1. ¿Kenke se tekichijketl kinejki ma kiatsonpoliuiltikaj?

KEMA se tekichijketl katli euayaya Etiopía kiitak atl, kiijtok ma kiatsonpoliuiltikaj. ¿Kenke? Pampa Felipe kinextilijtoya  ika Biblia Jesús eliyaya nopa Mesías katli ualaskia. Nopa tekichijketl tlauel kipaktik tlen Felipe kimachtik, yeka kiiljuik ma kiatsonpoliuilti (Hechos 8:26-36, TNM).

2. ¿Kenke monekiskia tikitas tlaj nojkia kualtias timoatsonpoliuiltis?

² Tlaj ya timomachtik ininuaya Jehová itlajtoltemakauaj nopa sekij tlamachtili ipan ni amochtli, monekiskia tikitas tlaj nojkia kualtias timoatsonpoliuiltis. Ipan Biblia timomachtik nochipa tiitstosej ipan Xochimili (Mateo 5:5; Apocalipsis [Revelación] 21:3, 4). Nojkia timomachtik katli miktokej ayokmo itstokej uan toTeotsij kinyolkuis (Eclesiastés 9:5; Juan 5:28, 29). Uelis nojkia timonechikoua ininuaya Jehová itlajtoltemakauaj, uan tikitstok kiueyichiuaj toTeotsij kej kinamiki (Juan 13:35). Uan nama, tijchijtok tlen tlauel ipati pampa tijpeualtijtok kuali timouika iuaya Jehová.

3. 1) ¿Tlake kinnauatik Jesús itokilijkauaj? 2) ¿Kenijkatsa moatsonpoliuiltiaj Cristo itokilijkauaj?

³ ¿Kenijkatsa uelis tijnextis nelia tijneki tijtekipanos toTeotsij? Jesús kiijtok: “Xiakaj, uan xijchiuakaj ma elikaj notokilijkauaj maseualmej tlen nochi altepemej, xikinatsonpoliuiltikaj” (Mateo 28:19, TNM). Jesús kinextik kenijkatsa timoatsonpoliuiltisej, pampa kema ya kichijki, nochi itlakayo atsonpolijki uan amo san kitekilijkej atl ipan itsonteko (Mateo 3:16, TNM).

4. ¿Tlake kinextia se akajya kema moatsonpoliuiltia?

⁴ Katli kinekij mouampojchiuasej iuaya Jehová moneki moatsonpoliuiltisej. Kej nopa kinextisej kinekij kitekipanosej toTeotsij uan kinpaktia kichiuas tlen ya kineki (Salmo 40:7, 8). Tlaj tijneki timoatsonpoliuiltis moneki tijchiuas se keski tlamantli.

5. 1) ¿Tlake moneki kichiuas se akajya tlaj kineki moatsonpoliuiltis? 2) ¿Kenke tlauel moneki ma timonechikokaj?

⁵ Uelis ya tijpeualtik tikixmati Jehová uan Jesucristo pampa se akajya mitsmachtia (xijpoua Juan 17:3). Maske tijchijtok nopa, nojua moneki ximomachtijto. Uan nojkia moneki xijmati “senkistok nochi tlen toTeko kineki kichiuas” (Colosenses 1:9). Uan tlaj timonechikos ininuaya Jehová itlajtoltemakauaj, tlauel mitspaleuis (Hebreos 10:24, 25). Tlaj tijchiuas nopa, tlauel kuali tikixmatis toTeotsij.

6. ¿Tlake moneki tijmatis tlaj tijneki timoatsonpoliuiltis?

⁶ Tlaj tijneki timoatsonpoliuiltis amo moneki tijtsontekontlalis nochi tlen tlamachtia Biblia. Xikilnamiki, maske nopa tekichijketl tlen euayaya Etiopía, kimatiyaya se keski tlamantli, kipaleuijkej kikuamachilis se keski tlamachtili (Hechos 8:30, 31). Uan maske tlauel timomachtis, nochipa tikixmajtias miak tlamantli tlen toTeotsij (Eclesiastés 3:11). Yeka, tlaj tijneki timoatsonpoliuiltis ximomachti uan xijneltoka tlamachtili tlen tlauel pankisa ipan Biblia (Hebreos 5:12). Moneki tijneltokas mijkatsitsij ayokmo itstokej, tlake kichiuas toTeotsij iTlanauatijkayo uan kenke tlauel moneki tijmatisej toTeotsij itoka uan tijtekiuisej.

