1. Aiseā na talosaga atu ai le eunuka Aitiope ia papatisoina o ia?

“FAAUTA! O le vai, o le ā se mea e taofia ai aʻu mai i le papatisoina?” O le fesili lenā a se eunuka Aitiope i le uluaʻi senituri. Ua uma ona faailoa i ai e le soo o Filipo faamaoniga e iloa ai, o Iesu o le Mesia na folafolaina mai. Na gaoioi le tamāloa Aitiope ona o le matuā faagaeetia  o ia i mea na ia aʻoaʻoina mai le Tusi Paia. Na faaalia e lenei tamāloa lona manaʻo ia papatisoina o ia!—Galuega 8:26-36.

2. Aiseā e tatau ai ona e manatu mamafa i le papatisoga?

² Afai na lelei ona outou suʻesuʻeina ma Molimau a Ieova mataupu ua tuanaʻi o lenei tusi, e te ono fesili ifo iā te oe lava, ʻPe e iai ea se mea ua taofia ai le papatisoina o aʻu?’ Ua uma ona e aʻoaʻoina le folafolaga a le Tusi Paia i le ola e faavavau i le Parataiso. (Luka 23:43; Faaaliga 21:3, 4) Ua māeʻa foʻi ona e aʻoaʻoina le mea moni e uiga i tagata ua maliliu ma le faamoemoe o le toe tū. (Failauga 9:5; Ioane 5:28, 29) Atonu ua e auaufaatasi ma Molimau a Ieova i a latou sauniga i le faapotopotoga, ma ua e iloa e saʻo le auala o loo latou tapuaʻi ai. (Ioane 13:35) A o le mea e sili ona tāua, e lē taumatea ua amata ona māfana la oulua faiā ma Ieova le Atua.

3. (a) O le ā le poloaʻiga a Iesu i ona soo? (e) E faapefea ona fai le papatisoga i le vai?

³ E faapefea ona faaalia e te fia auauna i le Atua? Na fetalai atu Iesu i ona soo: “Ia outou ō atu e fai tagata o nuu uma lava ma soo, ma papatiso atu iā i latou.” (Mataio 28:19) Na fai e Iesu le faaaʻoaʻoga o le papatisoga i le vai. E leʻi faatulutuluina pe liligi ifo le vai i lona ao. (Mataio 3:16) O le upu “papatiso” e sau mai se upu Eleni e uiga i le “lolō lea i le vai.” O lea la, o le papatisoga faa-Kerisiano o le matuā lolō lea i lalo po o le faatofu atoa i le vai.

4. O le ā ua faailoa i le papatisoga i le vai?

⁴ E tatau ona papatisoina i le vai tagata uma lava e fia mafuta iā Ieova le Atua. O le papatisoga e faailoa atu ai i le lautele lou manaʻo e auauna i le Atua. Ua faaalia ai lou fiafia e fai le finagalo o Ieova. (Salamo 40:7, 8) Peitaʻi, e iai gaoioiga e manaʻomia ona e faia muamua, a o leʻi mafai ona papatisoina oe.

5. (a) O le ā le gaoioiga muamua e manaʻomia mo le papatisoga? (e) Aiseā e tāua ai sauniga faa-Kerisiano?

⁵ O lenā ua e faatinoina le gaoioiga muamua. E faapefea? E ala i le iloaina o Ieova le Atua ma Iesu Keriso, atonu e ala i le suʻesuʻeina o le Tusi Paia. (Faitau le Ioane 17:3.) Ae e tele isi mea e ao ona e iloaina. E mananaʻo Kerisiano ina ia ʻfaatumuina i latou i le poto saʻo i le finagalo o le Atua.’ (Kolose 1:9) E fesoasoani tele iā te oe le auai atu i sauniga a le faapotopotoga o Molimau a Ieova. E tāua le auai i na sauniga. (Eperu 10:24, 25) O le auai e lē aunoa i sauniga, e fesoasoani iā te oe ia iloa le Atua.

