1. Kaia ne fia papatiso ei te ofisa Aitiope?

“KILOKE, konei a vai. E isi se fakalavelave e se papatiso ei au ne koe?” Tenā eiloa te fesili ne ‵sili atu ne se ofisa Aitiope i te senitenali muamua. Ne fatoā oti ne fakamaoni atu ne se Kelisiano e igoa ki a Filipo me i a Iesu ko te Mesia telā ne folafola mai. E isi se mea ne fia fai ne te tagata Aitiope tenā me ne otia tena loto i mea kolā ko iloa ne ia mai te Tusi Tapu. Ne fia papatiso tou tagata!​—Galuega 8:26-36.

2. Kaia e ‵tau ei o mafaufau faka‵lei koe ki te papatisoga?

 ² Kafai ko oti ne sukesuke faka‵lei koe ki nisi mataupu i te kamataga o te tusi tenei fakatasi mo Molimau a Ieova, kāti ko fia fai atu foki ne koe te fesili tenei, “E isi se fakalavelave e se papatiso ei au?” Kāti ko iloa nei ne koe te folafolaga a te Tusi Tapu e uiga ki te ola se-gata-mai i te Palataiso. (Luka 23:43; Fakaasiga 21:3, 4) Ko iloa foki ne koe te tulaga tonu o tino ‵mate mo te fakamoemoega ko te toe‵tuga. (Failauga 9:5; Ioane 5:28, 29) Kāti ko oti ne kau atu koe ki Molimau a Ieova i fakatasiga o te lotou fakapotopotoga kae ne lavea atu foki ne koe te auala e fai ei ne latou te lotu tonu. (Ioane 13:35) Kae e sili atu i ei, kāti ko oti ne kamata o fakamalosi aka ne koe tou fesokotakiga mo Ieova te Atua.

3. (a) Se a te fakatonuga a Iesu ki ana soko? (e) E ‵tau o fai pefea te papatisoga ki te vai?

³ E mafai pefea o fakaasi atu ne koe tou fia tavini atu ki te Atua? Ne fai atu a Iesu ki ana soko, penei: “Olo atu . . . ki fenua katoa ke fai a tino i ei mo oku soko; papatiso foki latou.” (Mataio 28:19) Ne tuku mai ne Iesu se fakaakoakoga me ne papatiso foki eiloa a ia i te vai. Ne seki fakamatulu‵tulu atu fua a vai ki luga i a ia, kae ne seki ‵ligi atu foki ne mū vai ki luga i tena ulu. (Mataio 3:16) Ne māfua mai te pati “papatiso” i te pati Eleni telā e fakauiga ki te “ufi ki lalo.” Tela la, e ‵tau eiloa o ufi ki lalo i te vai a Kelisiano kolā e papatiso.

4. Ne a mea e fakaasi mai i te papatisoga ki te vai?

⁴ E ‵tau o papatiso a tino katoa kolā e fia maua ne latou se fesokotakiga ‵lei mo Ieova te Atua. E fakaasi atu ne tau papatisoga ki tino katoa me e fia tavini atu koe ki te Atua. E fakaasi atu foki i ei tou fiafia o fai te loto o Ieova. (Salamo 40:7, 8) Kae e isi ne mea e ‵tau o fai ne koe a koi tuai o papatiso koe.

5. (a) Se a te mea muamua e ‵tau o fai ke mafai ei o papatiso koe? (e) Kaia e tāua ei a fakatasiga Kelisiano?

⁵ Ko oti ne kamata o fai ne koe te mea muamua. E pefea la?  Mai i te taumafai ke iloa ne koe a mea e uiga ki a Ieova te Atua mo Iesu Keliso, kāti e auala i te faiga o tau akoga faka-te-Tusi Tapu. (Faitau te Ioane 17:3) Kae e uke atu foki a nisi mea e ‵tau o iloa ne koe. E fia “iloa” tonu ne Kelisiano a “te loto o te Atua.” (Kolose 1:9) Ka fesoasoani malosi atu ki a koe i te feitu tenei a tou kau atu ki fakatasiga a te fakapotopotoga o Molimau a Ieova. E tāua ‵ki ke kau atu sāle ki vaegā fakatasiga penā. (Epelu 10:24, 25) Ka fesoasoani atu ki a koe te kau atu faeloa ki fakatasiga ke momea aka ei tou malamalama e uiga ki te Atua.

