THĨINĨ wa Bibilia yaku-rĩ, Thaburi 83:18 ĩtaũrĩtwo atĩa? Bibilia ya Gĩkũyũ yugaga ũũ: “Nĩguo mamenye atĩ wee, o wee wĩtagwo JEHOVA, nowe wiki Ũrĩa-wĩ-Igũrũ-Mũno o igũrũ rĩa thĩ yothe.” Ũtaũri ũngĩ wa Bibilia uugaga ũndũ ũhaanaine na ũcio. No rĩrĩ, ataũri aingĩ matihũthagĩra rĩĩtwa Jehova, ithenya rĩa ũguo mahũthagĩra marĩĩtwa ma ũnene ta “Mwathani” kana “Ngai.” Nĩ rĩĩtwa rĩrĩkũ rĩagĩrĩirũo gũkorũo mũhari-inĩ ũcio? Nĩ rĩĩtwa rĩa ũnene ĩ kana nĩ rĩĩtwa Jehova?

Mũhari ũcio ũraria ũhoro wa rĩĩtwa rĩo rĩene. Thĩinĩ wa Kĩhibirania gĩa tene kĩrĩa kĩahũthĩrirũo kwandĩka gĩcunjĩ kĩnene kĩa Bibilia-rĩ, rĩĩtwa rĩa mwanya rĩa Ngai we mwene nĩrĩo rĩkoragwo ho. Rĩandĩkagwo ũũ na ndemwa cia Kĩhibirania: יהוה (YHWH). Rĩĩtwa rĩu na Gĩkũyũ kaingĩ rĩandĩkagwo “Jehova.” Rĩĩtwa rĩu hihi rĩonekaga thĩinĩ wa mũhari o ũmwe tu wa Bibilia? Aca. Rĩonekaga thĩinĩ wa Maandĩko ma Kĩhibirania ma tene hakuhĩ maita 7,000!

Rĩĩtwa rĩa Ngai nĩ rĩa bata atĩa? Ta wĩcirie ũhoro wa ihoya rĩrĩa Jesu Kristo aaheanire rĩ ta kĩonereria. Rĩambagĩrĩria ũũ: “Ithe witũ wĩ igũrũ, rĩĩtwa rĩaku nĩrĩamũrũo.” (Mathayo 6:9) Thutha-inĩ Jesu aahoire ũũ kũrĩ Ngai: “Awa, kĩgoocithie rĩĩtwa rĩaku.” Ngai aamũcokeirie akiuga ũũ kuuma igũrũ: “Nĩndĩrĩgoocithĩtie, o na nĩngarĩgoocithia rĩngĩ.” (Johana 12:28) Hatarĩ nganja-rĩ, rĩĩtwa rĩa Ngai nĩ rĩa bata mũno ma. No nĩ kĩĩ gĩgĩtũmĩte ataũri amwe maage kũhũthĩra rĩĩtwa rĩu thĩinĩ wa ũtaũri wao wa Bibilia, na handũ ha rĩo makahũthĩra marĩĩtwa ma ũnene?

Kũroneka ta kũrĩ na itũmi igĩrĩ njega. Kĩa mbere, andũ aingĩ moigaga atĩ rĩĩtwa rĩu rĩtiagĩrĩire kũhũthĩrũo tondũ ũmũthĩ gũtiũĩkaine ũrĩa rĩatamũkagwo. Kĩhibirania gĩa tene kĩaandĩkagwo gĩtarĩ na mĩgambithia, kana a,e,i,ĩ,o,u,ũ. Kwoguo-rĩ, ũmũthĩ gũtirĩ mũndũ ũngiuga e na ma ũrĩa andũ a mahinda ma Bibilia maatamũkaga ndemwa YHWH. No rĩrĩ, ũndũ ũcio hihi  nĩwagĩrĩire ũtũgirie kũhũthĩra rĩĩtwa rĩa Ngai? Hĩndĩ ya mahinda ma Bibilia-rĩ, rĩĩtwa Jesu no gũkorũo rĩatamũkagwo Yeshua kana Yehoshua, no gũtirĩ mũndũ ũngiuga e na ma. Ĩndĩ, andũ thĩ yothe ũmũthĩ nĩ mahũthagĩra rĩĩtwa Jesu na njĩra nyingĩ, na marĩtamũkaga na njĩra ĩrĩa yũĩkaine mũno na rũthiomi rwao. Matiagaga kũrĩhũthĩra atĩ tondũ matiũĩ ũrĩa rĩatamũkagwo mahinda-inĩ marĩa Jesu aarĩ gũkũ thĩ. O ũndũ ũmwe-rĩ o nawe ũngĩthiĩ bũrũri ũngĩ, wahota gũkora atĩ ũrĩa rĩĩtwa rĩaku rĩratamũkwo na rũthiomi rũngĩ nĩ ngũrani biũ. Kwoguo-rĩ, kwaga kũmenya ũrĩa rĩĩtwa rĩa Ngai rĩatamũkagwo tene ti gĩtũmi gĩa kwaga kũrĩhũthĩra.

