FÜRENEEN nülange tami Biblia Salmo 83:18 mu (ka 82:19 kiñeke Biblia mu). ¿Chem piley tüfachi versikulo? Tati Traducción del Nuevo Mundo de las Santas Escrituras pingelu feypi: “Kom che tañi kimal eymi müten tami Alüpüralen itrokom Mapu mu, Jewba pingey tami üy”. Kiñeke Biblia mu ka femngechi rulpadungungekey. Welu fentren Biblia mu entuñmafingün Jewba ñi üy, ka üytufingün kakelu üy mu, tüfa ta “Ñidol” kam “Ngünechen”. Feymu, ¿chuchi am mülefuy ñi wirikonküleal tüfachi texto mu? ¿Kiñe üytun kam tati üy Jewba?

Tüfa mu müley kiñe üy. Ebrew dungun mu, epe kom Biblia mu kuyfi wirintukungelu müley tüfachi trürümfalnochi üy. Ebrew wirin mu, femngechi wirikonkülefuy tüfachi üy יהוה (YHWH). Wingkadungun mu rulpadungungekey Jehová ka Yavé, ka mapudungun mew Jewba pingey. ¿Kiñe rupa mu müten mülepey may tüfachi üy Biblia mu? Femlay llemay, tüfa mu epe regle warangka rupa mülekey ebrew wirintukun mu.

¿Falintufalpey may Chaw Ngünechen ñi üy? Ngüneduamaiñ ti ngillatun Jesus ñi elkünuel Padrenuestro pingelu. Femngechi feypi: “Taiñ Chaw Ngünechen wenu mapu mülelu, yamniengepe tami üy” (Matew 6:9, TNM). Jesus dew kimeltulu tüfachi ngillatun, kidu llellipufi ta Chaw Ngünechen: “Chaw, püramyengepe tami üy”. Ka Ngünechen wenu mapu llowdungueyew: “Püramyefiñ ka wiñome püramyeafiñ” (Juan 12:28, TNM). Tüfa pengeli Chaw Ngünechen ñi üy müna falintufali. Feymew, ¿chumngelu kiñeke rulpadungukelu nentufingün feychi üy Biblia mu ka welutukufi kake üytun?

Müley epu dungu. Wüne, fentren che feypikey ngelay ñi üytuafiel Ngünechen ñi üy, kimnolu am chumngechi rulpangekefuy. Kuyfi mu ebrew dungun wirintukukelafuy ti vocal a, e, i, o, u, feymu famülke mew iney no rume feypilayafuy chumngechi rulpangekefuy ti wirin YHWH, Biblia ñi kuyfike antü mu. Feymu, ¿eluñmakeaiñ üytunoal Ngünechen ñi üy? Kafey kuyfi Biblia ñi wirintukuel, Jesus ñi üy rulpangekefuy chi Yeshúa ka Yehoshúa;  welu iney no rume feypilayafuy chumngechi ñi rulpangekefel. Welu wall Mapu püle kakerumey ñi üytungen Jesus, kake kewün niekey kidu ñi rulpangeken. Feymu tati pu che kimnienolu rume chumngechi rulpangekefuy Jesus ñi üy wünen siglo mu, welu üytukefingün müten. Ka femngechi eymi amufulmi ka trokiñ mapu mu, ngüneduamafuymi tami üy kakerumey ñi üytungeken. Feymu lle, kimnielaiñ rume Ngünechen ñi üy chumngechi rulpangekefuy kuyfi, welu tüfa katrütukelaeiñmew taiñ üytuafiel.

Epungechi dungu chumngelu nentungekey Ngünechen ñi üy Biblia mu, tüfa nüwküley kiñe kuyfi wimtun pu judioche mu. Fentren judioche feyentukeyngün ngelay ñi üytuafiel Ngünechen ñi üy. Welu tüfa pengeli ñi welulkaniefiel engün tüfachi werkün dungu: “Ngelay tami weda üytuafiel Jewba ñi üy tami Ngünechen, Jewba kastigakefilu am tati pu che weda üytukefilu Ñi üy” (Éxodo 20:7).

