1. Omolwashike elenga lyokuEtiopia lya li lya pula li ninginithwe?

“OMEYA ogo ngaka! Oshike ando tashi imbi ndje, ndi [ninginithwe, NW]?” Epulo ndyoka olya li lya pulwa kelenga lyokuEtiopia methelemumvo lyotango. Omukriste gwedhina Filippus okwa li e mu ulukile kutya Jesus oye Mesiasa omuuvanekwa.  Molwaashoka omulumentu ngoka Omuetiopia okwa li i inyengithwa noonkondo kwaashoka i ilongo mOmanyolo, okwa katuka onkatu. Okwa li e shi ulike kutya okwa hala okuninginithwa.—Iilonga 8:26-36.

2. Omolwashike u na okudhiladhila wa mana mo shi na ko nasha neninginitho?

² Ngele owa konakona nuukeka oontopolwa dha tetekele dhembo ndika pamwe nagumwe gwomOonzapo dhaJehova, otashi vulika u kale wa hala okupula to ti: ‘Oshike tashi imbi ndje ndi ninginithwe?’ Sigo oompano, owi ilonga kombinga yeuvaneko lyOmbiimbeli lyomwenyo gwaaluhe mOparadisa. (Lukas 23:43; Ehololo 21:3, 4) Owi ilonga wo kombinga yonkalo yolela yoonakusa nosho wo etegameno lyeyumuko. (Omuuvithi 9:5; Johannes 5:28, 29) Otashi vulika ho endathana nOonzapo dhaJehova pokugongala kwadho nowa mona kutya elongelokalunga lyadho olyashili. (Johannes 13:35) Oshinima shoka sha simanenena osho kutya owa tameka nale okukala u na ekwatathano naJehova Kalunga.

3. (a) Jesus okwa gandja elombwelo lini kaalanduli ye? (b) Okuninginithwa momeya ohaku ningwa ngiini?

³ Ongiini to vulu okuulika kutya owa hala okulongela Kalunga? Jesus okwa lombwelele aalanduli ye a ti: “Indeni ano, ka ningeni aantu ayehe aalongwa yandje, mu ya [ninginithe, NW].” (Mateus 28:19) Jesus okwa tula po oshiholelwa okupitila mokuninginithwa kwe momeya. Ka li a shashaminwa nomeya nenge a tilwa owala omeya pokati komutse. (Mateus 3:16) Oshitya shOshigreka shoka sha tolokwa “okuninginithwa” otashi ti okutula kohi yomeya. Onkee ano, eninginitho lyopaKriste otali ti okutula olutu lwomuntu aluhe thiluthilu kohi yomeya.

4. Eninginitho momeya otali ulike shike?

⁴ Eninginitho momeya oli li oshitegelelwa kwaayehe mboka ya hala okukala ye na ekwatathano naJehova Kalunga. Okuninginithwa montaneho ohaku ulike kutya owa hala okulongela Kalunga. Ohaku ulike kutya ou hole okulonga ehalo lye. (Episalomi 40:7, 8) Ihe opo u kale wa gwana okuninginithwa, ou na okukatuka oonkatu dhontumba.

5. (a) Onkatu yotango yini u na okukatuka opo u kale wa gwana okuninginithwa? (b) Omolwashike okugongala kwopaKriste kwa simana?

⁵ Owa tameka nale okukatuka onkatu yotango. Ngiini mbela? Omokumona ontseyo yokutseya Jehova Kalunga naJesus Kristus, tashi vulika okupitila mokukala nelandulathano lyokukonakona Ombiimbeli. (Johannes 17:3) Ihe opu na natango oshindji okwiilonga. Aakriste oya hala okukala yu ‘udha ontseyo yokutseya ehalo lyaKalunga.’ (Aakolossa 1:9, OB-1954) Okukala pokugongala kwOonzapo dhaJehova otaku ku kwathele noonkondo moshinima shika. Osha simana okukala pokugongala kwa tya ngaaka. (Aahebeli 10:24, 25) Okukala pokugongala nopwaa he na okufaula otaku ke ku kwathela u mone ontseyo oyindji yokutseya Kalunga.

6. Ou na okukala u na ontseyo yOmbiimbeli yi thike peni opo u kale wa gwana okuninginithwa?

⁶ Ino pumbwa okutseya kehe shimwe mOmbiimbeli opo u kale wa gwana okuninginithwa. Elenga lyokuEtiopia olya li li na ontseyo yontumba, ihe olya li lya pumbwa okukwathelwa opo li uve ko iitopolwa yilwe yOmanyolo. (Iilonga 8:30, 31) Nangoye owa pumbwa wo okwiilonga oshindji natango. Odhoshili kutya otapu ka kala aluhe oshindji okwiilonga kombinga yaKalunga. (Omuuvithi 3:11) Ihe manga inoo ninginithwa, owa pumbwa okutseya omalongo gopetameko gOmbiimbeli noku ga taamba ko. (Aahebeli 5:12) Omalongo ga tya ngaaka oga kwatela mo oshili yi na ko nasha nonkalo yoonakusa nosho wo esimano lyedhina lyaKalunga nUukwaniilwa we.