7. ¿Tlake moneki tijnextis kema timomachtis Biblia?

⁷ Amo san moneki timomachtis Biblia, pampa “se tlakatl axueli kiyolpaktis toTeko intla axkineltoka temachtli tlen toTeko kiijtoua” (Hebreos 11:6). Biblia kiijtoua se keskij tlen euayayaj Corinto “kineltokakej” uan moatsonpoliuiltijkej kema kinmachtijkej Cristo itokilijkauaj (Hechos 18:8). Ta nojkia moneki tijchiuas nopa. Moneki xijneltoka Biblia nelia toTeotsij iTlajtol, toTeotsij nelia kichiuas tlen mosentlalijtok uan xijneltoka uelis  timomanauis ika Jesús inemilis (Josué 23:14; Hechos 4:12; 2 Timoteo 3:16, 17).

8. ¿Tlake mitsyololinis xitemachti tlen timomachtijtok?

⁸ Tlaj kuali titlaneltokas tlauel tijnekis titlajtolmoyauas (Jeremías 20:9). Uan tijnekis titemachtis tlen toTeotsij uan tlen mosentlalijtok kichiuas (xijpoua 2 Corintios 4:13).

9, 10. 1) ¿Ajkia inijuantij uelis tikinmachtis ika Biblia? 2) ¿Tlake moneki tijchiuas tlaj tijnekis titlajtolmoyauas kajkalpa ininuaya toikniuaj?

⁹ Uelis peuas tikinmachtis mochampoyouaj, mouampoyouaj, mokalnechkauaj uan katli ininuaya titekiti, san moneki amo xikinyolkoko. Teipa, tlaj nojkia tijnekis titlajtolmoyauas kajkalpa ininuaya toikniuaj, monekis tikiljuis katli mitsmachtia. Tlaj kiitas kena kualtias, kiniljuis ueuejtlakamej, uan teipa omej ueuejtlakamej monojnotsasej inmouaya.

¹⁰ Ni mitspaleuis xikinixmati ueuejtlakamej katli techmokuitlauiaj (Hechos 20:28; 1 Pedro 5:2, 3). Inijuantij kiitasej tlaj tijkuamachilia tlen tlauel pankisa ipan Biblia, tlaj tijneltoka, tlaj tijchiua tlen toTeotsij tlanauatia uan tlaj nelia tijneki timochiuas se tlen Jehová itlajtoltemakauaj. Tlaj kena, mitsiljuisej kualtias titlajtolmoyauas maske ayamo timoatsonpoliuiltijtok.

11. ¿Tlake moneki kichiuas se akajya tlaj kineki tlajtolmoyauas?

¹¹ Kemantika ueuejtlakamej kiitaj katli kineki tlajtolmoyauas kajkalpa, nojua kipoloua kichiuas se keski tlamantli. Uelis moneki ayokmo kichiuas tlen kichiuayaya ichtakatsi. Yeka, tlaj tijneki titlajtolmoyauas moneki amo ximomekati, amo ximoiuinti uan amo xijtekiui drogas (xijpoua 1 Corintios 6:9 uan 10, uan Gálatas 5:19-21).

12. ¿Kenke moneki timoyolkuepas?

¹² Tlaj tijneki timoatsonpoliuiltis moneki xijchiua sekinok tlamantli. Nopa apóstol Pedro kiijtok: “Ximoyolpatlakaj uan ximokuepakaj [...]. Uan yajaya inmechtlapojpoljuis inmotlajtlakoljuaj” (Hechos 3:19). Kema se nelia moyolkuepa kiyolkokoua tlen kichijtok. Moneki moyolkuepasej katli tlauel tlajtlakolchijtokej o momekatijtokej uan nojkia katli amo tlaixpanotokej. ¿Kenke? Pampa nochi titlajtlakolchiuanij uan moneki ma techtlapojpoljui toTeotsij (Romanos 3:23; 5:12). Kema ayamo timomachtiyaya Biblia tijchiuayaya tlen amo kuali, pampa amo tijmatiyaya kej toTeotsij kineki ximonejnemilti. Yeka, moneki nojkia ximoyolkuepa.

