Lumbapachiso naUsoko Wove naKalunga
Kapetulu 18
Lumbapachiso naUsoko Wove naKalunga
Lumbapachiso lwavaka-Kulishitu veji kululinganga ngachilihi?
Vyuma muka watela kulinga numba utengamo kukumbapachisa?
Uno mutu eji kulihananga ngachilihi ivene kuli Kalunga?
Mwomwo ika mutu vatela kumumbapachishila?
1. Mwomwo ika chilolo wakaEchopa alombele vamumbapachise?
“TALA meya wawa. Kaha chuma chika nachingwimika kuchina kungumbapachisa?” Chilolo wakaEchopa mulikulukaji lyamyaka lyakulivanga ikiye ahulishile chihula kanechi. Muka-Kulishitu vavuluka ngwavo Fwilipu amulumbunwinyine ngwenyi Yesu ikiye apwile Meshiya uze vashikile. Ou kaEchopa alingileko chuma chimwe mwomwo mujimbu alinangwile muVisoneka wamukwachile chikuma kumuchima. Asolwele chikupu nge asakile vamumbapachise.—Vilinga 8:26-36.
2. Mwomwo ika watela kushinganyeka chikuma halumbapachiso?
2 Kachi nge unalinangula kanawa tupetulu vakulivanga vamumukanda uno naumwe waVinjiho jaYehova, kaha unahase kulihulisa ngwove, ‘Chuma muka nachingwimikami kuchina kungumbapachisa?’ Halwola luno, unalinangula vyalushiko lwamuMbimbiliya lwakuyoya chahaya myaka yosena muPalachise. (Luka 23:43; Kusoloka 21:3, 4) Unalinangula nawa vyuma vyeji kusolokanga kuvafu nalutalililo lwakusanguka. (Muka-kwambulula 9:5; Yowano 5:28, 29) Pamo unapunga naVinjiho jaYehova hakukunguluka chavo chakuchikungulwilo nakulimwena omu veji kulemesanga Kalunga mujila yamuchano. (Yowano 13:35) Chachilemu chikumanyi, pamo unaputuka lyehi kutunga usoko wamwaza naYehova Kalunga.
3. (a) Lushimbi muka Yesu ahanyine vaka-kumukavangiza? (b) Uno lumbapachiso veji kululinganga ngachilihi?
3 Nausolola ngachilihi ngwove uli nakusaka kuzachila Kalunga? Yesu alwezele vaka-kumukavangiza ngwenyi: ‘Yenunga, mukavetavise vaka-mafuchi osena, mukavambapachisenga.’ (Mateu 28:19) Yesu ivene asolwele chakutalilaho hakumumbapachisa mumeya. Kavamusapwililile chipwe kumumwangila meya mumutweko. (Mateu 3:16) Lizu “kumbapachisa” lyafuma kulizu lyachiHelase lyalumbununa “kujimika.” Shikaho, lumbapachiso lwavaka-Kulishitu lwalumbununa kujimika mutu wosena mumeya.
4. Kumbapachisa mumeya chasolola ika?
4 Vosena vaze vali nakusaka kupwa nausoka naYehova Kalunga vatela kuvambapachisa mumeya. Lumbapachiso lweji kusolola kuvatu nge uli nakufwila chikupu kuzachila Kalunga. Lweji kusolola nawa nge uli nakusaka kulinga mwaya muchima waYehova. (Samu 40:7, 8) Oloze watela kulinga vyuma vimwe numba utengamo kukumbapachisa.
KUPWA NACHINYINGI NALUFWELELO
5. (a) Chuma muka chatete nachilingisa mutu kutamo kumumbapachisa? (b) Mwomwo ika kukunguluka chavaka-Kulishitu chapwila chachilemu?
