1. Ефиопаг хицауы донаргъуыд райсын цӕмӕн бафӕндыд?

«МӔНӔ ДОН! Цы мӕ хъыгдары донаргъуыд райсын?» Ацы ныхӕстӕ загъта, фыццаг ӕнусы чи цард, иу ахӕм ефиопаг хицау. Ӕмӕ йын Чырыстийы фӕдылдзӕуӕг Филипп бӕлвырд бамбарын кодта, Йесо кӕй уыд Хуыцауы ӕрвыст Мессийӕ. Ефиопаг лӕг Фыстадӕй цы базыдта, уый йын йӕ зӕрдӕ бацагайдта, ӕмӕ йӕ бафӕндыд донаргъуыд райсын (Хъуыддӕгтӕ 8:26–36).

2. Цӕмӕн дӕ хъӕуы донаргъуыд райсыныл ахъуыды кӕнын?

 ² Кӕд Йегъовӕйы Ӕвдисӕнтимӕ цасдӕр рӕстӕг Библи ахуыр кӕныс, уӕд ды дӕр, ӕвӕццӕгӕн, хъуыды кодтай: «Мӕн та цы хъыгдары донаргъуыд райсын?» Ды Библийӕ базыдтай, адӕм ӕнустӕм зӕххыл Дзӕнӕты кӕй цӕрдзысты (Лукайы 23:43; Раргомад 21:3, 4). Ноджыдӕр ма базыдтай, мӕрдты кӕй ницы ис ӕмӕ, чи амард, уыдон кӕй райгас уыдзысты, уый дӕр (Екклесиаст 9:5; Иоанны 5:28, 29). Ӕвӕццӕгӕн, Йегъовӕйы Ӕвдисӕнты ӕмбырдтӕм дӕр цӕуыс ӕмӕ йӕ дӕхи цӕстӕй уыныс, раст дин куыд амоны, афтӕ кӕй цӕрынц (Иоанны 13:35). Сӕйраджыдӕр та, ды базыдтай, Йегъовӕ удӕгас Хуыцау кӕй у, уый, ӕмӕ йӕм ӕввахсӕй-ӕввахсдӕр кӕныс.

3. а) Йесо йӕ фӕдылдзӕуджытӕн цы бахӕс кодта? ӕ) Адӕймаг донаргъуыд куыд райсы?

³ Хуыцауӕн лӕггад кӕнын дӕ кӕй фӕнды, уый иннӕтӕ та куыд базондзысты? Йесо йӕ фӕдылдзӕуджытӕн загъта: «Ацӕут ӕмӕ мын ӕппӕт адӕмтӕй дӕр цӕттӕ кӕнут ахуыргӕнинӕгтӕ. Дӕттут сын донаргъуыд» (Матфейы 28:19). Йесо йӕхӕдӕг дӕр донаргъуыд райста, ӕмӕ нын уымӕй у фӕзминаг. Фӕлӕ Йесойыл дон ӕнӕуи нӕ бапырх кодтой кӕнӕ йын ӕй йӕ сӕрыл нӕ рауагътой (Матфейы 3:16). Мивдисӕг «донаргъуыд дӕттын» грекъаг ӕвзаджы нысан кӕны «доны бын фӕкӕнын» кӕнӕ «доны нытътъыссын». Уӕдӕ Библимӕ гӕсгӕ, адӕймаг донаргъуыд куы фӕисы, уӕд ӕй ӕнӕхъӕнӕй дӕр доны бын фӕкӕнынц.

4. Адӕймаг донаргъуыд куы райсы, уӕд уымӕй цы равдисы?

⁴ Цӕмӕй адӕймаг Йегъовӕйы хӕлар суа, уый тыххӕй йӕ донаргъуыд райсын ӕнӕмӕнг хъӕуы. Донаргъуыд куы райсай, уӕд уымӕй иннӕтӕн равдисдзынӕ, кӕй дӕ фӕнды Хуыцауӕн лӕггад кӕнын ӕмӕ дын йӕ фӕндон ӕххӕст кӕнын цины хос кӕй у (Псалом 40:7, 8). Фӕлӕ дӕ уый размӕ саразын хъӕудзӕн цалдӕр къахдзӕфы.

