TERA aron rairan Taian Areru 83:18 n am Baibara? E kangai rairan te kibu aei n te Baibara ae Te Baibara ae Tabu—te Rairai ae te Aonnaba ae Boou: “Ke a ataiko aomata ae Iehova aram, bwa bon tii ngkoe Teuare Moan te Rietata n te aonnaba ni kabutaa.” Iai naba rairai n te Baibara tabeua ake a rairia naba n aron anne. Ma a boni bati naba rairai ake a kakeaa te ara ae Iehova, n onea mwina n nakoa aika “te Uea” ke “Teuare ma Ngkoangkoa ao n Aki Totoki.” Tera ae riai ni kabonganaaki n te kibu aei? Te nakoa ke te ara ae Iehova?

E koreaki taekan te ara n te kibu aei. N te taetae n Ebera rimoa are e moani koreaki iai bokin te Baibara aika mwaiti, ao e bati ni koreaki iai te ara ae okoro teina aei. E kangai koreana n aia man ni koroboki I-Ebera יהוה (YHWH). N te taetae ni Kiribati, e taneiai n rairaki te ara anne bwa “Iehova.” E kaoti te ara anne ni kibun te Baibara ae tii teuana? E aki, bwa e kaoti n te moani Baibara n Ebera n te mwaiti ae kaania 7,000 te tai!

Tera aroni kakawakin aran te Atua? Iangoa taekan te tataro ni katoto are e anga Iesu Kristo. E kangai moana: “Tamara are i karawa, e bia katabuaki aram.” (Mataio 6:9) Imwina riki, e a manga tataro Iesu nakon te Atua ni kangai: “Tamau, neboa aram.” Ni kaekaan anne iroun te Atua, ao e taku mai karawa: “I a tia n neboia ao N na manga neboia riki.” (Ioane 12:28) E teretere ngkanne bwa moan te kakawaki aran te Atua. Ma e aera ngkai a kakeaa te ara aei taan raira te Baibara tabeman, ao n onea mwina n taian nakoa?

N taraana, iai bukina aika uoua. Te moan, angia aomata a taku bwa e aki riai ni kabonganaaki te ara aei ibukina bwa aroni koreana n te moani Baibara, e aki kona ni katangaki raoi atongana ni boong aikai. E riki aei bwa akea te waueri n te koroboki n Ebera rimoa. Mangaia are akea te aomata ni boong aikai ae e ataa raoi aroia aomata n taai ake e koreaki iai te Baibara ni katanga atongan YHWH. Ma e na tukira aei mani kabonganaan aran te Atua? N taai aikai naba, ai akea ae e kona ni katanga raoi atongan aran Iesu are a kakatangnga aomata  ake maiu n taai ake e koreaki iai te Baibara, bwa tao e atongaki bwa Yeshua ke Yehoshua. Ma e kaokoro aron atongan te ara aei n te aonnaba nako bwa aomata a katanga te ara ae Iesu ma ni koreia, n te aro ae e na nakoraoi ma oin aia taetae. A aki katoka kabonganaan te ara anne ibukina bwa a aikoa kona ni katangnga raoi n aroni katangana irouia kaain te moan tienture. N aron naba anne, ngkana ko mwananga nakon aaba i tinaniku, ko na bae n noria bwa e na bitaki katangan aram n te taetae teuana. Mai ikai are e oti iai bwa bon akea manenani kakeaan aran te Atua ibukini kangaangan atongana.

Kauouani bukini kakeaan aran te Atua n te Baibara, e irekereke ma aia katei I-Iutaia ae teimaani kamanenaana. A bati i buakoia ake a kakoauaa bwa e aki riai n atongaki aran te Atua. E teretere bwa e boboto te koaua aei i aon otaia ae aki eti raoi n ana tua te Baibara ae kangai taekana: “Ko na tai kabongana aran Iehova ae Atuam n te aro ae aki riai, bwa Iehova e na boni katuuaaea te aomata ae kabongana Arana n te aro ae aki riai.”—Te Otinako 20:7.

