1. ¿Baʼaxten tu kʼáataj u yokjaʼ utúul jalaʼach etiopíai?

«JEʼEL jaʼaʼ. ¿Jeʼel wa u páajtal in wokjaʼeʼ?» Bey tu yaʼalil utúul jalaʼach etiopíai kuxlaj tu kʼiinil le apostoloʼoboʼ. Felipe, utúul u disipulo Cristoeʼ, yéetel u yáantaj le Kiliʼich Tsʼíiboʼoboʼ, tu yeʼesaj tiʼ le máakaʼ Jesuseʼ letiʼ le Mesías aʼalaʼan u taaloʼ. Le etiopíailaʼ jach kiʼimakchaj u yóol yoʼolal le baʼax tu kanoʼ, ka tu kʼáataj u yokjaʼ (Beetaʼanoʼob 8:26-36).

2. ¿Baʼaxten unaj a tuklik kʼaʼabéet a wokjaʼ?

 ² Wa utúul j-jaajkunaj tiʼ Jéeoba tsʼoʼok u yáantkech a xok yéetel a naʼat tubeel u yáax diecisiete xookiloʼob le libroaʼ, maʼ xaaneʼ jeʼel u taaktal xan a waʼalikeʼ: «Kux túun teen, ¿jeʼel wa u páajtal in wokjaʼeʼ?». Jeʼex tsʼoʼok a kankoʼ, le Bibliaoʼ ku yaʼalikeʼ wíinikoʼobeʼ yaan u kajtaloʼob utiaʼal mantatsʼ teʼ Paraísooʼ (Lucas 23:43; Apocalipsis 21:3, 4). Tsʼoʼok xan a kanik bix yanik le kimenoʼoboʼ yéetel tsʼoʼok a kanik yaan u kʼuchul u kʼiinil u líiʼsaʼaloʼob (Eclesiastés 9:5; Juan 5:28, 29). Maʼ xaaneʼ tsʼoʼok u chan máan kʼiin káajak a muchʼkaba yéetel u j-jaajkunajoʼob Jéeoba yéetel tsʼoʼok a wilik tiʼ letiʼob yaan u jaajil (Juan 13:35). Maʼ xaan xaneʼ tsʼoʼok u káajal a wilik Jéeoba bey a amigoeʼ.

3. 1) ¿Baʼax tu yaʼalaj Jesús tiʼ u disipuloʼob? 2) ¿Bix le okjaʼ ku kʼaʼamal tumen Diosoʼ?

³ ¿Bix jeʼel a weʼesik jach tu jaajil taak a meyajtik Dioseʼ? Jesuseʼ tu yaʼalaj tiʼ u disipuloʼob: «Xeeneʼex túun tiʼ u kajnáaliloʼob tuláakal kaajoʼobeʼ ka a beeteʼexoʼob j-kaambaloʼob; yéetel tsʼaʼex u yokjaʼob» (Mateo 28:19). Utiaʼal u yeʼesik kʼaʼabéet k-okjaʼeʼ Jesuseʼ okjaʼanaj xan. Baʼaleʼ maʼ chéen titsʼbil wa yalbil beetaʼabik jaʼ tu pooliʼ (Mateo 3:16). Le tʼaan ich griego ku suʼutul okjaʼoʼ u kʼáat yaʼal kʼaʼabéet u láaj búulul u wíinklil máak. Le beetikeʼ, ken okjaʼanak máakeʼ kʼaʼabéet u láaj búulul u wíinklil utiaʼal ka kʼaʼamak u yokjaʼ tumen Dios.

4. ¿Baʼax ku yeʼesik máak ken okjaʼanak?

⁴ Tuláakal máax u kʼáat u beetuba u amigo Jéeobaeʼ kʼaʼabéet u yokjaʼ. Ken okjaʼanak máakeʼ, táan u yeʼesik tu táan u maasil u kʼáat u meyajt Dios yéetel utstutʼaan u beetik baʼax u kʼáat (Salmo 40:7, 8). Baʼaleʼ utiaʼal u yokjaʼ máakeʼ yaan baʼaxoʼob kʼaʼabéet u yáax beetik.

5. 1) ¿Baʼax yáax kʼaʼabéet utiaʼal a wokjaʼ? 2) ¿Bix u yáantkoʼon le muchʼtáambaloʼoboʼ?