5 Unaputuka lyehi kulinga chuma chatete. Mujila muka? Hakulinangula chinyingi chakutachikiza Yehova Kalunga naYesu Kulishitu kuhichila muchilongesa chaMbimbiliya. (Yowano 17:3) Oloze kuchili vyuma vyeka vyavivulu watela kulinangula. Vaka-Kulishitu vasaka ‘kuzala nachinyingi chakutachikiza kanawa mwaya muchima [waKalunga].’ (Wavaka-Kolose 1:9) Kupwanga kukukunguluka chaVinjiho jaYehova nachikukafwa chikuma kulinga ngocho. Chapwa chachilemu kupwanga kukukunguluka kana. (WavaHepeleu 10:24, 25) Kupwanga kukukunguluka lwola lwosena nachikukafwa upwenga chikuma nachinyingi chakutachikiza Kalunga.
6. Chinyingi muka chamuMbimbiliya watela kupwa nacho numba utengamo kukumbapachisa?
6 Kawatela kwijiva vyuma vyosena vili muMbimbiliya numba utengamo kukumbapachisako. Uze chilolo wakaEchopa apwileko nachinyingi chimwe, oloze asakiwila kumukafwa numba evwishise vyuma vimwe vyamuVisoneka. (Vilinga 8:30, 31) Nayove nawa uchili navyuma vyavivulu watela kulilongesa. Kaha nawa kaweshi kukeza kalitwamina kulinangula vyaKalungako. (Muka-kwambulula 3:11) Oloze shimbu kanda vakumbapachise, watela kwijiva kunangula chamaputukilo chamuMbimbiliya nakuchitavila. (WavaHepeleu 5:12) Chakutalilaho, watela kwijiva nakwitavila vyuma vyeji kusolokanga kuvafu nakulema chalijina lyaKalunga naWangana wenyi.
7. Uno kulinangula Mbimbiliya chatela kukwata ngachilihi hali ove?
7 Oloze kawatela kupwa nachinyingi kahako, mwomwo “chikeshi kwitava, kachi mutu keshi kuhasa kumwivwisa [Kalunga] kuwahako.” (WavaHepeleu 11:6) Mbimbiliya yatulweza ngwayo, omu vatu vamwe vamunganda yakushikulu yaKolinde vevwile mujimbu vambulwile vaka-Kulishitu, “vetavile, kaha vavambapachishile.” (Vilinga 18:8) Ngocho nayove nawa, kulinangula Mbimbiliya chatela kukulingisa witavile ngwove yapwa hiMazu aKalunga vahwima. Chilongesa chaMbimbiliya chatela kukukafwa ufwelele muvyuma ashika Kalunga namungolo jakulwila jatwama muwana waYesu.—Yoshuwa 23:14; Vilinga 4:12; WaChimoteu 2, 3:16, 17.
KWAZANA NAVATU MUCHANO WAMUMBIMBILIYA
8. Vyuma muka navikulingisa ulwezeko vakwenu vyuma uli nakulinangula?
8 Omu naupwa chikuma nalufwelelo, nauchiwana jino kupwa chachashi kuli ove kulwezako vakwenu vyuma unalinangula. (Yelemiya 20:9) Naupwa chikuma natwima yakulweza vakwenu vyaKalunga navyuma ajina.—Wavaka-Kolinde 2, 4:13.
9, 10. (a) Uno unahase kuputuka kwazana naveya muchano wamuMbimbiliya? (b) Watela kulinga ngachilihi nge uli nakusaka kwazana mulimo wakwambulula hamwe naVinjiho jaYehova?
9 Unahase kuputuka kwazana vyuma uli nakulinangula hakuvihanjika mumangana kuli vausoko wove, namasepa jove, navaze watunga navo, navakwenu vaka-milimo nawa. Kutwala muze jino musaka kwazananga mumulimo wakwambulula naVinjiho jaYehova. Halwola kanelu, shimutwila chihande kana naChinjiho uze ali nakukunangula Mbimbiliya. Nge musoloka kupwa uwakutamo kwazana mumulimo wakwambulula hasanga, kaha navakalongesa vyuma mangana yove nauze ali nakukunangula mukaliwane navakulwane vavali vamuchikungulwilo.
