1. Dahaka dainai dagi bada Etiopia tauna ia ura bapatiso ia abia?

“OI ITAIA, ranu be inai. Dahaka ese egu bapatiso ia koua?” Unai henanadai be aposetolo edia negai ia noho dagi bada Etiopia tauna ese ia gwauraia. Keristani tauna Filipo ese ia dekenai ia hamomokania Iesu be gwauhamata Mesiana. Unai Etiopia tauna be Baibel amo ia dibaia gaudia ese iena  kudouna ia hamarerea bada dainai, maoromaoro kara ta ia karaia. Ia hahedinaraia ia ura bapatiso ia abia!​—Kara 8:​26-36.

2. Dahaka dainai bapatiso oi laloa bada be namo?

² Bema Iehova ena Witnes tauna ta ida inai buka ena karoa ginigunadia oi stadilaia namonamo vadaeni, reana do oi henanadai, ‘Dahaka ese egu bapatiso ia koua?’ Baibel ena gwauhamata, Paradaiso lalonai mauri hanaihanai do ita abia herevana be oi dibaia vadaeni. (Luka 23:43; Apokalupo 21:​3, 4) Mase taudia dekenai ia vara gauna bona toreisi lou helarona danu oi dibaia. (Hadibaia Tauna 9:5; Ioane 5:​28, 29) Reana Iehova ena Witnes taudia edia kongrigeisen heboudia dekenai oi lao noho bona idia ese tomadiho momokani idia badinaia dalana oi itaia. (Ioane 13:35) Gau badana be inai, oi ese Iehova Dirava oi tura henia matamaia vadaeni.

3. (a) Iesu ese ena murinai idia raka taudia dekenai dahaka hahegani ia henia? (b) Ranu bapatiso be edena bamona idia karaia?

³ Edena dala ai oi hahedinaraia diba oi ura Dirava oi hesiai henia? Iesu ese ena murinai idia raka taudia ia hamaoroa: “Do umui lao, bese ibounai be diba tahua taudia do umui halaoa, bona . . . do umui bapatiso henia idia dekenai.” (Mataio 28:19) Iesu be ranu lalonai bapatiso ia abia, unai kara dekenai haheitalai namona ia hahedinaraia. Ena kwarana dekenai ranu sisina idia haparia eiava idia bubua lasi. (Mataio 3:16) Inai hereva “bapatiso,” be Greek herevana ta amo idia abia bona ena anina be “lalonai hadihoa.” Unai dainai, Keristani bapatiso ena anina be tau ta ena tauanina ibounai be ranu lalonai idia hadihoa.

4. Ranu bapatiso ese dahaka ia hamomokania?

⁴ Namona be Iehova Dirava idia ura tura henia taudia ibounai ese ranu bapatiso idia abia. Bapatiso oi abia neganai, taunimanima vairanai oi hamomokania oi ura Dirava ena hesiai gaukara oi karaia. Unai ese ia hahedinaraia oi ura dikadika Iehova ena ura oi karaia. (Salamo 40:​7, 8) To, bapatiso oi do abia lasi neganai, gau haida oi karaia be namo.

5. (a) Bapatiso oi do abia lasi neganai, oi karaia kara ginigunana be dahaka? (b) Dahaka dainai Keristani heboudia be mai anina bada?

⁵ Kara ginigunana be oi karaia matamaia vadaeni. Unai be dahaka? Baibel stadilaia karana amo Iehova Dirava bona Iesu Keriso oi dibaia. (Ioane 17:3) To gau momo oi dibaia be namo. Keristani taudia idia ura Dirava ‘ena ura dalana idia dibaia.’ (Kolose 1:9) Unai dainai, Iehova ena Witnes taudia edia hebou lao henia karana ese oi do ia durua bada. Unai bamona heboudia oi lao henia be mai anina bada. (Heberu 10:​24, 25) Badina unai ese oi do ia durua Dirava dekenai emu diba oi habadaia totona.