5. а) Донаргъуыд райсынӕн фыццаджыдӕр цы хъӕуы? ӕ) Ӕмбырдтӕм цӕуын ӕнӕмӕнг цӕмӕн хъӕуы?

⁵ Донаргъуыд райсынӕн фыццаджыдӕр цы хъӕуы, уый  ныр дӕр аразыс. Алы къуыри дӕр Библи кӕй ахуыр кӕныс, уый фӕрцы Йегъовӕ Хуыцау ӕмӕ Йесо Чырыстийы тыххӕй дӕ зонындзинӕдтӕ фылдӕрӕй-фылдӕр кӕнынц (Иоанны 17:3). Фӕлӕ дӕ нырма бирӕ цыдӕртӕ хъӕуы базонын. Хуыцауы лӕггадгӕнджыты фӕнды, цӕмӕй Хуыцауы фӕндон «бӕлвырдӕй зоной» (Колоссӕгтӕм 1:9). Уымӕн дын стыр ӕххуыс уыдзысты Йегъовӕйы Ӕвдисӕнты ӕмбырдтӕ. Ӕмбырдтӕм цӕуын ӕнӕмӕнг хъӕуы (Дзуттӕгтӕм 10:24, 25). Алы ӕмбырдмӕ дӕр куы цӕуай, уӕд Хуыцауы ноджы хуыздӕр базондзынӕ.

6. Цӕмӕй донаргъуыд райсай, уый тыххӕй Библийӕ цы хъуамӕ зонай?

⁶ Кӕй зӕгъын ӕй хъӕуы, уый ууыл дзурӕг нӕу, ӕмӕ, цалынмӕ Библийӕ алцы нӕ базонай, уӕдмӕ донаргъуыд райсынмӕ цӕттӕ нӕ уыдзынӕ. Кӕд ефиопаг лӕг Фыстадӕй цыдӕртӕ зыдта, уӕддӕр дзы кӕцыдӕр бынӕттӕ не ’мбӕрста ӕмӕ йӕ хъуыди ӕххуыс (Хъуыддӕгтӕ 8:30, 31). Дӕу дӕр нырма бирӕ цыдӕртӕ хъӕуы базонын. Стӕй афтӕ никуы уыдзӕн, ӕмӕ Хуыцауы тыххӕй алцы зонай (Екклесиаст 3:11). Фӕлӕ цӕмӕй донаргъуыд райсай, уый тыххӕй хъуамӕ зонай Библийы сӕйраг ахуырӕдтӕ ӕмӕ сыл разы уай (Дзуттӕгтӕм 5:12). Библийы сӕйраг ахуырӕдтӕм хауынц, адӕймаг куы амӕлы, уӕд цы фӕвӕййы, Хуыцауы ном зонын афтӕ ахсджиаг цӕмӕн у ӕмӕ цы у Хуыцауы Паддзахад.

7. Библи кӕй ахуыр кӕныс, уый дыл куыд хъуамӕ фӕзына?

