1, 2. ¿Máax bey upʼéel jach maʼalob kúuchil utiaʼal k-taʼakikbaeʼ?

TUKULTEʼ xíimbalil a bin tiʼ uláakʼ kaajeʼ, ku joʼopʼol u sen nookoytal. Tiʼ leloʼ ku jáan káajal u léembal yéetel u kíilbal le cháak teʼ kaʼanoʼ, yéetel ku wojchajal upʼéel kʼaʼamkach jaʼ. Techeʼ ku lakchajal a wáalkab utiaʼal a kaxtik tuʼux a taʼakikaba. Ka wilik túuneʼ teʼ jáal bejoʼ yaan upʼéel chan pasel jach maʼalob kʼaxaʼanil yéetel maʼ tu yokol jaʼiʼ. ¡Bukaʼaj kiʼimakil a wóol úuchik a wilik le paselaʼ!

² Bejlaʼeʼ kuxaʼanoʼon tiʼ kʼiinoʼob ku keʼetloʼob bey yéetel upʼéel kʼaʼamkach jaʼeʼ, tumen le yóokʼol kaabaʼ jach chuup yéetel talamiloʼob yéetel táan u bin u maas kʼastal. Baʼaleʼ yaan upʼéel tuʼux jach maʼalob jeʼel u páajtal k-taʼakikbaeʼ; le kúuchilaʼ jeʼel u kanáantikoʼon tiʼ jeʼel baʼalak yajil bey minaʼan utskíinajil tiʼeʼ. ¿Máakalmáak le kúuchilaʼ? Ilawil baʼax ku yaʼalik le salmista tu yoʼolal Jéeobaoʼ: «¡Teech in taʼakbesaj, in [salvador], in [Dios tiʼ] máax [in kʼubmaj] in wóol!» (Salmo 91:2).

3. ¿Baʼax unaj k-beetik utiaʼal k-ilik Jéeoba bey upʼéel kúuchil tuʼux jeʼel u páajtal k-taʼakikbaeʼ?

³ Jéeoba, u Yuumil yéetel u Noj Jalaʼachil tuláakal baʼaleʼ, bey upʼéel kúuchil tuʼux jeʼel u  páajtal k-taʼakikbaeʼ. ¡Lelaʼ jach táaj maʼalob! Letiʼeʼ maas jach yaan u muukʼ tiʼ jeʼel máaxak yéetel tiʼ jeʼel baʼalak jeʼel u beetiktoʼon loobeʼ. Yéetel kex ka beetaʼaktoʼon upʼéel kʼaas wa upʼéel loobeʼ, Jéeobaeʼ jeʼel u páajtal u láaj utskíintikeʼ. ¿Baʼax unaj k-beetik utiaʼal k-ilik Jéeoba bey upʼéel kúuchil tuʼux jeʼel u páajtal k-taʼakikbaeʼ? Kʼaʼabéet k-kʼubik óol tiʼ letiʼ. Le Biblia xanoʼ ku yaʼaliktoʼon: «Pʼáateneʼex tiʼ u yaakunaj Jajal Dios» (Judas 21). Toʼon túuneʼ kʼaʼabéet k-pʼáatal ichil u yaakunaj Dios, yéetel kʼaʼabéet k-pʼáatal jach náatsʼ tiʼ k-Taata yaan teʼ kaʼanoʼ. Wa k-beetik beyoʼ, yaan k-ilik Jéeoba bey upʼéel kúuchil tuʼux jeʼel u páajtal k-taʼakikbaeʼ. Baʼaleʼ ¿bix jeʼel u páajtal k-antal jach náatsʼ tiʼ Dioseʼ?

4, 5. ¿Baʼaxoʼob tsʼoʼok u tsʼáaiktoʼon Dios utiaʼal u yeʼesiktoʼon u yaabilaj?

