18-нҗи бап

Худай билен достлашмак үчин нәме этмели?

Сувда нәдип чокундырыляр?

Сувда чокундырылмак үчин нәме этмели?

Худая өзүңи нәдип багыш этмели?

Нәме үчин сувда чокундырылмалы?

1. Хебешлериң меликесиниң везири нәме үчин сувда чокундырыласы гелди?

«ЫНХА сув, мениң чокундырылмагыма нәме пәсгел берйәр?» Шейле сораг билен б. э. I асырында яшан хебешлериң меликесиниң бир везири йүзленди. Филипус атлы хош хабарчы вада эдилен Месихиң Исадыгыны везире дүшүндирди. Мукаддес Язгылардакы  сөзлер бу адама тәсир эденде, онуң сувда чокундырыласы гелди (Ресулларың ишлери 8:26—36).

2. Сувда чокундырылмак барада нәме үчин чынлакай ойланмалы?

² Сен шу китабың өңки бапларыны Ехованың Гүвәчилери билен өвренен болсаң, өзүңе шейле сораг бермәге тайынсың: «Мениң чокундырылмагыма нәме пәсгел берйәр?» Сен инди Мукаддес Язгыларың Җеннетде эбеди яшайшы вада берйәнини билдиң (Лука 23:43; Ылхам 21:3, 4). Шейле-де дирелишиң болҗагы ве өлен адамларың ягдайы барада билдиң (Вагызчы 9:5; Яхя 5:28, 29). Мүмкин, сен Ехованың Гүвәчилериниң йыгнакларына барып, оларың дининиң хакыкыдыгына гөз етиренсиң (Яхя 13:35). Эсасанам, Ехованы танап ве оңа якынлашып башлансың.

3. а) Иса шәгиртлерине нәме табшырды? б) Сувда нәдип чокундырыляр?

³ Худая гуллук эдесиң гелсе нәме этмели? Иса шәгиртлерине: «Гидиң-де, бүтин миллетлери шәгирт эдиң, олары... чокундырың» дийип табшырды (Матта 28:19). Исаның өзи-де сувда чокундырылып, гөрелде гөркезди. Ол сувда чокундырыланда, оңа сув сепмедилер я-да үстүнден сув гуймадылар (Матта 3:16). Грек дилинде «чокундырмак» диен ишлик «чүмдүрмеги» аңладяр. Шонуң үчин сувда чокундырыланда, сува долы чүмдүрилйәр.

4. Сувда чокундырылмак нәмәни гөркезйәр?

⁴ Ехова Худай билен достлашасы гелйән хер бир адам хөкман сувда чокундырылмалы. Сувда чокундырылып, Худая гуллук эдесимизиң гелйәнини адамлара аян эдйәрис. Бу бизиң Ехованың ислегини ерине етирмәге шатдыгымызы гөркезйәр  (Зебур 40:7, 8). Эмма сувда чокундырылмак үчин мөхүм әдимлери әтмели.

БИЛИМ ХЕМ-ДЕ ИМАН ГЕРЕК

5. а) Сувда чокундырылмак үчин, илки билен, нәме этмели? б) Месихчилериң йыгнагына гатнашмак нәме үчин ваҗып?

⁵ Сен илкинҗи әдими әдип башладың. Нәдип? Сен, Мукаддес Язгылары өвренип, Ехова Худай ве Иса Месих билен таншып башладың (Яхя 17:3). Йөне бу етерлик дәл. Месихчилер «Худайың ислегиниң [догры, ТД] билими билен долмак» ислейәр (Колоселилер 1:9). Бу бабатда Ехованың Гүвәчилериниң йыгнагы көмек эдер. Шейле йыгнаклара гатнашмак ваҗып (Еврейлер 10:24, 25). Йыгнаклара ызыгидерли гатнасаң, Худай барада билимиң артар.

6. Сувда чокундырылмак үчин нәмәни билмели?

⁶ Элбетде, сувда чокундырылмак үчин Мукаддес Язгылары тутуш билмек герек дәл. Хебешлериң меликесиниң везириниң азда-кәнде билими барам болса, Язгылардакы кәбир аятлара говы дүшүнмейәрди (Ресулларың ишлери 8:30, 31). Сен ене көп затлары өвренмели. Худай барада алян билимиң ызыны үзмели дәл (Вагызчы 3:11). Эмма сувда чокундырылҗак болсаң, Мукаддес Язгыларың эсасы таглыматыны өвренмели (Еврейлер 5:12). Меселем, өлен адамларың нәхили ягдайдадыгыны, Худайың адының ваҗыпдыгыны ве Худайың Патышалыгының нәмедигини билмели.