6. Bapatiso oi abia totona, Baibel dekenai idia noho gaudia ibounai oi dibaia be namo, a?

⁶ Oibe, bapatiso oi abia totona, Baibel dekenai idia noho herevadia ibounai oi dibaia be anina lasi. Unai dagi bada Etiopia tauna be Baibel dekenai diba sisina ia abia vadaeni, to Baibel ena hereva haida ia lalopararalaia totona, heduru ia abia be namo. (Kara 8:​30, 31) Unai hegeregerena, gau momo oi dibaia be namo. Momokani, Dirava dibaia karana be do ia doko diba lasi. (Hadibaia Tauna 3:11) To, bapatiso oi do abia lasi neganai, Baibel ena hadibaia hereva badadia oi dibaia bona abia dae be namo. (Heberu 5:12) Unai hadibaia herevadia haida be, mase taudia dekenai ia vara gauna, Dirava ena ladana bona ena Basileia ena anina oi diba be namo.

7. Baibel stadilaia karana ese oi edena bamona do ia durua?

⁷ Diba sibona be hegeregere lasi, badina “tau ta bema Dirava ia abidadama henia lasi neganai, ia hegeregere lasi Dirava ena ura do ia badinaia.” (Heberu 11:6) Baibel ia gwau idaunega Korinto hanuana ai, taunimanima haida be Keristani taudia ese idia gwauraia sivaraina idia kamonai neganai, “idia abia dae danu, bona bapatiso idia abia.” (Kara 18:8) Unai hegeregerena, Baibel oi stadilaia neganai, namona be oi abia dae Baibel be Dirava ena Hereva. Baibel stadilaia karana ese oi do ia durua Dirava ena gwauhamata  bona Iesu ena boubou gauna ena hamauria siahuna oi abidadama henia totona.​—Iosua 23:14; Kara 4:12; 2 Timoteo 3:​16, 17.

8. Dahaka ese oi do ia veria oi dibaia gaudia be ma haida dekenai oi gwauraia totona?

⁸ Emu abidadama ia goada ia lao noho lalonai, do oi ura bada ma haida dekenai oi dibaia gaudia oi gwauraia. (Ieremia 20:9) Bona unai ura ese oi do ia veria haida dekenai Dirava bona ena ura oi gwauraia totona.​—2 Korinto 4:13.

9, 10. (a) Baibel ena hereva momokani be daidia dekenai oi gwauraia diba? (b) Bema oi ura Iehova ena Witnes taudia ida oi haroro, dahaka oi karaia guna be namo?

⁹ Reana dala namona ai Baibel ena hereva momokani be emu varavara, turadia, dekena taudia bona gaukara turadia dekenai oi gwauraia diba. Gabeai, do oi ura Iehova ena Witnes taudia ida haroro gaukara oi karaia. Unai neganai, oi ida Baibel ia stadilaia Witnes tauna danu unai umui herevalaia. Bema oi hegeregere kongrigeisen taudia ida oi haroro, oi bona emu hadibaia tauna be kongrigeisen ena elda rua ida do umui hebou.

¹⁰ Unai ese oi do ia durua Dirava ena mamoe idia naria Keristani elda taudia oi diba namonamo totona. (Kara 20:28; 1 Petero 5:​2, 3) Bema unai elda taudia idia itaia oi ese Baibel ena hadibaia hereva badadia oi lalopararalaia bona oi abia dae, Dirava ena hakaua herevadia hegeregerena oi noho, bona oi ura momokani Iehova ena Witnes tauna ta ai oi lao, oi dekenai gwaumaoro do idia henia bapatiso lasi pablisa bamona sivarai namona oi harorolaia totona.

11. Ma haida be kongrigeisen ida idia do haroro matamaia lasi neganai, dahaka idia karaia guna be namo?

¹¹ To, kongrigeisen ida haroro gaukara oi do matamaia lasi neganai, namona be emu noho dalana bona emu kara haida oi haidaua. Reana ma haida amo oi hunia kara haida oi  rakatania be namo. Unai dainai bapatiso lasi pablisa ai oi do lao lasi neganai, namona be kara dika badadia hegeregere, matabodaga karadia, inuinu kekero karana, bona drag ania karana oi rakatania.​—1 Korinto 6:​9, 10; Galatia 5:​19-21.

