1. ¿Imanasqam Etiopia nacionpi kamachikuq runa Bautizakuyta munarqa?

“KAYQAYA kaypi kasqa yaku ¿imaraqtaq faltawan bautizawanaykipaq?” nispam nirqa punta pachak wata ukupi Etiopia nacionpi kamachikuq runa. Diosta serviq Felipem Jesus Mesias kasqanmanta Bibliawan yachachirqa. Chay kamachikuqqa  anchatapunim kusikurqa yacharusqanmanta, chaymi bautizaykunanpaq mañakurqa (Hechos 8:26-36).

2. ¿Imanasqapunitaq bautizakuypiqa piensanaykiña?

² Sichu kay librota qallariymantapacha Jehová Diospa testigonwan estudiarunkiña hinaptinqa tapukuchkankipaschá: ‘¿Imaraqtaq faltawachkan bautizakunaypaqqa?’, nispa. Yacharunkiñam runakuna Paraisopi wiñaypaq kawsanankupaq Bibliapa prometesqanmanta (Lucas 23:43; Apocalipsis 21:3, 4). Yacharunkitaqmi wañuqkuna imayna kasqankumanta chaynataq kawsarimuy kananmantapas (Eclesiastes 9:5; Juan 5:28, 29). Yaqapaschá Jehová Diospa testigonkunapa huñunakuyninkunaman richkanki hinaspapas Diosta munasqanman hina yupaychasqankuta qawachkanki (Juan 13:35). Segurochariki Jehová Dioswan sumaq amistadta rurachkankiña.

3. a) ¿Imatataq Jesusqa qatiqninkunata kamachirqa? b) ¿Imaynataq cristiano bautizakuyqa?

³ ¿Imaynatam qawachiwaq Jehová Dios serviy munasqaykita? Qatiqninkunatam Jesus kamachirqa: “Llapallan nacionpi runakunaman rispayá [. . .] bautizamuychik”, nispa (Mateo 28:19). Jesuspunim bautizakusqanwan qawachirqa lliwpas bautizakunanchikpaq. Ichaqa manam Jesustaqa umanpichu yakuwanqa maqchiyllaqa-maqchirqaku (Mateo 3:16). Griego rimaypi bautizay ninanqa yaku ukupi entero cuerponchikta “challpuymi”. Chaynaqa cristiano bautizakuyqa yaku ukuman entero cuerpo challpuymi.

4. ¿Imatam qawachin bautizakuq runaqa?

⁴ Jehová Dioswan amistad rurayta llapallan munaqkunaqa bautizakunankum. Bautizakuqqa Diospa munayninta ruray munasqantam qawachichkan chaynataq Diospa munayninta ruraspan kusikusqantapas (Salmo 40:7, 8). Bautizakunapaq imam ruranamanta yachaykusunchik.

5. a) ¿Imatam puntataqa ruranayki bautizakuyta munaspaykiqa? b) ¿Imanasqataq ancha allinpuni huñunakuykunaman riyqa?

⁵ Bautizakunapaq punta kaq ruraytaqa ñam cumplichkankiña.  ¿Imaynata? Biblia estudiasqaykipi Jehová Diosmantawan Jesucristomanta yachaspaykim (Juan 17:3). Ichaqa astawanraqmi yachaytaqa haypawaq. Cristianokunaqa munanikum Jehová Dios imam ‘munasqanmanta entiendeykachisunaykita’ (Colosenses 1:9). Jehová Diospa testigonkunapa huñunakuyninkunam yanapasunki chay yachayta haypanaykipaq. Chaymi huñunakuykunaman riytaqa amam dejanaykichu (Hebreos 10:24, 25). Chay huñunakuykunaman sapa kutilla riptikiqa Jehová Diosmanta yachaynikim astawan masyarinqa.

6. ¿Bibliapa lliw yachachikuyninkunataraqchu yachana Bautizakunapaqqa?

⁶ Bautizakunapaqqa manam Bibliapa lliw yachachikuyninkunataraqchu yachanaykiqa. Yuyariy, Etiopia nacion kamachikuq runa Bibliamanta imallatapas yachachkaspanpas yanapanataraqmi necesitarqa astawan yachananpaqqa (Hechos 8:30, 31). Chaynam qampas astawanraqmi yachanayki. Diosmanta yachaynikiqa manam haykapipas tukunqachu (Eclesiastes 3:11). Ichaqa Bautizakunaykipaqqa yachanaykim Bibliamanta yachanapaq kaq yachaykunata hinaspapas chaykunapim iñinayki (Hebreos 5:12). Ejemplopaq, yachanaykim wañuqkuna imayna kasqankumanta, imarayku Diospa sutinpas Gobiernonpas ancha allinpuni kasqanmanta.