⁵ Yáax baʼax kʼaʼabéeteʼ a kaambal tiʼ Jéeoba yéetel tiʼ  Jesucristo. Lelaʼ tsʼoʼok u káajal a beetik ikil a kaambal tiʼ le Bibliaoʼ (Juan 17:3). Baʼaleʼ láayliʼ jeʼel u páajtal a maas kaambaleʼ. Máax u kʼáat u meyajt Dios jeʼex utstutʼaaneʼ u kʼáat u «kʼaj [óolt] maʼalob baʼax u kʼáat letiʼ» (Colosailoʼob 1:9). Le muchʼtáambaloʼob ku beetik u j-jaajkunajoʼob Jéeobaoʼ jeʼel u yáantkechoʼob utiaʼal ka yanaktech le kʼaj óolalaʼ. Le beetik maʼ unaj a peʼertikoʼobiʼ (Hebreob 10:24, 25). Wa ku suuktal a bin teʼ muchʼtáambaloʼobaʼ, yaan a maas kʼaj óoltik Dios.

6. ¿Baʼaxoʼob unaj a wojéeltik tiʼ le Biblia utiaʼal ka páatak a wokjaʼoʼ?

⁶ Utiaʼal ka páatak a wokjaʼeʼ maʼ kʼaʼabéet ka láaj kan tuláakal baʼax ku yaʼalik le Bibliaoʼ. Baʼaleʼ kʼaʼabéet a kʼaʼajskeʼ le etiopíaileʼ, kex yaan u kaʼansajiloʼob le Biblia u kʼaj óoloʼ, kʼaʼabéetchaj u yáantaʼal utiaʼal u naʼatik tubeel (Beetaʼanoʼob 8:30, 31). Teech xaneʼ, láayliʼ yaʼab baʼaloʼob ku binetik a kanikeʼ. U jaajileʼ, mix bikʼin kun xuʼulul a kaambal tiʼ Dios (Eclesiastés 3:11). Baʼaleʼ utiaʼal ka okjaʼanakecheʼ kʼaʼabéet a kanik yéetel a kʼamik le kaʼansajoʼob jach kʼaʼabéet u yojéeltaʼaloʼob tiʼ le Bibliaoʼ (Hebreob 5:12). Ichiloʼobeʼ tiaʼan bix yanik le kimenoʼoboʼ, baʼax u kʼáat u yaʼal u kʼaabaʼ Dios yéetel baʼaxoʼob ken u béeykunt u Reino.

7. ¿Baʼax unaj u yantaltech yoʼolal baʼax tsʼoʼok a kanik teʼ Bibliaoʼ?

⁷ Baʼaleʼ maʼ chéen unaj k-kanik baʼax ku yaʼalik le Bibliaoʼ, tumen utiaʼal k-kʼaʼamal tumen Dioseʼ kʼaʼabéettoʼon «oksaj óolal» wa fe (Hebreob 11:6). Yaan tiʼ u kajnáaliloʼob u yúuchben kaajil Corintoeʼ ka tu yuʼuboʼob baʼax ku kaʼansik u disipuloʼob Cristoeʼ, «tu yoksaj óoltoʼob» yéetel «okjaʼanajoʼob» (Beetaʼanoʼob 18:8). Bey xan unaj u yúuchul ta wéetel. Le baʼax tsʼoʼok a kanik teʼ Bibliaoʼ unaj u beetik a woksaj óoltik jach tu jaajil tiʼ Dios u taal. Unaj xan a woksaj óoltikeʼ Dioseʼ yaan u béeykuntik tuláakal baʼax u yaʼalmaj yéetel jeʼel u salvarkech yoʼolal u kʼiʼikʼel Jesús tu wekaj t-oʼolaleʼ (Josué 23:14; Beetaʼanoʼob 4:12; 2 Timoteo 3:16, 17).

8. ¿Baʼax kun túulchʼinkech tʼaan tiʼ baʼax tsʼoʼok a kanik?

⁸ Wa jach muʼukʼaʼan a woksaj óolal tiʼ Dioseʼ, yaan a tsʼíiboltik a tsikbaltik baʼax ka kanik (Jeremías 20:9). Yaan a wuʼuyik bey yaan baʼax túulchʼinkech tʼaan tiʼ letiʼeʼ (2 Corintoiloʼob 4:13).