⁴ Jéeobaeʼ jejeláas bix tsʼoʼok u yeʼesiktoʼon u yaabilaj. Koʼox ilik wa jaypʼéeliʼ, tumen lelaʼ yaan u yáantkoʼon utiaʼal k-pʼáatal ichil u yaabilaj. Yáaxeʼ, kʼaʼajaktech jujumpʼéel tiʼ le maʼalob baʼaloʼob tsʼoʼok a kanik teʼ libroaʼ. Kʼaʼajseʼ, utiaʼal k-ilik jatsʼutsil le kuxtalaʼ, Jéeobaeʼ u tsʼaamajtoʼon upʼéel kiʼichkelem kúuchil utiaʼal k-kajtal: letiʼe Luʼumaʼ. Teʼ Luʼumaʼ jach yaan baʼal jaantbiliʼ, jach yaan jaʼiʼ yéetel yaʼab uláakʼ baʼaloʼob jeʼel u páajtal k-jóoʼsik ichileʼ; chuup xan yéetel u jejeláasil jatsʼuts baʼalcheʼob yéetel jatsʼuts kúuchiloʼob. Tsʼoʼok ilik xaneʼ Dios beet u tsʼíibtaʼal le Bibliaoʼ; teʼ Bibliaoʼ tiʼ ku yaʼaliktoʼon bix u kʼaabaʼiʼ yéetel bix letiʼ. Le Biblia xanoʼ ku yaʼalikeʼ Dioseʼ tu túuxtaj u kiʼichkelem Hijo way Luʼumeʼ yéetel tu chaʼaj u muʼyaj yéetel u tsʼáaik u kuxtal t-óolal (Juan 3:16). Úuchik u beetik lelaʼ, Dioseʼ tu síijtoʼon upʼéel jach maʼalob baʼal; yoʼolal le baʼax tu síijtoʼonaʼ táan k-páaʼtik kʼamik upʼéel kuxtal jach táaj maʼalob.

⁵ Utiaʼal xan ka béeyak le kuxtalaʼ Dioseʼ yaan uláakʼ baʼax tsʼoʼok u beetik: tsʼoʼok u tsʼáaik tiʼ Jesús upʼéel gobierno wa reino teʼ kaʼanoʼ. Maʼ kun xáantaleʼ le Reinoaʼ yaan u xuʼulsik tuláakal k-muʼyajiloʼob, yéetel yaan u sutik paraísoi le Luʼumaʼ.  ¡Tiʼ túun ken k-kuxtal ich kiʼimak óolal yéetel jeetsʼelil utiaʼal mantatsʼiʼ! ¡Lelaʼ upʼéel baʼal jach táaj maʼalob! (Salmo 37:29.) Baʼaleʼ maʼiliʼ kʼuchuk le kʼiin jeʼeloʼ, u tsolnuʼukoʼob Dioseʼ ku yáantkoʼon k-bis upʼéel maʼalob kuxtal. Uláakʼ baʼax u siimajtoʼon Jéeobaeʼ letiʼe u páajtalil k-tʼaan tu yéetel ich payalchiʼ wa oracionoʼ; lelaʼ jeʼel u páajtal k-beetik jeʼel baʼalak oraeʼ. Tuláakal lelaʼ chéen jujumpʼéel tiʼ le bix u yeʼesik u yaabilaj Dios ta woʼolal yéetel tu yoʼolal tuláakal wíinikoʼ.

6. ¿Baʼax ku páaʼtaʼal ka a beet yoʼolal le yaabilaj ku yeʼesiktech Jéeobaoʼ?

⁶ Beoraaʼ, techeʼ maʼalob ka beet le kʼáatchiʼaʼ: «¿Baʼax ku páaʼtaʼal ka in beet yoʼolal le yaabilaj ku yeʼesikten Jéeobaoʼ?». Maʼ xaaneʼ, yaʼabeʼ jeʼel u yaʼalikeʼ: «Ka in yaabilt xan». Techeʼ, ¿bey wa xan a tuukuloʼ? Jesuseʼ tu yaʼaleʼ u maas nojchil u leyoʼob Dioseʼ letiʼ lelaʼ: «Yaabilt Yuumtsil a Jajal Dios [y]éetel tuláakal a puksiʼikʼal, yéetel tuláakal a wóol, yéetel tuláakal a naʼat» (Mateo 22:37). Jach yaan xan baʼax oʼolal unaj a yaabiltik Jéeoba. Baʼaleʼ utiaʼal a yaabiltik Dios yéetel tuláakal a puksiʼikʼal, tuláakal a wóol yéetel tuláakal a naʼateʼ, ¿chéen wa unaj a wuʼuyik yaabilaj tu yoʼolal?

