1. Hikuyini a nduna ya hombe ya le wuhosini ga Etiopia yi kombeleko ku bapatizwa?

“A MATI hi lawa; xana nzi beletelwa hi yini ku bapatizwa?” A xiwutiso lexi xi mahilwe hi nduna ya hombe ya le wuhosini ga Etiopia le ka zana go sangula ga malembe. A muKristu wo kari  a vitwako Filipu i wa mu tlhamuselile lezaku Jesu i wa hi yena Messia loyi a tsumbisilweko. Na a khumbilwe mbilu hi lezi a nga zi gonzile lomu Mitsalweni, a wanuna loye wa muEtiopia i lo hanya hi kuyelana ni lezi a zi gonzileko. I lo komba lezaku i wa lava ku bapatizwa! — Mitiro 8:26-36.

2. Hikuyini u faneleko ku alakanyela nguvu a kubapatizwa?

² Loku u gonzile khwatsi a zipimo zo sangula za bhuku legi ni munwe wa Timboni ta Jehova, za koteka a ku u tizwa na u longile ku wutisa, ‘Xana mina nzi beletelwa hi yini ku bapatizwa?’ Kala ka xikhati lexi u gonzile lezaku a Biblia gi na ni xitsumbiso xa wutomi ga pinzukelwa Paradiseni. (Luka 23:43; Kuvululelwa 21:3, 4) U gonzile kambe xungetano hi xiyimo xa vafileko zinwe ni kutsumba ka kuvuka ka vafileko. (Mutshawuteli 9:5; Johani 5:28, 29) Kuzilava u sina u sangulile ku hlengela ni Timboni ta Jehova mitlhanganwini ya tona ya bandla u tlhela u zi wona ha wece lezi ti hanyisako zona hi kuyelana ni wukhongeli ga lisine. (Johani 13:35) A xa lisima nguvu, hi lezaku za koteka ku ngha u sangulile kuva ni kuzwanana na Jehova Nungungulu.

3. (a) Xileletelo muni lexi Jesu a nyikileko valanzeli vakwe? (b) Xana a kubapatiza hi mati ku mahisiwa kuyini?

³ U nga kombisa kuyini lezaku u lava ku tirela Nungungulu? Jesu i te ngalo ka valanzeli vakwe: “Fambani, mu va maha vapizani a matiko wontlhe, mu va bapatiza.” (Mateu 28:19) Jesu wutsumbu i vekile xikombiso hi ku bapatizwa matini. A nga nwatsekelwangi mati, niku a nga cheliwangi matanyana ntsena laha hlokweni. (Mateu 3:16) A gezu “ku bapatiza” gita hi ka gezu ga xiGreki gi nge “ku peta.” Hikwalaho, a maKristu ma bapatizwa hi ku petiwa a miri wontlhe matini.

4. Xana a kubapatizwa hi mati xikombiso xa yini?

⁴ A kubapatizwa hi mati xilaveko ka vontlhe lava va lavako kuva ni kuzwanana na Jehova Nungungulu. A kubapatizwa ku komba vanhu vontlhe lezaku u lava ku tirela Nungungulu. Kona ku komba lezaku wa nengela ku maha kuranza ka Jehova. (Tisimu 40:7, 8) Hambulezo, kasi u ringanelwa hi kubapatizwa, u fanele ku nghenela a zigava zo kari.

5. (a) Hi xihi a xigava xo sangula lexi u faneleko ku xi nghenela lezaku u ringanelwa hi kubapatizwa? (b) Hikuyini a mitlhangano ya bandla yi nga ya lisima?

⁵ Hakunene u sangulile ku nghenela a xigava xo sangula. Hi ndlela muni? Hi ku gonza ha Jehova Nungungulu na Jesu Kristu, kuzilava u nga maha lezo hi ku lanzela a longoloko wa xigonzo xa Biblia. (Johani 17:3) Kanilezi wa ha ta gonza zinwani. A maKristu ma lava ku “tatiswa hi ku tiva a kuranza [ka Nungungulu].” (Va Le Kolosi 1:9) A kuva kona mitlhanganwini ya bandla ya Timboni ta Jehova zi nga ku vuna nguvu mhakeni leyo. Za lisima lezaku uva kona mitlhanganwini leyo. (Maheberu 10:24, 25) A kuva kona mitlhanganwini hi kukhanzakanya zi ta engetela a wutivi ga wena ha Nungungulu.