E katabuaka kabonganaan aran te Atua, te tua aei n te aro ae aki riai. Ma te koaua bwa e bon tabuaki kabonganaana n te aro ae karinerine? E aki. Taani korea te Baibara n Ebera (te “O Tetemanti”), boni mwaane aika rangi ni kakaonimaki ake a maiuakina te Tua are e angania tibun Iteraera rimoa te Atua. Ma e ngae n anne, a rangi ni kakabongana naba aran te Atua. N te katoto, a karina aran te Atua n aia areru aika bati, ake a a ungaria n aneneia taan taromauri aika uanao. Irarikina, Iehova ae te Atua e bon reireinia naba taan taromauria, bwa a na taboa arana, ao a ongeaba n anne te koraki ake a kakaonimaki. (Ioera 2:32; Mwakuri 2:21) Mangaia are Kristian ni boong aikai, a kakabongana aran te Atua ma te karinerine, n aron naba are e karaoia Iesu.—Ioane 17:26.

A rangi ni bure kakaiaki taan raira te Baibara n aroia n onea mwin aran te Atua n taian nakoa. A karika te Atua bwa aongkoa e aki kan iraorao ma aomata ao e aki tabe ma ngaiia. Ma e kaumakia aomata te Baibara bwa a na karekea “te iraorao ae kaan ma Iehova.” (Taian Areru 25:14) Iangoa raoraom ae ko rangi ni kaan ma ngaia. Kaanra ngkoe ma raoraom anne ngkana ko tuai n ataa arana? Ai bon titeboo naba ngkana e a karabaaki aran te Atua ae Iehova mairouia aomata. E na kangaa ngkanne n rangi ni kaan aia iraorao ma te Atua ngkana a aki ataa arana? Irarikin anne, a na bon aki ataa naba nanon aran te Atua aomata aikai ngkana a aki kakabongana aran te Atua. Tera nanon aran te Atua?

E boni kabwarabwaraa nanon arana te Atua, nakon ana toro ae kakaonimaki ae Mote. Ngke e titiraki Mote ibukin aran te Atua ao e kaeka Iehova ni kangai: “N na Riki bwa te Bwai ae I Rineia bwa N na Riki Iai.” (Te Otinako 3:14) E raira anne Rotherham ni kangai: “N na boni Karaoa te Bwai ae I Kukurei iai.” Mangaia are e kona n riki Iehova bwa te tia kakoroi bukin ana kantaninga nako.

Iangoia bwa tera arom ngkana ko a riki bwa te aomata ae ko kona ni kakoroi bukin baika ko kantaningai? Tera ae ko na karaoia ibukia raoraom? Ngkana e a rangi ni kakaiaki aorakin temanna, ao ko na bae n riki bwa te taokita ae mwaatai ma ni kamaiua man aorakina. Ngkana e a manga rotaki buaka temanna n ana kataumwane, ko na manga riki bwa te tia ibuobuoki ae rangi ni kaubwai ma n anganna buokana te mwane. Ti boni bane n aki konabwai ni baike ti kan uaiakin. Ngkai ko reiakina te Baibara, ko na mimi iai n nora aron Iehova ni kona n riki bwa te aomata are e kona ni kakoroi bukin ana berita nako. E kukukurei naba ni kabongana mwaakana ibukini buokaia te koraki ake a tangiria. (2 Rongorongo 16:9) Aroaron Iehova aika tamaroa aikai, a bon aki ota iai te koraki ake a aki ataa arana.

E teretere bwa e bon riai ni kabonganaaki te ara ae Iehova n te Baibara. Ataakin nanona iroura ao kakabonganaana n ara taromauri, boni buokara ae rangi ni kakawaki ibukin kaanian Tamara are i karawa ae Iehova. *