6. E ‵tau o pefea te lasi o tou malamalama i te Tusi Tapu ko te mea ke mafai ei o papatiso koe?

⁶ E tonu, e se ‵tau o iloa ne koe a mea katoa i te Tusi Tapu ko te mea ke mafai ei o papatiso koe. Ne iloa ne te ofisa Aitiope a nisi mea, kae ne manako eiloa ki se fesoasoani ke malamalama ei a ia i nisi vaega o te Tusi Tapu. (Galuega 8:30, 31) E penā foki loa koe, koi uke ‵ki a mea e ‵tau o iloa ne koe. A te ‵tonuga loa, ka seai se gatamaiga ki mea kolā e ‵tau o iloa ne koe e uiga ki te Atua. (Failauga 3:11) Kae koi tuai o papatiso koe, e ‵tau o iloa kae talia foki ne koe a akoakoga fakavae i te Tusi Tapu. (Epelu 5:12) E aofia i vaegā akoakoga penā te munatonu e uiga ki te tulaga o tino ‵mate mo te tāua o te igoa o te Atua mo tena Malo.

7. E fakamalosi aka pefea koe ne tau sukesukega ki te Tusi Tapu?

⁷ Kae e se lava fua i te maua ne koe o te iloaga, me “e seai se tino e mafai ne ia o fakafiafia te Atua e aunoa mo te fakatuanaki.” (Epelu 11:6) E fai mai te Tusi Tapu me i te taimi ne lagona ei ne nisi tino i te fa‵kai mua o Kolinito a te fekau telā ne talai atu ne Kelisiano, “ne tali‵tonu [latou] ki ei, kae ne papatisogina foki.” (Galuega 18:8) E penā foki koe, kafai e sukesuke koe ki te Tusi Tapu, e fakamalosi aka ei tou fakatuanaki me i te tusi tenā ko te Muna eiloa a te Atua. E ‵tau foki o fesoasoani atu te sukesuke ki te Tusi Tapu ke talitonu koe ki folafolaga a te Atua mo te malosi o te taulaga a Iesu ke fakaola ei tatou.​—Iosua 23:14; Galuega 4:12; 2 Timoteo 3:16, 17.

8. Se a te mea ka fakamalosi aka ei koe ke faipati atu ki nisi tino e uiga ki mea kolā ko iloa ne koe?

⁸ Kafai ko gasolo o malosi tou fakatuanaki, ka momea aka foki i ei te faigata ke ‵funa aka ne koe a mea kolā ko iloa ne koe. (Ielemia 20:9) Ka fakamalosi atu eiloa i ei ki a koe ke faipati atu ki nisi tino e uiga ki te Atua mo ana fuafuaga.​—2 Kolinito 4:13.

9, 10. (a) Ko oi e mafai o fakaasi atu muamua ne koe ki ei a te munatonu i te Tusi Tapu? (e) Ne a au mea e ‵tau o fai māfai ko fia kau atu koe ki te galuega talai telā e fai ne Molimau a Ieova?

⁹ Kāti ko oti ne kamata o fakaasi atu ne koe te munatonu i te Tusi Tapu ki nisi tino mai te faipati atu mo te fakaeteete ki ou kāiga, taugasoa, tuakoi, mo tino kolā e ga‵lue fakatasi mo koe. Fakamuli loa, kāti ka fia kau atu koe ki te galuega talai telā e fai ne Molimau a Ieova. Kafai tenā loa te mea ko manako koe ki ei, ke na faipati atu ki te Molimau telā e fai ne ia tau akoga faka-te-Tusi Tapu. Kafai e foliga mai me ko toka koe o kau atu ki te galuega talai, ka fai‵pati a toeaina e tokolua i te fakapotopotoga ki a koulua mo tou faiakoga.

