MƆ TIN DƐN FƆ NO
Aw fɔ Yuz Gɔd in Nem ɛn Wetin I Min?
INSAY yu Baybul, aw dɛn translet Sam 83:18? Insay di New World Translation of the Holy Scriptures Baybul, da vas de se: “Lɛ pipul dɛn no se yu, we nem Jiova, na yu wangren de oba ɔlman na di wɔl.” Ɔda Baybul dɛn bak yuz Jiova ɔ Yawɛ na dis vas. Bɔt, bɔku Baybul dɛn nɔ yuz di nem Jiova, bɔt yuz taytul dɛn lɛk “Lɔd” ɔ “Gɔd.” Na wetin fɔ de insay dis vas? Na taytul ɔ na di nem Jiova?
Gɔd in nem insay Ibru lɛta dɛn
Insay dis vas, na nem dɛn de tɔk bɔt. Insay di Ibru langwej we dɛn yuz fɔ rayt bɔku pat na di Baybul, na wan spɛshal nem dɛn yuz insay dis vas. Dɛn spɛl am יהוה (YHWH) insay di Ibru langwej. Insay Krio, dɛn kin kɔl am “Jiova.” Na ɔmɔs tɛm dis nem de na di Baybul? I de lɛk 7,000 tɛm so frɔm Jɛnɛsis to Malakay!
Yu tink se Gɔd in nem impɔtant? Fɔ ansa da kwɛstyɔn de, lɛ wi tɔk bɔt di prea we Jizɔs bin sho in disaypul dɛn. Di fɔs tin we i tɔk na di prea, na: “Papa Gɔd we de na ɛvin . . . mek ɔlman pre to yu ɛn ɔna yu [“nem,” NW].” (Matyu 6:9) Dis dɔn sho klia wan se Gɔd in nem impɔtant pas ɛnitin. Bɔt, wetin mek sɔm pipul dɛn we translet di Baybul, nɔ yuz Gɔd in nem?
Na tu men rizin mek dɛn du dat. Fɔs, bɔku pipul dɛn se i nɔ fayn fɔ yuz Gɔd in nem bikɔs nɔbɔdi nɔ no di kɔrɛkt we aw dɛn bin de kɔl am. Di Ibru langwej nɔ bin gɛt vawɛl dɛn. So tide, nɔbɔdi nɔ no di kɔrɛkt we aw dɛn fɔstɛm pipul dɛn bin de kɔl YHWH. Bɔt yu tink se dis fɔ mek wi nɔ yuz Gɔd in nem? Trade we dɛn rayt di Baybul, di we aw dɛn bin de kɔl di nem Jizɔs, na Yɛshwa ɔ Yɛoshwa. Nɔbɔdi nɔ no di kɔrɛkt we aw dɛn bin de kɔl am. Bɔt tide, pipul dɛn gɛt difrɛn difrɛn we dɛn fɔ kɔl Jizɔs insay dɛn langwej. Dɛn nɔ lɛf fɔ yuz di nem bikɔs dɛn nɔ no di kɔrɛkt we aw dɛn bin de kɔl am trade. Semweso, if yu go na sɔm kɔntri dɛn, yu go si se di we aw dɛn de kɔl yu nem difrɛn frɔm di we aw yu de kɔl am. So, nɔto bikɔs pipul dɛn nɔ no di kɔrɛkt we aw fɔ kɔl Gɔd in nem, go mek dɛn nɔ yuz am.
Di sɛkɔn tin we mek dɛn nɔ yuz Gɔd in nem na dɛn Baybul, na bikɔs di Ju pipul dɛn bin biliv se pɔsin nɔ fɔ ɛva kɔl Gɔd in nem. Dɛn biliv dis bikɔs dɛn nɔ bin ɔndastand wan lɔ na di Baybul we se: “Una nɔ fɔ tek PAPA GƆD we na una Gɔd in nem mek ple ple bikɔs PAPA GƆD nɔ go tek am layt wit ɛnibɔdi we tek in nem mek ple ple.”—Ɛksodɔs 20:7.
