APÉNDICE
Bab nuga, ¿ibu obare geb ibiga ebuleged abelege?
BE BIBLIAGI Salmo 83:18, ¿igi sognamoga? Traducción del Nuevo Mundo de las Santas Escrituras gine sognaid: “Dulemar wisgumalaga bee, be Jehová nugadi, bebii unnila wargwenna Bur Dummadid bela nabbaneggi”. Abar Bibliamargi weyobsaar soglenamogad. Auggi buggidar Bibliamargi we versículogine Jehová nug elisdamalad, geb agga anale bur nasisdamalad “Señor” sulirdi “Eterno”. We versículogine, ¿Jehová nug nague wilubbundibe? ¿Igi be binsae?
Hebreoba Bab nug nai
Wegine nug soggwengi sunmagnaid. Gebbe Hebreo gayaba Biblia narmaglesgua nug soggwenna nainad. We nuga Hebreobali weyob narmagleged יהוה (YHWH). Dulesigdina sogleged Jehová, Eobadibe. ¿Unnila we nug Bibliagi irgwenna narmaglesdibe? Suli. Hebreo gayabali 7.000 mergusaar narmaggar nainad.
¿Ibigala Bab Dummad nug nue wisguleged abelege? Be daggena, Jesucristo Babse goledgi emar odurdasgua sogsad: “Anmar Bab nibneggi maid, be nug swilidig obariledii gusun” (Mateo 6:9). Sorba weyob Babga sogsabalid: “Bab Dummad, be nug be odummoge”. Sorbali Bab Dummad, Jesús abin sogded: “An nug baddo an ogannosad. An nug gannar an ogannobaloed” (Juan 12:28). Degsoggu ise mag daglegaled nue Bab nug wisguleged abeleged. Auggi, ¿ibigala abar baid gaggaba Biblia ogwamaladi Bab nug elismala geb anar nug baid nasismala?
Ibmar sogbo ulaler gebed. Gebbedgine, buggidar dulemar sogmalanad Bab Dummad nug ebulegedsurye ar emi ibagi bar dule wissuliddeye igi nue Bab nug bilegena. Ebbenne Hebreo gayabali a, e, i, o, u, saddensoggua, emi ibagi geg dule soged igi nue YHWH bilegena. Degsoggu soglesunde, ¿geg bar Bab Dummadse e nugba gorleye? Binsa anmar sogoena dulemar nueggwa wissurmogad nue ebbenne igi Jesús nug bilegena, sun soglegenad Yeshúa sulirdi Yehoshúadibe. Auggi dulemar sogdisulid mer anmar Jesús nug ebugodagleye. Degi inigwale bela dulemar na e gaggabali Jesús nug bibuggwad. Be baid neggwebursig nadele be iddosmogaled be nug wis aggar bilemoga. Degsoggu anmar wissur inigwale ebbenne nue igi Bab nug bilegena soglesulid mer anmar Bab nug ebugoye.
Ebbenne Judíomar binsadamalanad Bab nug bibbisaar ebulegedsurye. Ar ebbenne Israel neggweburga igar uglesadba: “Melle be Bab Dummad Jehová nug yogasaar be obaro. Ar dule yogasaar Bab Dummad nug obarisale, aa dule, Bab Dummad Jehováse sabsur odurdaglegedsegad”. Degsoggu Judíomar binsasmalad wegine sognaye mer Bab nug ebumaloye aagala Bibliagi Bab nug elismarbalid (Éxodo 20:7).
Ar wegine soglenai inigwale mer dodoaggwa Bab nug ebumaloye, auggi soglenasulid, mer Bab nug ebumaloye. Hebreo gayaba Biblia narmasmaladi, Bab sogedba ibmar imagdamalanad. Degsoggua, emardina bali bali Bibliagine Bab nug narmasmalad. Be daggena Salmosgine Bab nug narmasmalad, we salmomar ebudamalanad namaglealir Bab nug odummogegar. Jehová sunnadi e sordaganga sogsamogad bemar bendaglegegala an nugbali anse gormaloye geb e sordagan deyob imasmalad (Joel 2:32; Gusmalad 2:21). Degsoggua, emi ibagi Cristo sordagan nuedgi Bab nug ebumarmogad, Jesús imasayobi (Juan 17:26).
Biblia ogwaarmargua Bab nug elilegedsulinad. Bab nug elismaladbali imasmalad dulemar binsaedga Bab masuliyobi. Auggi Bibliagindi sognaid, “Bab Jehová dulemar e nug odummodimaladbo waliggaa gu[ye]” (Salmo 25:14). Be ai nuedgi, be binsaena. Emisgi be e nug wissursundibe, ¿be sogsale we an ai nuedye? Bab Dummad deyobmogad, ¿igi anmar e aiga guode ar anmar wissulir Bab Dummad Jehováye nugye? Dulemar nugba Babse gorsurmaladi bibbisaar wissurmarbalid ibu nue e nug obare. ¿Ibu nue Bab Dummad nug obarsunna?
Bab Dummad, Moisésga sogsad e nug ibu obare. Moisés ese egissagua igi be nugye, Jehová abin ega sogsad ‘ibu an imagbie, an imaggoed’ (Éxodo 3:14, TNM). Degsoggua Jehovágardi ibmar soggwensaale geg gued sadded.
Anmar sogoena belagwable be nabir ibmar imagye. ¿Ibu be aimarga be imasale? Be ai wargwen uweleardibe be doctorgala gusaled onuguega. Be ai baid mani sadde gusdibe, be dule mani ibedga gusaled bendaggega. Auggi anmardina geg deyob ibmar imagged. Biblia durdagmaidbali be daggoed Bab Dummadgardi ibmar geg gued saddeye. Degsoggua yeer iddo daed na e sordagan bendaggedga e gangued ebugele (2 Crónicas 16:9). Dulemar Bab nug wissulile geg durdagmardo, Jehová nue dule igi daedi.
Degsoggua Jehová nug Bibliagi onolegedsulid. Ar anmar wisgusale Jehová nug ibu obare geb nugba anmar ese gorbalile, ibigwensur anmar e aiga gudoed. *
^ parr. 3 Be nabbi wisgubiele ibu Bab nug obare, geb ibiga anmar nugba ese goledi, absogo garda El nombre divino que durará para siempre, Jehovági sunmagmalad we garda onosmalad.
