1. N’ihi gịnị ka otu onye Etiopia na-arụ n’obí eze ji kwuo ka e mee ya baptizim?

“LEE! Mmiri; gịnị na-egbochi ime m baptizim?” Ọ bụ onye Etiopia na-arụ n’obí eze jụrụ ajụjụ ahụ na narị afọ mbụ. Onye Kraịst aha ya bụ Filip emewo ka o doo ya anya na Jizọs bụ Mezaịa ahụ e kwere ná nkwa. N’ịbụ  onye ihe ọ mụtara n’Akwụkwọ Nsọ kpaliri, nwoke Etiopia ahụ mere ihe. O gosipụtara na ya chọrọ ka e mee ya baptizim!—Ọrụ 8:26-36.

2. N’ihi gịnị ka i ji kwesị ichesi echiche ike banyere baptizim?

² Ọ bụrụ na i sorowo Ndịàmà Jehova mụọ isiakwụkwọ ndị bu ụzọ n’akwụkwọ a nke ọma, ị pụrụ ịchọ ịjụ, sị: ‘Gịnị na-egbochi ime m baptizim?’ Ka ọ na-erula ugbu a, ị mataworị nkwa Bible kwere maka ndụ ebighị ebi n’ime Paradaịs. (Luk 23:43; Mkpughe 21:3, 4) Ị mụtawokwa banyere ihe bụ́ n’ezie ọnọdụ ndị nwụrụ anwụ nakwa banyere olileanya mbilite n’ọnwụ. (Eklisiastis 9:5; Jọn 5:28, 29) Ma eleghị anya, i sowo Ndịàmà Jehova na-aga nzukọ ọgbakọ ha, ị hụwokwa n’onwe gị na ha na-ekpe ezi okpukpe. (Jọn 13:35) Nke kakwarị mkpa, o yiri ka ị malitewo iso Jehova Chineke na-enwe mmekọrịta.

3. (a) Iwu dị aṅaa ka Jizọs nyere ụmụazụ ya? (b) Olee otú e si eme baptizim ime mmiri?

³ Olee otú ị pụrụ isi gosi na ị chọrọ ijere Chineke ozi? Jizọs gwara ụmụazụ ya, sị: “Gaanụ mee ndị nke mba nile ka ha bụrụ ndị na-eso ụzọ m, na-eme ha baptizim.” (Matiu 28:19) Jizọs n’onwe ya setịpụrụ ihe nlereanya na nke a site n’ịbụ onye e mere baptizim n’ime mmiri. E fesaghị ya mmiri efesa, a wụsaghịkwa ya mmiri n’isi. (Matiu 3:16) Okwu ahụ bụ́ “mee baptizim” sitere n’okwu Grik a sụgharịrị ịbụ “mikpuo.” N’ihi ya, baptizim Ndị Kraịst pụtara ịbụ onye e mikpuru n’ime mmiri kpamkpam.

4. Gịnị ka ịbụ onye e mere baptizim n’ime mmiri na-egosipụta?

⁴ A chọrọ ka ndị nile chọrọ iso Jehova Chineke na-enwe mmekọrịta bụrụ ndị e mere baptizim n’ime mmiri. Baptizim na-egosipụta n’ihu ọha na ị chọrọ ijere Chineke ozi. Ọ na-egosi na ime uche Jehova na-atọ gị ụtọ. (Abụ Ọma 40:7, 8) Otú ọ dị, iji ruo eru maka baptizim, ọ dị ihe ụfọdụ ị na-aghaghị ime.

5. (a) Olee ihe mbụ ị ga-eme iji ruo eru maka baptizim? (b) N’ihi gịnị ka nzukọ Ndị Kraịst ji dị mkpa?

⁵ Ị maliteworị ime ihe mbụ i kwesịrị ime. N’ụzọ dị aṅaa? Ọ bụ site n’inweta ihe ọmụma banyere Jehova Chineke na Jizọs Kraịst, ikekwe site n’ịmụchi Bible anya. (Jọn 17:3) Ma, a ka nwere ihe ndị ọzọ ọ dị mkpa ka ị mụta. Ndị Kraịst kwesịrị ịbụ ndị ‘jupụtara n’ezi ihe ọmụma nke uche [Chineke].’ (Ndị Kọlọsi 1:9) Ịga nzukọ ọgbakọ Ndịàmà Jehova ga-enyere gị nnọọ aka n’akụkụ a. Ọ dị mkpa ka ị na-aga nzukọ ndị dị otú ahụ. (Ndị Hibru 10:24, 25) Ịgachi nzukọ anya ga-enyere gị aka inwetakwu ihe ọmụma banyere Chineke.

