1. Momo lie kalei u Etiopia a yonguilile oku papatisiwa?

 “OVAVA ya, nye ci nateka oku papatisiwa?” Epulilo eli lia lingiwile osimbu la umue kalei u Etiopia. Umue Ukristão wa tukuiwile hati Filipu, wo lomboluila okuti Yesu eye Mesiya wa likuminyiwile. Omo lieci a yeva, utima waye  wa vetiyiwa, kuenje wa lekisa onjongole yoku papatisiwa.​—Ovilinga 8:26-36.

2. Momo lie o sukilila oku sokolola lutate eci catiamẽla kepapatiso?

² Nda wa lilongisa ale ovipama viatete vielivulu lilo la umue Ombangi ya Yehova, ove pamue o lipulavo okuti “nye ci nateka oku papatisiwa?” Cilo ove wa lilongisa ale eci catiamẽla kelavoko li sangiwa Vembimbiliya liomuenyo kopui voluali luokaliye. (Luka 23:43; Esituluilo 21:3, 4) Wa lilongisavo eci catiamẽla kekalo liava va fa kuenda kelavoko liepinduko. (Ukundi 9:5; Yoano 5:28, 29) Ove pamue wa siata oku likongela ale Lolombangi via Yehova kolohongele viavo. Kuenje wa limbuka ale ndomo ovo va litumbika muẽle ketavo liocili. (Yoano 13:35) Ca velapo vali handi, ceci okuti ove cilo o kuete ukamba uwa la Yehova Suku.

3. (a) Ocikundi cipi Yesu a eca kolondonge viaye? (b) Oku papatisiwa vovava ku lingiwa ndati?

³ O lekisa hẽ ndati okuti o yongola muẽle oku vumba Suku? Yesu wa sapuila olondonge viaye hati: “Kuendi, ka tavisi olofeka viosi oco va linge olondonge. Va papatisi.’ (Mateo 28:19) Yesu wa tu sila ongangu yiwa konepa eyi. Momo eye muẽle wa papatisiwa vovava. Eye ka nyanyiwile ño otuvava tumue. Kuenda ka vo pesilile ño ovava ponumbutue. (Mateo 3:16) Ondaka oku “papatisa” yopiwa kelimi Liohelasi, yi lomboloka oku ‘mbuitikinya ale oku yuvika.’ Omo liaco, epapatiso Liakristão li lomboloka oku yuvikiwa vovava.

4. Oku papatisiwa vovava ocindekaise ca nye?

⁴ Omunu wosi o yongola oku livala ukamba la Yehova Suku te wa papatisiwa vovava. Oku papatisiwila powiñi ocindekaise cokuti ove o yongola oku vumba Suku. Ci lekisavo okuti o yongola oku linga ocipango ca Yehova. (Osamo 40:7, 8) Pole, oco o papatisiwe, o sukila oku eca ananga amue komuenyo wove.

5. (a) Lipi enanga liatete liatiamẽla koku papatisiwa? (b) Momo lie olohongele Viakristão vi kuetele esilivilo?

⁵ Ove wa fetika ale enanga liatete. O kasi oku ci linga hẽ ndati? O kasi oku ci linga poku kuata ukũlĩhĩso watiamẽla ku Yehova Suku kuenda ku Yesu Kristu poku lilongisa Embimbiliya olonjanja viosi. (Tanga Yoano 17:3.) Pole, eci hacoko lika. Kuli vali handi calua o sukila oku lilongisa. Akristão va sukila oku ‘yukisua lukũlĩhĩso wasuapo wocipango ca Suku.’ (Va Kolosai 1:9) Oku endaenda kolohongele Violombangi via Yehova ci kuatisa calua konepa eyi. Ci kuete esilivilo liocili kokuove oku endaenda kolohongele viaco. (Va Heveru 10:24, 25) Momo poku ci linga, cika vokiya ukũlĩhĩso wove watiamẽla ku Suku.

