1. ¿Andisï kurhajkuarhipi Etiopia anapu ma eskaksï itsï atapiringa?

PRIMERU siglurhu, Etiopia anapu ma enga kortirhu ánchikuarhienga uandaspti: “Era, ixú jarhasti itsï, ¿andisïni ji no uá bautisarikuarhini?”. Kristianu ma enga arhinhaenga Felipi, kʼamakuspti exerani Tata Diosïri Karakata jingoni, eska Jesusi jindespka Mesiasi enga aiatspinhapka. I achamasï, ísku pakaraspti indeni ambe jimbo enga jorhenguarhipka, jimbosï uékaendi eskaksï itsï atapiringa (Ukuecha 8:26-36).

2. ¿Ambesï úni jaki eskajtsï cha meru eratsiaka itsï atakuarhini?

² Engajtsï sési jorhenguarhikia uénakuarhu anapu kapituluechani i librueri, Jeobaeri testigu ma jingoni, jamberijtsï chájtu listu jakaia para uandani: “¿Andisïni ji no uá bautisarikuarhini?”. Jorhenguarhiskajtsïa eska Biblia aiatspisïnga eska kʼuiripu irekaaka para méntkisï Paraisurhu (Mateu 5:5; Jaŋaskuecha [Apocalipsis] 21:3, 4). Ístujtsï mítiskia na engaksï jarhajka uarhiricha ka eska jauaka tsíntskua ma (Eclesiastés 9:5; Juanu 5:28, 29). Sáni ióniitia engajtsï úndaka nirani tánguarhikuecharhu Jeobaeri testiguechani jingoni, ka exekajtsïa eska imecheri  kúnguarhikua jurhimbitiska (Juanu 13:35). Ka sánderu jukaparhakua ambe, jamberijtsï uénakia sési pájperakua ma jatsini Jeoba jingoni.

3. a) ¿Ambe juramukuaski Jesusi imeri chúxapatichani? b) ¿Nénaksï itsï atakuarhisïni kristianuecha?

³ ¿Nénajtsï uá xarhatani eskajtsï uékasïnga marhuakuni Tata Diosïni? Jesusi arhiaspti imeri chúxapatichani: “Ni je jorhendaani iámindu kʼuiripuechani, ka bautisaria je” (Mateu 28:19). Jesusi mísmujtsïni ejemplu íntskusti, jimboka imajtu itsï atakuarhiska. Peru nóksï itsï atarhespti ni itsï atajtsikuni éjpurhu (Mateu 3:16). Inde uandakua bautisarikuarhini uandakua griegu ma jimbo jurhasïndi ka arhikuekasïndi “itsïirhu inchamani”. Ísï jimbo, engaksï kristianuecha itsï atajka nemani, iámuksï inchamasïndi itsïrhu.

4. ¿Ambe xarhatasïni ma enga itsï atakuarhijka?

⁴ Iáminduecha engaksï uékajka Jeobaeri amigueni, jatsistiksï para itsï atakuarhini. Enga ma itsï atakuarhijka, xarhatasïndi máteruechani japarini eska uékasïnga marhuakuni Tata Diosïni ka eska tsitisïnga úni ambe enga  Jeoba uékajka (Ebreu 10:7; Salmo 40:8). Peru parajtsï úni itsï atakuarhini, uétarhisïndi máru ambe úni.

5. a) ¿Ambe uétarhisïni orheta para ma itsï atakuarhini? b) ¿Andisï xáni jukaparhakue nirani tánguarhikuecharhu?

⁵ Chájtsï uénaskia úni ma ambe. ¿Néna? Mítiparini Jeobani ka ístu tata Jesukristuni, Bibliaeri jorhenguarhikua ma jimbo (arhinta je Juanu 17:3). Perujtsï útasï uáka sánderu ambe jorhenguarhini. Kristianuechachi uékasïnga “sésimindu jánhaskani ambe enga Diosï uékajka” (Kolosasi 1:9). Jeobaeri testiguecheri tánguarhikuecha, kánikuaksïni jarhuataati parajtsï ísï úni. Jimbosï xáni jukaparhakueti eskajtsï no méni kuerataaka (Ebreu 10:24, 25). Engajtsï no méni kuerataska, sánderujtsï mítiaka Tata Diosïni.

