1. Kungani siphatsimandla lesingumTopiya sacela kubhajatiswa?

“INGANI nankha emanti, kwalani kutsi ngibhajatiswe?” Loyo ngumbuto lowabutwa siphatsimandla lesingumTopiya ngelikhulu lekucala leminyaka. Filiphu labengumKhristu abesibonisile kutsi Jesu abenguMesiya lowetsenjisiwe.  Sitsintseke ekujuleni kwenhlitiyo ngaloko besikufundze emiBhalweni, lesiphatsimandla lesingumTopiya satsatsa sinyatselo. Sakhombisa kutsi sifuna kubhajatiswa!—Imisebenti 8:26-36.

2. Kungani kufanele ucabange ngalokujulile ngekubhajatiswa?

² Nangabe utifundze ngekunakisisa tehluko tekucala talencwadzi nalomunye waboFakazi BaJehova, nawe ungatibuta, ‘Yini lengivimbela kutsi ngibhajatiswe?’ Nyalo sewufundzile ngesetsembiso seliBhayibheli sekuphila phakadze ePharadisi. (Lukha 23:43; Sembulo 21:3, 4) Sewufundzile ngesimo sebantfu labafile nangelitsemba leluvuko. (Umshumayeli 9:5; Johane 5:28, 29) Cishe bewusolo utihlanganisa naboFakazi BaJehova emihlanganweni yabo futsi utibonele ngewakho indlela labachuba ngayo inkholo yeliciniso. (Johane 13:35) Lokubaluleke kakhulu, sewucalile kwakha buhlobo naNkulunkulu Jehova.

3. (a) Ngumuphi umyalo Jesu lawuniketa balandzeli bakhe? (b) Lwentiwa njani lubhabhatiso lwemanti?

³ Ungakhombisa njani kutsi ufuna kukhonta Nkulunkulu? Jesu watjela balandzeli bakhe: “Hambani, nente tive tonkhe tibe bafundzi bami, nibabhabhatise.” (Matewu 28:19) Jesu wabeka sibonelo lesihle ngekutsi kwayena abhajatiswe emantini. Akazange nje amane afatwe ngemanti, nobe atselwe ngawo enhloko. (Matewu 3:16) Ligama lelitsi “bhabhatisa” lisukela egameni lesiGriki lelitsi “cwilisa.” Ngako-ke, lubhabhatiso lwebuKhristu lusho kucwiliswa nobe kufakwa ushone nya emantini.

4. Lusho kutsini lubhabhatiso lwemanti?

⁴ Lubhabhatiso lwemanti luyintfo lefunekako kubo bonkhe labo labafuna kuba nebuhlobo naNkulunkulu Jehova. Kubhajatiswa kubonisa ebaleni kutsi unesifiso sekukhonta Nkulunkulu. Kukhombisa kutsi uyakujabulela kwenta intsandvo yaJehova. (Tihlabelelo 40:7, 8) Nobe kunjalo, kute ukulungele kubhajatiswa, kudzingeka utsatse tinyatselo letitsite.

5. (a) Ngusiphi sinyatselo sekucala lokufanele usitsatse kute ulungele kubhajatiswa? (b) Kungani imihlangano yebuKhristu ibalulekile?

⁵ Sinyatselo sekucala sewuvele usitsetse. Njani? Ngekuvuma kufundza ngaNkulunkulu Jehova nangaJesu Khristu, ngesifundvo seliBhayibheli lesihleliwe. (Johane 17:3) Kodvwa kunalokunyenti lokusafanele ukufundze. EmaKhristu afuna ‘kuyati kahle intsandvo yaNkulunkulu.’ (Kholose 1:9) Kuba khona emihlanganweni yaboFakazi BaJehova kusita kakhulu kuze uyati kahle intsandvo yaJehova. Kubalulekile kuya kulemihlangano. (Hebheru 10:24, 25) Kuba khona ngaso sonkhe sikhatsi kulemihlangano, kutakusita ukhulise lwati lwakho ngaNkulunkulu.

