1. ¿Jamüshi nuchuntaka nuwoutisaajünüin chi wayuu chejeʼewaikai Etiopía?

MÜSHI wanee wayuu chejeʼewai Etiopía: «Anuʼusa wane wüin, ¿eesü wane kasa nnojotka woutiiseein aaʼujee taya?». Nüküjüin Felipe nümüin süka tü Wiwüliakat  niain Jesuu chi Mesías aküjünakai achiki paala. Anasü maʼin nümüin chi chejeʼewaikai Etiopía tü nikirajaakalü anain, makalaka nuchuntüin nuwoutisaajünüin (Aluwataaushikana 8:26-36).

2. ¿Jamüsü keeʼireeinjatka paaʼin puwoutisaajünüin?

² Sükajee wainmaipain kasa pikirajaaka anain sünain karalouktakat tüü nutuma wanee aküjüi pütchi nüchiki Jeʼwaa, eesü süpüla müin pünüiki: «¿Eesü wanee kasa nnojotka woutiiseein aaʼujee taya?». Pütüjaaitpa aaʼu katüinjatüin soʼu wayuu waneepia suluʼu tü Paʼaraiisükat (Lucas 23:43; Alateetkat Mapeena 21:3, 4). Otta müsia pütüjaaitpa aaʼu tü alatakat namüin na ouktüshiikana otta süsoʼiraainjatüin naaʼin mapeena (Eclesiastés 9:5; Juan 5:28, 29). Eesü eirüle pükalia sünain outkajawaa namaa na aküjüliikana pütchi nüchiki Jeʼwaa otta pütüjaa aaʼu nayain suluʼuin tü iküleesia shiimainkat (Juan 13:35). Tü anakat maʼin shia paʼaleewainchipain Jeʼwaa.

3. (1) ¿Jamüsü nünüiki Jesuu namüin na nikirajüinkana? (2) ¿Jamüsü nawoutisaajia na anoujashiikana?

³ ¿Kasa paainjainjatka piʼyataweere nümüin Maleiwa? Müshi Jesuu namüin na nikirajüinkana: ‹Juʼuna sainküin tü mmakat süpüla jüküjüin tachiki sümüin wayuu. Jee juwoutisaajeena naya› (Mateo 28:19). Awoutisaajünüinjana waya maʼaka nuwoutisaajünüin Jesuu. Nnojotsü ashipirajünüin otta oʼyotünüin wüin saaʼu nikii (Mateo 3:16). Tü pütchikat awoutisaajaa shia tü pütchikat griego «emetinnaa shiroku wüin». Makalaka nawoutisaajünapa na anoujashiikana emetinnüshii shiroku wüin.

4. ¿Kasa weeʼiyataka wawoutisaajünapa?

⁴ Eeka aneein nakuwaʼipa nümaa Jeʼwaa, awoutisaajüinjana. Wawoutisaajünapa weeʼiyatüin suʼupala wayuu waʼyataweein nümüin Maleiwa otta talatüin waya sümaa waainjain tü keeʼireekat naaʼin (Hebreokana 10:9). Wawoutisaajüneere waainjainjatü waneeirua kasa.

5. (1) ¿Kasa paainjainjatka palajana süpüla puwoutisaajünüin? (2) ¿Jamüsü anaka maʼin puʼunüle sünain tü outkajawaakat?

⁵ Paainjüitpa tü palajatkat kasa. Pikirajaa anainchi Jeʼwaa otta Jesukürisüto sükajee tü Wiwüliakat (paashajeʼera Juan 17:3, TNM). Akatsaʼa, eesü süpüla pikirajaain sooʼomüin. Keeʼireesü naaʼin na anoujashiikana ‹kekiin maʼin naya nutuma Maleiwa süpüla natüjaain saaʼu tü nüchekakat napüleerua› (Colosas 1:9). Paainjeerü tia, puutkajaale namaa na aküjüliikana pütchi nüchiki Jeʼwaa. Makalaka anain maʼin nnojorüle makatüin pia suulia (Hebreokana 10:24, 25). Puʼunüle waneepia sünain tü outkajawaakat, piʼraajeechi maʼin Maleiwa.

6. ¿Pütüjaainjatü aaʼu süpüshuaʼa tü sümakat tü Wiwüliakat süpüla puwoutisaajünüin?

