တၢ်နီၤဖး တဆံဃိး
တၢ်ဘျၢထံ ဒီးနတၢ်ရ့လိာ်သးဒီးယွၤ
-
ခရံာ်ဖိ တၢ်ဒိးဘျၢထံန့ၣ် မ့ၢ်ဒ်လဲၣ်.
-
နကတုၤထီၣ်ထီၣ်ဘးလၢ နကဘျၢထံအဂီၢ်န့ၣ် တၢ်မနုၤတဖၣ်လိၣ်လဲၣ်.
-
ပှၤတဂၤ မၤတၢ်ဟ့ၣ်လုၢ်ထီၣ်သး လၢကစၢ်ယွၤကသ့ဒ်လဲၣ်.
-
တၢ်ဂ့ၢ်မိၢ်ပှၢ်လၢ တၢ်ဒိးဘျၢထံန့ၣ် မ့ၢ်မနုၤလဲၣ်.
၁. ဘၣ်မနုၤအဃိ ပှၤအံးသံးယိဖၠံယါဖိအံၤ ဃ့ဒိးဘျၢအသးလၢထံလဲၣ်.
“ကွၢ်ကွၢ်,ထံအိၣ်ဝဲလီၤ. ဒ်သိးယသုတဒိးဘျၢ ယသးတဂ့ၤဒီး, မ့ၢ်မနုၤတြီယၤတမံၤလဲၣ်.” တၢ်သံကွၢ်အံၤန့ၣ် ဘၣ်တၢ်သံကွၢ်အီၤလၢ အံးသံးယိဖၠံယါ အပဒိၣ်တဂၤ ဖဲနံၣ်တၢကယၤ အတီၢ်ပူၤန့ၣ်လီၤ. ခရံာ်ဖိတဂၤလၢ အမံၤမ့ၢ် ဖံလံးပူးန့ၣ် တဲနၢ်ပၢၢ်အီၤလၢ ယ့ၣ်ၡူးမ့ၢ် တၢ်စံးပာ်မ့းၡံအၤလီၤ. တၢ်လၢသ့ၣ်ညါဘၣ်ဝဲလၢ လံာ်စီဆှံပူၤန့ၣ် ထုးန့ၢ်အသးအဃိ ပှၤအံးသံးယိဖၠံယါဖိအံၤ မၤဝဲတၢ်လၢ သ့ၣ်ညါထီၣ်ဘၣ်ဝဲန့ၣ်လီၤ. ပာ်ဖျါထီၣ်ဝဲလၢ အဝဲအဲၣ်ဒိး ဒိးဘျၢအသးလၢထံလီၤ.—မၤတၢ် ၈:၂၆-၃၆.
၂. ဘၣ်မနုၤအဃိ ကြၢးနဆိကမိၣ်တၢ် လီၤတံၢ်လီၤဆဲး လၢဘၣ်ဃးဒီး တၢ်ဘျၢထံလဲၣ်.
၂ တၢ်နီၤဖး အခီၣ်ထံးလၢ လံာ်အံၤအပူၤတဖၣ်န့ၣ် နမၤလိလီၤတံၢ်လီၤဆဲးဒီး ယဟိဝၤအပှၤအုၣ်အသးတဂၤ မ့ၢ်ဝံၤလံဒီး နကအိၣ်ကတဲာ်ကတီၤနသး လံလၢ နကစံး, ‘ဒ်သိးယသု တဒိးဘျၢ ယသးတဂ့ၤဒီး, မ့ၢ်မနုၤတြီယၤတမံၤလဲၣ်.’ ခဲအံၤ လံာ်စီဆှံအတၢ်စံးပာ်လၢ ဘၣ်ဃးဒီး တၢ်မူအထူအယိာ်လၢ ပၤရဒံစူးအဂ့ၢ်န့ၣ် နမၤလိဝံၤတ့ၢ်လံန့ၣ်လီၤ. (လူၤကၣ် ၂၃:၄၃; လီၣ်ဖျါ ၂၁:၃, ၄) တၢ်အိၣ်အသးနီၢ်နီၢ်လၢ ပှၤသံတဖၣ်ဒီး တၢ်မုၢ်လၢ်လၢ တၢ်ဂဲၤဆၢထၢၣ် သမူထီၣ်က့ၤအဂ့ၢ်န့ၣ် နသ့ၣ်ညါဘၣ်လံလီၤ. (စံၣ်တဲၤတဲလီၤ ၉:၅; ယိၤဟၣ် ၅:၂၈, ၂၉) နရ့လိာ်နသးဒီး ယဟိဝၤအပှၤအုၣ်အသးတဖၣ် လၢတၢ်အိၣ်ဖှိၣ် အတၢ်အိၣ်ဖှိၣ်ရိဖှိၣ်အပူၤန့ၣ်ဒီး နနီၢ်ကစၢ်ဒၣ်ဝဲ နကထံၣ်ဘၣ်တ့ၢ်လံ တၢ်ဘူၣ်တၢ်ဘါနီၢ်နီၢ် အလုၢ်အလၢ်န့ၣ်လီၤ. (ယိၤဟၣ် ၁၃:၃၅) အကါဒိၣ်ကတၢၢ်န့ၣ်, မ့ၢ်နစးထီၣ်လံလၢ နကဂုၤထီၣ်ပသီထီၣ် လၢတၢ်ရ့လိာ်သးဒီး ယဟိဝၤယွၤန့ၣ်လီၤ.
၃. (က) ယ့ၣ်ၡူးဟ့ၣ် အပျဲၢ်အဘီၣ်တဖၣ် တၢ်မၤလိာ်မနုၤလဲၣ်. (ခ) တၢ်ဒိးဘျၢထံန့ၢ် မ့ၢ်ဒ်လဲၣ်.