10 Echi nachikukafwa wijive kanawa vakulwane vamwe vauKulishitu vaze veji kulamanga utanga waKalunga. (Vilinga 20:28; WaPetulu 1, 5:2, 3) Nge ava vakulwane navamona ngwavo unevwishisa kunangula chamaputukilo chamuMbimbiliya, kaha uli nakutwama kweseka najishimbi jaKalunga, nakusaka nawa chikupu kupwa umwe waVinjiho jaYehova, kaha navakakulweza ngwavo unatemo kwazana nalizavu mumulimo kupwa umuka-kwambulula mujimbu wamwaza wakuzeneka kumbapachisa.
11. Vyuma muka vatela kwalumunako vatu vamwe numba vatengamo kwambulula mujimbu hasanga?
11 Nyi pamo watela kwalumunako vyuma vimwe mukuyoya chove numba utengamo kwambulula mujimbu hasanga. Pamo watela kulitwamina tato yize unalingilanga kupenge. Ngocho, shimbu kanda ulombe kupwa umuka-kwambulula wakuzeneka kumbapachisa, watela kwecha vilinga vimwe vyavipi chikuma vyakufwana nge ujila, utakwa, chipwe kunwa maundu mujila yakuhenga.—Wavaka-Kolinde 1, 6:9, 10; Wavaka-Ngalesha 5:19-21.
KUPIHILILA NAKWALUMUKA
12. Mwomwo ika kupihilila nakwalumuka chasakiwila?
12 Kuli vyuma vyeka watela kulinga numba utengamo kukumbapachisa. Kaposetolo Petulu ambile ngwenyi: “Pihililenu nakwalumuka, kindulukenu cheka, mangana milonga yenu yashili vakayijimbangane.” (Vilinga 3:19) Kupihilila nakwalumuka chapwa kwivwa kupihya havyuma vimwe unalingi. Kupihilila nakwalumuka chatamo kuli mutu uze apwilenga nachiyoyelo chachipi, oloze chasakiwa nakuli mutu uze apwilenga nachiyoyelo chamwaza. Mwomwo ika? Mwomwo vatu vosena vapwa vaka-shili kaha vatela kuvakonekela kuli Kalunga. (Wavaka-Loma 3:23; 5:12) Shimbu kanda ulinangule Mbimbiliya, kawejivile mwayile muchima waKalungako. Ngocho kawahashile kutwama mwaya muchima waKalungako. Shikaho, watela kupihilila nakwalumuka.
13. Uno kwalumuka chapwa chika?
13 Mutu napihilila atela jino kwalumuka, chipwe ngwetu ‘kukinduluka cheka.’ Kawatela kaha kwivwa kupihya havyuma walingile kunyimako. Oloze watela kukana chiyoyelo chove chakunyima nakufwila jino kulinganga vyuma vyakwoloka. Shikaho, shimbu kanda vakumbapachise, watela kupihilila nakwalumuka.
KULIHANA OVE LYAVENE
14. Chuma muka chachilemu watela kulinga shimbu kanda vakumbapachise?
14 Kuli nawa chuma chikwavo chachilemu watela kulinga shimbu kanda vakumbapachise. Watela kulihana ove lyavene kuli Yehova Kalunga.
15, 16. Kulihana ove lyavene kuli Kalunga chalumbununa ika, kaha vyuma muka vyeji kulingisanga mutu kulinga ngocho?
15 Omu naulihana kuli Yehova Kalunga mukulomba, uli nakumushika ngwove naukamuzachilanga haya myaka yosena. (Lushimbi lwamuchivali 6:15) Mwomwo ika mutu atela kulinga chuma kanechi? Achishinganyeke hali lunga ali nakusaka kumbata pwevo. Omu mwejiva vyuma vyavivulu hali uze pwevo nakumona vilinga vyenyi, nachimulingisa jino apandame chikuma kuli ikiye. Kutwala muze himwamulweza jino ngwenyi ali nakusaka kumumbata. Enga, kumbata nachikamunehela milimo yeka yayivulu. Oloze zangi yikiko nayimulingisa alinge chuma kanechi chachilemu.
