Nying Lubanga​—Tyen Lokke ki Ticce

I BAIBULLI, kigonyo Jabuli 83:18 nining? New World Translation of the Holy Scriptures gonyo tyeng man ni: “Wek dano gunge ni, in ma nyingi Jehovah, in keni aye Ngat ma Malo loyo i wi lobo ducu.” Baibul mukene mapol bene gonyo tyeng man i yo acel-li. Ento, i pol pa Baibul, nying me Jehovah-ni kikwanyo woko, ka kileyo kakare ki nying dog tic calo “Rwot” nyo “Lacwec.” Nying ango ma omyero obed i tyeng man? Nying dog tic nyo nying me Jehovah-ni?

Tyeng man loko i kom nying. I leb Ibru macon ma kitiyo kwede me coyo lok mapol me Baibul, nying kikome aye kiketo i tyeng man. Onongo kicoyo kit man יהוה (YHWH) i nukuta me leb Ibru. I leb Munu, pol kare gin keto nying man ni “Jehovah.” Nying man mono nonge i tyeng acel keken i Baibul? Pe kumeno. Nying man nonge i but Baibul ma kicoyo i leb Ibru macon cok-cok tyen 7,000 kulu!

Nying Lubanga mono pire tek ma rom mene? Tam kong i kom lega ma Yecu Kricito omiyo macalo lapor. Cakke kit man: “Wonwa ma tye i polo, giwor nyingi maleng.” (Matayo 6:9) Lacen Yecu olego bot Lubanga ni: “Abana, ket deyo i kom nyingi.” Me gamone, Lubanga oloko ki i polo, kun waco ni: “Dong aketo deyo i kome, dok abiketo aye.” (Jon 12:28) Nen ka maleng ni nying Lubanga obedo gin ma pire tek tutwal. Pingo dok jo mukene ma gugonyo Baibul gukwanyo nying man ka guleyo kakare ki nying dog tic?

Nen calo tye tyen lok aryo. Me acel, jo mapol gitamo ni nying-ngi omyero pe kitii kwede pien kit ma kilwongo kwede i kare macon dong pe kingeyo i kare-ni. Leb Ibru macon onongo pe kicoyo ki nukuta me a, e, i, o, u. Pi meno, pe tye ngat mo i kare-ni ma ngeyo atir atir kit ma dano i kare me Baibul onongo gilwongo kwede YHWH. Ento man mono, omyero ogengwa me  tic ki nying Lubanga? I kare me Baibul, nying ni Yecu-ni onongo gwok kilwongo ni Yecua nyo ni Yekocua​—pe tye ngat mo ma twero niang iye matir. Kadi wa kombeddi, dano i wi lobo ducu gilwongo nying Yecu mapat pat, gilwongo i yo ma nongo dano gungiyo iye i lebgi. Pe gilworo tic ki nying-ngi pien ni pe kingeyo kit ma onongo kilwongo kwede i cencwari me acel. I kit yo acel-li, ka onongo ni icito i lobo mo ma woko, itwero nongo ni dok kilwongo nyingi i yo ma winye mapat i leb mukene. Pi meno, akalakala ma tye i kit me lwongo nying Lubanga i kit macon pe obedo tyen lok ma weko pe omyero kiti kwede.

Tyen lok me aryo ma pol kare kimiyo pi kwanyo nying Lubanga woko ki i Baibul mako tekwaro pa Lujudaya ma yam con. Polgi onongo gitamo ni nying Lubanga omyero pe kilwong matwal. Tam man ojenge i kom niango manok i kom cik me Baibul ma waco ni: “Pe ilwong nying Rwot Lubangani me nono; pien Rwot bimiyo kop loyo dano ma lwongo nyinge me nono.”​—Nia 20:7.

Cik man gengo tic ki nying Lubanga i yo marac. Ento mono gengo tic kwede i yo me woro? Pe wa acel. Jo ma gucoyo Baibul i leb Ibru (“Cik Macon”) onongo ducu gubedo jo ma lugen ma onongo gilubo Cik ma Lubanga omiyo bot jo Icrael macon. Man omiyo gutiyo ki nying Lubanga tere tere. Me labolle, guketo i wer mapol ma onongo luworo mapol giwero ki dwan malongo. Lubanga Jehovah bene ociko jo ma giwore me lwongo nyinge, ci jo ma gin luye gulubo. (Joel 2:32; Tic pa Lukwena 2:21) Pi meno, Lukricitayo me kare-ni pe gilworo tic ki nying Lubanga i yo me woro, kit ma Yecu otimo kwede.​—Jon 17:26.

Jo ma gugonyo Baibul gutimo bal madit tutwal me leyo nying Lubanga ki nying dog tic. Guweko Lubanga onen calo pe mito bedo larem dok pe paro pi dano, ento Baibul kono cuko cwiny dano me mako ‘larem macok ki Jehovah.’ (Jabuli 25:14) Tam kong i kom ngat ma tye laremi macok atika. Laremwu twero bedo cok nining ka pe ingeyo nyinge? I yo acel-li, ka kiweko dano gubedo ma pe gingeyo nying Lubanga, Jehovah, gibiromo mako wat macok nining ki Lubanga? Medo i kom meno, ka dano pe gitiyo ki nying Lubanga, ci bene pe gibibedo ki ngec ma pire tek i kom tyen lok me nyinge. Nying Lubanga tyene tye ningo?

 Lubanga kikome aye ogonyo tyen lok me nyinge bot laticce ma lagen Moses. I kare ma Moses openyo Lubanga pi nyinge, Jehovah ogamo ni: ‘Atwero doko gin mo keken ma amito.’ (Nia 3:14) Baibul me Rotherham bene ogonyo tyeng man ni: “Abidoko kit gin mo keken ma amito.” Pi meno Jehovah twero doko gin mo keken ma mitte me cobo yubbe.

Ka onongo in iromo doko kit gin mo keken ma imito kono? Onongo kono itimo gin ango pi luremi? Ka ngat acel i kin-gi kome odoko lit atika, itwero doko daktar ma ladiro ma cango two. Ka laremi mukene orwenyo limme, idoko ngat ma olony ci ikonnye. Ki lok ada, tekowa me miyo kony nok tutwal. Wan ducu tekowa nok. Ka imedde ki kwano Baibul, ibibedo ki ur me neno kit ma Jehovah doko kwede gin mo keken ma mitte me cobo cikkene. Dok cwinye yom me tic ki tekone pi jo ma gimarre. (2 Tekwaro 16:9) Jo ma pe gingeyo nyinge pe gitwero niang kit pa Jehovah mamwonya magi.

Nen kene ni nying me Jehovah-ni omyero kitti kwede i Baibul. Ngeyo tyen lokke kacel ki bedo agonya me tic kwede i worowa konyo matek me moko wat macok ki Jehovah ma obedo Wonwa me polo. *

[Lok ma tye piny]

[Cal ma tye i pot karatac 195]

Nying Lubanga i nukuta me leb Ibru