1. Ke ku manda un altu funsionariu di palasiu di Etiopia pidi pa sedu batizadu?

“ALI yagu. Ke ku na tujin pa N batisadu?” Es i purgunta ku fasidu na purmeru sekulu pa un altu funsionariu di palasiu di Etiopia. Un kriston comadu Filipi mostral kuma Jesus i Mesias ku purmitidu. Motivadu pa ke ki  aprindi na Skrituras, omi di Etiopia aẑi. I mostra kuma i misti sedu batizadu! — Atus 8:26-36.

2. Ke ki ta mostra kuma bu dibi di pensa ku seredadi aserka di batismu?

² Si bu studa ja diritu purmerus kapitulus des livru ku un Tustumuña di Jeova, talves bu pudi sinti kuma bu sta prontu pa punta: ‘Ke ki na tujin sedu batizadu?’ Gosi bu aprindi ja aserka di promesa di Biblia di vida ku ka ta kaba na Paraisu. (Lukas 23:43; Apokalipsi 21:3, 4) Bu aprindi tambi aserka di ke ki na bardadi ta pasa ku jintis ku muri ku speransa di resureison. (Eklesiastis 9:5; Jon 5:28, 29) Talves bu sta ja na asosia ku Tustumuñas di Jeova na runions di se kongregason i abo propi bu oja kuma e ta pratika riliẑion di bardadi. (Jon 13:35) Mas importanti, bu kumsa ja disenvolvi un relason pesual ku Jeova Deus.

3. (a) kal mandamentu ki Jesus da si sigiduris? (b) Kuma ki batismu na yagu ta fasidu?

³ Kuma ku bu pudi mostra ki bu misti sirbi Deus? Jesus fala si sigiduris: “Bo bai pa jinti di tudu nasons, bo fasi elis ña disipulus. Bo batisa elis.” (Anos ku pui italiku; Mateus 28:19) Propi Jesus disa izemplu pa manera ki batizadu na yagu. I ka wagadu yagu, nin i ka darmadu yagu na si kabesa. (Mateus 3:16) Palabra gregu traduzidu pa “batiza” signifika “mburguja na yagu”. Asin, batismu kriston signifika mburguja di un manera kompletu na yagu.

4. Ke ki batismu na yagu ta mostra?

⁴ Batismu na yagu i un norma pa tudu kilis ku misti tene un relason ku Jeova Deus. Batismu ta mostra di un manera publiku bu diseẑu di sirbi Deus. I ta mostra kuma bu misti fasi vontadi di Jeova. (Salmu 40:7, 8) Ma, pa kualifika pa batismu, bu dibi di da alguns pasus.

5. (a) Kal ki purmeru pasu pa kualifika pa batismu? (b) Ke ku manda mati runions kriston i importanti?

⁵ Bu kumsa ja da purmeru pasu. Di kal manera? Pa manera ku bu sta na buska kunsi Jeova Deus ku Jesus Kristu, talves atraves di un studu regular di Biblia. (Lei Jon 17:3.) Ma i ten inda manga di kusas pa aprindi. Kristons misti ‘inci di kuñisimentu izatu di vontadi di Deus.’ (Kolosensis 1:9) Mati runions di kongregason di Tustumuñas di Jeova na judau ciu fasi kila. I importanti mati es runions. (Ebreus 10:24, 25) Mati sempri runions na judau kunsi Deus.

6. Kal kuñisimentu di Biblia ku bu dibi di tene pa kualifika pa batismu?

⁶ Sin duvida, bu ka pirsisa di sibi tudu ku sta na Biblia pa pudi kualifika pa batismu. Altu funsionariu di palasiu di Etiopia teneba sertu kuñisimentu, ma i pirsisaba di ajuda pa ntindi alguns parti di Skrituras. (Atus 8:30, 31) Di mesmu manera, bu tene inda manga di kusas pa aprindi. Na bardadi, nunka bu ka na para aprindi aserka di Deus. (Eklesiastis 3:11) Ma, antis di bu batizadu, bu pirsisa di kunsi i seta pelu menus nsinus basiku di Biblia. (Ebreus 5:12) Es nsinus nklui bardadi aserka di ke ki ta pasa ku jintis ku muri, importansia di nomi di Deus ku si Renu.

7. Kal efeitu ku studu di Biblia dibi di tene na bo?

⁷ Kuñisimentu so ka sufisienti, pabia “ningin ka pudi pui Deus kontenti ku el sin fe.” (Ebreus 11:6) Biblia falanu kuma, oca alguns jintis di antigu sidadi di Korintu obi mensaẑen ku kristons na pregaba, e “seta Siñor, e batisadu.” (Atus 18:8) Di mesmu manera, studu di Biblia dibi di lebau na tene fe di kuma Biblia i Palabra nspiradu di Deus. Studu di Biblia dibi di judau tene fe  na promesas di Deus i fia kuma sakrifisiu di Jesus pudi salbau. — Josué 23:14; Atus 4:12; 2 Timótiu 3:16, 17.

