1. ¿Tleka okinek noapolaktis se ueyixtika tlakatl itech Etiopía?

“¡XKITA! Nikan onka atl; ¿tlenon nechtsakuilia maninoapolakti?”, okijto se ueyixtika tlakatl akin tekitiya ipan ichan tekiuaj ne Etiopía. Se inomachtijkauj Cristo, akin itoka Felipe, kemach yokititijka ipan Biblia ika Jesús yejua katka Mesías akin yonoijtoka uajlaskia. Tlen okikak yejuin tlakatl  oajsik ipan iyojlo niman okinek noapolaktis (Hechos 8:26-36, TNM).

2. ¿Tleka kipiya titlanemilis ika noneki timoapolaktis?

² Tla kuajli yotimomachti capítulos tlen yotiuajpanokej ipan yejuin amoxtli iuan se iteixpantijkauj Jehová, kanaj tejua noijki uelis titetlajtoltis: “¿Tlenon nechtsakuilia maninoapolakti?”. Yotimomachti ipan Biblia kampa kijtoua ika tlaltikpakchanejkej nemiskej nochipa ipan Xochitlalpan (Mateo 5:5; Apocalipsis [Revelación] 21:3, 4). Noijki kuajli tikmatstika tlenon inpan nochiua akin yomijkej niman tikneltoka ika yejkos tonajli ijkuak yoliuiskej (Eclesiastés 9:5; Juan 5:28, 29). Kanaj yopeuj timosentlalia imiuan iteixpantijkauan Jehová niman yotikitak ika kipiyaj tlaneltokijli tlen melauak (Juan 13:35). Niman kanaj hasta yotipeuj timouika iuan toTajtsin Jehová.

3. a) ¿Tlen tlanauatijli okinmakak Jesús inomachtijkauan? b) ¿Kenon timoapolaktis ken okichiuj Cristo?

³ ¿Kenon uelis tikteititis ika tikneki tiktekichiuilis toTajtsin? Jesús okinnauati inomachtijkauan: “Xuiyan niman xkinmachtikan tlaltikpakchanejkej ipan nochi kalpamej, xkinapolaktikan” (Mateo 28:19, TNM). Jesús otechititi ijkon matikchiuakan pampa yejua noijki ijkon onoapolakti. Xsan okitekilijke atl ipan itsontekon, kuajli okipolaktijkej nochi itlalnakayo ijtik atl (Mateo 3:16, TNM).

4. ¿Tlenon kiteititia ijkuak se noapolaktia?

⁴ Nochimej akin kinekij kuajli iuan nouikaskej Jehová kipiya ika noapolaktiskej. Ijkuak se noapolaktia, kiteititia teixpan ika kineki kitekichiuilis toTajtsin niman ika kuelita kichiuas tlen yejua kineki (Hebreos 10:7; Salmo 40:8). San ika, tla se kineki noapolaktis, kachtopa noneki kichiuas seki tlemach.

5. a) ¿Tlenon noneki tikchiuas kachtopa tla tikneki timoapolaktis? b) ¿Tleka melak noneki xuiya xmosentlaliti?

⁵ Tejua yopeuj tikchiua tlen kachtopa noneki. Pampa  yopeuj tikixmati toTajtsin Jehová niman Jesucristo, kanaj pampa mitsmachtiaj ika Biblia (xpoua Juan 17:3). Niman ok uelis timomachtis miyek. Akin kichiuaj ken Cristo kitlajtlaniliaj toTajtsin makinpaleui kuajli makasikamatikan nochi tlen yejua kineki (Colosenses 1:9). Tla tiauj kampa nosentlaliaj iteixpantijkauan Jehová, mitspaleuis tikchiuas yejuin. Ika yejon noneki nochipa xuiya (Hebreos 10:24, 25). Tla nochipa tiauj ipan tlanechikoltin, kuajli tikixmatstias toTajtsin.

6. ¿Kech noneki tikmatis itech Biblia niman ijkon timoapolaktis?

⁶ Xnoneki tikmatis nochi tlen kijtoua Biblia niman ijkon uelis timoapolaktis. San ika, xkilnamiki ika maski yejon ueyixtika tlakatl itech Etiopía kimatstoya san seki itech iTlajtol toTajtsin, ononek makipaleuikan niman ijkon kuajli makasikamati (Hechos 8:30, 31). Noijki ijkon, tejua ok mitspoloua miyek timomachtis. Niman xmatsto ika xkeman titlamis timomachtis itech toTajtsin (Eclesiastés 3:11). San ika, tla tikneki timoapolaktis, kipiya ika tikixmatis tlen kachtopa noneki xmati itech Biblia (Hebreos 5:12). Noneki tikmatis tlenon inpan nochiua akin yomijkej niman tleka noneki manoixmati itokayo toTajtsin niman iTekiuajyo.

