1, 2. Nĩ ha tũngĩona ũgitĩri ũmũthĩ?

TA HŨŨRA mbica ũgĩthiĩ na njĩra mũthenya wĩ na kĩhuhũkanio. Matu ma mbura makahumbĩra igũrũ. Gũkambĩrĩria kũgĩa na heni na marurumĩ, na mbura nene ĩgaitĩka. Ũkahiũha ũkĩhũgagia maitho ũgĩetha handũ ha kwĩyũa. Ũgacoka ũkona kanyũmba o hau hakuhĩ na njĩra. Gatiroira na nĩ karũmu, na nĩkarakũgucĩrĩria. Ũngĩkena atĩa nĩ ũgitĩri ũcio!

² Tũratũũra mahinda ta macio ma thĩna. Maũndũ marathiĩ o na mbere mathũkĩte gũkũ thĩ. No harĩ na handũ tũngĩhota kũũrĩra, na tũgitĩrũo kaimana. Nĩ ha hau? Ta rora wone ũrĩa Bibilia ĩrutanaga: “Ngũkiuga atĩrĩ, ũhoro wa Jehova, atĩ, Nĩwe irahĩro rĩakwa o gwata gĩikaro gĩakwa kĩirigĩre; nĩwe Ngai wakwa, ũrĩa ndĩĩhokete.”—Thaburi 91:2.

3. Tũngĩka atĩa nĩguo Jehova atuĩke mwĩgitio witũ?

³ Ta wĩcirie ũndũ ũcio! Jehova, Mũũmbi na Mwathani wa igũrũ na thĩ, no atuĩke mwĩgitio witũ. No atũgitĩre tondũ we e na hinya gũkĩra mũndũ kana kĩndũ o gĩothe kĩrĩa kĩngĩtũkora. O na tũngĩona ũũru-rĩ, Jehova  no agarũranie maũndũ. Tũngĩka atĩa nĩguo Jehova atuĩke mwĩgitio witũ? Tũrabatara kũmwĩhoka. Ningĩ-rĩ, Kiugo kĩa Ngai gĩtwĩraga ũũ: ‘Ikaragai mwendetwo nĩ Ngai.’ (Judasi 21) Ĩĩ, tũbataire gũikara wendo-inĩ wa Ngai, tũtũũre tũnyitithanĩtio nĩ wendo na Ithe witũ wa matu-inĩ. Tweka ũguo no tũkorũo na ũũma atĩ nĩ egũtuĩka mwĩgitio witũ. No tũngĩhota kũnyitithanio nake ũguo atĩa?

4, 5. Nĩ njĩra irĩkũ imwe Jehova atuonetie wendo nacio?

⁴ Nĩguo tũtũũre wendo-inĩ wa Ngai-rĩ, nĩ tũbataire kũmenya ũrĩa Jehova atuonetie wendo wake. Ta wĩcirie morutani ma Bibilia marĩa wĩrutĩte na ũteithio wa ibuku rĩrĩ. Arĩ Mũũmbi-rĩ, Jehova nĩ atũheete thĩ ĩtuĩke mũciĩ witũ mũthaka na wa gĩkeno. Amĩiyũrĩtie irio nyingĩ na maĩ, indo cia gũtũguna, nyamũ cia gũtũkenia, na kũndũ gũthaka. Arĩ Mũtungi wa Bibilia-rĩ, Ngai nĩ atũguũrĩirie rĩĩtwa rĩake na ngumo ciake. Ningĩ-rĩ, Kiugo gĩake nĩ kĩguũrĩtie atĩ nĩ aatũmire Mũrũ wake endete oke gũkũ thĩ, agĩtĩkĩria Jesu anyarirĩke na akue nĩ ũndũ witũ. (Johana 3:16) Kĩheo kĩu nĩ kĩa bata ũrĩkũ harĩ ithuĩ? Gĩtũheaga mwĩhoko wa mahinda mega marĩa mokĩte.

