1, 2. მუნერ დუდიშ გითაფორაფალ მიღუნა ამდღა?

წერმიდგინ, ნამდა ბორია დღას სოდგარენ მეურქ. უცფას დიმუნუ. ვალ დო გურგინქ ქიდიჭყ დო თეს ოზღვარზღვალაია ჭვემაქ ქუმაჸუნ. სი კუჩხის უჩქარენქ დო ოცადუქ სოდგაინ დუდიშ გითოფორაფას. შარაპის ორწყექ გინორთვილ შენობას, სოდეთ შეილებ დუდ ქიქთუფორუე დო ვედიშოლე. მუშო ოკო რაგად, თენა მანგარო გახიოლედ.

² ჩქი მანგარ გლახა დროს ფცხოვრენთ. ირდიხას ართიანიშ უარეს ამბე რე. მარა არსებენს დუდიშ გითაფორაფალ, სოდეთ თხილერ იპით სერიოზულ საფრთხეშე. მუნერ დუდიშ გითაფორაფალშე რე რაგადი? ჸუჯ ქათხი, მუ ინოჭარ ბიბლიას: «მა უწინქ იეჰოვას: „ჩქიმ დუდიშ გითაფორაფალ დო სიმანგარე რექ, ჩქიმ ღორონთი რექ, სქანდა მიღუ იმენდი“» (ფსალმუნი 91:2).

3. მუჭო შილებე იეჰოვაქ ჩქინ დუდიშ გითაფორაფალქ იჸუას?

³ მართალო მუ ჯგირ აზრი რე! ცა დო ქიანაშ გუმაჭყაფალ დო უზენაეს მართველ იეჰოვა  ღორონთიქ, შილებე ჩქინ დუდიშ გითაფორაფალქ იჸუას. იეჰოვას შეულებ დოფთხილუან, მუშენდა თინა ირ კოჩშე დო ირფელშე უმოს ძალიერ რე. შხვაქ მუდგა ვა დამშუანი, თის შეულებ ჩქინ მდგომარეობაშ გიშანწყუალა. მუჭო გითუფორუათ იეჰოვას დუდი? ჩქი ოკო მივენდათ თის. თეშ გარდა, ღორონთიშ სიტყვა მირაგადნა: „ქუდოსკიდით ღორონთიშ ჸოროფას“ (იუდა 21). ღორონთიშ ჸოროფას ქუდოფსკიდათინ თიშენ, ჩქინ ზეციერ მუმაწკუმა ჸოროფათ ეფშა ურთიერთობა ოკო მიღდან. თაშ ქიმიფქცით-და, შემლებუნა დარწმუნებულ ვორდათ, ნამდა ღორონთი ჩქინ დუდიშ გითაფორაფალ იჸუაფ. მუჭო შემლებნა თეცალ ურთიერთობა მიღდან ღორონთწკუმა?

4, 5. სოვრეშე იძირე იეჰოვას უჸორთინ თინა?

⁴ ღორონთიშ ჸოროფას ქუდოფსკიდათინ თიშენ, ოკო მიჩქუდან, მუჭო მოძირანა ღორონთი მუშ ჸოროფას. ხოლო ართშა დეფიქრი, მუ გეგ ბიბლიაშე თე წიგნიშ გურაფათ. იეჰოვაქ დედამიწას ჯგირ ოცხოვრებელ პირობეფ მუჩეს. ჩქინ პლანეტა ეფშა რე ოჭკომალით, წყარით, ბუნებრივ რესურსეფით, ცხოველეფით დო სქვამ ბუნებათ. ღორონთიქ ბიბლიაშე გუმოგებაფუეს მუშ სახელ დო თვისებეფი. ბიბლიაშე თინა ხოლო ქიგებგით, ნამდა ღორონთიქ მუშ საჸოროფო სქუა მაშქუ დედამიწაშა, ჩქინ გურშენ ტანჯებათ დოღურედკონ (იოანე 3:16). თენა მარზენა მომავალიშ დიდებულ იმენდის.

