1. Ngera me ngike el chad er a Ethiopia a mle soal el mo metecholb?

“TIAKID a ralm! Ng ngera dirk orreked er ngak me ng diak kmetecholb?” Tia mle keril a ta el ngarbab el chad er a Ethiopia er a taem er a rekot el Kristiano. A Kristiano el ngklel a Filip a mileketeklii el mo er ngii el kmo a Jesus a ngike el telbiil el Mesias. Aika el tekoi el siluub ngika el chad er a Ethiopia a kmal riretechii a rengul me tia rirellii el mo soal el mo metecholb!​—Rellir 8:26-36.

2. Ngera me ngkirem el melatk el kirel a techolb?

² A lsekum ke mle kerekikl el mesuub aike el uleak uchei el bliongel el obengkel a ta er a Sioning er a Jehovah, e ke locha mo oker er chelecha el kmo, ‘Ngera merrob er ngak me ngdiak bo kmetecholb?’ Ke ulterekokl el mla suubii a telbiil el ngar er a Biblia el kirel a diak a ulebengelel klengar el ngar er a Baradis. (Lukas 23:43; Ocholt 21:3, 4) E dirrek el mla suubii el kmo ngera mera el duubech el mo er a rulekoad me a omelatk er a okiis. (Olisechakl 9:5; Johanes 5: 28, 29) E locha mla mo obengterir a Resioning er a Jehovah el ngar er aike el miting er tir, e mla mesa rolel a mera el klechelid. (Johanes 13:35) E a ngaruchei er ngii, e ke ulterekokl el mla  omuchel el mekurulii a deleuill er kau me a Jehovah el Dios.

3. (a) Ngera ngdilu Jesus el mo er a rulebengkel el kmo ngkirir el meruul er ngii? (b) Ngua ngera teletelel a lemetecholb a chad?

³ Ke mekerang e ochotii el kmo, ngsoam el mesiou er a Dios? A Jesus a dilu er a rulebengkel el kmo: “Morael el mor a bek el bedengir a re chad er ker me ker e moruul er tir el mo obengkek, e molecholb er tir.” (Mateus 28:19) A Jesus a kiltmeklii a kerebai er a bo lemetecholb er a ralm. Ngdimlak el di loliim er ngii me a lechub e loleitel a ralm er a bdelul. (Mateus 3:16) A tekoi el “techolb” a mlengai er a tekoi er a Grik el “olduleb.” Me a Rekristiano a lemetecholb e te mo moduleb er a ralm.

4. A techolb ngolechotel a ngerang?

⁴ A rokui el chad el sorir el mo er ngii a deleuill er tir me a Jehovah el Dios a kirir el mo metecholb. A techolb a ochotii el mo er a buai el kmo, ngsoam el mesiou er a Jehovah e dmeu a rengum el meruul a soal. (Psalm 40:7, 8) Engdi a uchei er a bo el sebechem el mo metecholb, e ngngar er ngii a tekoi el kirem el meruul.

5. (a) Ngera sel kot el tekoi el kirel a chad el meruul er ngii a lolatk el mo metecholb? (b) Ngera me a miting er a Rekristiano a kmal klou a ultutelel?

⁵ Kau a ulterekokl el mla rullii sel kot el tekoi. E tiang a sel bo modengelii a Jehovah el Dios me a Jesus Kristus, el oeak a mla moterekokl el temel a omesubem er a Biblia. (Monguiu er a Johanes 17:3.) Me nguaisei, ngkmal dirk betok a kirem el mesuub. A Rekristiano a sorir el “mo ungil el medengelii a soal” a Dios. (Kolose 1:9) Me a miting er a Resioning er a Jehovah a sebechel el ngosukau. Ngkmal klou a ultutelel el mngar aika el miting. (Hebru 10:24, 25) A oblechoel el ngar er a miting e ngmo ngosukau el mo medengelii a Dios.

6. Ngkirel el mo ua klungel a ngerang a klemedengei er kau er a Biblia er a uchei er a bo el sebechem el metecholb?

⁶ Tia diak el belkul a kmo, ngkirem el mo medengei a rokui el tekoi er a Biblia e mo sebechem el mo metecholb. Ngike el chad er a Ethiopia a mla er ngii a telkib el klemedengei er ngii, engdi nguluusbech a ngeso el mo medengei a bebil er a tekoi er a Bades. (Rellir 8:30, 31) Nguaisei, kau me nglocha betok a dirk kirem el mesuub. E a mera er ngii, kid a diak a ulebengelel a omesubed el kirel a Dios. (Olisechakl 3:11) Engdi uchei er a bo el sebechem el metecholb, e ngkirem el mo medengei e mo kongei aike el uchetemel a osisechakl er a Biblia. (Hebru 5:12) Aika el osisechakl a uldimukl er ngii a klemerang el kirel a kmo, ngngera mera el duubech el mo er a rulekoad me a klungel a ultutelel a ngklel a Dios me a Rengedel.

