1, 2. O fea tatou te malu ai i aso nei?

SEʻI faapea o loo e savali i le auala ae agi malosi le matagi. Ua pōuliuli le lagi. Ua amata ona emo uila, pāpā faititili ma totō mai timuga. Ua e faatopetope atu e suʻe se mea e te lafi ai. Ua e iloa atu se fale malosi i autafa o le auala. Ioe, e tāua iā te oe lenā fale saogalemu!

² O loo tatou ola i aso faigatā. Ua faasolosolo ina matuā leaga le lalolagi. Ae e mafai ona malupuipuia i tatou mai lamatiaga. E faapefea? Ia mātau le aʻoaʻoga a le Tusi Paia: “Ou te fai atu iā Ieova: ʻO oe o loʻu sulufaʻiga ma o loʻu ʻolo malosi, o loʻu Atua o lē ou te faatuatua i ai.’”—Salamo 91:2.

3. E faapefea ona fai Ieova ma o tatou malu?

³ Maʻeu se manatu ofoofogia! O Ieova o Lē na faia mea uma lava ma o le Pule silisili ese, e mafai ona fai o ia ma o tatou malu. E mafai ona ia puipuia i tatou, ona e sili atu lona malosi na i lo se tasi po o se mea e ono faamataʻu mai iā i tatou. E tusa foʻi pe tatou te afāina i se mea, ae e mafai ona  toe faaleleia e Ieova. E faapefea ona fai Ieova ma o tatou malu? E tatau ona tatou faatuatuaina o ia. Ua timaʻi mai foʻi le Tusi Paia: “Ia outou faatumau iā te outou i le alofa o le Atua.” (Iuta 21) E tatau ona tatou tumau i le alofa o le Atua, ia faaauau ona iai se faiā māfana ma ia. Ona mafai lea ona tatou mautinoa, o ia o lo tatou malu. Ae faapefea ona maua se faiā faapena?

4, 5. O ā ni auala ua alofa mai ai Ieova iā i tatou?

⁴ Ina ia tumau i le alofa o le Atua, e tatau ona tatou talisapaia le auala ua alofa mai ai Ieova iā i tatou. Ia tomānatu i nisi o aʻoaʻoga a le Tusi Paia na e aʻoaʻoina i le tusi lenei. Ona o ia o Lē na faia mea uma lava, ua foaʻi mai ai e Ieova le lalolagi matagofie ina ia tatou nonofo ai. Ua ia faatumulia le lalolagi i le anoanoaʻi o meaʻai ma vaitaumafa, o mea faalenatura, o manu eseese ma vaaiga matagofie. Ona o ia e Ana le Tusi Paia, ua faailoa mai ai e le Atua lona suafa ma ona uiga. E lē gata i lea, ua faailoa mai i lana Afioga, na ia auina mai lona Alo pele i le lalolagi, o lē na puapuagatia ma maliu mo i tatou. (Ioane 3:16) O le ā le uiga o lenā meaalofa mo i tatou? Ua tatou maua ai se faamoemoe mo se lumanaʻi matagofie.

⁵ O lo tatou faamoemoe mo le lumanaʻi, e faalagolago foʻi i se isi mea ua faia e le Atua. Ua faavaeina e Ieova le malo i le lagi, o le Malo Faa-Mesia. Ua toeitiiti ona faamuta lea e lenā Malo o puapuaga ma avea le lalolagi ma parataiso. O se mea ofoofogia! E mafai ai ona tatou ola e faavavau i le filemu ma le fiafia. (Salamo 37:29) Ae ua tuu mai e le Atua ni taʻiala i le auala e ola fiafia ai i aso nei. Ua ia tuuina mai foʻi le meaalofa o le tatalo, lea ua mafai ai ona tatou talanoa atu iā te ia i so o se taimi ma i so o se nofoaga. O nisi na o auala ua alofa mai ai Ieova i tagata lautele ma i tagata taʻitoʻatasi e pei o oe.