6. O le ā le tele o mea e tatau ona e iloa e uiga i le Tusi Paia ina ia mafai ai ona papatisoina oe?

⁶ O le mea moni, e lē tau tulia seʻi e iloa uma le Tusi Paia ona faatoʻā papatisoina lea o oe. E iai mea na iloa e le eunuka Aitiope, ae na ia moomia le fesoasoani e malamalama ai i isi vaega o le Tusi Paia. (Galuega 8:30, 31) E tele foʻi mea e tatau ona e aʻoaʻoina. E lē gata mai mea e te aʻoaʻoina e uiga i le Atua. (Failauga 3:11) A o leʻi papatisoina oe, e tatau ona e iloa ma taliaina aʻoaʻoga faavae a le Tusi Paia. (Eperu 5:12) O na aʻoaʻoga e aofia ai le mea moni e uiga i tagata ua maliliu, ma le tāua o le suafa o le Atua ma lona Malo.

7. E faapefea ona aafia oe ona o lou suʻesuʻeina o le Tusi Paia?

⁷ Ae e lē lava le tau ina iloa o le Tusi Paia, auā “a aunoa ma le faatuatua e lē mafai ona faafiafiaina ai” le Atua. (Eperu 11:6) Ua faapea mai le Tusi Paia, ina ua faalogo isi tagata o le aai anamua o Korinito i le feʻau a soo o Iesu, ʻna talitonu ma papatisoina i latou.’ (Galuega 18:8) Pe a e suʻesuʻeina foʻi le Tusi Paia, e tatau ona matuā faatalitonuina oe o le Afioga moni lea a le Atua. O le suʻesuʻeina o le Tusi Paia, e fesoasoani ina ia e faatuatua ai i  folafolaga a le Atua ma le taulaga a Iesu lea e maua ai le ola.—Iosua 23:14; Galuega 4:12; 2 Timoteo 3:16, 17.

8. O le ā o le a uunaʻia oe e faailoa atu i isi le poto ua e aʻoaʻoina?

⁸ A o tuputupu aʻe lou faatuatua, e faigatā ona e nofonofo ma mea ua e aʻoaʻoina. (Ieremia 20:9) O le a matuā uunaʻia oe ia taʻutaʻu atu mea ua e iloa e uiga i le Atua ma lona finagalo.—Faitau le 2 Korinito 4:13.

9, 10. (a) O ai atonu e amata ona e faailoa atu i ai upu moni o le Tusi Paia? (e) O le ā e ao ona e fai pe a e fia auai i le galuega talaʻi o loo faia e Molimau a Ieova?

⁹ Atonu e amata ona e faailoa atu upu moni o le Tusi Paia, e ala i le talatalanoa ma le faautauta i ou aiga, uō, tuaoi ma ē tou te faigaluega faatasi. E iai le taimi o le a e fia auai ai i le galuega talaʻi o loo faia e Molimau a Ieova. Afai ua e fia talaʻi, ia talanoa atu i le Molimau a Ieova o loo aʻoaʻoina oe i le Tusi Paia. Afai e aliali mai ua mafai ona e auai i le galuega talaʻi, o le a faia se fuafuaga e tou te fono ma lau faiaʻoga ma ni toeaina se toʻalua o le faapotopotoga.

¹⁰ O le faia faapea, o le a mafai ai ona e faamasani atu i nisi o toeaina Kerisiano o ē o leoleoina le lafu a le Atua. (Galuega 20:28; 1 Peteru 5:2, 3) Afai e mātau e toeaina ua e malamalama ma talitonu i aʻoaʻoga faavae a le Tusi Paia, ma e tausia taʻiala a le Atua, ma ua e manaʻo moni lava e avea oe ma Molimau a Ieova, o le a la taʻu atu iā te oe ua mafai ona e auai i le talaʻiga o se tagata talaʻi e leʻi papatisoina.

11. O ā suiga atonu e tatau ona fai muamua e isi ina ia mafai ai ona auai i le talaʻiga?

¹¹ Peitaʻi, atonu e mātau e toeaina e tatau ona fai ni suiga i lou olaga ma lau amio, ina ia mafai ona e auai atu i le talaʻiga. Atonu e aofia ai le tuu o ni amioga lilo. O lea  la, a o leʻi talosaga atu e fia avea oe o se tagata talaʻi e leʻi papatisoina, e tatau ona mamā lou olaga e aunoa ma le faia o ni agasala matuiā e pei o feusuaʻiga lē mamā, onā, faaaogāina o fualaau faasāina ma le taumafa tapaa.—Faitau le 1 Korinito 6:9, 10; Kalatia 5:19-21.