¹⁰ Ka fesoasoani atu te mea tenei ke fakamasani koe mo nisi toeaina Kelisiano, kolā e tausi ne latou te lafu a te Atua. (Galuega 20:28; 1 Petelu 5:2, 3) Kafai ko iloa ne toeaina konā me ko malamalama kae talitonu koe ki akoakoga fakavae o te Tusi Tapu, ko ola koe e ‵tusa mo akoakoga a te Atua, kae e manako tonu foki koe ke fai mo fai se Molimau a Ieova, ka fakaasi atu ei ne laua me ko mafai o kau atu koe ki te galuega talai o te tala ‵lei. Kae ka fai koe i ei e pelā me se tino talai kae seki papatiso.

11. Ne a ‵fuliga kāti e ‵tau o fai ne nisi tino ko te mea ke mafai o ‵kau atu latou ki te galuega talai?

¹¹ Kafai e se toka koe ke fai penā, kāti e ‵tau o fai ne koe a nisi ‵fuliga i tou olaga mo au amioga a koi tuai o kau atu koe ki te galuega talai. Kāti e aofia i ei a te taofi aka o nisi faifaiga  kolā ne fai ‵funa ne koe. Tela la, a koi tuai o fakailoa atu me ko fia fai koe mo fai se tino talai kae seki papatiso, e ‵tau o se toe fai ne koe a agasala matagā, e pelā mo te finalalolagi, te konā, mo te fakaaogāga o vailakau tapu.​—Faitau te 1 Kolinito 6:9, 10; Kalatia 5:19-21.

12. Kaia e tāua ei te salamō?

¹² E isi foki ne nisi mea e ‵tau o fai a koi tuai o talia ke papatiso koe. Ne fai atu te apositolo ko Petelu, penei: “Ke na sala‵mō . . . kae ‵fuli atu ki te Atua, ko te mea ke fakamagalo otou agasala.” (Galuega 3:19) A te salamō ko te fanoanoa tonu e uiga ki mea sē ‵lei kolā ne fai sāle ne koe. E ‵tau o iloa ‵lei ne te tino me e tāua te salamō māfai ne ola muamua a ia i se olaga masei, kae e tāua foki te salamō faitalia me ne ola se tino i se olaga tai ‵mā. Kaia? Me e agasala a tino katoa kae e ‵tau o maua ne latou te fakamagaloga a te Atua. (Loma 3:23; 5:12) A koi tuai o sukesuke koe ki te Tusi Tapu, ne seki iloa ne koe a te loto o te Atua. Tela la, ne mafai pefea o ola katoatoa koe e ‵tusa mo te loto o te Atua? Tenā eiloa te pogai e tāua ei te salamō.

13. Se a te mea e fakauiga ki ei te ‵fulimaiga?

¹³ E ‵tau o iku atu te salamō ki te ‵fulimaiga io me ko te ‘‵fuliga o amioga.’ E ‵tau o uke atu au mea e fai i lō te fanoanoa fua. E ‵tau o ‵teke atu koe ki tou olaga mua kae fakaiku aka mo te mautinoa me ka fai ne koe te mea tonu mai te taimi nei o fano ki mua. E ‵tau eiloa o salamō koe kae ‵fuli au amioga a koi tuai koe o papatiso.

14. Se a te mea tāua e ‵tau o fai ne koe a koi tuai o papatiso koe?

¹⁴ E isi foki se mea tāua telā e ‵tau o fai ne koe a koi tuai o papatiso koe. E ‵tau o fai tau tukuatuga ki a Ieova te Atua.

15, 16. Se a te uiga o tau tukuatuga ki te Atua, kae se a te mea e fakamalosi aka se tino ke fai ne ia te mea tenei?