၃ နအဲၣ်ဒိးမၤ ယွၤအတၢ်န့ၣ် နပာ်ဖျါထီၣ် ကသ့ဒ်လဲၣ်. ယ့ၣ်ၡူးစံးဘၣ် အပျဲၢ်အဘီၣ်တဖၣ်ဒ်အံၤလီၤ– “လဲၤဒုးကဲထီၣ် ပှၤအကလုာ်တဖၣ် ခဲလၢာ်လၢ ယပျဲၢ်ယဘီၣ်တက့ၢ်. ဒိးဘျၢ [ဘးပတံစၢ်]အီၤ . . . တက့ၢ်.” (မးသဲ ၂၈:၁၉) ယ့ၣ်ၡူးအနီၢ်ကစၢ်ဒၣ်ဝဲ ပာ်တ့ၢ်တၢ်အဒိအတဲာ် ခီဖျိဒိးဘျၢအသးလၢ ထံန့ၣ်လီၤ. တမ့ၢ်တၢ်ဖှံထံ လၢကစၢ်အလိၤဘၣ်, ဒီးတမ့ၢ် တၢ်ဟံးထီၣ်ထံတစဲးဒီး တၢ်လူလီၤဆူ အခိၣ်လိၤဘၣ်. (မးသဲ ၃:၁၆) “ဘးပတံစၢ်” တၢ်ကတိၤအံၤန့ၣ် ဟဲလီၤစၢၤလၢ ကရံးအတၢ်ကတိၤလၢ အခီပညီမ့ၢ် “ဘျၢလီၤ” န့ၣ်လီၤ. လၢတၢ်န့ၣ်အဃိ ခရံာ်ဖိတၢ်ဒိးဘျၢထံန့ၣ်မ့ၢ် တၢ်ဘျၢလီၤသး မ့တမ့ၢ် စုၣ်လီၤသး တုၤအဘၢ လၢလၢပှဲၤပှဲၤန့ၣ်လီၤ.
၄. တၢ်ဒိးဘျၢထံန့ၣ် မ့ၢ်တၢ်ဒုးနဲၣ်ဖျါထီၣ် တၢ်မနုၤလဲၣ်.
၄ တၢ်ဒိးဘျၢထံန့ၣ် မ့ၢ်တၢ်လိၣ်တခါလၢ ကယဲၢ်ပှၤလၢ အဲၣ်ဒိးအိၣ်ဒီး တၢ်ရ့လိာ်သး ဘူးဘူးတံၢ်တံၢ်ဒီး ယဟိဝၤယွၤန့ၣ်လီၤ. တၢ်ဘျၢန့ၣ် မ့ၢ်တၢ်ပာ်ဖျါလၢ ကမျၢၢ်အမဲာ်ညါ လၢနအဲၣ်ဒိးမၤ ကစၢ်ယွၤ အတၢ်မၤန့ၣ်လီၤ. တၢ်အံၤပာ်ဖျါဝဲလၢ နသးအိၣ်မၤ ယဟိဝၤ အတၢ်ဘၣ်သးန့ၣ်လီၤ. (စံးထီၣ်ပတြၢၤ ၄၀:၇, ၈) နကတုၤထီၣ် ထီၣ်ဘးလၢ တၢ်ဒိးဘျၢထံအဂီၢ် နကဘၣ်ခါထီၣ် ခီၣ်ခါတနီၤ သပှၢ်တၢၢ်လီၤ.
တၢ်သ့ၣ်ညါနၢ်ပၢၢ်ဒီး တၢ်စူၢ်တၢ်နာ်လိၣ်ဝဲ
၅. (က) တၢ်ကတုၤထီၣ် ထီၣ်ဘးလၢတၢ်ဘျၢထံအဂီၢ် နကဘၣ်ခါခီၣ်ခါ အဆိကတၢၢ်န့ၣ် မ့ၢ်မနုၤလဲၣ်. (ခ) ခရံာ်ဖိ အတၢ်အိၣ်ဖှိၣ်ရိဖှိၣ်န့ၣ် ဘၣ်မနုၤအဃိ အကါဒိၣ်လဲၣ်.
၅ နစးထီၣ်ခါ ခီၣ်ခါအဆိကတၢၢ်တဆီ ဝံၤလံန့ၣ်လီၤ. မ့ၢ်ဒ်လဲၣ်. နမၤလိ တၢ်သ့ၣ်ညါနၢ်ပၢၢ်လၢ ဘၣ်ဃးဒီးယဟိဝၤ ကစၢ်ယွၤ ဒီးယ့ၣ်ၡူးခီဖျိ နမၤလိလံာ်စီဆှံလီၤတံၢ် လီၤဆဲးန့ၣ်လီၤ. (ယိၤဟၣ် ၁၇:၃) ဘၣ်ဆၣ် နကဘၣ်မၤလိကဒီးတၢ် အိၣ်ဒံးလီၤ. ခရံာ်ဖိတဖၣ်န့ၣ် အဲၣ်ဒိး “လၢထီၣ်ပှဲၤထီၣ်ဒီး တၢ်သ့ၣ်ညါ တၢ်ဘၣ်ယွၤအသး” နီၢ်နီၢ်န့ၣ်လီၤ. (ကလီးစဲ ၁:၉) တၢ်လဲၤထီၣ် ယဟိဝၤအပှၤအုၣ်အသးတဖၣ် အတၢ်အိၣ်ဖှိၣ်ရိဖှိၣ်န့ၣ် မၤစၢၤပှၤအါမးန့ၣ်လီၤ. အကါဒိၣ်ဒိၣ်မးလၢ နကလဲၤထီၣ် တၢ်အိၣ်ဖှိၣ်ရိဖှိၣ်ဒ်သိးအံၤလီၤ. (ဧ့ၤဘြံၤ ၁၀:၂၄, ၂၅) တၢ်လဲၤထီၣ် တၢ်အိၣ်ဖှိၣ် ဘၣ်ဆၢဘၣ်ကတီၢ်န့ၣ် ကမၤစၢၤပှၤဒ်သိး ပတၢ်သ့ၣ်ညါနၢ်ပၢၢ် ကအါထီၣ်လၢ ဘၣ်ဃးဒီးကစၢ်ယွၤန့ၣ်လီၤ.
တၢ်ဃုမၤလိ တၢ်သ့ၣ်ညါနၢ်ပၢၢ် လီၤတံၢ်လီၤဆဲးလၢ ယွၤအကလုၢ်ကထါအပူၤန့ၣ် မ့ၢ်ခီၣ်ခါအကါဒိၣ်လၢ တၢ်တုၤထီၣ်ထီၣ်ဘးလၢ တၢ်ဘျၢထံအဂီၢ်လီၤ
၆. နကတုၤထီၣ်ထီၣ်ဘးလၢ တၢ်ဘျၢထံအဂီၢ် နတၢ်သ့ၣ်ညါနၢ်ပၢၢ်လံာ်စီဆှံ ကဘၣ်အိၣ်ဆံးအါလဲၣ်.