7. Ngera sebechel el rullii er kau a omesubel a Biblia?

⁷ Engdi ngdiak di bo doba klemedengei. E le “ng diak a chad el diak loumerang e sebechel el odeuir a rengul a Dios.” (Hebru 11:6) A Biblia a ouchais el kmo a rebebil er a rechad er a Korinth er a irechar er a lrenges a klemechir  a Rekristiano e te “mlo oumerang me te meltecholb.” (Rellir 18:8) Me ngdi osisiu, a omesubem er a Biblia a sebechel el rullau el mo oumerang el kmo, a Biblia a mera el mlukreng el Tekingel a Dios. Ngdirrek el sebechel el ngosukau el mo er ngii a klaumerang er kau er aike el telbilel a Dios me a klisichel a osobel el oeak a tengetengel a Jesus.​—Josua 23:14; Rellir 4:12; 2 Timothy 3:16, 17.

8. Ngera rullau el mo soam el ouchais er a rebebil el kirel aike el tekoi el bla msuub?

⁸ Sel lorael el mo klou a klaumerang er kau, e ngmo meringel er kau a diak mouchais er a rechad el kirel aike el tekoi el bla msuub. (Jeremia 20:9) Ngkmal mo mesisiich a urungulem el mo ouchais er a rebebil el kirel a Dios me a moktek er ngii.​—Monguiu er a 2 Korinth 4:13.

9, 10. (a) Te rua techang a sebechem el omuchel el ouchais a klemerang el mo er tir? (b) Ngera kirem el meruul er ngii a lsoam el mo teloi er a ureor er a berkel a klumech el loruul er ngii a Resioning er a Jehovah?

⁹ Ngsebechem el omuchel el ouchais er a klemerang er a Biblia el mo er a rechedam, me a resechelim, me a retonari er kau, me a rechad er a urerem. A omerolel a taem, e ngmo soam el mo teloi er a ureor er a berkel a klumech el loruul er ngii a Resioning er a Jehovah. Seikid e ngsebechem el ouchais er ngike el Sioning el mesuub a Biblia el obengkem. A lsekum ngmesa el kmo, ngsebechem el mo meruul er tia el ureor e le klengar er kau a oltirakl a omellach er a Biblia, e ko mo dmak el terung el mengedecheduch er a reteru el mechuodel er a ongdibel.

¹⁰ Tiang a mo ngosukau el mo ungil el medengelterir a rebebil er a remechuodel er a ongdibel, el tir a omekerreu er a delebechel er a Dios. (Rellir 20:28; 1 Petrus 5:2, 3) A lsekum e te mesa el kmo ke medengei e oumerang aike el uchetemel a osisechakl er a Biblia, me a blekerdelel a klengar er kau a oltirakl a omellach er a Dios, e mera el  soam el mo ta er a Sioning er a Jehovah, e te mo subedau el kmo ngsebechem el mo teloi er a ureor er a berkel a klumech el ta er a dirkak el metecholb el publisher.

11. Ngera el omelodech a kirir a rebebil el meruul er a uchei er a bo el sebechir el mo teloi er a ureor er a berkel a klumech?

¹¹ A remechuodel a locha mo ouchais er kau el kmo, ngdirk kirem el mo melodech a bebil er a tekoi er a klengar er kau me a omerellem me bo el sebechem el mo teloi er a ureor er a berkel a klumech. Aika uldimukl er a tekoi el moruul el locha diak a chad el medengei. Me nguaisei, a uchei er a omolengit el mo ta er a dirkak el metecholb el publisher, e ngkirem el mo cheroid a oberaod el klengit, el ua deleboes, me a cheltelaol er a rrom, me a usbechel a mekngit el kar.​—Monguiu er a 1 Korinth 6:9, 10; Galatia 5:19-21.

12. Ngera me ngklou a ultutelel a lebo er a bult a chad?

¹² Ngar er ngii a lmuut el bebil er a tekoi el kirem el meruul er a uchei er a bo el sebechem el mo metecholb. A apostol el Petrus a dilu el kmo: “Misei e mobult er a kngtmiu e bo mchau a Dios, me bo lousubes a kngtmiu.” (Rellir 3:19) A dobult a belkul a kmo kede mera el ouuchel a rengud er a tekoi el durruul. A chad el mle mekngit a rolel a klengar er ngii a kirel el mo er a bult. Me nguaisei, a chad el millasem er a chelsel a klengar er ngii el blechoel el meruul a llemalt me ngdirrek el kirel el mo er a bult. E ngera uchul? E le rokui el chad a ngar er a klengit e ousbech er a klausubes er a Dios. (Rom 3:23; 5:12) E sera uchei er a omosuub er a Biblia, e ngdimlak modengelii a soal a Dios, me ngdimlak el sebechem el kiei el oltirakl a soal. Sei a uchul me ngklou a ultutelel el bo er a bult.

