MU BIBIDIA iê, o divulu dia Jisálamu 83:18, a disoneka kiebhi? Mu Tradução do Novo Mundo das Escrituras Sagradas a disoneka kiki: “Phala athu a kijiie kuma eie, ngó uevu o dijina diê dia Jihova, eie ngó Suke-ku ia ngongo ioso.” Mu ji Bibidia ja kamúkua a soneka ué kienhiki. Maji saí ji Bibidia, a katula-mu o dijina dia Jihova, a te-mu o majina a ujitu, kála “Ngana” mba ‘Unangenena.’ Dijina diahi dia tokalele ku di zuela mu velusu íii? O dijina dia ujitu, anga o dijina Jihova?

O velusu íii, izuela dijina. Mu dízui dia Hebalaiku, dia soneka na-diu o Bibidia, mu moneka o dijina dimoxi-élele. A disoneka kiki mu isoneku ia Hebalaiku, יהוה (YHWH). Mu dízui dietu dia Kimbundu, o dijina didi a di lombolola, “Jihova.” O kuila o dijina didi di moneka ngó mu velusu imoxi ia Bibidia? Kana. Mu Mikanda ia Hebalaiku, o dijina didi di moneka 7.000 ia ji veji!

Valolo iahi iala na-iu o dijina dia Nzambi? Xinganeka o musambu ua longo Jezú Kristu. Uene u mateka kiki: “Tata ietu uene mu diulu, dijina dié a dixile.” (Matesu 6:9) Mu kithangana kia mukuá, Jezú ua sambe kua Nzambi: “Tata, fumanesa o dijina dié!” Nzambi ua mu tambuijila tundé ku diulu, uixi: “Nga di fumanesa kiá, hanji ngi di fumanesa jinga.” (Nzuá 12:28) Mu kidi, o dijina dia Nzambi diala ni valolo ia dikota. Mukonda diahi-phe o a mu bhitulula o isoneku ia Bibidia mu madimi engi, a katula o dijina didi mu Bibidia iâ, ia te-mu majina a ujitu?

Nange a di katula mu ima iiadi. Kia dianga, saí athu a zuela kuma o dijina didi, ki dia tokala ku di tumbula, mukonda ene kejiia se kiebhi kia kexile mu dixana m’okulu. Mu dízui dia Hebalaiku, akexile mu disoneka sé o isoneku ia tokala (vogais; a, e, i, o, u) Kienhiki, ki bhuala muthu lelu u tena kuzuela ni kidi kioso, se M’okulu kiebhi kia kexile mu xana o dijina, YHWH. Maji, o kuila kiki kieji tu fidisa ku tumbula o dijina dia Nzambi? Mu  izuua ia Jezú nange o dijina diê, akexile mu dixana Yeshua mba Yehoshua—se ko muthu ua kijidile. Né kiki, athu mu ngongo ioso, a tumbula o dijina dia Jezú mu ukexilu uéngi, kala muthu mu dízui diê. Ene ka kambe ku di tumbula, mukonda kejidile kiebhi kia kexile mu dixana m’okulu. Kiene kimoxi ué, se uia ku ixi iéngi, ua-nda mona kuila o dijina diê, a dixana kiéngi, mu dízui dia mukuá. Kienhiki, o ku kamba kuijiia se kiebhi kia kiexile mu kuixana o dijina dia Nzambi m’okulu, ki kia tokala ku tu fidisa ku di tumbula.

Lua kaiiadi, o kima kia mukuá kiene mu londekesa phala ku katula o dijina dia Nzambi mu Bibidia, kia lungu ni kijila kiokulu kia Jijudé. Saí athu mudiâ, a xikinine kuila, o dijina dia Nzambi, ka tokalele ku di tumbula. O kixikinu kiki kiéza, mukonda ene ka kexile mu tendela kiambote o kitumu kiki kia Bibidia, ki zuela kuma: “Kana ku tumbula dijina dia Jihova, Nzambi ié, mu kingoho; mukonda kua Jihova kà kamba kuêla uoso u tumbula o dijina diê mu kingoho.”—Makatukilu 20:7.

