1. Ethiopiekar odhikari bautizm gheunk kiteak fuddem sorlo?

“POLLE, hanga thoddem udok asa; hanvem Povitr-Snan gheunk kosli addkoll asa?” Ho prosn Ethiopiekar odhikarean kel’lo. Filip nanvachea eka Kristanvan taka Jezuch Mesias mhunn khatri korun dili. Povitr pustokachi hi somzonni, Ethiopiekaran kallzant thaun manun ghetli ani to bautizm gheunk fuddem sorlo.—Itihas 8:26-36.

2. Bautizm gheunchea vixim tumi bariksannen kiteak chintunk zai?

² Tumi hea pustokantle adle odheai xikleant zalear tumkam-i ghoddie disot, ‘Mhaka-i Povitr-Snan gheunk zai!’ Atam mhunnosor, tumkam Bible-achi zaiti somzonni mell’llea. Hi prithum sobit bag zaun, tacher tumkam sasnak jieunk mellttolem mhunn tumkam koll’llem. (Prokasovnni 21:3, 4) Melea uprant kitem ghoddtta ani meloleam pasot kitem bhorvonso asa, hem-ui tumi zannam zalim. (Upodexok 9:5; Juanv 5:28, 29) Toxench, Jehovachea Sakxeam sangata sobhechea mittingent vochon, tim Devak manvota tea dhorma pormonnem choltat mhunn tumkam khatri  zali. (Juanv 13:35) Ani sogleant gorjechem mhunnttlear, tumi Jehova Deva lagim tumchi ixttagot vaddoilea.

3. (a) Jezun aplea xisank kitem sanglem? (b) Bautizm koso ditat?

³ Tumkam Devachi bhokti korunk zai mhunn tumi koxim dakhoitolim? Jezun aplea xisank sanglem, “Vochun sogllea raxttrank Mhoje xis korat; . . . Tankam snan [bautizm] diat.” (Matev 28:19) Jezun udkant bautizm gheun, sogleam pasot ek borem udharonn dovorlem. Bautizma vellar, tacher udok ximpddaunk naslem, vo tachea matear il’lemxem udok rokounk naslem. (Matev 3:16) “Bautizm” hem utor, Grik bhaxentlean ailam. Tacho orth ‘buddovop’. Taka lagon, bautizm ghetat tannim udkant ak’khim buddon, voir sorchi goroz asa.

4. Bautizm ghetlolean kitem kolltta?

⁴ Jehova Deva lagim ixttagot kortolim zalear bautizm ghevop gorjechem. Bautizm gheun tumi Devachi seva korunk sodhtat mhunn dakhoun ditat. Toxench, Devak manvota tem-ui korunk tumkam khuxi asa mhunn  tumi dakhoitat. (Stotr 40:7, 8) Punn bautizm gheunchea poilim tumi thoddim pavlam gheunchi goroz asa.

5. (a) Bautizm ghetolim zalear sogleant poilim kitem korunk zai? (b) Jehovachea Sakxeanchea mittingek vochop kiteak gorjechem?

⁵ Sogleant poilim Jehova Devachi ani Jezu Kristachi vollokh gheunk zai. Hi vollokh gheunk tumi dor sumanak Bible xiktat. (Juanv 17:3 vachat.) Punn titlench puro nhoi. Tumkam, “Devache khuxechi poripurnn vollokh” asonk zai. (Koloskarank 1:9) Osli vollokh tumkam Jehovachea Sakxeanchea sobhent ailear mellttoli. Taka lagon, sobhent ievop gorjechem. (Hebrevank 10:24, 25) Dor sumanak, sobhechea soglea mittingenk hazir ravlear, tumkam Deva vixim anik chodd xikonk mellttolem.

6. Bautizm ghetolim zalear, tumkam Bible-achi kitli xikounn asop gorjechi?

⁶ Bautizm ghetolim zalear, tumkam Bible-ant asa tem soglem khobor asonk zai oxem na. Ethiopiekar odhikari Deva vixim thoddem zannam aslo, punn taka Bible-ant asloleo her vostu somzonk modot zai asli. (Itihas 8:30, 31) Toxench, Deva vixim tumi anik zaitem xikchim asat. Ani hem xikop kednanch bond zaunchem na. (Upodexok 3:11) Bautizm gheunchea adim, tumi Bible-antlim mullavim sotam xikon, tim manun gheunchi goroz asa. (Hebrevank 5:12) Melea uprant kitem zata, Devachem nanv kitem ani tachem Raj amkam koslim besanvam haddttolem, hea vixim Bible kitem xikoita tem tumi manun gheunk zai.