7. ¿Chéen wa unaj k-uʼuyik yaabilaj tu yoʼolal Dios, yéetel baʼaxten ka núukik beyoʼ?

⁷ Le Bibliaoʼ ku yeʼesikeʼ maʼ chéen unaj k-uʼuyik yaabilaj tu yoʼolal Diosiʼ. Kex kʼaʼabéet k-uʼuyik yaabilaj tu yoʼolal Dioseʼ, leloʼ chéen u káajbal utiaʼal k-eʼesik yaabilaj tiʼ. Utiaʼal a naʼatik tubeeleʼ, koʼox ketik beyaʼ: wa teech a kʼáat upʼéel manzanaeʼ, ¿jeʼel wa u kiʼimaktal a wóol ka tsʼaʼabaktech chéen upʼéel u neekʼeʼ? ¿Máasaʼ maʼatan? Le u neekʼoʼ kʼaʼabéet utiaʼal ka jóokʼok u kúul u cheʼiʼ manzana, baʼaleʼ techeʼ baʼax a kʼáateʼ upʼéel u yich. Bey xan u yúuchul yéetel le yaabilaj k-uʼuyik yoʼolal Jéeobaoʼ: kʼaʼabéet xan u nojochtal yéetel u tsʼáaik u yich. Le Bibliaoʼ ku yaʼalik: «U yaabiltaʼal Jajal Dioseʼ u yuʼubaj tʼantaʼal u [leyoʼob]; yéetel u [leyoʼobeʼ] maʼ talamoʼobiʼ» (1 Juan 5:3). Máax túun  u jach yaabilmaj Dioseʼ ku yeʼesik yéetel baʼaxoʼob ku beetik, u yaabilajeʼ ku tsʼáaik u yich (Mateo 7:16-20).

8, 9. ¿Bix k-eʼesik yaabilmaj Dios yéetel k-tsʼáaik nib óolal yoʼolal baʼax tsʼoʼok u beetik t-oʼolal?

⁸ Ken k-uʼuy u tʼaan Dios yéetel ken kuxlakoʼon jeʼex u kʼáateʼ, k-eʼesik yaabilmaj. Lelaʼ maʼ upʼéel baʼal ku pechʼkoʼoniʼ, tumen u leyoʼob Jéeobaeʼ maʼ beyoʼob upʼéel kuucheʼ. Baʼaxeʼ tsʼaʼabaʼan utiaʼal ka u taastoʼon kiʼimak óolal ichil k-kuxtal (Isaías 48:17, 18). Ken k-chaʼa u nuʼuktikoʼon Jéeobaeʼ, k-eʼesik jach táan k-tsʼáaik nib óolal wa gracias yoʼolal tuláakal baʼax tsʼoʼok u beetik t-óolal. Baʼaleʼ chéen upʼíit máakoʼob tsʼáaik nib óolal tiʼ Jéeoba. Toʼoneʼ maʼ unaj k-beetik jeʼex tu beetil jujuntúul máakoʼob tu kʼiiniloʼob Jesusiʼ. Utéenjeakileʼ, Cristoeʼ tu tsʼakaj diez utúulul máakoʼob kʼojaʼanoʼob tiʼ lepra, baʼaleʼ chéen utúul suunaj u tsʼáa u nib óolalil (Lucas 17:12-17). Toʼoneʼ unaj k-beetik jeʼex le máax tu tsʼáaj nib óolaloʼ, maʼ jeʼex u maasil maʼ tu beetoʼoboʼ.

