I KA Bibulu kɔnɔ, Zaburu 83:19 bayɛlɛmalen bɛ cogo jumɛn na? Bibulu min bɛ wɛlɛ tubabukan na ko Les Saintes Écritures — Traduction du monde nouveau bɛ nin tɛmɛsira fɔ ko: “Walisa u k’a dɔn ko e min tɔgɔ ko Jehova, ko i kelenpe ye kɔrɔtalenba ye dugukolo bɛɛ kunna.” Bibulu caman ye o bayɛlɛmali ɲɔgɔnna de kɛ. Nka, Bibulu bayɛlɛmalen wɛrɛw ye Jehova tɔgɔ bɔ Bibulu kɔnɔ, k’a falen ni mankutuw ye i ko “Matigi” walima “Min bɛ yen badaa”. Mun de ka kan ka kɛ nin tɛmɛsira kɔnɔ? Yala mankutu de b’a kɔnɔ wa, walima Jehova tɔgɔ?

Min bɛ nin tɛmɛsira kɔnɔ, tɔgɔ de don. Heburukan fɔlɔ la, Bibulu fanba sɛbɛnna o min na, Ala tɔgɔ jɛlen kelenpe dɔrɔn de bɛ yen. יהוה (YHWH) de tun sɛbɛnnen bɛ Heburukan siginidenw la. Angilɛkan walima tubabukan na, o bɛ bɛn “Jehovah” de ma tuma caman na. Yala o tɔgɔ nin bɛ sɔrɔ o Bibulu tɛmɛsira kelen dɔrɔn de kɔnɔ wa? Ayi. An b’o sɔrɔ siɲɛ 7 000 ɲɔgɔnna fɔlɔ Heburusɛbɛnniw kɔnɔ.

Mun na nafa bɛ Ala tɔgɔ la? Yesu Krisita ye delili kɛcogo min jira an na, an ka o lajɛ. A b’a daminɛ nin cogo la: “An Fa min bɛ sankolo la, i tɔgɔ ka saniya.” (Matiyu 6:9) Kɔfɛ, Yesu ye Ala deli ko: “Fa, i tɔgɔ bonya.” Ala y’a jaabi k’a to sankolo la, ko: “Ne y’a bonya, ne n’a bonya ko kura.” (Yuhana 12:28) A jɛlen don ko nafaba de bɛ Ala tɔgɔ la. N’a bɛ ten, mun na bayɛlɛmalikɛla dɔw ye o tɔgɔ in bɔ u ka Bibulu bayɛlɛmalenw kɔnɔ ani k’a falen ni mankutuw ye?

A bɛ i n’a fɔ kun fila de bɛ o la. A fɔlɔ, mɔgɔ caman ko o tɔgɔ man kan ka fɔ, bawo bi mɔgɔ tɛ Ala tɔgɔ fɔcogo dɔn i ko a tun bɛ fɔ cogo min na fɔlɔ-fɔlɔ. Fɔlɔ Heburukan tun bɛ sɛbɛn k’a sɔrɔ dafalenw t’a la. O la sa, mɔgɔ si tɛ se k’a fɔ tigitigi bi ko Bibulu sɛbɛnna waati min na, o mɔgɔw tun bɛ YHWH fɔ cogo min na. Nka, yala o ka kan k’an bali ka Ala tɔgɔ fɔ wa? Bibulu sɛbɛnna tuma min na, Yesu tɔgɔ tun bɛ fɔ ko Yéshoua walima  laala Yehoshoua; mɔgɔ si tɛ se ka o fɔcogo yɛrɛ fɔ. O bɛɛ n’a ta, diɲɛ yɔrɔ bɛɛ la bi, u bɛ baara kɛ ni Yesu tɔgɔ suguw ye minnu fɔcogo tɛ kelen ye. Bɛɛ bɛ a fɔ ka kɛɲɛ ni a ka kan ye. Mɔgɔw tɛ siga k’a tɔgɔ fɔ k’a sabu kɛ k’u t’a dɔn cogo min na san kɛmɛ fɔlɔ mɔgɔw tun b’a fɔ cogo min na. O cogo kelen na fana, n’i taara dugu jan dɔ la, i bɛ se k’a sɔrɔ ko i tɔgɔ fɔcogo i ka kan na ani o mɔgɔw bɛn’a fɔ cogo min na u ka kan na, olu tɛna kɛ kelen ye. O la sa, ikomi Ala tɔgɔ tun bɛ fɔ cogo min na fɔlɔ ni o dɔnnen tɛ tigitigi, o tɛ kun ye walisa Ala tɔgɔ kana fɔ.

U bɛ kun filanan min fɔ walisa ka Ala tɔgɔ bɔ Bibulu kɔnɔ, o bɛ bɔ Yahutuw ka laada kɔrɔ dɔ de la. Yahutu caman minnu ye dannabaw ye, olu fɛ Ala tɔgɔ man kan ka fɔ abada. A bɛ se ka kɛ ko o dannaya sinsinnen don Bibulu sariya waleya kojuguyali de kan, min b’a fɔ ko: “I kana Matigi i ka Ala tɔgɔ fɔ fu, k’a masɔrɔ min bɛ Ala tɔgɔ fɔ fu, Matigi tɛna o tigi ɲankatabali to.”—Ekisode 20:7.

