1, 2. Sipwe tongeni kúna me ia eú leenien op mi núkúnúkéch?

ANCHANGEI mwo pwe itá ka fetál wóón efóch al lón eú rán mi fókkun ákkásepwál, iwe a poputá le rocholó fán láng. A inefi me chopulap me a púngúmmong rán. Ka fetálekkái me ánennafetálei eú leeni kopwe súúri. Iwe, ka kúna eú chúló ppen ewe al mi péchékkúl, núkúnúkéch me kinamwe. A ifa me lamoten ena chúló ngonuk!

² Iei sia nónnóm lón eú fansoun mélúmél lón kapas áwewe. Napanapen fénúfan a fókkun ngangngawoló. Nge a wor eú leeni mi núkúnúkéch, eú leenien op mi tongeni túmúnúkich seni feiengaw. Met ena? Nengeni mwo met ewe Paipel a apasa: “Epwe kapas ngeni ewe Samol mi Lapalap, ‘En ai  lenien op me imwei imwen maun, en ai Kot üa apilükülükuk.’”​—Kölfel 91:2.

3. Ifa usun Jiowa epwe ach leenien op?

³ Mwa met! Jiowa a tongeni ach leenien op, I ewe Chón Fératá me ewe Sounemenemen unuselapen láng me fénúfan. A tongeni túmúnúkich pún a fókkun péchékkúl lap seni emén are och mettóch mi tongeni efeiengawakich. Inaamwo ika sia feiengaw nge Jiowa a tongeni amóeló pwúnúngawen mettóch meinisin mi torikich. Ifa usun Jiowa epwe ach leenien op? A lamot sipwe lúkúlúk wóón i. Iwe, án Kot Kapas a pwal pesekich pwe sipwe “chok nom non ewe tongen God.” (Jutas 21, KG) Ewer, sipwe chék nónnóm lón án Kot tong, weween epwe núkúchar ewe ririin tong lefilach me Semach we lón láng fansoun meinisin. Ika ina, sipwe wesewesen lúkú pwe i ach leenien op. Nge met sipwe féri pwe epwe wor ach ena sókkun riri?

4, 5. Ikkefa ekkóch mettóch mi pwáraatá án Jiowa tongekich?

⁴ A lamot sipwe esilla ifa usun Jiowa a fen pwári an tongekich fán iten sipwe nónnóm lón an we tong. Ekieki mwo usun áitien Paipel kewe ka fen káé lón ei puk. Jiowa, ewe Chón Fératá, a ngenikich fénúfan pwe leeniach mi fókkun múrinné. A ouraló fénúfan ren chómmóng sókkopaten mwéngé me konik, pwúkún masouan kewe, ménúmanaw mi amwarar me mettóch mi lingéch. Kot, ewe Sounemenemen Makken Paipel a pwár ngenikich itan we me napanapan kewe. Pwal eú, an we Kapas a  erá pwe a tiinaato Néún we mi áchengicheng ngeni fénúfan, mwirin a esen ngeni an epwe riáfféú me máló fán ásengesich. (Johannes 3:16) Iwe, met ena liffang a ngenikich? A aworato ach ápilúkúlúk fán iten mwachkkan.

⁵ Ach ápilúkúlúk fán iten mwachkkan a alóngólóng wóón pwal eú mettóch Kot a fen féri. Jiowa a fératá eú mwú lón láng, ewe Mwúún Messaia. Epwele amóeló riáfféú meinisin me ewili fénúfan ngeni eú paratis. Ekieki pwe sia tongeni manaw ikena ie fán kinamwe me pwapwa tori feilfeiló chék. (Kölfel 37:29) Iwe nge, Kot a áiti ngenikich ifa usun sipwe manaweni ewe sókkun manaw mi múrinné seni meinisin pwal mwo nge lón ach ei fansoun. A pwal ngenikich ewe liffangen iótek pwe sipwe tufichin fós ngeni iteitan. Ikkena ekkóch chék mettóch mi affata pwe Jiowa a tongei aramas meinisin kapachelong en.

6. Ifa usun kopwe tongeni liiwini án Jiowa tongeok?

⁶ Kopwe ekieki ei kapas eis mi lamot: Ifa usun upwe liiwini án Jiowa tongeei? Chómmóng repwe apasa, “Upwe pwal máá tongei Jiowa.” A ina usun meefiom? Jesus a apasa, iei ewe allúk mi lap seni meinisin: “Kopwe echeni ewe Samol om Kot ren unusen lelukom, ren unusen ngünum pwal ren unusen ekiekum.” (Mateus 22:37) A wor chómmóng popun óm kopwe tongei Jiowa Kot. Iwe  nge, óm chék meefi tong ngeni Jiowa a itá wewe ngeni pwe ka tongei ren unusen letipom, manawom me ekiekum?

