1. Tipagine gu banyaki nangia boro Etiopia asanahe ti ni tipa bapatiza?

“MO BÍ, ime du re! Gine naza re ti bapatiza?” Gure nga gu sanahe banyaki ni boro Etiopia asanaha rogo bambata sa kama agarã. Kristano nangia Firipo ayugu gupai fuko nga Yesu nangia gu Masiya i agumba paye ko. Wa gupai gu banyaki re awirikihe rogo Ziazia Kekeapai azi ngbaduko, ko amangipai nibasa. Ko aya fu Firipo ko naida ka zio bapatiza.—Amokedi 8:26-36.

2. Tipagine si aida mo berẽpa bapatiza ti ni nyanyaki?

² Ka si du nga mo ima wirika agu apai du rogo agu akapita nga ga gi buku re du kusayo na aDezire Yekova, si ngbaangba mo sana tiro nga, ‘Gine naza re ti bapatiza?’ Awere, mo ima wirikapai tipa gu kidohe nga ga Ziazia Kekeapai du tipa nyenye unga rogo paradizo auru kpotosende. (Ruka 23:43; Yugoti 21:3, 4) Mo ima wirikapai a tipa gupai du tipa kpikpi aboro na pa zingabekpio. (Batungusipai 9:5; Yoane 5:28, 29) Isoke mo  avura digo nikoditiro na aDezire Yekova ba gayo adunguratise yo kini bi wai i amanga ndikidi irisombori. (Yoane 13:35) Na si nawira mo ima tona ka sonosa wene pagume na Yekova Mbori, nga gu banyanyakipa pai si aida mo mangihe.

3. (a) Yesu arugu apefuoko i nimangi wai? (b) Wai i naamanga ndikidi bapatiza nga ga ime?

³ Wai rengbe mo ka yugo gupai nga mo naida ka mangasunge Mbori? Yesu aya fu apefuoko: ‘Oni ndu ki sa arikaaboro dunduko ni abawiriki, kini bapatizi yo.’ (Matayo 28:19) Yesu nitiko namoi kpiapai ni zioko bapatiza. I aamigidongo ko amigido na ime watadu ka uka ime kuriko yo te. (Matayo 3:16) Gu fugo nga “bapatizi,” si aye ti gu fugo Giriki du rogoyo nga “ka rindosi he kutii ime yo.” Sidu, gu ndikidi bapatiza nga ga aKristano, i namangaha ni rindosiyo boro kutii ime yo ki kusi ní yo.

4. Ginipai gu bapatiza nga ga ime ayugoho?

⁴ Zio bapatiza ime yo nga gupai si aida agu aboro  dunduko naida kadu na wene pagume dagbayo na Yekova Mbori mangihe. Bapatiza nayugo gupai gbaiga nga mo na nyemu ka mangasunge Mbori. Si nayugo gupai nga mo na ngbarago ka manga gupai Yekova akpinyemuhe. (Atambuahe 40:7, 8) Ono tipa mo rẽ tipa bapatiza, apai kinaho si aida mo mangihe.

5. (a) Gini bambatapai si aida boro mangihe tipa ka rẽ tipa bapatiza? (b) Tipagine nyakipa agu adunguratise nga ga aKristano ti ni?

⁵ Mo ima tona ka manga gu bambatapai si aidaha. Wai mo amangaha? Mo namangaha ni dia mo inohe tipa Yekova Mbori na Yesu Kristo rogo wirika mo Ziazia Kekeapai. (Mo gedi Yoane 17:3.) Ono bakere apai kinaho kindi si aida mo wirikihe. Si naida Kristano ‘hi ahi be inopa sangba Mbori.’ (AKorosaio 1:9) Nduge sa agu adunguratise nga ga aDezire Yekova rengbe ka undoro ni bakerehe rogo gi bangiriba re. Si ni nyanyakipa pai mo naandu sa agu adunguratise re. (AEbere 10:24, 25) Nduge sani dedede nika undoro mo ini Mbori.

6. Si naida mo ini Ziazia Kekeapai ki da wai mo kini ru ka rẽ tipa bapatiza?

⁶ Kina rengo du nga, si aidanga mo ini agu apai aino dunduko du rogo Ziazia Kekeapai mbata mo kini ru ka rẽ tipa bapatiza te. Gu banyaki nangia boro Etiopia re aima du na bete inohe, ono si aidi i undoko aundo ko girogo kura apapara Ziazia Kekeapai. (Amokedi 8:30, 31) Wakina gure a, badungu apai kinaho kindi si aida mo wirikihe. Na gupai nga rengo nga, mo nika wirikapai tipa Mbori nyeanye kindi. (Batungusipai 3:11) Ono mbata fu mo zi bapatiza, si naida mo ini gu bangua ayugopai aino nga ga Ziazia Kekeapai na ki idi kutini. (AEbere 5:12) Bete gu bangua ayugopai re nga,  gu rengo du tipa kpikpi aboro na wai nyakipa rimo Mbori na gako Kindo.

