Kolobezo ni Bulikani bwa Mina ni Mulimu
Kauhanyo 18
Kolobezo ni Bulikani bwa Mina ni Mulimu
Kolobezo ya Sikreste i eziwa cwañi?
Ki lika mañi ze mu swanela ku eza kuli mu kone ku kolobezwa?
Buineelo ku Mulimu bu eziwa cwañi?
Ki lifi libaka le li ipitezi la ku kolobezwa?
1. Ki kabakalañi sikombwa wa Muetopia ha n’a kupile kuli a kolobezwe?
“BONA, mezi ki a; kiñi se si ka ni hanisa ku kolobezwa?” Puzo yeo ne i buzizwe ki sikombwa wa Muetopia mwa linako za baapositola. Mukreste ya bizwa Filipi n’a mu bonisize kuli Jesu ne li yena Mesiya ya n’a sepisizwe. Ka ku susumezwa ki za n’a itutile mwa Mañolo, Muetopia a nga muhato. A bonisa kuli n’a bata ku kolobezwa!—Likezo 8:26-36.
2. Ki kabakalañi ha mu swanela ku kengeela hahulu ka za kolobezo?
2 Haiba mu itutile likauhanyo za buka ye ni yo muñwi wa Lipaki za Jehova ku zwelela kwa makalelo, mu kana mwa susuezwa ku buza kuli, ‘Kiñi se si ka ni hanisa ku kolobezwa?’ Se mu itutile ka za sepiso ya mwa Bibele ya bupilo bo bu sa feli mwa Paradaisi. (Luka 23:43; Sinulo 21:3, 4) Hape mu itutile ka za muinelo luli wa bafu ni ka za sepo ya zuho. (Muekelesia 9:5; Joani 5:28, 29) Mwendi se mu fumanehile kwa mikopano ya Lipaki za Jehova mwa puteho ya bona mi mu iponezi mo bu ezezwa bulapeli bwa niti. (Joani 13:35) Sa butokwa ni ku fita, mwendi mu kalile bulikani bwa ka butu ni Jehova Mulimu.
3. (a) Jesu n’a file balateleli ba hae taelo mañi? (b) Kolobezo ya mwa mezi i eziwa cwañi?
3 Mu kona ku bonisa cwañi kuli mu bata ku sebeleza Mulimu? Jesu n’a bulelezi balateleli ba hae kuli: ‘Mu ye, mu lute macaba kaufela, mu ba kolobeze.’ (Mateu 28:19) Yena Jesu ka sibili n’a tomile mutala ka ku kolobezwa mwa mezi. N’a si ka hasiwa mezi, mi n’a si ka seliwa fela mezi fa toho. (Mateu 3:16) Linzwi la ku “kolobeza” li zwelela fa linzwi la Sigerike le li talusa “ku nwelisa.” Kacwalo kolobezo ya Sikreste i talusa ku nweliswa luli mwa mezi.
4. Kolobezo ya mwa mezi i bonisañi?
4 Bote ba ba bata ku ba ni bulikani ni Jehova Mulimu ba tokwa ku kolobezwa mwa mezi. Kolobezo i bonisa nyangela kuli mu lakaza ku sebeleza Mulimu. I bonisa kuli mwa tabela ku eza tato ya Jehova. (Samu 40:7, 8) Kono kuli mu kone ku fita fa ku kolobezwa, ku na ni mihato ye mu lukela ku nga.
ZIBO NI TUMELO ZA TOKWAHALA
5. (a) Ki ufi muhato wa pili wa ku kona ku fita fa ku kolobezwa? (b) Ki kabakalañi mikopano ya Sikreste ha i li ya butokwa?