၆ နကတုၤထီၣ်ထီၣ်ဘးလၢ တၢ်ဘျၢထံအဂီၢ် တလိၣ်လၢနကဘၣ်သ့ၣ်ညါ တၢ်ခဲလၢာ်လၢ လံာ်စီဆှံပူၤဘၣ်. အံးသံးယိဖၠံယါ အပဒိၣ်န့ၣ် အတၢ်သ့ၣ်ညါနၢ်ပၢၢ် အိၣ်ဝဲတစဲးသနာ်က့ လိၣ်တၢ်မၤစၢၤလၢ ကနၢ်ပၢၢ်ဝဲ လံာ်စီဆှံတၢ်ဂ့ၢ်တနီၤန့ၣ်လီၤ. (မၤတၢ် ၈:၃၀, ၃၁) ဒ်န့ၣ်အသိးလီၤ, နၤစ့ၢ်ကီး နကဘၣ်မၤလိကဒီးတၢ် အိၣ်ဝဲအါမးန့ၣ်လီၤ. နီၢ်နီၢ်န့ၣ်, တၢ်သိၣ်လိမၤယုၤ ကစၢ်ယွၤအဂ့ၢ်န့ၣ် တဝံၤနီတဘျီဘၣ်. (စံၣ်တဲၤတဲလီၤ ၃:၁၁) ဘၣ်ဆၣ် တချုးနဘျၢထံအဆၢကတီၢ်န့ၣ် လိၣ်လၢနကဘၣ် သ့ၣ်ညါလံာ်စီဆှံ အတၢ်သိၣ်လိ အဂံၢ်ခီၣ်ထံးတဖၣ်ဒီး တူၢ်လိာ်အီၤန့ၣ်လီၤ. (ဧ့ၤဘြံၤ ၅:၁၂) တၢ်သိၣ်တၢ်သီတဖၣ်အံၤန့ၣ် ပာ်ဃုာ်ဒီး တၢ်မ့ၢ်တၢ်တီလၢ ဘၣ်ဃးဒီး ပှၤသံတဖၣ် အတၢ်အိၣ်အသး, ဒီးကစၢ်ယွၤအမံၤ ဒီးအဘီအမုၢ် အကါဒိၣ်အဂ့ၢ်န့ၣ်လီၤ.
၇. တၢ်မၤလိလံာ်စီဆှံန့ၣ် အဘျုးကြၢးအိၣ်လၢ နဖီခိၣ်ဒ်လဲၣ်.
၇ အိၣ်ထဲဒၣ် တၢ်သ့ၣ်ညါနၢ်ပၢၢ်န့ၣ် တလၢပှဲၤဒံးဘၣ်, မ့ၢ်လၢ “တၢ်နာ်တအိၣ်ဘၣ်ဒီး, တၢ်ဘၣ်အသးတသ့” အဃိလီၤ. (ဧ့ၤဘြံၤ ၁၁:၆) လံာ်စီဆှံပာ်ဖျါဝဲလၢ လၢပျၢၤ ပှၤကရံၣ်သူးဖိတဖၣ်န့ၣ် ဖဲအဝဲသ့ၣ်နၢ်ဟူ ခရံာ်ဖိအတၢ်ကစီၣ်အခါ “စူၢ်က့ၤနာ်က့ၤဝဲ, ဒီးဒိးဘျၢအသးလီၤ.” (မၤတၢ် ၁၈:၈) ဒ်န့ၣ်အသိးလီၤ ခီဖျိ နမၤလိလံာ်စီဆှံဒီး ကြၢးနစူၢ်က့ၤနာ်က့ၤလၢ လံာ်စီဆှံန့ၣ် ဘၣ်တၢ်ကွဲးအီၤလၢ ယွၤအသးစီဆှံန့ၣ်လီၤ. တၢ်မၤလိလံာ်စီဆှံန့ၣ် ကြၢးကဲထီၣ် တၢ်မၤစၢၤလၢ နကနာ် ကစၢ်ယွၤအတၢ်စံးပာ် တဖၣ်ဒီး ယ့ၣ်ၡူးအတၢ်လုၢ် တၢ်ပှ့ၤက့ၤ အတၢ်အုၣ်က့ၤခီၣ်က့ၤ အသဟီၣ်န့ၣ်လီၤ.—ယိၤၡူ ၂၃:၁၄; မၤတၢ် ၄:၁၂; ၂ တံၤမသ့း ၃:၁၆, ၁၇.
တၢ်ဟ့ၣ်နီၤလီၤ ပှၤအဂုၤအဂၤတဖၣ်လၢ လံာ်စီဆှံ တၢ်မ့ၢ်တၢ်တီအဂ့ၢ်
၈. တၢ်လၢနမၤလိ သ့ၣ်ညါထီၣ်ဘၣ်တဖၣ်န့ၣ် နကဟ့ၣ်နီၤလီၤ ပှၤဂၤအဂီၢ် တၢ်မနုၤ ကထိၣ်ဂဲၤထီၣ်နၤလဲၣ်.
၈ ဒ်နသးပူၤ တၢ်စူၢ်တၢ်နာ် အါထီၣ်ဂီၢ်ထီၣ်အသိး နကထံၣ်သ့ၣ်ညါဘၣ်လၢ တၢ်လၢနမၤလိ သ့ၣ်ညါထီၣ်တဖၣ်န့ၣ် နပၢၤဃာ်အီၤကီန့ၣ်လီၤ. (ယံးရမံယၤ ၂၀:၉) နသးကဆူၣ်ထီၣ်လၢ နကအဲၣ်ဒိးတဲဘၣ် ပှၤဂၤလၢ ကစၢ်ယွၤဒီး ကစၢ်အတၢ်တိာ်ပာ်တဖၣ်အဂ့ၢ်န့ၣ်လီၤ.—၂ ကရံၣ်သူး ၄:၁၃.
တၢ်နာ်န့ၣ် ကြၢးထိၣ်ဂဲၤထီၣ်နၤလၢ နကနီၤလီၤ ပှၤဂုၤဂၤလၢ နတၢ်စူၢ်တၢ်နာ်လီၤ
၉, ၁၀. (က) နစးထီၣ်နီၤလီၤ မတၤတဖၣ်လၢ လံာ်စီဆှံတၢ်မ့ၢ်တၢ်တီသ့လဲၣ်. (ခ) နမ့ၢ်အဲၣ်ဒိးပာ်ဃုာ်လၢ တၢ်စံၣ်တဲၤတဲလီၤအတၢ်မၤ, လၢယဟိဝၤအပှၤအုၣ်အသးတဖၣ် ရဲၣ်လီၤကျဲၤလီၤပာ်ဝဲန့ၣ် နကြၢးမၤတၢ်မနုၤလဲၣ်.
