1. Tanbasá mak ema-boot husi rai-Etiópia husu atu hetan batizmu?

“HAREE! Bee mak neʼebá; saida tan mak hanetik haʼu atu hetan batizmu?” Iha apóstolu sira-nia tempu, ema-boot ida husi rai-Etiópia mak husu pergunta neʼe. Ema kristaun ida naran Filipe uza eskritura atu hatudu ba nia katak Jesus mak Mesias neʼebé Maromak promete nanis. Buat neʼebé nia aprende husi Eskritura kona loos nia laran toʼo nia hakarak atu halo buat ruma. Nia husu atu hetan batizmu!—Apóstolu 8:26-36.

2. Tanbasá mak Ita tenke hanoin didiʼak kona-ba batizmu?

² Se Ita estuda ona kapítulu balu husi livru neʼe ho Testemuña ba Jeová, karik agora Ita bele husu Ita-nia an: ‘Saida tan mak hanetik haʼu atu hetan batizmu?’ Ita aprende ona husi Bíblia kona-ba Maromak nia promesa atu ita moris ba nafatin iha mundu neʼebé hanesan jardín furak. (Lucas 23:43; Apokalipse 21:3, 4) Ita mós aprende lia-loos kona-ba saida mak akontese ba ita kuandu ita mate no mós kona-ba esperansa moris-hiʼas. (Eclesiastes [Pengkhotbah] 9:5; João 5:28, 29) Karik Ita  tuir ona reuniaun Testemuña ba Jeová nian no Ita rasik haree oinsá mak sira halaʼo adorasaun neʼebé loos. (João 13:35) No buat neʼebé importante liu mak Ita rasik komesa ona atu harii relasaun ho Maromak Jeová.

3. (a) Jesus haruka nia dixípulu sira atu halo saida? (b) Oinsá mak ema kristaun neʼebé loos hetan batizmu?

³ Oinsá mak Ita bele hatudu katak Ita hakarak serbí Maromak? Jesus haruka nia dixípulu sira atu ‘hanorin ema husi nasaun hotu atu sai ninia dixípulu, fó batizmu ba sira’. (Mateus 28:19) Neʼe katak atu serbí Maromak ema tenke hetan batizmu. Jesus rasik mós hetan batizmu. Kuandu nia hetan batizmu, ema la hisik ka fakar bee deʼit ba nia ulun, maibé hatama ninia isin-lolon tomak iha bee laran. (Mateus 3:16) Liafuan “batizmu” iha lia-gregu katak “hatama”. Nuneʼe, batizmu kristaun nian katak tenke hatama ema nia isin-lolon tomak iha bee laran.

4. Batizmu iha bee laran hatudu saida?

⁴ Importante tebes atu hetan batizmu iha bee laran se  Ita hakarak atu iha relasaun ho Maromak Jeová. Hetan batizmu iha ema seluk nia oin hatudu katak Ita hakarak atu serbí Maromak. No hatudu mós katak Ita kontente atu halo Maromak Jeová nia hakarak. (Ebreu 10:7) Maibé antes Ita bele hetan batizmu, iha hakat balu neʼebé Ita tenkesér halo.

5. (a) Antes Ita bele hetan batizmu, hakat importante saida mak Ita tenke halo uluk? (b) Tanbasá mak importante atu tuir reuniaun kristaun?

⁵ Ita komesa ona hakat primeiru. Neʼe mak saida? Ita kontinua atu aprende kona-ba Maromak Jeová no Jesus Kristu, hodi estuda Bíblia beibeik. (João 17:3) Maibé sei iha buat barak tan neʼebé Ita tenke aprende. Ema kristaun tenke “hatene didiʼak [Maromak nia] hakarak”. (Koloso 1:9) Reuniaun sira husi Testemuña ba Jeová ajuda tebes Ita atu halo ida-neʼe. Entaun importante tebes atu tuir reuniaun sira-neʼe. (Ebreu 10:24, 25) Tuir reuniaun beibeik sei ajuda ita atu hatene liután kona-ba Maromak.

6. Antes Ita bele hetan batizmu, saida deʼit mak ita tenke hatene kona-ba Bíblia?

⁶ Maibé, ida-neʼe laʼós katak antes hetan batizmu Ita tenkesér hatene buat hotu iha Bíblia laran. Maski ema-boot husi rai-Etiópia hatene ona buat balu kona-ba Bíblia, nia presiza hetan ajuda tan atu bele komprende parte seluk husi eskritura sira. (Apóstolu 8:30, 31) Hanesan neʼe Ita mós iha buat barak tan neʼebé Ita tenke aprende kona-ba Maromak. Tuir loloos, Ita sei kontinua nafatin atu halo ida-neʼe. (Eclesiastes [Pengkhotbah] 3:11) Maibé antes Ita bele hetan batizmu, Ita presiza hatene no simu hanorin husi Bíblia neʼebé importante liu. (Ebreu 5:12) Hanorin neʼebé importante liu  mak hanesan lia-loos kona-ba saida mak akontese kuandu ita mate no mós kona-ba Maromak nia naran no nia Ukun.