13. Ngera belkul a mo ‘chemau a Dios’?

¹³ Uriul er a lebo er a bult a chad e ngkirel el mo  cheroid er aike el lurruul e mo ‘chemau a Dios.’ Me ngdiak di bo louuchel a rengum e ngdirrek el kirem el mo otngeklii a dimla blekerdelel a klengar er kau e tibir a rengum el di mo blechoel el meruul a llemalt. Me nguaisei, a uchei er a bo metecholb e ngdirrek el kmal kirem lobult el mo cheroid er a mekngit el murruul e otngeklii sel dimla blekerdelel a klengar er kau.

14. Ngera el klou a ultutelel el tekoi a kirem el meruul er ngii er a uchei er a techolb?

¹⁴ Ngdirrek el ngar er ngii a lmuut el ta er a klou a ultutelel el tekoi el kirem el meruul er ngii er a uchei er a techolb. Ngkirem el tibir a rengum el mo er a Jehovah el Dios.

15, 16. Ngera belkul sel mrellii a telbilel a rengum el mo er a Dios? E ngera uchul me a chad a mo meruul er tiang?

¹⁵ Sel moluluuch el mo er a Jehovah e mrellii a telbilel a rengum el mo er Ngii, e ke tibir el mo blak a rengum el mesiou er Ngii el mo cherechar. (Duteronomi 6:15) Engdi ngera uchul me a chad a mo meruul er tiang? Ka molatk el kmo ngngar er ngii a sechal me a redil el kasisiik. Ngika el sechal sel bo lungil medengelii ngika el redil e lomes a ungil el blekerdelel, e ngkmal mo soal ngii, me ngulterekokl el mo melekoi a chebechiil. Me alta chebechiil a mo dochel a betok el ngerechelel ngika el sechal, engdi ngbltikerreng a rullii el mo meruul er tia el klou a ultutelel el tekoi.

¹⁶ Sel bo modengelii a Jehovah e bo el betik a rengum er Ngii, e ngmo soam el mo mesiou er Ngii el mo er sel tkurrebab el sebechem. A ngii di el chad el soal el mo oltirakl er a Ngelekel a Dios, el Jesus Kristus, a kirel el ‘choitii a klechad er ngii.’ (Markus 8:34, BT) A de ‘choitii a klechad’ er kid e ngbelkul a kmo, a kot el  ngaruchei el tekoi er a klengar er kid a mo cherrungel el lolengesenges er a Jehovah. Me a uchei er a techolb, e ngkmal kirel a omesiunged el mo er a Jehovah el Dios el mo kot el klou a ultutelel el tekoi er a klengar er kid.​—Monguiu er a 1 Petrus 4:2.

17. Ngera me a rebebil a diak el sorir el meruul er a telbilel a rengrir el mo er a Dios?

¹⁷ A rebebil a diak el sorir el meruul er a telbilel a rengrir el mo er a Jehovah e le te medengei el kmo, ngkmal klou el tekoi. Te locha medakt a bo lak el sebechir el otireklii a telbilir el mo er a Dios. Te omdasu el kmo, ngbai ungil a lak loruul er a telbilir el mo er a Jehovah e le ngdiak el sorir el mo tomellii a rengul me a dirrek el Jehovah a diak el bo lomekngerachel er tir el kirel a kngterir.

18. Ngera sebechel el mo rullau el tibir a rengum el mo er a Jehovah?

¹⁸ Sel mosuub el mo betik a rengum er a Jehovah, e ngmo soam el rullii a telbilel a rengum el mo er Ngii e mo er sel tkurrebab el sebechem el oltirakl er tia el telbilel a rengum. (Olisechakl 5:4) Me a uriul er a omrellii a telbilel a rengum, e ngulterekokl el mo soam el “ngar el rodemii a rengul a Rubak, el meral odeuir a rengul.” (Kolose 1:10, BT) A bltkil a rengum el mo er a Dios a uchul, e ngdiak bo momdasu el kmo ngmeringel a omoruul a soal. Ke ulterekokl el mo kongei a tekingel a apostol el Johanes el dilu el kmo: “Ele bltikerreng er a Dios a belkul a kmo kede oltirakl a llechul. E a ikeikid el tekoi a diak lesal meringel er kid el meruul.”​—1 Johanes 5:3.

