1. Немә үчүн ефиопийәлик бир орда әмәлдари чөмдүрүш мәрасимидин өтүшини тәләп қилди?

БИРИНЧИ әсирдә Филип исимлик бир етиқатчи, ефиопийәлик бир орда әмәлдарини учритип, Әйсаниң Худа вәдә қилған Мәсиһ екәнлиги тоғрисидики хуш хәвәрни йәткүзгән. У Муқәддәс Китаптики Мәсиһ тоғрисидики һәқиқәтни аңлап  тәсирлинип, наһайити тезликтә һәрикәткә келип, өзиниң чөмдүрүшини халайдиғанлиғини ипадилигән (Әлчиләр 8:26—36).

2. Немә үчүн суға чөмдүрүш мәрасими тоғрисида әстаидил ойлинип көришиңиз керәк?

² Әгәр сиз Йәһвә Гувачилири билән мошу китапниң алдинқи баплирини тәпсилий үгәнгән болсиңиз, сиз: “Чөмдүрүш мәрасимидин өтүш үчүн маңа немә тосалғулуқ қилиду?” дәп соришиңиз мүмкин. Муқәддәс Китапни тәтқиқ қилип үгиниш арқилиқ һазир сиз җәннәттики мәңгүлүк һаятлиқ һәққидики вәдини чүшинип йәттиңиз (Луқа 23:43; Вәһийләр 21:3, 4). Өлүкләрниң һәқиқий әһвали вә тирилиш үмүти һәққидә билимгә егә болдиңиз (Вәз 9:5; Юһанна 5:28, 29). Бәлким сиз һәр-дайим Йәһвә Гувачилириниң жиғилишида, улар билән йеқин мунасивәт қилип өз көзиңиз билән уларниң тоғра динға қандақ етиқат қилидиғанлиғини көрдиңиз (Юһанна 13:35). Әң муһими, сиз Тәңри Йәһвәгә йеқинлишип, униң билән болған мунасивитиңизни риваҗландурдиңиз.

3. а) Әйса Мәсиһ өз әгәшкүчилиригә немә дәп буйруқ қилған? ә) Суға чөмдүрүш қандақ усулда елип берилиду?

³ Сиз Худаға хизмәт қилишни халайдиғанлиғиңизни қандақ көрситәләйсиз? Әйса Мәсиһ өз әгәшкүчилиригә: һәммә милләт кишилиридин “мениң шагиртлирим қилип... чөмүлдүрүңлар” дәп буйруқ қилған (Мәтта 28:19). Һәзрити Әйса өзи суда чөмдүрүш мәрасимидин өтүп үлгә қалдурған. Униңға су сәпмигән яки бешиға су төкмигән (Мәтта 3:16). Әксичә, пүтүн бәдини суға чөмдүрүлгән.

4. Суға чөмдүрүш мәрасими немини көрситиду?

⁴ Йәһвә билән мунасивәт орнитишни халайдиған барлиқ кишиләрниң суға чөмдүрүшни қобул қилиши тәләп қилиниду. Чөмдүрүш көпчилик алдида Худаға хизмәт қилиш арзу-истигиңизни ашкарә елан қилиш болуп, сиз униң ирадисини хошаллиқ билән орунлайдиғанлиғиңизни көрситиду (Зәбур 40:7, 8). Амма, чөмдүрүш мәрасими лайиқитигә егә болуш үчүн чоқум бәзи қәдәм-басқучларни бесишиңиз керәк.

5. а) Чөмдүрүш мәрасими лайиқитигә егә болушниң биринчи қәдәм-басқучи немә? ә) Немә үчүн җамаәтчилик жиғилишлар бәк муһим?

⁵ Сиз аллиқачан биринчи қәдәм-басқучини бесип болдиңиз.  Биринчи қәдәм-басқуч немә? Муқәддәс Китапни дайим тәтқиқ қилип үгиниш арқилиқ Йәһвә Худа вә Мәсиһ Әйса тоғрисида билим елиш (Юһанна 17:3). Йәнә үгинидиған көп нәрсиләр бар. Әйсаниң барлиқ әгәшкүчилири “Худаниң ирадиси тоғрилиқ толуқ чүшәнчигә еришкәйсиләр” дәп бир-бирини илһамландуриду (Колосилиқлар 1:9). Йәһвә Гувачилириниң җамаәтчилик жиғилиши сизниң шу тәрәптин билим елишиңизға ярдәм бериду. Шундақ жиғилишларға қатнишиш бәк муһим (Ибранийлар 10:24, 25). Давамлиқ жиғилишларға қатнишиш сизниң Йәһвә һәққидики билимлириңизни ашурушиңизға ярдәм бериду.