5 Ki kale mu kala muhato wa pili. Ka nzila ifi? Ka ku amuhela zibo ka za Jehova Mulimu ni Jesu Kreste, mwendi ili ka ku ba ni tuto ye tomahanyizwe hande ya Bibele. (Joani 17:3) Kono ku na ni ze ñwi hape za ku ituta. Bakreste ba bata ku ‘tala zibo ya tato ya Mulimu.’ (Makolose 1:9) Ku yanga kwa mikopano ya puteho ya Lipaki za Jehova ku tusa hahulu mwa ku eza cwalo. Ku fumanehanga kwa mikopano yeo ku butokwa. (Maheberu 10:24, 25) Ku fumanehanga kwa mikopano kamita ku ka mi tusa ku ekeza kwa zibo ya mina ya Mulimu.
6. Mu swanela ku ba ni zibo ye kuma kai ya Bibele kuli mu kone ku kolobezwa?
6 Kono ha mu tokwi ku ziba lika kaufela mwa Bibele kuli mu kone ku kolobezwa. Sikombwa wa Muetopia n’a na ni zibonyana, kono n’a tokwa tuso ya ku utwisisa likalulo ze ñwi za Mañolo. (Likezo 8:30, 31) Ni mina mu sa na ni ze ñata za ku ituta. Mane ha mu na ku tuhela ku ituta ka za Mulimu. (Muekelesia 3:11) Kono mu si ka kolobezwa kale, mu tokwa ku ziba ni ku lumela lituto za makalelo za Bibele. (Maheberu 5:12) Lituto zeo li kopanyeleza niti ka za muinelo wa bafu ni butokwa bwa libizo la Mulimu ni Mubuso wa hae.
7. Ku ituta Bibele ku swanela ku tahisa maikuto mañi ku mina?
7 Kono haki zibo fela ye tokwahala, kakuli “kwand’a tumelo mutu h’a koni ku tabelwa ki [Mulimu].” (Maheberu 11:6) Bibele i lu taluseza kuli batu ba bañwi ba mwa muleneñi wa kale wa Korinte ha se ba utwile lushango lwa Sikreste, ba ‘lumela, mi ba kolobezwa.’ (Likezo 18:8) Ka nzila ye swana, ku ituta Bibele ku swanela ku tahisa kuli mu tale tumelo ya kuli Bibele ki Linzwi la Mulimu le li ñozwi ka ketelelo ya moya wa hae. Ku ituta Bibele ku swanela ku mi tusa ku ba ni tumelo mwa lisepiso za Mulimu ni mwa sitabelo sa Jesu se si kona ku mi pulusa.—Joshua 23:14; Likezo 4:12; 2 Timotea 3:16, 17.
KU TALUSEZA BA BAÑWI NITI YA MWA BIBELE
8. Mu ka susumezwa kiñi ku taluseza ba bañwi ze mu itutile?
8 Tumelo ha i nze i hula mwa pilu ya mina, ku ka mi bela t’ata ku ipulukela ze mu itutile. (Jeremia 20:9) Mu ka susumezwa hahulu ku taluseza ba bañwi ka za Mulimu ni milelo ya hae.—2 Makorinte 4:13.
9, 10. (a) Mu kona ku kala ku taluseza bomañi niti ya mwa Bibele? (b) Ki lifi ze mu swanela ku eza haiba mu bata ku abana mwa tukiso ya musebezi wa ku kutaza wa Lipaki za Jehova?
9 Mu kana mwa kala ku taluseza ba bañwi niti ya mwa Bibele ka ku i taluseza bahabo mina ka maseme, balikani, be mu pila mabapa ni bona, ni be mu beleka ni bona. Nako ha inze i ya, mu ka bata ku abana mwa tukiso ya musebezi wa ku kutaza wa Lipaki za Jehova. Ka nako yeo, mu lukuluhe ku taluseza Paki ya mi luta Bibele. Haiba ku ka bonahala kuli mwa kona ku abana mwa bukombwa bwa fa ndu ni ndu, ku ka eziwa litukiso za kuli mina ni muluti wa mina mu kopane ni maeluda ba babeli ba mwa puteho.