6. Ihe ọmụma hà aṅaa nke Bible ka ị na-aghaghị inweta iji ruo eru maka baptizim?

⁶ Otú ọ dị, ọ dịghị mkpa na ị ga-amata ihe nile dị n’ime Bible iji ruo eru maka baptizim. Onye Etiopia ahụ na-arụ n’obí eze nwere ihe ọmụma ụfọdụ banyere Akwụkwọ Nsọ, ma ọ chọrọ enyemaka iji ghọta akụkụ ya ụfọdụ. (Ọrụ 8:30, 31) N’otu aka ahụ, ị ka nwere ọtụtụ ihe ị ga-amụta. N’eziokwu, ị ga-anọgide na-amụ banyere Chineke n’akwụsịghị akwụsị. (Eklisiastis 3:11) Otú ọ dị, tupu e mee gị baptizim, ọ dị mkpa ka ị mata ma nakwere ma ọ dịghị ihe ọzọ ozizi ndị bụ́ isi nke Bible. (Ndị Hibru 5:12) Ozizi ndị dị otú ahụ na-agụnye ihe ndị bụ́ eziokwu banyere ọnọdụ ndị nwụrụ anwụ na mkpa aha Chineke na Alaeze ya dị.

7. Mmetụta dị aṅaa ka ịmụ Bible kwesịrị inwe n’ahụ́ gị?

⁷ Otú ọ dị, o bighị nanị n’inwe ihe ọmụma n’ihi na “ma okwukwe adịghị ọ gaghị ekwe omume ime ihe dị [Chineke] ezi mma.” (Ndị Hibru 11:6) Bible na-agwa anyị na mgbe ụfọdụ ndị nọ n’obodo oge ochie bụ́ Kọrint nụrụ ozi Ndị Kraịst, ha “malitere ikwere nakwa ịbụ ndị e mere baptizim.” (Ọrụ 18:8) N’otu aka ahụ, ịmụ Bible  kwesịrị ime ka i nwee okwukwe siri ike na ọ bụ Okwu Chineke nke e dere site n’ike mmụọ nsọ. Ọmụmụ Bible kwesịrị inyere gị aka inwe okwukwe ná nkwa Chineke, o kwesịkwara inyere gị aka ikwenyesi ike na àjà Jizọs pụrụ ịzọpụta ndụ.—Joshua 23:14; Ọrụ 4:12; 2 Timoti 3:16, 17.

8. Gịnị ga-akpali gị ịkọrọ ndị ọzọ ihe ndị ị mụtaworo?

⁸ Ka okwukwe gị na-esiwanye ike, obi agaghị ekwe gị ịhapụ ịgwa ndị ọzọ ihe ndị ị mụtaworo. (Jeremaịa 20:9) Ị ga-enwe nnọọ ọchịchọ siri ike ịkọrọ ndị ọzọ banyere Chineke na nzube ya.—2 Ndị Kọrint 4:13.

9, 10. (a) Ole ndị ka ị pụrụ ịmalite ịkọrọ eziokwu Bible? (b) Gịnị ka ị ga-eme ma ọ bụrụ na ị chọrọ ikere òkè n’ọrụ nkwusa a haziri ahazi nke Ndịàmà Jehova na-arụ?

⁹ Ị pụrụ ịmalite ịkọrọ ndị ọzọ eziokwu Bible site n’iji nkà na-agwa ndị ikwu gị, ndị enyi gị, ndị agbata obi gị, na ndị ọrụ ibe gị banyere ya. Ka oge na-aga, ị ga-achọ ikere òkè n’ọrụ nkwusa a haziri ahazi nke Ndịàmà Jehova na-arụ. Mgbe i nwere ọchịchọ dị otú ahụ, alala azụ isoro Onyeàmà na-akụziri gị Bible kwurịta nke ahụ. Ọ bụrụ na o yie ka ì ruru eru ikere òkè n’ọrụ nkwusa, a ga-eme ndokwa ka gị na onye na-eduziri gị ọmụmụ Bible soro ndị okenye abụọ nke ọgbakọ zukọọ.