⁷ Фӕлӕ ӕрмӕст зонындзинӕдтӕ фаг не сты. Хъуамӕ дӕм уа уырнындзинад дӕр, уымӕн ӕмӕ «ӕнӕ уырнындзинадӕй... Хуыцауы зӕрдӕ барухс кӕнӕн нӕй» (Дзуттӕгтӕм 11:6). Библийы дзырд цӕуы рагон горӕт Коринфы цӕрджыты тыххӕй. Уыдон Чырыстийы фӕдылдзӕуджытӕй хорз хабар куы фехъуыстой, уӕд дзы «бирӕтӕ баууӕндыдысты ӕмӕ донаргъуыд райстой» (Хъуыддӕгтӕ 18:8). Библи кӕй ахуыр кӕныс, уый фӕрцы дӕу дӕр бауырндзӕн, Хуыцауы Ныхас кӕй у, уый. Стӕй фидарӕй ӕууӕнддзынӕ, Хуыцау цӕмӕйдӕриддӕр зӕрдӕ бавӕрдта, уый кӕй сӕххӕст уыдзӕн ӕмӕ нӕ Чырыстийы нывонд тӕригъӕд ӕмӕ  мӕлӕтӕй кӕй ирвӕзын кӕны (Йесо Навин 23:14; Хъуыддӕгтӕ 4:12; 2 Тимофеймӕ 3:16, 17).

8. Цы базыдтай, уый дӕ иннӕтӕн дзурын кӕд фӕнддзӕн?

⁸ Дӕ зӕрдӕйы уырнындзинад цас тыхджындӕр кӕна, уыйас дын зындӕр уыдзӕн, цы базыдтай, уый дӕхимидӕг уромын (Йереми 20:9). Тынг дӕ фӕнддзӕн, Хуыцау чи у ӕмӕ йӕм цы фӕндтӕ ис, уый тыххӕй иннӕтӕн дӕр дзурын (2 Коринфӕгтӕм 4:13).

9, 10. а) Библийӕ цы базыдтай, уый кӕмӕн фӕдзурыс? ӕ) Йегъовӕйы Ӕвдисӕнты ӕмбырдимӕ дӕ хъусын кӕнын куы фӕнда, уӕд дӕ цы бакӕнын хъӕудзӕн?

⁹ Библийӕ цы базыдтай, уый тыххӕй, ӕвӕццӕгӕн, ныр дӕр фӕдзурыс дӕ хиуӕттӕн, де ’мбӕлттӕн, дӕ сыхӕгтӕн ӕмӕ де ’мкусджытӕн. Фӕлӕ дӕ фӕстӕдӕр бафӕнддзӕн Йегъовӕйы Ӕвдисӕнты ӕмбырдимӕ хъусын кӕнын. Ӕмӕ-иу уӕд, демӕ Библи чи ахуыр кӕны, уыимӕ аныхас кӕн. Кӕд ӕй уына, ӕмӕ ӕмбырдимӕ хъусын кӕнынмӕ цӕттӕ дӕ, уӕд ӕмбырды хистӕр нӕлгоймӕгтӕй дыууӕимӕ фембӕлдзыстут.

¹⁰ Афтӕмӕй хуыздӕр базонгӕ уыдзынӕ, Хуыцауы дзугмӕ йӕ хъус чи дары, уыцы хистӕр нӕлгоймӕгтимӕ (Хъуыддӕгтӕ 20:28; 1 Петры 5:2, 3). Ӕмӕ кӕд Библийы сӕйраг ахуырӕдтӕ ӕмбарыс ӕмӕ сыл ӕууӕндыс, стӕй кӕд дӕ цард Библимӕ гӕсгӕ аразыс ӕмӕ, Йегъовӕйы Ӕвдисӕн уай, уый дӕ ӕцӕгдӕр фӕнды, уӕд дын зӕгъдзысты, ныр дӕ бон кӕй у хорз хабар ӕмбырдимӕ иумӕ хъусын кӕнын. Афтӕмӕй ды суыдзынӕ ӕнӕаргъуыд хъусынгӕнӕг.

11. Иуӕй-иутӕ цалынмӕ ӕмбырдимӕ хъусын кӕнын райдайынц, уӕдмӕ сӕ цы фӕхъӕуы фӕивын?