7. ¿Tlenon uelis mopan nochiuas ijkuak timomachtis Biblia?

⁷ San ika, xsan noneki tikpiyas tlaixmatilistli, pampa “xuelis tikpaktiskej [toTajtsin] tla xitech tikpiaj totlaneltok” (Hebreos 11:6). Biblia kijtoua tlenon okichiujkej sekimej chanejkej ipan ueyikalpan Corinto: ijkuak okitekakilijkej tlen tenojnotsayaj akin kichiuaj ken Cristo, “opeujkej tlaneltokaj niman onoapolaktijkej” (Hechos 18:8, TNM). Noijki uelis ijkon mopan nochiuas. Ijkuak timomachtis Biblia, kichiuas xneltoka ika yemelak iTlajtol toTajtsin. Noijki mitspaleuis xneltoka ika toTajtsin kichiuas tlen kijtoua niman ika uelis mitsmakixtis ipampa imikilis Jesús (Josué 23:14; Hechos 4:12; 2 Timoteo 3:16, 17).

8. ¿Tlenon mitsmapeuas titlajtos itech tlen yotimomachti?

⁸ Tla melak youeyiyak motlaneltokil, xouijtika peuas tikteijlis tlen yotimomachti (Jeremías 20:9). Tikitas kenon melak tiknekis titlajtos itech toTajtsin niman itech tlen kineki kichiuas (xpoua 2 Corintios 4:13).

9, 10. a) ¿Akinon uelis peuas tikinnojnotsas itech tlen yotimomachti ipan Biblia? b) ¿Tlenon noneki tikchiuas tla tikneki titenojnotsas imiuan iteixpantijkauan Jehová?

⁹ Kachtopa, uelis tipeuas san kualtsin tikimijlis tlen yotimomachti itech Biblia mochanejkauan, akin imiuan timouika, akin nisiu chantij kampa tejua tichanti niman akin imiuan titekiti. Ika tlayekapan, kanaj tiknekis peuas titenojnotsas imiuan iteixpantijkauan Jehová. Ijkuak yejkos yejon tonajli, xtlajto iuan iteixpantijkauj Jehová akin mitsmachtijtok. Tla yejua kita ika tejua tikchiujtika tlen kintlajtlaniliaj akin tenojnotsaj, omemej tlayekankej kitaskej kemanon uelis nosentlaliskej nemouan.

¹⁰ Ijkon kuajli tikimixmatis tlayekankej, akin kintlajpiyaj itekipanojkauan toTajtsin (Hechos 20:28; 1 Pedro 5:2, 3). Yejuamej kitaskej tla tikasikamati niman tikneltoka tlen kachtopa noneki tikmatis itech Biblia, tla tikchiujtika itlanauatiluan toTajtsin niman tla yemelak tikneki timochiuas iteixpantijkauj Jehová. Tla kema, mitsijliskej ika tikchiujtika tlen notlajtlani niman mitstlaliskej ken akin tenojnotsa itech kuajli tlajtoltin maski ok xnoapolaktia, ijkon uelis peuas titenojnotsas ken kichiuaj iteixpantijkauan Jehová.

11. ¿Tlenon noneki kichiuaskej kachtopa akin kinekij tenojnotsaskej ken kichiuaj iteixpantijkauan Jehová?

¹¹ Niman, kemantika tlayekankej kitaj ika yakaj ok poliui itlaj kipatlas ipan inemilis niman ijkon peuas tenojnotsas ken kichiuaj iteixpantijkauan Jehová. Kanaj kipiya ika kikajkauas kichiuas tlen kichiujtok san ichtaka.  Ika yejon, kachtopa noneki maka sa xchiua tlajtlakoltin, ken auilnemilistli, tlauanilistli niman maka xtekitilti drogas. Sakin uelis mitstlaliskej ken akin tenojnotsa maski ok xnoapolaktia (xpoua 1 Corintios 6:9, 10; Gálatas 5:19-21).

12. ¿Tleka noneki toyolkuepaskej?

