1. ¿Keyej tajtanik takat ueyichiujkej akin kayot Etiopía maj kiauianij?

SE UEYICHIUJKEJ akin tekitia itech kaltekiuaj tein moajsia Etiopía, kijtoj: “Nikan ongak at. ¿Xe amo uelis ma xinechaui tech nijin at?”. Se imomachtijkauj Cristo itokay Felipe, yekin kinextilijka itech Biblia, ke Jesús katka Mesías akin moijtojka ualaskia. Tein kikakik ajsik itech iyolo uan yejua ika tajtanik maj kiauianij (Hechos 8:26-36).

2. ¿Keyej moneki tikonnemilisya tionmoauis?

² Komo tionmomachtijya ika nejmachkayot okseki capítulos tein kipia nejin amaix, iuan se itaixpantijkauj Jiova, xa no tikonmachilia uelisya tiontajtanis: ‘¿Xe ayamo uelis maj nechauikan?’. Tejuatsin tionmomachtijya ke Biblia motenkaua, akin tatakamatij nemiskej nochipaya itech Xochital (Lucas 23:43, TNM; Apocalipsis 21:3, 4). No tikonmatikya keniuj yekmelauj moajsij mikemej uan neajokuilis tein  tikchiaj (Eclesiastés 9:5; Juan 5:28, 29). Xa tionmonechikojtokya iniuan itaixpantijkauan Jiova, uan tikonitakya ke yejuan kiueyichiuaj Dios kemej kiuelita (Juan 13:35). Uan tein okachi kuali, xa peuakya kuali tionmouika iuan Jiova Dios.

3. 1) ¿Toni tanauatil Jesús kinmakak itatojtokakauan? 2) ¿Keniuj mochiua neauilis kemej Cristo kinextij?

³ ¿Keniuj uelis tikonnextis ke tikonneki tikontekitilis Dios? Jesús kinnauatij itatojtokakauan: “Xiyakan [...] uan xikinnextilikan nochi in taltikpakuani [...] ma mochiuakan nomomachtijkauan. Uan xikinauijtinemikan” (Mateo 28:19). Jesús techkauilij neskayot, ta no moauij, sayoj ke amo kikuaatekijkej (Mateo 3:16). Tajtol griego tein mokepa kemej neauilis kijtosneki “senkis kikalakiaj itech at”. Yejua ika, akin kiauiaj kemej Cristo kinextij, nochi kipankalakiaj itech at.

4. ¿Toni se kinextia keman se moauia?

⁴ Nochin akin kinekij kuali mouikaskej iuan Jiova moneki moauiskej. Keman timoauiaj, tiknextiaj sentaixpan ke tiknekij tiktekitiliskej Dios uan techyolpaktia tikchiuaskej itanejnekilis (Salmo 40:7, 8). Axkan, achtopa ke uelis se moauis, moneki se kichiuas seki taman.

5. 1) ¿Toni yekinika taman moneki se kichiuas uan ijkon uelis se moauis? 2) ¿Keyej motelneki maj se youi itech ininnechikoluan akin kichiuaj kemej Cristo?

⁵ Tejuatsin peuakya tikonchiua yekinika taman. ¿Katiyejua nejin? Tikonixmatis Jiova Dios uan Jesucristo, xa ika nemachtil ika Biblia tein tikonselijtok (xikonixtajtolti Juan 17:3). Uan amo sayoj yejua,  ta uelis tionmomachtis okachi. Akin kichiuaj kemej Cristo, kinekij maj Dios ‘kinmatilti nochi tein kineki maj kichiuakan’ (Colosenses 1:9). Ininnechikoluan itaixpantijkauan Jiova no mitsontelpaleuis itech nejon. Yejua ika moneki amo xionmopolouili (Hebreos 10:24, 25). Komo tionyoui nochi nechikolmej, tikonixmatis Dios.

6. ¿Toni moneki tikonmatis tein kijtoua Biblia uan ijkon uelis tionmoauis?

⁶ Nejin amo kijtosneki xionueli nochi tein kijtoua Biblia uan ijkon uelis tionmoauis. Xikonelnamiki, maski nejon ueyichiujkej etíope kimatiaya seki taman, monekik maj kipaleuikan maj kiajsikamati okseki taman tein kijtoua Biblia (Hechos 8:30, 31).  Tejuatsin no ijkon tikonsentokas tionmomachtijtos miak taman. Tein melauj, amo keman tikonmatis nochi tein kijtoua Dios (Eclesiastés 3:11). Tein kemaj, achto ke tionmoauis moneki tikonixmatis uan tikonselis seki itamachtilisuan Biblia tein tayekantok (Hebreos 5:12). ¿Kemej toni? Moneki tikonmatis keniuj yekmelauj moajsij mikemej, uan tikonitas tel tayekantok itokay Dios uan iTekiuajyo.