6. ¿Nájtsï xáni jatsiski para mítini Bibliaeri parajtsï itsï atakuarhini?

⁶ No arhikuekasïndi eskajtsï jatsiska para mítini iámu Bibliani parajtsï úni itsï atakuarhini. Peru miá je eska Etiopia anapu achamasï mítispkia máru ambe, peru útasï uétarhinchaspti eskaksï jarhuatapiringa kurhanguni máru ambe Karakatecheri (Ukuecha 8:30, 31). Májkueni, útasï uánikua ambe jarhasti engajtsï uáka jorhenguarhini. Jo, nójtsï méni kʼamaraaka jorhenguarhini Tata Diosïri ambe (Eclesiastés 3:11). Peru parajtsï úni itsï atakuarhini, jatsiskajtsï para mítiani ka jiókuarhiani máru Bibliaeri jorhenguarhikuechani, enga ma orheta mítiajka (Ebreu 5:12). Jatsiskajtsï para mítini, náksï jarhaski uarhiricha ka na enga xáni jukaparhakueka Tata Diosïri arhinhakua ka imeri Reinu.

7. Engajtsï jorhenguarhini jauaka Bibliani, ¿ambejtsï niáraa jatsini?

⁷ Peru no uétarhisïndi nomasi mítini, jimboka “enga nema no mintsikaska Diosïni, nómindu uáti jeiapanhitarantani” (Ebreu 11:6). Biblia uandantasïndi ambe engaksï úpka máru Korintu anapuecha: engaksï kurhaapka ambe engaksï eianhpini japka kristianuecha, “jakajkusptiksï ka bautisarikuarhinksï” (Ukuecha 18:8).  Ka jatsisti para májkueni úkuarhini chánksïni jingoni. Engajtsï jorhenguarhiaka Bibliani, chájtsï jatsiska para meru jakajkuni eska Tata Diosïsï kararkuarhika Bibliani. Ístujtsï jatsiska para jakajkuni o mintsikani eska Tata Diosï uáka iámindu ambe enga eiatspikia, ka eskaksïni ima uáka pʼímutantani Jesusiri uarhikuani jimbo (Josué 23:14; Ukuecha 4:12; 2 Timoteo 3:16, 17).

8. ¿Ambe uá eskajtsï uékaaka uandantani ambe engajtsï jorhenguarhikia?

⁸ Enga chári mintsikakua sánderu kʼéaka, sánderujtsï uékaaka uandantani ambe engajtsï jorhenguarhikia (Jeremías 20:9). Exeakajtsï na engajtsï tsitiaka uandantani Tata Diosïri ambe ka ambe enga eratsitini jaka úni (arhinta je 2 Korintu 4:13).

9, 10. a) ¿Néchantsï úpirini uénani eianguani Bibliaeri ambe? b) ¿Ambejtsï uá engajtsï uékaakia eianhpini Jeobaeri testiguecha jingoni, ísï eskaksï ima na újka?

⁹ Para uénani, úpiringajtsï iatsitakuarhu eianguani Bibliaeri ambe chári parientichani, amiguechani, besinuechani ka imechani engajtsï jingoni ánchikuarhijka. Sánderu orhepani, jamberijtsï uékaaka nirani eianhpini Jeobaeri testiguecha jingoni ísï eskaksï ima na újka. Engajtsï uékakia ísï úni, aiangu je imani engaksïni jorhendani jaka Bibliaeri ambe. Enga ima exeaka eskajtsï listu jarhaskia para nirani eianhpini, úkuarhiatiksï arregluecha parajtsï cha tsimarani tánguarhini tsimani orhejtsïkutichani jingoni.