7. Si naida gamo wirika Ziazia Kekeapai sa ro mo mangi wai?

⁷ Si naida mo idi aida kuti agu apai mo nawirikihe, bambiko “zanga idapase ga boro pai arengba nga na ngba bangiri Mbori te.” (AEbere 11:6) Ziazia Kekeapai naya furani wẽ ho agu aboro naadu rogo gu gbata nangia Korinda agi gu pangbanga ni nga ga aKristano, i ‘aidipaha, i ki bapatizi yo.’ (Amokedi 18:8) Wakina gure a, si naida agu apai mo nawirikihe rogo Ziazia Kekeapai sa ro mo du na idapase kuti Ziazia Kekeapai ya si nga Sangba Mbori. Si naida si sa ro a mo du na idapase kuti agu akidohe nga ga Mbori na kuti gu motumo nga ga Yesu nga gu nabatasa rani.—Yosua 23:14; Amokedi 4:12; 2 Timoteo 3:16, 17.

8. Ginipai nika fõngbaduroyo mo gumba agu apai mo nawirikihe fu kura aboro?

⁸ Wa gamo idapase nikaa sona ngbaduroyo, mo nika bihe nga mo arengbanga ka onga aonga zanga gumba agu apai mo nawirikihe rogo Ziazia Kekeapai fu aboro te. (Yeremaya 20:9) Nyemu fura na aboro tipa ga Mbori Kindo na gako aringbisapai nika du ngbaduroyo ni bakerehe gbe.—Mo gedi 2 AKorindo 4:13.

9, 10. (a) Ada rengbe mo ka tona gumba gu pangbanga nga ga Ziazia Kekeapai fuyo? (b) Ka mo aida ka tona tungusapai na aDezire Yekova, ginipai si aida mo mangihe?

⁹ Mo rengbe ka tona gumba agu apai mo nawirikihe fu agumero, abakureamo, gamo amurakporo, na gamo abadiasunge. Si naida mo nimangihe wo ni irisa. Fuo gure, mo nika bihe nga si naida mo kodi tiro akoda na aDezire Yekova tipa kaa manga gu sunge tungusapai  i naamangaha. Ho mo nika du ni na nyemu mangaha wo, mo ki gumbaha nibasa fu gu Dezire Yekova ninaaye fuoro tipa wirika Ziazia Kekeapai. Ka ní bihe nga mo rẽarẽ tipa kaa tungusapai na aDezire Yekova, i nika manga mbakadapai tipa abaakumba ue nga ga dungurati yo sungu na mo gbiati gu boro nayugo Ziazia Kekeapai foro.

¹⁰ Gipai re nika undoro aundo mo inidi tiro a na kura abaakumba, nga aguyo nambuti ga Mbori rimbasa akandoro. (Amokedi 20:28; 1 Petero 5:2, 3) Ka agu abaakumba re bihe nga mo ima giarogo gu bangua ayugopai nga ga Ziazia Kekeapai, mo naraka ringbisihe kuti ga Mbori arugute, na mo na nyemu gupai nirengo nga kadu ni Dezire Yekova, i nika gumbaha agumba foro nga mo ima rẽ kaa ta na tungusa wene pangbanga na ga Mbori aboro ni gu batungusipai ata ziongo bapatiza ya.

11. Gini ngbatunga aˈariapai duho si aida boro mangihe amanga mbata ní kini ka rẽ kadu ni batungusipai?

¹¹ Ono abaakumba rengbe ka bi gupai nga si naida mo mangi ariapai amanga rogo gamo raka na gamo sino mangaapai tipa ka rẽ kadu ni batungusipai. Gere nakoda gupai nga mo mbu gu gbegberẽ mangaapai mo amangaha, zavura gu aboro ainongo paha ya. Sidu tie, mbata fu mo sanahe tipa kadu ni batungusipai, si aidanga kere aingapai duho kuriro te, wa angbatunga gu nga mo namanga wasiwasi kodaba, kini mbiri buda ni kerehe, watadu kini di kura kere ahe, wa gu nga gundö watadu baangi.—Mo gedi 1 AKorindo 6:9, 10; AGaratio 5:19-21.

