1, 2. Sinni i pakkarelattam tape maproteksionan?

NONOPAMMU nga lumaka-lakag ka ta lawan tapus gavva zimittal i badiu. Nazzibbo i langi. Namegafu nga nakkili-kilâ anna nagarugug, tapus naguran tu masikan. Inalistuammu i nakkarela nga magaleg tu palliruman. Egga nasingammu ta aggig na dalan. Matuyag, makasta, anna mamaga yatun. Dakal i appabalomu megafu tatun nga palliruman!

² Kunnatun i nekegittan na tiempo nga pattolayattam. Mas nga marrake i mesissimmu ta mundo. Ngem egga i awayya tam pakkarelan tape maprotektattam ta permanente nga espiritual nga peligro. Anni yatun? Innammu i nekagi na salmista kani Jehova: “Sikaw i mangiyegu anna mamaliag niakan. Sikaw i Dios nga ek-ku pammakatalakkan.”​—Salmo 91:2.

3. Anni kuattam tape protektan ittam ni Jehova?

³ Fugurammu yatun! Protektan ittam mismu ni Jehova, i Namaratu anna Soberano ta uniberso. Makuana yatun megafu ta mas makapangngua yaya anne ta maski sinni onu maski anni nga manannal nittam. Maski paga nadannal tam ngana, awayyana nga alsan i  marake ira nga efektona. Anni gafu i kuattam tape protektan ittam ni Jehova? Mawag tu mattalô tam sa. Fuera paga tatun, ipagaram nittam na Uvovug na Dios: “Ari kamu umarayyu ta aya na Dios.” (Judas 21) Wan, mawag tu mattalupaddiattam ta aya na Dios nga ariattam ipamavulun nga magattâ i aya nga mamaddukko nittam ta nelangitan nga Yama tam. Nu kunnatun i kuattam, masiguradu tam nga protektanna ittam. Kunnasi tam nga mapeggan tu kunnatun nga meggo nga relasion?

4, 5. Kunnasi nga nepasingan ni Jehova i ayâna nittam?

⁴ Tape makapattalupaddian ta aya na Dios, mawag tu malippawa tam nu kunnasi nga nepasingan ni Jehova i ayâna nittam. Nonopammu i karuan nga ituttuddu na Biblia nga nagigiammum taw nga libru. Bilang Namaratu, neyawa nittam ni Jehova i makasta nga davvun tape paddianattam. Pinannuna yatun tu abundansia nga makan anna danum, negagangay nga kayamanan na davvun, makemmemmi nga aya-ayam, anna makakkasta nga lugu-lugar. Bilang Autor na Biblia, nepakannammu na Dios nittam i ngagan anna kualidad na ira. Ikagi paga na Uvovug na nga zinog na ta davvun i kuruga ideddukanna nga Ana, anna nepamavulunna nga mazigarigatan anna matay para nittam. (Juan 3:16) Kunnasi tam nga mabenefisiowan tatun nga regalu? Egga iddanama tam nga makakkasta nga mappange.

⁵ Maddepende i mappange nga iddanama tam ta tadday paga nga gannug nga kingngua na Dios. Nangipataddag si Jehova tu nelangitan nga gobierno, i Mesianiko nga Pappatulan. Yatun noka i mamangultimo ta ngamin nga zigariga anna pabbalinanna tu paraiso i davvun. Fugurammu! Awayya tam magayayya anna memammo nga mattolay tatun tu mannanayun. (Salmo 37:29) Durante nga ari paga natuppal yatun, nangiyawa si Jehova tu giya tape makasta i pattoletam ta maddaggun. Neyawana gapa nittam i regalu nga pakimallo, tape makaranni tam sa maski anni nga oras anna maski sitaw. Yaw  laman i karuan ta gannagannug nu kunnasi nga nepasingan ni Jehova i ayâna nittam.