⁶ Nnojotsü pütüjaainjatüin aaʼu süpüshuaʼa tü sümakat tü Wiwüliakat süpüla puwoutisaajünüin. Soto paaʼin chi chejeʼewaikai Etiopía, mayaapejeʼe nütüjaain saaʼu süpüshi tü sümakat tü Wiwüliakat, choʼujaashi wanee wayuu ekirajaka nia süpüla nütüjain sooʼomüin (Aluwataaushikana 8:30, 31). Akaʼaya pia, isayülia pütüjain sooʼomüin. Pikirajaajeechi anain Maleiwa waneepia (Roma 11:33). Süpüla puwoutisaajünüin pütüjaainjatü aaʼu otta pücheküinjatü tü kasa mapüleekat suluʼujee tü Wiwüliakat (Hebreokana 5:12). Pütüjaainjatü aaʼu tü alatakat namüin na ouktüshiikana, jamüin kojutüka nünülia Maleiwa otta tü Nuluwataayakat.

7. ¿Kasa paainjainjatka pikirajaapa sünain tü Wiwüliakat?

⁷ Nnojotsü pütüjaainjatüin neʼe aaʼu tü sümakat tü Wiwüliakat sükajee ‹kamaneein Maleiwa namüin na anoujakana nünain sünain niain Maleiwain› (Hebreokana 11:6). Müsü tü Wiwüliakat nachiki na kepiakana Corinto: naapapa tü pütchi naküjakat na nikirajüinkana Jesuu, «anoujashii sünain woutiisaleʼeinya naya» (Aluwataaushikana  18:8). Müinjatia pukuwaʼipa. Pikirajaapa sünain tü Wiwüliakat, punoujainjatü anain nüshajiralain shia Maleiwa. Otta müsia punoujainjatü anain nikeraajeerüin Maleiwa tü nümakat otta kateerüin poʼu nutuma sükajee naapajiraain nikii Jesuu (Josué 23:14; Aluwataaushikana 4:12; 2 Timoteo 3:16, 17).

8. ¿Kaseerü püküjaka atuma tü pikirajaakalü anain?

⁸ Kooʼomüinre maʼin punoula, püküjeerü achiki tü pikirajaakalü anain (Aluwataaushikana 4:20). Pikirajeerü wayuu nüchiki Maleiwa otta süchiki tü naainjainjatkat (paashajeʼera 2 Corinto 4:13, TNM).

9, 10. (1) ¿Jaralii na püküjüinjanakana amüin pütchi palajana? (2) ¿Kasa paainjainjatka püküjeere pütchi namaa na aküjüliikana pütchi nüchiki Jeʼwaa?

⁹ Palajana, eesü süpüla püküjüin pütchi sümaa piyaawatüin pünüiki namüin püpüshi, paʼaleewainyuu, na kepiakana püʼütpaʼa otta na aʼyataakana pümaa. Mapa eesü süpüla püküjüin pütchi namaa na aküjüliikana pütchi nüchiki Jeʼwaa. Paainjeepa tia paashajaa nümaa chi ekirajakai pia. Niyaawatüle saaʼu kettaain pia süpüla püküjüin pütchi, outkajaajeena pümaa piamashii laülaashii otta chi ekirajakai pia.

¹⁰ Sükajee tia, piʼraajeena noʼutku na laülaashiikana suluʼu tü outkajaaleekat, na aaʼinmajakana na anoujashiikana (Aluwataaushikana 20:28; 1 Pedro 5:2, 3). Nayaawateerü aaʼu punoujale otta pütüjaale saaʼu tü kasa mapüleekat suluʼujee tü Wiwüliakat, paainjale shia otta shiimainre püküjüleein pütchi nüchiki Jeʼwaa. Müle shia, naküjeerü pümüin keraain pia süpüla püküjain tü pütchi anasükat suʼupala wayuu sümaa nnojoluin woutiisain pia.

11. ¿Kasa nooʼulaainjatka noʼutku na wayuukana süpüla naküjüin pütchi?

¹¹ Eeshii eeka neeʼiratajatüin nakuwaʼipa süpüla naküjüin  pütchi naashin na laülaashiikana. Maʼaka saaʼin nooʼulaain wanee kasa mojusü eeka naainjapuʼuin ojuunaa. Makalaka süpülapünaa püküjüin pütchi sümaa nnojoluin woutiisain pia, acheküsü nnojoluin paainjain kasa eeka mojuin maʼin maʼaka saaʼin amaʼüjirawaa akuwaʼipaa, epeʼruwaa, akamüjaa wasuuko otta kokaiina (paashajeʼera 1 Corinto 6:9, 10; Galacia 5:19-21).

12. ¿Jamüsü choʼujaaka wayaawajaain suulia waainjala?