10 Ku eza cwalo ku ka mi konisa ku tekelela hande ba bañwi kwa maeluda ba Sikreste, ba ba lisa mutapi wa Mulimu. (Likezo 20:28; 1 Pitrosi 5:2, 3) Haiba maeluda bao ba ka bona kuli mwa utwisisa ni ku lumela lituto za matatekelo za Bibele, mu pila ka ku ya ka likuka za Mulimu, mi luli mu bata ku ba yo muñwi wa Lipaki za Jehova, ba ka mi zibisa kuli mwa kona ku abana mwa bukombwa bwa fa ndu ni ndu sina muhasanyi ya si ka kolobezwa wa taba ye nde.
11. Ki licinceho mañi ze ba kana ba tokwa ku eza ba bañwi kuli ba kone ku abana mwa bukombwa?
11 Kono mwendi hape mu kana mwa tokwa ku eza licinceho ze ñwi mwa bupilo ni mikwa ya mina kuli mu kone ku abana mwa bukombwa. Zeo li kana za kopanyeleza ku tuhela mikwa ye sa zibwi ki ba bañwi. Kacwalo, mu si ka kupa kale ku ba muhasanyi ya si ka kolobezwa, mu tokwa ku sa ba ni libi ze tuna, ze cwale ka buhule, bucakolwa, ni ku zuba.—1 Makorinte 6:9, 10; Magalata 5:19-21.
KU BAKA NI KU FETUHA
12. Ki kabakalañi ku baka ha ku tokwahala?
12 Mu si ka fita kale fa ku kolobezwa, ku na ni ze ñwi hape ze lukela ku eziwa. Muapositola Pitrosi n’a ize: “Mu bake, mi mu sikuluhe; kuli libi za mina li takulwe.” (Likezo 3:19) Ku baka ku talusa ku inyaza luli kabakala nto ye ñwi ye mu ezize. Ku baka kwa swanela luli haiba mutu n’a na ni muzamao o maswe, kono hape kwa tokwahala nihaiba kuli muzamao wa mutu ne si o maswe hahulu. Kabakalañi? Kakuli batu kaufela ki baezalibi mi ba tokwa swalelo ya Mulimu. (Maroma 3:23; 5:12) Mu si ka ituta kale Bibele, ne mu sa zibi kuli tato ya Mulimu ki ifi. Kacwalo ne mu si ke mwa kona ku pila ka ku tala ka ku ya ka tato ya hae. Kabakaleo, ku baka ku butokwa.
13. Ku sikuluha ku talusañi?
13 Ku baka ku lukela ku latelelwa ki ku sikuluha. Se si tokwahala haki ku inyaza fela. Mu tokwa ku tuhela mupilelo wa mina wa kale ni ku ikatulela ka ku tala kuli ku tuha cwale, mu ka eza ze lukile. Ku baka ni ku sikuluha ki mihato ye mu lukela ku nga mu si ka kolobezwa kale.
KU EZA BUINEELO BWA KA BUTU
14. Ki ifi nto ye ñwi ya butokwa ye mu lukela ku eza mu si ka kolobezwa kale?
14 Ku na ni nto ye ñwi hape ya butokwa ya ku eza mu si ka kolobezwa kale. Mu lukela ku ineela ku Jehova Mulimu.
15, 16. Ku ineela ku Mulimu ku talusañi, mi mutu u susumezwa kiñi ku eza cwalo?
15 Ha mu ineela ku Jehova Mulimu mwa tapelo, mu sepisa kuli mu ka lapela yena a nosi ku ya ku ile. (Deuteronoma 6:15) Kono mutu n’a ka batelañi ku eza cwalo? Lu nge kuli munna u kala ku bata musali. H’a nze a fita fa ku mu ziba hande ni ku bona kuli u na ni mikwa ye minde, u ka ikutwa kuli wa mu lata hahulu ni ku fita. Nako ha i nze i ya, kwa utwahala h’a ka mu kupa kuli ba nyalane. Ki niti kuli ku kena mwa linyalo ku ka mu ekeleza kwa buikalabelo. Kono lilato li ka mu susumeza ku nga muhato wa butokwa w’o.