¹⁰ Nke a ga-eme ka i nwee ike ịmatakwu ụfọdụ ndị okenye ọgbakọ, bụ́ ndị na-azụ ìgwè atụrụ Chineke. (Ọrụ 20:28; 1 Pita 5:2, 3) Ọ bụrụ na ndị okenye ahụ achọpụta na ị ghọtara ozizi ndị bụ́ isi nke Bible ma kwenye na ha, na ị na-ebi ndụ kwekọrọ n’ụkpụrụ Chineke, nakwa na ị chọrọ n’ezie ịbụ otu n’ime Ndịàmà Jehova, ha ga-agwa gị na i ruru eru ikere òkè n’ọrụ nkwusa dị ka onye nkwusa ozi ọma, bụ́ onye a na-emebeghị baptizim.

11. Mgbanwe ndị dị aṅaa ka ụfọdụ na-aghaghị ime tupu ha eruo eru ikwusa ozi ọma?

 ¹¹ N’aka nke ọzọ, ọ pụrụ ịdị mkpa ka i mee mgbanwe ụfọdụ n’ụzọ i si ebi ndụ nakwa n’àgwà gị iji ruo eru ikwusa ozi ọma. Nke a pụrụ ịgụnye ịkwụsị ihe ụfọdụ ị na-ezo ezo eme. N’ihi ya, tupu i kwuo na ị chọrọ ịghọ onye nkwusa a na-emebeghị baptizim, ọ dị mkpa ka ị kwụsị ime mmehie ndị dị oké njọ, ndị dị ka mmekọahụ rụrụ arụ, aṅụrụma, na ịṅụ ọgwụ ọjọọ.—1 Ndị Kọrint 6:9, 10; Ndị Galeshia 5:19-21.

12. N’ihi gịnị ka nchegharị ji dị mkpa?

¹² Ọ dị ihe ndị ọzọ ị ga-emerịrị tupu i ruo eru maka baptizim. Pita onyeozi kwuru, sị: “Chegharịanụ, chigharịakwanụ ka e wee hichapụ mmehie unu.” (Ọrụ 3:19) Ichegharị bụ igosipụta ezi mwute maka ihe i mere. Nchegharị dị nnọọ mkpa ma ọ bụrụ na mmadụ ebiwo ndụ rụrụ arụ, ma ọ dịkwa mkpa ọbụna ma ọ bụrụ na mmadụ ebiwo ndụ dịtụ ọcha. N’ihi gịnị? Ọ bụ n’ihi na mmadụ nile bụ ndị mmehie, mgbaghara Chineke dịkwa ha mkpa. (Ndị Rom 3:23; 5:12) Tupu ị malite ịmụ Bible, ị maghị ihe bụ́ uche Chineke. Ya mere, o nweghị otú ọ ga-esi bụrụ na i biwo ndụ kwekọrọ nnọọ n’uche ya. N’ihi ya, nchegharị dị gị mkpa.

13. Gịnị bụ nchigharị?

¹³ Nchigharị aghaghị isochi ‘nchegharị.’ Ị ga-emerịrị ihe karịrị ịkwa ụta. Ọ dị mkpa ka ị kwụsị ụdị ndụ ị na-ebibu ma kpebisie ike na ị ga-eme ihe ziri ezi site ugbu a gawa. Ị ghaghị igosipụta nchegharị ma chigharịa tupu e mee gị baptizim.

14. Olee ihe dị mkpa ị ga-emerịrị tupu e mee gị baptizim?

¹⁴ Ọ dị ihe ọzọ dị mkpa ị ga-eme tupu e mee gị baptizim. Ị ghaghị ịrara onwe gị nye Jehova Chineke.

15, 16. Gịnị ka ịrara onwe gị nye Chineke pụtara, gịnịkwa na-akpali mmadụ ime nke a?

