TUMCHEA Bible-ant Stotr 83:18 hem vachop koxem bhaxantor kelam? New World Translation of the Holy Scriptures hea Inglez Bible-ant tem vers, “Ani zannam zaum soglle: Tujem ekleachench nanv Jehova, ak’khe prithume voir tum ekloch bhov vorto!”, oxem boroilolem asa. Khubxea Bible-ant hem vers oxench bhaxantor kelam. Punn zaite pavtt bhaxantor kortoleamnim, Jehova hea nanvachea zagear “Dev” vo “Sorvespor”, him utram uzar keleant. Hea vachpant Sorvespor asonk zai, vo Jehova hem nanv?

Hem vers, eka nanva vixim uloita. Adim Bible-achim choddxim pustokam Hebrev bhaxen boroilolim tednam, hem khas nanv tantunt aslem. Hebrev lipint tem יהוה (YHWH) oxem boroitat. Konkani bhaxen tem nanv Jehova. Hem nanv Bible-ant fokot ek versant asa kai? Na. Hebrev bhaxen boroilolea Bible-ant, tem nanv sumar 7,000 pavtt melltta.

Devachem nanv kitlem gorjechem? Jezun xikoilolea magnneacher niall korat. Tantunt survatek Jezun oxem mhunnttlam, “Amchea Bapa sorginchea, Tujem nanv povitr zaum.” (Matev 6:9) Anik eka vellar magnnem kortana tannem mhunnttlem, “Bapa, Tujea nanvak mhoima zoddun ghe.” Tednam sorga voilean Devan zobab dilo, “Hanvem Mhojea nanvak mhoima zoddun ghetlea ani novean mhoima zoddun ghetolom.” (Juanv 12:28) Khorench, Devachem nanv khub gorjechem. Toxem zalear, thoddea bhaxantor kortoleamnim tem nanv kaddun, thoim ‘Dev’ vo ‘Sorvespor’ kiteak ghatlam?

Oxem korunk ghoddie don karonnam asot. Poilem karonn mhunnttlear, Hebrev bhaxen tem nanv koxe uchartale, tem aiz pasun konnank khobor na. Ani hem khobor naslolean, tem nanv uzar korop chukichem oxem  tankam dista. Hebrev bhas boroitana, svor okxoram (a, e, i, o, u) uzar korinasle. Ani taka lagon, YHWH hem Devachem nanv, tea kallar lok koxe uchartale tem konnacheanuch sangonk zaina. Punn hea karonnak lagon, ami Devachem nanv uzar korunk zaina oxem nhoi. Adlea kallar Jezuk lok, Yeshua mhunnttale vo Yehoshua, tem aiz konn sarkem sangonk xokona. Torui, sonvsarbhor aslolo lok aiz pasun hem nanv ap-aplea bhaxent, veg-vegllea toren uchartat. Jezuchea vellar hem nanv koxe uchartale tem tankam khobor na mhunn, tannim tem uzar korchem bond korunk na. Eka dusrea desant gelear, thoincho lok tumchem nanv tanchea bhaxen veglleach toren uchartolo. Taka lagon, adim Devachem nanv koxe uchartale tem khobor na mhunn, tem uzar korinastana ravop, sarkem nhoi.

Tem nanv kaddun uddounk anik ek karonn mhunnttlear, Judev lokamnim kel’li chal. Devachem nanv kednanch gheunk zaina oxem te mantale. Bible-ant aslolea eka kaideacho tannim chukicho orth kaddlolo. Thoim mhunnttlam, “Mhojea nanvacho vaitt upeog korum nakat, kiteak hanv tumcho Sorvespor, mhojea nanvak okman kortoleank khast laitam.”—Dusri Somurt 5:11.

Hea kaideant, Devachem nanv vaitt ritin gheunchem nhoi mhunn sanglam. Punn tem nanv borea ritin gheunk, ho kaido addaina. Hebrev bhaxen, Bible (“Adlo Korar”) boroilolo te sogle lok visvaxi asle ani Israel porjek dilolea kaidea pormonnem jietale. Hea lokamnim pasun Devachem nanv khub pavtt uzar kelem. Udharonnak, tannim zaite pavtt hem nanv, Devachi bhokti korunk gaitat tea stotramnim ghatlolem asa. Jehova Devan pasun aplea bhokti kornnareank, apleak nanvan ulo marat mhunn sanglem, ani tea lokamnim toxench kelem. (Joel 2:32; Itihas 2:21) Jezunui tem nanv uzar kel’lem. Taka lagon, aiz Devache sevok tem nanv manan uzar korunk fatti soronant.—Juanv 17:26.

Bible-antlean Devachem nanv kaddun, bhaxantor korpi vhodd chuk kortat. Hea toren te, Devak amchem kainch  poddlolem na ani to amchea thaun khub pois asa mhunn dakhoitat. Punn, ami Devache ixtt zaunk xokta mhunn Bible sangta. (Jakob 2:23) Tumchea eka ghott ixtta vixim chintat. Tumkam tachem nanv khobor naslem zalear, tumi tache ghott ixtt zaunk pavtole asle? Na. Toxench, Jehova hem Devachem nanv mhunn khobor na zalear, lok tache ixtt koxe zatole? Devachem nanv uzar korina dekhun, lokank tacho orth khobor na. Punn tea nanvacho orth kitem?

Aplea nanvacho orth kitem to, Devanuch aplea visvaxi sevok Moizesak kolloilolo. Tannem Devachea nanva vixim vicharlem tednam Jehovan taka mhunnttlem, “ZO ASA TO HANV.” (Suttka 3:14) Rotherham-achea Bible-ant him utram, “Mhaka zai toso hanv zatolo”, oxim bhaxantor kel’lim asat. Aplo ud’dhex purnn korunk, Jehova konnui zaunk xokta. Itlench nhoi, apleak zai tem korunk tachean aple rochnnekui uzar korunk zata.

Tumkam zai tem tumi zaunk xoktalim zalear, tumchea ixttam pasot tumi kitem kortolim aslim? To duent poddlolo zalear, tumi dotor koxim taka boro kortolim aslim. Dusro ek ixtt poixanche gorjek sampoddlo zalear, ek girest munis koxim tumi tache gorjek pavtolim aslim. Khorem mhunnttlear, amchea modlo konnuch, amkam zai toso zaunk xokona. Punn zoxim ami Bible xikot ravtolim, Jehovan bhasailam tem khorem korunk to konnui zaunk xokta, hem amkam kollon ietolem. Ani aplo mog kortat tanchea pasot, apli xokti uzar korunk to fatti sorona. (2 Itihas 16:9) Punn Jehovachem nanv khobor na tankam tachea hea gunnam vixim vollokh mellchina.

Bible-ant, Jehovachem nanv asonkuch zai. Jehova Devache ixtt zatolim zalear, tachea nanvacho orth zannam zavop ani tem nanv uzar korop khub gorjechem zaun asa. *