6. Kudzingeka ube nelwati lolungakanani lweBhayibheli kute ukulungele kubhajatiswa?

⁶ Kuliciniso, akudzingeki wati konkhe lokuseBhayibhelini kute ulungele kubhajatiswa. Siphatsimandla lesingumTopiya besati lokutsite, kodvwa sasidzinga lusito kute sicondze tincenye letitsite temiBhalo. (Imisebenti 8:30, 31) Ngalokufanako, nawe kusadzingeka ufundze lokunyenti. Ecinisweni, angeke ucedze kufundza ngaNkulunkulu. (Umshumayeli 3:11) Ngembi kwekuba ubhajatiswe, kufanele wati futsi wemukele timfundziso letisisekelo teliBhayibheli. (Hebheru 5:12) Leto timfundziso tifaka ekhatsi kwati liciniso ngesimo sebantfu lafile kanye nekubaluleka kwekwati libito laNkulunkulu neMbuso wakhe.

7. Kufundza liBhayibheli kufanele kube namuphi umphumela kuwe?

⁷ Lwati nje nalulodvwa alukeneli, ngobe “umuntfu lote kukholwa angeke akhone kujabulisa Nkulunkulu.” (Hebheru 11:6) LiBhayibheli lisitjela kutsi bantfu labatsite edolobheni laseKhorinte lasendvulo beva tindzaba letinhle, futsi “bakholwa, base bayabhajatiswa.” (Imisebenti 18:8) Ngendlela lefananako, kufundza liBhayibheli kufanele kukwente ukholelwe kutsi liliVi laNkulunkulu leliphefumulelwe. Kufundza liBhayibheli kufanele kukusite ube nekukholwa  etetsembisweni taNkulunkulu nemandla emhlatjelo waJesu.—Joshuwa 23:14; Imisebenti 4:12; 2 Thimothi 3:16, 17.

8. Yini leyokwenta ucocele labanye ngaloko lokufundzile?

⁸ Njengobe kukholwa kuya kukhula enhlitiyweni yakho, utawutfola kumatima kuthula ungabatjeli labanye ngaloko lokufundzako. (Jeremiya 20:9) Utawuba nesifiso lesinemandla sekukhuluma nalabanye ngetinjongo taNkulunkulu.—2 Khorinte 4:13.

9, 10. (a) Bobani longacala ngabo kubacocela emaciniso laseBhayibhelini? (b) Yini lokudzingeka uyente nangabe ufuna kuhlanganyela emsebentini lohleliwe wekushumayela waboFakazi BaJehova?

⁹ Ungase ucale kucoca ngekuhlakanipha nalabanye ngaloko lokufundze eBhayibhelini, kungaba tihlobo takho, bangani, bomakhelwane nobe labo losebenta nabo. Njengobe sikhatsi sichubeka, utawufuna kuhlanganyela emsebentini wekushumayela lohleliwe waboFakazi BaJehova. Nasekufike leso sikhatsi, tive ukhululekile kukhuluma naFakazi lokufundzisa liBhayibheli. Nangabe kubonakala kutsi sewukulungele kushumayela nelibandla, emalungiselelo atawentiwa ekutsi wena naloyo lofundza naye nihlangane nalabadzala lababili basebandleni.

¹⁰ Loku kuyokwenta ubetayele kalula labadzala labangemaKhristu, labelusa umhlambi waNkulunkulu. (Imisebenti 20:28; 1 Phetro 5:2, 3) Nangabe labadzala babona kutsi uticondza kahle timfundziso teliBhayibheli letisisekelo, babona nekutsi kuphila kwakho kuvumelana netimiso taNkulunkulu, nekutsi vele uyafuna kuba ngulomunye waboFakazi BaJehova, batakwatisa kutsi ukulungele kushumayela nelibandla njengemmemeteli wetindzaba letinhle longakabhajatiswa.

11. Nguluphi lushintjo lokufanele labanye balwente ngembi kwekutsi balungele kushumayela nelibandla?

¹¹ Ngakulolunye luhlangotsi, kungase kudzingeke wente lushintjo lolutsite ekuphileni kwakho nasemikhubeni  bewuyenta kute ukulungele kushumayela. Loku kungase kuhlanganise kuyekela imikhuba letsite lebewuyentela esitse. Ngako-ke, ngembi kwekuba ngummemeteli longakabhajatiswa, kudzingeka uyekele kwenta tono letinkhulu, njengekutiphatsa kabi ngekwelicasi, kudzakwa, kanye nekusebentisa kabi tidzakamiva.—1 Khorinte 6:9, 10; Galathiya 5:19-21.

