Okubatizibwa Hamwe n’Omukago Gwawe na Ruhanga
Eshuura ya Ikumi na Munaana
Okubatizibwa Hamwe n’Omukago Gwawe na Ruhanga
Omukristaayo ashemereire kubatizibwa ata?
Ni bintu ki ebi orikwetenga kubanza kukora okubaasa kuba ohikire kubatizibwa?
Omuntu naayehayo ata ahari Ruhanga?
Ni nshonga ki enkuru eshemereire kureetera omuntu kubatizibwa?
1. Ahabw’enki omukungu w’eiramuriro Omwisiopia yaashabire ngu abatizibwe?
“REEBA, amaizi ngaga! Ekirikunzibira kubatizibwa niki?” Ekibuuzo eki kikabuuzibwa omukungu w’eiramuriro Omwisiopia omu kyasha ky’okubanza. Omukristaayo orikwetwa Filipo akaba yaaheza kuhamiza omushaija ogwo ngu Yesu ni Mesia owaaraganisiibwe. Ahabw’okukwatwaho ebi yaayegire omu Byahandiikirwe, omushaija ogu Omwisiopia akakorera aha bi yaayegire. Akooreka ngu akaba naayenda kubatizibwa!—Ebyakozirwe 8:26-36.
2. Ahabw’enki oshemereire kuteekateeka munonga aha kubatizibwa?
2 Ku oraabe oshwijumire gye eshuura ezihweireho ez’ekitabo eki ori hamwe n’omwe aha Bajurizi ba Yehova, noobaasa kuhurira ohikire okubuuza, ‘Nyowe ekirikunzibira kubatizibwa niki?’ Hati waaherize kwega ebirikukwata aha kiraganiso kya Baibuli eky’amagara agatahwaho. (Luka 23:43; Okushuuruurwa 21:3, 4) Kandi oyegire amazima agarikukwata aha mbeera y’abafu hamwe n’aha matsiko g’okuzooka. (Omubuurizi 9:5; Yohaana 5:28, 29) Noobaasa kuba otwire nooteerana hamwe n’Abajurizi ba Yehova omu nteerane zaabo ez’ekibiina kandi oyereebiire ngu nibakuratira ediini ey’amazima. (Yohaana 13:35) Ekikuru munonga, noobaasa kuba waatandikire kutunguura omukago gwawe na Yehova Ruhanga.
3. (a) Ni kiragiro ki eki Yesu yaahaire abakuratsi be? (b) Okubatizibwa omu maizi nikukorwa kuta?
3 Nooyoreka ota ngu nooyenda kuheereza Ruhanga? Yesu akagambira abakuratsi be ati: ‘Mugyende omu mahanga goona, muhindure abantu abeegi nimubabatiza.’ (Matayo 28:19) Yesu we wenka akataho eky’okureeberaho arikubatizibwa omu maizi. Taramiisiirwe maizi, kandi tarashukirweho otwizi tukye aha mutwe. (Matayo 3:16) Ekigambo “okubatiza” nikiruga omu kigambo ky’Orugriika ekirikumanyisa “okwibika.” N’ahabw’ekyo, okubatiza okw’Ekikristaayo nikumanyisa okwibikwa weena nari okudibikwa omu maizi.
4. Okubatizibwa omu maizi n’akamanyiso karikworeka ki?
4 Okubatizibwa omu maizi n’ekintu ekirikwetengwa ahari boona abarikwenda kugira omukago na Yehova Ruhanga. Okubatizibwa omu maisho g’abantu n’akamanyiso k’ekyetengo kyawe eky’okuheereza Ruhanga. Nikworeka ngu nooshemerererwa okukora ebi Ruhanga akunda. (Zaaburi 40:7, 8) Kwonka okubaasa kuba ohikire kubatizibwa, hariho ebi oshemereire kubanza kukora.
OKUMANYA HAMWE N’OKWIKIRIZA NIBYETENGWA
5. (a) Eky’okubanza ekirikwetengwa okubaasa kuba ohikire kubatizibwa niki? (b) Ahabw’enki okuba omu nteerane z’Ekikristaayo ez’ekibiina nikikuru?