7. Okukonakona Ombiimbeli oku na oku ku nwetha mo ngiini?

⁷ Ihe inashi gwana owala okukala nontseyo, molwaashoka “kape na ngoka ta hokiwa kuKalunga, ngele ke na eitaalo.” (Aahebeli 11:6) Ombiimbeli otayi tu lombwele kutya sho aantu yamwe yomoshilando Korinto shonale ya li yu uvu etumwalaka ndyoka lya li lyu uvithwa kAakriste, “oyi itaala e taya ninginithwa.” (Iilonga 18:8, NW) Sha faathana, okukonakona Ombiimbeli oku na oku ku kwathela u kale u na eitaalo kutya oyi li Oohapu dhaKalunga dha nwethwa mo. Okukonakona Ombiimbeli oku na wo oku ku kwathela u kale u na eitaalo momauvaneko  gaKalunga nosho wo moonkondo dhokuhupithwa dheyambo lyaJesus.—Josua 23:14; Iilonga 4:12; 2 Timoteus 3:16, 17.

8. Oshike tashi ke ku inyengitha opo u lombwele aantu yalwe shoka wi ilonga?

⁸ Sho eitaalo tali koko momutima gwoye, oto ka kala wa hala okulombwela yalwe kombinga yaashoka wi ilonga. (Jeremia 20:9) Oto ki inyengithwa noonkondo u lombwele aantu yalwe kombinga yaKalunga nomalalakano ge.—2 Aakorinto 4:13.

9, 10. (a) Oolye to vulu okutameka okulombwela oshili yOmbiimbeli? (b) Ou na okuninga po shike ngele owa hala okukutha ombinga miilonga yokuuvitha yu unganekwa hayi longwa kOonzapo dhaJehova?

⁹ Oto vulu okutameka okulombwela aantu yalwe oshili yOmbiimbeli mokupopya nondjaalela naapambele yoye, ookuume koye, aashiinda shoye naaniilonga pamwe nangoye. Konima yethimbo, oto ka kala wa hala okukutha ombinga miilonga yokuuvitha yu unganekwa hayi longwa kOonzapo dhaJehova. Pompito ndjoka, kala wa manguluka okukundathana oshinima shoka nOnzapo ndjoka tayi konakona nangoye Ombiimbeli. Ngele oto ulike kutya owa gwana okukutha ombinga muukalele womontaneho, otapu ka ningwa omalongekidho opo ngoye naangoka hamu konakona naye mu tsakanene naakuluntugongalo yaali.

¹⁰ Shoka otashi ke ku kwathela u tseye nawa yamwe yomaakuluntugongalo Aakriste mboka haya litha oshigunda shaKalunga. (Iilonga 20:28; 1 Petrus 5:2, 3) Ngele aakuluntugongalo mboka oya mono kutya ou uvite ko omalongo gopetameko gOmbiimbeli nowe gi itaala nonokutya ou li metsokumwe nomakotampango gaKalunga nowa hala shili okukala gumwe gwomOonzapo dhaJehova, otaye ke ku tseyithila kutya owa gwana okukutha ombinga muukalele womontaneho u li omuuvithi gwonkundana ombwanawa inaa ninginithwa.

11. Omalunduluko geni aantu yamwe ya pumbwa okuninga opo ya kale ya gwana okukutha ombinga muukalele womontaneho?

¹¹ Ihe otashi vulika aakuluntugongalo mboka ye wete kutya  owa pumbwa okuninga omalunduluko gontumba monkalamwenyo yoye nomomikalondjigilile dhontumba opo u kale wa gwana okukutha ombinga muukalele womontaneho. Omalunduluko ngoka otashi vulika ga kale ga kwatela mo omayono gontumba ngoka wa kala to ningi meholamo. Onkee ano, manga inoo pula u ninge omuuvithi inaa ninginithwa, ou na okweetha po omayono ga kwata miiti ngaashi oluhondelo, uunkolwe nokulongitha iingangamithi.—1 Aakorinto 6:9, 10; Aagalati 5:19-21.