7. Estuda Bíblia bele ajuda Ita atu halo saida?

⁷ Maibé aprende kona-ba Bíblia deʼit latoʼo, tanba “se fiar la iha, ita la bele halo Maromak nia laran kontente”. (Ebreu 11:6) Bíblia fó-hatene ita kona-ba ema balu husi sidade Korinto iha tempu uluk. Bainhira Jesus nia dixípulu haklaken ba sira, sira “hahú sai fiar-naʼin no hetan batizmu”. (Apóstolu 18:8) Hanesan neʼe mós, bainhira Ita estuda Bíblia, ida-neʼe halo Ita fiar duni katak Maromak mak leno ninia Liafuan. Estuda Bíblia sei ajuda Ita atu tau fiar ba Maromak nia promesa sira no fiar katak liuhusi Jesus nia sakrifísiu mak ita bele hetan salvasaun.—Josué (Yosua) 23:14; Apóstolu 4:12; 2 Timóteo 3:16, 17.

8. Saida mak sei book Ita atu koʼalia ba ema seluk kona-ba buat neʼebé Ita aprende?

⁸ Bainhira Ita-nia fiar sai buras iha Ita-nia laran, Ita sei sente laran-manas no hakarak fó-hatene ba ema seluk kona-ba buat neʼebé Ita aprende. (Apóstolu 4:20) Porezemplu, Ita-nia fiar sei book Ita atu koʼalia ba ema seluk kona-ba Maromak no nia hakarak.—2 Korinto 4:13.

9, 10. (a) Ita bele komesa koʼalia kona-ba lia-loos husi Bíblia ba sé deʼit? (b) Ita tenke halo saida antes Ita bele haklaken hamutuk ho Testemuña ba Jeová?

⁹ Ita bele komesa fó-hatene lia-loos husi Bíblia ba família, belun, viziñu no mós kolega sira iha serbisu-fatin. Koʼalia ba sira ho laran-diʼak. Bainhira Ita halo ona ida-neʼe, karik Ita mós hakarak atu haklaken hamutuk ho Testemuña ba Jeová. Se nuneʼe, Ita bele fó-hatene ba Testemuña neʼebé estuda Bíblia ho Ita. Se karik Ita prontu  ona atu bá haklaken, Ita hamutuk ho Ita-nia mestre ka mestra sei hasoru katuas naʼin-rua iha Ita-nia kongregasaun.

¹⁰ Bainhira Ita halo ida-neʼe, Ita sei koñese liután katuas kristaun sira neʼebé tau matan ba Maromak nia kongregasaun. (Apóstolu 20:28; 1 Pedro 5:2, 3) Se katuas sira haree katak Ita komprende no fiar ba hanorin importante husi Bíblia, no moris tuir Maromak nia hakarak, no hakarak duni atu sai Testemuña ba Jeová, sira sei fó-hatene katak Ita bele hola parte iha serbisu haklaken nuʼudar haklaken-naʼin neʼebé seidauk hetan batizmu.

11. Antes atu bele hola parte iha serbisu haklaken, Ita tenke halo saida?

¹¹ Maibé, antes Ita bele hola parte iha serbisu haklaken, karik Ita sei presiza tan atu troka ka hadiʼa Ita-nia moris no hahalok sira. Karik Ita tenke para no la halo tan hahalok sala neʼebé Ita subar husi ema seluk. Nuneʼe, antes Ita husu atu sai haklaken-naʼin, Ita tenkesér husik tiha hahalok sala hanesan sala-foʼer, hemu-lanu, no uza droga.—1 Korinto 6:9, 10; Galásia 5:19-21.

12. Tanbasá mak importante atu hakribi Ita-nia sala?

¹² Iha tan hakat balu neʼebé Ita tenke halo antes hetan batizmu. Apóstolu Pedro hatete: “Hakribi sala bá no fila fali ba Maromak, atu nuneʼe Jeová bele hamoos tiha imi-nia sala sira.” (Apóstolu 3:19) Atu hakribi Ita-nia sala, ka arrepende an, katak Ita loloos sente triste kona-ba buat neʼebé uluk Ita halo. Importante duni atu ema ida hakribi sala neʼebé uluk nia halo. Maibé, ema neʼebé halaʼo moris neʼebé loos mós tenkesér hakribi sira-nia sala. Tanbasá? Tanba ita hotu sala-naʼin no presiza duni atu  Maromak fó perdua ba ita-nia sala. (Roma 3:23; 5:12) Antes estuda Bíblia, Ita la hatene saida mak Maromak nia hakarak. Nuneʼe, Ita la bele moris tuir ninia hakarak. Tan neʼe, importante atu hakribi Ita-nia sala.