13. ¿Tlake nojkia moneki tijchiuas kema timoyolkuepas?

¹³ Katli moyolkuepa moneki ayokmo kichiuas tlen achtouia kichiuayaya. Ni kiijtosneki kiyolkokoua tlen kichijki uan ayokmo monejnemiltia kej achtouia. Moneki mosentlalijtos kichiuas san tlen kuali. Uajka, tlaj tijneki timoatsonpoliuiltis, moneki timoyolkuepas uan ayokmo tijchiuas tlen achtouia tijchiuayaya.

14. ¿Tlake nojua moneki tijchiuas tlaj ayamo timoatsonpoliuiltia?

¹⁴ Tlaj ayamo timoatsonpoliuiltia moneki xijmaktili Jehová monemilis.

15, 16. ¿Tlake kiijtosneki kema se akajya motemaktilia, uan kenke kichiua nopa?

¹⁵ Kema se akajya motemaktilia, momaijtoua ika nochi iyolo uan kiiljuia Jehová san yaya kiueyichiuas (Deuteronomio 6:15). ¿Uan kenke se akajya kichiuaskia nopa? Pampa kiiknelia Jehová. Kema se tlakatl kiixtoka  se siuatl kiiljuia kineki kuali kiixmatis. Kema itstok iuaya kiita kinextia kuali tlamantli, yeka nojua kiixtokatia. Teipa, kiiljuia ma monamikti iuaya. Uan maske ya kimati kipias miak tekitl tlaj mosiuajtis, mosenkauas iuaya pampa tlauel kiiknelia.

¹⁶ Kema tikixmatij uan tikikneliaj Jehová, tijnekij tijtekipanosej ika nochi toyolo uan amo tleno tijkauaj ma techtsakuili. Yeka, katli mochiua Cristo itokilijka moneki “kitlauelkauas tlen yaja kineki” (Marcos 8:34). Uan kema se akajya kichiua nopa, kinextia amo tleno kikaua ma kitsakuili kineltokas toTeotsij. Uajka, tlaj tijneki timoatsonpoliuiltis, achtoui moneki tijnextis nelia tijneki tijchiuas tlen Jehová kineki (xijpoua 1 Pedro 4:2).

17. ¿Kenke sekij amo kinekij motemaktilisej?

¹⁷ Sekij majmauij motemaktilisej pampa moiljuiaj nopa se tlamantli tlen tlauel ipati. Uelis majmauij pampa moiljuiaj nochi Cristo itokilijkauaj katli motemaktilijtokej monekis kintlajtolsenkauas toTeotsij. Uan nojkia pampa uelis kichiuasej ma mokueso Jehová tlaj tlajtlakolchiuasej.

18. ¿Tlake mitsyololinis tijmaktilis Jehová monemilis?

¹⁸ Tlaj tlauel tikiknelis Jehová, tijnekis timotemaktilis uan tijchiuas tlen tikiljuik (Eclesiastés 5:4). Teipa tijnekis timonejnemiltis ‘kej kinamiki kichiuasej iaxkauaj toTeko uan ya kipaktis nochi tlen tijchiuas’ (Colosenses 1:10). Tlaj nelia tikiknelia toTeotsij, tijmatis amo ouij tijchiuas tlen ya kineki. Uelis nojkia tikijtos kej apóstol Juan: “Uajka para tikikneliaj toTeko kineki kiijtos tikintokiliaj itlanauatiljuaj, uan itlanauatiljuaj axouij” (1 Juan 5:3).

19. ¿Kenke moneki amo timajmauis timotemaktilis?