5 Waaherize kutandika kukora ekirikukwetengyesa eky’okubanza. Ota? Orikwega ebirikukwata ahari Yehova Ruhanga na Yesu Kristo, shana orikukuratira enteekateeka y’okwega Baibuli. (Yohaana 17:3) Kwonka hakiriyo bingi eby’okwega. Abakristaayo nibenda ngu ‘baijuzibwe okumanya okuhikire okw’ebi [Ruhanga] akunda.’ (Abakolosai 1:9) Okubaho omu nteerane z’Abajurizi ba Yehova ez’ekibiina nikiija kukuhwera kihango okuhika ahari ekyo. Nikikuru okubaho omu nteerane nk’ezo. (Abaheburaayo 10:24, 25) Okuba omu nteerane obutoosha nikiija kukuhwera okutunguura okumanya kwawe ahari Ruhanga.
6. Oshemereire kugira okumanya kwa Baibuli okurikwingana ki okubaasa kuba ohikire kubatizibwa?
6 Buzimazima torikwetenga kubanza kumanya byona ebiri omuri Baibuli okubaasa kuba ohikire kubatizibwa. Omukungu w’eiramuriro Omwisiopia haine bimwe ebi yaabaire naamanya omu Byahandiikirwe, kwonka akaba naayetenga obuhwezi okwetegyereza ebicweka ebimwe. (Ebyakozirwe 8:30, 31) Nikyo kimwe, okyaine bingi ebi orikwetenga kwega. Amazima gari ngu, okwega kwawe ahari Ruhanga tikurihwayo. (Omubuurizi 3:11) Kwonka otakabatiziibwe, nooyetenga kumanya kandi okaikiriza enyegyesa za Baibuli ezoorobi ezirikutandikirwaho. (Abaheburaayo 5:12) Enyegyesa nk’ezo zirimu amazima agarikukwata aha mbeera y’abafu, obukuru bw’eiziina rya Ruhanga hamwe n’Obukama bwe.
7. Okwega Baibuli kushemereire kukukwataho kuta?
7 Okugira okumanya kwonka tikurikumara ahakuba “otarikwikiriza tarikubaasa kushemeza Ruhanga.” (Abaheburaayo 11:6) Baibuli neetugambira ngu abantu abamwe omuri Korinso eya ira ku baahuriire amakuru agu Abakristaayo baabuuriire, ‘bakaikiriza, baabatizibwa.’ (Ebyakozirwe 18:8) Omu muringo nigwo gumwe, okwega Baibuli kushemereire kukureetera kugira okwikiriza ngu Baibuli buzima n’Ekigambo kya Ruhanga ekyahandiikisiibwe omwoyo we. Okwega Baibuli kushemereire kukuhwera kugira okwikiriza omu biraganiso bya Ruhanga n’omu maani g’ekitambo kya Yesu okukujuna.—Yoshua 23:14; Ebyakozirwe 4:12; 2 Timoseo 3:16, 17.
OKUBUURIRA ABANDI AMAZIMA G’OMU BAIBULI
8. N’enki ekiraije kukuhiga kubuurira abandi ebi oyegire?
8 Okwikiriza ku kuraagyende nikutunguuka omu mutima gwawe, noija kushanga kigumire okutagambira abandi ebi waaherize kwega. (Yeremia 20:9) Noija kugira ekihika ky’okugambira abandi ebirikukwata ahari Ruhanga n’ebigyendererwa bye.—2 Abakorinso 4:13.
9, 10. (a) Ni baahi abu orikubaasa kutandikiraho kubuurira amazima agari omu Baibuli? (b) N’enki eki oshemereire kukora ku oraabe nooyenda kwejumba omu murimo gw’okubuurira hamwe n’Abajurizi ba Yehova?
9 Noobaasa kutandika kubuurira abandi amazima g’omuri Baibuli omu bwengye orikugaaniira n’abanyabuzaare baawe, banywani baawe, abakutwire haihi nari abu orikukora nabo. Bwanyima, noija kwetenga kubuurira hamwe n’Abajurizi ba Yehova. Otatiina kukigaaniiraho n’Omujurizi ogwo orikukwegyesa Baibuli. Kyareebeka ngu ohikire kuza kubuurira n’abandi, nihaija kubaho enteekateeka iwe hamwe n’orikukwegyesa kugamba n’abareeberezi babiri ab’ekibiina.