19. Ngera me ngdiak el kirem el medakt el meruul er a telbilel a rengum el mo er a Dios?

¹⁹ Ngdiak el belkul a kmo, ngkirel a chad el cherrungel e mo sebechel el rullii a telbilel a rengul el mo er a Dios. A Jehovah a medengei aike el sebechem me a ngelsengesem e diak longerechir er kau el mo meruul  a tekoi el engelakl er aike el sebechem. (Psalm 103:14) Ngsoal a obo mungil er aike el moruul. Ngmo obengkem e mo olengeseu er kau. (Monguiu er a Isaia 41:10.) Me ngsebechel el mo ulterekokl a rengum el kmo, a omoumerang er a Jehovah er a rengum el rokir, e ‘ngmo ochotii er kau a melemalt el rael.’​—Osisechakl 3:5, 6.

20. Ngera me ngkirir a rechad el mo medengei el kmo ke mla rullii a telbilel a rengum el mo er a Jehovah?

²⁰ Sel molebedebek aika el bla desaod, e ngsebechel el ngosukau el mo meruul er a telbilel a rengum el mo er  a Jehovah el loeak a nglunguuch. Ngike el mera el betik a rengul er a Dios a dirrek el kirel el mo meketeklii el mo er a rokui el chad el kmo ngmla rullii a telbilel a rengul el mo er a Dios. (Rom 10:10) Ngmekera omoruul er tiang?

21, 22. Ke mekerang e meketeklii a klaumerang er kau?

²¹ Msbedii a tebechelel a chelechad er a remechuodel er a ongdibel el kmo ngsoam el mo metecholb. E ngii a mo melutk er a rebebil er a remechuodel el mo oker  er kau a ker el kirel aike el uchetemel a osisechakl er a Biblia. A lsekum tirka el mechuodel a mesa el kmo, ngmla mo sebechem el mo metecholb e te mo ouchais er kau el kmo ngoingerang e ngsebechem el mo metecholb. * A cheldecheduch el ouchais er a belkul a techolb a blechoel el ngar er aika el ileakl el ongdibel. Ngike el oltobed er a cheldecheduch a mo olengit er tirke el mo metecholb el mo onger a teblo el ker, el ngii a ta er a rolel e te meketeklii a klaumerang er tir.

²² A techolb a mo ochotii el mo er a buai el kmo, ke mla tibir a rengum el mo mesiou er a Jehovah e mla mo ta er a Sioning er Ngii. Tirke el mo metecholb a moduleb a bedengir el rokir er a ralm el olecholt el kmo, te mla tibir a rengrir el mo mesiou er a Jehovah.

23. Ngera belkul a techolb “loba ngklel a Chedam, ma Ngalek, ma Chedaol Reng”?

²³ A Jesus a dilu el kmo a redisaiplo er ngii a mo metecholb “loba ngklel a Chedam, ma Ngalek, ma Chedaol Reng.” (Mateus 28:19) Tiang a belkul a kmo, a chad el mo metecholb a kongei er a omerredelel a Jehovah el Dios me a Jesus Kristus. (Psalm 83:18; Mateus 28:18) Ngdirrek el kongei er a usbechel me a urerel a chedaol reng, el ngii a oureor el klisichel a Dios.​—Galatia 5:22, 23; 2 Petrus 1:21.

24, 25. (a) A techolb ngomtechei er a ngerang? (b) Ngera el ker a kired el onger er ngii?

²⁴ A techolb a diak di el belkul a kmo ke moduleb er a ralm. Ngomtechei er a lmuut el klou a ultutelel el tekoi. Sel omoduleb er a ralm, e ngbelkul a kmo ke mla choitii sel dimla blekerdelel a klengar er kau. E a omtekerekl er  a ralm, e ngolecholt el kmo ke mla mo ngar el meruul a soal a Dios. Bo molatk el kmo, ke mla tibir a rengum el mo er a Jehovah el Dios, el diak el kirel a ureor, te rechad, me a lechub e ngcheldebechel. A telbilel a rengum me a techolb a uchelel a kmes el klausechelei er kau me a Dios.​—Psalm 25:14.

²⁵ Engdi a techolb a diak loterekeklii a osebelem. A Jesus a dilu el kmo: “Ngdi ngikel mtekengelii a rengul el mor a ulebongel, a mo suobel.” (Mateus 24:13) Me a techolb a di uchelel. A bo denguu a osobel e ngkired el melemolem el “ngar a bltikerreng er a Dios.” (Jude 21) Tia ngngera belkul? Ngmekera dolemolem el ngar er a bltikerreng er a Dios? A ongingil el bliongel a mo onger aika el ker.