¹⁰ Ísïjtsï uáka sánderu sési mítiani máru orhejtsïkutichani, imechani engaksï kuidarijka Tata Diosïri iretani (Ebreu 13:17; 1 Pedru 5:2, 3). Imaksï exeati sintsï cha kurhangusïnia ambe enga Biblia jorhentpijka ka sintsï jakajkusïni i ambe, ka sintsï irekaxaki ísï eska Jeoba na juramujka ka sintsï meru uékasïni Jeobaeri testigueni. Enga ísïuaka, imaksïni arhiati eskajtsï listu jarhaskia parajtsï  jindeni eianhpiri ma Tata Diosïri Karakateri enga nótki itsï atakuarhijka, ka iásï kʼórujtsï uákia kúnguarhikua jingoni eianhpini.

11. ¿Ambeksï jatsiski para mójtakuni máru, ante de únksï nirani eianhpini kúnguarhikua jingoni?

¹¹ Peru ménisï, orhejtsïkutichaksï exesïndi eska ma kʼuiripu útasï jatsiska para mójtakuni máru ambe imeri tsípikuarhu, para úni kúnguarhikua jingoni eianhpini. Jamberi útasï jatsiti para jurajkuni ambe ma enga sïpatekuarku úni japka. Ísï jimbo, ante de kurhajkuarhini eskajtsï uékasïngia jindeni eianhpiri ma enga nótki itsï atakuarhijka, uétarhisïndi eskajtsï cha no ma kʼéri pekadu úni jauaka, komueska ísku jándikua ambe úni, kauini o droga ambe úrani (arhinta je 1 Korintu 6:9, 10; Galasia 5:19-21).

12. ¿Andisï uétarhijki moantani?

¹² Parajtsï itsï atakuarhini, jatsiskajtsï para máteru ambe úni. Apostuli Pedru uandasti: “Moanta je, ka kʼuanhatsintani, parakajtsï borrariminhaaka chári pekaduechani” (Ukuecha 3:19). Enga ma meru moantajka, kánikua no sési pʼikuarherasïndi imani ambe jimbo enga ióntki úpka. Peru no imechajkuksïsï jatsiti para moantani engaksï ísku jándikua ambe úka, sino ístu imecha engaksï jánguarhintajka sési jásï ma irekua páni. ¿Andi? Jimbokachi iámindu pekadoriska, ka uétarhinchasïngachi eskajtsïni Tata Diosï puáchentaaka (Roma 3:23; 5:12). Ante de cha uénani jorhenguarhini Bibliani, nójtsï mítispka ambesï jaiapanhintajki Tata Diosï. Jimbojtsïsï no uénga úni ambe enga Tata Diosï uékajka, ¿no ísïski? Ísï jimbosï uétarhijti moantani.

13. ¿Ambe arhikuekasïni mójtakukuarhini?

¹³ Enga ma na moantajkia, iásï uétarhisïndi mójtakukuarhini. Enga cha mójtakukuarhijka, ísïsïndi komueska  ‘kʼuanhatsintani’ ima xanharueri engajtsï nirani japka. I ambe arhikuekasïndi eskajtsï no solu no sési pʼikuarherasïnga imani ambe jimbo engajtsï ióntki úpka, sino eskajtsï jurajkusïnga irekuani engajtsï páenga. Jatsiskajtsï para sési eratsitini jatsinia sési ambe úni jima uératini. Moantani ka mójtakukuarhini, jindesti ambe enga ma jatsika para úni ante de itsï atakuarhini.

14. ¿Ambe jukaparhakua ambejtsï jatsiski para úni, ante de itsï atakuarhini?

¹⁴ Máteru jukaparhakua ambe enga ma jatsika para úni ante de itsï atakuarhini jindesti: aiakukuarheni Tata Diosï Jeobani.

15, 16. ¿Ambe arhikuekasïni aiakukuarheni Tata Diosïni, ka ambejtsïni manataa parachi ísï úni?

¹⁵ Aiakukuarheni, jindesti mintsitarhu uératini kómarhikua ma úni, enga jimbo ma arhijka Jeobani eska aiakusïnga eska méntkisï imantku marhuakuaka (Deuteronomio 6:15). Peru ¿andisï nema uékapirini inde jásï kompromisu ma jatsini? Eranhaska je eska tumbi ma arhisïnga uátsïni ma eska uékasïnga sánderu sési mítini. Na enga sánhani arhijka mítini, sánhani arhisïndi exeni eska ambakiti uátsï máeska, ka sánhani arhisïndi sánderu xénchani. Sánderu tátsekua, tumbi arhiati eska uékasïnga imani jingoni tembuchani. Pero enga tembuchaakia, sánderu responsabilidadi ambe jatsiati. Peru uékperakua enga pʼikuarherajka uátsïni jimbo, manataati para indeni kompromisuni jatsini.