6. Wutivi ga ku chikela kwihi legi u faneleko kuva nago kasi u ringanelwa hi kubapatizwa?

⁶ Hakunene, a wu faneli ku tiva zontlhe lezi zi nga lomu ka Biblia kasi ku ringanelwa hi kubapatizwa. A nduna ya hombe ya le wuhosini ga Etiopia yi wa tiva zo kari, kanilezi yi wa lava ku vuniwa a ku zwisisa a zipanze zo kari za Mitsalo. (Mitiro 8:30, 31) A ku fana na yena, wenawu wa ha ta gonza zo tala. Hakunene, cima u nga ta tsika ku gonza ha Nungungulu. (Mutshawuteli 3:11) Hambulezo, u fanele ku tiva u tlhela u vumela a tigonzo to ranga ta Biblia, na u nga se ku bapatizwa. (Maheberu 5:12) Hi xikombiso, u fanele ku tiva ni ku vumela a lisine xungetano hi xiyimo xa vafileko u tlhela u tiva ni ku vumela a lisima la vito ga Nungungulu ni Mufumo wakwe.

7. Xana a xigonzo xa Biblia xi fanele ku ku khumbisa kuyini?

⁷ Hambulezo, a wutivi goce a gi eneli hakuva “ahandle ka kukholwa a zi koteki ku . . . tsakisa [Nungungulu].” (Maheberu 11:6) A Biblia gi hi byela lezaku a xikhati lexi a vanhu vo kari va le doropeni ga Korinte wa kale va ngazwa a mhaka leyi yi nga kari yi xumayelwa hi maKristu, “va lo kholwa, va bapatizwa.” (Mitiro 18:8) Hi kufanana, a xigonzo xa Biblia xi fanele ku ku tata hi kukholwa ka lezaku a Biblia i Mhaka yi pimisilweko hi Nungungulu. A xigonzo xa Biblia xi fanele ku ku vuna a kuva ni kukholwa zitsumbisweni za Nungungulu ni ntanwini wa kuhanyisa  ka muphahlo wa Jesu. — Joxua 23:14; Mitiro 4:12; 2 Timote 3:16, 17.

8. Xini xi to ku kuca a ku bhulela vanwani hi lezi u zi gonzileko?

⁸ Laha a kukholwa ku yako ku kula mbilwini ya wena, zi ta ku karatela a ku tshama ni lezi u zi gonzileko na u nga byeli munhu. (Jeremia 20:9) U ta tizwa na u susumetiwa hi ntamu lezaku u bhulela vanwani ha Nungungulu ni makhungo yakwe. — 2 Va Le Korinte 4:13.

9, 10. (a) Hi vamani lava u faneleko ku sangula hi vona a ku va bhulela a lisine la Biblia? (b) Zini u faneleko ku zi maha loku u kari u lava ku hlengela ntirweni wa kuxumayela lowu wu lulamisiwako hi Timboni ta Jehova?

⁹ Wa zi kota ku sangula a ku bhulela vanwani xungetano hi lisine la Biblia hi ku wulawula hi lona hi ndlela yi nene ni maxaka, vanghana, vaakelani va wena, ni vatiri-kuloni. Hi kufamba ka xikhati, u ta lava ku hlengela ntirweni wa kuxumayela lowu wu lulamisiwako hi Timboni ta Jehova. Loku u chikelelwe hi kunavela loko, tlhatlheka u byela a Mboni leyi yi ku gonzisako a Biblia. Loku zi woneka lezaku wa ringanelwa hi ku hlengela wutirelini ga laha kubaseni, ku ta mahiwa malulamiselo ya ku wena ni mugonzisi wa wena mu tlhangana ni madota mambiri ya bandla.