13. “Fila fali ba Maromak” katak sá?

¹³ Ita hatudu katak Ita hakribi duni Ita-nia sala hodi “fila fali ba Maromak”. Sente triste ba hahalok aat deʼit latoʼo. Ita tenke sees husi hahalok aat uluk nian no deside ho laran-metin katak agora kedas Ita sei halo buat neʼebé loos. Hakribi sala no fila ba Maromak mak hakat importante neʼebé Ita tenkesér halo antes hetan batizmu.

14. Hakat importante saida mak Ita tenke halo antes hetan batizmu?

¹⁴ Iha hakat importante ida tan neʼebé Ita halo antes hetan batizmu. Ita tenke halo dedikasaun, ka dedika Ita-nia an ba Maromak Jeová.

15, 16. Dedikasaun, ka dedika Ita-nia an ba Maromak, katak sá? Tanbasá mak ita hakarak halo ida-neʼe?

¹⁵ Kuandu Ita dedika Ita-nia an ba Maromak Jeová liuhusi orasaun, Ita promete ho laran tomak ba Maromak katak Ita sei adora nia mesak deʼit ba nafatin. (Deuteronômio [Ulangan] 6:15) Maibé, tanbasá mak ema ida hakarak sai Maromak nia atan? Hanoin toʼok katak mane ida foin namora ho feto. Kuandu mane neʼe koñese diʼak liu feto neʼe hodi haree nia hahalok sira neʼebé furak, nia sei gosta liu feto neʼe. Ikusmai, nia sei husu atu kaben. Maski mane neʼe sei hetan responsabilidade boot liu se nia kaben ho feto neʼe, maibé tanba domin, nia sei simu responsabilidade neʼe.

¹⁶ Bainhira Ita koñese didiʼak Maromak Jeová, Ita-nia domin sei book Ita atu serbí nia, no Ita sei la husik buat ida atu hapara Ita adora nia. Ema neʼebé hakarak tuir  Maromak nia Oan-Mane, Jesus Kristu, tenke “nega ninia an rasik”. (Marcos 8:34) Nega Ita-nia an katak la husik Ita-nia hanoin ka hakarak sai importante liu iha Ita-nia moris, maibé iha Ita-nia moris tomak Ita sei halo tuir Maromak nia hakarak. Nuneʼe, antes Ita bele hetan batizmu, buat neʼebé importante liu iha Ita-nia moris mak halo Maromak nia hakarak.—1 Pedro 4:2.

17. Tanbasá mak ema balu taʼuk atu dedika sira-nia an ba Maromak?

¹⁷ Ema balu taʼuk atu dedika sira-nia an ba Maromak Jeová. Sira hanoin katak sira la bele halo buat hotu neʼebé Maromak hakarak sira atu halo. Tanba sira sente taʼuk no sente katak sira la bele halo kontente Maromak Jeová, sira hanoin diʼak liu atu la dedika sira-nia an ba Maromak.

18. Saida mak bele book Ita atu dedika Ita-nia an ba Maromak?

¹⁸ Nuʼudar Ita-nia domin ba Maromak Jeová sai buras, ida-neʼe sei book Ita atu dedika Ita-nia an ba nia no hakaʼas an atu kumpre buat neʼebé Ita promete ba nia. (Mateus 5:33) Depois dedika Ita-nia an ba Maromak, Ita hakarak duni atu “laʼo ho loloos iha Jeová nia oin toʼo halo kontente nia iha dalan neʼebé kompletu”. (Koloso 1:10) Tanba Ita-nia domin ba Maromak, Ita sei la hanoin katak susar tebes atu halo nia hakarak. Ita sei sente hanesan ho apóstolu João neʼebé hatete: “Domin ba Maromak katak ita halo tuir ninia ukun-fuan sira; no ninia ukun-fuan sira la todan.”—1 João 5:3.

