OIEMU Baibel dekenai Salamo 83:18 be edena bamona idia hahanaia? Buka Helaga Baibel dekenai unai siri be inai bamona idia hahanaia: “Lau ura inai bamona do oi karaia, vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.” Baibel ma haida be unai bamona idia hahanaia danu. To, Baibel ma haida dekenai Dirava ena ladana idia kokia, bona ena gabu ai dagi ladadia hegeregere, “Lohiabada” eiava “Noho Hanaihanai Tauna” idia torea. Unai siri dekenai dagi ladana ta eiava inai ladana Iehova ia noho be namo a?

Unai siri ese ladana ta ia herevalaia. Baibel ena kahana badana be Heberu gado dekenai idia torea, unuseniai ladana ta idia gaukaralaia. Unai ladana be inai Heberu leta foa יהוה (YHWH) amo idia torea. Motu gado dekenai unai ladana idia hahanaia “Iehova.” Unai ladana be Baibel siri tamona sibona dekenai ia hedinarai, a? Lasi. Unai ladana be nega 7,000 bamona idaunegai Heberu Revarevadia lalonai ia hedinarai!

Dirava ena ladana be mai anina bada, a? Iesu Keriso ese ena hahediba taudia dekenai ia herevalaia gurigurina mani ita laloa. Unai guriguri ena matamanai inai hereva ia noho: “Aiemai Tamana e, guba dekenai oi noho, oiemu ladana do ai hahelagaia.” (Mataio 6:9) Gabeai, Iesu ese Dirava ia guriguri henia: “Egu Tamana e, oiemu ladana oi hanamoa!” Dirava be guba amo ia hereva: “Lau hanamoa vadaeni, ma do lau hanamoa lou.” (Ioane 12:28) Unai ese ia hahedinaraia goevagoeva, Dirava ena ladana be mai anina bada. To dahaka dainai Baibel idia hahanaia taudia ese unai ladana idia kokia bona ena gabu ai dagi ladadia idia torea?

Badina badadia rua dainai unai bamona idia karaia. Badina ginigunana be, momo idia gwau unai ladana ita gaukaralaia lasi be namo, badina idaunegai unai ladana idia gwauraia dalana be hari ita diba lasi. Idaunegai Heberu gado idia torea neganai, inai leta a, e, i, o, bona u idia torea lasi. Unai dainai, Baibel negadiai idia  noho taudia ese YHWH idia gwauraia dalana be hari ta ia diba lasi. To, unai ese ita do ia koua Dirava ena ladana ita gaukaralaia lasi totona, a? Baibel negadiai, reana inai ladana Iesu idia gwauraia Yeshua eiava Yehoshua​—ta be unai ia diba momokani lasi. To, hari tanobada hegegemadai taunimanima ese edia gado dekenai ia hegeregere daladia ai, Iesu ena ladana idia gwauraia. Unai ladana idia gaukaralaia, herevana idaunegai unai ladana idia gwauraia dalana idia diba lasi. Unai hegeregerena, bema idau tano ta dekenai oi lao, reana emu ladana be dala idauna ai do idia gwauraia. Unai dainai, idaunegai Dirava ena ladana idia gwauraia dalana ita diba lasi dainai, ita gaukaralaia lasi be badina namona lasi.

Badina iharuana be, Iuda taudia ese nega daudau lalonai idia abia dae lalohadaina ta dainai. Iuda taudia momo idia gwau Dirava ena ladana ita gwauraia be kerere. Unai bamona lalohadai idia abia dae badina Baibel ena taravatu ta idia lalopararalaia kerere, ia gwau: “Lohiabada emui Dirava ena ladana be do umui gwauraia kava, gwauraia kava lasi, badina be egu ladana do ia gwauraia kava tauna ena davana do lau henia.”​—Esodo 20:7.

Unai taravatu ese Dirava ena ladana gaukaralaia kava karana ia taravatua. To mai hemataurai ida ena ladana ita gaukaralaia karana ia taravatua danu, a? Lasi. Heberu Baibel (“Taravatu Gunana” unai) idia torea taudia ibounai be Dirava ese Israela taudia dekenai ia henia Taravatuna idia badinaia. To, nega ibounai Dirava ena ladana idia gaukaralaia. Hegeregere, tomadiho anedia lalonai unai ladana idia gaukaralaia. Iehova Dirava ese ia idia tomadiho henia taudia ia haganidia ena ladana do idia boiboilaia, bona abidadama taudia ese unai hahegani idia kamonai. (Ioela 2:​32, BHğ; Kara 2:21) Iesu ia karaia hegeregerena, hari Keristani taudia ese Dirava ena ladana be mai hemataurai ida idia gaukaralaia.​—Ioane 17:26.

Baibel idia hahanaia taudia ese Dirava ena ladana idia kokia bona ena gabu ai ena dagi ladana idia torea neganai, idia ese kerere badana idia karaia. Unai amo idia hahedinaraia, Dirava be taunimanima amo ia noho daudau bona ita ia laloa lasi, to Baibel ese taunimanima ia hagoadaia “Iehova ena turana” ai idia lao totona. (Salamo 25:​14, BHğ) Emu turana korikorina ta mani oi laloa. Bema emu turana ena ladana oi diba lasi, iena turana ai oi lao  diba, a? Unai hegeregerena, taunimanima ese Dirava ena ladana, Iehova idia diba lasi neganai, edena bamona idia be Dirava ena turana ai idia lao diba? Bona taunimanima ese Dirava ena ladana idia gaukaralaia lasi neganai, idia ese ena anina korikorina idia reaia danu. Dirava ena ladana ena anina be dahaka?

Dirava ese ena ladana ena anina be ena hesiai tauna, Mose dekenai ia gwauraia hedinarai. Mose be Dirava ena ladana totona ia henanadai neganai, Iehova ia gwau: “Dahaka ai lau sibona do lau halaoa be do lau halaoa.” (Esodo 3:​14, NW) Unai dainai Iehova be ia ura gauna ai ia sibona ia halaoa diba, ena ura ia hagugurua totona.

Bema oi sibona be taunimanima idauidau ai oi halaoa diba, emu turadia totona dahaka do oi karaia? Bema idia ta ia gorere bada, doketa tauna ta ai oi lao diba, ia oi hanamoa totona. Bema ma ta ese moni bada ia halusia, taga tauna ai do oi lao diba, ia oi durua totona. To ita be unai bamona ita karaia diba lasi. Baibel oi stadilaia noho lalonai, do oi hoa badina Iehova be ia ura gauna ai sibona ia halaoa diba, ena gwauhamata ia hagugurua totona. Bona ia moale bema ena siahu be ia idia lalokau henia taudia totona ia gaukaralaia. (2 Sivarai 16:9) Dirava ena ladana idia diba lasi taudia be Iehova ena kara idauidau do idia dibaia lasi.

Unai ese ia hahedinaraia goevagoeva, inai ladana Iehova be Baibel dekenai ia noho be namo. Unai ladana ena anina ita diba bona iseda tomadiho karana dekenai ita gaukaralaia neganai, iseda guba Tamana, Iehova kahirakahira do ita lao. *