6. Oco o papatisiwe ukũlĩhĩso upi o sukila oku kuata?

⁶ Ocili okuti oco o papatisiwe ka ci sukila oku lilongisa cosi ci sangiwa Vembimbiliya. Kalei u Etiopia wa kuata ño ukũlĩhĩso umue. Eye wa sukilile ekuatiso lioku kuata elomboloko liolonepa vimue Viovisonehua. (Ovilinga 8:30, 31) Ove okuetevo handi calua coku lilongisa. Ocili okuti, ove lalimue eteke oka liwekapo oku lilongisa eci catiamẽla ku Suku. (Ukundi 3:11) Pole, osimbu handi kua papatisiwile, o sukila oku kũlĩha kuenda oku tava kalongiso a velapo Embimbiliya. (Va Heveru 5:12) Valongiso aco mua kongela oku lilongisa ocili catiamẽla kekalo liava va fa. Kuenda esilivilo lionduko ya Suku leci catiamẽla Kusoma waye.

7. Oku lilongisa Embimbiliya cika ku vetiya oku linga nye?

⁷ Pole, oku kuata lika ukũlĩhĩso ka ci tẽla. Momo “okusunguluka ku Suku ka ku tẽliwa te lekolelo.” (Va Heveru 11:6) Embimbiliya li tu sapuila okuti eci vamue ko Korindo va yeva ondaka va va kundila, “va tava kuenje va papatisiwa.” (Ovilinga 18:8) Cimuamue haico ci sukila oku pita love. Elilongiso Liembimbiliya li sukila oku pamisa ekolelo liove loku limbuka okuti eyi Ondaka muẽle ya Suku. Oku lilongisa Embimbiliya cika ku kuatisa oku kuata ekolelo  kolohuminyo via Suku kuenda kocisembi ca Yesu.​—Yehosua 23:14; Ovilinga 4:12; 2 Timoteo 3:16, 17.

8. Nye cika ku vetiya oku sapuilako vakuẽle eci wa siata oku lilongisa?

⁸ Osimbu ekolelo liove li livokiya, oka limbuka okuti cika ku tĩlila oku seleka vutima wove eci wa lilongisa. (Yeremiya 20:9) Oka vetiyiwa oku sapuilako vakuẽle eci catiamẽla ku Suku kuenda kocipango caye.​—Tanga 2 Va Korindo 4:13.

9, 10. (a) Velie o sukila oku fetikila oku sapuilako ocili wa lilongisa Vembimbiliya? (b) Nye o sukila oku linga nda o yongola oku kuata onepa kupange woku kunda Lolombangi via Yehova?

⁹ Pamue ove wa fetika ale oku sapuilako ku vangandiove, kakamba vove, lokomanu o lisungue lavo kuenda lava u talavayela kumue kupange ovina wa lilongisa Vembimbiliya. Pole, vokuenda kuotembo ci tava okuti oka yongola oku talavaya vupange woku kunda kumosi Lolombangi via Yehova. Nda o yongola oku ci linga, vangula Lombangi ya Yehova yi kasi oku ku longisa Embimbiliya. Nda wa loñolohela ale kupange woku kunda, akulu vavali vekongelo vaka tumãla love kumosi lulongisi wove.

¹⁰ Eci cika ku kuatisa oku kũlĩha vamue pokati kakulu vekongelo, vana Suku a ĩha ocikele coku tata olomeme viaye. (Ovilinga 20:28; 1 Petulu 5:2, 3) Nda akulu vekongelo va limbuka okuti alongiso avelapo Embimbiliya a ku lomboloka kuenda wa kapako olonumbi viaco, kuenje o yongola muẽle oku kala Ombangi ya Yehova, ovo vaka ku ecelela oku kala ukundi kapapatisiwile.

11. Apongoloko api omunu a sukila oku linga eci handi ka pingile oco a linge ukundi wolondaka viwa?

¹¹ Pamue akulu vekongelo va limbuka okuti ove handi o sukila oku linga apongoloko amue komuenyo wove oco o taviwe oku kala ukundi wolondaka viwa. Pokati kovina o sukila oku siapo, pamue pali vina okuti wa siata oku vi lingila ño pokañunuñunu vakuẽle ka va ci kũlĩhĩle. Osimbu  handi kua pingile oco o linge ukundi ka papatisiwile, o sukila oku siapo akandu anene, ndeci ukahonga, uholua, kuenda oku sipa eliamba ale oku nyua vimue vi tapiyasa olondunge.​—Tanga 1 Va  Korindo 6:9, 10; Va Galatia 5:19-21.