¹⁶ Enga jucha niárajka mítini Jeobani ka uékani, i ambejtsïni manatasïndi parachi imantku uékani marhuakuni, iámu mintsita jingoni. Ima enga uékajka chúxapani Tata Diosïri Uájpani, jatsisti para ‘ísku exekuarhini’ (Markusʌ 8:34). Ískuchi exekuarhisïnga engachi no jurajkujka  eska ima ambe enga jucha tsitijka o uékani, ójkutaakajtsïni parachi no kurhajchani Tata Diosïni. Ísï jimbo, ante de cha itsï atakuarhini, jatsiskajtsï para xarhatani eskajtsï eratsitini jatsiskia chári irekuarhu, orheta pérani ambe enga Jeoba uékajka (arhinta je 1 Pedru 4:2).

17. ¿Andiksïsï máru no uéjki aiakukuarheni Tata Diosïni?

¹⁷ Máruksï no uékasïndi aiakukuarheni Jeobani, jimbokaksï chésïnga indeni xáni kʼéri kompromisu jatsini. Jamberiksï chéjti eratsini eskaksï jatsiska para kuenta íntskuntani Tata Diosïni, jimbokaksï aiakukuarheskia. Eratsisïndiksï eskaksï úpiringa pekadu ma úni, ka no sésiksï pʼikuastani Jeobani, ka jimboksïsï no uékajti aiakukuarheni Jeobani.

18. ¿Ambeksïni manataa parajtsï aiakukuarheni Jeobani?

¹⁸ Engajtsï cha sánderu uékaaka Jeobani, ístujtsï uékaaka aiakukuarheni imani ka uékaakajtsï uinhapikuarhintani para úni na engajtsï aiakukuarhekia (Eclesiastés 5:4). Engajtsï na aiakukuarheakia, seguruchi jarhaska eskajtsï “jámaaka eska na terokuntajka para kʼéri ambe arhini juchari Tatani, ka parajtsï iámindu ambe jimbo jeiapanhitarantani” (Kolosasi 1:10). Uékperakua engajtsï jatsika Tata Diosïni jimbo, indesï újti eskajtsï no úkua exeaka úni ambe enga ima uékajka. Chári eratsikua, májkueniuati eska apostuli Juanueri enga uandapka: “Jimboka para Diosïni uékani, jindeska eskajtsï uáka eska imajtsïni na juramuchijka, ka no kʼuetsapiti ambesti engajtsïni ima juramuchijka” (1 Juanu 5:3).

19. ¿Andijtsïsï no jatsi para chéni aiakukuarheni Tata Diosïni?

¹⁹ Tata Diosï no erokuarhisïndi eska ima enga aiakukuarheaka no ma pekadu jukaraaka. Jeoba sési mítisti na engachi xáni uáka úni, ka no méni erokuarhisïndi eskachi sánderu uáka (Salmo 103:14). Jeobaksïni jarhuataati,  jimboka uékasïnga eskajtsï sési irekaaka (arhinta je Isaías 41:10). Uákajtsï seguru jarhani eska engajtsï mintsikaska Jeobani, iámu mintsita jingoni, “ima jurhimberauati [chári] xanharuechani” (Proverbios 3:5, 6).

20. Engajtsï na aiakukuarheakia Jeobani, ¿andichisï no jatsi para juchajku mítini eskachi aiakukuarheskia?

²⁰ Engajtsï eratsintaaka ambe engachi exekia, jamberijtsï uékaakia jandiajku kómarhikua ma úni parajtsï aiakukuarheni Jeobani. Peru iáminduecha engaksï meru uékajka Tata Diosïni, jatsistiksï para máteru ambe úni: jatsistiksï  para ‘aiakukuarheni uánikua kʼuiripuechani japarini’ (1 Timoteo 6:12). ¿Néna úkuarhisïni i ambe?