12. Kungani kuphendvuka kudzingekile?

¹² Kunetinyatselo lokudzingeka umuntfu atitsatse ngembi kwekuba abhajatiswe. Umphostoli Phetro watsi: “Ngako, phendvukani, nibuyele kuNkulunkulu, kuze esule licala letono tenu.” (Imisebenti 3:19) Kuphendvuka kusho kutisola lokuphelele ngentfo letsite loyentile. Kuphendvuka kusebenta kahle kumuntfu labephila ngendlela lengakalungi, kuphindze kusebente ngisho nobe umuntfu abetiphatsa kahle. Kungani kunjalo? Sizatfu saloko kutsi bonkhe bantfu batoni futsi badzinga intsetselelo yaNkulunkulu. (Roma 3:23; 5:12) Ngembi kwekuba ucale kufundza liBhayibheli, bewungayati kutsi iyini intsandvo yaNkulunkulu. Kodvwa bewungaphila njani ngendlela levumelana nentsandvo yakhe? Ngako-ke, kuphendvuka kuyadzingeka.

13. Kuyini kugucuka?

¹³ Kuphendvuka kufanele kulandzelwe kugucuka. Kumelwe wente lokungetulu kwekutisola. Kudzingeka uyekele indlela lebewuphila ngayo futsi uciniseke ngalokuphelele kutsi utakwenta lokulungile kusukela nyalo kuchubeke. Kuphendvuka nekugucuka tinyatselo lokudzingeka utitsatse ngembi kwekuba ubhajatiswe.

14. Ngusiphi sinyatselo lesibalulekile lokudzingeka umuntfu asitsatse ngembi kwekuba abhajatiswe?

¹⁴ Kunalesinye sinyatselo lesibalulekile lokudzingeka usitsatse ngembi kwekubhajatiswa. Kumelwe utinikele kuNkulunkulu Jehova.

15, 16. Kusho kutsini kutinikela kuNkulunkulu, futsi yini ledvonsela umuntfu kutsi ente njalo?

 ¹⁵ Nawutinikela kuNkulunkulu Jehova ngemthandazo locotfo, usuke wetsembisa kutsi utinikela kuye kwaphela. (Dutheronomi 6:15) Kodvwa kungani umuntfu angafuna kwenta njalo? Ase sitsi lijaha lelitsite kunentfombi leliyitsandzako. Nalichubeka liyibuka, lifundza buntfu bayo futsi libona timfanelo tayo letinhle, litiva likhangeka kakhulu kuyo. Ngekuhamba kwesikhatsi, litawuvele licele kutsi bashade. Kuliciniso kutsi kushada kusho kutsatsa imitfwalo leyengetiwe. Kodvwa lutsandvo luyokwenta kutsi lisitsatse leso sinyatselo lesibalulekile.

¹⁶ Nase umati Jehova futsi umtsandza, udvonseleka ekutseni umkhonte ngenhlitiyo yakho yonkhe ungamgodleli lutfo nobe utibekele imincele ekumkhonteni. Nobe ngabe ngubani lofuna kulandzela iNdvodzana yaNkulunkulu, Jesu Khristu, kumelwe ‘atidzele.’ (Makho 8:34) Sikhombisa kutidzela nasicinisekisa kutsi tifiso tetfu nobe imigomo yetfu ayisivimbeli kutsi sikhonte Nkulunkulu ngekutitfoba lokuphelele. Ngembi kwekuba ubhajatiswe, kwenta intsandvo yaNkulunkulu Jehova kufanele kube sekuta kucala ekuphileni kwakho.—1 Phetro 4:2.

17. Kungani labanye bangafuni kutinikela kuNkulunkulu?

¹⁷ Labanye bamatsintsanyawo kutinikela kuJehova ngobe bayesaba kutsatsa leso sinyatselo lesibalulekile. Besaba kutsi batawulandzisa kuNkulunkulu njengemaKhristu latinikele. Kwesaba kwabo kutsi bangase behluleke nobe bavise Jehova buhlungu, kubenta bacabange kutsi kuncono bangatinikeli kuye.

18. Yini lengasenta kutsi sitinikele kuJehova?

¹⁸ Njengobe ufundza kutsandza Jehova, loko kuyokwenta kutsi utinikele kuye futsi wente konkhe lokusemandleni  akho kutsi wente intsandvo yakhe. (Umshumayeli 5:4) Ngemuva kwekutinikela, kucinisekile kutsi utawufuna ‘kuphila imphilo lefanele naletsandzekako kuJehova.’ (Kholose 1:10) Ngesizatfu sekutsi uyamtsandza Nkulunkulu, angeke ucabange kutsi kulukhuni kwenta intsandvo yakhe. Akungabateki kutsi utawuvumelana nemphostoli Johane, lowabhala: “Ngobe kutsandza Nkulunkulu kugcina imiyalo yakhe. Imiyalo yaNkulunkulu ayimatima kitsi.”—1 Johane 5:3.