 ¹⁵ Mgbe ị na-arara onwe gị nye Jehova Chineke n’ekpere siri ike, ị na-ekwe ya nkwa ife nanị ya ofufe ruo mgbe ebighị ebi. (Deuterọnọmi 6:15) Otú ọ dị, n’ihi gịnị ka mmadụ ga-eji chọọ ime otú ahụ? Ọ dị mma, ka e were ya na nwa okorobịa nwere nwa agbọghọ ọ na-elenyere anya. Ka ọ na-amatakwu ya ma hụ na o nwere àgwà ọma, otú ahụ ka ọ ga na-enwewanye mmasị n’ebe ọ nọ. Ka oge na-aga, ọ ga-enwe mkpali ịgwa ya na ya chọrọ ịlụ ya. N’eziokwu, ịlụ nwanyị nwekwara ibu nke ya. Ma ịhụnanya ga-akpali ya iwere nzọụkwụ ahụ dị mkpa.

¹⁶ Ọ bụrụ na ị mata Jehova ma hụ ya n’anya, ị ga-enwe mkpali iji obi gị dum jeere ya ozi n’ekweghị ka ihe ọ bụla dọlaa gị azụ n’ofufe ị na-efe ya. Onye ọ bụla nke chọrọ iso Ọkpara Chineke, bụ́ Jizọs Kraịst, aghaghị “ịjụ onwe ya.” (Mak 8:34) Anyị na-ajụ onwe anyị site n’ịhụ na ọchịchọ na ihe mgbaru ọsọ onwe onye adịghị egbochi anyị irubere Chineke isi n’ụzọ zuru ezu. Ya mere, tupu e mee gị baptizim, ime uche Jehova Chineke aghaghị ịbụ nzube gị bụ́ isi ná ndụ.—1 Pita 4:2.

17. Gịnị mere obi adịghị aka ụfọdụ ndị ịrara onwe ha nye Chineke?

¹⁷ Obi adịghị aka ụfọdụ ndị ịrara onwe ha nye Jehova n’ihi na ha na-atụ ụjọ iwere nzọụkwụ ahụ dị mkpa. Ha pụrụ ịtụ ụjọ na ha ga-aza ajụjụ n’ihu Chineke dị ka Ndị Kraịst raara onwe ha nye. N’ihi ịtụ ụjọ na ha pụrụ ịda ma ọ bụ mechuo Jehova ihu, ha na-eche na ọ kasị mma ịghara ịrara onwe ha nye ya.

18. Gịnị pụrụ ịkpali gị ịrara onwe gị nye Jehova?

¹⁸ Ka ị na-amụta ịhụ Jehova n’anya, ị ga-enwe mkpali ịrara onwe gị nye ya na ime ihe nile i nwere ike ime iji bie ndụ n’ụzọ kwekọrọ ná nraranye ahụ. (Eklisiastis 5:4) Mgbe i mesịrị nraranye, ị ga-achọ n’ezie ‘ije  ije n’ụzọ kwesịrị Jehova iji bụrụ onye na-eme ihe na-amasị ya n’ụzọ zuru ezu.’ (Ndị Kọlọsi 1:10) N’ihi ịhụnanya i nwere n’ebe Chineke nọ, ị gaghị eche na ime uche ya sibigara ike ókè. Ihe ịrụ ụka adịghị ya na ị ga-ekwenyere Jọn onyeozi, bụ́ onye dere, sị: “Nke a bụ ihe ịhụ Chineke n’anya pụtara, ka anyị debe ihe ndị o nyere n’iwu; ma ihe ndị o nyere n’iwu adịghịkwa arọ.”—1 Jọn 5:3.

19. N’ihi gịnị ka ị na-ekwesịghị ịtụ egwu ịrara onwe gị nye Chineke?

¹⁹ Ọ bụghị iwu na ị ga-ezu okè tupu ị rara onwe gị nye Chineke. Jehova maara adịghị ike gị, ọ dịghịkwa mgbe ọ ga-atụ anya ka i mee karịa ókè i nwere ike ime. (Abụ Ọma 103:14) Ọ chọrọ ka i nwee ihe ịga nke ọma, ọ ga-akwado  ma nyere gị aka. (Aịsaịa 41:10) I kwesịrị ijide n’aka na ọ bụrụ na ị tụkwasị Jehova obi gị nile, ọ “ga-emekwa ka okporo ụzọ gị nile zie ezie.”—Ilu 3:5, 6.