¹² Süpüla puwoutisaajünüin eesü sooʼomüin tü paainjainjatkat. Müshi Pedro: ‹Jiyaawajaa jümata suulia jaainjala otta juuyantaa jümata nünainmüin chi Maleiwakai› (Aluwataaushikana 3:19). Shiimainre wayaawajaain suulia waainjala, mojusü maʼin wamüin tü waainjakat. Ayaawajaainjana suulia naainjala na yarüttakana otta na wulekana akuwaʼipa. ¿Jamüsü? Shia süka kaainjaraliin waya otta choʼujaasü motuin naaʼin Maleiwa shia (Roma 3:23; 5:12). Süpülapünaa pikirajaain sünain tü Wiwüliakat, nnojotsü pütüjaain saaʼu tü keeʼireekat naaʼin Maleiwa. Makalaka nnojoluin paainjain maʼin shia ¿aashimüin? Choʼujaasü wayaawajaain suulia waainjala.

13. ¿Kasa wayuu tü ouyantawaakat suulia aainjalaa?

¹³ Süchikijee piyaawajaain suulia paainjala puuyantaa suulia. Tia maluʼulu puuʼulaaitpa suulia tü kasa mojusü paainjapuʼukat, shiainjatü neʼe paainjaka tü kasa anasükat. Süpülapünaa wawoutisaajünüin ayaawajaainjana otta ouyantaainjana waya suulia waainjala.

14. ¿Kasa tü wanee paainjainjatkat süpüla puwoutisaajünüin?

¹⁴ Eesü wanee kasa paainjainjatka süpüla puwoutisaajünüin: Paapüinjatü paaʼin nümüin Jeʼwaa.

15, 16. ¿Jamaluʼulu tü aapaakat waaʼin nümüin Maleiwa? ¿Jamüsü waainjainjatka tia?

 ¹⁵ Wanaa sümaa waapüin waaʼin nümüin Maleiwa, aashajaashii waya nümaa otta waküjüin nümüin niainjachin neʼe wanoujain anain (Deuteronomio 6:15). Akatsaʼa, ¿jamüsü waainjaka tia? Weʼitaa wanee shiyaawase. Nümüle wanee wayuu sümüin wanee jierü: «Teʼraajeein maʼin pia». Naashajaale sümaa otta niʼrüle anain maʼin sukuwaʼipa, aneerü maʼin nümüin shia. Mapa eeshi süpüla nümüin sümüin: «Anashii kasaalüle waya». Süchikijee kasaalüin nia wainma tü kasa naainjainjatkat. Akatsaʼa, naainjeerü tia sükajee alin maʼin shia nüpüla.

¹⁶ Weʼraajapa otta aipa wapüla Jeʼwaa, aʼyataweeshii maʼin waya nümüin sümaa nnojoluin wachuntüin wanee kasa süpüla nnojoluin waʼwaajüin nia. Na oʼuneekana nüchiirua Jesukürisüto ‹nnojoluinjatü naaʼinrüin tü nachekakat› (Marcos 8:34). Waainjain tia woonoole sümaa nünüiki Maleiwa otta nnojoluin waaʼinrüin tü keeʼireekat waaʼin. Makalaka süpülapünaa puwoutisaajünüin, shiainjatü paainjaka waneepia tü keeʼireekat naaʼin Jeʼwaa (paashajeʼera 1 Pedro 4:2).

17. ¿Jamüshii eeka wayuu eeka nnojoluin naapeein naaʼin nümüin Jeʼwaa?

¹⁷ Eeshii wayuu eeka nnojoluin naapeein naaʼin nümüin Jeʼwaa sükajee mmoluin naya seema naainjain tia. Mmotshii naya seema asouktaa nümüin Maleiwa saaʼu tü kasa naainjakat. Eeshii süpüla naainjain kasa mojusü nümüin Jeʼwaa naashin, makalaka nnojoluin naapüin naaʼin nümüin.

18. ¿Kaseerü paapaka atuma paaʼin nümüin Jeʼwaa?

¹⁸ Aipa maʼin püpüla Jeʼwaa, paapeerü paaʼin nümüin otta paainjeerü tü nuchuntakat pümüin (Mateo 5:33). Süchikijee paapüin paaʼin nümüin Maleiwa, püchekeerü  ‹paaʼinrüin süpüshuaʼa tü nüchekakat püpüleerua süpüla talatüin naaʼin pümaa› (Colosas 1:10). Nnojoleerü kapüleein pümüin tia sükajee alin nia püpüla. Eesü paaʼinwale paaʼin sümaa tü nümakat chi aluwataaushikai Juan: «Waaʼinrüle tü nuluwataakat anain waya chi Maleiwakai, shiimüin alin nia wapüla. Je tü nuluwataakat anain waya, nnojotsü isain wachiki. Wounteerü waaʼinrüin süka nüchooin waya» (1 Juan 5:3).

19. ¿Jamüsü nnojoluinjatka mmoluin paaʼin sünain paapüin paaʼin nümüin Maleiwa?