⁹ ¿Máakalmáak túun u leyoʼob Jéeoba unaj k-tsʼoʼokbesik? Yaan tsʼoʼok ilik teʼ libroaʼ. Baʼaleʼ koʼox ilik wa jaypʼéeliʼ, tumen wa k-tsʼoʼokbesik u leyoʼobeʼ, yaan u páajtal k-pʼáatal ichil u yaabilaj.

10. ¿Baʼaxten maʼ unaj k-xulik k-kaambal tiʼ Jéeobaiʼ?

¹⁰ Utiaʼal k-maas natsʼikba tiʼ Jéeobaeʼ unaj k-kʼaj óoltik tubeel. Mix utéen unaj k-pʼatik kaambal tiʼ letiʼ. Tukulteʼ tiaʼanech táankab tiʼ upʼéel áakʼab jach táan u beetik keʼeleʼ, techeʼ ka tʼabik upʼéel kʼáakʼ utiaʼal a kʼíich. ¿Jeʼel wa a chaʼik u jáabal le kʼáakʼoʼ? ¿Máasaʼ maʼatan? Jeʼex a wilik u bin u jáabal le kʼáakʼoʼ ka julik uláakʼ siʼ ichil, tumen wa ku tuʼupuleʼ jeʼel u kíimskech le keʼeloʼ. Jeʼel bix le siʼ ku beetik maʼ u jáabal le kʼáakʼoʼ, le kaambal k-beetik tiʼ Diosoʼ ku yáantaj utiaʼal maʼ u jáabal le yaabilaj k-uʼuyik tu yoʼolaloʼ (Proverbios 2:1-5).

11. U kaʼansajoʼob Jesuseʼ, ¿bix tu beetaj u yuʼubkuba u disipuloʼob?

¹¹ Jesuseʼ maʼ u kʼáat kaʼach ka jáabak u yaabilaj u disipuloʼob tu yoʼolal Jéeoba yéetel tu yoʼolal u kiʼichkelem Tʼaan. Ka tsʼoʼok u kaʼa kuxkíintaʼaleʼ, Jesuseʼ tu tsolaj tiʼ kaʼatúul u disipuloʼob jujumpʼéel tiʼ le baʼaxoʼob u yaʼalmaj le Biblia béeychajoʼob tiʼ letiʼoʼ. ¿Bix tu yuʼubilubaʼob tu yoʼolal? Letiʼobeʼ tu yaʼaloʼob: «¿Maʼ wa jaaj bey jumpʼéel kʼáakʼ j-tʼaʼab [ichil] k-puksiʼikʼal le ka j-tʼaanaj t-éetel teʼ j-bejoʼ, [le] táan u tsolik toʼon le Kiliʼich Tsʼíiboʼoboʼ?» (Lucas 24:32).

12, 13. 1) ¿Baʼax tsʼoʼok u yúuchul tiʼ yaʼabach máak yoʼolal u yaabilajoʼob tiʼ Dios yéetel tiʼ baʼax ku kaʼansik le Bibliaoʼ? 2) ¿Baʼax jeʼel u páajtal k-beetik utiaʼal maʼ u jáabal k-yaabilajeʼ?

¹² Ka joʼopʼ a kanik baʼax jach tu jaajil ku kaʼansik le Bibliaoʼ, ¿máasaʼ jach kiʼimakchaj a wóol yéetel jach ta wuʼuyaj yaabilaj tu yoʼolal Dios, bey ka tʼaʼabak upʼéel kʼáakʼ ta puksiʼikʼaleʼ? Bey waleʼ. Tiʼ yaʼab máaxeʼ bey tsʼoʼok u yúuchloʼ. Baʼaleʼ u talamil beoraaʼ a wilik maʼ u jáabal le yaabilaj ka wuʼuyik tu yoʼolal Diosoʼ yéetel a beetik u maas tóochʼbal. Maʼ unaj k-chaʼik u yúuchultoʼon le baʼax tu yaʼalaj Jesús kun úuchul tiʼ yaʼab máak teʼ kʼiinoʼobaʼ: «U yaakunaj yaʼaboʼobeʼ bin síisak» (Mateo 24:12, Le Tumben Nuptʼan, LTN). ¿Baʼax jeʼel u páajtal a beetik utiaʼal maʼ u síistal a yaabilaj tu yoʼolal Jéeoba yéetel tu yoʼolal baʼaxoʼob tsʼoʼok a kanik teʼ Bibliaoʼ?

