1. Mang fan ni ke yog be’ nu Ethiopia ni ngan taufenag?

“BAARAY e ran! Mang ndab ntaufenigeg?” Re deer ney e fith be’ nu Ethiopia u nap’an e bin som’on e chibog, u tomuren ni ka fini tamilangnag Filip ngak ni Jesus e ir fare Messiah. Kari mich u wan’ faanem nu Ethiopia e pi n’en ni ka fini fil u lan e babyor nib thothup. Ere, ke tamilang ni baadag ni nge un ko taufe!​—Acts 8:26-36.

2. Mang fan ni thingar mu lemnag murung’agen e taufe?

² Faanra kam fil nib fel’ rogon kam nang fan e thin ko fa tin som’on e guruy ko re ke babyor ney ma sana ra lungum, ‘Mang ni dab ntaufenigeg?’ Sana kam fil e n’en ni be yog e Bible u murung’agen e yafas ni manemus u Paradis. (Luke 23:43; Revelation 21:3, 4) Kam fil murung’agen rarogon e piin ni kar m’ad nge murung’agen e fas ko yam’. (Eklesiastes 9:5; John 5:28, 29) Ma sana kam un ko muulung ni ma tay e Pi Mich Rok Jehovah ma kam guy nga owchem rogon e ba’ nriyul’ e teliw. (John 13:35) Ma bin nib ga’ fan riy e sana ke tabab ni nge fel’ thilmew Jehovah Got.

3. (a) Mang motochiyel e pi’ Jesus ngak pi gachalpen? (b) Uw rogon e taufe?

 ³ Uw rogon ni ngam dag ni ga baadag ni ngam pigpig ku Got? I yog Jesus ngak pi gachalpen ni gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad.” (Matthew 28:19) Ke dag Jesus e kanawo’ ngodad ya ke un ko taufe. Gathi kan atngiy e ran nga daken ara kan puog e ran nga daken lolugen. (Matthew 3:16) Ya fan fare bugithin ni Greek ni kan pilyeg ni “taufe” e “ngan lithag nga ar.” Ere, rogon e taufe ni ma tay e piin Kristiano e ngan lithag be’ nga ar.

4. Mang e be tamilangnag e taufe?

⁴ Kan tay chilen ngak urngin e piin ni yad baadag ni nge fel’ thilrad Jehovah Got ni ngar uned ko taufe. Yira taufenag be’ ma ke dag ko girdi’ ni yoor ni baadag ni nge pigpig ku Got. Maku be tamilangnag nib felfelan’ ngay ni nge rin’ e tin nib m’agan’ Jehovah ngay. (Psalm  40:7, 8) Ba’ boch ban’en nib t’uf ni thingar mu rin’ u m’on ni ngam un ko taufe.

5. (a) Mang e som’on ni ngam rin’ u m’on ni ngam un ko taufe? (b) Mang nib ga’ fan ni ngam un ko muulung ni ma tay e piin Kristiano?

⁵ Kam tabab ni ngam rin’ e n’en nthingar mu rin’ ni som’on. Uw rogon? Ga be guy rogon ni ngarim nang murung’agen Jehovah Got nge Jesus Kristus. (Mu beeg e John 17:3.) Machane ka bay boch ban’en nthingar mu fil. Pi Kristiano e ba m’agan’rad ngay ni ngan “tamilangnag lanin’rad ngar nanged e tin nib m’agan’ [Got] ngay ni ir e ngar rin’ed.” (Kolose 1:9) Muulung ni ma tay e Pi Mich Rok Jehovah e ra ayuwegem ni nge yag e tamilangan’ ngom. Ere, ba ga’ fan ni ngam un ko pi muulung nem. (Hebrews 10:24, 25) Faanra um un ko muulung ni gubin ngiyal’ ma rayog ni nge yoor ban’en ni ngam nang u murung’agen Got.

6. Uw urngin e machib ni thingar mu nang u m’on ni ngam un ko taufe?

⁶ De t’uf ni ngam nang urngin ban’en u lan e Bible mfin mu un ko taufe. Faanem nu Ethiopia e sana ke tamilangan’ u boch ban’en u Bible, machane ka bay boch nthingar kun ayuweg nge nang. (Acts 8:30, 31) Ere, ku arrogon gur ni ka boor ban’en ni ngam fil. Machane bin riyul’ riy e dariy ba ngiyal’ ni ga ra tal i fil murung’agen Got. (Eklesiastes 3:11) Machane u m’on ni ngam un ko taufe ma thingar mu fil ngam nang kenggin e machib nu Bible. (Hebrews 5:12) Boch e pi kenggin e machib ney, e tin riyul’ u murung’agen e yam’, nge feni ga’ fan e ngachal rok Got, nge Gil’ilungun.