9, 10. 1) ¿Tiʼ máaxoʼob jeʼel u káajal a tsikbaltik baʼax ka kanikeʼ? 2) ¿Baʼax kʼaʼabéet a beetik wa a kʼáat jóokʼol kʼaʼaytaj yéetel u j-jaajkunajoʼob Jéeoba?

⁹ Utiaʼal a káajbaleʼ jeʼel u páajtal a tsikbaltik tiʼ a láakʼoʼob, tiʼ a amigoʼob, tiʼ a vecinoʼob yéetel tiʼ a wéet meyajoʼob baʼax táan a kanikeʼ, baʼaleʼ il maʼ beetik u kʼuuxiloʼob. Ken máanak kʼiineʼ maʼ xaaneʼ yaan u taaktal a jóokʼol kʼaʼaytaj wa predicar yéetel u j-jaajkunajoʼob Jéeoba. Ken taakak a beetkeʼ tʼaanen yéetel le máax kaʼanskechoʼ. Wa letiʼ ku yilik jeʼel u páajtal a jóokʼol kʼaʼaytajeʼ, yaan u yaʼalaʼal tiʼ kaʼatúul nuxiboʼob wa ancianoʼob tiʼ le múuchʼulil ka tʼaanakoʼob ta wéeteleʼexoʼ.

¹⁰ Lelaʼ yaan u yáantkech a maas kʼaj óolt le nuxiboʼob nuʼuktik le múuchʼuliloʼ (Beetaʼanoʼob 20:28; 1 Pedro 5:2, 3). Letiʼobeʼ yaan u yilkoʼob wa ka naʼatik tubeel le kaʼansajoʼob jach kʼaʼabéet u yojéeltaʼaloʼob tiʼ le Bibliaoʼ yéetel wa ka kʼamikoʼob; yaan xan u yilkoʼob wa táan a kuxtal jeʼex u yaʼalik Diosoʼ yéetel wa jach tu jaajil a kʼáat a beetaba j-jaajkunaj tiʼ Jéeoba. Wa beyoʼ, kex maʼ okjaʼanakecheʼ, yaan u yaʼalkoʼobtech jeʼel u páajtal a jóokʼol kʼaʼaytaj yéetel le sukuʼunoʼoboʼ.

11. Maʼ xaaneʼ, ¿baʼaxoʼob unaj u pʼatik le máaxoʼob taak u jóoʼloʼob kʼaʼaytajoʼ?

¹¹ Yaan kʼiin xaneʼ le nuxiboʼoboʼ ku yilkoʼobeʼ le máax taak u jóokʼol kʼaʼaytajoʼ yaan baʼaxoʼob ku binetik tiʼ. Maʼ xaaneʼ unaj u pʼatik upʼéel baʼal ku beetik maʼ u yaʼalmiʼ. Le beetikeʼ táanil tiʼ a waʼalik a kʼáat jóokʼol kʼaʼaytaj, kex maʼ okjaʼanakecheʼ, kʼaʼabéet a pʼatik jeʼel baʼalak maʼ maʼalob táan a beetikeʼ. Ichiloʼobeʼ tiaʼan le káaltaloʼ, le drogaʼoboʼ  yéetel le baʼaloʼob subtsiltak wa kʼaastakoʼ (1 Corintoiloʼob 6:9, 10; Galaciailoʼob 5:19-21).

12. ¿Baʼaxten kʼaʼabéet u kʼexik u tuukul máak yéetel u yaatal u yóol yoʼolal baʼax u beetmaj?

¹² Yaan uláakʼ baʼaxoʼob kʼaʼabéet a beetik táanil tiʼ u páajtal a wokjaʼ. Le apóstol Pedrooʼ tu yaʼalaj: «Kʼex a tuukuleʼex yéetel suuneneʼex tiʼ Jajal Dios, utiaʼal ka lukʼsaʼak a kʼebaneʼex» (Beetaʼanoʼob 3:19). Máax tu jaajil tsʼoʼok u kʼexik u tuukuleʼ ku yaatal u yóol yoʼolal baʼaxoʼob u beetmaj. Baʼaleʼ maʼ chéen le máaxoʼob u bismoʼob upʼéel kʼaakʼas kuxtal unaj u yaatal u yóoloʼobiʼ, tak le máaxoʼob ku yilaʼal bey táan u biskoʼob upʼéel utsul kuxtaleʼ. ¿Baʼaxten? Tumen láaj kʼeban wíinikoʼon yéetel ku kʼaʼabéettal ka perdonartaʼakoʼon tumen Dios (Romailoʼob 3:23; 5:12). Maʼiliʼ káajak a xokik le Bibliaoʼ maʼ a wojel kaʼach baʼax u kʼáat Diosiʼ. Le oʼolaleʼ, ¿jeʼel wa u páajtal a waʼalik táan kaʼach a bisik upʼéel kuxtal jach jeʼex u kʼáatoʼ? Maʼatan. Lelaʼ ku yeʼesikeʼ kʼaʼabéet u yaatal u yóol máak yoʼolal baʼaxoʼob u beetmaj kaʼachi.