7. Bible-achi xikounn ghetlolean tumcher kitem porinnam zatolo?

⁷ Devachi vollokh ghetlich mhunn zaina, karonn “Bhavartha viret konnacheanuch Devak manonk zaina.”  (Hebrevank 11:6) Bible dakhoita, Korint xarant ravtolea lokank, Jezuchea xisamnim sondex porgottlo tednam, tea lokamnim “Bhavarth dhorlo ani Povitr-Snan ghetlem.” (Itihas 18:8) Zoxim tumi Bible-achi xikounn ghetolim, tumcho bhavarth vaddttolo. Bible, Devachea preronnan boroilolem pustok mhunn tumkam khatri zatoli. Toxench, Devachea bhasaunneancher ani Jezu Kristan kel’lea bolidanacher tumcho bhavarth ghott zatolo.—Joshua 23:14; Itihas 4:12; 2 Timotak 3:16, 17.

8. Tumi xikleant tem herank kiteak sangtolim?

⁸ Devacher bhavarth vaddtta toso, tumi xikleant teo vostu herank sangonastana ravonk tumchean zaunchem na. (Jeremias 20:9) Hea bhavarthak lagon, Dev konn ani to fuddem kitem korcho asa hachea vixim tumi urben herank sangtolim.—2 Korintkarank 4:13 vachat.

9, 10. (a) Survatek tumi Deva vixim konnak sangtolim? (b) Jehovachea Sakxeam borabor ghora-ghorant porgottunk tumkam khuxi asa zalear tumi kitem korunk zai?

⁹ Survatek, tumchean soireank, ixttank, xezareank ani tumchea borabor kam kortoleank Deva vixim sangonk zata. Oxem kortana, tumi konnakuch dukhounk favona. Fuddem tumkam, Jehovachea Sakxeam borabor ghora-ghorant porgottnnechea vavrant vantto gheunk khuxi zatoli. Hea vellar tumi apli khuxi, tumkam Bible xikoita taka kollounk zata. Tumi porgottnnechea kamank toiar zaleant kai na hem pollounk, sobheche don vhoddil tumchea lagim ani tumkam Bible xikoita tachea lagim, sangata boson uloitole.

¹⁰ Sobhechea vhoddilank melltta tednam, tankam anik bore toren vollkhonk tumkam sondhi mellttoli. He vhoddil, Devachea hinddachi gonvlliam vorim  rakhonn kortat. (Itihas 20:28; 1 Pedru 5:2, 3) Bible-achi xikounn tumi somzoleat ani ti tumi manun ghetat hi khatri te kortole. Toxench, tumi Bible-achea xikounne pormonnem choltat kai na, ani tumkam khorench Jehovacho Sakxi zaunk khuxi asa vo na, hachi te khatri korun ghetole. Ani tankam hi khatri zalea uprant, tumi bautizm gheunk naslole porgottnnar zaun porgottunk zata mhunn te tumkam kolloitole.

11. Porgottnnechea kamant bhag gheunk thoddeank kitem bodol korche poddttat?

¹¹ Porgottnnechea kamant bhag gheunk tumi tumchea jivitant bodol korcho poddttolo. Tumkam tumchi adli vagnnuk ani vaitt sonvoim-eo soddcheo poddttoleo. Tumchea vaitt sonvoim-ia vixim, dusreank ghoddie khobor na zait. Tumkam bautizm gheunk naslolo porgottnnar zaunk zai mhunn vhoddilank sangchea adim, tumi tumchem patki jivit soddun diunchi goroz asa. Pozoddponn, bebdikai, noxechim vokhdam uzar korop vo cigar voddop, osleo vaitt sonvoim-eo soddun divop gorjechem.—1 Korintkarank 6:9, 10; Galasiekarank 5:19-21 vachat.