12. Tipagine si aida ti ni mo saberã?

¹² Kura apai kinaho si aida boro mangihe tipa ka rẽ tipa bapatiza. Gu mokedi nangia Petero aya: “Oni  zúngadi tironi . . . ki sa tironi berewe, i gbandaka gaoni ingaapai.” (Amokedi 3:19) Zungoditise nga ka saberã watadu ka biratise ti gu gbegberẽpai mo namangihe. Si naida boro saberã asa ka si du nga ní naraka wasiwasi raka, na ka si vura du a nga ní naraka wiri gigiri raka araka. Tipagine? Bambiko aboro dunduko nga aboro-ingapai na si naida Mbori mbupai ambu fuyo. (ARomo 3:23; 5:12) Mbata fu mo wiriki Ziazia Kekeapai, mo aainongo gupai Mbori akpinyemuhe wenengai te. Sidu, mo aarengbanga kaa raka ringbisihe kuti gupai Mbori akpinyemuhe nzunzu te. Si nga gupai si aida aida ti ni mo saberã.

13. Gine nga satise?

¹³ Si naida ‘satise’ ngbefuo saberã. Si aidanga mo bira kina kungbo bira tiro ti gamo gbegberẽ apai te. Si naida mo mbu gamo gbegberẽ apai ki diberã tipa kaa manga agu apai du ni ruruhe tona awere ka ndu ku mbatayo. Saberã na satise nga agu apai si aida mo mangihe mbata fu zio mo bapatiza.

14. Gini kura nyanyakipa pai si aida mo mangihe mbata fu zio mo bapatiza?

¹⁴ Gu kura nyanyakipa pai kinaho si aida mo mangihe mbata fu zio mo bapatiza. Si naida mo kparatiro fu Yekova Mbori.

15, 16. Gine nga kparatise fu Mbori, na gine nafõngbadu boro yo ní mangihe?

¹⁵ Mo nakparatiro fu Yekova rogo kakaka kpee yo. Rogo gu kpee re, mo nakido Yekova na gupai nga mo ima fu tiro fu kina ko nyeanye kindi. (Pa Fu Rugute ni Ue he 6:15) Tipagine si aida boro mangi gupai re ti ni? Ani bingo kpiapai: Ho kumba atona ka mbakadapa rogatise ni na dee, ko natona ka ino ri wenengai na kini  ini wene asinori. Ho ko aino ri ni wa gure, ri nangba tiko susi gu naadu mbata. Ni yangaraha, ko rengbe ka pe gupai furi nga ko naye ka diari. Ko ima ino nga wa ko nika diari, gure nga ko di kura tindiro kuriko. Ono nyemuse nika sako ko di ri adia.

¹⁶ Ho mo aino Yekova ni na kini kpinyemuko, si nasa ro mo niirisiko na ki zanga maa ngbanda nga gu mo nika irisoko ki da ti ni. Gu boro naida ka pekafuo Wiri Mbori nga Yesu Kristo, si naida ní “mbu gani apai” ambu. (Marako 8:34) Ani nambu gaani apai rogo gu gene nga ka peresapa giasangba Mbori rogo apai dũ mbatayo fu agu apai nga gaani. Sidu, mbata fu mo zi bapatiza, si naida pa manga gupai Mbori akpinyemuhe du ni gu banguapai mo naperesihe mbatayo rogo gamo raka.—Mo gedi 1 Petero 4:2.

17. Ginipai rengbe ka sa kura aboro ka i kparanga tiyo fu Yekova ya?

¹⁷ Kura aboro aidanga ka kparatiyo fu Yekova te bambiko i nagunde agunde ka manga gu bakerepai re. I nagunde nga ka i kparatiyo fu Yekova, ko saringbangayo asara ka i mangi ingapai. I nabihe nga gu ngba nga ka i kparanga tiyo fu Yekova ya.

18. Ginipai rengbe ka fõngbaduroyo mo kparatiro fu Yekova?

¹⁸ Wa mo nika wirika kpinyemu Yekova, ngbaduroyo nika fõ ro afõ mo kparatiro fuko na kini asadi tiro nyanyakii kaa raka ringbisihe kuti gamo kparatise. (Batungusipai 5:4) Fuo kpara mo tiro fu Yekova, si nika ida ‘mo nita ki rẽarẽ na gupai Gbia akpinyemuhe.’ (AKorosaio 1:10) Mbiko gu nyemuse du mo na ni tipa Mbori, mo abingo ho nga si foro ni bakpakarakpakarapai mo mangi gupai ko akpinyemuhe te. Mo nika ida aida kuti gupai Yoane agumbaha ki ya: “Gi nga du [ani]  na nyemu Mbori re, nga ka ani kuti gako rugute. Gako rugute asusa nga omerani te.”—1 Yoane 5:3.