6. Kunnasim nga mepasingan i ayâmu kani Jehova?

⁶ I importante nga pakkiavu: Kunnasî mepasingan i appabalo ku ta aya na Dios? Aru i mangikagi, “Siempre, mawag nga ayatakku gapa si Jehova.” Kunnatun kari gapa i matagenomu? Kinagi ni Jesus nga yaw i pinaka-importante ta ngamin nga dorob: “Ayatam-mu i YAFU nga Dios mu ta interu nga futum, interu nga ikararuam anna ta interu nga nono mu.” (Mateo 22:37) Siguradu nga aru rasommu tape ayatammu si Jehova nga Dios. Ngem i panageno kari laman nga egga ayâmu kani Jehova i kawagan ta pangayâ sa ta interu nga futu, kararua anna nonomu?

7. Ipakanawag nu ngatta ari laman tu basta panageno nga iddukammu i Dios i kawagan tape makagi nga talaga ayatammu yaya.

⁷ Kagitta na kagian na Biblia, ari laman tu basta panageno i aya ta Dios. Kakuruganna, importante gapa i panageno nga egga ayâmu kani Jehova, ngem pamegafuanan laman yatun na kurug nga pangaya sa. Angngariganna, importante i vukal na mansanas tape mattugu onu mattalovu i kayu nga mavvunga tu mansanas. Ngem nu kayàmu i kuman tu mansanas, magayayyaka panô nu vukal laman na mansanas i neyawada nikaw? Siguradu nga ari! Kunnatun i nekegittan na panageno nga ayatammu si Jehova. Ituttuddu na Biblia: “Ta nu ayatat-tam i Dios, parulatat-tam gapa i bili-bilin na, ay ari gammabba tu mariga nga tuttulan danaw.” (1 Juan 5:3) Tape makagi tu napafutuan i ayâmu ta Dios, mawag gapa tu mapia i vungana. Mawag tu mepasingan yatun ta annangngua.—Bibbigammu i Mateo 7:16-20.

8, 9. Kunnasi tam nga mepasingan i aya anna appabalo tam ta Dios?

⁸ Mepasingattam nga ideddukattam i Dios nu tuppalattam i bili-bilinna anna iyaplika i prinsipiona ira. Ari tu mariga nga kuan yatun. Imbes nga mamakadammo, makoffun i dorob ni  Jehova tape makasta, makapagayayya, anna makakontento i pattoletam. (Isaias 48:17, 18) Nu mattoletam nga mekunnay ta pangigiya ni Jehova, mepasingattam nga talaga apresiattam i ngamin nga kingnguana para nittam. Kaddaraddam ta balabaddi i mangappresia tatun. Ariattam kaya nga mabbalin tu kagitta na totolay turi ta kegga ni Jesus ta davvun nga awan tu appabaloda. Mafulu nga malleproso i pinammapia ni Jesus, ngem tadday laman i nanoli tape mappabalo sa. (Lucas 17:12-17) Siempre, kaya tam nga mabbalin tu kagitta na tadday nga nappabalo, ari tu kagitta na siam nga ari nappabalo!

⁹ Anni gafu nga bili-bilin ni Jehova i mawag nga tuppalattam? Makoffun i pattuppal tam tatun tape makapattalupaddiattam ta aya na Dios. Aru ngana i nagigiammu tam nga bili-bilinna taw nga libru, ngem repasuattam laman i karuan.

10. Ngatta importante i paggigiammu meyannung kani Jehova nga Dios?

¹⁰ Importante i pakannammu kani Jehova tape mas makaranni sa. Proseso yatun nga awan tu  pangultimuanna. Nu maggarenu onu maddaddang ka, pagurayammu kari nga sesenu nga maddo i afi? Ari. Siempre, duppangammu tape maggatáng i afi. Awayyana nga mappeligro ka nu ariammu kuan yatun! Nu kunnasi nga pagatangngan na kayu i afi, “i pakannammu ta Dios” i mamattalupaddian gapa nga masikan i aya tam kani Jehova.​—Proverbio 2:1-5.