8. Ke ki na motivau konta utrus ke ki bu aprindi?

⁸ Nkuantu fe na kirsi na bu korson, bu na bin oja kuma i difisil kala ku ke ki bu aprindi. (Jeremias 20:9) Bu na motivadu ciu pa papia ku utrus aserka di Deus ku si intenson. — Lei 2 Koríntius 4:13.

9, 10. (a) Kal jintis ku bu pudi kumsa konta bardadi ku sta na Biblia? (b) Ke ki bu dibi di fasi si bu misti partisipa na tarbaju di pregason organizadu pa Tustumuñas di Jeova?

⁹ Bu pudi kumsa konta utrus bardadi ku sta na Biblia, atraves di papia aserka del ku parentis, amigus, viziñus ku kolegas di tarbaju, sin firi elis. Ku tempu, bu na misti partisipa na tarbaju di pregason organizadu pa Tustumuñas di Jeova. Ora ki ciga ki mumentu, sta avontadi pa papia ku Tustumuña di Jeova ku ta studa Biblia ku bo. Si parsi kuma bu kualifika pa partisipa na tarbaju di pregason, aranjus na fasidu pa, abo ku bu instrutor riuni ku dus ansions di kongregason.

¹⁰ Es na pirmitiu kunsi minjor alguns ansions kriston ku ta pastoria rebañu di Deus. (Atus 20:28; 1 Pedru 5:2, 3) Si es ansions oja kuma bu ntindi i bu fia na nsinus basiku di Biblia, i bu sta na vivi na armonia ku prinsipius di Deus, i na bardadi bu misti sedu Tustumuña di Jeova, e na fasiu sibi di kuma bu kualifika pa partisipa na pregason suma un publikador di bon noba ku ka batizadu inda.

11. Kal mudansas ku alguns ten di fasi antis di kualifika pa pregason?

¹¹ Pa utru ladu, talves bu na pirsisa di fasi alguns mudansas na bu manera di vivi, ku bu abitus pa pudi  kualifika pa pregason. I pudi sedu para alguns pratikas ku bu sugundi. Ma, antis di bu pidi pa sedu un publikador ku ka batizadu, bu pirsisa di sta livri di pekadus gravi, suma pekadu seksual, cami ku abusu di droga. — Lei 1 Koríntius 6:9, 10; Gálatas 5:19-21.

12. Ke ku manda i pirsis ripindimentu?

¹² Utrus pasus dibi di dadu antis di bu kualifika pa batismu. Apostulu Pedru fala: “Bo ripindi, bo konverti, pa bo pekadu limpadu.” (Atus 3:19) Ripindi signifika lamenta ku tudu seredadi aserka di kusa ku bu fasiba. Ku serteza i pirsis ripindimentu si un algin ta lebaba un vida imoral, tambi i pirsis ripindimentu te mesmu pa kilis ku ta lebaba un vida un bokadu limpu, na sintidu moral. Pabia di ke? Pabia tudu jintis ta fasi pekadu i e pirsisa di purdon di Deus. (Romanus 3:23; 5:12) Antis di studa Biblia, bu ka sibiba kal ki vontadi di Deus. Asin, kuma ku bu pudiba vivi na armonia ku si vontadi? Pa kila, i pirsis ripindimentu.

13. Ke ki konverson?

¹³ Ripindimentu dibi di sigidu pa konverson. Bu dibi di fasi mas di ki so lamenta. Bu pirsisa di larga bu antigu manera di vivi i sta disididu pa fasi ke ki bon desdi gosi. Ripindimentu ku konverson i pasus ku bu dibi da antis di bu batizadu.

14. Kal pasu importanti ku bu dibi di da antis di sedu batizadu?

¹⁴ I ten utru pasu importanti ki pirsis da, antis di sedu batizadu. Bu dibi di dedika bu vida pa Jeova Deus.

15, 16. Ke ki signifika dedika bu vida pa Deus, i ke ki ta leba un algin fasil?

¹⁵ Ora ku bu dedika bu vida pa Jeova Deus na un  orason di tudu korson, bu purmiti adoral el son, pa sempri. Ma, ke ku manda un algin na misti fasi un kusa des? Imaẑina un omi ku kumsa namora un minjer. Mas ki na aprindi aserka del i nota kuma i tene bon kualidadis, mas i na sinti atraidu pa rel. Ku tempu, i normal pa i pidil kasamenti. Na bardadi, kasamenti na signifika mas responsabilidadis. Ma, amor na lebal pa i da es pasu importanti.

¹⁶ Ora ki bu kunsi i bu ama Jeova, bu ta motivadu sirbil sin reserva o adoral sin kualker limiti. Kualker algin ku misti sigi Fiju di Deus, Jesus Kristu, ten di “nega si kabesa.” (Markus 8:34) No ta nega no kabesa ora ku no kuida pa no diseẑus ku objetivus pesual ka tujinu obdisi Deus di un manera kompletu. Ma, antis di bu batizadu, fasi vontadi di Deus dibi di sedu objetivu prinsipal na bu vida. — Lei 1 Pedru 4:2.