12. Momo lie ci sukilila oku likekembela?

¹² Kuli vali ananga akuavo omunu a sukila oku eca osimbu handi ka papatisiwile. Upostolo Petulu wa popele hati: “Likekembeli akandu ene. Pongoloki okuti akandu ene a ecelua.” (Ovilinga 3:19) Oku likekembela ci lomboloka oku livela lutima wosi omo liocina cimue cĩvi wa linga. Oku likekembela ka ku sukiliwa lika komunu una wambatele omuenyo umue ũvi. Pole, ku sukiliwavo ndaño muẽle komunu una okuti ka lingile enene eci cĩvi komuenyo waye. Momo lie? Momo omanu vosi vakuakandu. Kuenje va sukila ongecelo ya Suku. (Va Roma 3:23; 5:12) Eci handi kua fetikile oku lilongisa Embimbiliya, kua kũlĩhĩle ocipango ca Suku. Omo liaco, ka ci tava oku popia okuti ove wambatele omuenyo umue u litava locipango Caye. Eli olio esunga lieci o sukilila oku likekembela.

13. Oku pongoloka ku lomboloka nye?

¹³ Voku likekembela mua kongela ‘oku pongoloka.’ Ove ku sukila lika oku livela lutima wosi omo liũvi wa linga. Pole, o sukilavo oku siapo ovituwa viosimbu kuenda oku nõlapo oku linga lika eci ciwa. Oku likekembela kuenda oku pongoloka, ananga amue o sukila oku eca eci handi kua papatisiwile.

14. Enanga lipi lia velapo omunu a sukila oku eca osimbu handi ka papatisiwile?

¹⁴ Kuli vali enanga likuavo o sukila oku eca osimbu handi kua papatisiwile. Ove o sukila oku litumbika ku Yehova.

15, 16. Oku litumbika ku Suku ci lomboloka nye? Kuenda nye ci vetiya omunu oku ci linga?

 ¹⁵ Eci o litumbika ku Yehova Suku vohutililo yutima wosi, o likuminya kokuaye oku u vumba lika eye otembo yosi. (Esinumuĩlo 6:15) Momo lie omunu a sukilila oku ci linga? Sokolola okuti ukuenje umue o yongola ufeko. Osimbu eye amamako oku kũlĩha ciwa ufeko waco, oka limbuka okuti o kuete ovituwa viwa. Kuenje ci ko vetiya oku u pinga kolohuela. Ocili okuti oku kuela ocikele cimue cinene. Pole, ocisola ci ko vetiya oku tava ocikele caco.

¹⁶ Eci ocisola cove ku Yehova ci fetika oku livokiya, oka vetiyiwa oku u vumba lutima wove wosi. Omunu wosi o yongola oku kuama ongangu ya Yesu Kristu, te ‘ka litendele vali eye muẽle.’ (Marko 8:34) Etu ka tu litendi vali etu muẽle eci tu suñamisa olonjongole vietu lovimãho vietu koku linga ocipango ca Suku. Ka tu ecelelavo lacimue oku tu tindula koku pokola ku Suku. Osimbu handi kua papatisiwile, ocipango ca Yehova Suku te oco ca linga ale ocimãho ca velapo vomuenyo wove.​—Tanga 1 Petulu 4:2.

17. Momo lie vamue va siatela oku susõha oku litumbika ku Suku?

¹⁷ Omanu vamue va siata oku susõha oku litumbika ku Yehova omo liohele yokuti pamue vaka lueya. Vakuavo va kuete usumba omo va sima okuti pamue ka vaka tẽlisa ocikele caco kuenje Suku oka va pisa. Va kala lohele yoku sumuisa Yehova kuenje va nõlapo oku liwekapo oku litumbika kokuaye.

18. Nye cika ku vetiya oku litumbika ku Yehova?

¹⁸ Osimbu ocisola cove ku Yehova ci livokiya, oka vetiyiwa oku litumbika kokuaye. Kuenda oka likolisilako oku ambata omuenyo umue u li tava lelitumbiko liaco. (Ukundi 5:4) Pana okuti wa litumbika ale, oka likolisilako oku ambata ‘omuenyo wa soka leci ca posokela Ñala, haiwo wu sanjuisa.’ (Va Kolosai 1:10) Omo liocisola  okuetele Suku, ka cika ku tĩlila oku linga ocipango caye. Ocili okuti ove o tava kolondaka viupostolo Yoano wa soneha hati: “Oku sola Suku kua lomboloka oku pokola kovihandeleko viaye. Ovihandeleko viaye ka vi lemi.”​—1 Yoano 5:3.