7. Bibliata estudiasqaykiman hina, ¿imatam sonqoykipi wiñachinayki?

⁷ Chaywanpas, manam yachayllachu-yachana, Bibliaqa ninmi “mana iñiyniyoq kaspaqa Diostaqa manam agradachwanchu”, nispa (Hebreos 11:6). Bibliam willakun ñawpa Corinto llaqta wakin runakuna cristianokunapa willakusqankuta uyariruspanku ‘iñikuspa bautizakusqankumanta’ (Hechos 18:8). Chaynatachá qampas rurayta munanki. Bibliata estudiaspaqqa iñinaykipunim Biblia Diospa Palabran kasqanpi. Iñinaykitaqmi Diospa promesankuna cumplikunanpi chaynataq rantinchikpi churin Jesucristopa wañukusqanwan salvaykusunaykimantapas (Josuey 23:14; Hechos 4:12; 2 Timoteo 3:16, 17).

8. ¿Imam tanqasunki yachasqaykikunamanta rimarinaykipaq?

⁸ Qaqa hina iñiyniki kaptinqa yachasqaykikunamanta astawan rimanaykipaqmi tanqasunki (Jeremias 20:9). Arí, Diosmantawan munayninmantam rimariyta munankipuni (2 Corintios 4:13).

9, 10. a) ¿Pikunamanmi Bibliapa yachachikuyninkunamanta willakuyta qallariwaq? b) ¿Imatam rurawaq Jehová Diospa testigonkunawan kuska predicayta munaspaykiqa?

⁹ Qallarinapaqqa, Bibliapa wakin yachachikuyninkunamantam sumaqllata willakuwaq aylluykikunaman, amistadnikikunaman, vecinoykikunaman chaynataq llamkaqmasikikunamanpas. Chaymantañataqmi Jehová Diospa testigonkunawan arreglo rurakusqanman hina kuskaña predicaytapas munanki. Chayna kaptinqa ama recelaspa Bibliamanta yachachisuqnikiwan rimariy. Yachachisuqniki predicanaykipaq hinaña kasqaykita reparaptinqa, iskay ancianokunawan iskaynikichik rimarinaykichikpaqmi arreglota rurakunqa.

¹⁰ Chaynapim astawan reqsinki Diospa llaqtanpi nanachikuq ancianokunata (Hechos 20:28; 1 Pedro 5:2, 3). Paykunam kaykunapi reparanqaku: Bibliamanta yachanapaq kaq yachachikuykunata entiendesqaykipi, chaykunapi iñisqaykipi, yachasqaykiman hina imayna kawsasqaykipi chaynataq cheqaqtapuni Jehová Diospa testigon kayta munasqaykipipas. Chayna kaptinqa willasunkikum manaraq bautizasqa predicaq kanaykipaq, chaynapim Jehová Diospa testigonkunawan kuska predicayta qallarinki.

11. ¿Predicaq kayta munaqkunaqa imakunatataq saqenanku?

¹¹ Wakin kutikunapiqa ancianokunam qawanku predicay munaqpa imayna kawsayninta tikranantaraq. Chayraykum predicaqña kanaykipaqqa kay hatun huchakunamanta karunchakunayki: millakuypaq aychapa munasqan huchapakuykunamanta, machakuymanta, coca akuymantawan cigarro pitaymantapas (1 Corintios 6:9, 10; Galatas 5:19-21).

12. ¿Imanasqataq huchanchikkunamanta wanakunanchik?

¹² Bautizakunapaqqa huk ruraykunataraqmi ruranayki. Apostol Pedrom nirqa: “Chaynaqa huchaykichikmanta wanakuspayá Diosman kutirikuychik”, nispa (Hechos 3:19). Sonqonmantapuni huchanmanta wanakuqqa anchatapunim pesakun rurasqankunamanta. Ichaqa manam hatun huchapi kawsaqkunallachu wanakunankuqa, lliwpas wanakunanchikmi. ¿Imanasqa? Llapallan runakunam huchallikuq kanchik, chaymi huchanchikmanta Dios pampachaykuwananchikta necesitanchik (Romanos 3:23; 5:12). Bibliata manaraq estudiachkaspaykiqa manam Diospa munaynintaqa yacharqankichu. Chayraykum Diospa munasqanman hinaqa mana kawsakurqankichu. Chaymi huchanchikkunamantaqa wanakunanchikpuni.