11. Anni i efekto na panuddu ni Jesus ta disipulos na?

¹¹ Kaya ni Jesus nga mattalupaddian nga matotolay anna mapapatu i aya na disipulos na kani Jehova anna ta mabalor nga kinakurug na Uvovug na. Kabalinna nga napaginnolay, netuddu ni Jesus ta dua nga disipulos na i meyannung ta karuan nga profesiya ta Hebreo nga Katurakan nga natuppal sa. Anni i efektona? Kinagida: “Yatun gabba tu ke-pia na annagenappat-ta turi ta ipakanawag na nitta i Masanto nga Tura ta kegga tam ta dalan!”​—Lucas 24:32.

12, 13. (a) Anni i nesimmu ta aya na magaru nga totolay ta Dios anna ta Biblia? (b) Anni kuattam tape ari nga mallammin i aya tam ta Dios?

¹² Napannu kari i futum tu pagayayya, pattalikarag, anna pangaya ta Dios? Siguradu nga wan. Kunnatun i natageno na magaru. Ngem kunnasim panô nga mapattalupaddian nga mapatu i ayâmu anna mas dumakal paga? Ariattam kaya nga parigan i paddiapaddian na mundo. Neprofesiya ni Jesus: ‘Mallammin noka i aya na aru nga totolay.’ (Mateo 24:12) Anni kuammu tape ari mallammin i ayâmu kani Jehova anna ta kinakurug ta Biblia?

¹³ Ariammu immangan i maggigiammu meyannung kani Jehova nga Dios anna kani Jesu-Cristo. (Juan 17:3) Nonopammu tu mapia i magigiammum ta Uvovug na Dios anna ipakkiavumu ta baggim: ‘Anni i itudduna niakan yaw meyannung kani Jehova nga Dios? Anni paga nga rason i meyawana niakan yaw tape mas ayatakku paga si Jehova ta interu nga futu, nono, anna kararuâ?’ (Bibbigammu i 1 Timoteo 4:15.) I kunnatun nga monag nga appanono i makoffun tape kanayun nga mapatu i ayâmu kani Jehova.

14. Kunnasi nga makoffun nittam i pakimallo tape ari maddô i aya tam kani Jehova?

 ¹⁴ I tadday paga nga makoffun ay i regular nga appakimallo. (1 Tesalonica 5:17) Nagigiammu tam ta Kapitulo 17 nga mabalor nga regalu na Dios i pakimallo. Nu kunnasi nga mas maddukko tam ta kofuttam nu kanayuttam nga makiuvovug sa, mattalupaddian gapa nga mapapatu anna matotolay i aya tam kani Jehova nu regular tam nga makimallo sa. Ariattam pulus kuan tu mekanikal i pakimallo tam, nga itotoli tam nga kagian i ari gamma napafutuan anna awan tu kuentana nga nakabisadu nga uvovug. Makimallo tam kani Jehova kagitta na pakiuvovug na abbing ta ideddukanna nga yama. Siempre kaya tam gapa i makiuvovug tu marespeto, nga mekagi tam ngamin nga egga ta futu tam. (Salmo 62:8) Wan, makoffun i personal nga paggigiammu tu Biblia anna i napafutuan nga pakimallo tape makapattalupaddiattam ta aya na Dios. Importante ira yatun nga aspeto na paddayarayaw tam.

15, 16. Ngatta ibilang tam nga pribilehio anna kayamanan i pangilayyagayya ta Pappatulan?

¹⁵ Egga ira aspeto na paddayarayaw nga awayya tam kuan maski tattadday tam laman gitta na paggigiammu tu Biblia anna pakimallo. Ngem egga gapa ira makua ta publiko: i pangikagi ta tanakuan ta pangurug tam ira. Nakuam kari ngana yatun? Makakkasta nga pribilehio i nakuam. (Lucas 1:74) Nu ikagi tam ta tanakuan i kinakurug nga nagigiammu tam meyannung kani Jehova, kukukuattam i nabala-balor nga trabahu nga netalô ta ngamin nga kurug nga Cristiano—i pangilayyagayya ta mapia nga dumug na Pappatulan na Dios.—Bibbigammu i Mateo 24:14; 28:19, 20.