16 Ha mu fita fa ku ziba ni ku lata Jehova, mu ka susumezwa ku mu sebeleza ka ku tala ha mu nze mu mu lapela. Mutu ufi kamba ufi ya bata ku latelela Jesu Kreste Mwan’a Mulimu u na ni ku ‘itoboha.’ (Mareka 8:34) Lu itoboha ka ku ikolwisa kuli litakazo ni milelo ya luna ha li lu tibeli ku utwa Mulimu ka ku tala. Kacwalo, mu si ka kolobezwa kale, ku eza tato ya Jehova Mulimu ku lukela ku ba mulelo wa mina o mutuna mwa bupilo.—1 Pitrosi 4:2.
KU FELISA SABO YA KU PALELWA
17. Ki kabakalañi ba bañwi ha ba kana ba zina-zina ku ineela ku Mulimu?
17 Ba bañwi ba zina-zinanga ku ineela ku Jehova kakuli ba saba ku nga muhato o mutuna w’o. Ba kana ba saba ku ikalabela ku Mulimu sina Bakreste ba ba ineezi. Ka ku saba kuli ba ka palelwa mi ba ka swabisa Jehova, ba nahana kuli ne ku ka ba hande ku sa ineela ku yena.
18. Mu kona ku susumezwa kiñi ku ineela ku Jehova?
18 Ha mu nze mu ituta ku lata Jehova, mu ka susumezwa ku ineela ku yena ni ku lika mo mu konela kaufela ku peta za buineelo b’o. (Muekelesia 5:4) Ha se mu ineezi, kaniti mu ka bata ku ‘zamaya ka mukwa o swanela Mulena, kuli a mi katelwe.’ (Makolose 1:10) Kabakala kuli mwa lata Mulimu, ha mu na ku nahana kuli ku eza tato ya hae ku t’ata hahulu. Kaniti mu ka lumelelana ni muapositola Joani ya n’a ñozi kuli: “Ku lata Mulimu, kiha lu mamela litaelo za hae; mi litaelo za hae ha li na bukiti.”—1 Joani 5:3.
19. Ki kabakalañi ha mu sa tokwi ku saba ku ineela ku Mulimu?
19 Kuli mu ineele ku Mulimu, ha mu tokwi ku ba ba ba petehile. Jehova wa ziba ze mu kona ku eza mi h’a libeleli ni kamuta kuli mu eze ze tuna ku fitelela f’o. (Samu 103:14) U bata kuli mu kondise nzila ya mina mi u ka mi tusa. (Isaya 41:10) Mu kolwe kuli haiba mu sepa Jehova ka pilu ya mina kaufela, u ka ‘lukisa linzila za mina.’—Liproverbia 3:5, 6.
KU BONISA BUINEELO BWA MINA KA KOLOBEZO
20. Ki kabakalañi buineelo ku Jehova ha bu sa koni ku zwelapili ku ba nto ye sa zibwi ki ba bañwi?
20 Ku yeya ze lu buhisani fa ku kana kwa mi tusa ku eza buineelo bwa ka butu ku Jehova ka tapelo. Mutu kaufela ya lata luli Mulimu u lukela ni ku “paka ka mulomo, kuli a piliswe.” (Maroma 10:10) Seo si eziwa cwañi?
21, 22. Mu kona cwañi ku ‘paka ka mulomo’ kuli mu na ni tumelo?
21 Mu zibise muokameli ya zamaisa wa puteho ya mina kuli mu bata ku kolobezwa. U ka lukisa kuli maeluda ba bañwi ba buhisane ni mina lipuzo li sikai ze ama lituto za matatekelo za Bibele. Haiba maeluda bao ba ka lumela kuli mwa kona ku kolobezwa, ba ka mi taluseza kuli ha ku ka ba ni kolobezo, mu ka kolobezwa. * Kamita ka nako yeo, ku banga ni ngambolo ye bulela za taluso ya kolobezo. Ku tuha f’o mubuleli u memanga ba ba kolobezwa ku alaba lipuzo ze peli ze bunolo ze bonisa kuli ba ‘paka ka mulomo’ tumelo ya bona.