¹¹ Фӕлӕ цӕмӕй ӕнӕаргъуыд хъусынгӕнӕг суай, уый тыххӕй уал дӕ, чи зоны, дӕ царды цыдӕртӕ фӕивын бахъӕуа. Уымӕ хауынц, иннӕтӕ кӕй тыххӕй нӕ зонынц, ахӕм хъуыддӕгтӕ. Уӕдӕ, цалынмӕ хистӕр нӕлгоймӕгтӕм бацӕуай, уӕдмӕ хъуамӕ ныууадзай, Хуыцауы цӕсты стыр тӕригъӕд чи сты, ахӕм хъуыддӕгтӕ, зӕгъӕм, хӕлд митӕ, фыднозт кӕнын кӕнӕ наркотиктӕ (1 Коринфӕгтӕм 6:9, 10; Галатӕгтӕм 5:19–21).

12. Алкӕй дӕр ӕрфӕсмон кӕнын цӕмӕн хъӕуы?

¹² Донаргъуыд райсыны размӕ ма дӕ саразын хъӕудзӕн ӕндӕр къахдзӕфтӕ дӕр. Апостол Петр загъта: «Ӕрфӕсмон кӕнут ӕмӕ уӕ цард аивут, цӕмӕй уӕ тӕригъӕдтӕй ссыгъдӕг уат» (Хъуыддӕгтӕ 3:19). Ӕрфӕсмон кӕнын уый у, ӕмӕ дӕ раздӕры хъуыддӕгты тыххӕй дӕ зӕрдӕ дӕхиуыл куы ӕрхуда. Ӕрфӕсмон кӕнын ӕнӕмӕнг хъӕуы, ӕнӕгъдау цард чи кодта, ахӕм адӕймаджы. Фӕлӕ, хӕрзӕгъдау цард чи кӕны, уымӕн дӕр йӕ бон нӕу афтӕ зӕгъын, мӕн ницӕуыл хъӕуы ӕрфӕсмон кӕнын, зӕгъгӕ. Цӕуылнӕ? Уымӕн ӕмӕ адӕм иууылдӕр тӕригъӕдджын сты ӕмӕ се ’ппӕты дӕр хъӕуы, цӕмӕй сын Хуыцау сӕ тӕригъӕдтӕ ныххатыр кӕна (Ромӕгтӕм 3:23; 5:12). Цалынмӕ Библи ахуыр кӕнын нӕ райдыдтай, уӕдмӕ Хуыцауы фӕндон нӕ зыдтай. Ӕмӕ уӕдӕ дӕ царды алцыдӕр йӕ фӕндонмӕ гӕсгӕ кӕцӕй уыдаид? Куыд уынӕм, афтӕмӕй ӕрфӕсмон кӕнын хъӕуы алкӕй дӕр.

13. Адӕймаг йӕ цард аивта, зӕгъгӕ, уый куыд ӕмбаргӕ у?

¹³ Адӕймаг куы ’рфӕсмон кӕна, уӕд ӕй уый фӕстӕ та хъӕуы йӕ цард аивын. Дӕ зӕрдӕ дӕхиуыл ӕрхуда, ӕрмӕст уый фаг нӕу. Дӕу хъӕуы, раздӕр куыд цардтӕ, ууыл дӕ къух сисын ӕмӕ дарддӕр, раст цы у, ӕрмӕстдӕр уый аразын. Уӕдӕ дӕ донаргъуыд райсыны размӕ ӕнӕмӕнг хъӕуы ӕрфӕсмон кӕнын ӕмӕ дӕ цард аивын.

14. Донаргъуыды размӕ цавӕр ахсджиаг къахдзӕф фӕхъӕуы саразын?

¹⁴ Донаргъуыды размӕ ма дӕ саразын хъӕудзӕн ноджыдӕр иу ахсджиаг къахдзӕф. Хъуамӕ дӕхи Йегъовӕ Хуыцауӕн снывонд кӕнай.

15, 16. а) Дӕхи Хуыцауӕн снывонд кӕнай, уый цы нысан кӕны? ӕ) Адӕймаджы уыцы къахдзӕф саразын цӕмӕн бафӕнды?