⁵ Mwĩhoko witũ wa mahinda marĩa mokĩte o na ningĩ nĩ wĩhocetie harĩ ũndũ ũngĩ Ngai ekĩte. Jehova nĩ arũgamĩtie thirikari ya igũrũ, Ũthamaki wa Kĩmesia. Ica ikuhĩ nĩ ũkũniina mĩnyamaro yothe na ũtue thĩ paradiso. Ta wĩcirie! No tũtũũre kuo tene na tene twĩ na thayũ na gĩkeno. (Thaburi 37:29) Kahinda-inĩ gaka-rĩ, Ngai nĩ atuonetie ũrĩa tũngĩtũũra na njĩra njega biũ ũmũthĩ. Ningĩ nĩ atũheete kĩheo kĩa mahoya, njĩra ya kwaria nake ĩmwe kwa ĩmwe. Icio no njĩra nyinyi tu iria Jehova onetie andũ othe wendo nacio, o hamwe nawe kĩũmbe.

6. Ũngĩtĩkĩra na njĩra ĩrĩkũ wendo ũrĩa Jehova akuonetie?

⁶ Kĩũria kĩrĩa kĩa bata ũbataire kwĩyũria nĩ gĩkĩ: Niĩ ingĩtĩkĩra wendo wa Jehova na njĩra ĩrĩkũ? Aingĩ no moige atĩrĩ, “O na  niĩ nĩ njagĩrĩirũo kwenda Jehova.” Ũguo nĩguo wee ũiguaga? Jesu oigire rĩathani rĩrĩa inene kũrĩ mothe nĩ rĩrĩ: “Enda Mwathani Ngai waku na ngoro yaku yothe, na muoyo waku wothe, na gwĩciria gwaku guothe.” (Mathayo 22:37) Hatarĩ nganja wĩ na itũmi nyingĩ cia kwenda Jehova Ngai. No kũigua tu wĩ na wendo ta ũcio hihi nĩ kũiganu harĩ kwenda Jehova na ngoro yaku yothe, muoyo, na meciria?

7. Kwenda Ngai nĩ kũbataraga ũndũ ũngĩ kana no kũigua ũmwendete tu? Taarĩria.

⁷ O ta ũrĩa Bibilia ĩtaarĩirie-rĩ, kwenda Ngai nĩ makĩria ma kũigua tu nĩ ũmwendete. O na gũtuĩka kũigua nĩ wendete Jehova nĩ kwa bata-rĩ, kĩu no kĩambĩrĩria gĩa kũmwenda na ma. Kwa ngerekano-rĩ, mbegũ ya itunda nĩ ya bata nĩguo mũtĩ wa itunda rĩu ũkũre. No rĩrĩ, ũngĩenda itunda-rĩ, no ũiganĩre mũndũ angĩkũhe mbegũ ya itunda rĩu? Aca, o na hanini! No taguo, kũigua nĩ wendete Jehova Ngai nĩ kĩambĩrĩria tu. Bibilia ĩrutanaga ũũ: “Kwenda Ngai nĩ atĩrĩ, nĩ tũmenyagĩrĩre maathani make; namo maathani make matirĩ thĩna.” (1 Johana 5:3) Nĩ getha kwenda Ngai gũtuĩke kwa ma no nginya gũkorũo na maciaro mega. No mũhaka kuonanio na ciĩko.—Mathayo 7:16-20.

8, 9. Tũngĩonania atĩa wendo na ngatho ciitũ harĩ Ngai?

⁸ Tuonanagia wendo witũ harĩ Ngai rĩrĩa twarũmia maathani make na kũhũthĩra mawatho make. Ti ũndũ mũritũ mũno gwĩka ũguo. Ngũrani na ũguo-rĩ, mawatho ma Jehova mahaarĩirio matũteithie tũikare wega, twĩ na gĩkeno, na tũiganĩire. (Isaia 48:17, 18) Twahũthĩra morutani ma Jehova-rĩ, tuonagia Ithe witũ wa matu-inĩ atĩ nĩ tũkenaga mũno nĩ maũndũ marĩa mothe atwĩkĩire. No ũndũ wa kĩeha nĩ atĩ ti andũ aingĩ thĩ ĩno mekaga ũguo. Tũtingĩenda kwaga ngatho  ta andũ amwe maatũũraga hĩndĩ ĩrĩa Jesu aarĩ gũkũ thĩ. Jesu aahonirie andũ ikũmi maarĩ na mangũ, no no ũmwe tu wokire kũmũcokeria ngatho. (Luka 17:12-17) Tũngĩenda gũtuĩka ta ũcio ũmwe wacokirie ngatho, ti ta arĩa kenda mataacokirie ngatho!