7. Itá a naf ach sipwe chék meefi pwe sia tongei Kot? Áweweei.

⁷ Paipel a áweweei pwe ach tongei Kot esap chék eú memmeef. Ren enletin mi lamot ena memmeef nge ina chék poputáán ach wesewesen tongei Jiowa. Áwewe chék, ewe pwikil lón apel, och chék kinikinin ewe apel. Iwe, pwal ina chék usun ach meefi tong ngeni Jiowa Kot, pwal ina och chék kúkkún kinikinin wesewesen weween ach tongei Kot. Iei alon Paipel: “Weween ewe tongen Kot, pwe sipwe alleasochisi an kewe alluk, o an kewe alluk rese mo chourek.” (1 Johannes 5:3, TF) Ika sia enletin tongei Kot, epwe uwaani uwa mi múrinné. Epwe pwáló lón féfférúch.​—Álleani Mateus 7:16-20.

8, 9. Ifa usun sipwe pwári ach tong me kilisou ngeni Kot?

 ⁸ Sia pwáraaló ach tongei Kot ren ach álleasochisi an kewe allúk me apwénúetá an kewe fén. Ese fókkun weires ngenikich le féri pún án Jiowa kewe allúk ra kawor pwe repwe álisikich le manawéch me pwapwa. (Aisea 48:17, 18) Ren ach álleasochisi án Jiowa emmwen, sia pwár ngeni pwe sia enletin kilisou ren mettóch meinisin a fen féri fán ásengesich. Solapan pún chókisikis chék ra pwári ena esin kilisou. Sisap usun ekkóch aramas lón fansoun Jesus we rese meefi kilisou. Jesus a echikara engol mi rupun pwétúr nge emén chék me leir a liwinsefál me apasa an kilisou. (Lukas 17:12-17) Sipwe áppirú ena emén mi pwáraatá an kilisou nge esap ekkewe tiwemén!

⁹ Iwe, ikkefa án Jiowa kewe allúk sipwe álleasochisiir? Sia fen káé usun ekkóch me leir lón ei puk nge sipwe nengenisefáli ekkóch leir. Ach ákkálleasochisi án Kot kewe allúk epwe álisikich le nónnóm lón an we tong.

10. Áweweei mwo pwata a lamot ach sipwe kákkáé usun Jiowa Kot.

¹⁰ Sisap úkútiw seni ach kákkáé usun Jiowa pún a lamot lón ach arap ngeni i. Áwewe chék, ika ka nóm lúkún lón eú pwinin mi fókkun ffééú nge ka ararók wóón eú ekkei, iwe kopwe itá mut ngeni án ewe ekkei epwe kunuló? Aapw. Kopwe tongeni máló ika epwe kunuló! Kopwe uwoutá émwúch pwe epwe ngetetá. Iwe ach “silei Kot” epwe apéchékkúlatá ach tongei i, usun chék án émwúch ángetatá ewe ekkei.—Än Salomon Fos 2:1-5.

11. Met meefien néún Jesus kewe chón káé atun a afalafal ngeniir?

 ¹¹ Jesus a mochen pwe epwe chék pwippwichikkar án néún kewe chón káé tongei Jiowa me an we Kapas mi enlet. Mwirin án Jesus manawsefál, a áiti ngeni rúúemén néún kewe chón káé ekkóch oesini lón ewe Tesin Ipru ra pwénúetá lón manawan. Met meefier? Iei alor: “Esap usun eu ekkei mi ngetenget lon lelukach, lupwen a kapas ngenikich won al o afata ngenikich wewen ekewe Toropwe mi Pin?”​—Lukas 24:32.

12, 13. (a) Met a fis ngeni án chómmóng aramas tong ngeni Kot me ewe Paipel? (b) Met sipwe féri pwe ete patapateló ach tong?

¹² Lupwen ka kerán káé met Paipel a wesewesen apasa, ese le mmen ngetenget lón letipom óm pwapwa, mwasangasang me tong ngeni Kot? Ese mwáál a ina usun meefiom. A pwal ina usun meefien chómmóng aramas. Nge met a weires an ach tong epwe chék pwippwichikkar me mámmááritá. Sisap usun aramasen ikenái. Jesus a osuni: “Chommong aramas epwe patapatelo ar tong.” (Mateus 24:12, TF) Met kopwe féri pwe ete patapateló óm tongei Jiowa me ekkewe pwóróus mi enlet lón Paipel?