7. Kemej tejuatsin tikonselijtok nemachtil ika Biblia, ¿toni monekiskiaya maj mitsonpaleui xikonpia?

⁷ Okse taman, amo sayoj moneki tikpiaskej taixmatilis, ta “komo se aksa amo takuautamatinemis iuan Dios, ijkuakon amo uelis kiyolpaktijtinemis” (Hebreos 11:6). Biblia techtapouia tein kichiujkej sekin akin nemiaj itech altepet Corinto: keman kikakkej tein tanojnotsayaj imomachtijkauan Cristo, ‘takuaujtamatkej itech nochi tein kikakiaj, uan kinauijkej’ (Hechos 18:8). No ijkon, nemachtil ika Biblia tein tikonselijtok, monekiskiaya maj mitsonpaleui senkis xiontakuaujtamati ke Biblia yejua iTajtol Dios. Uan no xiontakuaujtamati ke Dios kichiuas nochi tein motenkaujtok, uan ika inemilis Jesús tein kitemakak uelis tionmakisas (Josué 23:14; Hechos 4:12; 2 Timoteo 3:16, 17).

8. ¿Toni mitsonolinis xiontetapoui tein tionmomachtijtok?

⁸ Keman okachi chikauak yeski motakuaujtamatilis, okachi ouij sayoj tejuatsin tikonmattos tein tionmomachtijtok (Jeremías 20:9). Tikontelnekis tiontetapouis tein kijtoua Dios uan itanejnekilisuan (xikonixtajtolti 2 Corintios 4:13).

9, 10. 1) ¿Akonimej uelis peuas tikontapouis itamachtilisuan Biblia tein melauak? 2) ¿Toni moneki tikonchiuas komo tikonneki tiontanojnotsatiuj kemej kichiuaj itaixpantijkauan Jiova?

 ⁹ Uelis peuas tikontapouis tein melauak kijtoua Biblia kemej amo tikonkualantis, mochankauan, motasojikniuan, akin ompakauin nemij uan akin iniuan tiontekiti. Satepan, amo tiomeyolouaj ke tikonnekis tiontanojnotsas kemej kichiuaj itaixpantijkauan Jiova. Ijkuak nejon, amo xionomeyoloua tiontajtos iuan iTaixpantijkauj Jiova akin iuan tionmomachtijtok Biblia. Komo kiita ke tikonchiujtokya tein moneki kichiuas se tanojnotskej, kiitaskej maj nanomen xionmosentilikan iniuan ome tayekananij itech kalnechikol.

¹⁰ Ijkon okachi tikonixmatis sekin tayekananij akin kichiuaj kemej Cristo, akin kinitaj iichkauan Dios (Hechos 20:28; 1 Pedro 5:2, 3). Yejuan kiitaskej ox tikonajsikamati uan tikonneltoka itamachtilisuan Biblia tein tayekantok, ox tikonchiujtok kemej kijtoua itanauatiluan Dios, uan ox yekmelauj tikonneki tionmochiuas tionitaixpantijkauj Jiova. Komo kemaj, mitsoniluiskej ke tikonchiujtokya tein motajtani uan uelisya tiontanojnotsatiuj iniuan, kemej se tanojnotskej akin ayamo moauia akin kitetapouia kuali tanauatilmej.

11. ¿Toni tachiualismej sekin xa monekis maj kikauakan achtopa ke uelis tanojnotsaskej kemej itaixpantijkauan Jiova?

¹¹ Uan kemansa, tayekananij kiitaj ke taltikpaknenkej moneki kikauas seki tachiualismej uan ijkon uelis tanojnotsatiuj kemej yejuan. ¿Kemej toni? Xa moneki kikauas se tachiualis tein kichiujtok ichtaka. Yejua ika, achtopa ke tiontajtanis ox uelisya tionmochiuas se tanojnotskej akin ayamo moauia, moneki amo xikonchiujto tajtakolmej kemej auilnemilis,  tauanalis uan tikonkuitos drogas (xikonixtajtolti Marcos 7:20-23; 1 Pedro 4:3).

12. ¿Keyej moneki timoyolnonotsaskej?