6. Чөмдүрүш мәрасими лайиқитигә егә болуш үчүн қанчилик көп Муқәддәс Китап билимигә егә болуш керәк?

⁶ Әлвәттә, чөмдүрүш мәрасими лайиқитигә егә болуш үчүн сизниң Муқәддәс Китаптики барлиқ билимләрни билишиңиз һаҗәт әмәс. Ефиопийәлик орда әмәлдариниң Муқәддәс Китаптин аз-тола билими бар еди. Бирақ, у Муқәддәс Китаптики бәзи мәзмунларни чүшиниш үчүн ярдәмгә муһтаҗ болған (Әлчиләр 8:30, 31). Шуниңға охшаш, сиз йәнә үгинидиған көп билимләр бар. Әмәлиятта, Худа тоғрисидики билимни мәңгү үгинип түгәткили болмайду (Вәз 3:11). Амма, суға чөмдүрүш мәрасимидин илгири, сиз Муқәддәс Китапниң асасий тәлимлирини билип йетишиңиз вә уни қобул қилишиңиз зөрүр (Ибранийлар 5:12). Шу тәлимләр — өлүкләрниң әһвали һәққидики һәқиқәт; Худаниң исми вә Худа Падишалиғиниң муһимлиғи тоғрисидики билимләрни өз ичигә алиду.

7. Муқәддәс Китапни тәтқиқ қилип үгиниш сизгә қандақ тәсир қилиду?

⁷ Ялғуз билим болушла купайә қилмайду, чүнки “ишәнч болмай туруп, Худани хурсән қилиш мүмкин әмәс” (Ибранийлар 11:6). Муқәддәс Китап: Әйсаниң әгәшкүчилири тарқатқан хуш хәвәрни аңлиған қедимки Коринт шәһиридики кишиләр “ишинишкә башлиди вә чөмүлдүрүшни қобул қилди” дәйду (Әлчиләр 18:8). Шуниңға охшаш, Муқәддәс Китапни тәтқиқ қилип үгиниш, Худаниң илһамландурған сөзи болған Муқәддәс Китапқа болған ишәнчиңизни ашуриду. Муқәддәс Китапни тәтқиқ қилип үгиниш йәнә Худаниң вәдилиригә вә Әйсаниң қурванлиғиниң инсанларни қутқузалайдиғанлиғиға ишәнч қилишиңиз үчүн ярдәм бериду (Йәшу 23:14; Әлчиләр 4:12; Тимотийға 2-хәт 3:16, 17).

8. Үгәнгән билимлириңизни башқиларға сөзләшкә немә үндәйду?

⁸ Қәлбиңиздә ишәнчиниң чоңқурлишиға әгишип, үгәнгән билимлириңизни қәлбиңиздә сақлаш тәскә тохтайду (Йәрәмия 20:9). Шу ишәнчиңиз, сизни Худа вә униң ирадиси һәққидә башқиларға сөзләшкә үндәйду (Коринтлиқларға 2-хәт 4:13).

9, 10. а) Сиз кимләр билән Муқәддәс Китап һәқиқитини ортақлишишқа башлисиңиз болиду? ә) Әгәр сиз Йәһвә Гувачилири орунлаштурған хуш хәвәр йәткүзүш ишиға қатнишишни халисиңиз немә қилишиңиз керәк?

⁹ Авал, сиз үгәнгән Муқәддәс Китап һәқиқитини пәм-парасәтлик билән уруқ-туққан, дост-бурадәр, холум-хошна вә хизмәтдашлириңиз билән ортақлишишқа башлисиңиз болиду. Вақти кәлгәндә, Йәһвә Гувачилириниң орунлаштурған хуш хәвәр тоғрисида вәзә ейтиш ишиға қатнишишни халисиңиз, сизгә Муқәддәс Китап үгәткән Гувачи билән шу иш тоғрисида әркин-азадә параңлашсиңиз болиду. Әгәр сиз вәзә ейтиш лайиқитигә егә болған болсиңиз, сизгә Муқәддәс Китап үгәткән Гувачи билән бирликтә җамаәтчиликтики икки ақсақал билән параңлишиш орунлаштурулиду.