O sariya tun bɛ mɔgɔ bali ka Ala tɔgɔ fɔ fu. Nka ka Ala tɔgɔ fɔ ni bonya ye, yala o tun bɛ mɔgɔ bali ka o kɛ wa? Abada. Minnu ye Heburukan Bibulu sɛbɛn (n’o ye “Layidu Kɔrɔ” ye,) olu bɛɛ tun ye mɔgɔ kantigiw ye. Ala tun ye sariya minnu di Israɛlkaw ma fɔlɔ, u tun bɛ olu bɛɛ sirataama. O bɛ n’a ta, u tun bɛ Ala tɔgɔ fɔ tuma caman. Misali la, u y’a bila Zaburuw fan caman na. Jamakulu bɛɛ lajɛlen tun bɛ o dɔnkili da ni kanba ye walisa ka Ala bato. Jehova Ala yɛrɛ y’a ɲini a batobagaw fɛ u ka a tɔgɔ fɔ, wa kantigiw ye o kɛ. (Joɛl 2:32; Kɛwalew 2:21) O de la sa, bi Krecɛnw tɛ sigasiga ka Ala tɔgɔ fɔ ni bonya ye, i ko, siga t’a la, Yesu tun b’a kɛ cogo min na.—Yuhana 17:26.

U kɛlen ka Ala tɔgɔ falen mankutuw la, Bibulu bayɛlɛmanikɛlaw ye filiba de kɛ. U kɛlen ka o kɛ, a kɛra mɔgɔw kɔnɔ ko Ala ka jan an na, wa ko an tɛ se k’a dɔn tigitigi. K’a sɔrɔ Bibulu bɛ dusu don hadamadenw kɔnɔ u ka “kɛ Matigi teriw ye.” (Zaburu 25:14) E ka miiri i teri sɛbɛ dɔ la. Yala i bɛna gɛrɛ a la n’a y’a sɔrɔ i ma a ɲini abada ka i teri tɔgɔ dɔn wa? O cogo kelen na, mɔgɔw bɛ se ka gɛrɛ kosɛbɛ Ala la cogo jumɛn na, n’a y’a sɔrɔ u tɛ Ala tɔgɔ dɔn, n’o ye Jehova ye? Ka fara o kan, mɔgɔ minnu tɛ Ala tɔgɔ fɔ, olu fana tɛ se ka Ala tɔgɔ dakabana kɔrɔ dɔn. Ala tɔgɔ kɔrɔ ye mun ye?

 Ala yɛrɛ y’a tɔgɔ kɔrɔ fɔ Musa ye n’o ye a ka baarakɛla kantigi dɔ ye. Musa y’a ɲini tuma min na ka Ala tɔgɔ dɔn, Jehova y’a jaabi ko: “Min bɛ, ne don.” (Ekisode 3:14) Rotherham Bibulu (Angilɛkan) bɛ nin kumaw bayɛlɛma ko: “A ka di Ne ye ka kɛ min ye, ne bɛ kɛ o ye.” O la sa, Jehova mago bɛ fɛn o fɛn na walisa k’a sagonataw tiimɛ, a bɛ se ka kɛ o ye.

A ka kɛ ko a ka di i ye ka kɛ fɛn o fɛn ye, i bɛ se ka kɛ o ye. E bɛna mun kɛ i yɛrɛ teriw ye? N’i teri kelen banana kosɛbɛ, i bɛ se ka kɛ dɔkɔtɔrɔ ɲuman ye walisa k’a kɛnɛya. Ni wariko gɛlɛya bɛ i teri dɔ wɛrɛ la, i bɛ se ka kɛ nafolotigi bololabilalen ye, ka i teri dɛmɛ. Nka, tiɲɛ na, i bɛ se ka kɛ min ye, dan bɛ o la. Dan bɛ an bɛɛ la. Ikomi i bɛ ka Bibulu kalan, a bɛna bala i la k’a dɔn cogo min na Jehova mago bɛ fɛn o fɛn na walisa k’a ka layiduw tiimɛ, a bɛ se ka kɛ o ye. Wa, a kadi Ala ye ka baara kɛ n’a fanga ye mɔgɔw kama minnu b’a kanu. (2 Tilew kibaru 16:9) Mɔgɔ minnu tɛ Jehova tɔgɔ dɔn, Jehova jogo ɲumanba nin bɛ olu mɔgɔw jɛ.

O la sa, Jehova tɔgɔ ka kan ka ye Bibulu kɔnɔ. K’a tɔgɔ kɔrɔ dɔn ani ka to k’a fɔ an ka bato la, o b’an dɛmɛ kosɛbɛ ka gɛrɛ an sankolola Fa Jehova la. *