6. E faapefea ona e tali atu i le alofa o Ieova?

 ⁶ O le fesili tāua e tatau ona e manatu i ai: E faapefea ona ou tali atu i le alofa o Ieova? Ua tali mai le toʻatele o tagata, “E tatau foʻi ona tatou alolofa atu iā Ieova.” Po o ou faalogona na? Na fetalai Iesu o le poloaʻiga silisili lenei: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.” (Mataio 22:37) E tele māfuaaga e te alofa ai iā Ieova. Ae ina ia alofa moni i le Atua ma lou loto, ola ma le mafaufau atoa, pe faamata e lava lou faapea mai e te alofa i le Atua?

7. Pe e lava lou faapea mai e te alofa i le Atua? Ia faamatala.

⁷ E pei ona faamatalaina i le Tusi Paia, e tele mea e aofia ai i le alofa i le Atua. E ui lava e tāua lou faapea mai e te alofa i le Atua, ae ua na o se amataga lenā. O se faaaʻoaʻoga, e tāua le fatu o se apu i le tuputupu aʻe o se laau apu. Peitaʻi, afai e te manaʻo i se apu, pe e faamalieina oe pe afai e avatu e se tagata se fatu apu? Ailoga! E faapena foʻi le alofa iā Ieova le Atua, ua na o se amataga lea. Ua faapea mai le Tusi Paia: “O le alofa lenei i le Atua, ia tatou tausi i ana poloaʻiga; ma e lē mamafa ana poloaʻiga.” (1 Ioane 5:3) Ina ia moni lenā alofa mo le Atua, e tatau ona fua mai. E tatau ona faaalia i galuega.—Faitau le Mataio 7:16-20.

8, 9. E faapefea ona faaalia lo tatou alofa ma le talisapaia o le Atua?

⁸ Tatou te alolofa i le Atua pe a tatou tausi i ana poloaʻiga ma mulimuli i ana taʻiala. E lē faigatā lenā mea. E lē mamafa poloaʻiga a Ieova, na i lo lea, ua fesoasoani ina ia tatou maua ai ni olaga lelei, fiafia ma faamalieloto. (Isaia 48:17, 18) O lo tatou mulimuli i le taʻitaʻiga a Ieova, ua tatou taʻu atu ai i lo tatou Tamā o i le lagi, lo tatou matuā talisapaia o mea uma ua ia faia mo i tatou. E faanoanoa  ona e toʻaitiiti lava tagata o le lalolagi ua faaalia le talisapaia. Tatou te lē fia mulimuli i lenā agaga lē faafetai, e pei o nisi tagata na ola a o soifua Iesu i le lalolagi. Na faamālōlō e Iesu tagata lepela e toʻasefulu, ae e na o le toʻatasi lava le lepela na toe foʻi e faafetai iā Iesu. (Luka 17:12-17) E mautinoa lava, tatou te fia faataʻitaʻi i le lepela lotofaafetai, ae lē o lepela e toʻaiva na lē lotofaafetai!

⁹ O ā la poloaʻiga a Ieova e tatau ona tatou tausia? Ua uma ona tatou talanoaina nisi o na poloaʻiga i lenei tusi, ae o le a toe autalu. O le tausia o poloaʻiga a le Atua e fesoasoani ina ia tatou tumau ai i le alofa o le Atua.

10. Ia faamatala le māfuaaga e tāua ai ona faaauau ona aʻoaʻoina e uiga iā Ieova le Atua.

¹⁰ Ina ia tatou faalatalata atili atu iā Ieova, e tāua ona tatou iloa o ia. E ao ona faaauau ona tatou iloa ma aʻoaʻoina mea e uiga i le Atua. Afai o loo e nofo i fafo i se pō mālūlū i talaane o se afi, pe e iai sau  gaoioiga e fai a o e vaai atu ua tau uma le mumū o le afi, ma oo ai ina pē? Ioe, e iai. E faaauau ona e tuuina i ai ni fafie ina ia mumū pea le afi ma e māfanafana ai. Atonu e faalagolago lou ola i le mumū lelei o le afi! E pei ona mumū le afi i fafie, e faapena foʻi ona faamalosia pea lo tatou alofa mo Ieova e ala i “le poto i le Atua.”—Faataoto 2:1-5.