Rüfkünu may, tüfachi werkün dungu katrütukey ñi weda üytuafiel Ngünechen ñi üy. Welu tüfa, ¿katrütukepey may yamün mu ñi üytungeal? Femlay llemay. Kom tati pu wentru wirintukulu ebrew trokiñ Biblia mu (“Antiguo Testamento” pingelu) manelfalchi che ngekefuyngün allkütufilu Ngünechen ñi ley dungu elkünufilu tati pu israelche. ¿Chumingün tüfachi pu manelfalchi che wirintukulu Ngünechen ñi üy? Fillke rupa mu pünekefuyngün Ngünechen ñi üy. Fentren salmo mew wirintukukefuyngün tüfachi üy, newentu ülkantukelu fentren che poyekefilu ta Ngünechen. Jewba werküfi tañi pu che ñi üytual tañi üy, ka tati manelfalchi che femngechi femingün (Joel 2:32; Hecho 2:21). Feymu llemay, famülke mew tati pu kristiano yamün mew ka üytukefiyiñ Ngünechen ñi üy, chumngechi ñi femken Jesus (Juan 17:26).

Tati pu rulpadungukelu welulkawingün nentufiel mu Ngünechen ñi üy kake üytun mu. Femngechi femkeyngün ñi fütra kamapulelu reke trokingeal ta Ngünechen ka ngenolu kechiley. Welu tati Biblia yafültukukeeiñmew taiñ “küme weniyewküleal Jewba engu” (Salmo 25:14). Rakiduamnge kiñe küme weni mu. Kimnienofilmi tañi üy rume, ¿fülkonpeafuymi may tami weni mu? Ka femngechi rupakey Chaw Ngünechen mu. ¿Chumngechi doy weniyeafuiñ Ngünechen kimüñmanofiliyiñ tañi üy Jewba? Kafey tati pu che pünekenofilu Chaw Ngünechen ñi üy kimürpukelay chem pin tüfachi afmatufalchi üy. ¿Chem küpa feypi Ngünechen ñi üy?

 Ngünechen feypifi tañi manelfalchi kona Moyse chem pifel tañi üy. Fey tüfachi wentru ramtufilu ta Jewba chumngechi pingekey, Jewba feypieyew: “Iñche Ngerpuan, Iñche tañi Dulliel Ngerpuan” (Éxodo 3:14). Fey llemay, Jewba ñi femürpual tañi ayükeelchi dungu ngerpuafuy chem dungu ñi duamnieel, ka kidu femkey kom tañi dewman ñi ngerpual ka ñi femkeal chem dungu rume tañi duamnieel.

Rakiduamnge, nielmi pepiluwün tami femal kom tami ayükeel. ¿Chumngechi kelluafuymi tami pu weni? Kiñe tami pu weni kutranfule, kiñe küme lawentuchefe ngerpuafuymi reke tami tremoltuafiel. Kangelu weni fillañmalele, ülmen che künuwafuymi tami kelluafiel. Welu eymi ka kom iñchiñ nielaiñ pepiluwün, feymu femlayafuiñ kom taiñ ayükeel. Welu chillkatuniefilmi ta Biblia, afmatuaymi tami peal chumngechi Jewba femkey kom tañi duamnieelchi dungu ñi femürpual tañi ayükeel. Ka Chaw Ngünechen ayüwünkechi elukefi tañi newen tati pu che ñi piwkeyekeetew (2 Crónicas 16:9). Feymu kom tati pu che kimnofilu Ngünechen ñi üy, kimlayngün Jewba ñi kümeke chumngen.

Rüfkünu may, Ngünechen ñi üy müley ñi wirikonküleal Biblia mu. Feymu kimnielu am iñchiñ chem pin Jewba ñi üy ka fill antü üytukefiyiñ taiñ poyeafiel taiñ Wenu Chaw, tüfa kellukeeiñmew taiñ fülkonal kidu mu. *