12. Dahaka dainai oi helalo-kerehai be namo?

¹² Bapatiso oi do abia lasi neganai, gau ma haida oi karaia danu be namo. Aposetolo Petero ia gwau: “Umui emui lalona umui giroa, bona Dirava ese emui kara dika do ia kokia.” (Kara 3:19) Lalona giroa eiava helalo-kerehai ena anina be oi karaia kara dainai oi sori bada. Ta ia helalo-kerehai be namo bema matabodaga karadia ia karaia, to kara dika ta ia karaia lasi tauna ia helalo-kerehai danu be namo. Dahaka dainai? Badina taunimanima ibounai be mai edia kara dika bona Dirava ese edia dika ia gwauatao be namo. (Roma 3:23; 5:12) Baibel oi do stadilaia lasi neganai, Dirava ena ura be oi diba lasi. Unai dainai emu mauri ai ena ura oi badinaia momokani lasi, ani? Unai dainai, oi helalo-kerehai be namo.

13. Emu kara oi haidaua ena anina be dahaka?

¹³ Oi helalo-kerehai murinai, emu kara oi haidaua. Oi karaia kara dika dainai oi sori sibona be hegeregere lasi. Namona be guna oi karaia kara dikadia oi dadaraia momokani bona emu lalona oi hadaia hari kara namodia sibona do oi karaia. Bapatiso oi do abia lasi neganai, namona be oi helalo-kerehai bona emu kara oi haidaua guna.

14. Oi do bapatiso lasi neganai, dahaka mai anina bada kara ma ta oi karaia be namo?

¹⁴ Oi do bapatiso lasi neganai, mai anina bada kara ma ta oi karaia be namo. Namona be Iehova Dirava dekenai emu mauri oi gwauhamatalaia.

15, 16. Dirava dekenai emu mauri oi gwauhamatalaia ena anina be dahaka, bona dahaka ese ta ia veria unai ia karaia totona?

¹⁵ Guriguri amo Iehova Dirava dekenai emu mauri oi  gwauhamatalaia neganai, oi gwauhamata ia sibona do oi tomadiho henia ela bona hanaihanai. (Deuteronomi 6:15) Dahaka dainai ta be unai bamona ia karaia? Mani inai ita laloa, bema mero ta ese kekeni ta ia tura henia matamaia. Ia ese kekeni ia dibaia bona ena kara namodia ia itaia neganai, iena ura kekeni dekenai do ia bada. Gabeai, mero ese kekeni ia nanadaia diba ia ia adavaia totona. Momokani, ia headava neganai, maduna ma haida do ia huaia. To, kekeni ia lalokau henia dainai unai bamona ia karaia.

¹⁶ Iehova oi dibaia bona ia oi lalokau henia neganai, emu lalona ese oi do ia veria mai emu kudouna ibounai ida ia oi hesiai henia totona. Dirava ena Natuna, Iesu Keriso, murinai ia ura raka tauna ese “sibona . . . ena namo do ia laloa lasi.” (Mareko 8:34) Unai ita karaia diba bema sibona eda ura gaudia bona iseda tahua gaudia ese iseda Dirava kamonai henia karana idia koua lasi. Bapatiso oi do abia lasi neganai, gau badana be Iehova Dirava ena ura oi karaia.​—1 Petero 4:2.

17. Dahaka dainai haida ese Dirava dekenai edia mauri idia gwauhamatalaia lasi?

¹⁷ Haida ese edia mauri be Dirava dekenai idia gwauhamatalaia haraga lasi, badina idia gari. Reana idia gari badina idia laloa bema Keristani taudia ai idia lao, Dirava vairanai edia kara ena badina do idia gwauraia. Idia gari dika gau haida idia karaia kerere bena Iehova do idia habadua, unai dainai idia laloa Dirava dekenai edia mauri idia gwauhamatalaia lasi be namo.

18. Dahaka ese oi do ia veria Iehova dekenai emu mauri oi gwauhamatalaia totona?

¹⁸ Iehova lalokau henia karana oi dibaia neganai, unai ese emu lalona do ia veria ia dekenai emu mauri oi gwauhamatalaia bona unai gwauhamata oi badinaia totona. (Hadibaia Tauna 5:4) Emu mauri oi gwauhamatalaia murinai, do oi ura ‘Lohiabada ena ura hegeregerena do oi noho, bona nega  ibounai oi ese ia do oi hamoalea.’ (Kolose 1:10) Dirava oi lalokau henia dainai, do ia auka lasi ena ura oi karaia totona. Aposetolo Ioane ida do oi lalotamona, ia gwau: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.”​—1 Ioane 5:3.