13. ¿Baʼax uláakʼ unaj u beetik máak utiaʼal ka páatak u yokjaʼ?

¹³ Ken tsʼoʼokok u kʼexik u tuukul máakeʼ kʼaʼabéet u pʼatik baʼaxoʼob maʼ maʼalobtak ku beetikiʼ. K-ilik túuneʼ maʼ chéen unaj u yaatal u yóol máak yoʼolal baʼaxoʼob u beetmajiʼ, kʼaʼabéet u pʼatik le kuxtal ku bisik kaʼachoʼ. Kʼaʼabéet u chʼaʼatukultik u káajal u beetik baʼax maʼalob. Utiaʼal túun u yokjaʼ máakeʼ yáax kʼaʼabéet u kʼexik u tuukul yéetel u pʼatik u beetik le baʼaloʼob maʼ maʼalobtakoʼ.

14. ¿Baʼax uláakʼ jach kʼaʼabéet?

¹⁴ Yaan uláakʼ baʼax jach kʼaʼabéet u beetik máak utiaʼal ka páatak u yokjaʼ: u kʼubik u kuxtal tiʼ Jéeoba Dios.

15, 16. ¿Bix u kʼubik u kuxtal máak tiʼ Dios yéetel baʼax kun péekskoʼon k-beete?

¹⁵ Máakeʼ ku kʼubik u kuxtal tiʼ Dios ichil upʼéel payalchiʼ  wa oración. Ichil le payalchiʼaʼ máakeʼ yéetel u jaajil u yóoleʼ ku yaʼalik tiʼ Jéeoba yaan u meyajtik chéen letiʼ utiaʼal mantatsʼ (Deuteronomio 6:15). ¿Baʼaxten túun unaj u beetik máak upʼéel nojoch compromiso jeʼex lelaʼ? Tukulteʼ utúul xiʼipaleʼ ku yaʼalik tiʼ utúul chʼúupal u kʼáat u maas kʼaj óolte. Jeʼex u bin u maas kʼaj óoltik yéetel u yilik u jatsʼuts modoseʼ, bey u bin u maas utstal tu yich tak ken u yaʼal tiʼ le chʼúupal u kʼáat tsʼoʼokol u beel tu yéeteloʼ. Kex ken tsʼoʼokok u beel yaan u yantal maas meyaj tiʼeʼ, baʼaleʼ u yaabilaj yoʼolal le chʼúupalaʼ le kun péeksik u kʼáat u kʼab.

¹⁶ Le yaabilaj xan k-uʼuyik tu yoʼolal Jéeoba tumen tsʼoʼok k-kʼaj óoltikeʼ, le péekskoʼon k-beet tuláakal baʼax u kʼáat. Le máax u kʼáat kuxtal jeʼex Jesucristo, u Hijo Dioseʼ, maʼ unaj u yaabilkubaiʼ (Marcos 8:34). Lelaʼ u kʼáat u yaʼaleʼ, ichil k-kuxtaleʼ, mantatsʼ yáax kʼaʼabéet k-beetik baʼax u kʼáat Dios. Táanil túun tiʼ a wokjaʼeʼ, ku páaʼtaʼal tsʼokaʼan a tsʼáaik ta tuukul a beetik baʼax u kʼáat Dios utiaʼal tuláakal a kuxtal (1 Pedro 4:2).

17. ¿Baʼaxten yaʼab máakeʼ sajak u kʼub u kuxtal tiʼ Dios?