၉ နစးထီၣ်အီၤသ့ ခီဖျိနနီၤလီၤ လံာ်စီဆှံ တၢ်မ့ၢ်တၢ်တီအဂ့ၢ်လၢ နဘူးနတံၢ်, နတံၤသကိး, ပှၤလၢအအိၣ်ဘူးဒီးနၤ ဒီးပှၤလၢအမၤတၢ် ဒီးနၤတဖၣ်လၢ တၢ်ကူၣ်သ့န့ၣ်လီၤ. အဆၢကတီၢ်မ့ၢ်ဘၣ်ဒီး နကအဲၣ်ဒိးပာ်ဃုာ်လၢ တၢ်စံၣ်တဲၤတဲလီၤအတၢ်မၤ, လၢယဟိဝၤအပှၤအုၣ်အသးတဖၣ် ရဲၣ်လီၤကျဲၤလီၤပာ်ဝဲ လၢအလီၢ်ဘၣ်န့ၣ်လီၤ. နမ့ၢ်အဲၣ်ဒိးပာ်ဃုာ်ဒ်န့ၣ်ဒီး တဲဖျါထီၣ် ပှၤအုၣ်အသးလၢ အမၤလိနၤ လံာ်စီဆှံအံၤ ပျီပျီန့ၣ်တက့ၢ်. မ့ၢ်ထံၣ်ဘၣ်လၢ နတုၤထီၣ်ထီၣ်ဘးလၢ ကမျၢၢ်အတၢ်စံၣ်တဲၤတဲလီၤအဂီၢ်ဒီး ကမၤဝဲ တၢ်ရဲၣ်တၢ်ကျဲၤဒ်သိး နၤဒီး ပှၤလၢမၤလိနၤလံာ်စီဆှံအံၤ ကထံၣ်လိာ်သးဒီး တၢ်အိၣ်ဖှိၣ်သးပှၢ်ခံဂၤန့ၣ်လီၤ.
၁၀ တၢ်အံၤဒုးဟ့ၣ်နၤ တၢ်အခွဲးသ့လၢ နကသ့ၣ်ညါလိာ်ဘၣ် နသးဂ့ၤဂ့ၤဘၣ်ဘၣ်ဒီး ခရံာ်ဖိခိၣ်နၢ်တနီၤလၢ အကွၢ်ထွဲ ကစၢ်ယွၤအသိတဖၣ် န့ၣ်လီၤ. (မၤတၢ် ၂၀:၂၈; ၁ ပ့းတရူး ၅:၂, ၃) နနၢ်ပၢၢ် လံာ်စီဆှံသိၣ်လိတၢ် အဂံၢ်ခီၣ်ထံးတဖၣ်ဒီး နနာ်အီၤ, နအိၣ်မူထွဲဒ် ယွၤအတၢ်သိၣ်တၢ်သီအသိး, ဒီးနအဲၣ်ဒိးကဲထီၣ် နီၢ်နီၢ် ယဟိဝၤအပှၤအုၣ်အသးတဂၤန့ၣ်, ခိၣ်နၢ်တဖၣ်အံၤန့ၣ် မ့ၢ်ထံၣ်ဘၣ်ဝဲဒီး ကဒုးသ့ၣ်ညါနၤလၢ နတုၤထီၣ်ထီၣ်ဘးလၢ နကပာ်ဃုာ်လၢ ကမျၢၢ်အတၢ်စံၣ်တဲၤတဲလီၤအပူၤ ဒ်ပှၤစံၣ်တဲၤတဲလီၤ တၢ်သးခုကစီၣ် လၢအတဒိးဘျၢဘၣ်အသးဒံးဘၣ် လၢအမ့ၢ်ပှၤဘိးဘၣ်သ့ၣ်ညါတၢ်တဂၤအသိးန့ၣ်လီၤ.
၁၁. ပှၤတနီၤ ကတုၤထီၣ်ထီၣ်ဘးလၢ ကမျၢၢ်တၢ်စံၣ်တဲၤတဲလီၤအဂီၢ် လိၣ်လၢ ကဘၣ်လဲလိာ်ဝဲ တၢ်မနုၤတဖၣ်လဲၣ်.
၁၁ ဘၣ်ဆၣ် နကတုၤထီၣ်ထီၣ်ဘးလၢ ကမျၢၢ်တၢ်စံၣ်တဲၤတဲလီၤအဂီၢ် ဘၣ်တဘၣ်လိၣ်လၢ နကဘၣ်လဲလိာ် နတၢ်အိၣ်မူလုၢ်လၢ်ဒီး သကဲးပဝးတနီၤန့ၣ်လီၤ. တၢ်အံၤပာ်ဃုာ်ဒီး တၢ်ဆိတ့ၢ်ကွံာ် လုၢ်လၢ်တနီၤလၢ နပာ်ခူသူၣ်လၢ ပှၤဂၤတသ့ၣ်ညါ န့ၣ်လီၤ. လၢတၢ်န့ၣ်အဃိ, တချုးနတဲဖျါထီၣ်လၢ နအဲၣ်ဒိးကဲထီၣ် ပှၤဘိးဘၣ်သ့ၣ်ညါတၢ်လၢ တဒိးဘျၢအသးဒံးဘၣ်န့ၣ် လိၣ်လၢနကဘၣ်ပူၤဒီး တၢ်ကမၣ်အဒိၣ်အယိာ် ဒ်သိးဒီး တၢ်ကလုာ်ကလိၤ, တၢ်အီလုၢ်ကိ, ဒီးတၢ်သုကသံၣ်မူၤဘီးတဖၣ်န့ၣ်လီၤ.—၁ ကရံၣ်သူး ၆:၉, ၁၀; ကလၤတံ ၅:၁၉-၂၁.
တၢ်ပီၢ်ယၢ်လီၤက့ၤသး ဒီးတၢ်လဲလိာ်သး
၁၂. ဘၣ်မနုၤအဃိ လိၣ်လၢပကဘၣ် ပီၢ်ယၢ်လီၤက့ၤပသးလဲၣ်.