7. Mang angin e fol Bible ni ga ra tay?

 ⁷ Gathi kemus ni nge yag e tamilangan’ ngom, ya “dariy be’ nra fel’ u wan’ Got ni faanra de mich Got u wan’.” (Hebrews 11:6) Be yog e Bible ni boch e girdi’ u lan e mach nu Korinth kakrom e ur rung’aged e machib ko piin Kristiano “me mich Jesus u wun’rad min taufenagrad.” (Acts 18:8) Ere, ku nap’an ni ga ra fil e Bible ma susun e nge mich u wan’um ma ga nang ni aram e Thin rok Got. Faan ga ra fil e Bible ma ra ayuwegem ni nge mich u wan’um e tin ni ke micheg Got maku ra mich u wan’um nra yag e yafas ngom ni bochan e biyul ni pi’ Jesus.​—Joshua 23:14; Acts 4:12; 2 Timothy 3:16, 17.

8. Mang e ra k’aringem ni ngam weliy e tin ni kam fil ngak e girdi’?

⁸ Nap’an nra gel e michan’ rom me taw e tin kam fil nga gum’irchaem ma ga ra pirieg nib mo’maw’ ni ngam par ni dab mu weliy e pi n’en ni kam nang fan. (Jeremiah 20:9) Ga ra adag ni ngam weliy murung’agen Got nge tin nib m’agan’ ngay ngak e girdi’.​—Mu beeg e 2 Korinth 4:13.

9, 10. (a) Chon mini’ e rayog ni ngam tabab i weliy e tin ni kam nang ngorad? (b) Susun ni mang e ngam rin’ ni faanra ga baadag ni ngam un ko Pi Mich Rok Jehovah ko machib?

⁹ Sana ga ra tabab ni ngam weliy e tin ni kam fil ngak girdien e tabinaw rom, ara pi tafager rom, ara girdi’ nu lan binaw ara girdi’ u tabon e maruwel. Munmun ma sana ga ra adag ni ngam un ngak e Pi Mich Rok Jehovah ko machib. Faanra ga baadag ni ngam un ngorad ma ga non ngak e en ni be fil e Bible ngom. Ma faanra ke bung rogom ni ngam un ko machib ma en ni ma fil e Bible ngom e ngam nonad l’agruw e piilal ko ulung.

 ¹⁰ Aram rogon ni ga ra nang boch e piilal ni Kristiano ni yad ma ayuweg e pi saf rok Got. (Acts 20:28; 1 Peter 5:2, 3) Ma faanra ke guy e piin piilal ni ke mich u wan’um e thin nu Bible, ma ke puluw e ngongol rom ko pi motochiyel rok Got, ma riyul’ ni ga baadag ni ngam mang reb e Mich Rok Jehovah, ma aram e rayog ni ngam un ko machib ni yugu aram rogon ndawor mu un ko taufe.

11. Mang boch ban’en nthingar mu thilyeg ko ngongol rom u m’on ni ngam un ko machib?

¹¹ U m’on ni ngam un ko machib ma bay boch ban’en ni thingar mu thilyeg ko ngongol rom. Faanra bay boch ban’en nib kireb ni ga ma rin’ nib mith ma thingar mu digey. Ma u m’on ni nga mog ni ngam un ko machib ma thingar mu tal ni dab kum rin’ boch e denen nib ubchiya’ ni bod e ngongol ko darngal, nge chingaw, ma dab kum fanay boch e falay ni kireb.​—Mu beeg e 1 Korinth 6:9, 10; Galatia 5:19-21.

12. Mang fan nib t’uf ni ngan kalngan’uy?

¹² Ku bay boch ban’en ni thingar mu rin’ u m’on ni ngam un ko taufe. I gaar apostal Peter: “Ere mu kolgad ngan’med mi gimed pi’ keru’med ko denen mi gimed chel ngak Got, nge yog ni chuweg e denen romed.” (Acts 3:19) Kalngan’ e be yip’ fan ni kam dabuy e kireb ni kam rin’. Ere, ba puluw ni nge kal be’ ngan’ ni faanra be un ko ngongol nib kireb. Machane mus ni faanra der un be’ ko ngongol nib kireb maku thingari kalngan’. Mang fan? Ya urngin e girdi’ ni yad ba tadenen mab t’uf ni nge n’ag Got fan e denen rorad. (Roma 3:23; 5:12) U m’on ni ngam fil e Bible ma dam nang e pi n’en nib m’agan’ Got ngay, aram fan ni um rin’ e tin nib kireb. Ma chiney ni kam nang e ba t’uf ni ngam kalngan’um.