¹³ Maʼ xulik a kaambal tiʼ Jéeoba yéetel tiʼ Jesucristo (Juan 17:3). Ken a xok le Bibliaoʼ jach tuukulnen tiʼ baʼax ka xokik, yéetel kʼáate: «¿Baʼax ku kaʼansikten yoʼolal Jéeoba? ¿Táan wa u  yeʼesikten uláakʼ baʼax oʼolal kʼaʼabéet in yaabiltik yéetel tuláakal in puksiʼikʼal, in tuukul yéetel in wóol?» (Salmo 77:12). Wa ka tuukul tiʼ le kʼáatchiʼobaʼ, a yaabilaj tiʼ Jéeobaeʼ mix bikʼin kun jáabal.

14. ¿Bix u yáantkoʼon le payalchiʼ utiaʼal k-uʼuyikba naatsʼ tiʼ Jéeobaoʼ?

¹⁴ Utiaʼal xan maʼ u jáabal k-yaabilaj tu yoʼolal Jéeobaeʼ kʼaʼabéet k-tʼaan sáamsamal tu yéetel ich payalchiʼ (1 Tesalonicailoʼob 5:17). Tu 17 xookil le libroaʼ t-kaneʼ le payalchiʼoʼ upʼéel baʼal jach maʼalob u tsʼáamajtoʼon Dios. Jeʼex toʼon k-jach amigotikba yéetel wa máax tumen ku suuktal k-tsikbaltik tu yéetel baʼax ku yúuchultoʼoneʼ, wa xan ku suuktal k-tʼaan sáamsamal yéetel Jéeobaeʼ yaan xan k-uʼuyikba naatsʼ tiʼ letiʼ. Baʼaleʼ ken payalchiʼinakoʼoneʼ unaj k-ilik maʼ k-beetik upʼéeliliʼ bixi mix xan ka jóokʼok chéen jeʼel bixakeʼ. Kʼaʼabéet xan k-tʼaan yéetel Jéeoba jeʼex u tʼaan utúul chan paal yéetel u papaeʼ. Baʼaleʼ kʼaʼabéet k-beetik yéetel tsiikil, yéetel unaj u jóokʼol t-puksiʼikʼal baʼax ken k-aʼal tiʼ (Salmo 62:8). Jach kʼaʼabéet túun k-jóoʼsik u tiempoi utiaʼal k-xokik baʼax ku yaʼalik le Bibliaoʼ yéetel k-tʼaan sáamsamal yéetel Dios ich payalchiʼ, tumen lelaʼ táakaʼan ichil le adoración k-tsʼáaik tiʼ letiʼoʼ. Wa k-beetik beyaʼ yaan u páajtal k-pʼáatal ichil u yaabilaj.

15, 16. K-kʼaʼaytik le maʼalob péektsiloʼ, ¿baʼaxten kʼaʼabéet k-ilik bey upʼéel baʼal jach maʼalobeʼ bey xan bey upʼéel ayikʼalileʼ?

¹⁵ Ken k-xok le Biblia yéetel ken payalchiʼinakoʼoneʼ táan k-adorartik Dios, baʼaleʼ lelaʼ u suukileʼ t-juunal yaniloʼon táan k-beetik. Beoraaʼ koʼox tʼaan tiʼ upʼéel bix k-adorartik Dios tu táan u maasil: le k-tsikbaltik tiʼ uláakʼ máakoʼob le baʼax tsʼoʼok k-kanikoʼ. ¿Yaan wa tiʼ máax tsʼoʼok a tsikbaltik baʼax tsʼoʼok a kanik teʼ Bibliaoʼ? Wa beyeʼ, tsʼoʼok a wuʼuyik u kiʼimak óolalil a táakpajal tiʼ upʼéel jach maʼalob meyaj u tsʼaamajtoʼon Jéeoba (Efesoiloʼob 3:8). Ken tʼaanakoʼon tiʼ baʼaxoʼob tsʼoʼok k-kanik yoʼolal Jéeobaeʼ, táan k-beetik upʼéel jach maʼalob meyaj tsʼaʼan tiʼ tuláakal máax u yoksmaj u yóol tiʼ Cristo: u tsʼaʼabal ojéelbil u maʼalob péektsilil u Reino Dios (Mateo 24:14; 28:19, 20).