19. Tipagine si aidanga ti ni mo nigunde ti kparatiro fu Mbori ya?

¹⁹ Si aidanga mo du mbata ni rengberengbe boro mo kini ru ka kparatiro fu Mbori te. Yekova ima inopa gamo zangarengba na ko asananga ro mo mangi gupai ka mo amanganga ha ya te. (Atambuahe 103:14) Ko aidanga mo ti te, na ko nikaa songoda ro asongoda na kini undoro. (Mo gedi Yesaya 41:10.) Si naida mo du na gu kido nga, ka mo akido kuti Yekova na ngbaduroyo dũ, ko “arúga gamo apai [aruga] foro nzunzu.”—Asanza 3:5, 6.

20. Tipagine si aidanga ti ni boro kpara tiní fu Yekova kina ní ki inihe sa ya?

²⁰ Ka mo berẽkurii agu apai ani nasakihe re, mo idi aida ka kparatiro fu Yekova rogo kpee yo. Agu aboro dunduko nakpinyemu Mbori, si naida i ‘kusipa gayo idapase ni ngbayo sa bata.’ (ARomo 10:10) Wai du boro amanga gipai re?

21, 22. Wai rengbe mo ka ‘kusapa gamo idapase’ gbaiga?

 ²¹ Si naida gu barii gbuu nga ga agu abaakumba du rogo gamo dungurati ini gupai nga mo naida ka zio bapatiza. Ko nika manga mbakadapai tipa kura abaakumba sungu na mo ka wisigo bete asanahe du tipa gu bangua ayugopai nga ga Ziazia Kekeapai. Ka agu abaakumba re bihe nga mo ima rẽ tipa i bapatizi ro, i nika gumbaha agumba foro nga mo nika zio bapatiza azio ho regboho nika da ni. * Ti regbo zio bapatiza, i naamanga gumbapai nga ga bapatiza. Bagumbapai naasana agu aboro du tipa zio bapatiza i karagapai kuti asanahe ue tipa ka ‘kusapa gayo idapase’ gbaiga.

²² Bapatiza du nayugo ro ni gu boro naima kpara ti ni fu Mbori na ki da ni boro sa dagba aDezire Yekova. I nabapatizi aboro nga ka rindosiyo kutii ime yo tipa ka yugoho gbaiga nga i ima kparatiyo fu Yekova.

23. Gine nga bapatizi boro “ku rogo rimo . . . Ba na Wiri na Ziazia Toro”?

²³ Yesu aya wẽ i nikaa bapatizi gako abawiriki “ku rogo rimo . . . Ba na Wiri na Ziazia Toro.” (Matayo 28:19) Gere nayugo gupai nga gu boro nazio bapatiza, ní ima ino Yekova Mbori na Yesu Kristo na gayo asunge. (Atambuahe 83:18; Matayo 28:18) Ní ima inopa gu sunge a ga Mbori ziazia toro amangaha, nga gako ome mangaapai.—AGaratio 5:22, 23; 2 Petero 1:21.

24, 25. (a) Bapatiza nga kpia ginipai? (b) Gini sanahe duho i nika karagapai sani?

²⁴ Ono anga bapatiza nga kungbo rindosi boro ku ime yo te. Si nga guhe nayugopa nyanyakipa pai. Rindo  kutii ime yo nga kpia gupai nga mo ima kpi i ki kpisidi gamo kuru raka. Kura ime yo nga kpia gupai nga mo awere ni unga ro ka manga gupai Mbori akpinyemuhe. Mo tingidi gupai a nga, Yekova Mbori du mo akparatiro fuko, angianga fu kura boro watadu riigbu ya. Gamo kparatise na bapatiza nga tonatona dawedawe pagume na Mbori.—Atambuahe 25:14.

²⁵ Anga bapatiza du nayugo gupai nga boro nika bata te. Pauro aya: “Oni mangi pa gaoni bata tigaoni ni gunde na kio.” (AFiripoio 2:12) Bapatiza gbua nga tona nduge ngbagene unga. Gu sanahe duho tie nga, Wai rengbe mo ka nye rogo ga Mbori nyemuse? Gure nga gupai yangara kapita nga ga gi buku re nika sakapai tipaha.