13. Mang e be yip’ fan ni ngan pi’ keruuy ko kireb?

 ¹³ Tomuren ni ke kal be’ ngan’ ma thingari ‘pi’ keru’ ko denen ni be rin’ me chel ngak Got.’ Ere, gathi kemus ni nge kireban’um ko kireb ni kam rin’, ya thingar mu pag e ngongol nib kireb ma ga turguy u wan’um ni ngaum rin’ e tin nib mat’aw. Ba t’uf ni ngam kalngan’um ma ga pi’ keruum ko kireb u m’on ni ngam un ko taufe.

14. Mang e thingar mu rin’ u m’on ni ngam un ko taufe?

¹⁴ Ku bay ban’en nib ga’ fan ni ngam rin’ u m’on ni ngam un ko taufe. Thingar mu ognagem ngak Jehovah Got.

15, 16. Mang e be yip’ fan ni ngam ognagem ngak Got? Mang fan ni nge ognag be’ ir ngak Got?

¹⁵ Nap’an ni ga ra ognagem ngak Jehovah Got u daken e meybil, ma aram e kam micheg ni kemus ni yigoo ir e ngam pigpig ngak ni manemus. Mang fan nra adag be’ ni nge ognag ir ngak Got? Susun ni faanra be lemnag be’ nib moon ni nge un ko mabgol ma thingari nang ko uw rarogon fare pin ni nge leay. Ra yoor ban’en ni nang u murung’agen e re pin nem me guy fel’ngin, ma aram e ra adag. Munmun ma ra yog ngak fare pin ni ngar mabgolgow. Manang fare moon nnap’an nra un ko mabgol ma ra yoor ban’en ni nge milfan ngak ni nge rin’. Machane, adag rok ngak fare pin e ir e ra k’aring ni nge rin’ e re n’ey.

¹⁶ Nap’an ni ga ra fil murung’agen Jehovah ma ra t’uf Jehovah rom, ma re t’ufeg nem e ra k’aringem ni ngam pigpig ngak ni yugu demtrug rogon. Be’ ni baadag ni nge folwok rok Jesus Kristus ni Fak Got e “thingari pagtalin ir” ara nge pag fan. (Mark 8:34) Ra ngad paged fadad ma aram e nge m’on e tirok Got u wan’dad me tomur  e tirodad. Ere, u m’on ni ngam un ko taufe ma nge m’on u wan’um e tin nib m’agan’ Jehovah Got ngay.​—Mu beeg e 1 Peter 4:2.

17. Mang fan ni boch e girdi’ e dubrad ni ngar ognaged yad ngak Got?

¹⁷ Boch e girdi’ e dubrad ni ngar ognaged yad ku Jehovah ni bochan e yad be rus nri de yag rorad e tin ni kar micheged. Sana yad be rus nri pufthinnagrad Got ni bochan e de yag rorad e tin ni kar ognaged yad ngay. Ere, yad ma lemnag ni kab fel’ ndab ra ognaged yad ngak Got.

18. Mang e ra k’aringem ni ngam ognagem ngak Jehovah?

¹⁸ Nap’an ni ga ra fil murung’agen Jehovah me t’uf rom, ma re t’ufeg nem e ra k’aringem ni ngam ognagem ngak Got ma ga rin’ e tin nrayog rom ni ngam fol ko tin nib m’agan’ ngay. (Eklesiastes 5:4) Ma tomuren ni kam ognagem ngak ma dabisiy ni ga ra adag ni ngam ‘ngongol nrogon ni baadag Somol, mu um rin’ e tin nib m’agan’ ngay ni gubin ngiyal’.’ (Kolose 1:10) Ere, faanra ba t’uf Got rom ma dab mu lemnag ni kaygi mo’maw’ ni ngam rin’ e tin nib m’agan’ ngay. Dabisiy ni taareb lanin’mew apostal John ni ke gaar: “Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw’.”​—1 John 5:3.

