1. Ongwaye omuhona ombondo waEtiopie tja ningira okupapitisiwa?

“TARA, omeva owo nga, notjikeṋa tji matji ndji tjaere okupapitisiwa?” Epuriro ndo ra purwa i omuhona ombondo waEtiopie meserewondo etenga. Omukriste wena Filipus we mu  honga kutja Jesus ongwa ri Messias omukwizikwa. Omurumendu Omuetiopie tja za nokuṱunwa i imbi mbye rihonga okuza mOmatjangwa, eye wa toorera ko omikambo. Eye wa tja ma vanga okupapitisiwa!—Oviungura 8:26-36.

2. Ongwaye tji mo sokuripurira tjinene kombapitisimo?

² Indu tji wa konḓonona omakondwa nga kapita membo ndi nawa pamwe na umwe wOvahongonone vaJehova, mape ya o rirongerere okupura kutja: ‘Otjikeṋa tji matji ndji tjaere okupapitisiwa?’ Ove nai we rihonga ohunga nomakwizikiro womuinyo waaruhe mOparadisa nge tamunwa mOmbeibela. (Lukas 23:43; Omavandururiro 21:3, 4) Ove wina we rihonga ohunga nokutja ovaṱi tjiri ve ri mongaro iṋe na wina ohunga nombendukiro yovakoke. (Omuzuvarise 9:5; Johanes 5:28, 29) Ngahino ove u yenda pu nOvahongonone vaJehova kozombongarero zawo zombongo nu mape ya we rimunina omuini kutja ve ungurisa vi ongamburiro youatjiri. (Johanes 13:35) Nu kombanda yaavihe, ove ngahino wa uta okutunga oupanga na Jehova Mukuru.

3. (a) Jesus wa yandja erakiza riṋe kovahongewa ve? (b) Ombapitisimo yomomeva i tjitwa vi?

³ Ove mo raisa vi kutja mo vanga okukarera Mukuru? Jesus wa raera kovahongewa ve kutja: ‘Otji mwa sokuyenda koviwaṋa avihe ngamwa akuhe mu kaise po ovandu ovahongewa vandje amamu ve papitisa.’ (Mateus 28:19) Jesus omuini wa yandja otjihorera indu tja papitisiwa momeva. Eye kena pa tjatjwa nomeva uriri poo okutirirwa omeva kotjiuru. (Mateus 3:16) Embo ndi “okupapitisa” ra za kembo rOtjingrike ndi heya “okupundisiwa.” Ombapitisimo yOvakriste i heya kutja omundu ma sokupundisiwa auhe momeva.

4. Okupapitisiwa momeva ku raisa tjike?

⁴ Okupapitisiwa momeva otjiṋa tji tji undjirwa ko kovandu avehe mbe vanga okutunga oupanga na Jehova Mukuru. Oyo i raisa kovandu avehe kutja ove u nonḓero yokukarera Mukuru. Nu i raisa kutja ove u nonyuṋe okutjita ombango yaJehova. (Epsalme 40:7, 8) Kokutja u yenene okupapitisiwa, pe nomikambo vyorive mbi mo sokutoora.

5. (a) Omukambo uṋe omutenga ove mbu mo sokutoora kokutja u yenene okupapitisiwa? (b) Omena ratjike tje ri otjiṋa otjinanḓengu okukara pozombongarero zOukriste zombongo?

⁵ Ove wa uta rukuru okutoora omukambo omutenga. Omomuano uṋe? Omokurihonga ohunga na Jehova Mukuru na Jesus Kristus, okupitira momakonḓononeno wOmbeibela. (Johanes 17:3) Nungwari ngundee pe novingi okurihonga. Ovakriste mave ‘sokuurisiwa nondjiviro yombango yaMukuru.’ (Ovakolose 1:9) Tji wa kara pozombongarero zombongo zOvahongonone vaJehova matji ku vatere okumuna ondjiviro yokomurungu. Otjo otjiṋa otjinanḓengu okukara pozombongarero otja inḓo. (Ovaheberi 10:24, 25) Tji wa kara pozombongarero otja inḓo aruhe, matji ku vatere okukurisa ondjiviro yoye yaMukuru.

