OMWA Biblia yawu, Esyonyimbo 83:18 habindwirwe hathi? E Biblia New World Translation of the Holy Scriptures yikabindulha omulhondo oyu wa yithya: “Neryo abandu baminye bathi, iwe wukahulhawa mwa Yehova, iwe musa wuli Endatha Kutsibu okwa kihugho kyosi.” Esindi mbindulha nyingi sye Biblia kwa sikana bindulha wa sithya. Aliriryo, esyombindulha nyingi sikasigha erina Yehova, erisubya omwa mwanya walyo mw’ebitsumbi nga “Omukama” kutse “ow’Erikotha.” Ekitholere erikolesibwa omwa mulhondo oyu niki? Ky’ekitsumbi kutse erina Yehova?

Omulhondo ono akakanaya okwa lina. Omwa mubughe w’Ekihebrania owakolesibawa bakasakanga ebitsweka bingi bye Biblia, erina ly’embaghane likabanika omwa mulhondo oyo. Likasakawa omwa syonzakano sy’Ekihebrania יהוה (YHWH). Omwa Lhukonzo, erina eryo lyasibwe nga “Yehova.” Mbwino erina eryo likabanika omwa mulhondo mughuma musa owe Biblia? Eyihi. Likabanika omw’Amasako aw’Ekihebrania aw’erimbere hakuhi mirundi 7000!

Erina lya Nyamuhanga ni ry’omubongo lithi? Thalengekania okwa musabe owa Yesu Kristo aha. Akatsuka athya: ‘Thatha wethu oyuli elhubulha, Erina lyawu libye libuyirire.’ (Matayo 6:9) Enyuma waho, Yesu mwasaba Nyamuhanga athi: ‘Thatha wulethe olhukengerwa okwa lina lyawu.’ Erisubamu, Nyamuhanga mwabugha inyane elhubulha athi: ‘Nabirihamyalyo kandi nasyaswahamyalyo.’ (Yoane 12:28) Kilhangirikire ndeke-ndeke, erina lya Nyamuhanga ni ry’omubongo munene kutsibu. Ibbwa kwesi, busana naki abandi babinduli babiri lhusya erina eri ry’omwa syombindulha syabu sye Biblia n’erisubya mw’ebitsumbi?

Hakabya nga hali nzumwa nkulhu-nkulhu ibiri. Ey’erimbere, abangi bakabugha bathi erina eryo siritholere erikolesibwa kusangwa enzobolha yalyo ey’erimbere siyasibwe munabwire. Ekihebrania ekyakera kyabya kikasakangwa isimuli nzoboli. Busana n’ekyo, sihali mundu n’omughuma munabwire oyuwanga minya ndeke-ndeke ngokwa abandu ab’omwa mughulhu we Biblia babya bakasobolha YHWH. Aliriryo, eki kyangana thukakirya erikolesya erina lya Nyamuhanga?  Omughulhu e Biblia yabya iyikina sakangawa, erina Yesu lyangabya iryabya likasobolhwa nga Yeshua kutse nga Yehoshua​—sihali n’omughuma oyuwasi ndeke-ndeke. Aliriryo, abandu omwa ekihugho kyosi munabwire bakakolesaya erina Yesu omwa nzira muthima-muthina, bakalisobolha ngoku lyasibwe omwa mibughe yabu. Sibali thathika-thika erikolesya erina eryo kundi sibasi ngoku lyabya likasobolhwa omwa kighonye ky’erimbere. Kuthya, wulya bungira omwa kindi kihugho, obundi wangana sangana erina lyawu erikasobolhawa mbaghane omwa wundi mubughe. Busana n’ekyo, erithendi minya ngokwa erina lya Nyamuhanga lyabya likasobolhwa kera, si nzumwa ey’erithendi likolesya.