11. O le ā le iʻuga na oo i soo o Iesu ona o ana aʻoaʻoga?

¹¹ Na finagalo Iesu ina ia faaauau ona malosi le alofa o ona soo mo Ieova, ma ia matuā naunau atu i lana Afioga. Ina ua toe faatūina o ia, na aʻoaʻoina e Iesu ona soo e toʻalua i nisi o valoaga o le Tusitusiga Eperu (Feagaiga Tuai) na faataunuuina iā te ia. O le ā le iʻuga? Na la taʻua mulimuli ane: “Pe e leʻi mū ea o ta loto a o fetalai mai o ia iā i taʻua i le auala, ma faamatala mai Tusitusiga Paia?”—Luka 24:32.

12, 13. (a) O le ā le mea ua tupu i le alofa o le toʻatele o tagata i le Atua i aso nei ma lo latou naunau i le Tusi Paia? (e) E faapefea ona ʻalofia le maalili o lo tatou alofa?

¹² Ina ua faatoʻā e iloa aʻoaʻoga moni a le Tusi Paia, pe na mū lou loto i le olioli, maelega ma le alofa i le Atua? E lē taumatea na mū lou loto. O faalogona na o le toʻatele. O se luʻi le finafinau pea ma ia tuputupu aʻe lou alofa mo le Atua. Tatou te lē fia faaaʻoaʻo i le lalolagi. Na valoia e Iesu: “O le a maalili le alofa o le toʻatele.” (Mataio 24:12) E faapefea ona ʻalofia le maalili o lou alofa mo Ieova ma lou naunau i upu moni o le Tusi Paia?

¹³ Ia faaauau pea ona aʻoaʻoina mea e faatatau iā Ieova le Atua ma Iesu Keriso. (Ioane 17:3) Ia manatunatu loloto i mea ua e aʻoaʻoina mai le Tusi Paia, ma fesili ifo iā te oe lava: ʻO le ā ua ou iloa e uiga iā Ieova mai nei faamatalaga? O le ā se isi māfuaaga ua ou aʻoaʻoina ina ia ou alofa ai i le Atua ma loʻu loto, ola ma le mafaufau atoa?’ (Faitau le 1 Timoteo 4:15.) O le faia faapea, o le a faaauau ai ona malosi lou alofa mo Ieova.

14. E faapefea ona fesoasoani le tatalo e faaauau ai ona malosi lo tatou alofa mo Ieova?

 ¹⁴ O se isi auala e faaauau ai ona malosi lou alofa mo Ieova, o le tatalo lea e lē aunoa. (1 Tesalonia 5:17) Na tatou aʻoaʻoina i le Mataupu e 17 o lenei tusi, o le tatalo o se meaalofa tāua mai le Atua. E pei ona faamalosia faiā a tagata pe a talatalanoa e lē aunoa, e faapena foʻi ona māfana ma malosi la tatou faiā ma Ieova pe a tatou tatalo e lē aunoa iā te ia. E tāua ona tatou ʻalofia le tau lava ina tatalo, aua le tautū i a tatou upu ma ia tatalo mai i o tatou loto. E tatau ona talanoa atu iā Ieova e pei ona talanoa atu se tamaitiiti i lona tamā alofa. Tatou te fia talanoa atu i se auala faaaloalo, faamaoni ma e mapuna mai i o tatou loto. (Salamo 62:8) Ioe, o le suʻesuʻe i le Tusi Paia ma le tatalo, o ni gaoioiga tāua na o la tatou tapuaʻiga e fesoasoani ina ia tumau ai i le alofa o le Atua.

15, 16. Aiseā e mafai ai ona tatou manatu i le galuega talaʻi o le Malo o se faaeaga ma o se ʻoa?