13. ¿Ima ninantaq Diosman kutirikuyqa?

¹³ Huchamanta wanakuruspaqa allin ruraymanñam kutirikunanchik. Diosman kutirikuyqa manam huchakunamanta pesapakuyllachu, aswanqa ñawpa kawsasqanchikpi mana allin rurasqanchikkunata saqeymi. Kallpanchakunaykipunim Diosman kutirikusqaykimantapacha allin kaqllataña ruranaykipaq. Bautizakunaykipaqqa huchapi kawsasqaykimantam wanakunayki hinaspapas Diosmanmi kutirikunayki.

14. ¿Imatawanraqmi ruranayki manaraq bautizakuchkaspa?

¹⁴ Manaraq bautizakuchkaspaqa kaytawanmi ruranayki: Jehová Diosmanmi qokunayki.

15, 16. ¿Ima ninantaq Diosman qokuyqa, imataq kallpanchawasun chayta rurananchikpaq?

¹⁵ Diosman qokuyqa sonqomanta mañakuypi Jehová Diosllapaqña kawsanapaq prometekuymi (Deuteronomio 6:15). Ichaqa, ¿imaraykutaq Diosmanqa qokuykuna? Kay tupanachiypi yuyaymanasun: huk qarim huk warmita ninman, astawan reqsiykuytam munayki nispa. Warmita astawan  reqsispam hinaspa sumaq kayninkunapi astawan reparaspam paytaqa astawan kuyanqa. Chayna kaptinqa, casarananpaqñam rimapayanqa. Casarakuspaqa imaymana rurayniyoqmi astawan tarikunqa. Ichaqa, payta kuyayninmi chaykunata rurananpaq kallpanchanqa.

¹⁶ Jehová Diosta reqsispanchikmi hinaspapas kuyaspanchikmi kallpanchasqa tarikunchik payllapaqña kawsaspa payllataña yupaychananchikpaq. Jesucristota qatikuyta munaqqa manañam ‘kikillanpaqqa kawsananñachu’ (Marcos 8:34). Sichu imamantapas Diosta puntata kasukusunchik chaynataq munasqanchikkunatapas qepaman churasunchik hinaptinqa manañam kikillanchikpaqchu kawsasunchik. Manaraq bautizakuchkaspaqa Diospa munaynin rurayta puntapi churanaykipaqmi akllakunayki (1 Pedro 4:2).

17. ¿Imanasqataq wakinkunaqa Diosman qokuyta manchakunku?

¹⁷ Wakin runakunaqa Jehová Diosman qokuytam manchakunku. Manchakunkupaschá Diosman qokusqankuta mana cumpliptinku cuentallikunankumanta. Piensankupaschá huchallikuruptinku Jehová Diosta piñachinankumanta, chaymi Diosman mana qokunkuchu.

18. ¿Imataq kallpanchasunkiman Jehová Diosman qokuykunaykipaq?

¹⁸ Jehová Diosta astawan kuyaspaykim kallpanchasqa tarikunki payman qokuykunaykipaq chaynapi qokusqaykiman hina kawsanaykipaqpas (Eclesiastes 5:4). Diosman qokusqayki qepamanqa ‘Señorpa qatiqnin hina allinta kawsanaykipaqmi hinaspapas paypa munasqanta ruranaykipaqmi’ kallpanchasqa tarikunki (Colosenses 1:10). Diosta kuyaynikim yanapasunki Diospa munaynin kasukuyta mana sasa hinata qawanaykipaq. Yaqapaschá apostol Juan hina qampas ninki: “Diosta kuyaspanchikqa kamachikuyninkunatapas kasukunchikmi, kamachikuyninkunaqa manam llumpay sasachu”, nispa (1 Juan 5:3).

19. ¿Imanasqataq mana manchakunaykichu Jehová Diosman qokuykuyta?

 ¹⁹ Manam chuyay-chuyayraqchu kananchik Jehová Diosman qokuykunapaqqa. Payqa yachanmi atisqanchikta mana atisqanchiktapas, chaymi atisqallanchikta kamachiwanchik (Salmo 103:14). Paymi yanapasunkipuni allin kawsakunaykita munasqanrayku (Isaias 41:10). Segurom kawaq tukuy sonqoykiwan Jehová Diospi iñikuptiki ‘munasqanman hina kawsachisunaykimanta’ (Proverbios 3:5, 6).