19. Dahaka dainai Dirava dekenai emu mauri oi gwauhamatalaia totona oi gari lasi be namo?

¹⁹ Herevana oi be goevadae lasi, to Dirava dekenai emu mauri oi gwauhamatalaia diba. Iehova ia diba oiemu goada be mai ena hetoana bona oi amo gau momo ia noia lasi, to oi henia diba gaudia sibona ia abia dae. (Salamo 103:14) Ia ura do oi kwalimu bona ia ese oi do ia durua. (Isaia 41:10) Namona be oi diba momokani, bema mai emu kudouna  ibounai ida Iehova oi abidadama henia, ia ese “dala maorona, be oi dekenai do ia hadibaia.”​—Aonega Herevadia 3:​5, 6.

20. Dahaka dainai Iehova dekenai oi karaia gwauhamatana oi gwauraia hedinarai be namo?

²⁰ Inai karoa dekenai ita herevalaia gaudia oi laloa namonamo neganai, unai ese oi do ia durua guriguri amo Iehova dekenai emu mauri oi gwauhamatalaia totona. Namona be Dirava idia lalokau henia taudia ibounai ese edia abidadama  idia gwauraia hedinarai, unai amo mauri do idia abia. (Roma 10:10) Unai be edena bamona oi karaia diba?

21, 22. Edena dala ai emu abidadama oi gwauraia hedinarai diba?

²¹ Emu kongrigeisen ena hakaua naria tauna oi hadibaia oi ura bapatiso oi abia. Bena elda haida do ia noia oi ida Baibel ena hereva badadia idia riviulaia totona. Bema unai elda taudia idia laloa oi hegeregere, oi do idia hadibaia bapatiso oi abia diba. * Bapatiso oi abia negana ai, hereva ia henia tadikaka ta ese bapatiso ena anina do ia herevalaia. Bena, bapatiso idia abia gwauraia taudia do ia hamaoroa henanadai rua idia haerelaia totona, unai dala amo edia abidadama idia gwauraia hedinarai diba.

²² Bapatiso ese ia hahedinaraia oiemu mauri be Dirava dekenai oi gwauhamatalaia vadaeni bona hari oi be Iehova ena Witnes tauna ta. Bapatiso idia abia gwauraia taudia be ranu lalonai idia hadihoa, unai amo taunimanima vairanai idia hahedinaraia, Iehova dekenai edia mauri idia gwauhamatalaia.

23. “Tamana, Natuna, bona Lauma Helaga ena ladanai” bapatiso oi abia ena anina be dahaka?

²³ Iesu ia gwau ena hahediba taudia be “Tamana, Natuna, bona Lauma Helaga ena ladanai” bapatiso do idia abia. (Mataio 28:19) Unai ena anina be bapatiso ia abia gwauraia tauna ese Iehova Dirava bona Iesu Keriso edia dagi ia lalopararalaia. (Salamo 83:18; Mataio 28:18) Bona Dirava ena lauma helaga, eiava gaukara siahuna, ena gaukara ia diba.​—Galatia 5:​22, 23; 2 Petero 1:21.

24, 25. (a) Bapatiso ese dahaka ia hahedinaraia? (b) Edena henanadai ena haere ita abia be namo?

²⁴ To, bapatiso be ranu lalonai diho karana ta sibona lasi. Bapatiso ese mai anina bada gauna ta ia hahedinaraia. Ranu  lalonai oi diho karana ese ia hahedinaraia oi ese emu kara gunadia oi masetania vadaeni. Ranu amo oi daekau karana ese ia hahedinaraia oi mauri lou Dirava ena ura oi karaia totona. Laloatao, oi be Iehova Dirava sibona dekenai emu mauri oi gwauhamatalaia, to gaukara ta, tau ta eiava orea ta dekenai lasi. Emu mauri oi gwauhamatalaia bona bapatiso oi abia neganai, emu hetura karana namona Iehova ida oi matamaia unai.​—Salamo 25:​14, BHğ.

²⁵ Bapatiso ese ia hahedinaraia lasi mauri do oi abia. Aposetolo Paulo ia gwau: “Mai gari bona mai heudeheude danu emui hamauria do umui tahua noho.” (Filipi 2:12) Bapatiso be Dirava hesiai henia karana ena matamana sibona. Sibona ita nanadaia, Edena bamona Dirava ena lalokau dekenai lau noho diba? Karoa ginigabena ese unai henanadai do ia haerelaia.