1. Silxaane noosihu mittu Itiyophphiyu manchi cuuamara xaˈmiˈrinohu mayiraati?

“KUNEETI kowiichcho wayi noona cuuama hoolannoeri mayi no?” Tini xaˈmo umi sanira silxaane noosihu mittu  Itiyophphiyu manchi xaˈminote. Filiphphoosi yinanni Kiristaanchi konni manchira Yesuusi daanno yine qaale eˈnoonni Mesihichcha ikkinota xawise kulino. Kuni Itiyophphiyu manchi Qullaawa Borronni rosinori hagiirsiisinosi daafira rosinore loosu aana hosiisate kaino. Isi cuuama hasiˈrinota kulino!—Soqqamaanote Looso 8:26-36.

2. Cuuamate hajo hixamanynyite assaawa hasiissannohehu mayiraati?

² Yihowa Farciˈraasine giddo mittu ledo konni maxaafita saˈu fooliishshuwa seekkite xiinxalloottoha ikkiro, ‘Cuuama hoolannoeri isi mayi no?’ yite xaˈmate qixxaawoottoha ikkara dandaanno. Qullaawu Maxaafi giddo noota gannatete hegere heeshsho heeˈrate hexxo xa seekkite afootto. (Luqaasi 23:43; Ajuu[j]a 21:3, 4) Qoleno reyitinori noo garanna kaote hexxo rosootto. (Mekibibi 9:5; Yohaannisi 5:28, 29) Miteekkite Yihowa Farciˈraasine gamba yitanno songowa hadhe halaalaancho ammaˈna giddo noo manni ikkito illekkinni laoottoha ikkara dandaanno. (Yohaannisi 13:35) Hakkiinni saeno, Maganu Yihowa ledo gilletenni fiixooma jammaroottoha ikkara dandaanno.

3. (a) Yesuusi rosaanosira mayitanno hajajo uyino? (b) Kiristaanu cuuamannohu hiittoonniiti?

³ Maganoho soqqama hasiˈrattota leellisha dandaattohu hiittoonniiti? Yesuusi rosaanosi togo yiino: ‘Hadhine manna duuchcha cuuˈinanni rosaano asse.’ (Maatewoosi 28:19) Yesuusi umisi wayi giddo cuuame lawishsha ikkino. Isi cuuaminohu bisoho waa winxeenna diˈˈikkino; woyi umoonni qolle waa dunneenna diˈˈikkino. (Maatewoosi 3:16) “Cuua” yine tirroonnihu Girikete qaali “lixisa” yitanno tiro afiˈrino. Konni daafira Kiristaanu cuuamannohu woˈmunni woˈma wayi giddo lixeeti.

4. Wayinni cuuama maa leellishshanno?

⁴ Wayinni cuuama Yihowa ledo fiixooma hasiˈrannohura baalaho hasiissannote. Cuuama Maganoho soqqamate hasatto nooheta mannaho leellishshanno. Cuuamakki Yihowa fajjo assa hagiirsiissannoheta leellishshanno.  (Faarso 40:7, 8) Ikkollana cuuama dandaatto gede assa hasiissannoheri no.

5. (a) Cuuamate umo adha hasiissannohe qaafo hiitteeti? (b) Kiristaanu gambooshshi maaho kaaˈlanno?

⁵ Umi qaafo adha jammarte nootto. Hiittoonni? Qullaawa Maxaafa ganynyite xiinxallakkinni Magano Yihowanna Yesuusi Kiristoosi lainohunni egenno afiˈrootto. (Yohaannisi 17:3) Ikkollana rosattori gana lowori no. Kiristaanu “[Maganu] fajjotenni gara ikkitino egennonni woˈma” hasiissannonsa. (Qolasiyaasi 1:9, NW) Togoo egennonni woˈmate Yihowa Farciˈraasineha songote gambooshshe beeqqa lowo geeshsha kaaˈlitannohe. Togoo gambooshshe beeqqa lowo geeshsha hasiissannote. (Ibiraawuyaani 10:24, 25) Ganynyite gambooshshe beeqqakki Maganunnire ledde afatto gede kaaˈlitannohe.