Enzumwa eya kabiri eyikahebawa mughulhu wosi busana n’erilhusya erina lya Nyamuhanga ly’omwa Biblia w’omurwa w’Abayuda owa kera owa birighunza buthuku buuli. Abangi okw’ibo bak’ikiriraya bathi erina lya Nyamuhanga siritholere likahulhwa nahake. Erikirirya eri liseghemere okw’ikolesya nabi omughambo we Biblia owakabugha athi: ‘Isiwahulha erina ly’Omwami Mukulhu Nyamuhanga wawu ly’obusa kusangwa Omwami Mukulhu siendi syamughanza eribya butsira musangu, oyukahulha erina liwe ly’obusa.’​—Eriluayo 20:7.

Ekihano eki kikathanga erikolesya erina lya Nyamuhanga lya nabi. Aliriryo kikana thanga erikolesya erina liwe omwisikya? Eyihi nahake. Abasakangi be Biblia y’Ekihebrania (“Endaghano ya Kera”) abosi babya balhume abathaleghulha abakwama-kwamanaya Emighambo eya Nyamuhanga aha Abaisraeli abakera. Aliriryo, mughulhu wosi ibakakolesaya erina lya Nyamuhanga. Ng’eky’erireberyako, mubahiralyo omwa syonyimbo nyingi esy’imbawa n’abaramya bangi omwa mirenge minene. Nyamuhanga Yehova nibya mwabwira abaramya biwe eribya bakalhakira okwa lina liwe, n’abathaleghulha mubaligha. (Yoeli 2:32; Emibiri 2:21) Busana n’ekyo, Abakristayo munabwire sibali thika-thikira erikolesya erina lya Nyamuhanga omwisikya, ngoku Yesu akolha.​—Yoane 17:26, NW.

Ababinduli be Biblia bakasobaya kutsibu bakasubya omwa mwanya w’erina lya Nyamuhanga mw’ebitsumbi. Bakaleka Nyamuhanga inyabya ng’ali hali kandi nga si mundu, kandi ibbwa e Biblia iyinemuhana abandu “erinywana Yehova.” (Esyonyimbo 25:14, NW) Thalengekania oku munywani wawu w’okwandungu. Kwenene wangabya wuthi hakuhi nayu wamabya isiwuli wathaminya erina liwe? Kuthya, omughulhu abandu bakabya omwa buthaminya erina lya Nyamuhanga, Yehova, kwenene bangabya bathi hakuhi na Nyamuhanga? Eryongera okw’ekyo, omughulhu abandu bathe kolesaya erina lya Nyamuhanga, nabu sibali minya ekya likamanyisaya. Erina lya Nyamuhanga likamanyisaya ki?

 Nyamuhanga iyuwene-wene mwasoborera ekya lina liwe likamanyisaya okwa mughombe wiwe omuthaleghulha ya Musa. Omughulhu Musa anza eriminya erina lya Nyamuhanga, Yehova mwasubirya athi: “Nyine oyo Nyine.” (Eriluayo 3:14) Embindulha ye Rotherham yikabugha yithi: “Ngendi syabya ekyanga nzire eribya.” Kwesi Yehova anganabya ekyanzire eribya nuku aberereraye ebighendererwa biwe.

Thubughe thuthi wanganabya ekya wanzire eribya. Wanga kolera banywani bawu baki? Omughuma okw’ibo amalhwalha kutsibu, iwukendibya muthahwa neryo iwamulhamya. Owundi amabya nzama, iwukendibya mughuda neryo iwa muwathikya. Nomwakine, ekwenene yiri yithi, siwanga thoka eribya ekya wanzire eribya. Ithwe abosi kwa thune thuthya. Wukendibya wune mw’igha e Biblia, wukendi sweka wukalhangira ngoku Yehova akabya kyosi-kyosi ekyanzire eribya nuku aberereraye emilhaghe yiwe. Kandi kikamutsemesaya erikolesya akaghalha kiwe okw’abo abamwanzire. (2 Emyatsi y’Emigulu 16:9) Emighuma okwa mibere mibuyanga eyi eya Yehova, siyiri minyawa n’abandu abathasi erina liwe.

Ahathe erithika-thika, erina lya Yehova litholere irya kolesibwa omwa Biblia. Eriminya ekya likamanyisaya n’erilikolesya buthubaha omw’iramya lyethu, ni buwathikya bw’akaghalha omwi yithunda hakuhi na Thatha wethu w’elhubulha, Yehova. *