12. Omolwashike eitedhululo lya pumbiwa?

¹² Ou na wo okukatuka oonkatu dhilwe opo u kale wa gwana okuninginithwa. Omuyapostoli Petrus okwa ti: “Itedhululeni, ne mu galukile kuKalunga, opo a dhime po oondjo dheni.” (Iilonga 3:19) Okwiitedhulula oko okukala u uvite nayi shili omolwoshinima shoka wa ninga. Eitedhululo olya pumbiwa lela, unene tuu ngele omuntu okwa li e na onkalamwenyo ya nyata, ihe olya pumbiwa wo nokuli nonando omuntu okwa kala e na onkalamwenyo ya yogoka. Omolwashike mbela? Omolwaashoka aantu ayehe ohaya yono noya pumbwa okudhiminwa po kuKalunga. (Aaroma 3:23; 5:12) Manga inoo konakona Ombiimbeli, kawa li wa tseya ehalo lyaKalunga. Onkee ano kwa li to vulu okukala naanaa metsokumwe nehalo lye. Omolwaashono wa pumbwa okwiitedhulula.

13. Okwiigaluluka otashi ti ou na okuninga shike?

¹³ Konima sho wi itedhulula, ou na ‘okwiigaluluka.’ Ou na okuninga oshindji kaashi shi owala okukala u uvite nayi kwaashoka wa ninga. Owa pumbwa okweetha po onkalamwenyo yoye yonale nokukala wa tokola toko kutya okuza mpono oto ka kala to longo shoka shu uka. Eitedhululo neigaluluko oyi li oonkatu ndhoka u na okukatuka manga inoo ninginithwa.

14. Onkatu ya simana oyini u na okukatuka manga inoo ninginithwa?

¹⁴ Opu na ishewe onkatu yilwe ya simana ndjoka u na okukatuka  manga inoo ninginithwa. Ou na okwiiyapulila Jehova Kalunga.

15, 16. Otashi ti shike okwiiyapulila Kalunga, noshike hashi inyengitha omuntu e shi ninge?

¹⁵ Ngele to iyapulile Jehova Kalunga megalikano tali zi komutima, oto mu uvanekele kutya owa hala oku mu longela oye awike sigo aluhe. Ihe omolwashike wa hala okuninga omupiya gwaKalunga? Natu tye nduno ando omumati gwontumba okwa tameka okweendela omukadhona gwontumba. Mpoka ngaa pu thike okwiilonga kombinga yomukadhona ngoka nokumona kutya oku na omaukwatya omawanawa, opo ngaa pu thike okukala e mu hole noonkondo. Mokweendela ko kwethimbo, ota ka kala e na ehalo okupula omukadhona ngoka a hokane naye. Odhoshili kutya okuhokana otaku pula omumati ngoka a taambe ko iinakugwanithwa ya gwedhwa po. Ihe nonando ongaaka, ohole otayi ke mu inyengitha a katuke onkatu ndjoka ya simana.

¹⁶ Ngele owa tseya Jehova e to kala u mu hole, otashi ku inyengitha u mu longele nomutima aguhe. Kehe gumwe ngoka a hala okulandula Omwana gwaKalunga, Jesus Kristus, oku na ‘okwiidhimbika ye mwene.’ (Markus 8:34, OB-1954) Okwiidhimbika tse yene otashi ti okwaaetha omahalo getu nosho wo omalalakano getu ga ye moshipala okuvulika kwetu thiluthilu kuKalunga. Ihe manga inoo ninginithwa, okulonga ehalo lyaJehova Kalunga oku na okukala oshinima sha simanenena monkalamwenyo yoye.—1 Petrus 4:2.

17. Omolwashike aantu yamwe haya kala ya tila okwiiyapulila Kalunga?

¹⁷ Aantu yamwe ohaya kakadhala okwiiyapulila Jehova molwaashoka ya tila okukatuka onkatu ndjoka ya kwata miiti. Otashi vulika ya kale ya tila okwiihokolola kuKalunga ye li Aakriste ye mu iyapulila. Molwaashoka oya tila kutya pamwe otaya ka yona e taya yemateke Jehova, ohaya dhiladhila kutya oshi li hwepo kaaye mu iyapulile.

18. Oshike tashi vulu oku ku inyengitha u iyapulile Jehova?

¹⁸ Sho ohole yoye yokuhola Jehova tayi ende tayi koko, oto ki  inyengithwa u mu iyapulile nokukambadhala ngaashi to vulu opo u kale metsokumwe neiyapulo lyoye. (Omuuvithi 5:4) Konima sho we mu iyapulila, oto ka kala shili wa hala ‘okukala ngashika Omuwa a hala u kale, nokulonga aluhe shoka she mu opalela.’ (Aakolossa 1:10) Molwaashoka ou hole Kalunga, ito ka dhiladhila nando kutya oshidhigu unene okulonga ehalo lye. Osha yela kutya oto ka tsa kumwe nomuyapostoli Johannes, ngoka a nyola a ti: “Ohole yokuhola Kalunga oyo okuvulika kiipango ye. Iipango ye kayi shi iidhigu kutse.”—1 Johannes 5:3.