၁၂ နကတုၤထီၣ် ထီၣ်ဘးတၢ်ဒိးဘျၢထံအဂီၢ် နကဘၣ်ခါထီၣ်စ့ၢ်ကီး ခီၣ်ခါအဂၤတနီၤန့ၣ်လီၤ. တၢ်မၢဖိ ပ့းတရူး စံးဝဲဒ်အံၤလီၤ– “ ပီၢ်ယၢ်လီၤ ဒီးဃၣ်လိၤက့ၤသုသးဆူ ကစၢ်ယွၤအအိၣ်, ဒ်သိးအဝဲ ကပျၢ်ကွံာ် သုတၢ်ဒဲးဘး အဂီၢ်န့ၣ်တက့ၢ်.” (မၤတၢ် ၃:၁၉, ခစ) တၢ်ပီၢ်ယၢ်လီၤက့ၤသးန့ၣ် မ့ၢ်သးအတၢ်တူၢ်ဘၣ် တၢ်သးအုးနီၢ်နီၢ်လၢ တၢ်လၢနမၤတ့ၢ်တမံၤ အဂီၢ်န့ၣ်လီၤ. ပှၤလၢအိၣ်မူလၢ တၢ်သကဲးပဝးတဂ့ၤတဂၤန့ၣ် ကြၢးပီၢ်ယၢ်လီၤက့ၤအသးလီၤ, ပှၤလၢအိၣ်မူလၢ သကဲးပဝးလၢအဂ့ၤ တဖၣ်သနာ်က့ လိၣ်လၢကဘၣ် ပီၢ်ယၢ်လီၤက့ၤအသးန့ၣ်လီၤ. လၢမနုၤအဃိလဲၣ်. မ့ၢ်လၢ ကယဲၢ်ပှၤဟီၣ်ခိၣ်ဖိခဲလၢာ် မ့ၢ်ပှၤတၢ်ဒဲးဘးဖိအဃိ လိၣ်ဘၣ်ကစၢ်ယွၤ ကပျၢ်ကွံာ် အတၢ်ကမၣ်န့ၣ်လီၤ. (ရိမ့ၤ ၃:၂၃; ၅:၁၂) တချုးနမၤလိ လံာ်စီဆှံအခါ နတသ့ၣ်ညါ ကစၢ်ယွၤအတၢ်ဘၣ်သးဘၣ်. လၢတၢ်န့ၣ်အဃိ နအိၣ်မူဒ် ကစၢ်အတၢ်ဘၣ်သးကသ့ဒ်လဲၣ်. လိၣ်လၢပကဘၣ် ပီၢ်ယၢ်လီၤက့ၤပသးလီၤ.
၁၃. တၢ်လဲလိာ်သး စံးတၢ်န့ၣ် မ့ၢ်မနုၤလဲၣ်.
၁၃ တၢ်ပီၢ်ယၢ်လီၤက့ၤသး ဝံၤအလီၢ်ခံ နကဘၣ်မၤ ‘တၢ်လဲလိာ်သး’ န့ၣ်လီၤ. နကဘၣ်မၤအါန့ၣ်တက့ၢ် ဒံးနတူၢ်ဘၣ် တၢ်သးအုးန့ၣ်လီၤ. နကဘၣ်ညိကွံာ် နတၢ်အိၣ်မူကျဲလီၢ်လံၤဒီး စးထီၣ်ခဲအံၤ နကဘၣ်ပာ်လီၤနသး ကျၢၤကျၢၤလၢ နကမၤတၢ်ဂ့ၤအဂီၢ်န့ၣ်လီၤ. တၢ်ပီၢ်ယၢ်လီၤသး ဒီးတၢ်လဲလိာ်သးန့ၣ် မ့ၢ်ခီၣ်ခါတဖၣ်လၢ နကဘၣ်ခါလၢ တချုးနဒိးဘျၢထံန့ၣ်လီၤ.
တၢ်ဟ့ၣ်လုၢ်ထီၣ်သး
၁၄. တချုးနဒိးဘျၢထံန့ၣ် နကဘၣ်ခါထီၣ် ခီၣ်ခါလၢ အကါဒိၣ်မနုၤလဲၣ်.
၁၄ တချုးနဒိးဘျၢထံန့ၣ် နကဘၣ်ခါထီၣ် ခီၣ်ခါအကါဒိၣ်အဂၤ အိၣ်ဝဲတမံၤလီၤ. နကဘၣ် ဟ့ၣ်လုၢ်ထီၣ်နသးဆူ ယဟိဝၤအိၣ်န့ၣ်လီၤ.
နဃ့ဘါထုကဖၣ်ဒီး ဟ့ၣ်လုၢ်ထီၣ်နသးဆူ ယွၤအအိၣ်ဝံၤလံဧါ
၁၅, ၁၆. နတၢ်ဟ့ၣ်လုၢ်ထီၣ်သးလၢ ယွၤအအိၣ်န့ၣ် အခီပညီမ့ၢ်မနုၤလဲၣ်, ပှၤကမၤဒ်န့ၣ်အဂီၢ် တၢ်မနုၤထိၣ်ဂဲၤထီၣ်လဲၣ်.
၁၅ ဖဲနဃ့ဘါထုကဖၣ်လၢ တၢ်သးဆူၣ်ဒီး နဟ့ၣ်လုၢ်ထီၣ်နသးဆူ ယဟိဝၤအိၣ်အခါ မ့ၢ်ဒၣ် နအၢၣ်လီၤအီလီၤ ကစၢ်လၢ နကဘူၣ်ထီၣ်ဘါထီၣ် အီၤလၢနသးဒီဖျၢၣ် လီၤထူလီၤယိာ်လီၤ. (၅ မိၤၡ့ ၆:၅) မ့မ့ၢ်ဒ်န့ၣ်ဒီး ဘၣ်မနုၤအဃိ ပှၤတဂၤဂၤ အဲၣ်ဒိးမၤဝဲဒ်န့ၣ်လဲၣ်. ပစံးဒၣ်ကလိာ် ပိာ်ခွါတဂၤ စးထီၣ်တရံးဝဲ ပိာ်မုၢ်တဂၤန့ၣ်လီၤ. ဒ်သ့ၣ်ညါအါထီၣ်ဝဲအဂ့ၢ်ဒီး ထံၣ်ဘၣ်ဝဲ အတၢ်သ့တၢ်ဘၣ်တဖၣ်အသိး ကထုးန့ၢ်အသးအါထီၣ်လီၤ. အဆၢကတီၢ်မ့ၢ်ဘၣ်ဒီး ဃ့ဖျီအသးန့ၣ် မ့ၢ်န့ဆၢၣ်လုၢ်လၢ်န့ၣ်လီၤ. တၢ်ဒိးတ့ဒိးဖျီသးန့ၣ် မ့ၢ်ဒၣ်တၢ်တူၢ်လိာ်အါထီၣ် မူဒါအသီန့ၣ်လီၤ. ဘၣ်ဆၣ်တၢ်အဲၣ်တၢ်ကွံန့ၣ် ကထိၣ်ဂဲၤထီၣ်အီၤလၢ ကခါထီၣ်ခီၣ်ခါလၢ အကါဒိၣ်အံၤန့ၣ်လီၤ.