7. Мукаддес Язгылары өвренсең саңа нәхили тәсир эдер?

⁷ Йөне диңе билим алман, иман хем этмели, чүнки «иман этмезден Худай тарапындан халанмак мүмкин дәлдир» (Еврейлер 11:6). Мукаддес Язгыларда гадымы Коринтос шәхериниң яшайҗылары Иса Месих барада эшиденлеринде «иман этдилер хем чокундырылдылар»  дийилйәр (Ресулларың ишлери 18:8). Мукаддес Язгылары өвренсең, онуң Худайың Сөзүдигине иман эдерсиң. Шейле-де Худайың вадасының хакыкатдыгына ве Исаның төлег гурбанының гутулыш гетирҗекдигине гөз етирерсиң (Ешув 23:14; Ресулларың ишлери 4:12; 2 Тимотеос 3:16, 17).

МУКАДДЕС ЯЗГЫЛАРДАКЫ ХАКЫКАТЫ АДАМЛАРА ГҮРРҮҢ БЕР

8. Өвренен затларыңы адамлара гүррүң бермәге сени нәме хөвеслендирер?

⁸ Иманың нәче гүйчли болса, өвренен затларыңы ичиңде сакламак шонча-да кын болар (Еремия 20:9). Адамлара Худай ве онуң ниетлери барада гүррүң бермәге хөвес эдерсиң (2 Коринтослылар 4:13).

9, 10. а) Мукаддес Язгылардакы хакыкаты, илки билен, кимлере гүррүң берип билерсиң? б) Ехованың Гүвәчилери билен вагыз эдесиң гелсе нәме этмели?

⁹ Мукаддес Язгылардакы хакыкаты, илки билен, гарындашларыңа, достларыңа, гоңшуларыңа ве ишдешлериңе сыпайлык билен гүррүң берип билерсиң. Соңра Ехованың Гүвәчилери билен вагыз эдесиң гелер. Бу ислегиңи Мукаддес Язгылардан сениң билен окув гечйән Ехованың Гүвәчисине айт. Сен талаба лайык гелйән болсаң, йыгнагың ики яшулусы сизиң билен душушып, бу меселе барада гүрлешер.

¹⁰ Бу душушыкда «Худайың сүрүсине» гөзегчилик эдйән месихчи яшулулар билен говы таншып билерсиң (Ресулларың ишлери 20:28; 1 Петрус 5:2, 3). Эгер сен Мукаддес Язгыларың эсасы таглыматына дүшүнип, олара ынансаң, Худайың принциплерине гөрә яшасаң, догруданам, Ехованың Гүвәчиси боласың гелсе, онда яшулулар чокундырылмадык вагызчы болуп гуллук эдип билҗекдигиңи айдарлар.

11. Вагызчы болмак үчин нәме этмели?

 ¹¹ Вагызчы боласың гелсе, кәбир эрбет эндиклериңи ташламалы боларсың. Шонуң үчин вагызчы болмазыңдан өң, җынс ахлаксызлыгы, серхошлык ве нешекешлик ялы агыр гүнәлери ташламалы (1 Коринтослылар 6:9, 10; Галатялылар 5:19—21).

ТОБА ЭДИҢ ВЕ ДӨНҮҢ

12. Нәме үчин тоба этмели?

¹² Сувда чокундырылмак үчин ене ики әдим әтмели. Петрус ресул: «Гүнәлериңизиң өчүрилмеги үчин тоба эдиң, дөнүң» дийди (Ресулларың ишлери 3:19). Тоба этмек — эден этмишиңе өкүнмек. Йөне диңе җынсы ахлаксыз адамлар тоба этмели дәл. Нәме үчин? Себәби хемме адамлар гүнәли ве Худайың багышламагына мәтәч (Римлилер 3:23; 5:12). Мукаддес Язгылары өвренмезиңден өң, сен Худайың ислегини билеңокдың. Сен онуң талапларына долы лайык гелип билермидиң? Гөршүмиз ялы, агыр гүнә этмедиклерем тоба этмели.

13. Дөнмек нәме?