6. Ondjiviro ndji ṱa pi omundu ndje hepa kokutja a yenene okupapitisiwa?

⁶ Ove ko nakuhepa okutjiwa oviṋa avihe mOmbeibela kutja u yenene okupapitisiwa. Omuhona ombondo waEtiopie wa ri ama tjiwa oviṋa tjiva uriri, nungwari aa hepa ombatero okuzuva otupa tjiva twOmatjangwa. (Oviungura 8:30, 31) Momuano tjingewo, ove ngundee u novingi okurihonga. Mouatjiri, ove komoo mana okurihonga ohunga na Mukuru. (Omuzuvarise 3:11) Nungwari komurungu wokupapitisiwa, ove mo sokutjiwa omahongero omananḓengu wOmbeibela nokuyeyakura. (Ovaheberi 5:12) Omahongero ngo maye kamburire mo ouatjiri ohunga nokutja ovaṱi ve ri mongaro iṋe nu wina mo sokutjiwa nokuyakura ena raMukuru nOuhona we.

7. Omakonḓononeno wOmbeibela ya sokukuṱuna momuano uṋe?

⁷ Ondjiviro aiyerike kai ya yenena, orondu “kape nomundu ngu tjata ku Ndjambi e hi nongamburiro.” (Ovaheberi 11:6) Ombeibela i tu raera ohunga novandu tjiva votjihuro otjikuru tjaKorinte mba zuvire ombuze ndjaai zuvarisiwa i ovahongewa vaJesus, nowo va ‘kambura, narire tji va papitisiwa.’ (Oviungura 18:8) Momuano tjingewo omakonḓononeno woye wOmbeibela maye sokukurisa ongamburiro yoye mOmbeibela kutja oro Embo nda yandjwa i Mukuru. Omakonḓononeno  wOmbeibela maye sokukuvatera kutja u kare nongamburiro momakwizikiro waMukuru nokutja ombunguhiro yaKristus i nomasa okutuyama.—Josua 23:14; Oviungura 4:12; 2 Timoteus 3:16, 17.

8. Otjikeṋa tji matji ku hingi okuraera varwe imbi mbi we rihonga?

⁸ Otja ongamburiro yoye tji mai kuru, ma rire ouzeu kove okuṱizira oviṋa mbi we rihonga kove omuini. (Jeremia 20:9) Oyo mai ku hingi okuhungira na varwe ohunga na Mukuru nozondando ze.—2 Ovakorinte 4:13.

9, 10. (a) Ovandu veṋe mbu mape ya o utu okuraera ko ouatjiri mbu ri mOmbeibela? (b) Ove mo sokutjita vi indu tji u nonḓero yokuzuvarisa pu nOvahongonone vaJehova motjiungura tjawo tjokuzuvarisa?

⁹ Ove mo yenene okuuta okuraera ouatjiri mbu ri mOmbeibela ku varwe. Raera kovazamumwe voye, na komapanga na ku imba mba tura popezu na ove na wina ku imba mbu mu ungura pamwe, nu ihi tji ungura noupore. Otja oruveze tji maru kayenda ove mo yenene okuzuvarisa pu nOvahongonone vaJehova motjiungura tjawo tjokuzuvarisa. Tji wa hara onḓero ndjo, raera Omuhongonone waJehova ngu ku honga Ombeibela. Indu tji mape munika aayo ove mo yenene okuuta otjiungura tjokuzuvarisa, okutja mo ṱuninwa oruveze kutja ove na ingwi ngu mu rihonga pamwe mu hakaene novanene vevari vombongo.

¹⁰ Ihi matji tjiti kutja u tjiwe tjiva vovanene vombongo Ovakriste, mbe ri ovarise vorupanda rwaMukuru. (Oviungura 20:28; 1 Petrus 5:2, 3) Ovanene vombongo mba tji va munu kutja ove u nondjiviro nu u kambura mu imbi Ombeibela mbi i honga, nu u hupa mombwaneno nomatwako waMukuru, nu tjiri u nonḓero yokurira umwe wOvahongonone vaJehova, owo mave ku tjivisa kutja mo yenene okuuta otjiungura tjokuzuvarisa otjomuzuvarise wombuze ombwa ngu hi ya papitisiwa.

11. Ozongaro zeṋe zehupo ovandu tjiva nḓu mave sokurundurura komurungu wokuuta okuzuvarisa pu nombongo?

¹¹ Otjiṋa tjarwe wina, ove mo hepa okurundurura ozongaro  zoye tjiva zehupo novikaro kutja u yenene okuungura otjiungura hi. Ihi matji hee kutja mo sokuisa ovitjitwa tjiva ngahino mbyoo tjiti monyondwi. Okutja ove ngunda au hiya ningira okurira omuzuvarise ngu hiya papitisiwa, ove rutenga mo sokupoka kourunde ounene tjimuna oruvakiro, okuṱomeva wamururu, nokuungurisa ovipurukise.—1 Ovakorinte 6:9, 10; Ovagalate 5:19-21.