¹⁷ Yaʼab máaxeʼ sajak u kʼub u kuxtal tiʼ Dios, tumen upʼéel jach nojoch compromiso. Maʼ xaaneʼ saajkoʼob tumen yaan u kʼubkoʼob cuenta tiʼ Jéeoba, yoʼolal tsʼoʼok u kʼubkuba u meyajtoʼob. Maʼ xaaneʼ ku tuklikoʼob jeʼel u beetkoʼob upʼéel baʼal maʼ utstutʼaan Jéeobaeʼ, le beetik ku tuklikoʼob maas maʼalob maʼ u kʼubik u kuxtaloʼob tiʼ letiʼ.

18. ¿Baʼax kun péekskech a kʼub a kuxtal tiʼ Dios?

¹⁸ Wa nojoch a yaabilaj tu yoʼolal Jéeobaeʼ, yaan u túulchʼinkech a kʼub a kuxtal tiʼ letiʼ yéetel yaan u yáantkech ka a tsʼáa a wóol kuxtal jeʼex a waʼalmil tiʼoʼ (Eclesiastés 5:4). Ken tsʼoʼokok a kʼubkaba tiʼ Dioseʼ, techeʼ unaj a wilik a kuxtal «jeʼel bix unaj u kuxtaloʼob le máaxoʼob utiaʼaloʼob Yuumtsiloʼ» (Colosailoʼob 1:10). Baʼaleʼ a yaabilaj yoʼolal Dioseʼ yaan u yáantkech utiaʼal maʼ a wilik bey upʼéel baʼal jach talam  a wuʼuyik u tʼaaneʼ. Yaan a wilik jaaj le baʼax tu yaʼalaj le apóstol Juanaʼ: «U yaabiltaʼal Jajal Dioseʼ u yuʼubaj tʼantaʼal u [leyoʼob]; yéetel u [leyoʼobeʼ] maʼ talamoʼobiʼ» (1 Juan 5:3).

19. ¿Baʼaxten maʼ unaj a chʼaʼik saajkil a kʼub a kuxtal tiʼ Diosiʼ?

¹⁹ Dioseʼ maʼ tu páaʼtik ka k-beet tuláakal baʼal tubeel ken tsʼoʼokok k-kʼubik kuxtal tiʼ letiʼ. Jéeobaeʼ u yojel baʼax ku páajtal k-beetik yéetel baʼax maʼ tu páajtal k-beetik, mix utéen jeʼel u kʼáatiktoʼon upʼéel baʼal maʼ tu páajtal k-beetikeʼ (Salmo 103:14). Letiʼeʼ yaan u yáantkech, tumen u kʼáat ka xiʼiktech utsil (Isaías 41:10). Wa teech ka jach kʼubik a wóol tiʼ Jéeobaeʼ, letiʼeʼ «bíin u bisech tiʼ u tojil bej» (Proverbios 3:5, 6).

20. Ken tsʼoʼokok a kʼubikaba tiʼ Jéeobaeʼ, ¿baʼaxten unaj a tsʼáaik ojéelbil?

²⁰ Maʼ xaaneʼ yoʼolal le baʼax tsʼoʼok k-ilkaʼ, techeʼ ta juunal yanilecheʼ, yaan a waʼalik tiʼ Dios ich payalchiʼ táan a kʼubik a kuxtal tiʼ letiʼ. Baʼaleʼ máaxoʼob jach tu jaajil u yaabiltmoʼob Dioseʼ yaan uláakʼ baʼax kʼaʼabéet u beetkoʼob: «u káant[koʼob]» wa u tsʼáaikoʼob ojéelbil tu táan u maasil u fejoʼob «utiaʼal ka yanak [salvación]» tiʼob (Romailoʼob 10:10). ¿Bix u beetaʼal lelaʼ?

21, 22. ¿Bix jeʼel a káantik wa a tsʼáaik ojéelbil tu táan u maasil a fejeʼ?