16 Omu naumwijiva Yehova nakumuzanga, nachikulingisa jino umuzachilenga namuchima wove wosena hakumulemesa. Kala mutu mwasaka kukavangiza MwanaKalunga, Yesu Kulishitu, atela ‘kulikanyisa ivene.’ (Mako 8:34) Tweji kulikanyisanga etu vavene hakuhona kulingisa vyuma twafwila vituhonese kwononoka Kalunga. Shikaho, watela kumona kulinga mwaya muchima waYehova Kalunga kupwa chachilemu mukuyoya chove shimbu kanda vakumbapachise.—WaPetulu 1, 4:2.
KUHONESA WOMA
17. Mwomwo ika vatu vamwe veji kuhonenanga kulihana kuli Kalunga?
17 Vatu vamwe veji kuhonanga kulihana kuli Yehova mwomwo yakwivwila woma chuma kanechi chachilemu. Pamo veji kuchinanga kukalyambulula kuli Kalunga hakupwa vaka-Kulishitu vakulihana. Veji kushinganyekanga ngwavo chapwa chamwaza kuhona kulihana kuli Yehova mwomwo nge navalihana kuli ikiye kaha pamo navakahona, ngocho navakevwisa Yehova kupihya.
18. Vyuma muka navikulingisa ulihane kuli Yehova?
18 Kulinangula kuzanga Yehova, nachikulingisa ulihane kuli ikiye nakuzata nangolo mangana uyoye kweseka namwaya kulihana chove. (Muka-kwambulula 5:4) Hakulihana kuli Kalunga, nausaka ‘kutambukanga nganomu atela Mwata, nakumwivwisa kuwaha mwosena.’ (Wavaka-Kolose 1:10) Kumuzanga Kalunga nachikulingisa uhone kushinganyeka ngwove kulinga mwaya muchima wenyi chapwa chachikalu. Mwitavila chikupu mazu asonekele kaposetolo Yowano akwamba ngwenyi: “Echi chikiko vene kumuzanga Kalunga, kulamanga jishimbi jenyi. Kaha jishimbi jenyi kajeshi jajikaluko.”—WaYowano 1, 5:3.
19. Mwomwo ika kawatela kwivwa womako hakusaka kulihana kuli Kalunga?
19 Kawatela kupwa wakukupuka mwosena numba ulihane kuli Kalungako. Yehova ejiva oho hakumina ngolo jove ngocho keshi kusaka ulinge vyuma vize kaweshi kuhasa kulingako, nduma. (Samu 103:14) Ali nakusaka ufukile, ngocho mwakukafwanga nakukukundwiza. (Isaya 41:10) Ijiva ngwove nge naufwelelanga muli Yehova namuchima wove wosena, kaha “ikiye mwasungamisa jijila jove.”—Vishimo 3:5, 6.
KUSOLOLA KULIHANA CHOVE KUHICHILA MULUMBAPACHISO
20. Mwomwo ika kulihana chove kuli Yehova kachatela kukumina kaha kupengeko?
20 Kushinganyeka havyuma tunashimutwila nachikukafwa ulihane ove lyavene kuli Yehova kuhichila mukulomba. Kala mutu azanga Kalunga atela nawa ‘kukundwiza nakanwa kenyi nakuwana ulwilo.’ (Wavaka-Loma 10:10) Uno muhasa kulinga ngachilihi ngocho?
21, 22. Uno nauhasa ‘kukundwiza’ ngachilihi lufwelelo lwove?
21 Watela kulweza kalama wakutwaminyina muchikungulwilo chenu ngwove uli nakusaka vakumbapachise. Ikiye mwalweza jino vakulwane vamwe vahituluke nayove muvihula vize vili nakulumbununa kunangula chamaputukilo chamuMbimbiliya. Nge ava vakulwane navetavila ngwavo unatemo, kaha navakulweza ngwavo navakumbapachisa hakukunguluka nachikavangizaho. * Hakukunguluka kana heji kupwanga chihande chakulumbununa lumbapachiso. Muka-kuhanjika chihande kanechi eji kulwezanga vaze navaya kulumbapachiso vakumbulule vihula vivali vyavyashi mangana ‘vakundwize’ lufwelelo lwavo.
22 Lumbapachiso lukiko nalukusolola nge unalihane chikupu kuli Kalunga nakupwa jino umwe waVinjiho jaYehova. Vatu navambapachisa veji kuvajimikanga mumeya mangana vasolole kuvatu nge vanalihane kuli Yehova.