¹² Moneki tikonchiuas okseki taman uan ijkon uelis tionmoauis. Tatitanil Pedro kijtoj: “Ximoyolnemilikan [oso ximoyolnonotsakan] de namotajtakoluan uan ximokuepakan [oso ximopatakan] [...] uan ijkon Totajtsin Dios namechtapojpoluilis de namotajtakoluan” (Hechos 3:19). Keman aksa yekmelauj moyolnonotsa, kiyolkokoua tein kichiua. Nejin amo kijtosneki maj moyolnonotsakan sayoj akin auilnemij, ta no akin uelis moijtos ke chipaujkanemi. ¿Keyej? Porin tinochin titajtakouanij uan moneki maj techtapojpolui Dios (Romanos 3:23; 5:12). Keman tejuatsin ayamo tionmomachtiaya Biblia, amo tikonmatia katiyejua itanejnekilis Dios. Yejua ika, amo senkis tionuelia tionnemia kemej Dios kiyolpaktia. Kemej tikitaj, moneki tionmoyolnonotsas.

13. ¿Toni kijtosneki se mopatas?

¹³ Keman aksa moyolnonotsa, niman mopata. Kemaj, ijkuak tejuatsin ‘tionmopata’, tikonkaua ojti tein achto tikontojtokaya. Amo sayoj mitsonyolkokoua tein tikonchiuak, ta senkis tikonkaua. Uan moneki senkis tikontalis itech moyolo nochipa tikonchiuas tein kuali. Se moyolnonotsas uan se mopatas yejua ome taman tein moneki se kichiuas uan ijkon uelis se moauis.

14. ¿Toni okse taman moneki tikonchiuas uan ijkon uelis tionmoauis?

¹⁴ Okse taman tein moneki tikonchiuas uan ijkon  uelis tionmoauis: moneki tionmotemaktis iuan Jiova Dios.

15, 16. ¿Toni kijtosneki se motemaktis iuan Jiova uan toni techolinis maj tikchiuakan?

¹⁵ ¿Keniuj se motemaktia iuan Jiova? Itech se netataujtil tein se kichiua ika nochi se iyolo, se motenkaua iuan ke sayoj yejuatsin nochipa se kiueyichiuas (Deuteronomio 6:15). Axkan, ¿keyej kinekis aksa kichiuas se netenkaualis kemej nejon? Se neskayot, maj tikijtokan ke se takat kiluia se siuat ke kineki okachi kiixmatis. Keman okachi iuan monojnotsa uan kiita ikuali tachiualisuan, okachi kitasojta. Kemej tikmatij, ajsi tonal keman kiluia maj iuan monamikti. Uan maski keman monamiktis kipias okseki tekit tein kichiuas, netasojtalis tein kipialia kiolinis maj ijkon kichiua.

¹⁶ Keman tikixmatij uan tiktasojtaj Jiova, kichiua maj tiknekikan tiktekitilikan uan maj tikueyichiuakan nochi tein tiueliskej. Akin kineki kitojtokas iKonetsin Dios, Jesucristo, moneki ‘kikaujteuas itanejnekilis yejua san’ (Marcos 8:34). Uan ijkon tikchiuaj keman amo tikauaj totanejnekilis uan tein tikixtaliskej tikchiuaskej, maj techtsakuili tiktakamatiskej Dios. Yejua ika, achtopa ke tionmoauis, moneki xikontayekanaltijto tikonchiuas itanejnekilis Jiova (xikonixtajtolti 1 Pedro 4:2).

17. ¿Keyej sekin amo kinemiliaj motemaktiskej iuan Jiova?

¹⁷ Sekin amo kinemiliaj motemaktiskej iuan Jiova porin kimattokej ke nejon amo auil. Xa kimouiliaj maj kintatsakuilti Dios komo amo kichiujkej kemej  moneki kichiuas akin motemaktia iuan. Kinemiliaj xa tajtakoskej uan nejon kiyolkokos Jiova, uan yejua ika okachi kuali amo motemaktiaj iuan.

18. ¿Toni mitsonolinis xionmotemakti iuan Jiova?

¹⁸ Keman okachi mochikauas monetasojtalis iuan Jiova, mitsonolinis xionmotemakti iuan, uan tionmochikauas nochi tein tionuelis, tikonchiuas ijkon kemej kijtosneki netemaktilis (Eclesiastés 5:4). Satepan keman tionmotemaktisya, yekmelauj tikonnekis ‘tikonchiujtinemis sayoj tein kiyolpaktia’ (Colosenses 1:10). Netasojtalis tein tikonpialia Dios kichiuas maj amo ouij mitsonkisa tikonchiuas itanejnekilis. Xa no ijkon tikonmachilis kemej kijtoua itajtoluan tatitanil Juan: “Nestinemi ke melau tikpiaj ne tetasojtalis de Dios, kuak no tiktakamatij ya in tanauatil ten Dios technauatilia ma tikchiutinemikan. Uan [...] amo techmachililtia ke kox semi oui para se kintakamatinemis” (1 Juan 5:3).