12. Omena ratjike ove tji mo sokuritanaura?

¹² Pe nomikambo vyarwe mbi mo sokutoora kokutja u yenene okupapitisiwa. Omuapostele Petrus wa tjere: “Ngamu tji ritanaura omitima, nu mu vingurukire ku Ndjambi, kokutja Eye e mu isire omauvi weṋu.” (Oviungura 3:19) Okuritanaura ku heya okuhihamwa omutima tjiri mena rotjiṋa tji wa tjita. Ondanaukiro otjiṋa tji tji undjirwako indu omundu tjaa hupu mongaro ohakohoke, nungwari wina otjiṋa otjinahepero nandarire kutja omundu oo hupu mongaro youkohoke. Omena ratjike? Orondu ovandu avehe ovanauvi nu ve hepa okuisirwa omauvi wawo i Mukuru. (Ovaroma 3:23; 5:12) Ngunda au hiya uta okurihonga Ombeibela, ove koo tjiwa ombango yaMukuru. Nu koo yenene okuhupa otja kombango ye, orondu kawa ri nondjiviro ndja yenene. Mena ranao, ove mo hepa okuritanaura.

13. Okuvingurukira ku Mukuru ku heya tjike?

¹³ Tji wa zu nokuritanaura, mo sokuvingurukira ku Jehova poo okurundurura ongaro yehupo roye. Pendje nokuhihamwa omutima uriri, ove wina mo sokunakaura ongaro yoye onguru yehupo nu okuza ku nai o rimanene okutjita ihi tji tji ri otjiwa. Ondanaukiro nomerivingurukiro omikambo mbi mo sokutoora ngunda au hi ya papitisiwa.

14. Omukambo uṋe omunanḓengu mbu mo sokutoora komurungu wo kupapitisiwa?

¹⁴ Pe nomukambo warwe omunanḓengu mbu mo sokutoora  komurungu wokupapitisiwa. Ove mo sokuriyandja omuini ku Jehova Mukuru.

15, 16. Okuriyandja omuini ku Mukuru ku heya tjike, nu otjikeṋa tji tji hinga omundu okutjita nao?

¹⁵ Indu ove tji we riyandja ku Jehova Mukuru mongumbiro, okutja mo mu kwizikire okurikotamena ku ye erike. (Deuteronomium 6:15) Nu hapo ongwaye omundu tja tja zera okurira omukarere waMukuru? Ngatu tje omurumendu ma vanga okukupa omukazendu. Otja pu me rihongo ovingi ohunga naye notja tji ma munu ovikaṋena vye oviwa, opunga ma nanukirwa i omukazendu ngo. Nu otja oruveze tji maru kayenda, mape ya e mu ningire okumukupa. Otjingaperi kutja okukupa ku etera ko omerizirira. Nungwari orusuvero maru mu hingi kutja a toore omukambo omunanḓengu mbo.

¹⁶ Indu tji wa tjiwa Jehova nu o mu suvere, ihi matji tjiti kutja u mu karere nomutima woye auhe. Auhe ngu ma vanga okukongorera Omuna waMukuru, Jesus Kristus, ma ‘sokurizemba omuini.’ (Markus 8:34) Ihi matji hee kutja katu sokurivara oveni. Okutja ozonḓero zetu aze tu tjaere okukarera Mukuru nomutima auhe. Okutja ngunda au hiya papitisiwa, okutjita ombango yaJehova Mukuru tjinenenene ondji mai sokurira ondando yoye.—1 Petrus 4:2.

17. Ongwaye ovandu tjiva tji ve tira okuriyandja oveni ku Mukuru?

¹⁷ Ovandu ovengi ve keyakeya okuriyandja ku Jehova orondu owo ve tira kutja owo omukambo omunene navi okutoora. Owo mape ya ve tira okutjinda omerizirira komurungu waMukuru indu tji va rire Ovakriste mba papitisiwa. Nu ve tira kutja mape ya ave katuka nave hihamisa Jehova omutima, okutja ve muna kutja okokuwa okuhinakuriyandja ku ye.

18. Otjikwaye tji mape ya atji ku hingi kutja u riyandje ku Jehova?

¹⁸ Otja orusuvero rwoye ku Jehova tji maru kuru, otji mo hara onḓero yokuriyandja ku ye nokukondja pu wa yandera okuyenenisa omakwizikiro ngo. (Omuzuvarise 5:4) Tji wa zu  nokuriyandja ku Jehova, tjiri otji mo kara nonḓero ‘yokuhupa otja kombango yaNdjambi, naruhe mo tjiti imbi mbi tjata ku ye.’ (Ovakolose 1:10) Tji wa suvera Mukuru, ove komoo munu kutja otjo otjiṋa otjizeu okutjita ombango ye. Nokuhinomakeyakeyero, ove mo itavere komambo womuapostele Johanes ngwa tjanga kutja: “Norusuvero rwetu ku Ndjambi eendu tji matu ṱakamisa omatwako we. Nomatwako we kamazeu okuyeṱakamisa.”—1 Johanes 5:3.