¹⁵ Адӕймаг йӕхи Йегъовӕйӕн куыд снывонд кӕны? Зӕрдӕбынӕй йӕм скувы ӕмӕ йын дзырд ратты, ӕнустӕм ӕрмӕстдӕр дӕуыл уыдзынӕн иузӕрдион, зӕгъгӕ (Дыккаг закъон 6:15). Фӕлӕ адӕймаджы цӕмӕн бафӕнды уыцы  къахдзӕф саразын? Зӕгъӕм, лӕппу чызгимӕ ӕмбӕлын райдыдта. Бонӕй-бонмӕ йемӕ хуыздӕр зонгӕ кӕны, йӕ рӕсугъд миниуджытӕ йын уыны ӕмӕ йӕ зӕрдӕмӕ тынгӕй-тынгдӕр цӕуы. Ӕмӕ йын иу бон зӕгъдзӕн, уарзын дӕ ӕмӕ нӕ цард баиу кӕнӕм, зӕгъгӕ. Кӕй зӕгъын ӕй хъӕуы, бинонтӕ скӕнын гыццыл хъуыддаг нӕу, афтӕмӕй йӕхимӕ стыр хӕс райсы. Фӕлӕ чызджы кӕй уарзы, уый фӕрцы зындзинӕдтӕй нӕ тӕрсы.

¹⁶ Адӕймаг Йегъовӕйы куы базоны ӕмӕ йӕ уарзын куы райдайы, уӕд ӕй бафӕнды йӕ цард ӕгасӕй дӕр уымӕн снывонд кӕнын ӕмӕ йын удуӕлдайӕ лӕггад кӕнын. Кӕй фӕнды, цӕмӕй Йесо Чырыстийы фӕдылдзӕуӕг уа, уый хъуамӕ «йӕхи тыххӕй мауал цӕра» (Марчы 8:34). Адӕймаг йӕхи тыххӕй нал цӕры, уый афтӕ ӕмбаргӕ у, ӕмӕ йын йӕхи фӕндтӕ ӕмӕ бӕллицтӕ Хуыцауы фӕндонӕй ахсджиагдӕр никуы вӕййынц. Уӕдӕ цалынмӕ донаргъуыд райсай, уӕдмӕ дын царды ӕппӕтӕй сӕйрагдӕр хъуамӕ суа Йегъовӕ Хуыцауы фӕндон ӕххӕст кӕнын (1 Петры 4:2).

17. Иуӕй-иутӕ Хуыцауӕн сӕхи снывонд кӕнынмӕ сӕ ныфс цӕуылнӕ фӕхӕссынц?

¹⁷ Иуӕй-иутӕ сӕ ныфс нӕ фӕхӕссынц сӕхи Йегъовӕйӕн снывонд кӕнынмӕ. Хуыцауӕн дзырд куы раттой, уӕд сӕ йӕ разы дзуапп дӕттын кӕй хъӕудзӕн, уымӕй фӕтӕрсынц. Ӕмӕ сӕхицӕн фӕзӕгъынц, зӕгъгӕ, мӕнӕн афтӕ цӕрын мӕ бон нӕ бауыдзӕн ӕмӕ цӕйнӕфӕлтау Йегъовӕйы фӕфыдӕнхъӕл кӕнон, фӕлтау ын дзырд нӕ ратдзынӕн.

18. Цӕй фӕрцы дӕ бафӕнддзӕн дӕхи Йегъовӕйӕн снывонд кӕнын?