19. Tanbasá mak Ita la presiza taʼuk atu dedika Ita-nia an ba Maromak?

¹⁹ Maromak la hanoin katak Ita sai perfeitu mak foin bele dedika Ita-nia an ba nia. Maromak Jeová hatene katak Ita mak ema neʼebé fraku, no nia nunka husu atu Ita halo buat neʼebé ita la bele halo. (Salmo [Mazmur]  103:14) Nia hakarak Ita atu serbí nia, no nia sei apoia no ajuda Ita. (Isaías [Yesaya] 41:10) Ita bele sente laran-metin katak se Ita tau fiar ba Maromak Jeová ho Ita-nia laran tomak, nia ‘sei halo Ita-nia dalan sai loos’.—Provérbios (Amsal) 3:5, 6.

20. Tanbasá mak ita tenke hatudu ba ema seluk katak ita dedika tiha ona ita-nia an ba Maromak?

²⁰ Hanoin didiʼak kona-ba buat neʼebé ita foin estuda. Ida-neʼe bele ajuda Ita atu dedika Ita-nia an ba Maromak Jeová iha orasaun. Ema hotu neʼebé hadomi loos Maromak tenke “fó sai iha ema barak nia oin hodi  hetan salvasaun”. (Roma 10:10) Oinsá mak Ita hatudu ba ema seluk katak Ita dedika tiha ona Ita-nia an ba Maromak?

21, 22. Oinsá mak Ita bele “fó sai” Ita-nia fiar iha ema nia oin?

²¹ Ita bele fó-hatene koordenadór ba grupu katuas nian iha Ita-nia kongregasaun katak Ita hakarak hetan batizmu. Nia sei konvida katuas balu atu hasoru Ita hodi husu pergunta balu kona-ba hanorin importante husi Bíblia. Se katuas sira-neʼe haree katak Ita kumpre kritériu  atu hetan batizmu, sira sei fó-hatene katak Ita bele hetan batizmu iha reuniaun-boot tuirmai. * Iha loron neʼebé atu halaʼo batizmu, katuas ida sei hatoʼo diskursu atu esplika kona-ba batizmu. Katuas neʼe sei konvida sira neʼebé atu hetan batizmu atu hatán pergunta rua. Hatán pergunta sira-neʼe mak dalan ida atu “fó sai iha ema barak nia oin” kona-ba sira-nia fiar.

²² Batizmu mak hatudu katak Ita dedika tiha ona Ita-nia an ba Maromak no agora Ita mak Testemuña ba Jeová. Ema neʼebé hetan batizmu sei hatama sira-nia isin-lolon tomak iha bee laran atu hatudu ba ema barak katak sira dedika tiha ona sira-nia an ba Maromak Jeová.

23. Hetan batizmu hodi “Aman, Oan no espíritu santu nia naran” katak sá?

²³ Jesus hatete katak nia dixípulu sira sei hetan batizmu hodi “Aman, Oan no espíritu santu nia naran”. (Mateus 28:19) Ida-neʼe katak ema neʼebé atu hetan batizmu rekoñese Maromak Jeová no Jesus Kristu nia pozisaun. (Salmo [Mazmur] 83:18; Mateus 28:18) Nia mós rekoñese katak liuhusi Maromak nia espíritu santu, ka forsa, mak Jeová kumpre nia hakarak no ajuda nia povu iha rai.—Galásia 5:22, 23; 2 Pedro 1:21.

24, 25. (a) Isin-lolon tomak hatama iha bee laran hatudu saida? (b) Ita tenke buka-hatene pergunta saida?

²⁴ Maibé, batizmu laʼós deʼit katak hatama isin-lolon tomak iha bee laran. Batizmu hatudu buat neʼebé importante loos. Bainhira isin-lolon tomak hatama iha bee laran, neʼe hatudu katak Ita mate ba moris uluk nian. Bainhira Ita sai husi bee laran hatudu katak agora Ita  moris fali atu halo Maromak nia hakarak. Hanoin-hetan mós katak Ita dedika ona Ita-nia an ba Maromak Jeová deʼit. Ita la dedika Ita-nia moris atu halo serbisu ruma, ka ba ema ruma ka ba organizasaun ruma. Bainhira Ita dedika Ita-nia an no hetan batizmu, Ita hahú relasaun neʼebé besik loos ba Maromak nuʼudar belun.—Salmo (Mazmur) 25:14.

²⁵ Hodi hetan batizmu, neʼe la dehan katak Ita hetan ona salvasaun. Apóstolu Paulo hatete: “Kontinua hakaʼas an atu hetan imi-nia salvasaun ho taʼuk no nakdedar.” (Filipe 2:12) Tuir loloos, batizmu katak ita halo ona hakat primeiru neʼebé lori ita ba salvasaun. Maibé, pergunta neʼebé Ita hakarak husu ba Ita-nia an mak: ‘Oinsá mak haʼu bele hela nafatin iha Maromak nia domin?’ Iha kapítulu ikus husi livru neʼe sei hatán pergunta ida-neʼe.