19. Kungani kungafanele wesabe kutinikela kuNkulunkulu?

¹⁹ Akudzingeki kutsi ube ngumuntfu lophelele kute utinikele kuNkulunkulu. Jehova uyakwati kulinganisela kwetfu  futsi akalindzeli lokungetulu kwaloko lesingakhona kukwenta. (Tihlabelelo 103:14) Ufuna uphumelele, ngako utakusekela aphindze akusite. (Isaya 41:10) Ungaciniseka kutsi nawetsembela kuJehova ngenhlitiyo yakho yonkhe, “yena uyakucondzisa tindlela takho.”—Taga 3:5, 6.

20. Kungani kutinikela kuJehova kungeke kube yintfo lefihlekile?

²⁰ Kucabanga ngaletintfo lesesifundze ngato kutakusita  kutsi utinikele kuJehova ngemthandazo. Umuntfu lotsandza Nkulunkulu kufanele “avume ngemlomo wakhe kube kusindziswa kwakhe.” (Roma 10:10) Ukwenta njani loku?

21, 22. Kukholwa kwakho ‘ungakubonakalisa njani ebaleni’?

²¹ Tjela umchumanisi wesigungu salabadzala welibandla lakini kutsi sewufuna kubhajatiswa. Utawuhlela kutsi labadzala babukete nawe imibuto letsite lehlanganisa timfundziso teliBhayibheli letisisekelo. Nangabe labadzala bavumelana kutsi ukulungele kubhajatiswa, batakutjela kutsi ungabhajatiswa emhlanganweni lolandzelako. * Emihlanganweni lemikhulu, kuvamise kutsi kwetfulwe inkhulumo lebuketa loko lokushiwo lubhabhatiso. Loyo lowetfula lenkhulumo ucela bonkhe labo labatewubhajatiswa kutsi baphendvule imibuto lemibili lelula njengencenye ‘yekuvuma ngalokusebaleni’ kukholwa kwabo.

²² Lubhabhatiso lolukwenta watiwe kutsi sewutinikele kuNkulunkulu nekutsi sewungulomunye waboFakazi BaJehova. Labo lababhajatiswako bacwiliswa emantini kute babonakale ebaleni kutsi sebatinikele kuJehova.

23. Kusho kutsini kubhajatiswa “egameni leYise, neleNdvodzana, nelamoya longcwele”?

²³ Jesu watsi bafundzi bakhe bebayobhajatiswa “egameni leYise, neleNdvodzana, nelamoya longcwele.” (Matewu 28:19) Loku kusho kutsi loyo lotawubhajatiswa uyalemukela ligunya laNkulunkulu Jehova nelaJesu Khristu. (Tihlabelelo 83:18; Matewu 28:18) Ucaphela nendlela losebenta ngayo umoya longcwele waNkulunkulu nobe emandla akhe lasebentako.—Galathiya 5:22, 23; 2 Phetro 1:21.

24, 25. (a) Kufanekiselani kubhajatiswa? (b) Ngumuphi umbuto lodzinga kuphendvulwa?

 ²⁴ Noko-ke, kubhajatiswa akusiko kucwiliswa lokungasho lutfo. Kufanekisela intfo lebaluleke kakhulu. Kucwiliswa emantini kufanekisela kutsi sewufile endleleni lebewuphila ngayo esikhatsini lesendlulile. Kuvuswa nekukhushulwa emantini kubonisa kutsi nyalo sewuphilela kwenta intsandvo yaNkulunkulu. Khumbula kutsi, utinikele kuNkulunkulu Jehova, hhayi emsebentini, kumuntfu, nobe enhlanganweni letsite. Kutinikela kanye nekubhajatiswa kwakho kusicalo sebuhlobo lobusedvute naNkulunkulu.—Tihlabelelo 25:14.

²⁵ Kubhajatiswa akusicinisekisi ngekutsi siyosindziswa. Umphostoli Pawula wabhala: “Fezani kusindziswa kwenu ngekwesaba nangekutfutfumela.” (Filiphi 2:12) Kubhajatiswa kumane kusicalo nje. Nyalo indzaba ikutsi, singahlala njani elutsandvweni lwaNkulunkulu? Sehluko sekugcina sitawuphendvula lombuto.