⁹ Kwoguo maathani ma Jehova marĩa twagĩrĩirũo kũrũmia nĩ marĩkũ? Nĩtwarĩrĩirie maigana ũna thĩinĩ wa ibuku rĩrĩ, no reke tũcokere mamwe ma mo. Kũrũmia maathani ma Ngai nĩ gũgũtũteithia gũikara wendo-inĩ wa Ngai.

10. Taarĩria nĩkĩ gũthiĩ na mbere kwĩruta igũrũ rĩgiĩ Jehova Ngai nĩ kwa bata.

¹⁰ Kwĩruta igũrũ rĩgiĩ Jehova nĩ ikinya rĩa bata harĩ kũmũkuhĩrĩria. Ũcio nĩ ũndũ ũtagĩrĩire gũkorũo na mũthia. Ũngĩkorũo wĩ nja ũtukũ ũgĩota mwaki kwĩ na heho nyingĩ-rĩ, no ũrekererie mwaki ũhwererekere nginya ũhore biũ? Aca. Ũngĩthiĩ o na mbere kuongerera ngũ nĩguo mwaki ũikare ũrĩrĩmbũkĩte na ũkorũo na ũrugarĩ. Muoyo  waku no ũkorũo wĩhocetie harĩ wee kũiga mwaki ũcio ũgĩakanaga! O ta ũrĩa ngũ itũmaga mwaki wakane-rĩ, no taguo “kũmenya Ngai” kũigaga wendo witũ harĩ Jehova wĩ na hinya.—Thimo 2:1-5.

11. Ũrutani wa Jesu warĩ na moimĩrĩro marĩkũ harĩ arũmĩrĩri ake?

¹¹ Jesu eendaga arũmĩrĩri ake mathiĩ na mbere gwĩkĩra hinya wendo wao harĩ Jehova na Kiugo Gĩake kĩa bata. Jesu thutha wa kũriũkio nĩ aarutire arutwo ake erĩ igũrũ rĩgiĩ ũrathi wĩ thĩinĩ wa Maandĩko ma Kĩhibirania, ũrĩa wahingire harĩ we. Ũndũ ũcio warĩ na moimĩrĩro marĩkũ? O moigire ũũ thutha-inĩ: “Githĩ ngoro ciitũ itikũhĩahĩaga thĩinĩ witũ rĩrĩa egũtwaragĩria twĩ njĩra, hĩndĩ ĩrĩa egũtũtaũragĩra Maandĩko?”—Luka 24:32.

12, 13. (a) Wendo wa andũ aingĩ harĩ Ngai na harĩ Bibilia ũhaanĩte atĩa ũmũthĩ? (b) Tũngĩka atĩa nĩguo wendo witũ ndũkanyihe ?

¹² Rĩrĩa werutire ũrĩa Bibilia ĩrutanaga kũna-rĩ, kaĩ ũtoonire ũrĩa ngoro yaku yahĩahĩaga nĩ gĩkeno, kĩo, na wendo harĩ Ngai? Hatarĩ nganja nĩ woonire. Andũ aingĩ manaigua ũguo. Ũndũ ũrĩa mũritũ rĩu nĩ gũtũũria wendo ũcio mũnene na kũũrĩmĩra ũkũre. Tũtikwenda kũrũmĩrĩra ũrĩa andũ mekaga ũmũthĩ. Jesu aarathire ũũ: “Wendani wa andũ aingĩ nĩũkanyihio.” (Mathayo 24:12) Ũngĩka atĩa nĩguo wendo waku harĩ Jehova na harĩ ma cia Bibilia ndũkanyihe?

¹³ Thiĩ na mbere kwĩruta igũrũ rĩgiĩ Jehova Ngai na Jesu Kristo. (Johana 17:3) Wĩthugunde, kana ũtaranie na njĩra ndikĩru, maũndũ marĩa ũreruta kuuma gwĩ Kiugo kĩa Ngai, ũkĩyũragia ũũ: ‘Ũndũ ũcio ũranduta atĩa igũrũ rĩgiĩ Jehova Ngai? Ũrahe gĩtũmi kĩrĩkũ gĩa kũmwenda na ngoro yakwa yothe, meciria, na muoyo?’ (Thaburi 119:97) Gwĩthugunda ta kũu nĩ gũgũtũma wendo waku harĩ Jehova wakane mũno.