⁵ ჩქინ მომავალშო ღორონთიქ ხოლო ართ მნიშვნელოვან მუდგარენ აკეთუ. იეჰოვაქ ზეცას მთავრობა გაჭყუ, ნამუშ მეფეთ იესო დარინუ. თე მთავრობა მალას მოსპუნს ირნერ წვალებას დო დედამიწას სამოთხეთ გინართინუანს. ჩქი მიღნა საშვალება, მშვიდობიან პირობეფს ირიათო ბედნერო იფცხოვრათ (ფსალმუნი 37:29). ღორონთიშ ზუკოლს გეგმიბრინუანთ-და, ამდღა ხოლო შემლებნა ბედნერ ცხოვრება მიღუდან. თეშ გარდა, ჩქი მიღნა საშვალება ღორონთის ლოცვაშ დროს თავისფალო ვეჩუათ ჩქინ ოთხუალი. თენა რე ხვალე მუსხირენ მაგალით თიშ,  მუჭო უჸორქ ღორონთის პირადო სი დო ირ კოჩი.

6. მუჭო ოკო უპასუხე იეჰოვაშ ჸოროფას?

⁶ ასე დეფიქრი ათე მნიშვნელოვან კითხვაშენ: „მუჭო უპასუხა იეჰოვაშ ჸოროფას“? ბრელ თქუანს: „მა ხოლო ოკო მიჸორდას იეჰოვა“. სი ხოლო თაშ ფიქრენქო? იესოქ თქუ, ნამდა არძაშ უდიდაშ მცნება რე: „გიჸორდას იეჰოვა, სქან ღორონთი, მთელ გურით, მთელ შურით დო მთელ გონებათ“ (მათე 22:37). სი მართალო ბრელ მიზეზ გიღ თიშ, ნამდა გიჸორდას იეჰოვა ღორონთი. მარა მთელ გურით, შურით დო გონებათ იეჰოვაშ ჸოროფა თის ნიშნენსო, ხვალე გინაფლენდე ჸოროფასინ?

7. ქორენო დასაბაღ ნამდვილ ჸოროფაშო ხვალე თიშ რაგად, ნამდა მიჸორა ღორონთი? გენწყი.

⁷ ბიბლიაშე ვორწყეთ, ნამდა ღორონთიშ ჸოროფა გრძნობაშე უმოს მეტ რე. მნიშვნელოვან რე მიჸორდან ღორონთი, მარა თენა ვა რე დასაბაღ ნამდვილ ჸოროფაშო. უშკურიშ ჯაქ გერთას თიშენ, აუცილებერ რე თიშ თასი. მარა უშკურ ქუგოკონ-და, ხვალე უშკურიშ თას ქიჸიდუო დასაბაღ სქანო? მუშო ოკო რაგად, ვარ! თეგვარო, იეჰოვა ღორონთიშ ჸოროფას ქოგინაფლენქ-და, თენა ნამდვილ ჸოროფაშ დაჭყაფ რე. ბიბლია მირაგადნა: „ღორონთიშ ჸოროფა თინა რე, ნამდა იფცვენდათ თიშ მცნებეფს, თიშ მცნებეფ დუმამონკებელ ვა რე“ (1 იოანე 5:3). ღორონთი მართალო მიჸორან თენა, ჩქინ საქმეეფშე ოკო იძირედას ანუ ნაყოფ ოკო მიკმომღუდან (წეკითხი მათეშ 7:16—20).

8, 9. მუჭო შემლებნა ვოძირათ, ნამდა მიჸორა ღორონთი დო თიშ მარდიელეფ ვორეთ?

⁸ ღორონთიშ ჸოროფას ვოძირანთ, მუჟამს იფცვენთ თიშ მცნებეფს დო გიმიბრინუანთ თიშ მითითებეფს. თეშ კეთება მართალო ვა რე ძნელი. იეჰოვაშ კანონეფ ოღალცალო ვეგებჯანნა. პირიქით, თინა მოხვარნა უმოს კმაყოფილეფ დო ბედნერეფ ვორდათ (ესაია 48:17, 18). ქიმეპუნთ იეჰოვაშ ზუკოლს-და, ჩქინ  ზეციერ მუმას ვოძირანთ, ნამდა თიშ მარდიელ ვორეთ ირფელშენ, მუდგას ჩქინო ორთუ. მარა ამდღა ბრელ ვა რე ღორონთიშ მარდიელი. ჩქი ვა მოკონა ვორდათ თი კათაცალ უმარდულეფი, ნამუთ იესოშ დროს ცხოვრენდეს. ართშა იესოქ კეთრი ოჭირდუნ ფერ ვით ლეხ ოსქილიდუ, მარა ხვალე ართიქ დირთ მადლობაშ ორაგადშა (ლუკა 17:12—17). ჩქი მოკონა მიფქცუათ თი ართ მარდიელცალო დო ვართ ხოლო ჩხორო უმარდულცალო!