22 Ki kolobezo ye bonisanga nyangela kuli mu ezize buineelo ku Mulimu mi se mu li yo muñwi wa Lipaki za Jehova. Ba ba kolobezwa ba nweliswanga mwa mezi ili ku bonisa patalaza kuli ba ineezi ku Jehova.
TALUSO YA KOLOBEZO YA MINA
23. Ku kolobezwa “ka Libizo la Ndate, ni la Mwana, ni la Moya o Kenile” ku talusañi?
23 Jesu n’a bulezi kuli balutiwa ba hae ne ba ka kolobezwa “ka Libizo la Ndate, ni la Mwana, ni la Moya o Kenile.” (Mateu 28:19) Seo si talusa kuli ya kolobezwa wa lemuha m’ata a tamaiso a Jehova Mulimu ni Jesu Kreste. (Samu 83:18; Mateu 28:18) Hape wa lemuha musebezi wa moya o kenile, kamba m’ata a sebeza a Mulimu.—Magalata 5:22, 23; 2 Pitrosi 1:21.
24, 25. (a) Kolobezo i yemelañi? (b) Ki puzo mañi ye tokwa ku alabiwa?
24 Kono kolobezo haki taba ya ku nweliswa fela. I yemela nto ya butokwa hahulu. Ku nwela mwa mezi ku bonisa kuli mu shwile kwa neku la bupilo bwa mina bwa kale. Ku zwisiwa mwa mezi ku bonisa kuli cwale se mu pilela ku eza tato ya Mulimu. Hape mu hupule kuli mu ezize buineelo ku yena Jehova Mulimu ka sibili, isi kwa musebezi, kwa mulelo o muñwi, kwa batu ba bañwi, kamba kwa kopano ye ñwi. Buineelo ni kolobezo ya mina ki makalelo a bulikani bo butuna ni Mulimu.—Samu 25:14.
25 Kolobezo ha i talusi kuli mutu kipeto ki kale a piliswa. Muapositola Paulusi n’a ñozi kuli: “Mu sebeze za ku piliswa kwa mina ka sabo ni ka tutumelo.” (Mafilipi 2:12) Kolobezo ki makalelo fela. Puzo ki ya kuli, Mu kona ku tiiseza cwañi mwa lilato la Mulimu? Kauhanyo ya luna ya mafelelezo i ka fa kalabo.
[Litaluso za kwatasi]
^ para. 21 Kolobezo kamita i banga teñi kwa mikopano ye mituna ni ye minyinyani ya ka silimo ye eziwanga ki Lipaki za Jehova.
ZE I LUTA BIBELE
▪ Kolobezo ya Sikreste i ama ku nweliswa luli mwa mezi, isi ku hasiwa fela mezi. —Mateu 3:16.
▪ Mihato ye libisa kwa kolobezo i kala ka ku fumana zibo ni ku bonisa tumelo, ku tuha f’o ni ku baka, ku sikuluha, ni ku ineela ku Mulimu.—Joani 17:3; Likezo 3:19; 18:8.
▪ Kuli mu ineele ku Jehova, mu lukela ku itoboha, sina batu mo ne ba itobohezi kuli ba latelele Jesu.—Mareka 8:34.
▪ Kolobezo i yemela ku shwa kwa neku la bupilo bwa kale ni ku pila kuli mutu a kale ku eza tato ya Mulimu.—1 Pitrosi 4:2.
[Lipuzo za Tuto]
[Siswaniso se si fa likepe 180]
Ku fumana zibo ye nepahezi ya Linzwi la Mulimu ki muhato wa butokwa o libisa kwa kolobezo
[Siswaniso se si fa likepe 180]
Tumelo i swanela ku mi susumeza ku taluseza ba bañwi ze mu lumela
[Siswaniso se si fa likepe 180, 181]
Kana mu ineezi ka butu ku Mulimu ka tapelo?
[Siswaniso se si fa likepe 181]
Kolobezo i talusa ku shwa kwa neku la bupilo bwa luna bwa kale ni ku pila kuli lu kale ku eza tato ya Mulimu