19. ¿Keyej moneki amo tikonmouilis tionmotemaktis iuan Dios?

¹⁹ Dios amo kichia maj amo tajtakojkej akin iuan motemaktia. Jiova kimattok tein amo ueli tikchiuaj, uan amo keman techtajtania maj tikchiuakan tein amo tiueliskej (Salmo 103:14). Yejuatsin kineki kuali xionnemi uan yejua ika senkis mitsonpaleuis (xikonixtajtolti Isaías 41:10). Komo tiontakuaujtamati iuan Jiova ika nochi moyolo, uelis senkis tikonneltokas ke yejuatsin “kimelauas moojuan” (Proverbios 3:5, 6).

20. Keman tionmotemaktisya iuan Jiova, ¿keyej amo sayoj tejuatsin moneki xikonmatto?

²⁰ Ijkuak tionmonemilis tein timomachtijkejya, xa  tikonnekis tionmotemaktis iuan Jiova moselti itech se netataujtil. Axkan, akin yekmelauj kitasojtaj Dios moneki kichiuaskej okse tamanok: moneki ‘kinextiskej ininixpan miakej’ (1 Timoteo 6:12). ¿Keniuj se kichiua nejon?

21, 22. ¿Keniuj uelis ‘tikonnextis ininixpan miakej’ motakuaujtamatilis?

²¹ Xikonilui akin kinixyekana oloch tayekananij ke tikonneki tionmoauis. Yejua kiitas maj sekin tayekananij,  kiyekitakan mouan netajtanilmej tein ika motajtoua itamachtilis Biblia tein tayekantok. Komo yejuan kiitaj ke tikonchiujtokya tein motajtani, mitsoniluiskej ke uelis tionmoauis itech se ueyi nechikol tein mochiuas amo uejkaua. * Ijkuak nejon, motemaka  se tanojnots kampa kimelauaj tein kijtosneki neauilis. Akin kitemaka tanojnots, keman matami kinchiuilia ome netajtanilmej tein amo ouij akin moauitij, uan yejuan kinankiliaj chikauak. Nejin yejua se taman kemej uelis se ‘kinextis ininixpan miakej’ se itakuaujtamatilis.

²² Ika neauilis tionmoteixmatiltia ininixpan miakej ke tionmotemaktijya iuan Dios, uan tionmochiua tionitaixpantijkauj Jiova. Akin moauitij, senkis kinpankalakiaj itech at uan ijkon kinextiaj ininixpan miakej ke motemaktijkejya iuan Jiova.

23. ¿Toni kijtosneki se moauis “ika itokaytsin de Toueyitajtsin Dios uan de Ikonetsin Dios uan de in Yektikatsin Espíritu”?

²³ Jesús kijtoj ke imomachtijkauan moauiskiaj “ika itokaytsin de Toueyitajtsin Dios uan de Ikonetsin Dios uan de in Yektikatsin Espíritu” (Mateo 28:19). Nejin kijtosneki ke akin moauitij moneki kiixmatiskej tanauatil tein kipiaj Jiova Dios uan Jesucristo (Salmo 83:18; Mateo 28:18). No kiixmatij tein kichiua iyektikatsin espíritu Dios, oso ichikaualis tein tekititok (Gálatas 5:22, 23; 2 Pedro 1:21).

24, 25. 1) ¿Toni kijtosneki neauilis? 2) ¿Toni netajtanil moneki tiknankiliskej?

²⁴ Se moauis amo sayoj kijtosneki senkis se kalakis itech at, ta kijtosneki teisa tein motelneki. Ijkuak tionmoauij kemej yeskia “tionmiki”, oso tikonkaua ojti tein achto tikontojtokaya. Uan keman tionkisa itech at, kemej yeskia tionnemi, uan ijkuak peua tikonchiua itanejnekilis Dios. Amo keman xikonelkaua ke tionmotemaktia iuan Jiova Dios, uan amo itech se tekit, se teisa, iuan se taltikpaknenkej oso iuan  se nechikol. Ika monetemaktilis uan neauilis tejuatsin peua tel kuali tionmouika iuan Dios (Salmo 25:14).

²⁵ Tein kemaj, neauilis ayamo kijtosneki nemakixtilis. Tatitanil Pablo kijkuiloj: “Xiksentokakan ximotekitilijtokan ika mouilis uan uiuiyokalis uan ijkon nanmakisaskej” (Filipenses 2:12, TNM). Neauilis sayoj ipeujyan. Axkan, mochiua se netajtanil: ¿keniuj uelis tiksentokaskej tiyetoskej iuan Dios uan itech inetasojtalis? Itech capítulo tein ika tamiya nejin amaix kitemaka tanankilil.