⁹ იეჰოვაშ ნამ მცნებეფ ოკო დეფცვათ? თე წიგნის ბრელ შხვადოშხვა მცნებაშენ რდუ რაგად, მარა მორთ ასე ქიგიფშინათ თავრეშე მუსხირენ. ღორონთიშ მცნებეფიშ მეჸუნა მიმეხვარებუნა, ქუდოფსკიდათ ღორონთიშ ჸოროფას.

10. გენწყი, მუშენ რე საჭირო ირიათო იბგურუათ დო უმოს ქიგებგათ ღორონთიშ გურშენ?

¹⁰ ქუგოკო იეჰოვას ქიდეახლოვენ-და, საჭირო რე მეტ ქიგეგე თიშ გურშენ. ჩქი ირიათო ოკო იბგურუათ დო გებგათ მეტ ღორონთიშ გურშენ. მაგალთო წერმიდგინ, ნამდა  სერით გალე რექ დო მანგარ ჩხურ რე. გიტიბუენ თიშენ, დაჩხერ გაფუ აკორზამილი. ხომ ვემთაშკირიტანდ დაჩხერს? მუშო ოკო რაგად, ვარ. პირიქით, უმოსო ქიმთუტურუანდი. დაჩხერქ ვა შკირტას დო ვეგიჸინენ თიშენ, დიშკაშ მითოტურაფა რე საჭირო. თეშნერო, იეჰოვაშ ჸოროფაქ ვა გომრგიდანინ თიშენ, საჭირო რე ირიათო იბგურუათ დო უმოს ქიგებგათ ღორონთიშ გურშენ (იგავები 2:1—5).

11. მუჭო იმოქმედ იესოშ სიტყვეფქ მოწაფეეფწკუმა?

¹¹ იესოს ოკოდ, მუშ მოწაფეეფს დღას ვა გურგიდესკო იეჰოვა ღორონთიშ დო თიშ სიტყვაშ ჸოროფაქ. გათელებაშ უკულ იესოქ მუშ ჟირ მოწაფეს ეუნწყ ებრაულ წერილეფს ინოჭარილ წინასწარნარაგადუეფი, ნამუქით იესოშა შესრულუ. მუჭო იმოქმედ თექ მოწაფეეფწკუმა? დრო-ხანიშ უკულ თინეფქ თქვის: „გურ ვა მაფდესო გოღვიღვინაფილ, მუჟამს თინა შარას მირაგადუდეს დო წმინდა წერილეფს ემწყუნდესინ?“ (ლუკა 24:32).

12, 13. ა) მუნერ დამოკიდებულება უღუ ამდღა ბრელს ღორონთი დო ბიბლიაშ ჸოროფაშე? ბ) მუ ოკო ვაკეთათ, ჸოროფაქ ვა გომრგიდანინ თიშენ?

¹² ხიოლით დო ჸოროფათ ვეგაფშუო გურქ, მუჟამსით პირველო მირჩქილე თინა, მუდგას ბიბლია ოგურუანს? მუ რაგად ოკო, სი ხოლო შხვეფცალო მანგარო გახიოლედ თენა. ასე მთავარ რე, ვა გოირგიდას თე ჸოროფაქ დო უმოსო გამანგარე. ქეცადე ოკო, ვემიაჸუნე ამდღა მსოფლიოს რენ თი ტენდენციას. იესოქ წინასწარ თქუ: „ბრელს ჸოროფა გოურგიდუ“ (მათე 24:12). მუ ოკო აკეთე, იეჰოვა ღორონთიშ დო ბიბლიურ ჭეშმარიტებაშ ჸოროფაქ ვა გოირგიდასინ თიშენ?

¹³ ვემიოტუა იეჰოვა ღორონთიშ დო იესო ქრისტეშ გაჩინებაფა (იოანე 17:3). იფიქრ თიშე, მუდგას ღორონთიშ სიტყვაშე გურაფლენქ დო ქოკითხ სქან დუდის: „მუს მირაგად თენა იეჰოვა ღორონთიშ გურშენ? მუშენ ოკო მიჸორდას იეჰოვა მთელ გურით, გონებათ დო შურით?“ (წეკითხი 1 ტიმოთეშ 4:15). თეცალ კითხვეფშენ ფიქრ მიგეხვარებ, ვა გოირგიდას იეჰოვაშ ჸოროფაქ.