19. Momo lie ku sukilila oku kuata ohele yoku litumbika ku Suku?

¹⁹ Oco o litumbike ku Suku, ka ci sukila okuti o kala omunu umue wa lipua. Yehova wa kũlĩha apa ongusu yetu yi sulila. Eye ka tu kisika eci ka tu tẽla oku linga. (Osamo 103:14) Eye oyongola okuti ove o litunda ciwa. Omo liaco, oka ku kuatisa. (Tanga Isaya 41:10.) Limbuka okuti nda wa kolela Yehova lutima wove wosi, “eye o[ka] suñamisa olonjila viove.”​—Olosapo 3:5, 6.

20. Momo lie oku litumbika ku Yehova ka ku sulilila lika pokolika?

²⁰ Eci o sokolola ovina tua lombolola konano, pamue cika ku vetiya oku litumbika ku Yehova vohutililo. Omunu wosi o sole ocili Suku, oka yongola oku lekisa elitumbiko liaye kowiñi. (Va Roma 10:10) Ove oka ci linga hẽ ndati?

21, 22. O lekisa ndati “lomẽla” uvangi wekolelo liove?

²¹ Sapuilako ukulu wekongelo mitavaso catiamẽla  konjongole yove yoku papatisiwa. Eye oka linga eliangiliyo liokuti ove o tumãla lakulu vamue vekongelo, kuenje va ku linga apulilo amue atiamẽla kalongiso a velapo Embimbiliya. Nda akulu vaco vekongelo va limbuka okuti ove ci tava oku papatisiwa, ovo vaka ku ci sapuila. Kuenje epuluvi liosi lieya oku mõlehako, oka papatisiwa. a Kepuluvi liaco, kuka lingiwa ohundo yimue yi lombolola eci ci lomboloka oku papatisiwa. Noke hundi oka laleka vosi va yongola oku papatisiwa oco va tambulule apulilo avali a leluka. Apulilo aco a lingiwila oku vetiya ava vaka papatisiwa oku eca “lomẽla” uvangi wekolelo liavo.

²² Epapatiso ondimbukiso yokuti wa litumbika ku Suku kuenje wa linga Ombangi ya Yehova. Omunu o papatisiwa etimba liaye liosi li iñisiwa vovava oco a lekise kowiñi okuti wa litumbika ku Yehova.

23. Oku papatisiwila “vonduko ya Tate la Mõla, kuenda espiritu sandu” ci lomboloka nye?

²³ Yesu wa vetiya olondonge viaye oku papatisiwila “Vonduko ya Tate la Mõla, kuenda Espiritu Sandu.” (Mateo 28:19) Eci ci lomboloka okuti omunu oka papatisiwa o sukila oku limbuka okuti Yehova Suku eye ombiali ya velapo. Kuenda o sukila oku limbukavo ocikele ca Yesu Kristu vocipango ca Suku. (Osamo 83:18; Mateo 28:18) Eye o sukilavo oku limbuka unene wespiritu sandu lia Suku.​—Va Galatia 5:22, 23; 2 Petulu 1:21.

24, 25. (a) Epapatiso li lomboloka nye? (b) Epulilo lipi li sukila oku tambuluiwa?

²⁴ Pole, oku papatisiwa haku yuvikiwako ño vovava. Oku papatisiwa ku kuete elomboloko limue linene. Eci iñisiwa vovava, ci lomboloka okuti wa fa kovilinga viove  viosimbu. Eci o votuiwa vovava, ci lomboloka okuti o kasi oku tundila komuenyo wokaliye, woku linga ocipango ca Suku. Ivaluka okuti ove wa litumbika ku Yehova Suku. Kua litumbikile kupange umue, komunu umue ale kocisoko cimue. Oku litumbika kuove lepapatiso liove, efetikilo lioku kuata ukamba uwa la Yehova Suku.​—Osamo 25:14.

²⁵ Eci omunu a papatisiwa, ka ci lekisa okuti oco yapa wa yovuiwa ale. Upostolo Paulu wa soneha hati: “Kolisiko oku linga eci ci koka epopelo liene. Kolisiko muẽle laco lusumba loku luluma.” (Va Filipoi 2:12) Epapatiso efetikilo ño handi. Omo liaco, epulilo li lingiwa lieli: Oka amamako ndati oku endela vocisola ca suku? Ocipama ca sulako cika eca etambululo kepulilo eli.