¹⁸ Йегъовӕйы цас тынгдӕр уарзай, уыйас дӕ тынгдӕр фӕнддзӕн, цӕмӕй йын дӕхи снывонд кӕнай ӕмӕ, цы дзырд раттай, уымӕ гӕсгӕ цӕрай (Екклесиаст 5:4). Ӕмӕ йын дӕхи куы снывонд кӕнай, уӕд та дӕ ӕнӕмӕнг фӕнддзӕн, цӕмӕй дӕ цард аразай, «Йегъовӕйы раз куыд ӕмбӕлы, афтӕ ӕмӕ йын алцӕмӕй дӕр йӕ зӕрдӕ рухс кӕнай» (Колоссӕгтӕм 1:10). Хуыцауы куы уарзай, уӕд дӕм йӕ фӕндон ӕххӕст кӕнын зын нӕ кӕсдзӕн. Ды дӕр разы уыдзынӕ  апостол Иоанны ныхӕстимӕ: «Хуыцауы кӕй уарзӕм, уый уымӕй бӕрӕг уыдзӕн, ӕмӕ йын йӕ фӕдзӕхстытӕ куы ӕххӕст кӕнӕм. Ӕмӕ йӕ фӕдзӕхстытӕ та зынӕххӕстгӕнӕн не сты» (1 Иоанны 5:3).

19. Дӕхи Хуыцауӕн снывонд кӕнай, уымӕй тӕрсын цӕуылнӕ хъӕуы?

¹⁹ Афтӕ ма хъуыды кӕн, ӕмӕ цӕмӕй Хуыцауӕн дӕхи снывонд кӕнай, уый тыххӕй хъуамӕ алцӕмӕй ӕххӕст уай. Дӕ бон цы у ӕмӕ цы нӕу, уый Йегъовӕ хорз зоны ӕмӕ дӕ уымӕй фылдӕр нӕ домы (Псалом 103:14). Уый фӕнды, цӕмӕй царды ӕнтыстджын уай, ӕмӕ дӕ уый тыххӕй фидар дӕр кӕндзӕн ӕмӕ дын ӕххуыс дӕр кӕндзӕн (Исай 41:10). Дӕ зӕрдӕ ӕгасӕй дӕр Йегъовӕйыл куы дарай, уӕд дын «дӕ фӕндаг раст кӕндзӕн» (Ӕмбисӕндтӕ 3:5, 6).

20. Адӕймаг йӕхи Йегъовӕйӕн куы снывонд кӕна, уӕд ма йӕ ноджыдӕр цы хъӕуы саразын?

²⁰ Уӕлдӕр цӕуыл ӕрныхас кодтам, уыдӕттыл лӕмбынӕг куы ахъуыды кӕнай, уӕд дӕ, чи зоны, бафӕнда Йегъовӕмӕ скувын ӕмӕ йын дӕхи снывонд кӕнын. Фӕлӕ, Хуыцауы ӕцӕгӕй чи уарзы, уый ма саразын хъӕуы ноджыдӕр иу хъуыддаг. Хъуамӕ йӕ уырнындзинады тыххӕй «ӕргом» зӕгъа, цӕмӕй фервӕза (Ромӕгтӕм 10:10). Уый та дӕ бон куыд у саразын?

21, 22. Куыд у дӕ бон дӕ уырнындзинад «ӕргом» равдисын?

 ²¹ Де ’мбырды хистӕр нӕлгоймӕгты советы координатормӕ бацу ӕмӕ йын зӕгъ, донаргъуыд райсын дӕ кӕй фӕнды. Уый иннӕ хистӕр нӕлгоймӕгтимӕ баныхас кӕндзӕн, цӕмӕй цалдӕр хатты демӕ фембӕлой ӕмӕ фарстаты фӕрцы Библийы сӕйраг ахуырӕдтыл аныхас кӕной. Кӕд хистӕр нӕлгоймӕгтӕ се ’ппӕт дӕр разы уой, цӕттӕ кӕй дӕ, ууыл, уӕд дын зӕгъдзысты, зӕгъгӕ, куыддӕр фадат уа, афтӕ донаргъуыд райсдзынӕ *. Донаргъуыды размӕ вӕййы раныхас, адӕймаг донаргъуыд цӕмӕн исы, уый фӕдыл. Стӕй раныхас кӕмӕн вӕййы, уый, донаргъуыд чи фӕисы, уыдонмӕ ратты дыууӕ фарстайы, ӕмӕ сын афтӕмӕй фадат ратты, цӕмӕй сӕ уырнындзинады тыххӕй «ӕргом» зӕгъой.

