MIRÄ amp suma Salmo 83:18 Bibliaman thaqtma. ¿Kamsis ukanxa? Traducción del Nuevo Mundo de las Santas Escrituras Biblianxa siwa: “Jaqinakan yatipxañapataki, jumax Jehová sutinïtama, juma sapakiw uraqpachxaru taqi Munañanïtaxa” sasa. Yaqha Biblianakanxa niya ukhamjamarakiw jaqukipapxi. Ukampis walja Biblianakatwa Jehová sutxa apsupxi, aymar Biblianakansa ukhamarakiwa, uka lantix akham sutinchanakwa uchapxi, “Dios” jan ukax “Tatitu” sasa. Ukhamaxa, ¿kuna sutis ukawjan uñstañapa? ¿Jehová sutiti jan ukax mä sutinchacha?

Mä sutiw ukanxa qillqata. Hebreo arut nayra qillqatansa, ukat Biblian jila part jiskʼa tʼaqanakapansa mä sutiw uñsti, ukham yaqha sutix janipuniw utjkaspati. Akham hebreo qillqanakampi qillqatänwa יהוה (YHWH). Español arunxa akhamawa: Jehová jan ukax Yavé. ¿Uka sutix mä chiqanakti Biblianx uñstpacha? Janiwa, hebreo aruta nayra qillqatanakanxa niya paqallqu waranqa kutiw uñsti.

¿Kunjamsa Diosan sutipax uñjañasa? Jesucristox yatichawaykistu uka mayisïwit amuytʼañäni. Akham sasaw qallti: “Alaxpachankir nanakan Awkixa, sutimax jachʼañchatäpan” sasa (Mateo 6:9). Mä qhawqha tiempotxa, Jesusaxa akham sasaw Diosarux achikasïna: “Awkiy, sutimax jachʼañchatäpan” sasa. Ukatxa Inuqirixa alaxpachatpachwa jaysanitayna: “Nayax jachʼañchawayxtwa, wasitampis jachʼañchaskakïwa” sasa (Juan 12:28). Ukhamaxa, Diosan sutipax wali jachʼapuniwa. Ukampisa, ¿kunatsa yaqhip Biblia jaqukipirinakax Diosan sutipa apsusax sutinchanakak uchapxi?

Inas pä amuyumpi ukham lurapxchi. Mayïrix akäspawa, Diosan sutipxa janiw arsuñasäkiti, kunattix janiw yatktanti kunjamsa arsusïna sapxiw yaqhipanakaxa. Bibliax qillqaskän ukhaxa, nayra hebreo arunxa janiw akïri a, e, i, o, u qillqanakax utjkänti. Ukhamaxa jichhüranakanxa janiw khitis siskaspati  kunjamsa uka urunakanxa arsusïna YHWH qillqanakaxa. Ukhamasti, ¿Diosan sutip janit arsxañäni? Amuyañataki, Bibliax qillqaskän uka urunakanxa Jesusan sutipax inas akham arsuschïna: Yeshúa jan ukax Yehoshúa; ukampis janiw khitis ukhamapuniw siskaspati. Uraqpachanxa Jesusan sutipax sapaqat arurjama kunaymanit arsutawa. Nayrax uka sutix kunjamsa arsusïna ukxa janiw yatktanti, ukampisa, Jesusan sutipxa jan payachasisaw aytastanxa. Ukhamarakiwa, jumatix yaqha anqa markaru sarasmaxa, yaqha arunakanxa sutimax mayjaw arsusispa. Ukhamaxa, Diosan sutipax kunjamxay nayrax arsuschïna ukxa janiw yatktanti, ukampisa arsuskañasakipuniwa.

Payïr amuyux akarakïspawa, judionakan nayra amtaparjamaw yaqhipanakax Bibliatxa Diosan sutip apsupxi. Diosan sutipax janipuniw arsusiñapäkiti sapxiwa. Judionakax akïr kamachi jan sum amuytʼasaw ukham sapxiritayna: “Janiwa Tatitu [Jehová] Diosaman sutipxa inamayataki aytasïtati, jupasti inamay sutip aytasirirux castigakipuniniwa” sasa (Éxodo 20:7).