¹⁶ Utiaʼal le apóstol Pablo kaʼachoʼ u tsʼáaik kʼaj óoltbil  le maʼalob péektsiloʼ bey ka yanak upʼéel nojoch ayikʼalil tiʼeʼ (2 Corintoiloʼob 4:7). K-tʼaan tiʼ Jéeoba yéetel tiʼ baʼaxoʼob ken u beeteʼ, letiʼe maas maʼalob meyaj yanoʼ, tumen k-beetik utiaʼal k-meyajtik le maas maʼalob Patrón jeʼel u yantaltoʼonoʼ yéetel ku taasik yaʼabach utsil. Ken k-kʼaʼayt le maʼalob péektsiloʼ, k-áantik  máaxoʼob uts u puksiʼikʼaloʼob utiaʼal u natsʼkubaʼob tiʼ Dios yéetel ka xiʼikoʼob tu bejil le kuxtal minaʼan u xuuloʼ. ¿Baʼax uláakʼ meyajil jeʼel u maas taasik kiʼimak óolaleʼ? Ken xan tʼaanakoʼon tiʼ Jéeoba yéetel tiʼ le Bibliaoʼ, ku maas yantal k-fe yéetel k-yaabilaj tiʼ Dios. Jéeoba xaneʼ jach kʼambeʼen u yilik tuláakal baʼax k-beetik utiaʼal k-kʼaʼaytik le maʼalob péektsiloʼ (Hebreob 6:10). Jeʼex túun k-ilkoʼ, wa mantatsʼ k-jóokʼol kʼaʼayt le maʼalob péektsiloʼ, lelaʼ ku yáantkoʼon utiaʼal k-pʼáatal ichil u yaabilaj Dios (1 Corintoiloʼob 15:58).

17. ¿Baʼaxten jach unaj u kʼaʼaytal le maʼalob péektsil bejlaʼoʼ?

¹⁷ U kʼaʼaytaʼal u maʼalob péektsilil le Reinooʼ upʼéel meyaj jach unaj u beetaʼal bejlaʼeʼ. Le Bibliaoʼ ku yaʼalik: «Séebkunt a [kʼaʼaytik] le tʼaanoʼ», wa le maʼalob péektsiloʼ (2 Timoteo 4:2, LTN). ¿Baʼaxten jach unaj u beetaʼal le meyajaʼ? Tu yoʼolal baʼax ku yaʼalik le Bibliaaʼ: «¡Tsʼoʼok u náatsʼal u noj kʼiinil Yuumtsil! ¡Tsʼoʼok u náatsʼal, séebaʼan u taal!» (Sofonías 1:14). U kʼiinil túun u xuʼulsaʼal le kʼasaʼan yóokʼol kaab tumen Jéeobaoʼ jach naatsʼ yanil. ¡Le máakoʼoboʼ jach unaj u yojéeltikoʼob lelaʼ! Unaj u naʼatkoʼobeʼ beoraaʼ u kʼiinil u yuʼubkoʼob u tʼaan Jéeoba, tumen le xuʼulsajiloʼ «bíin kʼuchuk jach [tu] kʼiinil» (Habacuc 2:3).

18. ¿Baʼaxten kʼaʼabéet k-muchʼikba k-adorart Jéeoba yéetel le máaxoʼob meyajtik jeʼex utstutʼaanoʼ?