Dis lɔ tɔk se wi nɔ fɔ yuz Gɔd in nem ɛnikayn we. Bɔt yu tink se dat fɔ mek wi nɔ yuz Gɔd in nem atɔl? Nɔ, i nɔ fɔ bi so! Di wan dɛn we rayt frɔm Jɛnɛsis to Malakay, na fetful pipul dɛn we bin de obe di Lɔ we Gɔd bin gi di Izrɛlayt dɛn. Bɔt dɛn bin de yuz Gɔd in nem plɛnti tɛm. Fɔ ɛgzampul, dɛn bin yuz am we dɛn bin de rayt di Sam dɛn we pipul dɛn bin de siŋ fɔ wɔship Gɔd. Jiova Gɔd bin tɛl in pipul dɛn fɔ kɔl in nem, ɛn di wan dɛn we fetful to am bin obe. (Joɛl 2:32, NW; Di Apɔsul Dɛn Wok [Akt] 2:21, NW) So, Kristian dɛn tide nɔ de fred fɔ yuz Gɔd in nem wit rɛspɛkt, lɛk aw Jizɔs bin de du.
Di rɔng tin we sɔm pan di wan dɛn we translet di Baybul du, na we dɛn nɔ yuz Gɔd in nem bɔt dɛn yuz taytul. Dɛn kin mek pipul dɛn tink se mɔtalman nɔ go ebul kam nia Gɔd, bɔt di Baybul de tɛl ɔlman fɔ ‘mek Gɔd dɛn padi.’ (Prɔvabs 3:32) Tink bɔt yu ɛn yu tayt padi. Yu tink se una bin fɔ bi tayt padi if yu nɔ bin sabi in nem? Semweso, if pipul dɛn nɔ no se Jiova na Gɔd in nem, aw dɛn go ebul fɔ kam nia am? Apat frɔm dat, pipul dɛn nɔ go ebul fɔ ɔndastand di fayn minin we Gɔd in nem gɛt if dɛn nɔ de yuz am. Wetin Gɔd in nem min?
Gɔd insɛf bin tɛl Mozis wetin in nem min. We Mozis aks Gɔd bɔt in nem, Gɔd tɛl am se: “A GO BI ƐNITIN WE A WANT FƆ BI.” (Ɛksodɔs 3:14, NW) So Jiova ebul fɔ bi ɛnikayn tin, so dat i go ebul fɔ du wetin i want, ɛn i kin mek tin apin di we aw i want mɔ we i kam pan di tin dɛn we i dɔn mek ɛn wetin i want fɔ mek i bi.
Lɛ wi se, yu ebul fɔ bi ɛnikayn pɔsin we yu go want fɔ bi, wetin yu go du fɔ yu padi dɛn? If wan pan dɛn gɛt bad sik, yu go bi gud dɔktɔ ɛn mɛn am. If ɔda wan in mɔni dɔn, yu go bi jɛntriman ɛn ɛp am. Bɔt yu nɔ go rili ebul fɔ bi ɔl wetin yu go want fɔ bi. Na so ɔlman de. As yu go de stɔdi di Baybul, yu go sɔprayz fɔ lan aw Jiova kin bi ɛnitin we i want so dat i go du wetin i dɔn prɔmis. Ɛn i kin gladi fɔ yuz in pawa fɔ ɛp di wan dɛn we lɛk am. (Sɛkɛn Krɔnikul 16:9) Di wan dɛn we nɔ no Jiova in nem, nɔ go ebul fɔ no ɔl dɛn fayn fayn tin ya bɔt am.
Dis dɔn sho wi klia wan se Gɔd in nem fɔ de insay di Baybul. We wi sabi wetin di nem min ɛn yuz am, dat go ɛp wi fɔ kam nia wi Papa we de na ɛvin, we nem Jiova. *
^ par. 12 If yu want no mɔ bɔt Gɔd in nem, wetin i min, ɛn wetin mek wi fɔ yuz am, na fɔ rid wan buk we dɛn kɔl The Divine Name That Will Endure Forever. Na Jiova Witnɛs dɛn mek am. Rid bak Appendix A4 na di New World Translation we dɛn mek insay 2013.
You May Also Like
ESSENTIAL BIBLE TEACHINGS
Yu Tink se Gɔd Gɛt Nem?
Gɔd gɛt bɔku taytul dɛn lɛk Ɔlmayti, di Wan we mek ɔltin, ɛn Lɔd. Bɔt Gɔd in rial nem de insay di Baybul fɔ lɛk 7,000 tɛm so.