Gĩtũmi gĩa kerĩ kĩrĩa kĩheanagwo kaingĩ gĩa kweheria rĩĩtwa rĩa Ngai thĩinĩ wa Bibilia gĩkoniĩ ũndũire wa kahinda karaihu wa Ayahudi. Aingĩ ao metĩkĩtie atĩ rĩĩtwa rĩa Ngai rĩtiagĩrĩire kũgwetwo. Nĩ ũhũthũ wĩtĩkio ũcio uumanĩte na kũhũthĩrũo ũũru kwa watho wa Bibilia ũrĩa ugaga ũũ: “Ndũkanagwete rĩĩtwa rĩa Jehova Ngai waku na itherũ, nĩ gũkorũo Jehova ndakoiga atĩ mũndũ ndehĩtie ũrĩa ũgwetaga rĩĩtwa rĩake na itherũ.”—Thama 20:7.

Watho ũcio ũgirĩtie kũhũthĩra rĩĩtwa rĩa Ngai na njĩra njũru. No hihi nĩ ũgirĩtie kũhũthĩra rĩĩtwa rĩake na njĩra ya gĩtĩo? Aca o na hanini. Aandĩki a Maandĩko ma Kĩhibirania (“Kĩrĩkanĩro kĩrĩa gĩa Tene”) othe maarĩ ehokeku na maatũũraga kũringana na Watho ũrĩa Ngai aaheete Aisiraeli a tene. No o na kũrĩ ũguo-rĩ, nĩmaahũthagĩra kaingĩ rĩĩtwa rĩa Ngai. Kwa ngerekano-rĩ, nĩmaarĩhũthĩrire mũno thĩinĩ wa thaburi iria ciainagwo na kayũ kanene nĩ irĩndĩ cia athathaiya. Jehova Ngai o na eerire athathaiya ake makayagĩre rĩĩtwa rĩake, na andũ ehokeku nĩmaathĩkire. (Joeli 2:32; Atũmwo 2:21) Nĩ ũndũ ũcio-rĩ, Akristiano ũmũthĩ matiagaga kũhũthĩra rĩĩtwa rĩa Ngai na gĩtĩo, o ta ũrĩa Jesu eekaga.—Johana 17:26.

Ataũri a Bibilia nĩmahĩtagia mũno rĩrĩa maaga kũhũthĩra rĩĩtwa rĩa Ngai na handũ ha rĩo magekĩra marĩĩtwa ma ũnene. Matũmaga Ngai oneke ta arĩ kũraihu mũno, na andũ matingĩtuma ũrata nake, o rĩrĩa Bibilia ĩraga andũ magĩe ‘ndundu na Jehova,’ kana ũrata nake. (Thaburi 25:14) Ta wĩcirie ũhoro wa mũrata waku wa gĩtĩ kĩa mbere. Ũrata wanyu ũngĩkorũo ũhaana atĩa angĩkorũo ndũrĩ wamenya rĩĩtwa rĩake? Na njĩra o ta ĩo-rĩ, andũ  mangĩkuhĩrĩria Ngai atĩa mangĩaga kwĩrũo rĩĩtwa rĩake, Jehova? Ningĩ rĩrĩa andũ maaga kũhũthĩra rĩĩtwa rĩa Ngai-rĩ, nĩmagaga ũmenyo wa ũrĩa riugĩte. Rĩĩtwa rĩa Ngai riugĩte atĩa?

Ngai we mwene nĩaatarĩirie ndungata yake njĩhokeku Musa ũrĩa rĩĩtwa rĩake riugĩte. Rĩrĩa Musa ooririe ũhoro wĩgiĩ rĩĩtwa rĩa Ngai-rĩ, Jehova aamũcokeirie ũũ: “Niĩ ndũire o ta ũrĩa ndũire.” (Thama 3:14) Ũtaũri wa Rotherham uugaga ũũ: “Niĩ Ngũtuĩka o kĩrĩa gĩothe ngwenda.” Kwoguo Jehova no atuĩke o kĩrĩa gĩothe kĩngĩendeka nĩgetha ahingie matanya make.

Ta wĩcirie korũo wee no ũhote gũtuĩka kĩrĩa gĩothe ũrenda. Ũngĩĩkĩra arata aku atĩa? Ũmwe wao angĩrwara-rĩ, no ũtuĩke ndagĩtarĩ njorua na ũmũhonie. Ũngĩ nake angĩthĩna nĩ mbia-rĩ, no ũtuĩke gĩtonga na ũmũteithie. Ũhoro wa ma nĩ atĩ wee ndũngĩhota gwĩka ũguo. Gũtirĩ o na ũmwe witũ ũngĩhota gwĩka ũguo. Wathiĩ na mbere gũthoma Bibilia-rĩ, nĩ ũkũgega kuona ũrĩa Jehova atuĩkaga o kĩrĩa gĩothe kĩendekaga nĩguo ahingie ciĩranĩro ciake. Na nĩakenagio nĩ kũhũthĩra hinya wake gũteithia arĩa mamwendete. (2 Maũndũ 16:9) Ngumo icio njega cia Jehova itingĩmenyeka nĩ arĩa matoĩ rĩĩtwa rĩake.

Hatarĩ nganja-rĩ, rĩĩtwa Jehova rĩagĩrĩirũo gũkorũo thĩinĩ wa Bibilia. Kũmenya ũrĩa riugĩte na kũrĩhũthĩra ũthathaiya-inĩ witũ tũtegwĩtigĩra nĩ ũteithio mũnene harĩ gũkuhĩrĩria Ithe witũ wa matu-inĩ, Jehova. *