¹⁶ Kuruga tinagibalor ni apostol Pablo i ministeriona. Nebilang na tu kayamanan yatun. (2 Corinto 4:7) I pangikagi ta tanakuan meyannung kani Jehova anna ta gakkag na ira i kapianan nga trabahu nga awayyam makua. Passerbi yatun ta kapianan nga Yafu, nga mangiyawa tu kakastan ira nga benefisio. Nu makipattrabahu ka ta ministerio, moffunammu i  mapia-giffutuadda nga totolay nga umaranni kani Jehova. Megiyam paga ira ta dalan nga mappange ta mannanayun nga inango! Egga paga kari mas makapagayayya nga trabahu anne tatun? Paladdan paga na pallayyagayya meyannung kani Jehova anna ta Uvovug na i pangurug anna ayâmu sa. Kuruga  appresian ni Jehova i appursigim nga kuan yatun. (Hebreo 6:10) Makoffun i malappo nga pallayyagayya tape makapattalupaddiakka ta aya na Dios.​—Bibbigammu i 1 Corinto15:58.

17. Ngatta apuradu i trabahu nga pallayyagayya?

¹⁷ Importante nga daddammammu tu apuradu nga trabahu i pangilayyagayya ta Pappatulan. Kagian na Biblia: “Ilammuyag mu i uvovug na Dios; mawag tu agga-parak-ka nga mallayyagayya.” (2 Timoteo 4:2) Ngatta mawag tu magapura tam nga kuan yaw? Kagian na Uvovug na Dios: “Aranni ngana i dakal nga aggaw ni Jehova! Aranni ngana anna talaga mabbibibi nga duttal!” (Zefanias 1:14) Wan, umara-aranni i tiempo nga pangultimuan ni Jehova i interu nga sistema na gannagannug. Mawag tu makagianan i totolay! Mawag tu mammuadda nga tiempo ngana tape pilliadda si Jehova bilang Soberano nga Dios. Kagian na Habakuk 2:3 nga i Aggaw na Pamanunnu ay “ari nga matalattan!”

18. Ngatta mawag tu dayarayawattam si Jehova kavulu i kurug ira nga Cristiano?

¹⁸ Kaya ni Jehova nga dayarayawattam yaya kavulu i kurug ira nga Cristiano. Yatutta kagian na Biblia: “Nonopat-tam nu kunnasi na pakka-uffu-uffut-tam nga mangipasingan ta aya anna pangngua ta mapia. Ariat-tam nga immangan i paggarammammung tam, kagitta na kuan na karuan ira. Makkapasa-pasikan ittam lallagu tu nono, netallugaring ta masingat-tam tu aranni ngana i Aggaw na Yafu.” (Hebreo 10:24, 25) Nu maggarammammung ittam ta study kavulu i kapangngurug tam, medayaw tam i ideddukattam nga Dios. Mapasikan anna mapagaram tam gapa i kataggitadday.

19. Anni i awayya tam kuan tape mapaladda i meggo nga aya ta unag na kongregasion na Cristiano?

¹⁹ Durante nga makikavulu tam ta maddayarayaw ira kani Jehova, mapaladda tam i meggo nga aya anna pakkorofun ta unag na kongregasion. Importante nga innattam i makasta ira nga ugali na kataggitadday, kagitta na paningan ni Jehova ta mapia nittam. Ariammu ekspektan tu ari nga makkamali i kapangngurug mu. Takkilalammu nga nadduruma i gukug na espiritual nga pammanakam na kada indibidual anna  awan tu perfekto nittam. (Bibbigammu i Colosas 3:13.) Makikofukka ta totolay nga meggo i pangayâda kani Jehova tape mammanakam ka ta espiritual. Wan, makapattalupaddiakka ta aya na Dios nu maddayoka ta Dios kavulu i manakam ta espiritual nga wawwagi. Kunnasi nga balabalakkan ni Jehova danuri matalô nga masserbi sa anna mattalupaddian ta ayâna?