MULWALUMBUNUKILA LUMBAPACHISO LWOVE
23. Kumbapachisa “mulijina lyaTata naMwana naShipilitu [ya]jila” chalumbununa ika?
23 Yesu ambile ngwenyi tumbaji twenyi navakavambapachisa “mulijina lyaTata naMwana naShipilitu [ya]jila.” (Mateu 28:19) Echi chalumbununa nge uze ali nakuya kulumbapachiso nejiva ngolo jakuyula atwama najo Yehova Kalunga naYesu Kulishitu. (Samu 83:18; Mateu 28:18) Kaha nejiva nawa mulimo washipilitu yajila yaKalunga, chipwe ngwetu ngolo jize jeji kuzatanga.—Wavaka-Ngalesha 5:22, 23; WaPetulu 2, 1:21.
24, 25. (a) Uno lumbapachiso lwemanyinako ika? (b) Chihula muka chili nakusakiwa kukumbulula?
24 Oloze lumbapachiso kalwapwa kaha kujimika mutu mumeyako. Lumbapachiso lwemanyinako chuma chimwe chachilemu. Kukujimika mumeya chalumbununa nge unafu kuchiyoyelo chove chakunyima. Kaha kukufwapula mumeya chalumbununa nge unahinduka jino ulinge mwaya muchima waKalunga. Kaha anuka nawa ngwove unalihane kuli Yehova Kalunga ivene, keshi kumilimo, chipwe kuvatu veka, chipwe kuliukako. Kulihana chove nalumbapachiso himaputukilo akupwa nausepa wamwaza naKalunga, usoko wakukola chikuma.—Samu 25:14.
25 Lumbapachiso kalwapwa hikatachikijilo kakusolola nge mutu nawane lyehi ulwiloko, nduma. Kaposetolo Paulu asonekele ngwenyi: “Ulwilo wenu enu vavene uzatenunga nawoma nakuchikima.” (Wavaka-Fwilipi 2:12) Lumbapachiso lwapwa kaha himaputukilo. Uno nauhasa kutwalaho lika ngachilihi kulilamina muzangi yaKalunga? Kapetulu wamakumishilo mwakumbulula chihula kanechi.
[Kwinyikila chamwishi]
^ par. 21 Hakukunguluka chosena chaVinjiho jaYehova, chachindende nachechi chachinene, veji kumbapachisanga vatu.
VYUMA YANANGULA MBIMBILIYA
▪ Lumbapachiso lwavaka-Kulishitu lwapwa kujimika mutu wosena mumeya, keshi nge kumusapwila kaha meyako.—Mateu 3:16.
▪ Mutu atela kulinangula chinyingi nakupwa nalufwelelo nakupihilila nakwalumuka, nakulihana ivene kuli Kalunga numba jino vamumbapachise.—Yowano 17:3; Vilinga 3:19; 18:8.
▪ Hakusaka kulihana kuli Yehova, watela kulikanyisa ove lyavene, nge muze vatu valikanyishile vavene nakukavangiza Yesu.—Mako 8:34.
▪ Lumbapachiso lweji kusolola nge mutu nafu kuvilinga vyenyi vyakunyima nakuyoya jino alinge mwaya muchima waKalunga. —WaPetulu 1, 4:2.
[Vihula vyaChilongesa]
[Muvwimbimbi halifwo 180]
Kupwa nachinyingi chakutachikiza Mazu aKalunga hichuma chachilemu chize nachilingisa mutu atengamo kumumbapachisa
[Muvwimbimbi halifwo 180]
Lufwelelo lwatela kukulingisa wazane navakwenu vyuma uli nakulinangula
[Muvwimbimbi halifwo 180, 181]
Kutala unalihane ove lyavene kuli Kalunga kuhichila mukulomba nyi?
[Muvwimbimbi halifwo 181]
Lumbapachiso lwalumbununa nge mutu nafu kuvilinga vyenyi vyakunyima nakuyoya jino alinge mwaya muchima waKalunga