¹³ Sópweló óm káé usun Jiowa Kot me Jesus Kraist. (Johannes 17:3) Ekilonei minne ka káé seni án Kot Kapas me pwisin eisinuk: ‘Met ei pwóróus a áiti ngeniei usun Jiowa Kot? Ifa usun ei pwóróus a alapaaló ai tongei Jiowa ren unusen letipei, ekieki me manawei?’ (Álleani Kölfel 119:97.) Epwe chék ngetecharachar óm tong ngeni Jiowa ren óm ekilonei pwóróusen Paipel.

14. Ifa usun iótek a álisikich pwe epwe chék pwippwichikkar ach tongei Jiowa?

 ¹⁴ Epwe pwal pwippwichikkar óm tongei Jiowa ika kopwe iótek iteitan. (1 Tesalonika 5:17) Sia fen káé lón Sópwun 17 pwe iótek, eú liffang mi aúchea seni Kot. Chiechi lefilen aramas a kan péchékkúleló ren ar pwóppwóróusfengen, iwe a pwal ina usun ach chiechi ngeni Jiowa, epwe núkúchar ren ach iótek ngeni iteitan. Sisap epiepini ach iótek. Ach iótek ngeni Jiowa epwe usun chék án emén nau fóffós ngeni seman we a tongei. Ach kapas epwe fiti súfél nge epwe pwal wenechar me popu seni letipach. (Kölfel 62:8) Pwúngún, ach pwisin kákkáé Paipel me ikkiótek seni letipach epwe álisikich le nónnóm lón án Kot tong.

15, 16. Pwata a pwúng ach sipwe ekieki pwe ewe angangen afalafala ewe Mwú eú feiéch me pisek aúchea?

¹⁵ Ach pwisin káé Paipel me pwisin iótek, ikkena kinikinin ach fel ngeni Kot wóón winikapach. Iwe nge, iei sipwele pwóróus usun pwal eú kinikinin ach fel, weween ach kapas ngeni aramas usun ach lúkú. Ika ka fen fós ngeni aramas usun pwóróusen Paipel, iwe ka fókkun feiéch. (Lukas 1:74) Atun sia esilefeili pwóróus mi enlet usun Jiowa Kot, sia fiti eú angang mi fókkun lamot mi ewis ngeni Chón Kraist mi enlet meinisin, ina ewe angangen afalafala ewe kapas allim usun Mwúún Kot we.​—Álleani Mateus 24:14; 28:19, 20.

¹⁶ Ewe aposel Paulus a aúcheani ewe angangen afalafal, a usun pisek aúchea. (2 Korint 4:7) Óm  afalafal ngeni aramas usun Jiowa Kot me minne a tipeni, ina ewe angang mi kon múrinné lap seni meinisin. Popun, pún ka angang ngeni ewe Masta mi kon múrinné me a atoto ngonuk feiéch mi lapalap. Óm fiffiti ei angang a álisi aramas mi letipwenechar le arap ngeni Semach we lón láng me aleni ewe al ngeni manaw esemuch! Itá menni angang epwe aúchea seni ena? Pwal eú, óm akkafalafal usun Jiowa me an we Kapas a alapaaló pwisin óm lúkú me apéchékkúla óm tongei i. Iwe, Jiowa a aúcheani óm achocho. (Ipru 6:10) Óm éttúres le féfféri ena angangen afalafal epwe álisuk le nónnóm lón án Kot tong.​—Álleani 1 Korint 15:58.

17. Pwata a atapwalapwal án Chón Kraist angangen afalafal ikenái?

¹⁷ A lamot sipwe chechchemeni pwe ewe angangen afalafala ewe Mwú a fókkun atapwalapwal. Pwata? Pún iei alon Paipel: “Ewe rän mi lap, ränin ewe Samol mi Lapalap a arapoto, a arapoto o müttirito.” (Sefanaia 1:14) Enlet, Jiowa epwele asopwaló unusen ei ótót. A lamot ach sipwe éúréúra aramas! Mi lamot repwe silei pwe iei ewe fansoun mi fich repwe filatá Jiowa pwe epwe ar Sounemenem. Ewe sópwólóón “esap mang.”​—Apakuk 2:3.

18. Pwata sipwe fiffiti Chón Kraist mi enlet le fel ngeni Jiowa?

¹⁸ Jiowa a mochen pwe sipwe fiffiti Chón Kraist mi enlet le fel ngeni i. Ina popun, an we Kapas a erá: “Ousipwe ekiekifengeni usun ach sipwe tongeni alollolätai chienach ren ach eäni chen me föför mürina. Sisap likiti ach eti ach mwichfengen usun ekoch ra föföri. Nge sipwe fokun  apöchökülafengenikich lefilach, pun sia silei pwe Ränin ach Samol a arapoto.” (Ipru 10:24, 25) Sia tongeni mwareiti me fel ngeni ach we Kot mi áchengicheng, atun sia mwichfengen me chiechiach  kewe chón lúkú. Sia pwal aúfichikichetá me apéchékkúlafengenikichetá.