12. Poschatap korop mhunnchem kitem?

¹² Bautizm gheunchea poilim patkak lagon poschatap korop gorjechem. Apostl Pedru mhunntta, ‘Jivit bodlun tumi portun ieiat; he porim tumchea patkanchem bhogsonnem tumkam melltolem.’ (Itihas 3:19) Poschatap korop mhunnche ami kel’lea patkank lagon kallzant thaun dukhi zavop. Ami patki jivit jieleant zalear poschatap korop mhotvachem. Punn ami patki jivit jieunk na zalearui, poschatap korop gorjechem. Karonn soglim munxam patki, ani tankam Deva thaun  bhogsonneachi goroz asa. (Romkarank 3:23; 5:12) Bible-achi xikounn gheunchea adim tumkam Devachi khuxi kitem ti khobor nasli ani tea pormonnem tumi jie naslim. Hea pasot, poschatap korop gorjechem.

13. Jivit bodlop mhunnchem kitem?

¹³ Poschatap kelea uprant tumi tumchem jivit bodlunk zai. Tumchea patkak lagon tumi dukhi zalinch mhunn zaina. Jivit bodlop mhunnche, tumchea adlea jivitachi chal soddun diun, ti porot kednanch apnnaunchimnant mhunn ghott tharav korop. Bautizm gheunchea poilim poschatap korun, jivit bodlop khorench gorjechem.

14. Bautizm gheunchea poilim tumi anik kitem korunk zai?

¹⁴ Bautizm gheunchea poilim tumi tumchem jivit Jehova Devak somorpit korunk zai. Jivit Devak somorpit korop mhunnchem kitem?

15, 16. Tumchem jivit Devak somorponn korop mhunnche kitem ani oxem kiteak korunk zai?

¹⁵ Somorponn korop mhunnche, tumi tumchem jivit sodankal fokot Jehovachi bhokti korunk uzar kortole mhunn magnneant utor divop. (Dusri Somurt 6:15) Oxem kiteak korunk zai? Chintat, ek munis ek ostorecho mog korta. Jitlo to tiche bore gunn polloita ti taka anik avddonk lagta. Ani fuddem, to tichea lagim kazar zata. Kazar mhunnche ek vhodd zobabdari, punn to ticho mog korta mhunn hi zobabdari gheunk fuddem sorta.

¹⁶ Teach bhaxen, tumi jednam Jehova Devak vollkhon tacho mog korunk lagtat, tumi tachi soglea kallzan bhokti korunk fuddem sortat. Jezun mhunnttlem, “Konnank Mhojea pattlean ieunchi khuxi asa zait, tannem apnnachech khuxechi vatt soddchi.” (Marku 8:34) Amchea khuxechi vatt soddop mhunnttlear  amcheo khuxeo ani anvdde kuxin dovrun, soglea ritin Devacheo adnea pallop. Bautizm gheunchea poilim, Jehova Devachi khuxi korop tumchea jivitacho mukhel ud’dhex asonk zai.—1 Pedru 4:2 vachat.

17. Thoddim zann somorponn korunk fatti kiteak ravtat?

¹⁷ Thoddim zannam somorponn korunk fatti ravtat, karonn oxem kelea uprant tim Deva mukhar zobabdar zatat mhunn tankam dista. Aplea lagim kitem-i chuk zait ani Deva mukhar apunn guneanvkari zait mhunn tim bhietat. Somorponn kelea uprant zal’li chuk, Devak dukhoitoli mhunn bhieun tim Devak somorponn korunk fatti sortat.

18. Tumchem jivit Jehovak somorponn korunk tumi kiteak fuddem sortolim?

¹⁸ Zoso Deva pasot tumcho mog vaddttolo, tumi tumchem jivit taka somorponn korunk ani tache khuxe pormonnem jieunk fuddem sortolim. (Upodexok 5:4) Somorponn kelea uprant, “Devak manonk” tumi tumchem “jivit odik ani odik sudharunk” vavurtolim. (1 Tesalonikekarank 4:1) Tumi Devacho mog kortat dekhun Devachi khuxi korop tumkam zhodd zaunchem na. Apostl Juanvan mhunnttlem, “Devacho mog korop mhonnge Tacheo adnia pallop. Ani Tacheo adnia zhodd nhoi.”—1 Juanv 5:3, 4.

19. Somorponn korunk tumi kiteak bhieunchi goroz na?

¹⁹ Somorponn kelea uprantui tumchea lagim chukeo zait, karonn soglim patki zaun asat. Punn tumi bhieunchi goroz na. Jehova tumchi oskotai zannam, ani to tumchea lagim ghoddona tem korunk sangona. (Stotr 103:14) Tumi kel’lem somorponn sodanch samball’llolem taka zai, ani tem korunk to tumkam  adar ditolo. (Izaias 41:10 vachat.) Tumchea soglea kallzan tumi, Jehovacher bhavarth dovortat zalear, to tumcheo “vatto nitt kortolo.”—Mhonn’nneo 3:5, 6.