 ²¹ Aʼal a kʼáat okjaʼ tiʼ u coordinadori le ancianoʼob teʼ múuchʼulil tuʼux ka binoʼ. Letiʼ túuneʼ yaan u yaʼalik tiʼ jujuntúul nuxiboʼob wa ancianoʼob ka u beetoʼobtech kʼáatchiʼob yaan u yil yéetel le kaʼansajoʼob tiʼ le Biblia tsʼoʼok a kanikoʼ. Le sukuʼunoʼobaʼ wa ku yilkoʼob jeʼel u béeytal a wokjaʼeʼ, yaan u yaʼalkoʼobtech jeʼel u páajtal a beetik tuláakʼ noj muchʼtáambal wa asamblea kun beetbileʼ. * U suukileʼ, táanil tiʼ u yúuchul le okjaʼoʼ, ku tsoʼolol u nuʼuk tiʼ le máaxoʼob kun okjaʼoboʼ. Tu taal u tsʼoʼokbal le tsolnuʼukaʼ, le máax ku tʼaanoʼ ku beetik kaʼapʼéel kʼáatchiʼob tiʼ le máaxoʼob kun okjaʼoʼ, letiʼob túuneʼ ku kʼaʼam núukikoʼob le kʼáatchiʼobaʼ. Bey u káantkoʼob wa u tsʼáaikoʼob ojéelbil tu táan u maasil u fejoʼoboʼ.

²² Ken okjaʼanakecheʼ ka weʼesik tiʼ u maasil tsʼoʼok a kʼubik a kuxtal tiʼ Dios yéetel u j-jaajkunajech Jéeoba bejlaʼeʼ. Le máaxoʼob kun okjaʼoʼ ku láaj buʼulul u wíinkliloʼob ich jaʼ utiaʼal u yeʼesaʼal tu táan u maasil tsʼoʼok u kʼubikubaʼob tiʼ Jéeoba.

23. ¿Baʼax u kʼáat u yaʼal u yokjaʼ máak «tu kʼaabaʼ le Taataoʼ, le Paaloʼ yéetel le Kiliʼich Pixanoʼ»?

²³ Jesuseʼ tu yaʼaleʼ máaxoʼob kun oksaj óoltikeʼ unaj u yokjaʼob «tu kʼaabaʼ le Taataoʼ, le Paaloʼ yéetel le Kiliʼich Pixan» wa espíritu santooʼ (Mateo 28:19). Lelaʼ u kʼáat u yaʼaleʼ máaxoʼob kun okjaʼeʼ ku yuʼubkoʼob u tʼaan Jéeoba yéetel Cristo tumen ku kʼamkoʼob le nojoch páajtalil yantiʼoboʼ (Salmo 83:18; Mateo 28:18). Ku kʼamkoʼob xaneʼ le kiliʼich pixanoʼ letiʼe muukʼ ku meyaj tiʼ Dios utiaʼal u beetik baʼax u kʼáatoʼ (Galaciailoʼob 5:22, 23; 2 Pedro 1:21).

24, 25. 1) ¿Baʼax u kʼáat u yaʼal le okjaʼoʼ? 2) ¿Baʼax kʼáatchiʼi unaj k-núukik?

²⁴ Ken okjaʼanak máakeʼ ku láaj búulul u wíinklil. Lelaʼ  jach nojoch baʼax u kʼáat u yaʼaleʼ. Ken láaj búulkech ichil le jaʼoʼ u kʼáat u yaʼaleʼ ka «kíimil» tiʼ bix a kuxtal kaʼachiʼ. Ken jóoʼkech ichil le jaʼoʼ u kʼáat u yaʼaleʼ ku káajal a kuxtal utiaʼal a beetik baʼax u kʼáat Dios. Mix utéen unaj a tuʼubsikeʼ techeʼ tsʼoʼok a kʼubikaba a meyajt Jéeoba Dios, u Noj Jalaʼachil tuláakal baʼal, maʼ chéen wíinikoʼobiʼ. Ken a kʼub a kuxtal tiʼ Dios yéetel ken okjaʼanakecheʼ tiʼ ka kʼuchul a jach amigotaba tu yéeteliʼ (Salmo 25:14).

²⁵ Baʼaleʼ ken okjaʼanak máakeʼ maʼ u kʼáat u yaʼal tsʼoʼok u salvarkubaiʼ. Le apóstol Pablooʼ tu tsʼíibtaj: «Tsʼáa a wóoleʼex tiʼ a [salvacioneʼex]» (Filiposiloʼob 2:12). Le okjaʼoʼ chéen u káajbal k-kaxtik le salvacionoʼ. Le oʼolal maʼalob ka k-beet le kʼáatchiʼaʼ: «¿Bix jeʼel k-beetik utiaʼal maʼ k-náachtal tiʼ Dios utiaʼal ka pʼáatkoʼon ichil u yaabilajeʼ?». U tsʼook xookil le libroaʼ yaan u yeʼesiktoʼon bixi.