6. Cuuamate mageeshshiti Qullaawu Maxaafi egenno hasiissanno?

⁶ Ikkeennano cuuamate Qullaawu Maxaafi giddo noore baala afa dihasiissannohe. Silxaane noosihu Itiyophphiyu manchi gama egenno afiˈrinoho; ikkollana Qullaawa Borrota mite mite kifile huwatate kaaˈlo hasiissinosi. (Soqqamaanote Looso 8:30, 31) Hatteente gede, atino rosattori lowori no. Isinni, Maganunnire rosatto rosi digoofanno. (Mekibibi 3:11) Ikkeennano, cuuamattora albaanni Qullaawu Maxaafiha xinta ikkino roso huwatanna ammana hasiissannohe. (Ibiraawuyaani 5:12) Lawishshaho, reyitinori noo gara, Maganu suˈminna Mangistesi hasiissannohu mayiraatiro afanna ammana hasiissannohe.

7. Qullaawa Maxaafa xiinxallakki ma assitahera hasiisanno?

⁷ Ikkollana ‘ammana nookkiha Magano hagiirsiisa dandiinannikkihura’ egenno calla baqe diˈˈikkitino. (Ibiraawuyaani 11:6) Biˈre Qorontoosi katamira heeˈrinohu mitu mitu manni Kiristaanu sabbakino sibikate macciishshihu gedensaanni,  ‘ammane cuuaminota’ Qullaawu Maxaafi kulannonke. (Soqqamaanote Looso 18:8) Insante gede, Qullaawa Maxaafa xiinxallakki Qullaawu Maxaafi ayyaanunni borreessaminoha Maganu Qaale ikkinota ammanatto gede assitahera hasiisanno. Qullaawa Maxaafa xiinxallakki, Maganu uyino hexxo ammanatto gedenna Yesuusiti wodote kakkalo manna gatisate wolqa afidhinota ammanatto gede assitahera hasiisanno.—Iyyaasu 23:14; Soqqamaanote Looso 4:12; 2 Ximootewosi 3:16, 17.

8. Rosoottore woleho kulate kakkayisannoheri maati?

⁸ Ammanakki lexxitanni hadhuro, afoottore mannaho kulittokki sammi yite diafatto. (Ermiyaasi 20:9) Maganunnirenna alaamasi woleho kulate lowo geeshsha quqquxamatto.—2 Qorontoosi 4:13.

9, 10. (a) Qullaawu Maxaafi halaale ayeoora kulte jammara dandaatto? (b) Yihowa Farciˈraasine ledo darajjaino garinni sabbaka hasiˈrittoro ma assa hasiissannohe?

⁹ Qullaawu Maxaafi halaale fiixikkira, jaallakkira, olliikkiranna ledokki loosanno mannira kulatenni jammara dandaatto; tenne assatto woyite hayyotenni assi. Yannate gedensaanni darajjaino garinni Yihowa Farciˈraasine ledo sabbaka dandaatto. Tenne hajo lainohunni Qullaawa Maxaafa rosiisihe Farciˈraasinchi ledo hasaawa waajjitooti. Faajjete sabbakate deerra iillittoro, atinna rosiisihe Farciˈraasinchi, lame songote cimeeyye ledo hasaabbinanni gede qixxaawo assinanni.

¹⁰ Tini qixxaawo Maganu geˈreewi allaalaasine ledo yaano Kiristaanu songo cimeeyye ledo seekkite egennamatto gede kaaˈlitannohe. (Soqqamaanote Looso 20:28; 1 Pheexiroosi 5:2, 3) Tini cimeeyye Qullaawu Maxaafiha xinta ikkino roso huwatoottotanna ammanattota, Maganu qaali garinni heeˈrakki, qoleno addinta Yihowa Farciˈraasincho ikka  hasiˈrattotanna teˈee buuxxanno. Hakkiinnino cuuamoottokki halashshaancho ikkite faajjete sabbaka dandaattota kultannohe.

11. Mitu mitu manni faajjete sabbaka dandaanno gede maa agura hasiissannonsa?

¹¹ Wole ragaanni kayinni faajjete sabbaka dandaatto gede, heeshshokki giddo mite mite soorro assanna mito mito amale agura hasiissannoheha ikkara dandaanno. Agura hasiissannohe coyi giddo gamu, wolu mannira maaxxe keeshshoottore ikkara dandaanno. Konni daafira, cuuamoottokki halashshaancho ikkate xaˈmiˈrakkira albaanni kabbaade ikkino cubbiwiinni, yaano soorro, dimba, hashiishe aganna caate ita lawinore xooqa hasiissannohe.—1 Qorontoosi 6:9, 10; Galatiya 5:19-21.