¹⁰ Мошу параңлишиш арқилиқ сиз Худаниң қойлирини бақидиған падичилар дәп аталған җамаәтниң ақсақаллири билән яхширақ тонушалайсиз (Әлчиләр 20:28; Петрусниң 1-хети 5:2, 3). Әгәр шу ақсақаллар, сизниң Муқәддәс Китапниң асасий тәлимлирини чүшәнгәнлигиңизни вә шу тәлимләргә ишәнгәнлигиңизни, шундақла Йәһвәниң қаидә-қанунлириға уйғун яшап расттинла бир Йәһвә Гувачиси болушни халайдиғанлиғиңизни көрүп йәтсә, улар сизниң техи чөмдүрүш мәрасимидин өтмигән вәзә ейтқучи сүпитидә хуш хәвәр йәткүзүш лайиқитигә егә болғанлиғиңизни сизгә ейтиду.

11. Чөмдүрүш мәрасимидин өтмигән вәзә ейтқучи болушни илтимас қилиштин бурун, қайси бәзи ишларни өзгәртиш керәк?

¹¹ Амма, сиз хуш хәвәр йәткүзүш лайиқитигә егә болуш үчүн еһтимал бәзи турмуш кәчүрүш усулиңиз вә адитиңизни өзгәртишиңиз зөрүр болуши мүмкин. Мәсилән, башқилар билмәйдиған бәзи начар қилиқлириңизни өзгәртишиңиз зөрүр болуши мүмкин. Чөмдүрүш мәрасимидин өтмигән вәзә  ейтқучи болушни илтимас қилиштин бурун, сиз җинсий әхлақсизлиқ, һарақкәшлик вә зәһәр чекиш қатарлиқ еғир гуналиқ қилмишлардин чоқум қол үзүшиңиз керәк (Коринтлиқларға 1-хәт 6:9, 10; Галатиялиқлар 5:19—21).

12. Немә үчүн товва қилиш зөрүр?

¹² Суға чөмдүрүш мәрасимидин өтүштин авал йәнә башқа қәдәм-басқучлар бар. Әйса Мәсиһниң шагирти Петрус: “Яман йоллириңлардин йенип, товва қилиңлар!.. Шундақ қилғанда, Худа гуналириңларни кәчүрүм қилиду” дәп ейтқан (Әлчиләр 3:19). Товва қилиш қилған бәзи ишлириңиз үчүн сәмимийлик билән пушайман қилишни көрситиду. Пәқәт әхлақсиз турмуш кәчүргән кишиләрла товва қилип қалмай, хелила әхлақлиқ турмуш кәчүргәнләрму товва қилиши зөрүр. Немә үчүн? Чүнки, барлиқ инсанлар гунакар вә Худаниң кәчүрүм қилишиға муһтаҗ (Римлиқлар 3:23; 5:12). Сиз Муқәддәс Китапни тәтқиқ қилип үгиништин илгири, Худаниң ирадисиниң немә екәнлигини билмәттиңиз. Демәк, Униң ирадисигә мас яшалмиған, шундақ әмәсму? Шу сәвәптин, һәммә адәмниң товва қилиши зөрүр.

13. Өзгәртиш дегән немә?

¹³ Товва қилғандин кейин, чоқум өзгәртиш йәни раст йолға меңиш керәк. Пушайман қилиш йетәрлик әмәс. Сиз илгири адәтләнгән турмуш кәчүрүш усулиңизни ташлап, һазирдин башлап тоғра иш қилишни қәтъий қарар қилишиңиз лазим. Товва қилиш вә өзгәртиш — чөмдүрүш мәрасимидин илгири чоқум орунлайдиған қәдәм-басқучлар.

14. Сиз чөмдүрүш мәрасимидин илгири қайси муһим қәдәм-басқучни орунлишиңиз керәк?

¹⁴ Чөмдүрүш мәрасимидин бурун орунлайдиған йәнә бир муһим қәдәм-басқуч бар. Сиз чоқум өзиңизни Тәңри Йәһвәгә беғишлишиңиз керәк.

15, 16. Өзиңизни Худаға беғишлаш немини билдуриду? Немә сизни шундақ қилишқа һәрикәтләндүриду?