၁၆ ဖဲနသ့ၣ်ညါထီၣ် ယဟိဝၤဒီး အဲၣ်ဘၣ်အီၤအခါ တမ့ၢ် နကပၢၤဃာ်နသး မ့တမ့ၢ် တပျဲတၢ်တြီဃာ်တမံၤမံၤလၢ နကဘူၣ်ထီၣ်ဘါထီၣ် ကစၢ်အဂီၢ်ဘၣ်, ဒီးနကဘၣ် တၢ်ထိၣ်ဂဲၤထီၣ်လၢ နကဘူၣ်ထီၣ်ဘါထီၣ် ကစၢ်န့ၣ်လီၤ. ကယဲၢ်ပှၤလၢ အဲၣ်ဒိးပိာ် ကစၢ်ယွၤအဖိခွါ, ယ့ၣ်ၡူးခရံာ်အခံတဖၣ်န့ၣ် ကဘၣ် “ညိကွံာ်အသးဒၣ်ဝဲ” န့ၣ်လီၤ. (မၢ်ကူး ၈:၃၄) ပညိကွံာ်ပသး ခီဖျိပနီၢ်ကစၢ် အတၢ်ဆၢန့ၢ်တၢ် မ့တမ့ၢ် ဖီတၢၣ်တဖၣ်န့ၣ် သုတကဲထီၣ် တၢ်တြီလၢ ပတၢ်စူၢ်ကစၢ်ယွၤ အလၢအပှဲၤအဂီၢ်တဂ့ၤန့ၣ်လီၤ. လၢတၢ်န့ၣ်အဃိ, နမၤယဟိဝၤ ကစၢ်ယွၤ အတၢ်ဘၣ်သးလၢ တချုးနဒိးဘျၢထံန့ၣ် ကဘၣ်မ့ၢ်ဝဲ နတၢ်အိၣ်မူ တၢ်တိာ်ပာ်လၢ အကါဒိၣ်ကတၢၢ်န့ၣ်လီၤ.—၁ ပ့းတရူး ၄:၂.
တၢ်မၤနၢၤ တၢ်ဘၣ်ယိၣ်လၢ တမ့ၢ်ကတုၤထီၣ်ထီၣ်ဘး
၁၇. ဘၣ်မနုၤအဃိ ပှၤတနီၤ မၤယံၣ်မၤနီၣ်အသးလၢ ကဟ့ၣ်လုၢ်ထီၣ်အသးဆူ ကစၢ်ယွၤအအိၣ်လဲၣ်.
၁၇ ပှၤတနီၤနီၤ ပျံၤတၢ်တစဲးစဲးလၢ ကဘၣ်ခါထီၣ် ခီၣ်ခါအကါဒိၣ်အံၤအဃိ မၤယံၣ်မၤနီၣ်အသးလၢ ကဟ့ၣ်လုၢ်ထီၣ်အသးဆူ ယဟိဝၤအအိၣ်န့ၣ်လီၤ. ဒ်အမ့ၢ် ခရံာ်ဖိလၢ အဟ့ၣ်လုၢ်ထီၣ်အသးတဂၤအသိး ကမ့ၢ်ဘၣ်ယိၣ်ဝဲ ကဘၣ်ဟ့ၣ်တၢ်စံးဆၢလၢ ကစၢ်ယွၤအမဲာ်ညါန့ၣ်လီၤ. အဝဲသ့ၣ်ဘၣ်ယိၣ်ဝဲလၢ မၤဝဲမ့ၢ်တလၢထီၣ်ပှဲၤထီၣ် ဒီးယဟိဝၤ အသးကဟးဂီၤအဃိ, ဆိကမိၣ်ဝဲလၢ မ့ၢ်တဟ့ၣ်လုၢ်ထီၣ်အသးန့ၣ် ကဂ့ၤကတၢၢ်န့ၣ်လီၤ.
၁၈. နကဟ့ၣ်လုၢ်ထီၣ် နသးဆူ ယဟိဝၤအအိၣ်အဂီၢ် တၢ်မနုၤထိၣ်ဂဲၤထီၣ်နၤသ့လဲၣ်.
၁၈ ဒ်နအဲၣ် ယဟိဝၤသ့ထီၣ်အသိး နကဘၣ်တၢ်ထိၣ်ဂဲၤထီၣ်နၤလၢ နကလုၢ်ထီၣ်နသးဆူ ကစၢ်ဒီး အိၣ်မူအဂ့ၤကတၢၢ် ဒ်န့ၣ်အသိးန့ၣ်လီၤ. (စံၣ်တဲၤတဲလီၤ ၅:၄) နဟ့ၣ်လုၢ်ထီၣ်နသးဝံၤအလီၢ်ခံ နကအဲၣ်ဒိး “လဲၤတၢ်ဒ်အကြၢးဒီးကစၢ်, လၢတၢ်ဘၣ်အသးခဲလၢာ်” န့ၣ်လီၤ. (ကလီးစဲ ၁:၁၀) မ့ၢ်လၢနအဲၣ် ကစၢ်ယွၤအဃိ တမ့ၢ်နကဆိကမိၣ်လၢ တၢ်မၤယွၤအတၢ်ဘၣ်သးန့ၣ် ကီခဲဒိၣ်မးဘၣ်. နကအၢၣ်လီၤတူၢ်လိာ် တၢ်မၢဖိယိၤဟၣ် အတၢ်ကွဲးအံၤန့ၣ်လီၤ– “တၢ်အဲၣ်ယွၤမ့ၢ်အအံၤ, လၢပတိၢ်န့ၢ် အတၢ်မၤလိာ်လီၤ. ဒီးအတၢ်မၤလိာ်န့ၣ် တကီခဲဘၣ်လီၤ.”— ၁ ယိၤဟၣ် ၅:၃.