¹⁰ Lezo zi ta ku vuna a ku tolovelana khwatsi ni madota yo kari ya wuKristu, lawa ma risako a ntlhambi wa Nungungulu. (Mitiro 20:28; 1 Pedro 5:2, 3) Loku a madota lawo ma wona lezaku wa zwisisa niku wa kholwa ka tigonzo to ranga ta Biblia, ni lezaku wa hanya hi kuyelana ni matshinya ya milayo ya Nungungulu, niku hakunene wa zi lava kuva munwe wa Timboni ta Jehova, wona ma ta ku tivisa lezaku wa ringanelwa hi ku hlengela wutirelini ga laha kubaseni kota muhuweleli a nga bapatizwangiko wa mahungu yo saseka.

11. Zini lezi a vo kari va nga ha lavako ku zi cica mahanyeleni yabye kasi va zi kota ku ringanelwa hi ku hlengela wutirelini ga laha kubaseni?

¹¹ Za koteka a ku a madota lawo ma wona lezaku u na ni  xilaveko xa ku cica zo kari mahanyeleni ya wena kasi u zi kota ku ringanelwa hi ku hlengela wutirelini ga laha kubaseni. Lezo zi nga ha patsa a ku tsika mahanyela yo kari u nga kari u ma fihlela vanwani. Hikwalaho, na u nga se kombela ku maha muhuweleli a nga bapatizwangiko, u fanele ku ngha u tlhatlhekile zionhweni za hombe, zo kota a ku tirisa ziro za wubeleki hi ndlela ya hava, a wudakwa, ni ku delela mimuri yo lahlisa mapimo. — 1 Va Le Korinte 6:9, 10; Va Le Galatia 5:19-21.

12. Hikuyini a kutisola ku lavekako?

¹² Ku na ni zinwani zigava lezi u faneleko ku zi nghenela na u nga se ringanelwa hi kubapatizwa. Mupostoli Pedro i te ngalo: “Ti soleni, mu hunzuluka, kasi a zionho za nwina zi fela ku vinyetelwa.” (Mitiro 3:19) A ku ti sola zi wula a ku ti laya hi kota ya nchumu wo kari u wu mahileko. A kutisola ku fanela nguvu a munhu loyi zi kotekako ku ngha a hanyile wutomi go biha, kanilezi ka laveka kambe ni ka loyi a hanyileko wutomi gi ti kombako ku khwatsi gi basile. Hikuyini? Hi lezaku a vanhu vontlhe vaonhi niku va na ni xilaveko xa ku tsetselelwa hi Nungungulu. (Va Le Roma 3:23; 5:12) Na u nga se gonza a Biblia, u wa nga ku tivi a kuranza ka Nungungulu. Makunu, xana u wa ta zi kotisa kuyini ku hanya hi kuyelana khwatsi ni kuranza kakwe? Hikwalaho, a kutisola ka laveka.

13. Xini a kuhunzuluka?

¹³ A kutisola ku fanele ku lanzelwa hi ‘kuhunzuluka.’ A ku ti laya ntsena a ku eneli. U fanele ku ala a mahanyela ya wena ya kale u tlhela u maha xiboho xo tiya xa lezaku u ta maha lezi zi nga zi nene kusukela zalezi. A kutisola ni kuhunzuluka zigava lezi u faneleko ku zi nghenela na u nga se ku bapatizwa.

14. Xigava muni xa lisima lexi u faneleko ku xi nghenela na u nga se ku bapatizwa?

¹⁴ Ku na ni xinwani xigava xa lisima lexi u faneleko ku xi nghenela na u nga se ku bapatizwa. U fanele ku ti hendleleta ka Jehova Nungungulu.

15, 16. Zi wula yini a ku ti hendleleta ka Nungungulu, niku xini lexi xi kucako munhu lezaku a maha lezo?