¹⁸ Jéeobaeʼ u kʼáat xan ka k-muchʼba k-adorart yéetel le máaxoʼob meyajtik jeʼex utstutʼaanoʼ. Le beetikeʼ, u Tʼaaneʼ ku yaʼalik: «Unaj k-kaxantik bix jeʼel u páajtal k-áantikba t-baatsileʼ utiaʼal ka yanaktoʼon yaakunaj yéetel utiaʼal k-beetik baʼax uts. Maʼ unaj k-ketikba yéetel le máaxoʼob suuk tiʼob maʼ u taaloʼob j-muchʼtal t-éeteliʼ, baʼaleʼ unaj k-líikʼ óoltikba t-baatsil, [jach unaj k-beetik bejlaʼeʼ] tumen táan a wilikeʼex u náatsʼal u kʼiinil Yuumtsil» (Hebreob 10:24, 25). Ken k-muchʼba yéetel máaxoʼob meyajtik Dios jeʼex utstutʼaaneʼ, jach upʼéel maʼalob súutuk utiaʼal k-kiʼikiʼtʼantik yéetel k-adorartik k-Yuumtsil yaan teʼ kaʼanoʼ. Ku yáantkoʼon xan utiaʼal k-muʼukʼankúuntikba yéetel utiaʼal k-líiʼsik óol t-baatsil.

19. ¿Bix jeʼel k-muʼukʼankúuntik le yaabilaj k-uʼuyik yoʼolal le sukuʼunoʼoboʼ?

¹⁹ K-muchʼikba yéetel máaxoʼob meyajtik Jéeobaeʼ, ku yáantkoʼon utiaʼal k-maas yaabiltkoʼob yéetel utiaʼal k-maas bisikba  tu yéeteloʼob. Baʼax unaj k-ilkeʼ letiʼe jatsʼuts modos yaan tiʼ u maasiloʼ, jeʼex u beetik Jéeoba yéetel toʼonoʼ. Maʼ páaʼtik tiʼ le sukuʼunoʼob ka u beetoʼob tuláakal baʼal jach tubeeloʼ. Kʼaʼajseʼ láaj kʼeban wíinkoʼon yéetel yaan sukuʼunoʼobeʼ maas chan xaan u kʼexik bix u kuxtaloʼob (Colosailoʼob 3:13). Bisaba yéetel máaxoʼob jach tu jaajil u yaabiltmoʼob Jéeoba, beyoʼ yaan u maas muʼukʼantal a wóol tiʼ Dios. Wa ka muchʼkaba utiaʼal a adorartik Jéeoba yéetel máaxoʼob meyajtik jeʼex utstutʼaaneʼ, lelaʼ yaan u yáantkech utiaʼal ka pʼáatkech ichil u yaabilaj Dios. Beoraaʼ koʼox ilik baʼax ken u tsʼáa Jéeoba tiʼ máaxoʼob meyajtik jeʼex utstutʼaan yéetel ku pʼáatloʼob ichil u yaabilajeʼ.

20, 21. ¿Baʼax «le kuxtal jach tu jaajiloʼ», yéetel baʼaxten jach maʼalob ken k-tiaʼalinte?

²⁰ Le jach maʼalob baʼal ken u tsʼáa Jéeoba tiʼ máaxoʼob meyajtik jeʼex u kʼáatoʼ letiʼe kuxtaloʼ, baʼaleʼ ¿baʼax kuxtalil? Óoliʼ tuláakloʼoneʼ jeʼel k-aʼalikeʼ: «¿Maʼ wa kuxaʼaneniʼ? Kin chʼaʼik in wiikʼ yéetel kin janal». Tu kʼiinil xan jach kiʼimak k-óoleʼ jeʼel tak aʼalikeʼ: «Lelaʼ ¡jach túun kuxtal!». Baʼaleʼ le Bibliaoʼ ku yaʼalikeʼ, bejlaʼeʼ tiʼ mix máak yaan upʼéel kuxtal jach tu jaajil kuxtal.