20. N’ihi gịnị ka mmadụ ga-eji mee ka ọha mara banyere nrara ọ raara onwe ya nye Jehova?

²⁰ Ịtụgharị uche n’ihe ndị a anyị tụlere ugbu a pụrụ inyere gị aka ịrara onwe gị nye Jehova n’ekpere. Onye ọ bụla nke hụrụ Chineke n’anya aghaghị ‘ime nkwupụta  ihu ọha maka nzọpụta.’ (Ndị Rom 10:10) Olee otú ị ga-esi mee nke ahụ?

21, 22. Olee otú ị pụrụ isi mee “nkwupụta ihu ọha” banyere okwukwe gị?

²¹ Mee ka onyeisi oche ndị nlekọta nke ọgbakọ gị mara na ị chọrọ ka e mee gị baptizim. Ọ ga-eme ndokwa ka ụfọdụ ndị okenye soro gị tụlee ọtụtụ ajụjụ ndị metụtara ozizi ndị bụ́ isi nke Bible. Ọ bụrụ na ndị okenye a ekweta na i ruru eru, ha ga-agwa gị na a pụrụ ime gị baptizim ná mgbakọ na-abịanụ. * A na-ekwukarị okwu na-atụleghachi ihe baptizim pụtara n’oge ndị dị otú ahụ. Ọkà okwu na-agwazi ndị nile a na-aga ime baptizim ka ha zaa ajụjụ abụọ dị mfe dị ka ụzọ isi jiri ọnụ mee “nkwupụta ihu ọha” banyere okwukwe ha.

²² Ọ bụ baptizim ahụ n’onwe ya na-eme ka a mata gị n’ihu ọha dị ka onye rarawooro onwe ya nye Chineke, nke bụkwa otu n’ime Ndịàmà Jehova ugbu a. A na-emikpu ndị a na-eme baptizim n’ime mmiri iji gosipụta n’ihu ọha na ha ararawo onwe ha nye Jehova.

23. Gịnị ka ịbụ onye e mere baptizim “n’aha nke Nna na nke Ọkpara na nke mmụọ nsọ” pụtara?

²³ Jizọs kwuru na a ga-eme ndị na-eso ụzọ ya baptizim “n’aha nke Nna na nke Ọkpara na nke mmụọ nsọ.” (Matiu 28:19) Nke a pụtara na onye a na-aga ime baptizim nakweere ịbụisi Jehova Chineke na nke Jizọs Kraịst. (Abụ Ọma 83:18; Matiu 28:18) Ọ ghọtakwara ókè mmụọ nsọ Chineke ma ọ bụ ike ya nọ n’ọrụ na-ekere.—Ndị Galeshia 5:22, 23; 2 Pita 1:21.

24, 25. (a) Gịnị ka baptizim na-egosipụta? (b) Olee ajụjụ dị mkpa ka a zaa?

²⁴ Otú ọ dị, baptizim abụghị ịsa ahụ́ nkịtị. Ọ na-egosipụta  otu ihe dị nnọọ mkpa. Ịbụ onye e mikpuru n’ime mmiri na-egosipụta na ị nwụwo n’ụzọ ndụ gị mbụ. Ịbụ onye e si n’ime mmiri kulite na-egosi na ị dị ndụ ugbu a ime uche Chineke. Chetakwa na ọ bụ Jehova Chineke n’onwe ya ka ị raara onwe gị nye, ọ bụghị otu ọrụ, ihe omume, mmadụ ndị ọzọ, ma ọ bụ otu òtù. Nrara ị raara onwe gị nye na ịbụ onye e mere baptizim bụ mmalite nke ezi ọbụbụenyi gị na Chineke—ezi mmekọrịta nke gị na ya.—Abụ Ọma 25:14.

²⁵ Ọ pụtaghị na e mehaala gị Baptizim nzọpụta abụrụla nke gị. Pọl onyeozi dere, sị: “Nọgidenụ jiri egwu na ịma jijiji na-arụpụta nzọpụta nke onwe unu.” (Ndị Filipaị 2:12) Baptizim bụ nanị mmalite. Ajụjụ abụrụ, Olee otú ị pụrụ isi nọgide n’ịhụnanya Chineke? Isiakwụkwọ nke ikpeazụ ga-aza ajụjụ a.