12. Aiseā e manaʻomia ai le salamō?

¹² E iai isi gaoioiga e tatau ona fai a o leʻi papatisoina oe. Na faapea atu le aposetolo o Peteru: “Inā salamō ia ma liliu, ina ia soloiesea a outou agasala.” (Galuega 3:19) O le salamō, o le matuā tigā lea o lou loto i se mea ua e faia. E tatau ona salamō se tagata na lē mamā lana amio, ae e tatau foʻi ona salamō se tagata tusa lava pe e leʻi leaga lona olaga. Aiseā? Auā e agasala tagata uma lava ma moomia le faamagaloga a le Atua. (Roma 3:23; 5:12) A o e leʻi suʻesuʻeina le Tusi Paia, e te leʻi iloa le finagalo o le Atua. Ona o lea, na lē mafai ai ona e soifua e tusa ma lona finagalo. O lea la, e manaʻomia le salamō.

13. E faapefea ona liliu se tagata?

¹³ A uma ona salamō, ona liliu lea. E lē lava le tau ina tigā o le loto i se mea ua fai. E tatau ona e fulitua i lou olaga tuai ma maumauaʻi e fai le mea saʻo e amata atu i le asō. E tatau ona e salamō ma liliu a o leʻi papatisoina oe.

14. O le ā le gaoioiga tāua e tatau ona fai a o leʻi papatisoina oe?

¹⁴ E iai se isi gaoioiga tāua e tatau ona fai a o leʻi papatisoina oe. E tatau ona tuuina atu lou ola iā Ieova le Atua.

15, 16. O le ā le uiga o le tuuina atu o lou ola i le Atua, ma aiseā e faia ai e se tasi lenā gaoioiga?

¹⁵ Afai e tuuina atu lou ola iā Ieova le Atua i le tatalo  faatauanau, ua e taʻutino atu i le Atua o le a e auauna tau lava o ia e faavavau. (Teuteronome 6:15) Ae aiseā e manaʻo ai se tagata e faia lea tulaga? Seʻi faapea ua amata ona uō se tama ma se teine. O le tele o mea e iloa e le tama e uiga i le teine ma vaai atu i ona uiga lelei, o le atili foʻi lenā ona tosina atu i le teine. Mulimuli ane, e lē taumatea o le a talosaga i ai e la te faaipoipo. E ui e tele isi tiute tauave faaopoopo pe a faaipoipo, ae e lē taofia ai lona fia faaipoipo i le teine, ona o lona alofa iā te ia.

¹⁶ Pe afai ua e iloa Ieova ma alofa iā te ia, e uunaʻia ai oe e auauna ma le loto atoa iā te ia ma faia mea uma lava e tusa ma lona finagalo. O se tagata e fia mulimuli i le Alo o le Atua o Iesu Keriso, e tatau ona “faafitia e ia o ia lava.” (Mareko 8:34) Tatou te faafitia i tatou lava e ala i lo tatou faamautinoa e lē faalavelavea lo tatou usiusitai atoatoa i le Atua, ona o mea tatou te mananaʻo i ai ma tulimataʻia. O lea la, a o leʻi papatisoina oe, e tatau ona faamuamua i lou olaga le faia o le finagalo o Ieova.—Faitau le 1 Peteru 4:2.

17. Aiseā ua lē tuuina atu ai e isi o latou ola i le Atua?

¹⁷ O isi tagata ua lē tuuina atu o latou ola iā Ieova, ona o le fefefe i lenā gaoioiga tāua. Latou te popole i le manatu e faapea, e ao ona latou tali atu i le Atua pe a tuuina atu o latou ola iā te ia o ni Kerisiano. Ona o le fefefe neʻi lē faamaoni ma faatigā ai iā Ieova, ua latou manatu ai e sili pe a lē tuuina atu o latou ola i le Atua.

18. O le ā le mea e mafai ona uunaʻia oe e tuuina atu lou ola iā Ieova?

¹⁸ A o tuputupu aʻe lou alofa iā Ieova, o le a uunaʻia ai oe e tuuina atu lou ola iā te ia ma fai le mea silisili e te mafaia. (Failauga 5:4) A uma lenā, e lē taumatea o le a e  manaʻo e ʻsavali e tusa ma le finagalo o Ieova, ma iʻu ina matuā faafiafiaina ai o ia.’ (Kolose 1:10) Ona o lou alofa i le Atua, o le a e lē manatu ai e faigatā le faia o lona finagalo. E lē taumatea e te ioe i upu a le aposetolo o Ioane: “O le alofa lenei i le Atua, ia tatou tausi i ana poloaʻiga; ma e lē mamafa ana poloaʻiga.”—1 Ioane 5:3.