၁၉. တၢ်ဟ့ၣ်လုၢ်ထီၣ်သးလၢ ကစၢ်ယွၤအအိၣ်န့ၣ် ဘၣ်မနုၤအဃိ တၢ်ဘၣ်ယိၣ်အလီၢ်တအိၣ်လဲၣ်.
၁၉ နကဟ့ၣ်လုၢ်ထီၣ်နသးဆူ ယွၤအအိၣ်အဂီၢ် တလိၣ်လၢနကဘၣ်မ့ၢ် ပှၤလၢပှဲၤဘၣ်. ယဟိဝၤသ့ၣ်ညါ နတၢ်အိၣ်အသးဒီး တမုၢ်လၢ်တၢ် အါန့ၢ်ဒံးတၢ်လၢ နမၤသ့ဘၣ်. (စံးထီၣ်ပတြၢၤ ၁၀၃:၁၄) ကစၢ်အဲၣ်ဒိးလၢ နမၤတၢ်ကဲထီၣ်လိၣ်ထီၣ်အဃိ ကကွၢ်ထွဲ မၤစၢၤနၤလီၤ. (ယၡါယၤ ၄၁:၁၀) နနာ်သပှၢ်တၢၢ်သ့လၢ နမ့ၢ်သန့ၤနသးလၢ ယဟိဝၤလၢ နသးဒီဖျၢၣ်ညါဒီး “အဝဲဒၣ် ကမၤလိၤနကျဲလီၤ.”—ကတိၤဒိ ၃:၅, ၆.
တၢ်ဒိးဘျၢထံန့ၣ် မ့ၢ်တၢ်ပနီၣ်လၢ နတၢ်ဟ့ၣ်လုၢ်ထီၣ်သး
၂၀. တၢ်ဟ့ၣ်လုၢ်ထီၣ်သးလၢ ယဟိဝၤန့ၣ် ဘၣ်မနုၤအဃိ တမ့ၢ်တၢ်ဂ့ၢ်လၢ အိၣ်သဒၢအသးလဲၣ်.
၂၀ ပမ့ၢ်က့ၤ ဆိကမိၣ်ကွၢ် တၢ်ဂ့ၢ်လၢ ပကတိၤသကိး ခဲအံၤန့ၣ် ကမၤစၢၤနၤလၢ နကဃ့ဘါထုကဖၣ်ဒီး ဟ့ၣ်လုၢ်ထီၣ်နသးဆူ ယဟိဝၤအအိၣ်န့ၣ်လီၤ. ပှၤလၢအအဲၣ်နီၢ်နီၢ် ကစၢ်ယွၤ ကိးဂၤဒဲးန့ၣ် ‘ကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ကဘၣ်ဘိးဘၣ်သ့ၣ်ညါဝဲလၢ ကမျၢၢ်အမဲာ်ညါ’ န့ၣ်လီၤ. (ရိမ့ၤ ၁၀:၁၀) နမၤတၢ်အံၤ ကသ့ဒ်လဲၣ်.
တၢ်ဘျၢထံ အခီပညီန့ၣ် မ့ၢ်တၢ်ဒုးသံကွံာ် တၢ်အိၣ်မူလၢညါခီဒီး တၢ်က့ၤသမူထီၣ်လၢ တၢ်ကမၤ ယွၤအတၢ်ဘၣ်သးန့ၣ်လီၤ
၂၁, ၂၂. နတၢ်စူၢ်တၢ်နာ်န့ၣ် န‘ဘိးဘၣ်သ့ၣ်ညါလၢ ကမျၢၢ်အမဲာ်ညါ’ ကသ့ဒ်လဲၣ်.
၂၁ ဒုးသ့ၣ်ညါ နတၢ်အိၣ်ဖှိၣ် ပှၤပၢဘၣ် ကွၢ်ထွဲတၢ်ကရၢအပှၤကျဲၤတၢ်လၢ နအဲၣ်ဒိးဘျၢထံန့ၣ်တက့ၢ်. အဝဲကသုးကျဲၤဝဲလၢ နၤဒီးပှၤကွၢ်ထွဲတၢ်အိၣ်ဖှိၣ်တဖၣ် ကကွၢ်ကဒါက့ၤ တၢ်သံကွၢ်လၢ အကျၢၢ်တံၢ် လံာ်စီဆှံ တၢ်သိၣ်တၢ်သီ အခီၣ်ထံးတဖၣ်န့ၣ်လီၤ. ပှၤကွၢ်ထွဲတၢ်တဖၣ်အံၤ မ့ၢ်အၢၣ်လီၤဝဲလၢ နတုၤထီၣ်ထီၣ်ဘးန့ၣ်ဒီး ကစံးနၤလၢ, လၢခံ တၢ်အခွဲးအယာ် မ့ၢ်အိၣ်န့ၣ် နဘျၢထံသ့န့ၣ်လီၤ. * ဖဲတၢ်ဘျၢထံ အကတီၢ်န့ၣ် ပှၤဟ့ၣ်တၢ်ကစီၣ်လၢ တၢ်က့ၤကွၢ်ကဒါက့ၤ တၢ်ဘျၢထံ အခီပညီန့ၣ်လီၤ. ပှၤဟ့ၣ်တၢ်ကစီၣ်န့ၣ် ကကွဲဝဲ ပှၤကဘျၢထံအသီတဖၣ်လၢ ကစံးဆၢ တၢ်သံကွၢ် ညီညီဖိခံဘီ န့ၣ်လီၤ, တၢ်အံၤ မ့ၢ်ကျဲလၢ ပအၢၣ်လီၤအီလီၤ ပတၢ်စူၢ်တၢ်နာ်လၢ ကမျၢၢ်အမဲာ်ညါလၢ ပထးခိၣ်န့ၣ်လီၤ.
၂၂ တၢ်ဘျၢထံန့ၣ် မ့ၢ်တၢ်ပာ်ဖျါ လၢကမျၢၢ်အမဲာ်ညါ လၢနဟ့ၣ်လုၢ်ထီၣ်နသးဆူ ယွၤအအိၣ်ဒီး ခဲအံၤနမ့ၢ် ယဟိဝၤ အပှၤအုၣ်အသး တဂၤလံန့ၣ်လီၤ. ပှၤကဒိးဘျၢအသးလၢထံ တဖၣ်န့ၣ်ခီဖျိ ဘျုးလီၤအသးလၢထံကျါ လၢလၢပှဲၤပှဲၤအဃိ မ့ၢ်တၢ်ပာ်ဖျါထီၣ်လၢ ကမျၢၢ်အမဲာ်ညါလၢ အဝဲသ့ၣ် ဟ့ၣ်လုၢ်ထီၣ်အသးလၢ ယဟိဝၤအအိၣ် ဝံၤလံန့ၣ်လီၤ.