17. Ke ku manda alguns ta ezita dedika se vida pa Deus?

¹⁷ Alguns ta ezita dedika se vida pa Jeova pabia e ta medi da es pasu seriu. Talves e ta medi bin presta konta pa Deus suma un kriston dedikadu. Medu di kuma e pudi bin yara i fasi Jeova sinti tristi, ta leba elis na pensa kuma i minjor pa ka dedika se vida pa rel.

18. Ke ki pudi motivau dedika bu vida pa Jeova?

¹⁸ Nkuantu bu na aprindi ama Jeova, bu na bin motivadu dedika bu vida pa rel i fasi bu minjor pa vivi na armonia ku bu dedikason. (Eklesiastis 5:4) Dipus di fasi un dedikason, ku serteza bu na misti ‘yanda na manera dignu di Siñor, pa i pudi kontenti ku bo na tudu.’ (Kolosensis 1:10) Pabia di bu amor pa Deus, bu ka na pensa kuma i difisil fasi si vontadi. Sin duvida,  bu na konkorda ku apostulu Jon, ku skirbi: “No amor pa Deus ta mostra na manera ku no ta obdisi si mandamentus. Si mandamentus gora, nin e ka kansadu.” — 1 Jon 5:3.

19. Ke ku manda bu ka dibi di medi dedika bu vida pa Deus?

¹⁹ Bu ka pirsisa di sedu perfeitu pa dedika bu vida pa Deus. Jeova kunsi bu limitasons, i nunka i ka na spera pa bu fasi mas di ke ki bu pudi fasi. (Salmu 103:14) I misti pa bu sai ben, i na apoiau i judau. (Lei Isaias 41:10.) Bu pudi sta sertu di kuma, si bu konfia na Jeova di tudu bu korson, “i na ndiritau bu kamiñu.” — Ditus 3:5, 6.

20. Ke ku manda dedikason pa Jeova ka ta kontinua sedu un asuntu ku ka sibidu?

²⁰ Pensa na kusas ku no kaba di fala del pudi judau fasi un dedikason pesual pa Jeova na orason. Tudu algin ku ama Deus dibi di tambi ‘fasi diklarason publiku pa salbason.’ (Romanus 10:10) Kuma ku bu pudi fasi kila?

21, 22. Kuma ku bu pudi ‘fasi diklarason publiku’ di bu fe?

 ²¹ Konta kordenador di korpu di ansions di bu kongregason di kuma bu misti sedu batizadu. I na fasi aranju pa alguns ansions rekapitula ku bo alguns purguntas ku ta trata di nsinus basiku di Biblia. Si es ansions konkorda kuma bu kualifika, e na kontau kuma bu pudi sedu batizadu na prosimu asembleia o kongresu. * Na ki mumentus, i kustuma ta fasidu un diskursu pa lembra di signifikadu di batismu. Kin ku na fasi diskursu ta kumbida tudu kandidatus pa batismu pa e ruspundi dus purguntas simplis suma un manera di ‘fasi diklarason publiku’ di se fe.

²² Batismu ku ta identifikau di manera publiku suma algin ku dedika pa Deus i ki gosi bu sedu Tustumuña di Jeova. Kandidatus pa batismu ta mburgujantadu di manera kompletu na yagu pa mostra publiku di kuma e dedika pa Jeova.

23. Ke ki signifika sedu batizadu na “nomi di Pape, di Fiju ku di Spiritu Santu”?

²³ Jesus fala si disipulus na batizadu na “nomi di Pape, di Fiju ku di Spiritu Santu.” (Mateus 28:19) Es signifika ki kandidatu pa batismu rukuñisi otridadi di Jeova Deus ku di Jesus Kristu. (Salmus 83:18; Mateus 28:18) I rukuñisi tambi ke ki spiritu santu di Deus o si forsa ativa ta fasi. — Gálatas 5:22, 23; 2 Pedru 1:21.

24, 25. (a) Batismu i simbulu di ke? (b) Kal purgunta ku pirsisa di ruspundidu?

²⁴ Ma, batismu i ka un simplis atu di mburguja na yagu. I simbulu di un kusa importanti dimas. Yentra  dentru di yagu signifika ki, bu muri na sintidu simboliku i bu ka na leba vida mas suma antis. Sai di yagu ta mostra kuma gosi bu sta vivu pa fasi vontadi di Deus. Lembra tambi kuma, bu dedika bu vida pa propi Jeova Deus, i ka pa un tarbaju, pa un kausa, pa utrus pekaduris o pa un organizason. Bu dedikason ku batismu i kumsada di un amizadi intimu ku Deus — un relason intimu kel. — Salmu 25:14.

²⁵ Batismu ka ta garanti salbason. Jesus Kristu fala: “Kil ku fika fiel te na fin i ta salba.” (Mateus 24:13) Batismu i so un kumsada. Pa risibi salbason ku Deus na da, no dibi di “fika sempri dentru di amor di Deus.” (Judas 21) Ke ki kila signifika? Kuma ku bu pudi manti na amor di Deus? No ultimu kapitulu na bin da resposta.