²¹ Le Bibliaoʼ ku yaʼalik tiʼ tuláakal máak ka «u mach[uba tiʼ] le kuxtal minaʼan u xuuloʼ», wa jeʼex u yaʼalik le Nuevo Testamento tiʼ José María Valverdeoʼ, «tiʼ le kuxtal jach tu jaajiloʼ» (1 Timoteo 6:19). «Le kuxtal jach tu jaajiloʼ» táan u tʼaan tiʼ le kuxtal táan k-páaʼtik u yantaltoʼon teʼ Paraíso way Luʼumeʼ. Teʼ kuxtal jeʼelaʼ maʼ ken k-kʼojaʼantal mix ken k-chʼíijil, yaan k-kuxtal ich jeetsʼelil yéetel ich kiʼimak óolal. Tiʼ túun ken k-il le kuxtal jach tu jaajiloʼ, le u kʼáat Dios kaʼach ka yanaktoʼon tu káajbaloʼ: le kuxtal minaʼan u xuuloʼ (1 Timoteo 6:12). ¿Máasaʼ jach táaj maʼalob le baʼax táan k-páaʼtikaʼ?

22. ¿Bix jeʼel a tiaʼalintik «le kuxtal jach tu jaajiloʼ»?

²² ¿Bix jeʼel k-tiaʼalintik «le kuxtal jach tu jaajiloʼ»? Le apóstol Pablooʼ tu yaʼalaj tiʼ máaxoʼob meyajtik Dioseʼ «ka u beetoʼob [baʼax] uts» yéetel «ka ayikʼalchajkoʼob» tiʼ baʼax maʼalob (1 Timoteo 6:18). Utiaʼal túun k-kʼamik le kuxtal minaʼan u xuuloʼ kʼaʼabéet k-kuxtal jeʼex tsʼoʼok k-kanik teʼ Bibliaoʼ. ¿Tu yóotaj  wa túun Pablo u yaʼal náajaltbil u beetaʼal le kuxtal minaʼan u xuuloʼ? Maʼatech, tumen le jach maʼalob kuxtalaʼ chéen jeʼel k-kʼamik tu yoʼolal u yutsil Dioseʼ (Romailoʼob 5:15). Baʼaleʼ Jéeobaeʼ utstutʼaan u síik baʼax maʼalob tiʼ máaxoʼob meyajtik jeʼex u yaʼalikeʼ. Letiʼeʼ u kʼáat ka yanaktech le kuxtal minaʼan u xuuloʼ, upʼéel kuxtal ich kiʼimak óolal yéetel jeetsʼelil. Lelaʼ letiʼe kuxtal kun yantal tiʼ tuláakal máax ku pʼáatal ichil u yaabilaj Diosoʼ.

23. ¿Baʼaxten jach kʼaʼabéet ka pʼáatkoʼon ichil u yaabilaj Dios?

²³ Cada utúul tiʼ toʼoneʼ maʼalob ka u beet le kʼáatchiʼaʼ: «¿Táan wa in meyajtik Dios jeʼex u yaʼalik teʼ Bibliaoʼ?». Wa sáamsamal k-ilik kuxtal jeʼex u kʼáat Dioseʼ, táan k-bin tu bejil le kuxtaloʼ. Maʼ u tuʼubultoʼoneʼ Jéeobaeʼ bey upʼéel kúuchil tuʼux jeʼel u páajtal k-taʼakikbaeʼ. Letiʼeʼ yaan u kanáantik u kaajal teʼ tu tsʼook kʼiiniloʼob le kʼasaʼan yóokʼol kaab jach chuup yéetel talamiloʼobaʼ. Tsʼoʼoleʼ yaan u yokskoʼon teʼ jatsʼuts túumben yóokʼol kaab ken u tsʼáa maʼ kun xáantaloʼ. ¡Bukaʼaj jatsʼutsil ken úuchuk lelaʼ! ¡Jach yaan u kiʼimaktal k-óol úuchik beetik baʼax utstutʼaan Jéeoba teʼ tsʼook kʼiinoʼobaʼ! Wa teech ka meyajtik Dios bejlaʼeʼ, yaan a kʼamik le kuxtal u kʼáat Dios ka yanaktoʼonoʼ: le kuxtal minaʼan u xuuloʼ, le kuxtal jach tu jaajiloʼ.