19. Ifa usun sipwe apéchékkúlatá ewe ririin tong lón ewe mwichefelin Chón Kraist?

¹⁹ Atun sia chufengen me chiechiach kewe chón fel ngeni Jiowa, sia apéchékkúla ewe ririin tong me chiechi lón ach mwichefel. A lamot sipwe nennengeni manawéchún emén me emén leir, usun chék án Jiowa nennengeni manawéchúch. Sisap ekieki pwe pwiich kewe ra unuséch. Chechchemeni pwe ese léllé feffeitáán emén me emén lón an riri ngeni Kot me oukich meinisin sia kan mwámmwáálliló. (Álleani Kolose 3:13.) Kopwe achocho le chiechiéch ngeni chókkewe mi fókkun tongei Jiowa, iwe kopwe ásimawetá lón óm lúkú. Enlet, óm fiffiti pwiich kewe le fel ngeni Jiowa epwe álisuk le nónnóm lón an we tong. Ifa usun Jiowa a efeiéchú chókkewe mi tuppwél le fel ngeni i me nónnóm lón an we tong?

20, 21. Met weween “ewe enletin manau” me pwata ei ápilúkúlúk a amwarar?

²⁰ Jiowa epwe liffang ngeni néún kewe chón angang mi tuppwél ewe mettóch manaw, nge met sókkun manaw? Iwe met, ka wesewesen manaw iei? Chómmóng me leich sipwe apasa, Ewer! Popun, pún sia ngasangas, mwéngé me ún. Iwe, atun sia pwapwa, eli sipwe apasa, “Mwa met ren enletin feiéchún manawach!” Iwe nge, ren pwal och weween me ren Paipel ese wor emén aramas mi enletin manaw lón ei fansoun.

 ²¹ Án Kot Kapas a pesekich pwe sipwe amwéchúnnúkú “ewe enletin manau.” (1 Timoty 6:19) Weween, sia ápilúkúlúkú pwe sipwe angei “ewe enletin manau” lón mwachkkan. Ewer, atun sipwe unuséch, sipwe eáni ewe manaw mi enlet pún ina ewe sókkun manaw Kot a tipeni fán itach seni chék me lepoputáán. Atun sipwe nóm lón ewe paratis wóón fénúfan lón mwachkkan, epwe unus péchékkúlach, kinamweech me pwapwaach. Ina atun, sipwe eáni “ewe enletin manau,” ewe manaw esemuch. (1 Timoty 6:12) Esap pwe ina eú ápilúkúlúk mi amwarar?

22. Ifa usun kopwe tongeni amwéchúnnúkú “ewe enletin manau”?

²² Ifa usun sipwe tongeni amwéchúnnúkú “ewe enletin manau”? Lón ena epwipwiin wokisin, Paulus a pesei Chón Kraist pwe repwe “föri mine a mürina” me “pisekisek lon ar föför mürina.” (1 Timoty 6:18) A ffat pwe mi lamot ach akkapwénúetá minne sia káé lón Paipel. Nge alon Paulus na a itá wewe ngeni pwe mi fichiitikich “ewe enletin manau” ren ach féfféri angang mi múrinné? Aapw, pún ach kúna manaw esemuch a alóngólóng wóón án Kot úméúméch mi fókkun somwoló. (Rom 5:15) Iwe nge, Jiowa a pwapwa le efeiéchú néún kewe chón angang mi tuppwél. A mochen kopwe eáni “ewe enletin manau.” Chókkewe mi nónnóm lón án Kot tong ra lúkúlúk pwe repwe kúna ena esin manaw esemuch fán pwapwa me kinamwe.

23. Pwata a fókkun lamot ach sipwe nónnóm lón án Kot tong?

²³ A múrinné pwe emén me emén leich epwe  pwisin eisini, ‘Ngang mi fel ngeni Kot me ren minne a mak lón Paipel?’ Ika sia tongeni pélúweni ‘ewer,’ atun sia etittina manawach iteiten rán, weween sia manaweni ewe manaw mi pwúng. Sia tongeni lúkúlúk pwe Jiowa ach we leenien op. Epwe túmúnú néún kewe aramas mi tuppwél lón ekkeei ránin lesópwólóón mi ur ren fitikoko. Jiowa epwe pwal atolongakich lón ewe mineféén ótót mi chék arapoto. Epwele ifa me apwapwaach le kúna ena fansoun! Sipwe pwal fókkun pwapwa pwe sia kefiléch lón ekkeei ránin lesópwólóón! Ika ka kefiliéch iei, kopwe pwapwaesini “ewe enletin manau” tori feilfeiló chék. Ewe sókkun manaw Jiowa a tipeni seni chék me lepoputáán!