21, 22. ¿Nénajtsï uá “uánikua kʼuiripuechani japarini” xarhatani chári mintsikakuani?

²¹ Arhi je imani enga orhejtsïkutichani orhekupajka chári kúnguarhikuarhu, eskajtsï uékasïngia itsï atakuarhini. Ima arhiauati máru orhejtsïkutichani eskaksïni úchiauaka máru kurhamarhikuechani Bibliaeri ambe, engajtsï jorhenguarhiakia. Engaksï orhejtsïkuticha exeaka eskajtsï listu jarhaskia para itsï atakuarhini, imaksïni eianguati  eskajtsï uákia ísï úni kʼéri tánguarhikua ma jimbo. * Enga itsï atakuarhinhajka, nitamataranhasïndi arhijtsïkperakua ma, enga jimbo uandanhantajka ambe arhikuekasïni itsï atakuarhini. Enga na kʼamakurhijkia arhijtsïkperata, arhijtsïkpiti úkuasïndi tsimani kurhamarhikuechani imechani engaksï itsï atakuarhiaka, ka íksï mókuntasïndi uinhachaparini. Ka ísïksï úsïndi “uánikua kʼuiripuechani japarini” xarhatani imecheri mintsikakuani.

²² Engajtsï itsï atakuarhijkia, i ambesï xarhatakuajti máteruechani eskajtsï aiakukuarheskia Tata Diosïni ka eskajtsï Jeobaeri testigueskia. Ima engaksï itsï atakuarhijka, iámuksï inchamanhasïndi itsïrhu paraksï xarhatakuani máteruechani eskaksï aiakukuarheskia Jeobani.

23. ¿Ambe arhikuekasïni itsï atakuarhini “Tátiri ka Uájperi ka Espiritu Santueri nombrini jimbo”?

²³ Tata Jesukristu arhiaspti imeri chúxapatichani eskaksï itsï atakuarhipiringa “Tátiri ka Uájperi ka Espiritu Santueri nombrini jimbo” (Mateu 28:19). I ambe arhikuekasïndi eska imecha engaksï itsï atakuarhiaka, jatsiskaksï para jiókuarhini Jeobaeri ka Jesukristueri juramukuani (Salmo 83:18; Mateu 28:18). Ístuksï jatsisti para jiókuarhini ambe enga újka Tata Diosïri espiritu santu, o uinhapikua enga Jeoba úrajka para ambe ma úni (Galasia 5:22, 23; 2 Pedru 1:21).

24, 25. a) ¿Ambe arhikuekasïni itsï atakuarhini? b) ¿Náki kurhamarhikuanchi jatsiski para mókuntani?

²⁴ Itsï atakuarhini sánderu ambesti ka eska itsïrhu inchamini. Jukaparhakua ambe arhikuekasïndi. Enga cha itsïrhu inchamijka, arhikuekasïndi eska ísïska eska “uarhini” ka eskajtsï jurajkusïnga imani irekuani engajtsï jatsipka.  Ka engajtsï uémintajka itsïrhu, arhikuekasïndi eska jima para orhepatini irekaakajtsï para úni ambe enga Tata Diosï uékajka. Nójtsï jatsiska para mirikurhini, eskajtsï Jeobanisï aiakukuarheka, ka no ánchikuarhitani, kʼuiripuni o kúnguarhikuani ma. Ambakiti pájperakuajtsï ma uénasïnga Tata Diosïni jingoni engajtsï aiakukuarhejka ka itsï atakuarhijka, ka úndasïngajtsï sánderu andarherani (Salmo 25:14).

²⁵ Peru itsï atakuarhini, no arhikuekasïndi eska ma pʼímutantskatesïngia. Tata Jesukristu uandasti: “Ima enga tekaantaka asta kʼamarhutani jamberi, ima jindeati enga pʼímutantskateaka” (Mateu 24:13). Itsï atakuarhini, apenasi uénakuesti. Peru, jarhasti kurhamarhikua ma: ¿ambechi uá parachi no méni jurajkuni Tata Diosïni ka parajtsïni ima méntkisï uékani? Últimu kapitulu mókuntasïndi i ambe.