¹⁵ Ихлас билән дуа қилип Тәңри Йәһвәгә өзиңизни беғишлиғанда, сиз дайим ялғуз униңғила садақәтликни сақлаймән  дәп вәдә қилисиз (Тәкрар қанун 6:15). Немә үчүн бәзи адәмләр Йәһвәгә өзини беғишлашни халайду? Мошу соалға җавап бериш үчүн бир мисал қилайли, бир жигит бир қизға ашиқ болди вә аста-аста қизни техиму чоңқур чүшәнди. У қизниң наһайити есил пәзилитини көрүп, ахирида қиз билән муһәббәтләшти. Шуңа вақти кәлгәндә, жигитниң қизға той қилиш тәкливини қоюши наһайити тәбиий әһвал. Гәрчә жигит той қилғандин кейин, өз җавапкәрлигиниң техиму еғирлишидиғанлиғини билсиму, униң қизға болған муһәббити уни шу муһим қәдәмни бесишқа һәрикәт қилдуриду.

¹⁶ Охшашла, сизниң Йәһвәгә болған тонушиңиз чоңқурлашқансери, униңға болған муһәббитиңиз күчийиду вә иккиләнмәйла униңға хизмәт қилиш яки чин қәлбиңиздин униңға ибадәт қилишқа һәрикәт қилисиз. Һәр қандақ киши Әйса Мәсиһкә әгишип меңишни халиса, “өз хаһишидин” ваз кечиши керәк (Маркус 8:34). Худаға пүтүнләй бойсунушимизға өз арзу-һәвәс вә мәхсәт-нишанлиримизниң тосқунлуқ қилмаслиғиға капаләтлик қилишимиз керәк. Шундақ қилиш арқилиқ бәзи бир хаһишимиздин ваз кечип өз-өзимизни инкар қилимиз. Сиз чөмдүрүш мәрасимидин илгири, Йәһвә Худаниң ирадисини орунлашни чоқум өзиңизниң һаятиниң асасий мәхсәт-нишани қилишиңиз керәк (Петрусниң 1-хети 4:2).

17. Немә үчүн бәзи кишиләр Йәһвәгә өзини беғишлашта иккилинип туруп қалиду?

¹⁷ Бәзи кишиләр Пәрвәрдигар Йәһвәгә өзини беғишлашта иккилинип туруп қалиду. Чүнки, улар шундақ муһим қәдәм-басқучни бесиштин қорқиду. Улар өзини Худаға беғишлиса, Йәһвәниң алдидики җавапкәрликниң һөддисидин чиқалмай уни үмүтсизләндүрүп қоярмәнмикин дәп қорқуп, әң яхшиси униңға өзәмни беғишлимай дәп ойлиши мүмкин.

18. Йәһвә Худаға өзиңизни беғишлашқа немә һәрикәт қилдуриду?

¹⁸ Тәңри Йәһвәгә болған муһәббитиңиз чоңқурлашқансери, униңға өзиңизни беғишлаш истиги күчийиду вә күчиңизниң баричә униңға бәргән вәдиңизгә мувапиқ яшашқа һәрикәт қилисиз (Вәз 5:4). Өзиңизни беғишлиғандин кейин, “Рәббимизниң ирадисигә мунасип яшап, һәр җәһәттин Уни хурсән қилалайсиз” (Колосилиқлар 1:10). Сизниң Худаға  болған муһәббитиңиз сәвәплик, сиз униң ирадисини орунлашни қийин әмәс һис қилисиз. Шәк-шүбһисизки, сиз Әйсаниң шагирти Юһаннаниң язған мону сөзлиригә қошулисиз: “Худани сөйүш — Униң әмирлиригә әмәл қилиш демәктур. Униң әмирлириму еғир әмәс” (Юһаннаниң 1-хети 5:3).

19. Немә үчүн Худаға өзиңизни беғишлаштин қорқмаслиғиңиз керәк?

¹⁹ Сиз Худаға өзиңизни беғишлаш үчүн мукәммәл болушиңиз һаҗәтсиз. Йәһвә сизниң ихтидариңизниң чәклик екәнлигини билиду вә у һәргизму сизниң қилишқа қурбитиңиз йәтмәйдиған ишларни қилишиңизни тәләп қилмайду (Зәбур 103:14). У сизниң ғалиб келишиңизни халайду вә қоллап ярдәм бериду (Йәшая 41:10). Пәрвәрдигар Йәһвәгә чин қәлбиңиздин ишәнч қилиң. Муқәддәс Китап: У “һәммә йоллириңни  җайлайдур” дәп капаләт бәргән (Пәнди-нәсиһәт 3:5, 6).

20. Немә үчүн өзиңизни Йәһвә Худаға беғишлиғанлиғиңизни иқрар қилишиңиз керәк?