20, 21. Anni i “kurug nga pattolay,” anna ngatta makakkasta nga iddanama yatun?

²⁰ Balabalakkan ni Jehova tu inango i matalô ira nga aripanna. Ngem anni klasena nga inango? Ta maddaggun, talaga kari nga siggamatolay tam? Siempre gapa, kunna magaru. Maginango tam mabba, kuman, anna minum. Siguradu nga siggamatolay ittam. Nu egga paga lagu tiempo nga magayayya tam, mekagi tam, “Kekkasta talaga mattolay!” Ngem kagian na Biblia nga ta kakuruganna, awan tu maski sinni i talaga nga siggamatolay.

²¹ Ipagaram nittam na Biblia nga tammitattam tu mapia i “kurug nga pattolay.” (1 Timoteo 6:19) Kebalinanna yatun nga iddanamattam nga mesimmu i “kurug nga pattolay” ta mappange. Wan, sonu perfekto tam ngana, makagi tam nga talaga nga siggamatolay tam, megafu ta mattolay tam mekunnay ta orihinal nga gakkag na Dios. Sonu mattolay tam ngana nga memmamo, magayayya, anna perfekto i gawagawayyan ta paraiso nga davvun, makagi tam ngana gabbalaman nga yaw “i kurug nga pattolay”​—mannanayun nga pattolay. (1 Timoteo 6:12) Anni mabba kastana nga iddanama!

22. Anni i kuammu tape ariammu mawawan i “kurug nga pattolay”?

²² Anni kuattam tape ariattam mawawan i iddanama nga “kurug nga pattolay”? Pinagaram ni apostol Pablo i kurug ira nga Cristiano nga “mangngua ira ta mapia, ay tu parrikuad-da nakuan ay i mapia nga pangnga-pangngua.” (1 Timoteo 6:18) Nakadepende gafu yatun nu kunnasi tam iyaplika i nagigiammu tam ta Biblia. Ngem kaya kari kagian ni Pablo nga mala tam i “kurug nga pattolay” gukaban laman na mapia nga annangngua? Ari, megafu ta nakadepende talaga yatun ta  ‘dakal nga inaggallallo na Dios.’ (Roma 5:15) Ngem kakayà ni Jehova nga balabalakkan danuri matalò nga masserbi sa. Kaya naka nga masingan nga mattolay tu “kurug nga pattolay.” I iddanama nga magayayya, memammo, anna mannanayun nga pattolay ay para ta ngamin nga mattalupaddian ta aya na Dios.

23. Ngatta importante nga mattalupaddian ta aya na Dios?

²³ Mawag tu ipakkiavu na kataggitadday, ‘Makapagayayya kari ta Dios i forma na paddayarayô sa?’ Nu siguraduattam nga wan i tabbag tam tatun ta kagaggaw, egga tam ta fustu nga dalan. Makapattalô tam nga protektan ittam ni Jehova. Protektanna i matalô nga aripanna ira ta pangultimuan nga agga-aggaw na dana nga sistema na gannagannug. Ipalliag gapa ittam ni Jehova anna igiyana ittam nga mappange ta aranni ngana nga bagu nga sistema. Siguradu nga fermi ayayya tam nga masingan yatun nga tiempo! Anna kunnatun ngana laman i pagayayya tam megafu ta fustu i pinili tam durante ta pangultimuan nga agga-aggaw! Nu fustu i pilliammu, malawamu noka i “kurug nga pattolay,” i makapagayya nga pattolay nga kaya ni Jehova para nikaw ta mannanayun!