နတၢ်ဘျၢထံ အခီပညီ
၂၃. တၢ်ဒိးဘျၢထံလၢ “ပၢ်, ဒီးဖိခွါ, ဒီးသးစီဆှံအမံၤ” န့ၣ်အဲၣ်ဒိးစံးဝဲ တၢ်မနုၤလဲၣ်.
၂၃ ယ့ၣ်ၡူးစံးဝဲလၢ အပျဲၢ်အဘီၣ်တဖၣ်န့ၣ် ကဘၣ်ဒိးဘျၢအသးလၢ “ပၢ်, ဒီးဖိခွါ, ဒီးသးစီဆှံအမံၤ”န့ၣ်လီၤ. (မးသဲ ၂၈:၁၉) တၢ်အံၤ အဲၣ်ဒိးစံးဝဲလၢ ပှၤလၢအကဒိးဘျၢ အသးလၢထံတဂၤန့ၣ် ကဘၣ်အၢၣ်လီၤတူၢ်လိာ်ဝဲ ခွဲးယာ်စိကမီၤလၢ ဘၣ်ဃးဒီး ယဟိဝၤယွၤ ဒီးယ့ၣ်ၡူးခရံာ် န့ၣ်လီၤ. (စံးထီၣ်ပတြၢၤ ၈၃:၁၈; မးသဲ ၂၈:၁၈) အဝဲအၢၣ်လီၤတူၢ်လိာ်စ့ၢ်ကီးဝဲ ယွၤအသးစီဆှံ, မ့တမ့ၢ် အသဟီၣ်ဟုးဂဲၤ အသနၢၣ် ဒီးအတၢ်မၤတဖၣ်န့ၣ်လီၤ.—ကလၤတံ ၅:၂၂, ၂၃; ၂ ပ့းတရူး ၁:၂၁.
၂၄, ၂၅. (က) တၢ်ဘျၢထံန့ၣ် မ့ၢ်တၢ်မနုၤ အတၢ်ပနီၣ်လဲၣ်. (ခ) လိၣ်လၢပကဘၣ်စံးဆၢ တၢ်သံကွၢ်မနုၤလဲၣ်.
၂၄ ဘၣ်ဆၣ်, တၢ်ဘျၢထံန့ၣ် တမ့ၢ်ထဲဒၣ် တၢ်စုၣ်လီၤ ဘျၢလီၤသးလၢ ထံကျါဘၣ်. တၢ်အံၤမ့ၢ် တၢ်လၢအကါဒိၣ် ဒိၣ်မးအတၢ်ပနီၣ် တမံၤန့ၣ်လီၤ. နလီၤဘျၢလၢ ထံဖီလာ်န့ၣ် မ့ၢ်တၢ်ပနီၣ်လၢ နမၤကတၢၢ်ကွံာ် နတၢ်အိၣ်မူကျဲလၢ ညါခီန့ၣ်လီၤ. ဒီးနဟဲက့ၤထီၣ်လၢ ထံကျါန့ၣ် မ့ၢ်တၢ်ပာ်ဖျါလၢ ခဲအံၤနကအိၣ်မူလၢ တၢ်ဘၣ်ယွၤအသးန့ၣ်လီၤ. သ့ၣ်နီၣ်ထီၣ်လၢ နဟ့ၣ်လုၢ်ထီၣ်နသးဆူ ယဟိဝၤ ကစၢ်ယွၤအအိၣ်, တမ့ၢ်နဟ့ၣ်လုၢ်ထီၣ်နသးဆူ တၢ်မၤတခါ, တၢ်ဟူးတၢ်ဂဲၤတခါ, ပှၤအဂုၤအဂၤ မ့တမ့ၢ် တၢ်ကရၢကရိ တခါအဖီခိၣ်ဘၣ်န့ၣ်တက့ၢ်. နတၢ်ဟ့ၣ်လုၢ်ထီၣ်နသး ဒီးတၢ်ဘျၢထံန့ၣ် မ့ၢ်တၢ်အခီၣ်ထံးလၢ နတၢ်ရ့လိာ်သးဒီး ကစၢ်ယွၤ ဘူးဘူးတံၢ်တံၢ်န့ၣ်လီၤ.—စံးထီၣ်ပတြၢၤ ၂၅:၁၄.
၂၅ တၢ်ဘျၢထံန့ၣ် တမ့ၢ်တၢ်အုၣ်ကီၤသးလၢ တၢ်အုၣ်က့ၤခီၣ်က့ၤအဂီၢ်ဘၣ်. တၢ်မၢဖိပီလူး ကွဲးဝဲဒ်အံၤလီၤ– “မၤသုတၢ်အုၣ်က့ၤခီၣ်က့ၤ ဒၣ်သုဝဲလၢ တၢ်ပျံၤဒီး တၢ်ကနိးတက့ၢ်.” (ဖံလံးပံၤ ၂:၁၂) တၢ်ဘျၢထံန့ၣ် မ့ၢ်ဒၣ်တၢ်အခီၣ်ထံးလီၤ. တၢ်သံကွၢ်လၢကဘၣ်သံကွၢ်န့ၣ်မ့ၢ်, နအိၣ်ဂၢၢ်ဆိးကျၢၤလၢ ကစၢ်ယွၤ အတၢ်အဲၣ်တၢ်ကွံအပူၤ ကသ့ဒ်လဲၣ်. တၢ်နီၤဖးလၢခံကတၢၢ် အပူၤန့ၣ် ပာ်ဖျါထီၣ်ဝဲ တၢ်စံးဆၢန့ၣ်လီၤ.
^ လံာ်အဆၢ. 21 တၢ်ဘျၢထံန့ၣ် မ့ၢ်တၢ်ရဲၣ်တၢ်ကျဲၤတခါလၢ အပာ်ဃုာ်ထီဘိလၢ ကိးနံၣ်ဒဲး ယဟိဝၤအပှၤအုၣ်အသးတဖၣ် အတၢ်အိၣ်ဖှိၣ်ဒီး တၢ်အိၣ်ဖှိၣ်ဖးဒိၣ် တဖၣ်န့ၣ်လီၤ.