20. Tumi Jehova Devak somorponn kelam mhunn dusreank koxem kollon ietolem?

²⁰ Atam ami xikleant tea vostuncher niall kelea uprant, tumi ghoddie Jehova Devak magnneant tumchem jivit somorpit korunk fuddem sortolim. Tumi somorponn kelam mhunn dusreank kollon ietolem, karonn Devacho mog kortat tim aplo bhavarth tonddan uchartat. Bible mhunntta, tuzo bhavarth tum zor  “tonddan ucharxi tuka taronn” mellttolem. (Romkarank 10:10, Povitr Pustok—Novo Korar) Tumi tumcho bhavarth tonddan koso ucharunk zata?

21, 22. Tumcho bhavarth tumi heram hujir tonddan koxim uchartolim?

²¹ Tumkam bautizm gheunk zai mhunn tumchean sobhechea vhoddilanchea sohokareak kollounk zata. Tumi Bible-achi mullavi xikounn manun ghetlea kai na, hem pollounk to, sobhentlea thoddea vhoddilank tumchea lagim ulounk manddavoll kortolo. Tumi bautizm gheunk khoreponnim toiar zaleant mhunn  hea vhoddilank khatri zali zalear, tumchean fuddlea zomatint vo odhivexonant bautizm gheunk zata mhunn te kolloitole. * Oslea zomatint vo odhivexonant, bautizmacho orth somzaunk ek bhaxonn asta. Hea bhaxonnachea xevottak, bhaxonn diupi bhav, bautizm ghetat tankam don sompea prosnanche zobab diunk sangta. Hea don prosnank zobab diun, tim aplo bhavarth ‘tonddan uchartat’.

²² Bautizm ghetlea uprant, tumi Devak somorponn kelam, ani atam tumi Jehovache Sakxi zaleat mhunn herank kolltta. Bautizm ghetoleak udkant ak’kho buddoun bhair kaddttat. Oxem kel’lean, tannem aplem jivit Jehovak somorpit kelam mhunn herank kolltta.

23. “Bapache ani Putache ani Povitr Atmeache Nanvim” bautizm ghevop mhunnttlear kitem?

²³ Jezun aple xis, “Bapache ani Putache ani Povitr Atmeache Nanvim” povitr snan vo bautizm ghetole mhunn sanglem. (Matev 28:19) Hea utram pormonnem, bautizm ghetoleamnim Jehova Devak ani Jezu Kristak aslolo odhikar manun gheunk zai. (Stotr 83:18; Matev 28:18) Toxench, tannim Dev aplo povitr atmo vo povitr xokti, koxi uzar korta tem zannam zavop gorjechem.—Galasiekarank 5:22, 23; 2 Pedru 1:21.

24, 25. (a) Bautizmacho orth kitem? (b) Amkam khoinchea prosnancho zobab zai?

²⁴ Bautizm mhunnche fokot udkant buddon voir sorop nhoi. Taka ek khas orth asa. Udkant buddop hem, tumi tumchea adlea jivitachi chal soddun dilea mhunn dakhoita. Udkantlean voir sorop mhunnttlear, tumkam  novem jivit mell’llea sarkem, jem jivit tumi Devachi khuxi korunk uzar korunk sodhtat. Ugddas dovrat, tumi tumchem somorponn Jehova Devak kortat, nhoi eka munxak vo kamak vo eka songottnnek. Somorponn ani bautizma udexim tumi Deva lagim ek khas ixttagot korunk survat kortat.—Stotr 25:14.

²⁵ Bautizm gheun tumi salvar zatolim mhunn khatri diunk zaina. Apostl Paulun mhunnttlem, “tumchi purnn suttka tumkam mellche khatir bhieun ani kampun proitn korit ravat.” (Filipkarank 2:12) Bautizm ghevop fokot ek survat. Ami sodanch Devachea mogant ravop mhotvachem. Punn, ami Devachea mogant thir koxe ravonk zata? Hea prosnacho zobab amkam fuddlea odheai-ant mellttolo.