¹⁵ Kafai ko fai ne koe tau tukuatuga ki a Ieova te Atua e  auala i se ‵talo, e tauto atu i ei koe me ka tapuaki atu fua koe ki a ia ki te se-gata-mai. (Teutelonome 6:15) Kaia e fia fai ei ne se tino te mea tenā? Ia, ke fai se tala fakatusa: e a māfai ko kamata o fai fāmau se tagata mo se fafine? Ko te momea aka o tena masani ki tou fafine, ko te momea aka foki o tena fia fai ki a ia, i ne? E masani o iku fakamuli atu i ei ki te fakamolemole atu o tou tagata ki tou fafine ke avaga laua. E tonu, a te fakaipoipoga e fakaopoopo atu i ei a nisi tiute. Kae ona ko te alofa e fakamalosi aka ei tou tagata ke oko atu ki te faiga tāua tenā.

¹⁶ Kafai ko iloa kae alofa foki koe ki a Ieova, ka fakamalosi aka ei tou loto ke tapuaki katoatoa atu ki a ia mo tou ola kātoa. So se tino telā e fia tautali atu ki te Tama a te Atua, ko Iesu Keliso, “e ‵tau o se mafaufau ki a ia” eiloa. (Maleko 8:34) Kafai e se toe mafau‵fau tatou ki a tatou eiloa, ka se talia ei ne tatou ‵tou manakoga mo ‵tou fakamoemoega ke fakalavelave mai ki te ‵tou faka‵logo katoatoa atu ki te Atua. A koi tuai o papatiso koe, e ‵tau o fakamuamua ne koe te faiga o te loto o te Atua i tou olaga.​—Faitau te 1 Petelu 4:2.

17. Kaia e faka‵lave aka ei ne nisi tino te lotou tukuatuga ki te Atua?

¹⁷ E faka‵lave ne nisi tino te faiga o te lotou tukuatuga me e manava‵se latou ki ei. E ma‵taku latou i te mea ma fakamasino aka ne te Atua latou e pelā me ne Kelisiano tukugina atu. E manava‵se i a latou ma mā‵vale kae fakafanoanoa atu i ei ki a Ieova. Telā e ma‵natu aka ei latou me e ‵lei atu ke se fai ne latou te lotou tukuatuga ki a ia.

18. Se a te mea e mafai o fakamalosi aka ei koe ke fai tau tukuatuga ki a Ieova?

¹⁸ Kafai ko kamata o alofa koe ki a Ieova, ka fakamalosi aka ei koe ke fai tau tukuatuga kae taumafai malosi foki ke ola koe e ‵tusa mo te mea tenā. (Failauga 5:4) Kafai ko oti ne fai tau tukuatuga ki te Atua, ka manako eiloa koe o ola i “se olaga e  aogā mō te Aliki [ko Ieova], e ‵fonu i mea e fakafiafia ki a ia.” (Kolose 1:10) Ona ko tou alofa ki te Atua, ka se mafaufau ei koe me ko tō faigata ke fai tena loto. E mautinoa eiloa me ka lotomalie koe ki pati a te apositolo ko Ioane, telā ne tusi mai penei: “Tenei te uiga o te alofa ki te Atua: ko te fakalogo ki ana fakatonuga. Ka ko ana fakatonuga e se na ‵mafa foki mo tatou.”—1 Ioane 5:3.

19. Kaia e se ‵tau ei o sōna manavase koe i te faiga o tau tukuatuga ki te Atua?

¹⁹ E se ‵tau o ‵lei katoatoa koe ke fai ei tau tukuatuga ki te Atua. E iloa ne Ieova ou vāivāiga kae e se manako a ia ke fai ne koe a mea e sili atu i mea kolā e mafai ne koe o fai. (Salamo 103:14) E manako a ia ke manuia koe kae ka ‵lago kae fesoasoani atu foki a ia ki a koe. (Faitau te Isaia 41:10) E ‵tau o iloa tonu ne  koe me kafai e fakalagolago atu koe ki a Ieova mo tou loto kātoa, “ka fakaasi atu ne ia ki a koe te auala tonu.”​—Faataoto 3:5, 6.