12. Maaro ea hasiissannohu mayiraati?

¹² Cuuama dandaatto gede assa hasiissannoheri wolurino no. Hawaariya Pheexiroosi, ‘Cubbiˈne hayishshamanno gede [maaro eˈe, hattono soorramme]’ yiino. (Soqqamaanote Looso 3:19) Maaro ea yaa assootto cubbira giddokkinni gaabbate yaate. Maaeela heeshsho heeˈranno manchi maaro ea hasiissannositi dihuluullammannite. Ikkollana maaeela heeshsho heeˈrannokki manchi nafa maaro ea hasiissannosi. Mayira? Korkaatuno mannu ooso baala cubbaataamma ikkitinohura Maganu maaro hasiissannonsa. (Roomu Sokka 3:23; 5:12) Qullaawa Maxaafa xiinxallakkira albaanni Maganu fajjo maatiro diafootto. Maganu fajjo maatiro afittokki fajjosi garinni heeˈra didandaatto. Konni daafira maaro ea hasiissannote.

13. Soorrama yaa mayyaate?

¹³ Maaro eino manchi ‘soorrama’ woyi albi doogosinni higa hasiissannosi. Maaro ea gaabba calla diˈˈikkitino. Konni albaanni heeˈratto heeshsho aguratenna dancha ikkino coye assate qodhite kaˈˈa hasiissannohe. Cuuamakkira albaanni maaro eanna soorrama hasiissannohe.

14. Cuuamakkira albaanni assa hasiissannohehu qaru coyi maati?

¹⁴ Cuuamakkira albaanni assa hasiissannohehu wolu qaru coyi no. Hakkuno ateneeto Yihowara sayisse aate.

15, 16. Meessaneeto Maganoho aa yaa mayyaate? Mitto mancho hatto assate kakkayisannosihu maati?

¹⁵ Woˈmu wodani huuccattonni ateneeto Yihowara sayisse aatto wote, hegerera isiha calla ikkate qaale eatto. (Marro 6:15) Mittu manchi togoo qaale eannohu mayiraati? Lawishshaho, mittu beetti mitte beetto adhara coyiˈramino yine hendo. Ise roore afanni haˈranno wotenna danchu akati nooseta buuxiro tini beetto roore baxissanni hadhannosi. Yannate gedensaanni tenne beetto adhara huucciˈranno. Seenne adha halaafinate leddannoti dikaandannite. Ikkollana tenne beettora noosi baxilli ise adhanno gede assannosi.

¹⁶ Atino Yihowa affanninna baxxanni haˈrittoro ateneeto qooffatittokki isira soqqamate kakkaˈˈatto. Maganu Beetto Yesuusi Kiristoosi harunsa hasiˈrannohu ayiino “umosi [kaada]” hasiissannosi. (Maarqoosi 8:34) Gillenke hasattonna iqqidenke Maganoho woˈmunni woˈma hajajammeemmota hooltannonkekki gede umonke kaada hasiissannonke. Konni daafira, cuuamakkira albaanni Yihowa fajjo assa heeshshokki giddo qara coye ikka hasiissannose.—1 Pheexiroosi 4:2.

17. Mitu manni insaneeto Maganoho sayise aate hobbi ruxxi yaannohu mayiraati?

¹⁷ Mitu manni gufirummorona yee waajjanno daafira, insaneeto Yihowara sayise aate hobbi ruxxi yaanno. Aneneeto Maganoho sayise uummoro Maganu albaanni xaˈmameemmo yee waajjara dandaanno. Soˈro loose Yihowa dadilliseemmo yee waajjanno daafira, insaneeto Yihowara sayise aa hooga woyyitannoha lawannonsa.

18. Ateneeto Yihowara sayisse aatto gede kakkayisannoheri maati?

 ¹⁸ Yihowara noohe baxilli lexxanni haˈriro, ateneeto isira sayisse aatenna eootto qaale agadhate kakkaˈˈatto. (Mekibibi 5:4) Ateneeto Maganoho sayisse uyitto gedensaanni, “Yihowa woˈmunni woˈma hagiirsiisanna isi hasiˈranno garinni heeˈra” hasiˈrakki digattanno. (Qolasiyaasi 1:10, NW) Maganoho noohe baxilli fajjosi assa gooddo ikkite leeltannohekki gede assanno. Konni daafira hawaariya Yohaannisi yiinori ledo sumuu yaattoti dihuluullissanno. Isi togo yee borreessino: “Magano baxa hajajosi agadhate, hajajosino diqarrissannote.”—1 Yohaannisi 5:3.