19. Aiseā e lē tatau ai ona e fefe e tuuina atu lou ola i le Atua?

¹⁹ E lē faapea e tatau ona e lelei atoatoa ina ia mafai ai ona tuuina atu lou ola i le Atua. E silafia e Ieova le mea e gata mai ai lou malosi, ma e lē finagalo o ia e te faia se mea e te lē lavātia. (Salamo 103:14) E finagalo Ieova ina ia e taulau manuia, ma o le a ia lagolagoina oe  ma fesoasoani atu. (Faitau le Isaia 41:10.) E mafai ona e mautinoa, a e faatuatua iā Ieova ma lou loto atoa, ona “ia faasaʻoina lea o ou ala.”—Faataoto 3:5, 6.

20. Aiseā e tatau ai ona faailoa i isi le tuuina atu o lou ola iā Ieova?

²⁰ O le mafaufau i manatu faatoʻā uma ona tatou talanoaina, e ono fesoasoani iā te oe ia tuuina atu lou ola iā Ieova e ala i le tatalo. O tagata uma lava e alolofa i le  Atua, e tatau foʻi ona latou ʻtaʻutino atu i luma o tagata, e maua ai le faaolataga.’ (Roma 10:10) E faapefea ona fai o lenā mea?

21, 22. E faapefea ona e ʻtaʻutino atu i luma o tagata’ lou faatuatua?

²¹ Ia logo le sooupu a le ʻautoeaina o la outou faapotopotoga, o oe lenā ua fia papatiso. O le a ia faatulagaina ni toeaina ina ia autaluina ma oe ni fesili i aʻoaʻoga faavae a le Tusi Paia. Afai e ioe toeaina nei e mafai ona e papatiso, latou te faailoa atu e mafai ona e papatiso i se avanoa o le a sosoo mai. * E masani lava ona fai i lenā taimi se lauga e autalu ai le uiga o le papatisoga. Ona valaaulia lea e le failauga ē uma o loo fuafua e papatiso, ina ia tali ni fesili se lua. O se tasi lea o auala e “taʻutino atu ai i luma o tagata” lo latou faatuatua.

²² O le papatisoga, e mātauina ai oe o se tagata ua tuuina atu lou ola i le Atua ma ua avea o se Molimau a Ieova. E faatofu atoa i le vai tagata papatiso ina ia faailoa atu ai i le lautele, ua uma ona tuuina atu o latou ola iā Ieova.

23. O le ā le uiga o le papatiso “i le suafa o le Tamā, ma le Atalii, ma le agaga paia”?

²³ Na fetalai Iesu ia papatiso ona soo “i le suafa o le Tamā, ma le Atalii, ma le agaga paia.” (Mataio 28:19) O lona uiga e amanaʻia e le tagata papatiso le pule a Ieova le Atua ma Iesu Keriso. (Salamo 83:18; Mataio 28:18) E na te amanaʻia foʻi gaoioiga a le agaga paia o le Atua, po o lona mana galue.—Kalatia 5:22, 23; 2 Peteru 1:21.

24, 25. (a) O le ā le mea ua faatusaina i ai le papatisoga? (e) O le ā le fesili e tatau ona tali?

²⁴ Peitaʻi, o le papatisoga e lē o le tau ina taʻele i le vai.  Ae o se mea e tāua tele. Ua faatusaina le faatofu i le vai i lou fulitua i lou olaga tuai. O le toe ea aʻe mai le vai, ua faaalia ai ua faafouina oe e fai le finagalo o le Atua. Ia manatua, ua e tuuina atu lou ola iā Ieova le Atua, ae lē o tagata po o se faalapotopotoga, po o se isi lava mea. O le tuuina atu o lou ola i le Atua ma lou papatisoga, o le amataga lenā o se mafutaga vavalalata ma le Atua, o se faiā māfana ma ia.—Salamo 25:14.

²⁵ O le papatisoga, e lē faapea e mautinoa ai lou faaolataga. Na tusi atu le aposetolo o Paulo: “Ia faaauau ona outou galulue mo lo outou faaolataga, i le mataʻu ma le gatete.” (Filipi 2:12) O le papatisoga ua na o se amataga. Ae o le fesili, e faapefea ona e tumau i le alofa o le Atua? E tali lenā fesili i la tatou mataupu mulimuli.