 ¹⁹ ToTeotsij amo kiijtoua tlaj katli motemaktilia moneki ayokmo kema mokuapolos. Ya kimati tlake tiuelij tijchiuaj uan tlake amo, uan amo kema technauatia ma tijchiuakaj tlen amo tiueliskiaj (Salmo 103:14). ToTeotsij kineki kuali xiitsto uan ya mitspaleuis (xijpoua Isaías 41:10). Tlaj timotemachis ika nochi moyolo ipan Jehová, ya “mitsyakanas ipan se ojtli tlen xitlauak” (Proverbios 3:5, 6).

20. ¿Kenijkatsa uelis tijnextis ya tijmaktilik Jehová monemilis?

²⁰ Tlaj tijneki tijmaktilis Jehová monemilis, moneki tijchiuas se tlamaijtoli kema tiitstos moselti. Nochi katli nelia kiikneliaj toTeotsij, moneki ‘kiniljuisej sekinok kineltokaj Jesucristo techmakixtia’ (Romanos 10:10). ¿Kenijkatsa moneki kichiuasej nopa?

21, 22. ¿Kenijkatsa uelis tijnextis o ‘tikiniljuis sekinok’ tlen tijneltoka?

 ²¹ Tlaj tijneki timoatsonpoliuiltis xikiniljui ueuejtlakamej kampa timonechikoua. Uan se keskij ueuejtlakamej kiompauisej mouaya se keski tlamantli tlen kintlajtlaniaj katli moatsonpoliuiltiaj. Tlaj kiitasej kena uelis timoatsonpoliuiltis, mitsiljuisej uelis tijchiuas ipan se ueyi tlanechikolistli. * Nopaya, ipan se tlamachtili moixtoma tlake kiijtosneki kema se moatsonpoliuiltia. Nojkia kintlajtlaniaj ome tlamantli tlen moneki kinankilisej chikauak. Kej ni kinextiaj kinekij ‘kiniljuisej sekinok’ tlen kineltokaj.

²² Kema timoatsonpoliuiltis tijnextis tijmaktilijtok toTeotsij monemilis, uan nojkia timochiuas se tlen Jehová itlajtoltemakauaj. Katli kichiua ni moneki nochi itlakayo atsonpoliuis uan kej nopa kinextis motemaktilijtok.

23. ¿Tlake kiijtosneki se moatsonpoliuiltis ika Jesús ‘iTata itoka uan ika ya itoka uan ika iTata itonal’?

²³ Jesús kiijtok itokilijkauaj moatsonpoliuiltiskiaj ‘ika iTata itoka uan ika ya itoka uan ika iTata itonal’ (Mateo 28:19, TNM). Ni kiijtosneki, moneki kimatisej san Jehová uan Jesucristo tlanauatiaj (Salmo 83:18, TNM; Mateo 28:18). Uan nojkia kimatij tlake kichiua toTeotsij itonal o itetikayo (Gálatas 5:22, 23; 2 Pedro 1:21).

24, 25. 1) ¿Tlake kiixnextia se akajya kema moatsonpoliuiltia? 2) ¿Tlake tikitasej ipan seyok tlamachtili?

²⁴ Kema se akajya moatsonpoliuiltia kichiua tlen tlauel ipati, pampa ipan nopa tonali kejuak miki, ni kiixnextia  ayokmo monejnemiltia kej achtouia. Uan kema kisa ipan atl kiixnextia kichiuas san tlen toTeotsij kineki. Moneki tikilnamiktos tijmaktilik Jehová monemilis uan amo se maseuali. Uajka, kema timotemaktilis uan timoatsonpoliuiltis, peuas kuali timouampojchiuas iuaya toTeotsij (Salmo 25:14).

²⁵ Tlaj timoatsonpoliuiltis amo kiijtosneki ya timomanauik. Nopa apóstol Pablo kiijtok: “Sejse tojuantij tijpiaj toteki para tijmokuitlauisej tlen tojuantij tonemilis” (Gálatas 6:5). Uajka, kema se moatsonpoliuiltia peua kichiua tlen ika uelis momanauis. Ipan seyok tlamachtili tikitasej tlake techpaleuis nochipa ma techiknelijto toTeotsij uan amo kema ma tijkauakaj.