PUJUTALA tü Wiwülia pümaʼanakat suluʼu Salmo 83:18 (82:19 suluʼu waneeirua Wiwülia). ¿Jamüsü sünüiki wetsiikulokot tüü? Müsü Traducción del Nuevo Mundo de las Santas Escrituras: «Süpüla sütüjaainjatüin aaʼu wayuu, piain neʼe pümüiwaʼa chi Miyoʼushikai saaʼu tü mmakat süpüshuaʼa, piakai chi kanüliakai Jeʼwaa». Tia pütchikat meematüsü aka saaʼin süshajia sutuma waneeirua Wiwülia. Suluʼu waneeirua Wiwülia nnojotsü tü anülieekat Jeʼwaa suluʼu, aʼwanajaanüsü süka «Senyotkai» jee «chi Matüjüinkai ouktaa». ¿Kasa eeinjatka suluʼu wetsiikulokot tia? ¿Wanee nünüliayaasü Maleiwa shiataapa tü anülieekat Jeʼwaa?

Yala ashajünüsü wanee anüliee. Suluʼu tü ashajünakat süka hebreo otta suluʼu süpüshuaʼa tü Wiwüliakat ashajünüsü wanee anüliee. Anülieekat tia ashajünüsü süka tü pütchikat hebreo יהוה (YHWH). Süpüla sülatinnüin süka wayuunaiki shia Jeʼwaa. ¿Uatuache neʼe süshajünüin tia anülieekat suluʼu tü Wiwüliakat? Nnojorüleejaa, ashajünüsü maʼaka 7.000 suluʼu tü saʼata ashajuushikat süka Hebreo.

¿Kojutusüche maʼin nünülia Maleiwa? Jülüja waaʼin tü nünüikikat Jesukürisüto washatüinjatka naashin waashajaapa nümaa Maleiwa. Müsü tü suʼttiakat: «Taata Maleiwa chakai iipünaa, kojutshaatashi pia watüma [wule putuma tü pünüliakat, TNM]» (Mateo 6:9). Mapa, müshi nia: «Taata, kojutü putuma tü pünüliakat». Nümaka Maleiwa sirumatuʼujee: «Kojutüitpa tatuma otta kojuteerü shia tatuma süchikuaʼa» (Juan 12:28, TNM). Sutuma tia, kojutüsü maʼin nünülia Maleiwa. Akatsaʼa, ¿jamüsü nasünneʼeraka shia na wayuukana suluʼujee waneeirua Wiwülia otta neʼitaaka wanee nünüliayaasü Maleiwa?

Aainjünüsü tia sutuma piamasü kasa. Palajana, naashin noʼutku na wayuukana nnojoluinjatü wachuntüin nünülia Maleiwa süka nnojoluin watüjaain saaʼu tü suchuntiapuʼukat. Sükajee nnojoluin süshajünüin süka wokaale tü pütchi hebreo sümaiwajatkat, nnojotsü atüjaanüin aaʼu maaʼulu tü achuntünapuʼukat  aka tü pütchikat YHWH. ¿Nnojotsüche wachuntajatüin nünülia Maleiwa sutuma tia? Tü nünüliakat Jesuu, eesü suchuntünapuʼule süka tü pütchikat Yeshúa jee Yehoshúa; matüjaaju aaʼu. Akatsaʼa sainküin mma naatawaisü süshajia otta suchuntia nünülia Jesuu. Mayaapejeʼe matüjaajuin saaʼu suchuntia nünülia Jesuu sümaiwa, achuntünüsü shia. Puʼunüle suluʼumüin wanee mma naata, naateerü suchuntia pünülia. Mayaapejeʼe nnojoluin watüjaain saaʼu suchuntia nünülia Maleiwa sümaiwa, wachuntajatü shia.