¹² Tla tikneki timoapolaktis, kipiya ika tikchiuas okseki tlemach. Pedro, itlatitlankauj Cristo, okijto: “Xmoyolkuepakan niman xpatlakan nemonemilis para nemotlajtlakol popoliuis” (Hechos 3:19). Ijkuak se melauak noyolkuepa, yemelak najmana itech tlen yokichiuj. San ika, xsan akin okipixkej xkuajli innemilis noneki noyolkuepaskej, noijki akin kinemiliaj ika chipauak innemilis. ¿Tleka? Pampa nochimej tlaltikpakchanejkej titlajtlakolejkej niman noneki matechtlapopolui toTajtsin (Romanos 3:23; 5:12). Ijkuak xtimomachtiaya Biblia, tejua xtikmatiya tlenon toTajtsin kinekiya. Ika yejon, xtinemiya ken yejua kineki, ¿xmelak? Ken tikita, noneki toyolkuepaskej.

13. ¿Tlenon kijtosneki timopatlas?

¹³ Tla yotimoyolkuep aman noneki timopatlas. Ijkuak timopatla, ‘tiuajmokuepa’ itech ojtli kampa tinemiya. Uelis tikijtoskej ika xsan timajmana itech tlen yotikchiuj, noijki tijkaua tlen tikchiuaya ipan monemilis. Noneki tiktlapejpenis tikchiuas tlen kuajli. Kachtopa noneki timoyolkuepas iuan timopatlas niman sakin timoapolaktis.

14. ¿Tlenon okse noneki tikchiuas ijkuak xtimoapolaktia?

¹⁴ Onka okse tlen noneki tikchiuas niman sakin timoapolaktis: timotemakas itech toTajtsin Jehová.

15, 16. ¿Tlenon kijtosneki timotemakas itech toTajtsin niman tleka tiknekis tikchiuas?

 ¹⁵ Timotemakas, kijtosneki, san moselti ipan se teoyotl tikijlis toTajtsin ika san yejua nochipa tiknekis tikueyichiuas (Deuteronomio 6:15). San ika ¿tleka se kinekis ijkon kichiuas? Xnemili ipan se tlakatl akin kijlia se siuatl ika kineki kuajli kixmatis. Ijkuak peua kinotsa niman kita ikualneskayouan, melak kitlasojtla. Tla ijkon panoua, yejkos tonajli ijkuak kijlis iuan manonamikti. Kema, ijkuak nonamiktis onias miyek tlemach tlen kichiuas. San ika, pampa melak kitlasojtla, kijlis ika kineki iuan manonamikti.

¹⁶ Ijkuak tikixmatij niman tiktlasojtlaj Jehová, tiknekij tiktekichiuiliskej nochi kech tiueliskej. Akin kineki kitokas iKoneuj toTajtsin, Jesucristo, ‘ma kelkaua on tlen kitlajsojtla’ (Marcos 8:34). Tikilkauaj tlen tiktlasojtlaj ijkuak tlen tikuelitaj niman tlen tiknekij xtijkauiliaj matechtsakuili tiktlakamatiskej toTajtsin. Ijkon tej, ijkuak ok xtimoapolaktia, noneki tiknemilis san tikchiuas ipan monemilis tlen Jehová kineki (xpoua 1 Pedro 4:2).

17. ¿Tleka sekimej xnotemakaj itech toTajtsin?

¹⁷ Sekimej xkinekij notemakaskej itech Jehová pampa nomojtiaj itlaj xkuajli kichiuaskej. Kanaj nomojtiaj kinemiliskej ika toTajtsin kinyolkuitis akin yonotemakakej itech. Kinemiliaj ika uelis kichiuaskej itlaj tlen kiyolkokos Jehová niman ika yejon xkinekij notemakaskej itech.

18. ¿Tlenon mitsmapeuas timotemakas itech Jehová?

¹⁸ Ijkuak ueyiyas motlasojtlalis itech Jehová, tiknekis itech timotemakas niman tikchiuas nochi tlen tiuelis, tiktlakamatis ijkon ken otikijli (Eclesiastés 5:4). Sakin tla yotimotemakak, ‘tiknekis tikpaktis [Jehová] ika monemilis’ (Colosenses 1:10). Tla tiktlasojtla toTajtsin, kichiuas  maka xkita ika ouijtika tikchiuas tlen kineki. Kanaj noijki ijkon titlanemilia ken Juan, itlatitlankauj Cristo, akin okijto: “Ijkuak tiktlakamatij itlanauatiluan Dios, sa no yejua tiktlajsojtlaj. Niman itlanauatiluan xyejyetikej”, kijtosneki, xouijtika tikintlakamatiskej (1 Juan 5:3).

19. ¿Tleka noneki maka xmomojti timotemakas itech toTajtsin?