10 Eki nikiija kukubaasisa kumanya gye bamwe aha bareeberezi, abarikureeberera obusyo bwa Ruhanga. (Ebyakozirwe 20:28; 1 Petero 5:2, 3) Abareeberezi aba baheza kureeba ngu nooyetegyereza kandi ngu noikiriza enyegyesa za Baibuli ezirikutandikirwaho, ngu noohikaanisa amagara gaawe n’emisingye ya Ruhanga kandi ngu buzima nooyenda kuba omwe aha Bajurizi ba Yehova, nibaija kukumanyisa ngu ohikire kubuurira n’abandi omu buheereza nk’omubuurizi w’amakuru marungi otabatiziibwe.
11. Ni mpindahinduka ki ezi bamwe barikwetenga kukora batakaikiriziibwe kubuurira hamwe n’abandi?
11 Kwonka obumwe, abareeberezi aba nibabaasa kwetegyereza ngu nooyetenga kukora empindahinduka omu magara gaawe n’omu mitwarize yaawe okubaasa kuba ohikire kubuurira n’abandi. Empindahinduka ezi nizibaasa kutwariramu okurekyera aho ebikorwa ebimwe eby’omu mubonano ebi osherekire abandi. N’ahabw’ekyo, otakashabire kuba omubuurizi otabatiziibwe, nooyetenga kureka ebibi by’amaani nk’obushambani, obusinzi n’okukoresa emibazi y’ekitabura bwonko.—1 Abakorinso 6:9, 10; Abagalatia 5:19-21.
OKWETEISA HAMWE N’OKUHINDUKA
12. Ahabw’enki okweteisa nikwetengyesa?
12 Hariho n’ebindi ebi oshemereire kukora otakahikire aha kubatizibwa. Entumwa Petero akagira ati: “Mweteise, muhindukye, ebibi byanyu biragazibwe, ebiro eby’okugaruka obusya bibone kwija okuruga ahari Mukama.” (Ebyakozirwe 3:19) Okweteisa nikwo kwefuuza, okashaasha munonga ahabw’ekintu eki waakora. Kihikire omuntu kweteisa ku araabe atwire naatwaza kubi amagara ge, kwonka kandi nikwetengyesa n’obu omuntu yaakuba abaire atarikugatwaza kubi. Ahabw’enki? Ahabw’okuba abantu boona n’abasiisi kandi nibetenga okusaasirwa okurikuruga ahari Ruhanga. (Abarooma 3:23; 5:12) Otakatandikire kwega Baibuli, okaba otarikumanya ebi Ruhanga akunda. Mbwenu shi okaabaasize ota kutwaza amagara gaawe nk’oku akunda kandi obwe otarikumanya ebi akunda? N’ahabw’ekyo, okweteisa nikwetengyesa.
13. Okuhinduka nikimanyisa ki?
13 Okweteisa kushemereire kukuratirwa okuhinduka. Oshemereire kukora ekirikukira aha kushaasha nari okwefuuza. Oshemereire kureka omuringo gu obaire nootwazamu amagara gaawe kandi okamariirira kukora ebihikire okuruga hati n’ebiro byona. Okweteisa hamwe n’okuhinduka n’ebi oshemereire kukora otakabatiziibwe.
IWE OKWEHAYO AHARI RUHANGA
14. Ni kintu ki ekikuru munonga eki oshemereire kukora otakabatiziibwe?
14 Hariho ekindi kintu kikuru eki oshemereire kukora otakabatiziibwe. Nikikwetengyesa kwehayo ahari Yehova Ruhanga.
15, 16. Nikimanyisa ki okwehayo ahari Ruhanga, kandi n’enki ekirikuhiga omuntu okukora eki?
15 Ku orikwehayo ahari Yehova Ruhanga omu kushaba, nooraganisa ngu nooza kumwemariraho kandi obe niwe waaramya wenka. (Eky’Ebiragiro 6:15) Kwonka shi ahabw’enki omuntu yaakwenzire kwemarira ahari Ruhanga? Okubaasa kugarukamu ekibuuzo eki, ka tugire ngu omushaija yaatandika kuriima omukazi w’okushwera. Oku araayeyongyere kumumanya kandi akareeba ngu aine emitwarize mirungi, nikwo araayeyongyere kumukunda. N’ekya butoosha bwanyima okumushaba ngu amutaatsye. N’eky’amazima, okumutaatsya nikwongyera aha bujunaanizibwa. Kwonka rukundo neereetera omuntu kukora ekyo.