²² Донаргъуыд куы райсай, уӕд уымӕй равдисдзынӕ, дӕхи Хуыцауӕн кӕй снывонд кодтай ӕмӕ Йегъовӕйы Ӕвдисӕн кӕй сдӕ. Донаргъуыд чи фӕисы, уыдоны иннӕты раз доны бын фӕкӕнынц, цӕмӕй равдисой, сӕхи Йегъовӕйӕн кӕй снывонд кодтой, уый.

23. «Фыд, Фырт ӕмӕ сыгъдӕг тыхы номыл» донаргъуыд райсын цӕуыл дзурӕг у?

²³ Йесо загъта, йӕ ахуыргӕнинӕгтӕ донаргъуыд кӕй исдзысты «Фыд, Фырт ӕмӕ сыгъдӕг тыхы номыл» (Матфейы 28:19). Уый ууыл дзурӕг у, ӕмӕ, донаргъуыд чи исы, уыцы адӕймаг ӕмбары, Йегъовӕ Хуыцау ӕмӕ Йесо Чырысти чи сты ӕмӕ сӕм цы бартӕ ис, уый (Псалом 83:18; Матфейы 28:18). Уымӕй ма адӕймаг ноджыдӕр равдисы, Хуыцауы сыгъдӕг тых, кӕнӕ архайгӕ тых, цы у ӕмӕ дзы Хуыцау куыд пайда кӕны, уый кӕй ӕмбары (Галатӕгтӕм 5:22, 23; 2 Петры 1:21).

24, 25. а) Донаргъуыдӕн цавӕр нысаниуӕг ис? ӕ) Цавӕр фарстайыл хъӕуы ахъуыды кӕнын?

²⁴ Фӕлӕ донаргъуыд, ӕнӕуи доны ныххизай, ӕрмӕст уый нӕу. Донаргъуыдӕн ис стыр нысаниуӕг. Зӕгъӕн ис, ӕмӕ адӕймаджы доны бын куы фӕкӕнынц, уӕд йӕ раздӕры  цардӕн амӕлы. Донӕй йӕ фӕстӕмӕ кӕй сисынц, уый та ӕвдисы, ныр Хуыцауы фӕндон ӕххӕст кӕнынӕн кӕй цӕрдзӕн. Рох дӕ ма уӕд уый дӕр, ӕмӕ дӕ цард адӕймагӕн кӕнӕ цыдӕр хъуыддагӕн, йе та цавӕрдӕр организацийӕн кӕй не снывонд кӕндзынӕ, фӕлӕ Йегъовӕ Хуыцауӕн. Уӕдӕ дӕхи Хуыцауӕн куы снывонд кӕнай ӕмӕ донаргъуыд куы райсай, уӕд ӕрлӕудзынӕ ног фӕндагыл – уыцы фӕндагыл цӕугӕйӕ Йегъовӕ суыдзӕн дӕ хуыздӕр Хӕлар (Псалом 25:14).

²⁵ Фӕлӕ адӕймаг донаргъуыд кӕй райста, уый ууыл дзурӕг нӕу, ӕмӕ Хуыцауы ног дунейы йӕ бынат цӕттӕ у. Апостол Павел ныффыста: «Тӕрсгӕ-ризгӕйӕ ӕппӕт хъарутӕй архайут уӕ ирвӕзындзинадыл» (Филиппӕгтӕм 2:12). Донаргъуыд у чырыстон фӕндагӕн ӕрмӕстдӕр йӕ райдиан. Уымӕ гӕсгӕ хорз уаид ахъуыды кӕнын: цы аразын дӕ хъӕуы, цӕмӕй Хуыцауы уарзтӕй дӕхи ӕнӕхай ма фӕкӕнай? Ууыл дзырд цӕудзӕн ацы чиныджы фӕстаг сӕры.