Chiqäskapuniwa, aka kamachixa janiw Diosan sutipxa jan walitaki aytasïtati siwa. Ukampisa, ¿janipunit respetompis aytasiñäkaspa? Janiw ukham siskiti. Israelitanakaru Diosax Leyinak churatayna uka kamachinakaru taqi chuyma istʼiri jaqinakänwa hebreo aruta (“Antiguo Testamento”) Biblia qillqirinakaxa. Jupanakaxa, ¿kuns kamachapxäna Diosan sutipampixa? Aytasipxapunïnwa. Amuyañataki, Diosan sutipaxa walja salmonakan qillqatawa, uka salmonakxa walja jaqinakawa Diosaru yupaychasax jachʼat qʼuchupxiritayna. Ukampisa, sutijat artʼasipxapunim sasaw Jehová Diosaxa yupaychirinakaparux säna (Joel 2:32; Hechos 2:21). Ukhamasti, cristianonakaxa jan payachasisawa Diosan sutipxa wali respetompi aytasipxi, kunjamtï Jesusax artʼaskatayna ukhama (Juan 17:26).

Diosan sutip lanti sutinchanaka uchasaxa, Biblia jaqukipirinakax jan walpun lurapxi. Diosax wali jayankkaspasa, janis utjkaspa ukham jaqinakar amuyayapxi. Ukampis Bibliaxa, Jehová Diosampi ‘sum parlasipxam’ sistuwa (Salmo 25:14). Mä munat masimat amuytʼasma. Jan sutipa yatisasti, ¿jupax wali munat masijaw sasmati? Niya ukhamjamarakiwa. ¿Kunjamrak Diosampix sum parlassnasti Jehová sutinïtap jan yatkasinxa? Ukat  Diosan sutip jan aytasir jaqinakaxa, janiw yatipkiti kun sañs muni uka jachʼa sutixa. ¿Kun sañs munpacha uka sutixa?

Moisés luqtiriparuxa ukwa Diosax qhanañchatayna. Moisesax Diosan sutip jisktʼkäna ukhaxa, Jehová Diosax akham sänwa: “Kunañtix nayax munkäxa ukaruw nayax tuküxa” sasa (Éxodo 3:14, NM). Rotherham Bibliax sarakiwa: “Kuntix nayax munktxa ukaruw nayax tuküxa”. Ukhamaxa, amtanakapa phuqañataki kunaxay wakischispa ukaruw Jehová Diosax tukuspa.

Kunañtï jumax munasma ukar tukusma ukhaxa, ¿kuns lurasma munat masinakam laykuxa? Mä munat masimatix wal usuntaspaxa, ¿janit mä suma qullirir tukusax qulltʼkasma? Maynitï jan qullqin uñjasispaxa, ¿janit mä qamirir tukusax yanaptʼkasma? Jïsa. Ukampisa, janiw jumas nayas ukham taqi kunar tuksnati, jaqikïtanwa. Jehová Diosax taqi kunatix wakiskaspa ukaruw tukuspa munañap phuqañatakixa, ukxa Biblianwa jukʼat jukʼat yatiqäta. Munasitanakaparux chʼamapamp yanaptʼañ munapuniwa (2 Crónicas 16:9). Diosan sutip jan yatirinakaxa, Jehová Diosarusa, suma jachʼa sutipsa janiw uñtʼapkiti.

Ukhamaxa, Diosan sutipaxa Biblian uñstañapapuniwa. Kunapachatï Jehová Diosan sutipax kun sañs munpacha uk yatxatxtan ukat yupaychañataki jan axsarasa sutip aytastan ukhaxa alaxpachankiri Awkisarux jukʼampwa jakʼachastanxa. a