¹⁹ ToTajtsin xkitlajtlani ika akin notemakas itech maka matlajtlakole. Jehová kimati tlen uelis tikchiuaskej niman xkeman techtlajtlanilia matikchiuakan tlen xtiuelij (Salmo 103:14). Yejua mitspaleuis, pampa kineki kuajli xnemi (xpoua Isaías 41:10). Kuajli xmatsto ika tla titlaneltoka itech Jehová ika nochi moyojlo, “yejua mitspaleuis xyolmelaujkanemi” (Proverbios 3:5, 6).

20. Sakin tla yotimotemakak itech Jehová, ¿tleka xnoneki san tejua xmatsto?

²⁰ Tla tiknemilia itech tlen yotomachtijkej, kanaj tiknekis timotemakas itech Jehová moselti ipan se teoyotl. San ika, akin yemelak kitlasojtlaj toTajtsin noneki kichiuaskej okse tlemach: noneki ‘teixpan kijtoskej ika tlaneltokaj’ (Romanos 10:10). ¿Kenon nochiua yejon?

21, 22. ¿Kenon uelis tikteijlis “teixpan” tlaneltokijli tlen tikpiya?

 ²¹ Xkijli akin kinyekana tlayekankej kampa timosentlalia ika tikneki timoapolaktis. Yejua kichiuas ika sekimej tlayekankej makitakan mouan itech tlen kachtopa noneki xmati itech Biblia. Tla yejuin tlayekankej kitaj ika tikchiua tlen notlajtlani ijkuak se kineki noapolaktis, mitsijliskej ika uelis tikchiuas ipan se ueyi tlanechikojli. * Ijkuak noapolaktilo, kiminojnotsaj itech tlenon kijtosneki tlen kichiujtokej. Ijkuak ontlami akin kinnojnotstika, kinchiuilia ome tlajtoltilistli akin noapolaktiskej, niman yejuamej tlanankiliaj chikauak. Ijkon “teixpan kijtoua[j]” tlaneltokijli tlen kipiyaj.

²² Ijkuak timoapolaktia tikteititia teixpan ika yotimotemakak itech toTajtsin niman ika aman tiiteixpantijkauj Jehová. Akin noapolaktiaj kuajli kinpolaktiaj ipan atl teixpan niman ijkon kiteititiaj ika yonotemakakej itech Jehová.

23. ¿Tlenon kijtosneki timoapolaktis “ipampa itoka toTajtsin niman ipampa Tekoneuj niman ipampa espíritu santo”?

²³ Jesús okijto ika inomachtijkauan noapolaktiskiaj “ipampa itoka toTajtsin niman ipampa Tekoneuj niman ipampa espíritu santo” (Mateo 28:19, TNM). Yejon kijtosneki ika akin noapolaktiskej noneki kimatstoskej tlen tekitl kichiua toTajtsin niman Jesucristo (Salmo 83:18; Mateo 28:18). Noijki kimatstokej kenon kitekitiltia toTajtsin iespíritu santo, kijtosneki, ichikaualis tlen tekititok (Gálatas 5:22, 23; 2 Pedro 1:21).

24, 25. a) ¿Tlenon kijtosneki ijkuak se noapolaktia? b) ¿Tlenon noneki tiknankiliskej?

²⁴ Timoapolaktis xsan mitspolaktiskej ipan atl. Yejuin melak ueyi kijtosneki. Ijkuak mitspolaktiskej kentla  “timiki”, kijtosneki, ika tijkaua tlen tikchiuaya ipan monemilis. Niman ijkuak tikisas kijtosnekis ika aman san tikchiuas ipan monemilis tlen toTajtsin kineki. Maka keman tikilkauas ika yotimotemakak itech toTajtsin Jehová, niman xsan itech se tekitl noso itech se tlaltikpakchane. Ijkuak timotemakas niman timoapolaktis, san kemach tipeuas kuajli iuan timouikas toTajtsin (Salmo 25:14).

²⁵ San ika, ijkuak timoapolaktis xkijtosneki ika san ijkon uelis timakisas. Pablo, itlatitlankauj Cristo, okijkuilo: “Xmotekimakatiakan itech nemomakixtilis ikan yolyemanilistli niman nemojtijli” (Filipenses 2:12). Ijkuak timoapolaktis kentla kemach tipeuas. Aman uelis totlajtoltiskej: “¿Kenon uelis nochipa iuan ninemis toTajtsin niman ninemis itech itlasojtlalis?”. Ipan itlamiyan capítulo itech yejuin amoxtli technankilis yejuin.