19. Mang fan ndab mu rus ni ngam ognagem ngak Got?

¹⁹ De t’uf ni ngam flont mfin mu ognagem ngak Got. Manang Jehovah e tin nrayog rom ma dabi lemnag ni ngam rin’ e tin ni dabiyog rom. (Psalm 103:14) Baadag ni ngam rin’ e tin ni kam micheg, ma ra ayuwegem me pi’ gelngim. (Mu beeg e Isaiah 41:10.) Rayog ni nge  mich u wan’um ni faanra pagan’um ngak Jehovah u polo’ i lanin’um ma ra “dag ngom e bin nib mat’aw e kanawo’.”​—Proverbs 3:5, 6.

20. Mang fan nib t’uf ni nge nang e girdi’ ni yoor ni kam ognagem ngak Jehovah?

²⁰ Ga ra lemnag e pi n’en ni kad weliyed, ma rayog ni nge ayuwegem ni ngam ognagem ngak Jehovah u daken e meybil. Machane urngin e girdi’ nib t’uf Got  rorad e ku thingar rogned ‘nga dap’i l’ugunrad ni aram e kar thapgad.’ (Roma 10:10) Uw rogon ni ngam rin’ e re n’ey?

21, 22. Uw rogon ni ga ra dag ngak e girdi’ ni yoor ni ke michan’um?

²¹ Nga mog ngak e en ni ma yarmiy e piin piilal ko ulung ni ga baadag ni ngam un ko taufe. Ma ir e ra dugliy boch e piilal ko ulung ni ngar fithed boch e deer ngom u murung’agen e pi kenggin e machib nu Bible.  Faanra ke guy e piin piilal ni ke bung rogom nrayog ni ngam un ko taufe, ma rayog ni ngam un ko taufe u nap’an e assembly. * Bay reb e welthin ni yima pi’ ni fan ngak e piin yad ra un ko taufe u nap’an e assembly. Ma en nra pi’ fare welthin e ra fith l’agruw e deer ngak e piin ni yad ra un ko taufe ma aram e yad ‘ra yog nga dap’i l’ugunrad’ ni ke mich u wun’rad.

²² Taufe e ra tamilangnag ngak urngin e girdi’ ni kam ognagem ngak Got ma aram e kam mang reb e Mich Rok Jehovah. Piin ni ngar uned ko taufe e yima lithagrad nga ar ni aram e pow riy ni kar ognaged yad ngak Jehovah.

23. Mang fan fare thin ni ngan taufenag be’ “nga fithingan e Chitamangiy nge Fak nge gelngin Got nib thothup”?

²³ I yog Jesus ni yira taufenag pi gachalpen “nga fithingan e Chitamangiy nge Fak nge [“gelngin Got nib thothup,” NW].” (Matthew 28:19) Fan e re thin ney e en nra un ko taufe e ke tayfan e liw rok Jehovah Got nge Jesus Kristus. (Psalm 83:18; Matthew 28:18) Maku be tayfan gelngin Got nib thothup nge rogon ni ma maruwel.​—Galatia 5:22, 23; 2 Peter 1:21.

24, 25. (a) Mang e be yip’ fan e taufe? (b) Mang deer e gad ra weliy e fulweg riy?

²⁴ Machane taufe e gathi kemus ni ngan lithag be’ nga ar. Ya ku be yip’ fan ban’en nib ga’ fan. Nap’an ni ran lithagem nga ar ma aram e be yip’ fan ni kam digey e bin ni kakrom e pangin. Ma nap’an ni ran foregem nga lang ma aram e kam beech u mit Got ni ngam  rin’ e tin nib m’agan’ ngay. Ku dab mu pagtalin ni kam ognagem ni ngam rin’ e maruwel rok Jehovah Got ma gathi maruwel ko girdi’. Nap’an ni kam ognagem ngak Got, kam un ko taufe, ma aram e kari fel’ thilmew Got.​—Psalm 25:14.

²⁵ Faanra kam un ko taufe ma gathi aram e ke yag e yafas ni manemus ngom. I gaar Jesus: “En nra athamgil nge mada’ ko tomur e ra yog e yafos ngak.” (Matthew 24:13) Taufe e aram tabolngin e kanawo’ ni nge yag e yafas ni manemus ngom. Machane, uw rogon ni ngaum par ni gab t’uf rok Got? Fulweg ko re deer ney e bay ko bin tomur e guruy.