Tü piamakat kasa nnojotka süshajünüin atuma nünülia Maleiwa suluʼu tü Wiwüliakat shia sutuma nnojoluinjatüin suchuntünüin nünülia Maleiwa naashin na judíokana. Müsü tü nanüikikat sükajee mojuin sukuwaʼipa natuma tü pütchi makat mayaa: ‹Nnojotsü puchuntajatüin sümaa mojutuyaain pümüin nünülia Jeʼwaa, chi pümaleiwasekai, na eekana naainjain tia süsaleena nutuma Jeʼwaa› (Éxodo 20:7, TNM).

Shiimain tia, nnojotsü mojutüinjatüin nünülia Maleiwa watuma. Wachuntajatü sümaa kojutüin shia wamüin. Napüshuaʼa na ashajakana tü Wiwüliakat süka hebreo (kanüliaka «Antiguo Testamento») naainjain waneepia tü nümakat Maleiwa sükajee tü pütchi naapakat namüin na israeliitakana. ¿Kasa naainjaka wayuukana naainnua süka nünülia Maleiwa? Nachuntüin shia waneepia. Nashajüin shia suluʼu tü kanüliakat Salmos, tü neeʼirajapuʼukat na wayuu aʼwaajakana Maleiwa. Nuluwataain Jeʼwaa na aʼyataakana nümüin süpüla nachuntüin nünülia otta oonooshii naya sümaa nünüiki (Joel 2:32; Aluwataaushikana 2:21, TNM). Makalaka wachuntüin maaʼulu nünülia Maleiwa otta kojutüin shia wamüin maʼaka naainjain shia Jesuu (Juan 17:26, TNM).

Mojusü maʼin shiiʼiratünüin nünülia Maleiwa süka wanee nünüliayaasü. Müshi kaʼyatakai Maleiwa woulia sutuma. Akatsaʼa saashin tü Wiwüliakat «aleewainjana maʼin waya nümaa Jeʼwaa» (Salmo 25:14, TNM). Jülüja paaʼin wanee wayuu eeka paʼaleewain maʼin. Nnojorüle pütüjaain saaʼu nünülia, ¿paʼaleewainjeechiche maʼin nia? Müshia Maleiwa, nnojorüle watüjaain saaʼu nünülia nnojoishii waya süpüla naʼaleewain. Wayuu eeka nnojoluin nachuntüin nünülia Maleiwa nnojotsü natüjaain aaʼu jamaluʼuluin shia. ¿Jamaluʼulu nünülia Maleiwa?

 Wanaa sümaa nüsakinnüin Maleiwa sünain tü nünüliakat nutuma Moisés, müshi nia nümüin :‹Taainjeerü tü keeʼireekat taaʼin süpüla shikeraajüinjatüin tü tamakat› (Éxodo 3:14, TNM). Müsia shia sutuma tü Wiwülia nülatiralakat Rotherham. Makalaka naainjain Jeʼwaa tü keeʼireekat naaʼin süpüla shikeraajüin tü nümakat.

Pütüjale maʼin süpüleerua paainjain tü keeʼireekat paaʼin, ¿kaseerü paainjaka namüin na paʼaleewainkana? Eekai ayuulin, piiyajeechi nia maʼaka naaʼin wanee tottoot atüjashi maʼin. Amülouire nünneetse wanee, wainmajaajeerü nneerü pümaʼana süpüla pükaaliinjain nia. Akatsaʼa isain püchiki paainjain tü keeʼireekat paaʼin maʼaka isain shia wachiki. Pikirajaapa maʼin sünain tü Wiwüliakat, pütüjaajeerü aaʼu naainjain Jeʼwaa süpüshuaʼa tü keeʼireekat naaʼin süpüla shikeraajüin tü nümakat. Anasü nümüin nükaaliinjain süka nütchin na wayuu aikana apüla nia (2 Crónicas 16:9). Na nnojoliikana atüjaain saaʼu nünülia Jeʼwaa nnojotsü natüjaain aaʼu anashaatain maʼin nukuwaʼipa.

Ashajünajatü suluʼu tü Wiwüliakat nünülia Maleiwa. Watüjaapa saaʼu jamaluʼuluin nünülia Jeʼwaa otta wachuntüle shia süpüla waʼwaajüin nia, arütkaajeena maʼin waya nünainmüin. *