19. Ateneeto Maganoho sayisse aa waajja hasiissannohekkihu mayiraati?

¹⁹ Ateneeto Maganoho sayise aate guuta ikka dihasiissannohe.  Yihowa wolqakki deerra afino; qoleno wolqakkira alee ikkinore assattora dihasiˈranno. (Faarso 103:14) Isi qinaahera hasiˈranno daafira kaaˈlannohe; qoleno irkisannohe. (Isayyaasi 41:10) Woˈmu wodanikkinni Yihowa addaxxattoha ikkiro, “doogokki suwashsho assannota” huluullantooti.—Lawishsha 3:5, 6.

20. Meessaneeto Yihowara sayise aa mannu afikki gattannota ikkitinokkihu mayiraati?

²⁰ Aleenni xawinsoonnire seekkite huwatakki gillekkinni  ateneeto huuccattotenni Yihowara sayisse aate kaaˈlitahera dandiitanno. Qoleno Yihowara addu baxilli noosihu ayee manchino ‘gato afiˈrate ammanasi faajjete xawisa’ hasiissannosi. (Roomu Sokka 10:10, NW) Ammanakki faajjete xawisa dandaattohu hiittoonniiti?

21, 22. Ammanakki “faajjete xawisa” dandaattohu hiittoonniiti?

²¹ Cuuama hasiˈrattota songoˈne cimeeyye bisi qineessaanchira kuli. Isi gama cimeeyye ledo Qullaawu Maxaafiha xinta ikkino roso addi addi xaˈmonni ledde hasaawatto gede qixxaawo assanno. Tini cimeeyye cuuama dandaatto yite wossanturo, aane noohura jawu gambooshshira cuuama dandaattota kultannohe. * Duuchcha wote togoo gambooshshira, cuuama yaa mayyaatero Maganu qaalinni xawinsanni. Cuuamate yannara qaale kulannohu, cuuantannori qoltanno gede lame xaˈmo xaˈmannonsa; tini xaˈmo cuuantannori ammanansa “faajjete xawisate” kaaˈlitannonsa.

²² Cuuama ateneeto Maganoho sayisse oottotanna hakkiinni jammarte Yihowa Farciˈraasincho ikkoottota faajjete leellishshanno. Cuuantannori mannimmansa gudisse wayi giddora eessite insaneeto Yihowara sayisse uyitinota mannaho leellishshanno.

23. “Annunni, Beettunninna Qullaawu Ayyaani suˈminni” cuuama yaa mayyaate?

²³ Yesuusi rosaanosi “Annunni Beettunninna Qullaawu Ayyaani suˈminni” cuuantannota xawisino. (Maatewoosi 28:19) Togo yaa cuuamanno manchi Yihowatanna Yesuusi Kiristoosi silxaane huwatanna ammana hasiissannosi yaate. (Faarso 83:18; Maatewoosi 28:18) Qoleno Maganunnihu qullaawu ayyaani yaano Maganunniti loosu aana noo wolqa maa assitannoro huwata hasiissannosi.—Galatiya 5:22, 23; 2 Pheexiroosi 1:21.

24, 25. (a) Cuuama maa leellishshanno? (b) Dawaro afiˈra hasiissannonke xaˈmo hiitteeti?

 ²⁴ Ikkollana cuuama wayi giddora eˈˈe fula calla ikkitukkinni, mittu hasiisanno coyira malaateho. Wayi giddora gudisante eakki albi heeshshora reyottota leellishshanno. Wayi giddonni fulakki kayinni xaate Maganu fajjo assitanni heeˈrattota leellishshannote. Qoleno ateneeto sayisse oottohu mittu loosira, mittu alaamira, mannaho woyi mitte dirijjitera ikkikkinni Yihowara ikkinota qaagi. Ateneeto Yihowara sayisse aakkinna cuuamakki Maganu ledo muli jaalooma kalaqiˈrate hanafote.—Faarso 25:14.

²⁵ Cuuama calla digatissanno. Hawaariya Phaawuloosi togo yee borreessino: “Waajjatenninna [huxiˈratenni] umiˈne gato kaajjishidhe.” (Filiphphisiyusi 2:12) Cuuama gato afiˈrate hanafotella. Xa kayinni, Maganu baxillinni fulittokki heeˈra dandaattohu hiittoonniiti? yitannotera hasiissanno xaˈmora dawaro afiˈra hasiissannonke. Goofimarchu fooliishsho tenne xaˈmora dawaro qoltanno.