14. Mahoya mangĩtũteithia atĩa gũikara twendete Jehova?

¹⁴ Njĩra ĩngĩ ya gwĩkĩra wendo waku harĩ Jehova hinya nĩ kũhoyaga hingo ciothe. (1 Athesalonike 5:17) Thĩinĩ wa Gĩcunjĩ gĩa 17 kĩa ibuku rĩrĩ-rĩ, nĩ twerutire atĩ mahoya nĩ kĩheo  kĩa goro kuuma kwĩ Ngai. O ta ũrĩa ũrata wa andũ wagĩraga nĩ ũndũ wa kwaranagĩria mategũĩtiganĩra-rĩ, noguo ũkuruhanu witũ na Jehova ũgũikara wĩ mũcanjamũku twamũhoya kaingĩ. Nĩ ũndũ wa bata mahoya maitũ matigakorũo marĩ ma gũcokera ciugo o iria iria itekuuma ngoro kana itarĩ ũndũ ciugĩte. Twagĩrĩirũo kwaria na Jehova o ta ũrĩa kaana karagia na ithe wako kendete. Hatarĩ nganja nĩtũbataire kwaria na gĩtĩo, no twagĩrĩirũo kwaria tũtegwĩtigĩra, tũtarĩ na ũhinga, na kuuma ngoro thĩinĩ. (Thaburi 62:8) Ĩĩ, kwĩruta Bibilia ithuĩ ene na kũhoya kuuma ngoro thĩinĩ nĩ maũndũ ma bata ũthathaiya-inĩ witũ, na nĩmatũteithagia gũikara wendo-inĩ wa Ngai.

15, 16. Twagĩrĩirũo kuona wĩra wa kũhunjia ũhoro wa Ũthamaki ũrĩ gĩtĩo na kĩgĩĩna nĩkĩ?

¹⁵ Kwĩruta Bibilia ithuĩ ene na kũhoya nĩ maũndũ ma ũthathaiya tũngĩka tũrĩ ithuiki. No rĩu reke twĩcirie ũndũ ũmwe wa ũthathaiya ũrĩa twĩkaga mbere ya andũ othe: kwaria na andũ arĩa angĩ igũrũ rĩgii wĩtĩkio witũ. Hihi nĩwarĩtie na andũ angĩ ma cia Bibilia? Okorũo nĩ wĩkĩte ũguo-rĩ, nĩũkeneire gĩtĩo kĩa mwanya mũno. (Luka 1:74) Rĩrĩa tũkwaria na andũ ma iria twĩrutĩte ikoniĩ Jehova Ngai-rĩ, tũraruta wĩra wa bata mũno ũheetwo Akristiano othe a ma, wĩra wa kũhunjia ũhoro mwega wa Ũthamaki wa Ngai.—Mathayo 24:14; 28:19, 20.

¹⁶ Mũtũmwo Paulo oonaga ũtungata wake ũrĩ kĩndũ kĩa bata, na aawĩtaga kĩgĩĩna. (2 Akorintho 4:7) Kwaria na andũ ũhoro wĩgiĩ Jehova Ngai na matanya make nĩguo wĩra ũrĩa wa bata mũno ũngĩruta. Nĩ ũtungata harĩ Mwathani ũrĩa mwega makĩria, na kũrehaga ũguni mwega gũkĩra wĩra ũngĩ o wothe. Rĩrĩa ũraruta wĩra ũcio-rĩ, ũrateithia andũ arĩa mena ngoro njega makuhĩrĩrie Ithe witũ wa matu-inĩ, na mathiĩre njĩra ĩrĩa ĩtongoragia nginya muoyo-inĩ wa tene na tene! Nĩ wĩra ũrĩkũ ũngĩ ũngĩtũma ũiganĩre makĩria ma ũguo? Ningĩ-rĩ,  kũruta ũira igũrũ rĩgiĩ Jehova na Kiugo gĩake nĩ kuongagĩrĩra wĩtĩkio waku na gũgekĩra hinya wendo waku harĩ Ngai. Na Jehova nĩ akenagio nĩ kĩyo gĩaku. (Ahibirania 6:10) Kũruta wĩra ta ũcio hingo ciothe na kĩyo nĩ gũgũgũteithia ũikare wendo-inĩ wa Ngai.—1 Akorintho 15:58.