19. Omolwashike inoo pumbwa okukala wa tila okwiiyapulila Kalunga?

¹⁹ Ino pumbwa okukala wa gwanenena opo u iyapulile Kalunga. Jehova oku shi omangambeko goye noita ka tegelela nando u ninge oshindji shi vulithe pwaashoka to vulu okuninga.  (Episalomi 103:14) Okwa hala u pondole note ke ku yambidhidha noku ku kwathela. (Jesaja 41:10) Oto vulu okukala nuushili kutya ngele owi inekele Jehova nomutima gwoye aguhe, “oondjila dhoye ote dhi yelekanitha.”—Omayeletumbulo 3:5, 6.

20. Omolwashike okwiiyapulila Jehova kwaahe na okukala oshiholekwa?

²⁰ Okudhiladhila shi na ko nasha niinima mbyoka opo twa kundathana naku ku kwathele u iyapulile Jehova okupitila  megalikano. Kehe gumwe ngoka e hole Kalunga shili oku na wo ‘okuhempulula ehempululo ewanawa lyeitaalo montaneho yoonzapo odhindji.’ (1 Timoteus 6:12) Mbela ongiini to vulu oku shi ninga?

21, 22. Ongiini to vulu ‘okuhempulula montaneho’ eitaalo lyoye?

²¹ Tseyithila omutonateli omuunganeki gwegongalo lyeni kutya owa hala okuninginithwa. Ota ka ninga omalongekidho opo aakuluntugongalo yamwe ye ku pule omapulo gontumba kombinga yomalongo gopetameko gOmbiimbeli. Ngele aakuluntugongalo mboka oya mono kutya owa gwana okuninginithwa, otaye ke ku lombwela kutya oto vulu oku ka ninginithwa poshigongi tashi landula. * Oshipopiwa tashi kundathana eityo lyeninginitho ohashi gandjwa aluhe poompito dha tya ngaaka. Opo nduno omupopi oha pula aaninginithwa ayehe ya yamukule omapulo gaali ga yela nawa, shi li omukalo gumwe ‘gwokuhempulula montaneho’ eitaalo lyawo nokana.

²² Eninginitho olyo tali ku ndhindhilikitha montaneho kutya owi iyapulila Kalunga nonokutya ngashingeyi owa ninga gumwe gwomOonzapo dhaJehova. Aaninginithwa ohaya ninginithwa thiluthilu kohi yomeya okuulika montaneho kutya oyi iyapulila Jehova.

23. Otashi ti shike okuninginithwa “medhina lyaHe nolyOmwana nolyOmbepo Ondjapuki”?

²³ Jesus okwa ti kutya aalongwa ye oye na okuninginithwa “medhina lyaHe nolyOmwana nolyOmbepo Ondjapuki.” (Mateus 28:19) Shoka otashi ti kutya omuninginithwa oku na okuzimina oonkondopangelo dhaJehova Kalunga nosho wo dhaJesus Kristus. (Episalomi 83:18; Mateus 28:18) Oku na okuzimina wo iilonga yombepo ondjapuki yaKalunga nenge oonkondo dhe tadhi longo.—Aagalati 5:22, 23; 2 Petrus 1:21.

24, 25. (a) Eninginitho otali thaneke shike? (b) Epulo lini lya pumbwa okuyamukulwa?

²⁴ Ihe okuninginithwa kaku shi owala okutulwa kohi yomeya.  Otaku thaneke sha sha simanenena. Otaku thaneke kutya owa sa mo monkalamwenyo yoye yonale. Okukuthwa kohi yomeya otaku ti kutya ngashingeyi owa yumuka opo u longe ehalo lyaKalunga. Dhimbulukwa wo kutya owi iyapulila Jehova Kalunga, ihe hailonga yontumba nenge aantu yontumba nenge ehangano lyontumba. Eiyapulo neninginitho lyoye oyi li etameko lyuukuume wopothingo naKalunga, sha hala okutya, ekwatathano ewanawa naye.—Episalomi 25:14.

²⁵ Okuninginithwa itaku ti kutya oto ka hupithwa. Omuyapostoli Paulus okwa nyola a ti: “Kaleni tamu longo nokutila nokukakama molwehupitho lyeni.” (Aafilippi 2:12) Eninginitho oli li owala onkatu yotango ndjoka tayi fala kehupitho. Epulo olyo kutya: Ongiini tatu vulu okwiikaleka mohole yaKalunga? Ontopolwa yahugunina otayi ke tu pa eyamukulo.