¹³ Тоба эдениңден соң дөнмели. Эден этмишиңе өкүнмек етерлик дәл. Эрбет этмишлериңи гоюп, мундан бейләк догры иш этмели. Сувда чокундырылмак үчин тоба этмели ве дөнмели.

ХУДАЯ ӨЗҮҢИ БАГЫШ ЭТМЕК

14. Сувда чокундырылмак үчин ене нәме этмели?

¹⁴ Сувда чокундырылмак үчин ене бир ваҗып әдим әтмели. Ехова Худая өзүңи багыш этмели.

15, 16. Худая өзүңи багыш этмек нәме ве оңа нәме хөвеслендирмели?

¹⁵ Йүрекден дога эдип, Ехова өзүңи багыш эдениңде, Худая хемише вепалы галҗагыңы сөз берйәң  (Кануның гайталанышы 6:15). Шейле әдим әтмәге нәме хөвеслендирмели? Айдалы, бир йигит гызың гөвнүни тапҗак боляр. Оны якындан танадыгыча говы хәсиетлерини гөрүп, оңа болан сөйгүси артяр. Соңра оңа дурмуша чыкмагы теклип эдйәр. Элбетде, өйленсе борчларының көпелҗегини билйәр. Йөне шейле чынлакай әдим әтмәге, гыза болан гүйчли сөйгүси хөвеслендирйәр.

¹⁶ Ехованы танадыгыңча сөйгиң артар ве оңа йүрекден гуллук эдип ислегини ерине етиресиң гелер. Худайың Оглы Иса Месихиң ызына эермек үчин «өзүңи инкәр этмели» (Маркус 8:34). Өзүңи инкәр этмек — ислегиңден ве максадыңдан гечип, хемише Худая гулак асмакдыр. Гөршүмиз ялы, хениз сувда чокундырылманкаң, Ехованың ислеги билен яшамалы (1 Петрус 4:2).

ШОВСУЗЛЫКДАН ГОРКМА

17. Кәбир адамлар нәме үчин Худая өзүни багыш этмекден яйданяр?

¹⁷ Худая өзүңи багыш этмек җогапкәрли боланы үчин, кәбир адамлар шейле әдими әтмәге яйданяр. Мүмкин, шол җогапкәрлик оларда горкы дөредйәндир. Шейле адамлар өзлерини мынасып гөрмейәр ве Ехованы гынандырарын өйдүп, Худая өзүни багыш этмейәр.

18. Ехова өзүңи багыш этмек ислеги хачан дөрейәр?

¹⁸ Эгер сен Ехованы йүрекден сөйүп башласаң, оңа өзүңи багыш эдип, мынасып яшасың гелер (Вагызчы 5:4). Худая өзүңи багыш этсең, «Реббе мынасып ягдайда гезип, Оны хер бабатда хошнут эдерсиң» (Колоселилер 1:10). Худайы сөййән болсаң, онуң ислегини ерине етирмек саңа кын  болмаз. Сен Яхя ресулың: «Худайың сөйгүси Онуң буйрукларыны берҗай этмекдир, Онуң буйруклары болса агыр дәлдир» диен сөзлери билен ылалашарсың (1 Яхя 5:3).

19. Худая өзүңи багыш этмекден нәме үчин горкмалы дәл?

¹⁹ Худая өзүңи багыш этмек үчин кәмил болмак хөкман дәл. Ехова сениң мүмкинчиликлериңи билйәр ве гүйҗүңден артык гелйән зады талап этмейәр (Зебур 103:14). Ол саңа ягшылык ислейәр ве гүйч берип беркитҗекдигини вада берйәр (Ишая 41:10). Эгер Худая йүрекден бил багласаң, «Ол хем сениң ёдаларыңы догрулар» (Сүлейманың тымсаллары 3:5, 6).

 ХУДАЯ ӨЗҮҢИ БАГЫШ ЭДЕНИҢИ СУВДА ЧОКУНДЫРЫЛЫП ГӨРКЕЗ

20. Ехова өзүңи багыш эдениңи нәме үчин адамлара аян этмели?

²⁰ Ёкарда айдылан затлар барада ойлансаң, екеликде дога эдип Ехова өзүңи багыш эдесиң гелер. Йөне халас болмак үчин, Худайы сөййәнлериң әхлиси иманы барада «адамларың өңүнде агыз билен ыкрар» хем этмели (Римлилер 10:10, ТД). Нәдип?

21, 22. Иманың барада нәдип «адамларың өңүнде агыз билен ыкрар» этмели?