17. Wĩra wa Akristiano wa kũhunjia nĩ wa mĩtũkĩ nĩkĩ ũmũthĩ?

 ¹⁷ He bata kũririkana atĩ kũhunjia ũhoro wa Ũthamaki nĩ wĩra wa mĩtũkĩ. Bibilia yugaga ũũ: “Kĩhunjagiei Ũhoro wa Ngai, na [mwĩkagĩre] kĩyo.” (2 Timotheo 4:2) Gwĩka ũguo nĩ kwa mĩtũkĩ nĩkĩ ũmũthĩ? Kiugo kĩa Ngai gĩtwĩraga ũũ: “Mũthenya ũrĩa mũnene wa Jehova nĩũkuhĩhĩirie, ũgagĩkuhĩhĩria mũno na ũkehĩka.” (Zefania 1:14) Ĩĩ, ihinda nĩ rĩĩhĩkĩte mũno rĩrĩa Jehova arĩreehe mũthia wa mũtabarĩre ũyũ wothe wa maũndũ. Andũ nĩ marabatara kũheo mũkaana! Nĩ mabataire kũmenya atĩ rĩrĩ nĩrĩo ihinda rĩa gũthuura Jehova atuĩke Mũnene wao. Mũthia ‘wĩhĩkĩte ũkinye na ndũgatĩrio.’—Habakuku 2:3.

18. Twagĩrĩirũo gũtungatĩra Jehova tũnyitanĩire na Akristiano a ma nĩkĩ?

¹⁸ Jehova endaga tũmũtungatĩre tũnyitanĩire hamwe na Akristiano a ma. Nĩkĩo gĩtũmi Kiugo gĩake kiugaga ũũ: “Nĩtwĩciragiei ũrĩa tũngĩarahũranaga o mũndũ na ũrĩa ũngĩ, nĩ getha twendanage, na twĩkage ciĩko njega; ningĩ tũtigatige kũũnganaga hamwe, ta ũrĩa andũ amwe mamenyerete gwĩkaga, no kaba tũhatanagĩrĩrie; na twĩkage ũguo o makĩria tondũ wa ũrĩa mũkuona atĩ Mũthenya ũcio nĩũrakuhĩhĩria.” (Ahibirania 10:24, 25) Rĩrĩa twacemania na etĩkia arĩa angĩ mĩcemanio-inĩ ya Gĩkristiano-rĩ, nĩtũkoragwo na mweke mwega ma wa kũgooca na gũthathaiya Ngai witũ ũrĩa twendete. Ningĩ o mũndũ nĩ akaga ũrĩa ũngĩ na tũgekĩrana ngoro.

19. Tũngĩka atĩa nĩguo twĩkĩre wendo hinya thĩinĩ wa gĩkundi gĩa Gĩkristiano?

¹⁹ Rĩrĩa tũranyitanĩra na athathaiya arĩa angĩ a Jehova-rĩ, nĩ twĩkĩraga hinya wendo na ũrata witũ thĩinĩ wa gĩkundi. Nĩ ũndũ wa bata tũcaragie ngumo iria njega thĩinĩ wa andũ arĩa angĩ, o ta ũrĩa Jehova acaragia ngumo njega harĩ ithuĩ. Ndũkerĩgĩrĩre etĩkia arĩa angĩ makorũo marĩ akinyanĩru. Ririkana atĩ othe nĩmatiganĩte harĩ gũkũra kwao kĩroho, na ithuothe gũtirĩ mũndũ ũtahĩtagia. (Akolosai 3:13) Geria kũgĩa na ũrata wa hakuhĩ na arĩa mendete Jehova biũ, na  nĩ ũkuona ũgĩkũra kĩroho. Ĩĩ, gũthathaiya Jehova hamwe na ariũ na aarĩ a kĩroho a ithe witũ nĩ gũgũgũteithia ũikare wendo-inĩ wa Ngai. Jehova aheaga kĩ arĩa maikaraga wendo-inĩ wake na njĩra ya kũmũthathaiya na wĩhokeku?

20, 21. “Muoyo ũrĩa [wa] ma” nĩ ũrĩkũ, na guo nĩ kĩĩrĩgĩrĩro kĩa magegania nĩkĩ?

²⁰ Jehova aheaga ndungata ciake njĩhokeku kĩheo kĩa muoyo, no nĩ muoyo ũhaana atĩa? Wee ũrĩ muoyo kũna ũmũthĩ? Andũ aingĩ mangiuga atĩ kĩu nĩ kĩũria gĩĩcoketie. Githĩ tũtirahuuhia, tũkarĩa, na tũkanyua? Hatarĩ nganja twĩ muoyo. Na rĩrĩa tũkenete o na no tuuge ũũ: “Maya na ma nĩmo maica!” No rĩrĩ, Bibilia yonanagia atĩ na njĩra ya bata mũno, gũtirĩ mũndũ na ma ũratũũra.