16 Ku orikumanya kandi okakunda Yehova, noohurira orikwenda kumuheereza otainemu kutiina nari okwesaasira kwona omu kumuramya. Omuntu weena orikwenda kukuratira Yesu Kristo, Omwana wa Ruhanga, ashemereire ‘kweyangisa.’ (Mako 8:34) Nitweyangisa turikuhamya ngu ebyetengo byaitu n’ebigyendererwa byaitu tibyatuzibira kworobera Ruhanga n’omutima gwaitu gwona. N’ahabw’ekyo, okukora ebi Yehova Ruhanga akunda nikyo kishemereire kuba ekigyendererwa kyawe ekikuru omu magara otakabatiziibwe.—1 Petero 4:2.
OKUSINGURA OKUTIINA KUREMWA
17. Ahabw’enki abamwe barikutiina kwehayo ahari Ruhanga?
17 Abamwe nibatiina kwehayo ahari Yehova ahabw’okugiramu okutiina ngu shana nibabaasa kuremwa kuhikiiriza ebirikubetengwaho. Nibabaasa kutiina kujunaanwa Ruhanga nk’Abakristaayo abeehaireyo. Barikutiina ngu nibabaasa kuremwa nari kugwisa kubi Yehova, nibateekateeka ngu nikikiraho okutehayo ahari Ruhanga.
18. N’enki ekirikubaasa kukureetera kwehayo ahari Yehova?
18 Nk’oku oraayege kukunda Yehova, noija kuhurira orikwenda kwehayo ahariwe n’okukora kyona eki orikubaasa okuhikiiriza ebi arikukwenza. (Omubuurizi 5:4) Bwanyima y’okwehayo, buzima noija kwenda ‘kugyenda nk’oku aba Yehova bashemereire, orikumushemeza omuri byona.’ (Abakolosai 1:10) Ahabwa rukundo ei oyiniire Ruhanga, torikwija kuteekateeka ngu kigumire munonga okukora ebi akunda. Hatariho kubangaanisa noija kwikirizana n’ebigambo by’entumwa Yohaana owaahandiikire ati: “Oku nikwo kukunda Ruhanga, itwe okworobera ebiragiro bye; kandi ebiragiro bye tibirusya.”—1 Yohaana 5:3.
19. Ahabw’enki otashemereire kutiina kwehayo ahari Ruhanga?
19 Torikwetenga kubanza kuba ohikiriire okubaasa kwehayo ahari Ruhanga. Yehova naamanya obweremwa bwawe kandi tarikubaasa kukwenza ebi otarikubaasa. (Zaaburi 103:14) Naayenda ngu bikugyendere gye kandi naija kukubangira kandi akuhwere. (Isaaya 41:10) Noobaasa kugira obwesigye ngu ku oraayesigye Yehova n’omutima gwawe gwona, nawe naija ‘kuguma naatebeekanisa emihanda yaawe yoona.’—Enfumu 3:5, 6.
OKWOREKA OKWEHAYO KWAWE ORIKUBATIZIBWA
20. Ahabw’enki okwehayo ahari Yehova kitashemereire kuguma kiri eky’omu mubonano?
20 Okuteekateeka aha bintu ebi twagambaho nikibaasa kukuhwera iwe okwehayo ahari Yehova orikurabira omu kushaba. Buri muntu orikukunda Ruhanga buzima naaragiirwa kandi kwatura n’akanwa ke okuheebwa okujunwa.’ (Abarooma 10:10) Okwatura oku nookukora ota?
21, 22. Noobaasa ‘kworeka ota boona’ okwikiriza kwawe?
21 Manyisa omureeberezi orikukurira akakiiko k’abareeberezi ku nooyenda kubatizibwa. Naija kutaho enteekateeka kugira ngu abareeberezi abamwe bari hamwe naiwe mweyijutsye ebibuuzo ebirikukwata aha nyegyesa za Baibuli ezirikutandikirwaho. Abareeberezi aba ku barikwikirizana ngu buzima ohikire kubatizibwa, nibaija kukugambira kugira ngu obaase kubatizibwa haabaho omugisha ogwo. * Orubazo orurikugamba aha makuru g’okubatizibwa obutoosha ni ruheebwa omu nteerane ezo. Omugambi bwanyima naashaba boona abarikwenda kubatizibwa kugarukamu ebibuuzo bibiri ebyanguhi nk’omuringo gumwe ‘ogw’okwaturira omu bantu’ okwikiriza kwabo.