20. ¿Imatawanraqmi rurananku Diosman qokuykuqkunaqa?

²⁰ Yacharusqanchikman hinaqa yaqapaschá oracionpi  Jehová Diosman qokuykuyta munachkankiña. Ichaqa Diosta cheqaptapuni kuyaqkunaqa kaytaraqmi rurananku: Diosman qokuykusqankumantam runakunaman ‘willakunanku’ (Romanos 10:10). ¿Imaynatam chayta rurana?

21, 22. ¿Imaynatam runakunapa qayllanpi Jehová Diosman qokurusqaykita ‘willakuwaq’?

²¹ Bautizakuyta munaptikiqa congregacionnikipi ancianomasinkunawan ruranankupaq yanapaq ancianomanmi willakunayki. Paymi rimanqa huk ancianokunawan Bibliapa yachanapaq kaq tapukuykunamanta  qanwan rimarinankupaq. Bautizakunaykipaq allin kasqaykita ancianokuna tantearuptinkuqa willasunkikum hamuq asambleakunapi bautizakunaykipaq. * Bautizakuna punchawpiqa bautizakuqkunapaq yachachikuypim qawachikun imam bautizakuy kasqanmanta. Chay yachachikuy tukupaytam bautizakuqkunata asambleapi yachachikuq iskay tapukuykunata ruran, paykunañataqmi kallpawan kutichinku. Chaynapim Diosman qokuykusqankuta llapallan runakunaman ‘willakuchkanku’.

²² Bautizakuynikiqa Diosmanña qokusqaykitam lliwman qawachin chaynallataqmi Jehová Diospa testigonña kasqaykitapas. Bautizakuqkunaqa yakupim chinkaykunankukama challpuchikunku chaynapi Diosmanña qokurusqankuta qawachinankupaq.

23. ¿Ima ninantaq “Taytapa, Churipa hinaspa Chuya Espiritupa sutinpi” bautizakuyqa?

²³ Jesusqa qatiqninkunatam nirqa “Taytapa, Churipa hinaspa Chuya Espiritupa sutinpi” bautizakunankupaq (Mateo 28:19). Taytapa sutinpi bautizakuyqa tukuy unanchaq Dios kasqanta reqsikuymi, Churipa sutinpi bautizakuyñataq kamachiqninchik kananpaq akllasqa kasqanta reqsikuymi (Salmo 83:18; Mateo 28:18). Chuya espiritupa sutinpi bautizakuyñataqmi Diospa tukuy imatapas atiq kallpan reqsikuymi (Galatas 5:22, 23; 2 Pedro 1:21).

24, 25. a) ¿Imawanmi tupachichwan bautizakuytaqa? b) ¿Ima tapukuytataq kutichinanchik?

²⁴ Bautizakuyqa manam yakupi challpukuyllachu. Ancha valorniyoq ruraymanmi rikchakun. Yakupi challpukuyqa munasqallanchikman hina kawsasqanchikmanta “wañuymanmi” rikchakun. Yakumanta lloqsimuyñataqmi qawachin bautizakusqaykimantapacha Jehová Diospa munayninta ruranaykipaqña kawsarimusqaykita. Ama  haykapipas qonqaychu kikin Jehová Diosmanpuni qokurusqaykita, manam llamkaymanchu ni runakunapa piensasqanmanchu, manataqmi runakunamanchu nitaq huk rikchaq ruraymanchu. Diosman qokurusqaykiwanmi chaynataq bautizakusqaykiwanmi Jehová Dioswan sumaqllaña amistad rurayta qallarichkanki (Salmo 25:14).

²⁵ Ichaqa manam bautizakusqallaykiwanchu salvasqaqa kanki. Apostol Pabloqa qellqarqam: “Manchakuywan hinaspa respetowanyá salvasqa kasqaykichik qespichiypi riychik”, nispa (Filipenses 2:12). Bautizakuyqa Diosman hukllawasqa kanapaq qallariyllaraqmi. Ichaqa, ¿imatam rurananchik Diosman hinalla hukllawasqa kanapaq chaynataq kuyakuyninpi takyananchikpaqpas? Tukupay kaq yachachikuymi kay tapukuytaqa kutichinqa.