 ¹⁵ A xikhati lexi u ti hendleletako ka Jehova Nungungulu hi mukhongelo wu sukelako mbilwini, wo mu tsumbisa lezaku u ta tirela yena yece kala kupinzuka. (Deuteronome 6:15) Kanilezi, hikuyini a munhu a kalako a lava ku maha nanza ga Nungungulu ke? Kasi ku hlamula a xiwutiso lexo, a hi woneni a mufananiso lowu. A hi pimeni lezaku a wanuna wo kari i sangulile ku gangisana ni wasati. A xikhati lexi a tivako khwatsi a wasati loye a tlhela a wona lezaku i na ni matshamela ya ma nene, i tizwa na a kokiwa nguvu mbilu hi yena. Hi kufamba ka xikhati, zi le kubaseni lezaku a wanuna loye i ta mu kombela akuva a chada naye. Lisine lezaku a ku tekana zi neha wutihlamuleli go engeteleka. Kanilezi a liranzo li ta kuca wanuna loye lezaku a nghenela a xigava lexo xa lisima.

¹⁶ A xikhati lexi u tivako khwatsi Jehova u tlhela u mu ranza, u ta tizwa na u byekelela ku mu tirela hi mbilu yontlhe na u ti nyiketela hi kumbhelela kukhozeleni kakwe. A munhu loyi a lavako ku lanzela a N’wana wa Nungungulu, Jesu Kristu, i fanele ‘ku ti tsika.’ (Marku 8:34) Hi ti tsika hi ku lwela lezaku a kunavela ni mixuvo ya hina wutsumbu zi nga hi tsanzekisi a ku ingisa Nungungulu hi kumbhelela. Makunu, a ku maha kuranza ka Jehova Nungungulu ku fanele kuva khungo ga wena wutomini na u nga se ku bapatizwa. — 1 Pedro 4:2.

17. Hikuyini a vo kari va tsikako ku ti hendleleta ka Nungungulu?

¹⁷ A vo kari va kanakana a ku ti hendleleta ka Jehova hakuva va chava ku nghenela a xigava lexo xa lisima nguvu. Za koteka ku ngha va chava kuva ni wutihlamuleli mahlweni ka Nungungulu loku va maha maKristu ma ti hendleletileko. Hi kota ya lezi va chavako ku tsanzeka a ku tatisa a kutihendleleta kabye ni lezi va chavako a ku khunguvanyisa Jehova, va alakanya lezaku i chukwana a ku nga ti hendleleti ka yena.

18. Zini lezi zi to ku kuca a ku ti hendleleta ka Jehova?

¹⁸ Kota lezi u yako u gonza ku ranza Jehova, u ta tizwa na u susumetelwa a ku ti hendleleta ka yena u tlhela u maha mizamo  ya ku hanya hi kuyelana ni kutihendleleta loko. (Mutshawuteli 5:4) Anzhako ka kuva u ti hendleletile, hakunene u ta lava ku ‘famba hi laha ku faneleko Hosi, u yi xalalisa ka zontlhe.’ (Va Le Kolosi 1:10) Hi kota ya liranzo la wena ka Nungungulu, u nga ta alakanya lezaku za karata a ku maha kuranza kakwe. Handle ko kanakana u ta vumela lezi mupostoli Johani a zi tsalileko, yena i te ngalo: “A ku mu ranza Nungungulu hi ku hlayisa milayo yakwe; ni milayo yakwe a yi karati.” — 1 Johani 5:3.

19. Hikuyini u nga faneliko ku chava a ku ti hendleleta ka Nungungulu?

¹⁹ A hi ku khwatsi u fanele kuva munhu a mbheleleko lezaku u ti hendleleta ka Nungungulu. Jehova wa ku tiva a kuhluleka  ka wena niku cima a nga rinzeli lezaku u maha zilo lezi zi ku tsanzako. (Tisimu 103:14) Yena i lava lezaku a zilo zi ku fambela khwatsi niku i ta tlhela a ku seketela ni ku ku vuna. (Isaya 41:10) Tiyiseka lezaku loku u tsumba Jehova hi mbilu ya wena yontlhe, “yena i ta lulamisa a tisoko ta wena.” — Mavingu 3:5, 6.