14. მუჭო მოხვარნა ლოცვა, ვა გომრგიდან ღორონთიშ ჸოროფაქ?

 ¹⁴ ხოლო ართ საშვალება, ღორონთიშ ჸოროფაქ ვა გომრგიდანინ თიშო, რეგულარულ ლოცვა რე (1 თესალონიკელები 5:17). თე წიგნიშ მა-17 დუდშე გებგით, ნამდა ლოცვათ შემლებნა ღორონთწკუმა ხოლოშიან ურთიერთობა მიღდან. საერთოთ, ართიანწკუმა ხშირ დო გურგონწყუმილ რაგად ურთიერთობეფს ამანგარენს. თეგვარო, მუჟამსით ღორონთის ხშირას ლოცვათ ურაგადუთინ, თიწკუმა უმოს ხოლოშიან ურთიერთობა მაღვენუნა. ლოცვაშ დროს დღას ოკო ვა ფთქუათ ართ დო იგივე სიტყვეფ უაზროთ დო მექანიკურო, გრძნობეფიშ უმშო. ჩქინ ლოცვა ოკო გუდას მუმაწკუმა სქუაშ რაგადის. მუშო ოკო რაგად, ღორონთის პატიცემათ ოკო დურაგადუათ, თიშ ნდობა მიღდან დო ირფელ ალალო ქივეჩუათ (ფსალმუნი 62:8). ბიბლიაშ პირად გურაფა დო გურგონწყუმილ ლოცვა თაყვანიშცემაშ მნიშვნელოვან ნაწილ რე დო მოხვარნა, ქუდოფსკიდათ ღორონთიშ ჸოროფას.

15, 16. მუშენ რე სამეფოშ გურშენ ქადაგება ჩქინო დიდ პატი და განძი?

¹⁵ ღორონთიშ თაყვანიშცემაშა ხვალე ბიბლიაშ პირად გურაფა დო ლოცვა ვემშმურს. თიშა შხვეფწკუმა ჩქინ რწმენაშენ რაგად ხოლო მიშმურს. ქურაგადუქო შხვეფს ბიბლიურ ჭეშმარიტებაშენ? თეცალ მსახურება დიდ პატი რე ჩქინო (ლუკა 1:74). მუჟამს ხალხის ჭეშმარიტებას ვეჩიებუთ იეჰოვა ღორონთიშ გურშენ, თეთ არძაშ უმოს მნიშვნელოვან მითითებას მეპჸუნთ, ნამუთ ოხუ სახიოლო ამბეშ ქადაგებას ღორონთიშ სამეფოშ გურშენ დო თეს არძა ჭეშმარიტ ქრისტიან ოკო ორთუდას (წეკითხი მათეშ 24:14; 28:19, 20).

¹⁶ პავლე მოციქულ მსახურებას მანგარო აფასენდ, ათეშგურშენ თის, „განძი“ დუძახ (2 კორინთელები 4:7). არძაშ უჯგუშ საქმეს ვორთუთ, მუჟამს ხალხის იეჰოვა ღორონთიშ დო თიშ განზრახვეფშენ ურაგადუთ. თე საქმეს ჯგირ შედეგეფ მოჸუნს. ქადაგებათ გურმართალ კათას ვოხვარუთ, ქიდეახლოვან ზეციურ მუმას დო ქიდიჭყან სწორ შარათ გილულა, ნამუთ მარადიულ  სიცოცხლეშა რე მიმაჸუნაფალი. შხვა მუთუნ საქმე ქუმოიღანსო თეშე უმოს კმაყოფილებას? ქადაგება ღორონთიშ რწმენას დო ჸოროფას გიმანგარენს. იეჰოვა ხანდას ვაიდინუანს (ებრაელები 6:10). გაგრძელ გურგედვალირო ქადაგება დო თენა მიგეხვარებუ, ქუდოსკიდე ღორონთიშ ჸოროფას (წეკითხი 1 კორინთელეფიშ 15:58).

17. მუშენ ვა რე სამეფოშ გურშენ ქადაგება გინადვალარ საქმე?