O kitumu kiki, kia fidisile ku tumbula o dijina dia Nzambi mu ukexilu ua iibha. Maji o kuila kia fidisile ué o ku tumbula o dijina didi ni ujitu? Kana. O asoneki, ia Bibidia ia Hebalaiku (mu “Kikutu Kiokulu”), ene oso exile jifiiele, a belesele o Kitumu kia Nzambi kia bhanene ku akua Izalaiele m’okulu. Ene ué akexile mu tumbula o dijina dia Nzambi. Mu kifika, ene a tumbula o dijina didi mu mikumbi iâ, ia jisálamu, iexile mu kuimba o abhezi, ni dízui dia suína. Katé ué Jihova Nzambi, ua longo o abhezi’ê, ku kola o dijina diê, o akua kixikinu a belesela. (Jisálamu 116:4; Ikalakalu 2:21) Mukonda dia kiki, o Jikidistá ja lelu, kala ni hele ia ku tumbula o dijina dia Nzambi ni ujitu, kála kia bhangele Jezú.—Nzuá 17:26.

Mu bhitulula o isoneku ia Bibidia mu madimi engi, kioso kia katula o dijina dia Nzambi, ia a te-mu o majina a ujitu, ene a té kituxi kia dikota. Ene a bhangesa kuila athu, a banza kuma Nzambi uala dikanga, ni kuila muéne ki muthu, maji o Bibidia i suínisa athu, ku kala ni “ukamba ua Jihova.” (Jisálamu 25:14) Xinganeka o dikamba diê dia kazola. O kuila enu mueji kala makamba, se ki uejidile o dijina diê? Kiene kimoxi ué, se athu a a suekela o dijina dia Nzambi, Jihova, kiebhi ene kia tena ku kala makamba a Nzambi? Lua kamúkua ué, se athu a kamba ku  tumbula o dijina dia Nzambi, ene ka tena kuijiia o dijimbuluilu diê. O dijina dia Ngana di jimbulula ihi?

Nzambi ua bhana o kijimbuluilu kia dijina diê, kua selevende iê, Mozé. Kioso Mozé kiebhula o dijina dia Nzambi, Jihova ua mu tambuijila: “Eme kala-dia-kala.” (Makatukilu 3:14) O mutongoluelu Rotherham’s ua ki lungulula kiki: “Eme ngi kala o kima ki nga-ndala ku kala.” Kiki kilombolola kuila Jihova u tena ku kala o kima kia mesena, phala ku kumbidila o vondadi iê.

Xinganeka kuila eie u tena ku kala ioso i ua mesena ku kala. Ihi i ueji bhanga phala o makamba mê? Se bhu kala muthu u kata, eie ueji bhiluka dotolo phala ku mu saka. Se mukuá u tala hadi, ni uadiama, eie ueji bhiluka mvuama phala ku zubha o uadiama uê. Mu kidi, eie kuala ni kutena phala ku kala ioso i ua-ndala ku kala. Kioso ki uia ni ku di longa o Bibidia, ua-nda diuana mu ku mona se kiebhi Jihova u tena ku kala, kabasa kima kia mesena, phala ku kumbidila o ikanenu iê. Muéne ki mu uabhela ku bhanga ioso, ni kutena kuê phala ió a mu zolo. (2 Malunda 16:9) O ukexilu iú uambote ua Jihova, ka uijiia kua ió a kambe kuijiia o dijina diê.

Mu kidi, o dijina dia Jihova dia tokala ku kala mu Bibidia. O kuijiia o dilomboluelu diê, ni ku di tumbula mu ubhezelu uetu, kikuatekesu kia dikota, phala ku tu zukamesa dingi kua Tata ietu ia diulu, Jihova. *