20. Hikuyini a kutihendleleta ka Jehova ku nga faneliko kuva nchumu wa xihundla?

²⁰ A ku alakanyela a zilo lezi hi wulawulileko ha zona zalezi  ka zi kota ku ku vuna lezaku u ti hendleleta wutsumbu ga wena ka Jehova hi mukhongelo. Vontlhe lava hakunene va ranzako Nungungulu va fanele ‘ku vumela hi nomu laha kubaseni kasi va hanyiswa.’ (Va Le Roma 10:10, NM) Xana u nga vumelisa kuyini hi nomu laha kubaseni?

21, 22. Xana u nga vumelisa kuyini a kukholwa ka wena hi nomu laha kubaseni?

²¹ Tivisa muwoneleli loyi a rangelako a bandla ga nwina lezaku wa zi lava ku bapatizwa. Yena i ta maha malulamiselo ya ku a madota yo kari ma vuxeta zinwe na wena a ziwutiso zo kari lezi zi wulawulako hi tigonzo to ranga ta Biblia. Loku a madota lawo ma boha lezaku wa ringanelwa, ma ta ku tivisa lezaku u ta bapatizwa ka xikhati xi lanzelako. * Ka zikhati lezo, ku tala ku vekiwa a kanelo wu alakanyisako a tlhamuselo wa kubapatizwa. Hi kulanzela, a mukaneli i ramba vontlhe lava va yako kubapatizweni lezaku va hlamula ziwutiso zimbiri zo hehuka kota ndlela ya ku vumela a kukholwa kabye hi nomu laha kubaseni.

²² A kubapatizwa hi kona ku ku tivekisako ka vanhu vontlhe lezaku u munhu loyi a ti hendleletileko ka Nungungulu ni lezaku makunu u munwe wa Timboni ta Jehova. Lava va yako kubapatizweni va petiwa a miri wontlhe matini kasi ku komba laha kubaseni lezaku va ti hendleletile ka Jehova.

23. Zi wula yini a ku bapatizwa “hi vito ga Dadani ni ga N’wana ni ga Moya wa ku Basa”?

²³ Jesu i te ngalo a vapizani vakwe va wa ta bapatizwa “hi vito ga Dadani ni ga N’wana ni ga Moya wa ku Basa.” (Mateu 28:19) Lezo zi wula ku ngalo loyi a yako kubapatizweni wa vumela a wufumeli ga Jehova Nungungulu ni ga Jesu Kristu. (Tisimu 83:18; Mateu 28:18) Yena kambe wa vumela a ntiro lowu wu mahiwako hi moya wa ku basa, kutani ntamu wu tiriswako hi Nungungulu. — Va Le Galatia 5:22, 23; 2 Pedro 1:21.

24, 25. (a) Xana a kubapatizwa ku kombisa yini? (b) Hi xihi a xiwutiso lexi xi faneleko ku hlamuliwa?

 ²⁴ Hambulezo, a kubapatizwa a hi ku ti peta matini ntsena. Kona ku kombisa a nchumu wa lisima nguvu. A ku nyupela matini i xikombiso xa lezaku u file hi tlhelo ga mahanyela ya wena ya kale. A ku tlakuswa hi lomu matini ku komba lezaku makunu u hanyela ku maha kuranza ka Nungungulu. Alakanya kambe lezaku u lo ti hendleleta ka Jehova Nungungulu wutsumbu, na ku nga hi ka ntiro wo kari, ka xigelo, ka vanhu vanwani, ge hambu ka hlengeletano yo kari. A kutihendleleta ni kubapatizwa ka wena zi maha masangulo ya wunghana ga hombe nguvu na Nungungulu — ku nga kuzwanana ko tiya na yena. — Tisimu 25:14.

²⁵ A kubapatizwa a ku tiyisi lezaku u ta hanyiswa. Mupostoli Paule i tsalile lezi: “Tirelani a kuhanyiswa ka nwina hi kuchava ni kururumela.” (Va Le Filipi 2:12) A kubapatizwa i masangulo ntsena. Lezi ku sala xiwutiso lexi, U nga zi kotisa kuyini ku simama liranzweni la Nungungulu? A xipimo xa hina xo gumesa xi ta hi nyika a hlamulo wa kona.