 ¹⁷ ვაგმოჭყორდან, ნამდა სამეფოშ გურშენ ქადაგება გინადვალარ საქმე ვა რე. ბიბლიას ინოჭარ: „იქადაგ სიტყვა უგნუდვალუო“ (2 ტიმოთე 4:2). მუშენ ვეშილებე თე საქმეშ გინოდვალა? ღორონთიშ სიტყვა მირაგადნა: „ხოლოს რე იეჰოვაშ დიდ დღა, ხოლოს რე დო მანგარო იჩქარებუ“ (სოფონია 1:14). ხოლოს რე თი დღა, მუჟამსით იეჰოვა მოსპუნს უბადო ხალხის. ათეშგურშენ საჭირო რე ხალხიშ გაფრთხილება! თინეფს ოკო უჩქუდან, ნამდა ზუსტას ასე რე თიშ დრო, აღიარან იეჰოვა მუნეფიშ უზენაეს ხელისუფალო. აღსასრულ „ვედეგვიანუანს“ (აბაკუმი 2:3).

18. მუშენ ოკო ფცათ იეჰოვას თაყვან ჭეშმარიტ ქრისტიანეფწკუმა ართო?

¹⁸ იეჰოვას ოკო, ნამდა თის სახალხოთ ფცათ თაყვან ჭეშმარიტ ქრისტიანეფწკუმა ართო. ათეშგურშენ თიშ სიტყვას ინოჭარ: „ყურადღებიანეფ ვორდათ, ნამდა წუვახალისათ ართიან ჸოროფაშო დო ჯგირ საქმეეფშო. ვემუოტუათ ჩქინ კრება, მუჭოთ ნამთინეს ჩვევათ უღუ, პირიქით გურს ეუქექუათ ართიანს, მუთ უმოსო ვორწყეთ თი დღაშ მონჭაფას“ (ებრაელები 10:24, 25). ქრისტიანულ შეხვალამეფს თანამორწმუნეეფწკუმა ართო შემლებუნა ღორონთიშ განდიდება, თაყვანიშცემა დო ართიანიშ გამანგარება.

19. მუჭო შემლებნა ხე შეუნწყუათ ქრისტიანულ კრებას ჸოროფაშ დო მეგობრობაშ გამანგარებას?

¹⁹ იეჰოვაშ შხვა თაყვანიშმცემელეფწკუმა ურთიერთობათ ხეს უნწყუნთ კრებას ჸოროფაშ დო მეგობრობაშ გამანგარებას. მუჭოთ იეჰოვა ორწყე ჩქინ ჯგირ თვისებეფსინ თეშ, ჩქი ხოლო ართიანიშ ჯგირს ოკო ვორწყედათ. თანამორწმუნეეფშე სრულყოფილებას ოკო ვეველუდათ. ვაგგოჭყორდას, ნამდა იეჰოვაშ თაყვანიშმცემელეფ სულიერ რდუალაშ შხვადოშხვა ეტაპის რენა დო არძა ფჩირთუთ (წეკითხი კოლოსელეფიშ 3:13). ხოლოს რდა თი ხალხწკუმა, მიდგას იეჰოვა უჸორს. თენა სქან სულიერ რდუალას შეუნწყუნს ხეს. სულიერ და დო ჯიმალეფწკუმა ართო იეჰოვაშ თაყვანიშცემა მიგეხვარებ,  ქუდოსკიდე იეჰოვაშ ჸოროფას. მუჭო აჯილდოენს იეჰოვა თინეფს, მიდგა ართგურო ცენს თაყვანს დო თეგვარო დუთმოსკიდუ თიშ ჸოროფას?

20, 21. მუ რე „ჭეშმარიტ სიცოცხლე“ დო მუშენ შემლებნა თიშ რაგად, ნამდა დიდებულ იმენდ მიღუნა?

²⁰ იეჰოვა მუშ მსახურეფს სიცოცხლეთ აჯილდოვენს. მარა მუნერ სიცოცხლეთ? დეფიქრი: ქიშილებენო ფთქუათ, ნამდა ამდღარ ცხოვრება ცხოვრება რენ? ბრელშო თე კითხვაშ პასუხი არგამა რე. ბოლო-ბოლო, შურ ქიმემღუნა, ქობჭკომუნთ დო ქოფშუნთ. მუჟამს ბედნერ დო კმაყოფილ რექინ, შილებე თქუე: „ცხოვრება ათეს ჯოხო!“. მარა ბიბლიაშე იძირე, ნამდა ამდღა მითინშენ ვერაგადე „ჭეშმარიტ სიცოცხლე“ უღუნია.