20. Kaia e se lava ei ke fai ne koe tau tukuatuga ki a Ieova i te va fua o koulua?

²⁰ A te mafaufau ki mea kolā ne fatoā sau‵tala tatou ki ei, e mafai o fesoasoani atu ki a koe ke fai tau tukuatuga ki a Ieova  e auala i se ‵talo. A tino katoa kolā e a‵lofa tonu ki te Atua, e ‵tau o ‘molimau foki olotou laugutu, ke fakaolagina ei latou.’ (Loma 10:10) E ‵tau o fai pefea ne koe te mea tenā?

21, 22. E mafai pefea o ‘molimau atu ou laugutu’ e uiga ki tou fakatuanaki?

²¹ Ke fakailoa atu ki te ovasia tausi o te kau toeaina i tau fakapotopotoga me i a koe ko fia papatiso. Ka fai atu a ia ki nisi toeaina ke sau‵tala mo koe e uiga ki fesili kolā e fakamatala mai i ei a akoakoga fakavae i te Tusi Tapu. Kafai e lotoma‵lie a toeaina konei me ko toka koe o papatiso, ka fakailoa atu ne latou me e mafai o papatiso koe i te suā taimi e fai ei te papatisoga. * E isi se lauga telā e fai sāle i vaegā taimi penā kae e fakamatala mai i ei te uiga o te papatisoga. Ko ‵kami ei ne te failauga a tino katoa kolā ka papatiso ke tali mai ne latou a fesili faigofie e lua e pelā me se auala ke ‘molimau atu olotou laugutu’ e uiga ki te lotou fakatuanaki.

²² Ko te papatisoga eiloa telā e fakailoa atu ei i mua o tino katoa me ko oti ne fai ne koe tau tukuatuga ki te Atua kae ko fai nei koe mo fai se Molimau a Ieova. E ‵tau eiloa o ufi kātoa ki lalo i te vai a tino papatiso ke fakaasi atu i ei i mua o tino katoa me ko oti ne fai ne latou se tukuatuga ki a Ieova.

23. Se a te uiga ke papatiso se tino “i te igoa o te Tamana, te Tama mo te Agaga Tapu”?

²³ Ne fai atu a Iesu me ka papatiso ana soko “i te igoa o te Tamana, te Tama mo te Agaga Tapu.” (Mataio 28:19) E fakauiga i ei me e talia ne te tino papatiso te pulega a Ieova te Atua mo Iesu Keliso. (Salamo 83:18; Mataio 28:18) E talia foki ne ia te galuega mo gasuesuega a te agaga tapu, io me ko te ‵mana o te Atua.​—Kalatia 5:22, 23; 2 Petelu 1:21.

24, 25. (a) Se a te uiga o te papatisoga? (e) Se a te fesili e ‵tau o tali aka?

²⁴ Kae e se fai te papatisoga mo fai se taimi koukou. A te  papatisoga se fakailoga tāua ‵ki. A te fanaifoga ki lalo i te vai e fakauiga pelā me ko mate koe ki tou olaga mua. A te fanakaga mai te vai e fakaasi mai i ei me ko toe ola mai nei koe ke fai te loto o te Atua. Masaua foki la, me ne tuku atu eiloa koe ki a Ieova te Atua kae e seki tuku atu fua koe ki te faiga o se galuega, se vaegā talitonuga, nisi tino, io me se fakapotopotoga. A te tukuatuga o koe mo tau papatisoga ko te kamataga fua o tou va pili mo te Atua​—ko te fesokotakiga fakataugasoa ‵lei mo ia.​—Salamo 25:14.

²⁵ E se fai pelā me e maua fua te fakaolataga i te faiga o te papatisoga. Ne tusi mai te apositolo ko Paulo, penei: “Ga‵lue mo te ma‵taku mo te pole‵pole, ko te mea ke katoatoa te otou fakaolataga.” (Filipi 2:12) A te papatisoga ko te kamataga fua. Tenei te fesili e ‵tau o mafaufau ki ei. E mafai pefea o tumau koe i te alofa o te Atua? Ka tali mai i te ‵toe mataupu a te fesili tenā.