²¹ Эгер сен сувда чокундырыласың гелсе, йыгнагың  баш гөзегчисине айт. Соңра йыгнак яшулулары сениң билен Мукаддес Язгыларың эсасы таглыматыны гайталар. Эгер яшулулар сениң сувда чокундырылмага талаба лайык гелйәндигиңи айтсалар, якын вагтда сувда чокундырылып билерсиң *. Сувда чокундырылмазындан өң, онуң әхмиети барада яшулы доклад билен чыкыш эдйәр. Доклатдан соң яшулы сувда чокундырылҗакларың әхлисине ики саны сораг берйәр. Олар сораглара җогап берип, иманы барада «адамларың өңүнде агыз билен ыкрар» эдйәр.

²² Биз сувда чокундырылып, адамларың өңүнде Худая өзүмизи багыш эдендигимизи гөркезйәрис. Шейдип, Ехованың Гүвәчиси болярыс. Ехова өзүни багыш эден адам чокундырыланда, оны сува долы чүмдүрйәрлер.

СУВДА ЧОКУНДЫРЫЛМАК НӘМӘНИ АҢЛАДЯР?

23. «Ата, Огул ве мукаддес рухуң ады билен чокундырылмак» нәмәни аңладяр?

²³ Иса шәгиртлериниң «Ата, Огул ве мукаддес рухуң ады билен чокундырылҗакдыгыны» айтды (Матта 28:19). Диймек, сувда чокундырылян адам Ехова Худайың ве Иса Месихиң хәкимиетине табын боляр (Зебур 83:18; Матта 28:18). Шейле-де ол мукаддес рухуң, ягны Худайың херекетдәки гүйҗүниң эдйән ишине ве гөркезмесине табын болмалы (Галатялылар 5:22, 23; 2 Петрус 1:21).

24, 25. а) Сувда чокундырылмак нәмәни аңладяр? б) Хайсы сорагың җогабыны билмели?

²⁴ Эмма сувда чокундырылмак йөне бир сува  чүмдүрилмек дәл. Онуң чуң манысы бар. Месихчи сува чүмдүриленде, өңки дурмушы үчин өлен ялы, сувдан чыканда болса, Худайың ислегини ерине етирмек үчин дирелен ялы боляр. Йөне сен өзүңи адама я-да гурама дәл-де, Ехова Худая багыш эдйәндигиңи унутма. Худая өзүңи багыш этмек ве сувда чокундырылмак, Ехова билен якын достлугың башлангыҗыдыр (Якуп 4:8).

²⁵ Эмма гутулмак үчин сувда чокундырылмак етерлик дәл. Павлус ресул шейле язды: «Горкы хем титреме билен өз гутулышыңызы амала ашырың» (Филипилилер 2:12). Сувда чокундырылмак диңе башлангыҗыдыр. Йөне Худайың сөйгүсинде галмак үчин нәме этмели? Бу барада соңкы бапдан билерсиң.

[Чыкгыт]

МУКАДДЕС ЯЗГЫЛАР НӘМЕ ӨВРЕДЙӘР?

▪ Сувда чокундырылмак үстүңден сув сепмек дәл-де, сува долы чүмдүрилмеги аңладяр (Матта 3:16).

▪ Сувда чокундырылмаздан өң билим алмалы, иман этмели, тоба этмели, дөнмели ве Худая өзүңи багыш этмели (Яхя 17:3; Ресулларың ишлери 3:19; 18:8).

▪ Ехова өзүңи багыш эдениңде, Исаның шәгиртлери ялы өзүңи инкәр этмели (Маркус 8:34).

▪ Адам сувда чокундырыланда, өңки алып баран дурмушы үчин өлүп, Худайың ислегини ерине етирмек үчин дирелен ялы боляр (1 Петрус 4:2).

[Макаланың сораглары]

[180 Сахыпадакы сурат]

Сувда чокундырылмак үчин, илки билен, Худайың Сөзүндәки хакыкат билимине етмели

[180 Сахыпадакы сурат

Иманың болса Худай барада өвренен затларыңы гүррүң берерсиң

[181 Сахыпадакы сурат]

Дога эдип‚ Ехова өзүңи багыш этдиңми?

[181 Сахыпадакы сурат]

Адам сувда чокундырыланда, өңки алып баран дурмушы үчин өлүп, Худайың ислегини ерине етирмек үчин дирелен ялы боляр