19. Ongwaye tji u ha sokutira okuriyandja omuini ku Mukuru?

¹⁹ Ove ko nakuhepa okurira ohomonena kokutja u riyandje ku Mukuru. Jehova u tjiwa oungundipare wetu nu ka undjire ko kutja tu tjite oviṋa mbi tu hi nakuyenena okutjita. (Epsalme 103:14)  Eye u vanga kutja u toṋe nu me ku vatere kutja u yenenise ombango ye. (Jesaja 41:10) Kara nongamburiro kutja indu tji wa ṱakama mu Jehova nomutima woye auhe, eye me “ku sembamisire ondjira yoye.”—Omiano 3:5, 6.

20. Omena ratjike omeriyandjero ku Jehova tji ye ha sokurira otjiṋa otjiundikwa?

²⁰ Tji we ripurire koviṋa mbi twa zu nokuhungirira ko, matji  ku vatere kutja u riyandje omuini ku Jehova mongumbiro. Kangamwa auhe ngwa suvera Mukuru tjiri, eye wina ma ‘sokuhongonona notjinyo’ tje. (Ovaroma 10:10) Ihi mo tji tjiti vi?

21, 22. Ove mo yenene vi ‘okuhongonona’ ongamburiro yoye?

²¹ Twende komukuramene po worutu rovanene vombongo u kemuraere kutja mo vanga okupapitisiwa. Eye ma zuvasana novanene tjiva vombongo kutja ve yekutara puna ove omapuriro tjiva ngu maye tjama nomahongero tjiva omananḓengu wOmbeibela. Ovanene mba tji mave itavere kutja mo yenene okupapitisiwa, owo mave ku raere kutja u papitisiwe moruveze ndu maru ya. * Potuveze tjimuna two, pe yandjwa ehungi ndi kahurura kutja ombapitisimo i heya tjike. Okuzambo omuyandje wehungi u ṋanga avehe mbu mave papitisiwa, okuzira omapuriro yevari omapupu otjomuano wokuhongonona ongamburiro yawo notjinyo.

²² Ombapitisimo ondji ku tjiukisa ku varwe kutja we riyandja omuini ku Mukuru nokutja nai oove umwe wOvahongonone vaJehova. Imba mbu mave papitisiwa ve pundisiwa orutu aruhe momeva okuraisa ku avehe kutja owo ve riyandja ku Jehova.

23. Okupapitisiwa “mena raTate nOmuna nOmbepo Ondjapuke,” ku heya tjike?

²³ Jesus wa tja ovahongewa ve mave papitisiwa “mena raTate nOmuna nOmbepo Ondjapuke.” (Mateus 28:19) Ihi matji hee kutja ingwi ngu ma papitisiwa ma yakura ouhonapare waJehova Mukuru na imbwi owaJesus Kristus. (Epsalme 83:19 [EEP]; Mateus 28:18) Nu wina matji hee kutja eye ma yakura omaunguriro wombepo ondjapuke, oyo ndji ri omasa waMukuru omaungure.—Ovagalate 5:22, 23; 2 Petrus 1:21.

24, 25. (a) Ombapitisimo i kuramena po tjike? (b) Epuriro riṋe ndi mari sokuzirwa?

²⁴ Posi yokutja, ombapitisimo ka kupundisiwa momeva uriri,  nungwari i kuramena po otjiṋa otjinanḓengu tjinene. Okupunda kehi yomeva ku heya kutja ove wa koza ongaro yoye onguru yehupo. Nu okuyeruruka okupita momeva ku heya kutja ove nai wa hara omuinyo omupe okutjita ombango yaMukuru. Zemburuka wina kutja ove we riyandja ku Jehova Mukuru omuini, nu ka kotjiungura kaaṋi, ka komundu kangamwa, poo kotjira tjorive. Omeriyandjero woye ku Mukuru nombapitisimo, ovyo ombutiro youpanga wopepuzu nu oukoto tjinene na Mukuru.—Epsalme 25:14.

²⁵ Ombapitisimo kai hee kutja omundu opuwo wa yamwa. Omuapostele Paulus wa tjanga nai: “Kareye pokuungurira ondjamo yeṋu amu nondjozikiro nondira ku Ndjambi.” (Ovafilipi 2:12) Ombapitisimo oyo omautiro uriri. Epuriro nambano orondi: Eṱe matu yenene vi okukara morusuvero rwaMukuru? Ekondwa retu esenina mari tu pe eziriro ndo.