IFA usun afféún Kölfel 83:18 lón noum na Paipel? Ewe New World Translation of the Holy Scriptures a iei usun an afféúni: “Aramas repwe silei pwe en, ewe mi iteni Jiowa, en chék ewe mi Unusen Tekia seni meinisin wóón fénúfan.” A ina usun afféún lón pwal fitu Paipel. Iwe nge, ese mak ena it Jiowa lón chómmóng Paipel nge ra siwili ren eú itelap, áwewe chék ren “Kot” are “Samol.” * Iwe, itá úrúrún, met epwe mak lón ena wokisin? Eú itelap are ewe it Jiowa?

Ena wokisin lón Kölfel 83:18 a kapas usun eú it. Lón fósun Ipru, ewe fós chómmóng puken Paipel ra akkomw le mak lón, eú it mi sókkóló aúchean a mak ie. Iei itechikin lón fósun Ipru: יהוה (YHWH). Lón fósun Merika, ena it a afféú ngeni “Jehovah.” Lón fósun Chuuk, a afféú ngeni “Jiowa” are “Iowa.” Ena it a itá mak lón eú chék wokisin lón Paipel? Aapw. A mak lón ewe Tesin Ipru arapakkan fán 7,000!

Ifa úkúkún lamoten iten Kot we? Ekieki mwo ewe iótekin ach Samol, ewe Jesus a áiti ngeni néún kewe chón káé. Lepoputáán a apasa: “Semem lon läng. Itom epwe pin.” (Mateus 6:9) Mwirin, Jesus a iótek ngeni Kot: “Semei, kopwe alinga itom!” Iwe, Kot a pélúweni seni láng, iei alon: “Üa fen alinga itei, nge üpwe pwal alingasefäli.” (Johannes 12:28) A ffat pwe iten Kot we a wesewesen watte lamotan. Nge pwata chék ekkóch chón afféúni Paipel ra télawu seni néúr kewe Paipel me siwili ngeni ekkena itelap?

 Usun a wor ruu popun. Áeúin, chómmóng ra apasa pwe sisap pani ena it pún ese ffat wesewesen newenewan lón ach ei fansoun. Me lóóm, atun chón Ipru ra mak, ese wor ekkewe osowá. Ina popun ikenái, ese wor emén a tongeni apasa ika ifa usun chón Ipru me lóóm ra ánewenewa YHWH. Iwe nge, ena mettóch epwe itá pinekich seni ach sipwe néúnéú iten Kot we? Eli chón lóóm ra apasa Yeshua are Yehoshua ren newenewen ewe it Jesus are Jises nge ese wesewesen ffat ika a pwúng ena. Iwe ikenái aramas wóón unusen fénúfan ra néúnéú ena it Jesus are Jises, nge ra ánewenewa me ren minne a chéúfetál lón en me fósun fénúan. Sap minne rese néúnéú ena it pokiten chék ar rese silei newenewan lón fansoun Jesus we me ekkewe aposel. Pwal ina chék usun, ika kopwe sái ngeni eú fénú, eli kopwe kúna pwe epwe sókkóló newenewen itom lón fósun ena fénú. Ina popun, esap weween pwe sisap néúnéú iten Kot we pokiten chék an ese ffat newenewan lón fansoun lóóm lóóm.

Oruuen popun aramas ra apasa pwe ra télawu iten Kot we lón Paipel, pokiten eú eéreni mi poputá lóóm lóóm lein ekkewe chón Jus. Chómmóng me leir ra lúkú pwe ese pwúng ach sipwe féúni iten Kot we. Neman ar lúkú a lóngólóng wóón ar ekiekmwáál usun ei allúk lón Paipel: “Kosap föünimwäli itei ngang ewe Samol mi Lapalap om Kot. Pun ngang ewe Samol mi Lapalap üpwe ngeni iteiten eman me eman chappen tipisin an föünimwäli itei.”​—Ekistos 20:7.

Ena allúk a pinei néúnéúmwáállin iten Kot we. Nge a itá pinei néúnéún itan we fán súfél? Aapw. Meinisin chón makkeei ewe Tesin Ipru (ewe “Testamentin Lom”), iir mwán mi tuppwél, iwe ra álleasochisi ewe Allúk Kot a ngeni chón Israel lóóm lóóm. Iwe nge, ra néúnéú iten Kot we fán chómmóng. Áwewe chék, ra makkeelong lón chómmóng kélúpin, iwe chómmóng aramas ra eáni ekkena kél atun ar fel. Jiowa Kot a pwal affata pwe chón fel ngeni repwe pani itan we, iwe chón tuppwél ra álleasochisi. (Sowel 2:32; Föför 2:21) Ina minne, Chón Kraist mi enlet ikenái ra kan pappani iten Kot fán súfél nge a pwal ina usun Jesus.​—Johannes 17:26.

 Ekkóch chón afféúni Paipel ra fókkun mwáál lón ar ekkesiwili iten Kot we ngeni ekkóch itelap. Ra atowauafeseni Kot me aramas nge Paipel a pesei aramas pwe repwe “chiechifengen” me Jiowa. (Kölfel 25:14) Ekieki mwo emén ka pwipwiéch ngeni. Ka tongeni wesewesen pwipwiéch ngeni ika kese silei itan? Iwe, pwal ina chék usun, lupwen aramas rese silei iten Kot we Jiowa, epwe ifa usun repwe tongeni enletin chiechiéch ngeni? Pwal och, ika aramas rese nénnéúnéú iten Kot we, resap pwal silei weween we mi amwarar. Ifa weween ena it mi fel?

Kot a áweweei weween itan we ngeni néún we chón angang mi tuppwél itan Moses. Lupwen Moses a eis usun iten Kot we, Jiowa a pélúweni: “Ngang Upwe Wiliti Met Ua Filatá.” (Ekistos 3:14, NW) Iei itiitin afféún ena kapas me ren ei Paipel Rotherham: “Upwe Wiliti minne chék ua tipeni.” Iwe, Jiowa a tongeni wiliti minne chék a lamot fán iten an epwe apwénúetá minne a tipeni me a pwal tongeni efisi pwe férian kewe repwe apwénúetá minne a tipeni.

Ekieki mwo ika ka tongeni wiliti minne chék ka tipeni. Met kopwe féri fán ásengesin chienom kewe? Ika emén me leir a úri samau watte, ka tongeni wiliti emén tokter mi lipwákéch pwe kopwe echikaraatá. Ika emén a fókkun osupwang, ka tongeni wiliti emén mi pisekisek pwe kopwe álisi. Iwe nge, ren enletin, kese tongeni wiliti minne chék ka tipeni. A ina usuch meinisin. Fansoun kopwe kákkáé Paipel, epwe ámáirú ngonuk ifa usun Jiowa a kan wiliti minne chék a lamot fán iten an epwe apwénúetá minne a tipeni. Iwe, a pwapwa le áeá an manaman fán iten chókkewe mi tongei i. (2 Kronika 16:9) Nge ren chókkewe rese silei iten Jiowa, resap tongeni weweiti napanapan kewe mi fókkun múrinné.

Iei a ffat pwe a pwúng an epwe nóm lón Paipel ewe it Jiowa. Ach silei weween me ach nénnéúnéú lón ach fel epwe fókkun álisikich ach sipwe ririéch ngeni Jiowa, Semach we lón láng. *