¹⁵ O a tatou suʻesuʻega o le Tusi Paia ma tatalo, atonu o ni gaoioiga tau tapuaʻiga e fai na o i tatou lava. Ae seʻi o tatou iloiloina se gaoioiga tau tapuaʻiga e faatinoina i le lautele: o le talanoa atu lea i isi e uiga i o tatou talitonuga. Po ua e faasoa atu i tagata upu moni o le Tusi Paia? Afai o lea, ua e olioli i se faaeaga matagofie. (Luka 1:74) Afai ua tatou faasoa atu i tagata upu moni ua tatou aʻoaʻoina e uiga iā Ieova, o lona uiga la ua tatou faatinoina se tofiga tāua ua tuuina mai i Kerisiano moni, o le talaʻia lea o le tala lelei o le Malo o le Atua.—Faitau le Mataio 24:14; 28:19, 20.

¹⁶ Na manatu Paulo e tāua lana galuega talaʻi, lea na ia taʻua o se ʻoa. (2 Korinito 4:7) O le talanoa atu i tagata e uiga iā Ieova ma lona finagalo, o le galuega sili lea e mafai  ona e faia. O loo e auauna i le Matai aupito i lelei, ma e silisili aogā e maua mai ai. O le auai i le talaʻiga, ua e fesoasoani ai i tagata faamaoni e faalatalata i le Atua, ma savavali i le ala i le ola e faavavau! E leai se isi galuega e matuā faamalieina ai oe. O le molimau atu e uiga iā Ieova  ma lana Afioga, e faamalosia ai foʻi lou faatuatua ma lou alofa mo ia. E talisapaia e Ieova au galuega. (Eperu 6:10) O lou maelega i le galuega talaʻi, e fesoasoani e te tumau ai i le alofa o le Atua.—Faitau le 1 Korinito 15:58.

17. Aiseā ua faanatinati ai le galuega talaʻi i aso nei?

¹⁷ E tāua ona manatua, ua faanatinati le galuega talaʻi o le Malo. Ua taʻua i le Tusi Paia: “Ia talaʻi atu le upu, ia maelega [faanatinati].” (2 Timoteo 4:2) Aiseā e faanatinati ai lenei galuega i aso nei? Ua faapea mai le Afioga a le Atua: “O loo latalata mai le aso tele o Ieova. O loo lata mai lava, e matuā televave mai lava.” (Sefanaia 1:14) Ioe, ua matuā tele vave mai lava le aso e faaumatia ai e Ieova lenei lalolagi. E tatau ona lapataʻia tagata! E tatau ona latou iloa o le taimi lenei e ao ai ona latou filifilia Ieova e fai ma o latou Tupu. “E lē faatuai mai” le iʻuga.—Sapakuka 2:3.

18. Aiseā e ao ai ona tapuaʻi atu iā Ieova faatasi ma Kerisiano moni?

¹⁸ E finagalo Ieova tatou te tapuaʻi atu iā te ia faatasi ma Kerisiano moni. O le ala lea ua fai mai ai lana Afioga: “Ia tatou manatunatu foʻi le tasi i le isi ina ia faatupu ai le alofa ma galuega lelei, aua neʻi tuulafoaʻiina le faapotopotoina o i tatou e pei o le masani a isi, a ia fefaalaeiauaʻi, ia sili foʻi ona faia faapea auā ua outou iloa ua matuā latalata mai lava le aso.” (Eperu 10:24, 25) A tatou potopoto ma uso talitonu i sauniga faa-Kerisiano, ua maua ai le avanoa e faaneenee ma tapuaʻi atu ai i lo tatou Atua pele. Tatou te fefaalaeiauaʻi ma fefaamāfanafanaaʻi i na sauniga.