²¹ Kiugo kĩa Ngai gĩtwĩraga twĩnyitĩre “muoyo ũrĩa [wa] ma.” (1 Timotheo 6:19) Ciugo icio ironania atĩ “muoyo ũrĩa [wa] ma” nĩ kĩndũ twĩrĩgĩrĩire gũkoona mahinda-inĩ mokĩte. Ĩĩ, rĩrĩa tũgaatuĩka akinyanĩru-rĩ, nĩrĩo tũgaakorũo tũgĩtũũra kũna, tondũ tũgaatũũraga kũringana na ũrĩa Ngai aatanyĩte tũtũũrage. Rĩrĩa tũgaakorũo tũgĩtũũra thĩinĩ wa thĩ ĩ paradiso tũrĩ na ũgima mwega wa mwĩrĩ, thayũ, na gĩkeno-rĩ, nĩrĩo tũgaakenera “muoyo ũrĩa [wa] ma,” wa tene na tene. (1 Timotheo 6:12) Githĩ kĩu ti kĩĩrĩgĩrĩro kĩa magegania?

22. Ũngĩĩnyitĩra “muoyo ũrĩa [wa] ma” na njĩra ĩrĩkũ?

²² Tũngĩĩnyitĩra “muoyo ũrĩa [wa] ma” na njĩra ĩrĩkũ? Akĩaria ũhoro ũcio-rĩ, Paulo eerire Akristiano “mekage wega” na “matonge na ũtonga o ũrĩa wa gwĩkaga maũndũ mega.” (1 Timotheo 6:18) Kwoguo-rĩ, ũndũ ũcio wĩhocetie harĩ ũrĩa tũrahũthĩra ma iria twĩrutĩte kuuma thĩinĩ wa Bibilia. No Paulo hihi oigaga atĩ “muoyo ũrĩa [wa] ma” nĩ mũcara wa gwĩka maũndũ mega? Aca, tondũ ciĩrĩgĩrĩro ta icio njega ũguo tũngĩciona nĩũndũ wa “wega wa Ngai.” (Aroma 5:15) No rĩrĩ, Jehova nĩakenagio mũno nĩ kũhe kĩheo andũ arĩa mamũtungatagĩra  marĩ ehokeku. Nĩ arenda kuona wee ũgĩtũũra “muoyo ũrĩa [wa] ma.” Arĩa megũikara wendo-inĩ wa Ngai nĩ maratanya muoyo ta ũcio wa tene na tene, wĩ na gĩkeno na thayũ.

23. Nĩ ũndũ wa bata gũikara wendo-inĩ wa Ngai nĩkĩ?

²³ O mũndũ agĩrĩire kwĩyũria ũũ: ‘Nĩndĩrathathaiya Ngai kũringana na njĩra ĩrĩa onanĩtie thĩinĩ wa Bibilia?’ Tũngĩĩtuĩria o mũthenya tuone atĩ nĩ tũreeka ũguo-rĩ, tũrĩ njĩra-inĩ ĩrĩa yagĩrĩire. No tũgĩe na ũũma atĩ Jehova nĩwe mwĩgitio witũ. Nĩ ekũgitĩra andũ ake ehokeku matukũ-inĩ mothe ma mũthia ma mũtabarĩre ũyũ mũũru wa maũndũ. Jehova ningĩ nĩegũtũkũũra na atũingĩrie thĩinĩ wa mũtabarĩre mwerũ wa magegania ũrĩa rĩu ũkuhĩrĩirie. Kaĩ nĩ tũgagĩkena kuona ihinda rĩu ĩ! Na nĩtũgaakena mũno tondũ nĩtwathuurire gwĩka ũrĩa kwagĩrĩire matukũ-inĩ maya ma kũrigĩrĩria! Ũngĩthuura gwĩka ũguo ũmũthĩ-rĩ, nĩ ũgaakenera “muoyo ũrĩa [wa] ma,” ta ũrĩa Jehova Ngai aatanyĩte tũkorũo naguo, mĩndĩ na mĩndĩ!