¹⁹ Na aapakana naaʼin nümüin Maleiwa, nnojotsü choʼujaain anainjatüin maʼin nakuwaʼipa. Nütüjaa aaʼu Jeʼwaa tü isakat wachiki otta nnojotsü nuchuntüin shia waainjain (Salmo 103:14). Nieechi akaaliinjaka pia süka aneein  pukuwaʼipa nutuma (paashajeʼera Génesis 15:1). Piʼitaale süpüshuaʼa paaʼin nünain Jeʼwaa ‹aneerü pukuwaʼipa nutuma› (Proverbios 3:5, 6).

20. ¿Jamüsü piiʼiyatüinjatka paapüitpain paaʼin nümüin Jeʼwaa?

²⁰ Sutuma tü wekirajaaitpakat anain, eesü paashajaweere nümaa Jeʼwaa pümüiwaʼa süpüla paapüin paaʼin nümüin. Akanasaʼa na aikana maʼin apüla Jeʼwaa eesü wanee kasa naainjainjatka: ‹naküjüinjatü süchiki süpüla katüin noʼu waneepia› (Roma 10:10, TNM). ¿Jamüsü sukuwaʼipa tia?

21, 22. ¿Kasa paainjainjatka süpüla ‹piiʼiyatüin suʼupala wayuu› punoujain?

 ²¹ Puwoutisaajüneere, paashajaa nümaa chi akumajakai napüleerua na laülaashiikana tü aainjünajatkat. Nüneekeena waneeinnua laülaashii süpüla nasakirüin pia sünain tü kasa mapüleekat suluʼujee tü Wiwüliakat. Paainjale tü sümakat tü Wiwüliakat, eesü süpüla puwoutisaajünüin sünain tü outkajawaa miyoʼu eeinjateetkat. * Nawoutisaajünapa na wayuukana, aküjünüsü wanee pütchi namüin eere süküjünüin jamaluʼuluin tü awoutisaajaakat. Sajaʼlajaapa, asakinnüshii piantua otta asouktüshii naya shiʼipajee sümaa emetuluin nanüiki. Sükajee tia, ‹neeʼiyatüin suʼupala wayuu› nanoujain.

²² Puwoutisaajünapa piiʼiyatüin suʼupala wayuu paapüin paaʼin nümüin Maleiwa otta püküjülin pütchi nüchiki Jeʼwaa. Na awoutisaajünakana emetinnüshii shiroku wüin süpüla neeʼiyatüin suʼupala wayuu naapüin naaʼin nümüin Jeʼwaa.

23. ¿Jamaluʼulu tü awoutisaajaakat ‹saaʼu nünülia chi Nüshikai Jesuu, saaʼu nünülia Jesuu otta saaʼu nünülia chi naaʼinkai Maleiwa›?

²³ Naashin Jesuu awoutisaajünüinjana na nikirajüinkana ‹saaʼu nünülia chi Nüshikai, saaʼu nünülia niakai jee saaʼu nünülia chi naaʼinkai Maleiwa› (Mateo 28:19). Sükajee tia, anasü namüin laülaain Jeʼwaa otta Jesukürisüto saaʼu wayuu (Salmo 83:18; Mateo 28:18). Otta müsia, kojutüsü namüin tü naainjakat chi naaʼinkai Maleiwa (Galacia 5:22, 23; 2 Pedro 1:20, 21).

24, 25. (1) ¿Jamaluʼulu tü awoutisaajaakat? (2) ¿Kasa wekirajaainjatka anain suluʼu tü wanee ekirajaayakat?

²⁴ Tü awoutisaajaakat nnojotsü emetiraain neʼe shiroku wüin. Kojutüshaatasü maʼin shia. Pimetinnapa shiroku  tü wüinkat, puuʼulaaitpa tü pukuwaʼipapuʼukat. Pujuʼitapa shirokujee tü wüinkat shia paainjainjatka tü keeʼireekat naaʼin Maleiwa. Nnojotsü motuinjatüin paaʼin paapüin paaʼin nümüin Jeʼwaa, nnojotsü paapüin paaʼin sümüin wanee kasa jee sümüin wayuu. Wanaa sümaa paapüin paaʼin nümüin Jeʼwaa otta puwoutisaajünüin, paʼaleewainjeechi nia (Salmo 25:14).

²⁵ Nnojotsü katüin neʼe soʼu wayuu sutuma tü awoutisaajaakat. Müshi Pablo: ‹Ayata jaaʼinrüin süpüshuaʼa tü kasa nüchekakat Maleiwa süpüla juʼtteʼennüin› (Filipos 2:12). Tü awoutisaajaakat shia tü kasa aainjünajatkat palajana süpüla katüin woʼu. Wasakira waaʼin: ¿kasa waainjainjatka süpüla paaʼinwain waya nümaa Maleiwa otta süpüla alinjanain waya nüpüla? Wekirajaajeerü anain tia sünain tü wanee ekirajaayakat.