²⁰ Биз жуқирида мулаһизә қилип өткән айәтләр, бәлким дугалириңизда өзиңизни Тәңри Йәһвәгә беғишлашни қарар қилишиңиз үчүн ярдәм бериши мүмкин. Әгәр биз һәқиқәтән Худани  сөйсәк чоқум “етирап қилиш арқилиқ қутқузулишимиз” мүмкин (Римлиқлар 10:10). Сиз қандақ қилип шундақ қилалайсиз?

21, 22. Қандақ қилип өзиңизниң иман-етиқатини “иқрар қилиш” арқилиқ җакалалайсиз?

²¹ Сиз чөмдүрүш мәрасимидин өтүшни халисиңиз, җамаәтчиликниң ақсақаллири арисидики риясәтчи ақсақални хәвәрләндүрүң. У ақсақал сизни бир қанчә ақсақаллар билән Муқәддәс Китапниң асасий тәлимлирини тәкрарлаш үчүн бәзи соалларни бирликтә музакирә қилишқа орунлаштуриду. Әгәр шу ақсақаллар сизниң лайиқәтлик болғанлиғиңизға қошулса, сизниң су чөмдүрүш мәрасимидин өтүшиңиз болиду. * Суға чөмдүрүш мәрасимидин илгири, униң мәнаси тоғрисида нутуқ сөзлиниду. Нутуқ сөзлигүчи суға чөмдүрмәк болған барлиқ намзатларни аддий икки соалға җавап беришкә тәклип қилиду. Мошу арқилиқ улар өз иман-етиқатини еғиз “иқрари” арқилиқ җакарлайду.

²² Суға чөмдүрүш мәрасимидин өткиниңиз Йәһвәгә беғишлиғанлиғиңизни вә әнди Йәһвә Гувачиси болғанлиғиңизни җамаәтчиликкә ашкарә көрситиду. Суға чөмдүрүлгән намзатларниң пүтүн бәдининиң суға кириши уларниң өзини Йәһвәгә беғишлиғанлиғини ашкарә ипадиләйду.

23. “Худа Ата вә Униң Оғли вә Муқәддәс Роһниң нами” билән чөмдүрүшниң мәнаси немә?

²³ Әйса шагиртлириға: “Худа Ата, Униң Оғли вә Муқәддәс Роһниң нами” билән чөмдүрүңлар дәп буйруқ қилған (Мәтта 28:19). Буниң мәнаси чөмдүрүлгән киши Пәрвәрдигар Йәһвәниң вә Әйса Мәсиһниң һоқуқини етирап қилиду (Зәбур 83:18; Мәтта 28:18). Худаниң Муқәддәс роһи йәни һәрикәт күчиниң ролини етирап қилиду (Галатиялиқлар 5:22, 23; Петрусниң 2-хети 1:21).

24, 25. а) Чөмдүрүш мәрасими немигә символ қилинған? ә) Кейинки бап қайси соалға җавап бериду?

²⁴ Амма, суға чөмдүрүш пәқәт мундақла суға чөмүлүпла чиқидиған мәрасим әмәс. Униң наһайити муһим символлуқ  мәнаси бар. Суға чөмдүрүш болса сизниң илгәрки турмуш кәчүрүш усулиңизниң өлгәнлигигә йәни уни ташливәткәнлигиңизгә символ қилинса, судин чиқиш болса Худаниң ирадисини орунлаш үчүн тирилгәнлигиңизгә йәни йеңи турмуш йоли башлиғанлиғиңизға символ қилинған. Йәнә шу ядиңизда болсунки, сиз һәргизму мәлум хизмәт, ғайә-нишан яки башқа адәмләр вә яки тәшкилат үчүн өзиңизни беғишлимидиңиз, бәлки Йәһвәгә беғишлидиңиз. Сизниң Йәһвәгә өзиңизни беғишлап суға чөмдүрүшни қобул қилишиңиз, униң билән болған наһайити йеқин достлуқ мунасивитиңизниң башлинишидур (Зәбур 25:14).

²⁵ Суға чөмдүрүш һәргизму ниҗатлиқ тепишқа капаләт бәрмәйду. Чүнки, әлчи Павлус: “Худадин қорқуп вә Уни чоңқур һөрмәтләп, йеңи һаятни турмушуңларға өзләштүрүшкә тиришиңлар” дәп язған (Филипиликләр 2:12). Суға чөмдүрүш пәқәтла башлиниши халас. Қандақ қилип Худаниң меһир-муһәббитидә қелип яшаш мүмкин болиду? Бу соалға мошу китапниң әң ахирқи баби җавап бериду.