22 Okubatizibwa nikwo kurikworeka ngu ori omuntu oyehaireyo ahari Ruhanga kandi ngu hati ori omwe aha Bajurizi ba Yehova. Abarikubatizibwa nibiibikirwa kimwe omu maizi okworeka boona ngu beehaireyo ahari Yehova.
AMAKURU G’OKUBATIZIBWA KWAWE
23. Nikimanyisa ki okubatizibwa “omu iziina rya Isheboona, n’ery’Omwana n’ery’[o]mwoyo [o]rikwera”?
23 Yesu akagira ngu abeegyesibwa be bakaba nibaija kubatizibwa “omu iziina rya Isheboona n’ery’Omwana n’ery’[o]mwoyo [o]rikwera.” (Matayo 28:19) Eki nikimanyisa ngu orikuza kubatizibwa naayetegyereza obushoboorozi bwa Yehova Ruhanga na Yesu Kristo. (Zaaburi 83:18; Matayo 28:18) Ngu kandi naayetegyereza omugasho n’omurimo gw’omwoyo orikwera ninga shi amaani ga Ruhanga agarikukora.—Abagalatia 5:22, 23; 2 Petero 1:21.
24, 25. (a) Okubatizibwa n’akamanyiso akarikworeka ki? (b) Ni kibuuzo ki ekirikwetengwa kugarukwamu?
24 Kwonka beitu, okubatizibwa ti kikorwa ky’okwibikwa omu maizi kwonka. N’akamanyiso k’ekintu kikuru munonga. Okwibikwa okashwekwa amaizi nikyoreka ngu waafa omu mitwarize yaawe eya ira. Okuruga omu maizi nikyoreka ngu hati waaba ohuriire okukora ebi Ruhanga akunda. Ijuka kandi ngu waayehayo ahari Yehova Ruhanga we wenka, beitu tiwaayehayo aha murimo, nari aha kintu nari aha bandi bantu n’obu kyakuba ekitongore. Okwehayo kwawe n’okubatizibwa n’entandikiro y’omukago gwawe na Ruhanga.—omukago ogw’ahamara nawe.—Zaaburi 25:14.
25 Okubatizibwa ti buhame ngu nooza kujunwa. Entumwa Paulo akahandiika ati: ‘Mugume nimukorerera okujunwa kwanyu mwine obwoba n’okutetema.’ (Abafilipi 2:12) Okubatizibwa n’entandikiro kwonka. Ekibuuzo kiri ngu, Noobaasa ota kwerindira omu kukunda kwa Ruhanga? Eshuura yaitu erikuhererukayo neeza kugarukamu ekibuuzo eki.
[Obugambo obw’Ahansi]
^ kacw. 21 Okubatizibwa obutoosha nikubaho omu nteerane empango ez’Abajurizi ba Yehova ezirikubaho buri mwaka.
EBI BAIBULI ERIKWEGYESA
▪ Okubatizibwa kw’Ekikristaayo nikutwariramu okwibikirwa kimwe omu maizi, beitu kutari kushukwaho otwizi.—Matayo 3:16.
▪ Okubaasa kuhika aha kubatizibwa, noobanza waatunga okumanya kandi oyoreka okwikiriza, ebi bikuratirwa okweteisa, okuhinduka hamwe n’okwehayo ahari Ruhanga.—Yohaana 17:3; Ebyakozirwe 3:19; 18:8.
▪ Okubaasa kwehayo ahari Yehova, oshemereire kweyangisa nk’oku abantu baayeyangiise okubaasa kukuratira Yesu.—Mako 8:34.
▪ Okubatizibwa n’akamanyiso k’okufa omu mitwarize ey’okubanza kandi okaba ohuriire okukora ebi Ruhanga akunda.—1 Petero 4:2.
[Ebibuuzo by’Obucweka]
[Ekishushani ekiri aha rupapura 180]
Okutunga okumanya okuhikire okw’omu Kigambo kya Ruhanga n’ekintu kikuru ekirikuhitsya aha kuba ohikire kubatizibwa
[Ekishushani ekiri aha rupapura 180]
Okwikiriza kushemereire kukuhiga kubuurira abandi ebi orikwikiriza
[Ekishushani ekiri aha rupapura 180, 181]
Waayehaireyo ahari Ruhanga omu kushaba?
[Ekishushani ekiri aha rupapura 181]
Okubatizibwa nikimanyisa okufa omu mitwarize yaitu eya ira okaba ohuriire okukora ebi Ruhanga akunda