²¹ ღორონთიშ სიტყვა ქრისტიანეფს ურაგად, ნამდა „ხეშე ვა გუტუან ჭეშმარიტ სიცოცხლე“ (1 ტიმოთე 6:19). თე სიტყვეფშე იძირე, ნამდა „ჭეშმარიტ სიცოცხლე“ რე თინა, მუდგას მომავალს ველუთ. მუჟამს სრულყოფილებას ქიმვოჭირინუანთინ, ჩქი ცოცხალეფ იპჸით თე სიტყვაშ სრულ გაგებათ, მუშენდა ცხოვრება თინერ იჸუაფ, მუნერით ღორონთის აფუდ დუდშე განზრახული. „ჭეშმარიტ სიცოცხლეს“ ანუ მარადიულ სიცოცხლეს თიმწკუმა მივოჭირინუანთ, მუჟამს სამოთხეთ გინორთელ დედამიწას მშვიდობიანო იფცხოვრენთ, ირნერო ჯამრთელეფ დო ბედნერეფ იპჸით (1 ტიმოთე 6:12). დასურო, მუ დიდებულ იმენდ მიღუნა!

22. მუჭო შეილებ ხეშე ვა გუტუე „ჭეშმარიტ სიცოცხლე“?

²² მუჭო შილებე ხეშე ვა გუტუათ „ჭეშმარიტ სიცოცხლე“? პავლე მუჟამსით „ჭეშმარიტ სიცოცხლეშე“ იჩიებუნ, ქრისტიანეფს თის ხოლო ურაგად, ნამდა „აკეთან სიკეთე“ დო „გემდიდრან ჯგირ საქმეეფით“ (1 ტიმოთე 6:18). ბრელ მუთუნ რე თიშა დამოკიდებულ, მუჭო გიმიბრინუანთ ცხოვრებას ბიბლიაშე ნაგურეფ ჭეშმარიტება. ნიშნენსო პავლეშ სიტყვეფი თის, ნამდა „ჭეშმარიტ სიცოცხლე“ ჩქინ ჯგირ საქმეეფიშ კეთებათ მუმაჩამუნან?  ვარ. „ჭეშმარიტ სიცოცხლეშ“ მეღება შილებე ღორონთიშ „ჭყოლოფუათ“ (რომაელები 5:15). იეჰოვას მოწონს დო ხვამანს თინეფს, მით ართგურო ომსახურ თის. ღორონთის ოკო სი ხოლო მიღე „ჭეშმარიტ სიცოცხლე“. თეცალ სიცოცხლე — მარადიულ ბედნერობა დო მშვიდობა — ელუ თინეფს, მით სკიდუ ღორონთიშ ჸოროფას.

23. მუშენ რე აუცილებერ, ქუდოსკიდე ღორონთიშ ჸოროფას?

²³ ჩქინ დუდის ოკო ქოპკითხათ: „ქოფცენქო ღორონთის თაყვანს თეშ, მუჭოთ ბიბლია მოგურუანს“? ირდღას ქუვორთუთ ირფელს თიშო, ნამდა თე კითხვას დადებითო ქუპასუხათ-და, ჩქი სწორ შარას გივორეთ. იეჰოვა ჩქინ დუდიშ გითაფორაფალ რე. თინა დოთხილანს მუშ ართგურ ხალხის თე ქიანაშ ბოლო დღალეფს დო მაცხოვრენა ახალ ქიანას, ნამუთ კარს რე მონჭაფილი. მუ ბედნერეფ იპჸით, მუჟამსით თე დრო ქუმურსი! კმაყოფილ იპჸუაფუთ, თე ბოლო დღალეფს სწორ არჩევან ვაკეთით თიშენ. ამდღა თეცალ არჩევანს გაკეთენქ-და, მიოჭირინუანქ „ჭეშმარიტ სიცოცხლეს“ დო იცხოვრენქ მარადიულო, მუჭოთ თენა იეჰოვას დუდშე ულამუდ კაცობრიობაშო!