19. E faapefea ona faamalosia fusi o le alofa i le faapotopotoga?

¹⁹ A o tatou faatasitasi ma isi tagata tapuaʻi o Ieova, e faamalosia ai le fusi o le alofa ma faiā i le faapotopotoga. E tāua ona tatou taulaʻi atu i uiga lelei o isi, e pei foʻi ona silasila mai Ieova i o tatou uiga lelei. Aua e te manatu e ao ona lelei atoatoa mea e fai e ou uso talitonu. Ia manatua, e eseese uma lo tatou matutua faaleagaga, ma o i tatou uma  lava e fai mea sesē. (Faitau le Kolose 3:13.) Ia faauō atu i tagata e alolofa moni lava iā Ieova, ona mafai lea ona e tuputupu aʻe faaleagaga. Ioe, o le tapuaʻi iā Ieova faatasi ai ma ou uso ma tuafāfine faaleagaga, o le a fesoasoani e te tumau ai i le alofa o le Atua. O le ā le taui a Ieova mo tagata e tapuaʻi faamaoni iā te ia ma tumau i lona alofa?

20, 21. O le ā “le ola moni,” ma aiseā ua avea ai o se faamoemoe matagofie?

²⁰ E tauia e Ieova ana auauna faamaoni i le ola. E faapeʻī lenā ola? Po o le ola ea lea o loo tatou ola ai i le taimi nei? Atonu e toʻatele tagata e tali mai o lea o loo tatou feola. O loo tatou mānava, aai ma feinu. E mautinoa lava o loo tatou feola. E iai taimi tatou te fiafia ai ma faapea atu, “O le saʻo la lea o le olaga!” Ae ua faailoa mai e le Tusi Paia, e lē o le ola moni lenei o loo tatou ola ai.

²¹ Ua timaʻi mai le Afioga a le Atua, ia tatou “taofimau i le ola moni.” (1 Timoteo 6:19) Ua faaalia i upu na, o “le ola moni” o se mea o loo tatou faamoemoe e maua i le lumanaʻi. Ioe, o le a lelei atoatoa o tatou tino ma mafaufau i le ola moni, ona o le a tatou ola e pei ona muaʻi finagalo i ai le Atua. Pe a tatou ola i le parataiso i le lalolagi i le soifua lelei atoatoa, filemu ma le fiafia, ona tatou oo lea i “le ola moni,” o le ola e faavavau lea. (1 Timoteo 6:12) Ioe, o se faamoemoe matagofie!

22. E faapefea ona tatou “taofimau i le ola moni”?

²² E faapefea ona tatou “taofimau i le ola moni”? I lenā lava mataupu e tasi, na uunaʻia ai e Paulo Kerisiano “ia faia mea lelei” ma “ia tamaoaiga i galuega lelei.” (1 Timoteo 6:18) E tāua tele ona faatatauina upu moni ua tatou aʻoaʻoina mai le Tusi Paia. Ae po o le uiga o le tala a Paulo, o “le ola moni” o le totogi lenā o a tatou galuega lelei? E leai, o na faamanuiaga matagofie e faalagolago i le mauaina  o le “agalelei faifua” o le Atua. (Roma 5:15) Ae e fiafia Ieova e tauia ana auauna faamaoni. E finagalo Ieova ia e maua “le ola moni.” O lenā ola fiafia ma le filemu e faavavau, ua folasia mai mo tagata e tumau i le alofa o le Atua.

23. Aiseā e tāua ai ona tumau i le alofa o le Atua?

²³ E lelei ona tatou fesili ifo iā i tatou lava, ʻPo o oʻu tapuaʻi atu i le Atua e pei ona aʻoaʻo mai i le Tusi Paia?’ Afai tatou te faamautinoa i aso taʻitasi o loo tatou tapuaʻi atu i le Atua i le auala lenā, o lona uiga e saʻo le ala o loo tatou savavali ai. E mafai ona tatou mautinoa o loo fai Ieova ma o tatou malu. O le a puipuimalu e Ieova ona tagata i siʻui o aso e gata ai o lenei lalolagi tuai. O le a faasaoina atu foʻi i tatou e Ieova e ulu atu i le lalolagi fou ua i faitotoʻa. Maʻeu le faagaeetia o i tatou pe a tatou oo i lenā taimi! O le a tatou fiafia ona o le saʻo o a tatou filifiliga e fai i nei aso e gata ai! Afai e saʻo au filifiliga e fai i le taimi nei, o le a e tofo i “le ola moni,” o le ola lea na muaʻi finagalo i ai Ieova le Atua, o le ola e faavavau!